"إلا أن يشاء الله"

الجزء الاخير "القسم الثاني"

✒...
"مش عارفه خيرها من لما روحت من المراجعه وهي راقده في الدار ماتكلمتش معاي بكل"
مروة بضيق:بالك تعبانه من المشروع ودوشته..
جميله بقلق:قداش ليها مكمله خدمه ع مشروعها يامروة..لالا اختك اشبح خيرها..اتصلي بيها شوفيها هدرزي عليها..
مروة تنهدت بضيق وقالت:ان شاء الله ماما..لما تفيق ابعتيلي رساله ع الماسنجر..
جميله:باهي..هي بالسلامه توا..
مروة:بالسلامه..
وصكرت جميله ومشت للدار تشوف دعاء لقتها مازال متغطيه وراقده...تنهدت بقلق بعدين مشت لدار النوم...
⚘⚘⚘⚘
خش للحوش...
وصوت تليفونه يرن وهو مش مهتم ليه..
كان سرحان ويفكر..
وفي عيونه محبوسه دمعه..
وع وجهه مرسومه ملامح الضيق..
مشي للدروج وركب وخطواته كانت متثاقله..
لعند ماوصل فوق..كان حيتجه لداره..
بس بعدين غير رايه وتوجه لدار احب انسانه ع قلبه في الدنيا..
مشالها وخشلها..كانت الدار هادي هي المكان الوحيد اللي اثاثه قاعد زي ماهو..لأن قبل مايبيعه خدي الأثاث كله وحطه في حوش اخته نجلاء...ريحة امه وحاجته مايقدرش يفرط فيهم..
مشي طول قعمز ع السرير بعدين انطرح عليه بتعب..
وجه نظره للسقف وهو مازال يفكر..ويتفكر..
<< ايه غلط..لانك ماتعرف عني شي..ماتعرفش اني مريت بتجارب فاشله دمرتني..مرة خطبت وفسخت..ومرة انقرت فاتحتي واطلقت قبل العرس..في المرتين اني اللي طلبت الانفصال لان اختياراتي كلها غلط..كرهت سيرة الزواج وصارلي رهاب منه..وانت اصلا بروحك توا بعد عرفت هدا كله حتغض النظر عنه مني اني..
لهدا يادكتور برا شوف وحده تصلح بيك اكثر مني...>>
قعد يذكر في ملامح وجهها وهي تتكلم دموعها اللي كانوا ع حافة جفونها..رجفة صوتها وهي تتكلم..ايديها وهي شادة ع قبضاتهم بقوة..
ولما ناضت بسرعه هاربه بدموعها..واضح انها كانت ماتبيش تضعف اكثر من هكي قدامه..
عرف وقتها ان قلب هالإنسانه مكسور ومازال ماانجبرش..
وانها مجروحه جروح بليغه مازال مابرتش..وان الحزن واخد حيز كبير في حياتها..
زيه هو بالزبط...حس وقتها ان اكثر شي شده ليها هو نظرة عينها اللي كان الحزن مسيطر حتى وهي تبتسم زيها زي نظرة عينه هو بالزبط..
بدون مايشعر وفي عز تفكيره بيها..ستار عيونه نزل وصكرهم..وراح في نوم عميق..
⚘⚘⚘⚘⚘⚘
بعد المغرب..
طلعت دعاء من الصاله بعد ماكانت تصلي فيها وتقرا في القرآن ومشت بطريقها للدار..
لما خطمت من قدام الكوجينه امها شافتها..مشت طول بعتت لاختها مروة رساله ع الماسنجر..
فهالوقت..
كانت دعاء في الدار..
علقت ملاية الصلاة ع الشماعه..بعدين فتحت دولابها وبدت اضم فيه برغم انه مرتب بس هي هكي تبي تشغل نفسها وماتبيش تذكر اللي صار..
شويه ورن تليفونها..
سيبت اللي فيدها ومشت خداته من فوق التلفزيون لما شافت اسم مروة..فتحت الخط وهي مبتسمه وردت..
دعاء:السلام عليكم مروة شن حالك..
مروة:وعليكم السلام دعاء الحمد لله..شن جوك انتي..
