"إلا أن يشاء الله"

الجزء التاسع

✒..
خشوا البنات للحوش ووقتها كانت الساعه 4مزبوطه..
وهما ماشيات للدار شافوا للكوجينه لقوا امهم واقفه ع الرخامه وتحرك فالدجاج فوسط جاط كبير بلاستيك..
رويدا:السلام عليكم..
دعاء:ماما شن الغدي؟
جميله بضحكه:غير سلمي قبل!
دعاء ضحكت وهي عاقده حواجبها وقالت:السلام عليكم..هي قولي ماما شن الغدي؟
ورويدا تشرب في ميه..
جميله:مكرونه بالبيشاميل..
دعاء:وييي..
ومشت تجري..
رويدا بالضحكه:شكله العشي دجاج..
جميله هزت راسها وقالت:ورز بالخلطه..
رويدا:اممم..وكيف جت بتمشي وقفتها امها وقالت..اتصلت اليوم ناهد..
التفتت رويدا وقالت:شن تبي؟!
جميله غطت الجاط وقالت:تهدرز وقالتلي ياما من مدسوس.
رويدا بفضول:الله!شن قالت؟!
جميله وهي ماشيه تحط فالجاط فالفريز:بري بدلي وصلي صلاتك ولما تتغدوا انتي واختك تو نحكيلكم..
رويدا مشت طلعت بسرعه وهي تقول:تمام..
وجميله كملت باقي حوسة الكوجينه..
فالوقت اللي خشت فيه رويدا الدار كانت دعاء طالعه للحمام..
صكرت رويدا الدار وقالت لمروة اللي لقتها لاهيه بالتليفون:شدي فقرايتك خيرلك..
مروة وهي تشوف لتليفونها:قرايتي ساهله ماتبيش قرايه هلبه..
رويدا وهي اطلع فحوايجها من الدولاب:باهي قوليلي شن جو الشيخ جوزيف..
مروة بضحكه وهي تشوفلها:قرده..
ورويدا تضحك..
مروة تنهدت وقالت:شي قاعده نتفرج عليه من بعيد لبعيد..الله يارويدا قداش يهبل مش ع شكله بس..ع كلامه ع اسلوبه حتى ادبه..
رويدا:وهدا كله عرفتيه من صفحته ع الفيس!؟
مروة ساوت تقعميزتها وقالت:هو ايه مفروض مانحكمش عليه من الفيس لكن والله حتى منه هو يبان البنادم وتبان اخلاقه..هدا خريج دراسات اسلاميه وتوا معيد غادي..ويمشي ويجي ع مصر والسعوديه..مرة فالأزهر ومرة فالمدينه يحب ياخد العلم وين مايلقاه..وبالعقل طبعا..يعني ماياخدش فالكلام يحشيه فراسه حشي..لا لازم يفهمه كويس ويعرف كل شي..
رويدا:ماشاء الله..
ع خشة دعاء للدار فتحتها ع وسعها لما شافت رويدا مبدله..
ومروة تتكلم بكل احاسيسها:تعرفي ان ربي لو هكي حققلي حلمي وخلاه من نصيبي..الله ياربي..اني هدا  هو فارس احلامي..
دعاء ابتسمت بتهكم وقالت:هيا رويدا جعانه راني..
رويدا:باهي..شبحت لمروة وقالت..ماتحلميش هلبه بش ماتفيقيش ع واقع مر..
وطلعت من حداهم..
شبحت مروة لدعاء..
دعاء قعمزت وقالت:عندها الحق يامروة..مانبيش نقولك ماتتمنيش بس ماتعلقيش قلبك فهالامنيه بس..
مروة تنهدت ونزلت عيونها للتليفون وهزت راسها بإيجاب..
ودعاء سرحت بتفكيرها وهي تذكر كيف اليوم شافت رشاد مركب انوار السياره ومروح بيها وهما يهدرزوا ويضحكوا..
تنهدت من قلبها بألم..
ومروة مرة مرة تشوفلها..
🌻🌻🌻🌻🌻
ياحناتي خطبها واحد ملتزم متزوج قبل وعنده صغار اكبرهم يقرا في الاعدادي..شافاته عجبها تموا الموضوع وجابولها حتى التلبيسه..
رويدا تمضغ وهي مفنصه..