دعاء:تمام ماشي الحال..شن جو السنافر..
مروة:اهو جو الشطانه والكلب..
ضحكت دعاء وقالت:سلامتهم..تعالوا غدوة مروة استاحشناكم..
مروة:تو نشوف الياس كان ماعنده شي تو نجو بإذن الله من الصبح...
دعاء بإبتسامه:إن شاء الله..
مروة:ايه شن جوك دودي..
تبدلت ابتسامتها بملامح الحزن وقالت:مش تمام بكل والحمد لله على كل حال..
مروة بقلق:دعاء شن صار في المراجعه!؟.
خنقت دعاء العبره وهي تقول..
"قلبي يوجع فيا يامروة.."
⚘⚘⚘⚘⚘
طلع من الجامع..
ومشي طول ركب سيارته..وتحرك بإتجاه حوش اخته..
ع طريقه وقف خدي حاجات للصغار وليها زي ماتعود..
كانت زيارته ليها مفاجئة ماقاللهاش بيجي عكس ماتعود..
بس اهم شي انه تاكد من عدم وجود راجلها في الحوش..
⚘مرحبتين بوخيي الغالي مرحبتين..
هادي نجلاء وهي تستقبل في خوها وتسلم عليه بالأحضان..
بعدين جو  صغارها سلموا ع خالهم...عطاهم شن جايبلهم وهدرز عليهم شويه..بعدين مشي هو واخته لصالون حوشها قعمزوا فيه..
نجلاء:نحطلك تتعشا؟
جمال:لالا..قعمزي نبيك..
نجلاء عقدت حواجبها بأستغراب وقالت:خير حبيبي؟.
جمال تنهد بعدين وزع نظره ع المكان وقال:مش عارف كيف بنحكيلك..من وين بنبدا مش عارف..
نجلاء بقلق:حسني خفت جمال .
جمال شبحلها وابتسم ابتسامه خفيفه اطمنها وهو يقول:مافي شي يخوف..بعدين تنهد من اعماق قلبه وقال..غير خوك شكله بعد السنين هادي كلها طاح مرة تانيه وباين عليها طيحة قويه..خلتين في مرتين شفتهم فيها نبي نتزوجها..
ضحكت نجلاء بفرح وقالت:من هي هادي اللي انحلت العقده ع ايديها!؟
ضحك بعقدة حواجب وقال:قصدك اني معقد..
نجلاء:هههههه..مش بالزبط..
تنهد بإبتسامه وقال:لكن الحكايه معقده شويه...
ضيقت عيونها وقالت:كيف؟
شبحلها شويه..بعدين بدي يحكي...
⚘⚘⚘⚘
"علاش درتي هكي"
دعاء:بندير هكي مالا شنو هو ماكان يعرف عني شي واكيد بعد عرف خلاص يخط عليا بالأحمر...
مروة:علاش تحسسي انك معيوبه!! انتي اطلقتي وانتي مازال قاعده بنت راهو يعني زيك زيه بالزبط في حكم العزابه..
دعاء:عندك انتي يامروة اما عند الناس اني مطلقه سوا كنت بكر او ثيب"سبق لها الزواج"..
مروة بأسف:خساره يادعاء كان عطتيه فرصه مادامه ناوي الحلال علاش تصكري فيها هكي طول..
نزلوا دموع دعاء وهي تقول:تزيدي فيا على مابيا يامروة راهو..
مروة:معليشي دعاء لأن دمي انحرق..مش عارفه علاش برغم انك قريبه لربي بطرتي ع نعمته وردتيها يادعاء مش واثقه في ربي انه يعوضك عوض لايخطر ع بالك ولاخاطرك..وينه ايمانك يادعاء..
دعاء سكتت معاش عرفت شن ترد..
مروة:دعاء ياحبيبتي في ارامل ومطلقات بصغارهم خدوهم عزارى وعايشين معاهم احلى عيشه..علاش انتي نشوفي فهالشي ممنوع عليك ومايصيرش..
دعاء بنبرة باكيه :اني خايفه يامروة..
مروة:خايفه!!خايفه من ربي يخذلك!! هو ربي اللي تعرفيه يامروة يخذل المؤمن بيه..
دعاء حطت يدها ع فمها وشدت عبرتها..
مروة:دعاء حبيبتي..احسني الظن بالله راهو ربي عند ظن عبده بيه..لو ظنيتي ان ربي حيعوضك اجمل عوض عن اللي ريتيه كله في حياتك صدقيتي حيعطيك ضعف ظنك يادعاء..معاش تخافي وانتي مع ربي معاش تخافي يادعاء..وين صلاتك وين قرايتك للقرآن وين ذكرك يادعاء هدا كله مادار فيك شي!!؟
دعاء رشفت وهي تقول:استغفر الله العظيم..بس توا خلاص هدا اللي صار .
تنهدت مروة وقالت:مرات ربي مش كاتب نصيب..لكن الموقف هدا نبيه يعلمك في الجديد ردي بالك تكرري نفس التصرف..
دعاء غمضت عيونها بألم وقالت؛ان شاء الله..
دعاء..
نتكلم وفي داخلي حسرة ع الدكتور جمال كنت نادمه اشد الندم اللي تصرفت هكي..كان ممكن لو حكيتله اللي صار معاي بدون مانصكرها في وجهه راهو تفهم لأني حسيت انه انسان متفهم وراقي هكي حسيت..وممكن الموضوع انتهي نهاية حلوة..لكن قلت في نفسي وقتها..ان جمال زيه زي كل اللي مروا في حياتي اشخاص عابرين خلوا اثر فيا ومشوا وبرغم انه هو واضح كان يختلف عنهم هلبه هلبه..لكن خلف نفس النوع من الأثر...جرح جديد...
⚘⚘⚘⚘⚘⚘
في اليوم التالي..
بعد العصر..
في حوش نجلاء كانوا الخوات ملتمات بعد ان طلبت منهم اختهم الكبيره الحضور لأمر مهم..
مابتش تلمحلهم حتى التلميح بس هما بروحهم عرفوا ان الموضوع يخص خوهم جمال..
نجلاء:ماشفتاش في الحاله هادي بكل حتى مع منال..
رجاء بدهشه:سبحان الله البنيه نفسها !؟
نجلاء:شوفي الصدف..
آلاء:مش صدف عاديه هادي ربي مقدر بيصير شي..
عطاء:مافهمتش انتم علاش متحمسات للموضوع والباين انه عاجبكم..
شبحولها بإستغراب..
نجلاء:وعلاش مايعجبناش مادام خونا عاجبه..
عطاء:وخونا شن ناقصه بش يصيم ويفطر ع وحده مطلقه وعمرها فايت التلاتين!!
فنصوا فيها نجلاء وآلاء بصدمه..
بينما رجاء ابتسمت بتهكم وقالت:ايه عندك حق جمال عزري كيف ياخد وحده تزوجت قبله عيب..حرام..مايجيش..
عطاء انطمست مرة وحده..راحت عن بالها اختها رجاء..
ناضت رجاء وقالت:والله لما نوقف معاه ونساعده لين يوصل فيها ونقنعها توافق ياعطاء..بدر..مروان..هيا بنروحوا..
ناضت نجلاء شدتها من ذراعها وهي تقول:رجاء صلي ع النبي وقعمزي..
عطاء بضيق:والله مانقصدك يارجاء..
رجاء شبحتلها بتضييقة عيون وهي تقول:ماتقصدنيش!!؟ علاش اني شن فيا زايد عليها!؟ اصلا وضعها هي خير من وضعي لما خداني اسامه العزري ياعطاء..وباسف تابعت تقول..خسارة ياعطاء مانحسابكش هكي..
نفضت ذراعها من نجلاء ومشت خدت بنتها اللي كانت راقده ع الفراش..
نجلاء:رجاء!!
آلاء:خلاص رجو تعوذي من الشيطان وقعمزي عطاء مش قصدها..
ورجاء مابتش تعدل عليهم وهي تنادي:بدر مرواان..
جوها الزوز..
بدر:مازال مانبيش نروح..