ودعاء بإندهاش تقول:تلبيسه مرة وحده وحني مانندروش!؟
جميله:موصيه بوك ياحنه مايقولش بلعاني تبي تردهالنا زعميتها..
رويدا:مريضه..
جميله:مش هدا المهم
رويدا ودعاء وهما مفنصات وياكلوا:امممم.!!
جميله :بعد مده اتصلت بيها مرت خطيبها..عطتها ع راسها مسحت بيها مسح وهددتها بخوتها اللي فالكتايب ياتسيبه ياتوريها هي واماليها
دعاء:حييي..
رويدا:وبعدين!
جميله:في اليوم نفسه الراجل جي ونهي الموضوع فسخ منه ليه...
دعاء:لاحول ولاقوة الابالله!
رويدا:عليك عمله!
مروة:صخفتني الحق..
وفاق:ماعندها علاش تصخفك هي بروحها قالت كل حد نيته تخدمه وهي نيتها خدمتها..
شبحت جميله لوفاق بتضييقة عيون..
دعاء:وانتي ماما شن حسيتي بعد عرفتي؟.
شبحت جميله لدعاء وقالت:ماقدرتش نتشمت قلبي ماطاوعنيش..وفي نفس الوقت عندي ولايا..
هزت دعاء راسها وكملت ماكله..
والبنات قعدوا ساكتات وهما يفكروا فاللي سمعوه..
🌻وفهالوقت شرقيه كانت تهدرز هي وازدهار بالتليفون..
شرقيه بحزن:مالا اني شن نقول يازوزو بس!
ازدهار ببكي:اني ماقاهرني الا المعايره والتلقيح واللي يقولي فات عليك القطار..واللي تقولي اختك امل في عمرك عندها عيل..قصدي هي من ربي نصيب..
شرقيه:نساوين خوالك المحسديات ولا؟
ازدهار تنهدت بحرقه:بناتهم كلهم تزوجوا ياعمتي حتى الأصغر مني..وتوا مرت خالي بشير بتعطي بنتها مواليد92 تعرفي شن قالت قدامي يومها! قالت البنت كان فاتت 25 راحت عليها خلاص..واني قريب نخشها 25..
شرقيه وعيونها معبيات دموع:متخلفات والله لمتخلفات يابنت خوي وتفكيرهم جاهلي..
ازدهار رشفت وقالت:صح..بس كلامهم يوجع هلبه هلبه..
شرقيه:مادوريش بنتي مادوريش سيوره يجيك نصيب خير من نصيبهم..وبعدين راهو مش كل شي الزواج هاك دكتورة بخدمتك..بمرتبك..بسيارتك ماناقصك شي..انتي حتى يوم حفلة تخرجك اللي درتيها فالصاله هما قريب ماتوا سحن من الحسد..مايعطوا في بناتهم هكي الالأنهم فاشلات ومافيش منهم فايده..
ازدهار:احمم..ايه ايه..امم..قوليلي مافيش جديد فحوش عمي محمد..
شرقيه:لالا معاش في شي جاهم حتى هما..
دعاء..
كانت ازدهار خاشه في حالة نفسيه بمعنى الكلمه..محيطها كلهم تزوجوا صاحباتها زميلاتها
قريباتها وقعدت هي بس فهالمحيط فاضيه تماما حتى المواضيع اللي تجيها ماتصلحش يااكبرمنها يااقل منها مستوى تعليمي يااشكالهم مايعجبوش فيها وحتى هي يهمها الشكل..المهم المخفف عليها شويه ان حني قاعدات ماجاناش موضوع..
🗝ومرت الأيام..وكل شي قاعد زي ماهو مافيش اي جديد..
غير ان رويدا اللي كانت متمسكه بالقرايه بس مش ملاحظه اعجاب امين صديق رشاد بيها..وعيونها اللي يقعدوا معلقات فيها مجرد ماتبان عليه..
ويالا الصدف..
عند أمين اخت هي حاليا تقرا اول سنه هندسه وجت مع رويدا في نفس القروب..
في الكليه..
جيداء "اخت امين":باهي تو نجس نبضها يااخي..
امين ضحك وقال:بري خشي هي..
ضحكت جيداء وخشت داخل..
وامين وراها..لما خش لقي زملائه سلم عليهم ووقف يدور بعيونه على رويدا لقاها مقعمزة مع قروب دعاء تهدرز وتضحك..