رجاء بعصبيه:لابتروح اطلعوا قدامي هياا..
نجلاء:كان درتيها وطلعتي يارجاء معاش تكلمني بكل وحوشك معاش خاشتله..
مجرد ماوصلت للباب وقفت..بعدين التفتت لنجلاء شبحتلها شويه..بعدين مشت ببنتها متوجه لوحده من الديار..
نجلاء مشت للولاد وقالتلهم:بروا كملوا لعب حبايبي..
والولاد مشوا طول لولاد خالتهم..
اما نجلاء مشت لحقت رجاء..
عطاء بضيق:والله ماقصدي الزفت نسيتها بكل..
آلاء حركت راسها يمين ويسار بأسف وهي ساكته..
⚘⚘⚘
"تعرفيها انتي عطاء كلامها ديما دج"
رجاء بنبرة باكيه:لكن وجعني هلبه يانجلا..
نجلاء:مادوريش المهم انتي راضيه عن نفسك ومرتاحه مع اسامه ولا..زي ماطنشي في خواته وتلقيحهم طنشي تفتفيت عطاء..
مسحت رجاء دموعها وهي تقول:باهي خلينا في جمال توا..كيف يصير فيه..
تنهدت نجلاء وقالت:قالي بيدور عليها مش حيحول الموضوع من راسه..
ابتسمت من بين دموعها:يعني مصر عليها؟
نجلاء بإبتسامه:اشبح شن دارت فيه هالبنيه قلباته قلب..
رجاء بضحكه:السحر في جبهتها شكله..
نجلاء:ههههههه..قريده..
ورجاء تمسح في دموعها وتضحك..
⚘⚘⚘⚘⚘
"السلام عليكم.."
الممرضه بإبتسامه:وعليكم السلام...اهلا دكتور جمال..
جمال:اهلا بيك..بالله منيره نبي منك طلعيلي رقم حاله جت عاينت عندي اسمها دعاء محمد سالم..
الممرضه:حاضر..
وبدت تلعب ع ازرار جهاز الحاسب..ودور في الاسماء لين عترت اسم دعاء والرقم..
الممرضه:اهو رقمها..
قام جمال تليفونه وقال:شن هو؟
وبدت الممرضه تمل في الرقم..وسجله جمال بعدين قال:شكرا..ومشي...
الممرضة:العفو..وقعدوا معاه بعيونها لين درق وفي راسها هلبه اسئله من حب الفضول..
⚘طلع جمال من العياده واتصل بالرقم طول.
حط التليفون ع وذنه وقعد يراجي وهو متوتر..
........
في الطريق ..
كان مؤيد من الجامع مع بوه بعد ماكانوا يصلوا في العصر..
فجأة رن تليفونه..
طلعه من جيبه وفتح الخط وقال؛ايوه..
استغرب جمال وقال بشي من الربكه:هدا رقم صالح ولا؟
مؤيد:لاخوي انت غالط..
جمال :اها..اسف خوي سامحني..السلام عليكم...وصكر
مؤيد نزل التليفون وحطه في جيبه..
محمد:قولي شن جو الخدمه..
مؤيد:والله ماشيه يابوي الحمد لله..كان نحكيلك ع الموقف اللي صار امس قدام المصرف..
محمد:ان شاء الله خير...
وبدي مؤيد يهدرز ومحمد يتفاعل معاه ويهدرز لعند ماوصلوا للحوش..
لقوا سيارات الياس ومحي مدرسات قدام الباب..
مؤيد:اوو فاروق وماريه..
ضحك محمد..بعدين فتح الباب وخشوا هما الزوز..
توجهوا للمربوعه طول وين مامقعمزين النسابه يشربوا في العصير..وبدي السلام والترحيب..
بعدين قعمز محمد ومؤيد خش الكوجينه لقي امه فيها وقال:شن جابت مروة..
جميله بضحكه:كيكة الكراميل..
ابتهج مؤيد وهو يقول:خوشييي..
ضحكت امه وقالت:حتى وفاق دايره دونات..
مؤيد:ياودي بعد مروة في الحلو مافيش..
بعدين مشي طلع من حداها وتوجه للدار وهو يسمع في اصوات خواته وهدرزتهم وهدرزة ماريه وعمر..
خش عليهم وهو يقول:اوووو...
ناضوا مروة ووفاق وهما يضحكوا قدموله وسلموا ع بعض..
وماريه شاده في رجله وتنقز..
وعمر قام فاروق في غمره وهو يضحك ع مؤيد كيف يتسهوك ع وفاق وهي تضرب فيه..
دعاء..
واني نتفرج عليهم ونملي فعيوني كنت نبي ننسى اللي جمال ولو شويه ونبطل تفكير فيه..اااه..وخلاص..اول مرة نحس بقلبي يوجعني لهالدرجه..شن دار فيا في تلاته مرات اللي ريته فيهم مش عارفه..
⚘⚘⚘⚘⚘
"رقم واحد اسمه مؤيد سالم"
جمال وهو يتكلم بالتليفون؛تمام بكل بارك الله فيك محمود
..........ان شاء الله ان شاء الله...السلام عليكم...وصكر..
ضرب بيده اللي شاد بيها التليفون الدومان وع وجهه ملامح الإنزعاج ممزوجه بالأسف وقال: رقم خوها شكله..تس...
بعدين شغل السيارة وتحرك...
⚘⚘⚘⚘⚘
مروة:والله ياماما مادرتلها حاجه هي اللي جاها جاها حطت راسها من راسي..
دعاء:ناغرة منك شكلها..
مروة:كل شويه تقول الياس قبل ماكانش هكي وتوا تغير اللي محرمه علينا حللهولك..
وفاق:اللي يسمع يقول مخليك تلبسي فري..وعندك التلفزيون..
مروة:هدا الهم هو هما عايشين حياتهم كيف يبوا عمري ماريته فارض عليهم حاجه..صح ينصح لكن مايجبر فيهم على شي..
جميله:معامله الياس ليك قدامهم هي اللي خلتها هكي حتى هو ربي يهديه يحاول يشد روحه شويه..
وفاق:شن تبيها يهزبها بش ترضى ست الحسن..سحيقه حموات الهم..
جميله:وانتي خيرك حامقه!؟
وفاق:حتى اني عندي نفس العينه بعد حملت محي ولى يدلل فيا بزايد واللات مش عاجبهم..
دعاء:تو اني نبي نفهم علاش هالغيره الفارغه هادم خواته وهادي مرته..معقوله تغير عليه من مرته شن هالمرض هدا!!؟
جميله:اغلب الحموات مريضات وعمتكم شرقيه خير مثال..برغم اني والله لاعمري غرت من نساوين خوتي ولااضايقت من معاملة خوتي الباهيه ليهم بالعكس الله نفرح من قلبي وين نشوف وخيي ومرته متهنيين ومتريحيين..
مروة:ان شاء الله حتى حني مانديروش هكي لنساوين عمر ومؤيد..
دعاء:لالا حني مش متربيات ع الأنانيه والخبث والحسد والحمد لله..اهم شي عندي انهم يحترموا بوي وامي ويتعاملوا معانا بإحترام..اما حياتهم الشخصيه مالياش بيها اي دخل..يجيبولهم مايجيبولهم يرفعوهم وين مايرفعوهم مادامهم متفهمين مع بعض مادخليش بيهم..
جميله:عاملوا بنات الناس كيف ماتبوا متاعينكم يعاملوكم..هو هدا..
دعاء:هدا الصح..
⚘⚘⚘⚘⚘
درس سيارته في الساحه اللي كانت فيها صدفة اول لقاء..
نزل ..وصكر الباب..
ومشي طول خشلها..
وبدي يمشي...ويذكر في تفاصيل اللي صار يومها..
لعند ماوصل في المكان اللي خبطها فيه..
بين عيونه نظرة عيونها ليه لما انفتحوا فجأة..
في هديكا اللحظه حس وكأن عيونها بنظراتهم..شمس زرقت ع ظلام قلبه اللي دام سنين وسنين..
ايه هو مايعرفهاش كويس..
ايه هو ماراهاش الا تلاته مرات..