سكينه بضحكه:اختك جوها مليح اكثر منك..
اماني:ايه حقه انتي ديما وانتي منكده وقارنتيهم..
رويدا:ههههههه..كلهم يقولوا فيها..
دعاء:واني معترفه رويدا مطلوقه واجتماعيه اكثر مني..
ابتسمت رويدا وهي تشوفلها..
اماني:ايه حقه ريم بتجي اليوم هنيده..
ريم:الله!! مقدمها..
اماني بضحكه:قالت بنجي نشوفكم استاحشتكم..وتتحلف فيك انتي..
ريم بضحكه:ايه صح قداش ليا ماكلمتها..
ايات:صاحبتكم ايام الثانوي؟
اماني:ايه..
ايات:شن رايك دودي نمشوا لتسنيم الأيام الجايه؟
دعاء:باهي تو نشوف..
رويدا ناضت وقالت:عندي محاضره توا..
اماني:زي ماوصيتك اطقسيلنا ع اخت اميره..
رويدا بضحكه:باهي..ومشت بسرعه..
لين وصلت للقاعه..بالصدفه جت عينها في عين امين..ابتسملها..
هي مادورتش خشت طول
🌻ريم:من اميره هادي!؟
سكينه:السي امين مسمياته اميره لانه يشبه امير في مسلسل فريحه وللتمويه سماته اميره..
ضحكوا البنات..
ريم:لارسمي حطتيه فراسك..
اماني رفعت حاجبها وقالت:خل الواحد يكسب حاجه فيها فايده من هالكليه..
امال:والله مافي حاجه فيها فايده هني كان قرايتك..
اماني:كنا في دعاء وحده..
ضحكوا البنات..
بعدين قالت ريم بشي من الضيق:بنات..
شبحولها..
ريم تنهدت وقالت:سيبنا اني وهشام..
اماني:افتكييييتي منه دراه هالكبد..
سكينه:الصراحه ياريم ماكنت نطيقه ولانقبله..
دعاء:علاش سيبتوا؟
ريم:حسيت دوته فاضيه مش جدي الحق..
آيات:افتكيتي منه..
دعاء تنهدت وقالت:ربي يعوضك خير..
ريم مسحت دمعتها اللي نزلت وقالت:دعيت في قيام الليل لين عيت بش ننساه وربي يعوضني بخير منه...قلبي لتوا واجعني...لينا سنتين مش شويه..
امال شدت يدها وقالت:تو تنسيه صدقيني ويجيك اللي ينسيك...
ريم:يارب..
ع خطمه انوار ومعاها سجى وايه يهدرزوا..
سمعوا ايه تقول..
"خل نرفعوا انوار لراجلها بعدين نمشوا"
 وانوار ردت..
"خسارة قبل نبي نمشي معاكم لكن قوانين زوجي العزيز صارمه"..
وفاتوا..
دعاء الدموع تجمعوا في عيونها..والبنات لاحظوها..
شويه..تكلمت سكينه بتردد وقالت:بنات..جايني موضوع..
كلهم اندهشوا وقعدوا يشوفولها..
سكينه:احمم..نبي ناخد رايكم..هما زوز خوت جونا اني واختي..
دعاء:ايه كملي وشن تاني..
وقعدت سكينه تحكي والبنات يسمعولها..
اماني كانت متضايقه..عكس الباقي اللي فرحولها لأن الموضوع ممتاز ومايتفوتش..
سكينه:هكي تقولوا..
امال:ايه..وقفي قيدك اول الزواج بعدين ولي..
سكينه تنهدت وقالت:خل نستخير وان شاء الله خير..
كلهم بأصوات متقطعه:ان شاء الله..
🌻🌻🌻🌻
خشوا البنات محاضراتهم..
وقعدوا بس اماني وريم برا فاتوا المحاضره ع خاطر صاحبتهم "هنيده"..
تلاقوا هما وياها في واجهة الكليه..
وبعد سلام حار دخلوها داخل ورفعوها طول للكافتيريا خدوا فطور وقعمزوا ع الكراسي وبدوا يهدرزوا..
وكانت الهدرزة ع احوالهم واخر التطورات اللي صارت في حياتهم..