بس في المرات مع المحادثات القصيرة اللي دارت بينه وبينها قدرت تاخد عقله وتخش قلبه..
وكأن ليه سنين يعرفها..
ممكن لأن الله سبحانه حط حبها في قلبه من زمان وكان هالحب زي الفراشه قبل تطلع من شرنقتها...ماتطلع قبل اوانه..
ماتطلعش...إلا ان يشاء الله..انها تطلع..
وشاء الله...وطلع هالحب من اول لحظه جمعت بينه وبينها..
وقف في نقطة اللقاء...تنهد من قلبه وقال...
إن العيون التي في طرفها حور..
قتتلنا ثم لم يحيين قتلانا...
يصرعن ذا اللب حتى لاحراك به..
وهن أضعف خلق الله اركانا..
⚘عقد حواحبه وضحك ضحكه خفيفه..
بعدين تابع طريقه بس هالمرة جري مش مشي..
⚘⚘⚘⚘⚘
الساعه الحادية عشرة ليلا..
فم الباب..
مروة:توا فكري في يوم المناقشه بس دودي..
دعاء:بتجي ولا .
مروة:طبعا زنيت ع الياس زنين اهل الارض بش وافق..
ضحكت دعاء..
ع جية مؤيد:طلع الشيخ يامروه..
مروة:هيا هي..نشوفك على خير وسلموا ع بعض بالخد..
بعدين صافحت مؤيد ونزلت خمارها ومشت
طلعت من الحوش ولحقها مؤيد يسقد فيها..
اما دعاء تنهدت وخشت داخل ومازالوا قلبها وعقلها مشغولين..
توجهت طول للحمام..توضت وطلعت لبست ملايه الصلاه..
ومشت للصاله..صلت ركعتين..بعدين قعمزت وخدت المصحف وبدت تقرا في سورة البقرة..
دعاء..
اخذها بركه...والله بركه في كل شي في الحياه..
وتركها حسرة..اي حد يسببها بعد ماكان محافظ عليها حيتحسر ع بركتها اللي خسرها..
ولايدركها البطله...معاها بإذن الله لايوصل فيك سحر ولاساحر وكيده لن يفلح..
نقراها نرتاح..وصدري ينشرح..بس هالمره قريتها ودموعي تنزل كان احساسي فهديكا اللحظه ان ربي يشوف لدموعي وهدا شي مفروغ منه..ومتأكده انه بلطفه حيبدلها لدموع فرح..ع فكرة اني نحب دموع الفرح هلبه...ودعيت من قلبي لما وصلت في آية "إن الله على كل شي قدير" ان ربي يبكيني فرح في القادم من حياتي..
🌻🌻🌻🌻
وانصرم شهر يناير..
وفي اخر ايامه..
كان حال جمال متغير هلبه..
باله مازال مشغول..وديما وين يقعمز في مجمع يسرح..
وخواته ملاحظات حاله اللي تغير هلبه وخاطرهم يساعدوه..
بالذات رجاء..
في جنان حوش العيله...
كان مقعمز هو وياها يهدرزوا..
رجاء:باهي انت ماتعرفش عنها معلومات تانيه؟
جمال تنهد بضيق وقال:للأسف لا..حتى الآسم اللي عطاته مافيشي لقت يدلني عليها..ميه وحده تلقيها بهالأسم..
رجاء:تس..باهي جربت تمشي للساحه مرة تانيه بالك تصدف وتلقاه..
جمال:مشيت مرات ومرات حتى بوها وامها معاش جو..
ضم رجاء شواربها لداخل بضيق بعدين قالت:باهي هي ماقالتش قدامك حاجه مميزة..ممكن ادلك ع شي..
هو قعد يشبح للفراغ ويحاول يتفكر..
<< :انتي علاش تقعدي ساعات طويله ورا اللاب توب؟!
دعاء:نخدم ع مشروع تخرجي..
ابتسم وقال:بالتوفيق ان شاء الله..
دعاء بإبتسامه يشوبها شي من الخجل:ان شاء الله..شكرا..
هو ضحك وقال:فاهم عليك..امم..باهي يا..دعاء انتي شن تخصصك؟!.
دعاء قلبها بدي يدق بالقوة جاوباته وقالت:هندسه..>>
فتح عيونه ع وسعهم وقال بضحكه:هندسه!!
شبحتله رجاء بإستغراب..
جمال ضحك تاني ومسح بايديه ع شعره ووخره للخلف وهو يقول:ايه قالت مشروع تخرجها تخدم ع مشروع تخرجها وتقرا في الهندسه..ههههههه..
هي ضحكت بحماس وقالت:خلاص انحلت..
جمال:ههههههه..كيف نسيتها وراحت عليا مش عارف..
مسح بيده ع لحيته وقال بضحكته:خوك شكله كبر يارجو ومعاش يركز كويس..
رجاء ضحكت وبعدين قالت:شيخ الشباب انت اصلا عمر الاربعين احلا عمر للراجل..قمة في النضوج والرشد..
ضحك بعدين حط يده ع شعرها وشفشفه وهي تضحك...
⚘⚘⚘⚘
فبراير 2021...
في كلية الهندسه..
كان يوم مناقشة دعاء اللي كانت مغلقه بسبب وباء الكورونا..
بس خوتها وامها كانوا موجودين..
دعاء..
من اجمل ايام حياتي هداكا اليوم...لين نموت مش حننساه..
⚘⚘⚘⚘⚘
كانت دعاء واقفه ع الدكتورة وتتناقش هي وياها..
وامها وخواتها مقعمزات وعمر ومؤيد واقفين عليهم..
جميله:ربي يفتح عليها بنيتي وينجحها يارب..
كلهم قالوا :آمين..
بعدين وزعت وفاق نظرها ع المكان لعند ماثبت ع حد تشوف فيه جاي من بعيد شبهت عليه في الأول..
لين بدي يقرب وتأكدت مزبوط..
ناضت وقفت وهي تقول بفرحه:رويدا!
كلهم شبحوا وين ماتشبح..
واولهم دعاء اللي مشتلها طول تجري..ورويدا جتها تجري..
ولما تلاقوا مع بعض حضنوا بعض بقوة..
رويدا بضحكه ودموعها ينزلوا:راك تقولي خلعتك..
دعاء بدموع ونبره فرح:واحلا خلعه والله العظيم..
بعدين بعدوا عن بعض وسلموا بالخد..
وبعدها سلموا ع رويدا باقي افراد عيلتها..
ومشت معاها للدكتورة بش تسلم عليها..
الدكتورة:تغيرتي هلبه رويدا..
رويدا بضحكه:للأحسن اكيد..
ضحكوا الدكتورة ودعاء وجاوبت الدكتورة تقول:اكيد..بس راهو مشروع اختك خير من مشروع..
حاوطت اختها من وسطها وحطت راسها ع كتفها وقالت:دودي نبيها تكون احسن مني في كل شي..
ضحكت دعاء ودموعها نزلوا..
والدكتورة بإبتسامه قالت:ربي يخليكم لبعض..
الزوز قالوا:آمين..
شويه وقالت الدكتورة:هيا دعاء..
خدت دعاء نفس وقالت:هيا..
بعد رويدا وهي تقول:موفقه بإذن الله..
دعاء :يارب..
ومشت مع الدكتورة وفاتوا من حدا امها وخواتها..
دعاء شبحت لأمها وقالت:دعواتك ماما..
جميله:ربي يفتح عليك بنيتي..
ابتسمت دعاء وكملت طريقها..
مروة:وين خليتي صغارك!؟
رويدا:عند عمتهم ريمه..وعبدالله مشي يقضي مصلحه..
جميله:خاطري مرة تجي وتقولي قبلها..
رويدا بضحكه:نحب ندير المفاجآت  ياجيجي..
"السلام عليكم"
شبحوا لمصدر الاصوات..
رويدا بإندهاش:ياهلا ياهلا..
مؤيد خدي عمر ومشوا بعيد عنهم..
رويدا:والله ليكم وحشة بصغارها..
سكينه وهي تحضن في رويدا:ليك اكثر..
وباقي صاحبات دعاء اللي كانوا..