اماني بصدمه:قصدك انتي انخطبتي لواحد تاني غير ايمن!!؟
ريم بصدمه:ايمن حبك اللي عمره 6سنين..6سنين ليكم مع بعض!!
هنيده بضحكه:مش مهمه المده مدام في نهاية المطاف مافيش نتيجه..ايمن صح كان مدللني ومامخلي شي في خاطري..لكن ماكانش جدي معاي..اول مافتحت معاه موضوع الخطوبه..بدي يتسبل اموري ملخبطه وضعي قاعد مش مساوي..بوي مش عارف خيره..امي اشبح شن صايرلها..ومن هالكلام اللي اني فهمت منه ان ايمن مايبنيش نكون مرته..خديتها من قصيرها وقتله..خلاص كل حد يمشي ع حاله..قالي ع راحتك...
اماني تسمع ومش مصدقه..
وريم مصدومه هلبه..ضحكت وقتلها:وحني اللي كنا حاسدينك عليه ونقولوا ياهكي الحب يابلاش..
هنيده:لاحب لابطاطا..مش هكي الحب يابنات مش بالهدايا والكلام الحلو وكان مرضت يجيبلي دوا ولايلحقني المستشفى ولايقولي ماتطلعيش وماتلبسيش وماديريش وديري..الحب هو ان اللي يحب حق طول يمشي يطق باب حوشكم...وكان مايقدرش فالبدايه يجيك ويقولك يابنت الناس اني نبيك بالحلال ومانبيش ندير معاك غلط وراجيني لين نرتب اموري وبعدين نجي نخطبك..الباقي كله قطاف فارغ ويضيعوا سنين من عمرك ع قطاف فارغ وذنوب وبس..
الزوز يسمعولها وهما مندهشات كيف تفكيرها تغير..
تنهدت هنيده وقالت:الحمد لله مرتاحه مع صالح الحق راجل كويس وطيب..صح مش قنين
هلبه ومش زي شباب هالوقت طرحات ولبس وجو.. لكن محترم وراجل بمعنى الكلمه..وهدا المهم..
ريم وهي مبتسمه بتأمل:واني اللي نبكي امس ع هداكا.
ضحكوا البنات.
هنيده بضحكه:هو سبحان الله ياريم وكأن ربي يبي يجبر بخاطرك فيسع فيسع.
ريم واماني شبحوا لهنيده بإستغراب..
هنيده بإبتسامه:ريومه..تعرفي قداش نحبك ونعزك..والصراحه نبيك تكوني مرت خوي..
ريم جمدت من المفاجآه..
اما اماني انصدمت بقوة...كانت هي اقرب لهنيده من ريم مفروض هنيده تختارها هي مش ريم..
ريم: فاجئتيني الحق!
هنيده بضحكه:عارفه..ع العموم اسمعي ياستي..خوي يخدم فالجمارك....
وقعدت هنيده تحكي ع خوها لريم وريم تسمع ومازال مش مستوعبه..
اما اماني فكانت تمرر فنظرات حقد تحاول تخفيها بين هنيده وريم ومن داخل تسحن من الحسد..
دعاء..
وجو موضوعين لريم وسكينه..وكلنا فرحنالهم وشجعناهم مواضيع ماتتفوتش بكل..ممكن بعد اسبوعين من هداكا اليوم كانت فضانية سكينه..وبعدها بأسبوع كانت فضانيه ريم..
وبدي عقد قروبنا يتفرط والبنات بالوحده تمشي..
قعدنا اني..واماني..وآيات
🗝وفي نفس الوقت..
كانت رويدا تجيب في اخبار امين لاماني اللي كانت متحمسه هلبه بش اطيحه زي ماتقول..ورويدا برغم تقرب جيداء ليها مازالت مش منتبهه ان في شي وان امين خوها حاط عليها العين..وامين مايبيش يكلمها طول يبي يعرفها كويس من خلال مراقبته ليها بعدين يدير خطوة...
🌻🌻🌻🌻🌻
وتمر الايام..
لين جي اخر شهر فهالفصل قبل الامتحانات بأسبوعين..
كانوا رويدا ودعاء مقعمزات مع بعض يهدرزوا..وامين يراقب فيهم من بعيد..ورشاد واقف معاه وملاحظه انه ميال لاخت دعاء..
دعاء:ساهله هلبه..
رويدا تنهدت وقالت:ايه الحمد لله فهمتها..
"السلام عليكم".
شبحوا الزوز لمصدر الصوت لقوها بنت لابسه قونه طويله عليها بلوزه قصيره ووشاح وكانت مبتسمه..
ردوا عليها السلام..
البنت وهي تشوف لدعاء:تقروا هني؟
الزوز:ايه.
البنت تنهدت وشبحت لدعاء وقالت:باهي لوسمحتي ممكن شويه..
دعاء شبحت لأختها ورويدا تشوف للبنت..
البنت:مش واخده من وقتك هلبه..
شبحتلها دعاء بعدين ناضت وقالت:باهي..
البنت:تعالي شويه..
مشت معاها دعاء ورويدا ناضت وقعدت تشبحلهم..
وقفت البنت وقالت:حتى هني كويس..
وقفت دعاء وقالت:تفضلي..
البنت بإبتسامه:اسمي اسمهان نحضر فالدراسات هني بس مش في قسمكم..من بداية الفصل واني مركزة عليك الحق عاجبتيني هلبه وفكرت فيك لخوي..وبصراحه اكبر فتحت الموضوع معاه ومع العيله..
ابتسمت دعاء بإستغراب..
اسمهان:الحق نشبح فيك بنيه ماشاء الله عليك خلوقه ومحترمه ولامرة ريتك واقفه ع شباب وسألت عليك من هني وهني وكلهم شكروك..
دعاء تسمع وبس..
اسمهان:اممم..خل نحكيلك ع خوي..مهندس طيران..مواليد 80 اسمه طارق..الشكل ماشاء الله..طويل وعريض..صلاي اوقاته..خادم ع راسه وعنده حوش وسياره واموره كلها مرتبه ماناقصاته كان بنية الحلال واللي هي انتي بإذن الله..
ضحكت دعاء بإحراج وقالت:الحق فاجئتيني..
اسمهان ضحكت وقالت:عارفه..ع العموم..خودي وقتك وفكري..ايه ولو تبي يجي هني وتشوفيه ويشوفك مافيش مشكله ولو تبي تشوفيه فالمقابله الشرعيه بردوا مافيش مشكله..
دعاء..
كانت دارهه كبدي من المقابلات الشرعيه في الحوش كنت نبي نشوفه من اولها عجبته وعجبني باهي..كان هدا كل حد يمشي ع حاله..هكي افضل خير من الدوشة والشوشرة..
دعاء:نشوفه هني افضل..
اسمهان:وحتى اني نقول هكي خير..تمام..الخميس هدا ان شاء الله يجي باهي..
دعاء هزت راسها وقالت:ان شاء الله..
اسمهان تنهدت بإبتسامه وقالت:ربي يجيب اللي فيه الخير..
دعاء ابتسمت وقالت:ان شاء الله..
اسمهان:هي مالا اني نستأذن..ومدت يدها..
صافحتها دعاء وقالت:اذنك معاك..مع السلامه..
اسمهان بإبتسامه:سلام...
ومشت ع حالها..
ودعاء ولت لاختها...
دعاء..
عجبني الموضوع وتحمستله هلبه مش عارفه علاش..وطول حكيت لرويدا والبنات اللي لما جيت لقيتهم معاها وهما زادو شجعوني وقتها بالذات سكينه..
🗝اما اماني طبعا انغاضت وانقهرت هلبه حست روحها دونهم كلهم وكأنها غير مرغوبه ومافي حد يشوف فيها..
ونست ان آيات في نفس حالها لكن مافكرتش زيها كانت تفرح لصاحباتها وكأنها فرحانه لنفسها..
🌻🌻🌻
دعاء..
وبعد روحت حكيت لماما طول وحتى هي تحمست معاي هلبه وحسيت خواتي فرحولي ع الآخر..
بس في نفس الوقت نبهت لماما ماتحكي لبابا اي شي لبعد مانشوف طارق ونعرف شن بيصير وهي قالت باهي..
🗝ومرت الأيام
وجي يوم الخميس...
الساعه 11:00صباحا..
خدت اسمهان دعاء من القروب ومشت هي وياها وين ماموجود خوها..
وسكينه ورويدا لحقوهم من بعيد بش يطمنوا..
وصلوا اسمهان ودعاء وين ماموجود طارق..
اسمهان:طارق..اهيا دعاء..