امال..آيات..ريم..اكرام..قعدوا يسلموا ع باقي العيله..
ورويدا تعرف فيهم ببعض..
بعدين قعمزوا مع بعض وقعدوا يهدرزوا..
🌷ودعاء في وحده من الحجرات..
كانت مع دكتورة ومجموعه من اعضاء هيئة التدريس تناقش في مشروعها..
برغم من قوة دقات قلبها الخايفه الا انها ناقشت وجاوبت ع اسئلتهم بدقه واجابات نموذجيه..
وفي نهاية المناقشه..خدت دعاء نسبة 86% بتقدير
ممتاز..
⚘الدكتورة: مبارك يادعاء..وان شاء الله ديما موفقه فحياتك..
دعاء:الله يبارك فيك..تسلمي دكتورة..
الدكتورة:هي سلام توا..
دعاء؛سلام..
ومشت الدكتورة..
ودعاء مشت بسرعه للمكان المقعمزين فيه اهلها..
كيف وصلت فيهم بتتكلم..
شهقت وحطت ايديها ع فمها..
سكينه بضحكه:تتوقعي تعزمينا ومانجوكش..
جتها طول دعاء وحضنوا بعض بقوة..
سكينه بضحكه وعيون معبيه دموع:شن صار معاك..
دعاء بصوت عالي شويه:جبت 86%..
رويدا طلقتها زغروده..ومعاها امها..
بعدت دعاء عن سكينه وجتهم تقول:اسكتوا حي عليا اصص..
كلهم قعدوا يضحكوا..
بعدين جتها جميله وحضنتها بقوة وهي تقول:مبارك عليك ياماما هدا النجاح حق..
باستها دعاء من خدها وضمتها بقوة اكثر..
وبعدها سلمت ع وخواتها..
ومن ثم صاحباتها..
بعدين مشت لمؤيد وعمر وسلموا عليها وهنوها..
💖وشويه وبدوا امها وخواتها يوتوا في العصير والبكلاوة والكيكه اللي بيوزعوهم..
ودعاء تهدرز ع صاحباتها..
دعاء:مبارك اموله وان شاء الله تحلي عويناتك ع خير..
امال بإبتسامه:آمين..والفال ليك دودي..
ابتسمت دعاء..
سكينه:قولي امين يافرخه..
دعاء:هههههه..آمين..الا حقه معاش سمعتوا شي عن أماني؟
ريم:ياحنه اخر حاجه سمعتها عنها انها تزوجت وراجلها مصكر عليها حتى من رقمها غيره وقال لاتقوليلي صاحباتي ولاتفنقي زايد..طبعا الدوة هادي سمعتها من اختها قالت متزمت هلبه..
دعاء:سبحان الله اماني اللي ماتحبش تقعد في الحوش ترضى تاخد واحد زي هدا..
اكرام:نصيبات..
دعاء:صدقتي..
 ع جية مروة قالت:دعاء بمن نبدوا قتلك ماما..
دعاء:شويه بس..
وكيف جت بتمشي شدت مروة يدها..
شبحتلها دعاء وقالت:خيرك..
من ورا خمارها كانوا يدوب يبانوا عيون مروة اللي مصوبين نظرهم القدام بإندهاش بعدين:اشبحي غادي دعاء..
انظار صاحباتها كانت متوجهه كلها لوين ماتشبح مروة..
ودعاء شبحت معاهم حتى هي..
توسعوا عيونها بصدمه..
وانفتح فمها...واكتسي وجهها شيئا فشيئا باللون الأحمر وقلبها قعد يدق بقوة كاد يطلع من مكانه..
وهي تشوف فيه واقف من بعيد..
وهو لابس جاكيت زيتي..تحت قميص لونه كريمي محشي في سروال زيتي..
شاد بيده اليمين باقة ورد متوسطه الحجم..ويده اليسار حاطها في جيب سرواله..
وابتسامه حلوة مرسومه ع وجهه..
وفي جنبها زوز بنات حلوات فيهم شبه منه كانوا كذلك يشبحولها وابتسامتهم ع وجهه..
ووحده منهم لوحت بيدها تحيي فيها....

...يتبع....