طارق شاف دعاء ابتسم وقال:اهلا وسهلا..
ابتسمت دعاء بخجل ونزلت عيونها..
اسمهان:هدا خوي طارق دعاء..نخليكم توا هدرزوا ولما تكملوا رن عليا طارق..
طارق هز راسه بإيجاب وهو مبتسم..
ومشت اسمهان.
طارق شبح لدعاء وقال:ارفعي راسك خل نشوفك كويس..
قامت عيونها فيه..
ابتسم وقال:شن جو يادعاء سومه قلبتلنا الحوش
بيك..
ضحكت دعاء ونزلت راسها..
طارق:ماتتحشميش قلنا..
ابتسمت ورفعت راسها وشبحتله..
دعاء..
كان احلا من وصف اخته ليه..راكز ورزين وراقي..هدرزنا في مواضيع متنوعه منها ع البلاد..قداش حسيت افكارنا متقاربه هلبه..بس كنت ملاحظه انها مركز ع تفاصيل معينه فيا..اللي هيا لبسي وشنطي وكندرتي..اني كنت نحسابه تركيز عادي يعني هادي وكانها مقابله شرعيه يعني مادورتش..
وبعد مانهينا الهدرزة..
هو مشي واني خشيت..تفاجئت لما جيت خاشه رشاد وامين واقفين يشبحولي..الحق..فرحت..مش عارفه علاش..او ممكن لاني حسيت ان لقيت حد زي رشاد ومرات خير منه..وكأني نقوله مش واقفه عليك..برغم ماصار بيني وبينه أي شي..بس هكي حسيت وقتها..
🗝تلاقت دعاء هي واسمهان وخدت اسمهان رقم دعاء ودعاء كذلك خدت رقمها وقالتلها اسمهان قريبا نرد عليك..
🌷🌷🌷🌷
الساعه 7:00مساءا..
غير يولد ويسموه ياماما..
جميله:لايولد ويسموه غير تفائلي انتي بس..المهم من توا بنقول لبوك ع التريا متاع الصاله تبي تغيير..وغلافات المنادير يبوا الغسل..
دعاء بضحكه:وشن تاني؟
جميله:والجنان يبي تكرسين..ايييه شوق مانبي..
رويدا بضحكه؛باهي وحده وحده عليك ماما فكل وحده فينا ديري حاجه..
جميله:عينك..اهو اختك قالت كان صار الناس يبوا العرس فالصيف معاش في وقت..
دعاء تنهدت وهي مبتسمه بفرح وقعدت تتخيل وتفكر وتسرح واطير بأحلامها لفوق هلبه...
وخواتها فرحانات هلبه ويقولوا..
"واخيرا بنديروا عرس"..
دعاء..
وغيرت امي التريا..وغسلت غلافات المنادير..وشرت ماعين تقديم..وقعدت تراجي فيا نخش عليها فيوم نخبرها عن موعد جية الناس..
واني بروحي كنت نراجي زيها البنت تتصل او تجيني فالكليه وتكلمني..
ومروا الأسبوعين...وفي اخر يوم فيهم..
🗝جت البنت لدعاء وخدتها ع تركينه..
اسمهان بإبتسامه اسف:والله شن بنقولك يادعاء..خوي لما روح هداكا اليوم كان عاجبه الموضوع وقال مبدئيا كله تمام وخل نستخير..وقال..بعد صلى استخاره ماتريحش..قال ماتريحتش بكل..اني البنت عاجبتني بس الموضوع ماارتحتلاش بعد مااستخرت..
دعاء..
يعني شن بيكون شعور البنت لما ينقاللها كلام زي هدا!!..شعور بشع..والله مانتمنى بنت تعيشه..صلى استخاره وماتريحش للموضوع..اقبح رد نسمعه فحياتي..ياريته قال اي شي تاني ولاقال هالرد التافه..اللي كنت متأكده وقتها انه كذب في كذب..برغم كمية الالم اللي حسيتها وقتها الا اني رديت عليها عادي جدا..
دعاء:عادي مش مشكله..كل شي نصيب ومادامه مااستريحش خلاص
اسمهان باسف:والله تمنيتك لخوي من قلبي وانتي تستاهلي كل خير..
دعاء ابتسمت مجامله وقالت:بارك الله فيك..نستأذن منك بنروح..
اسمهان:اذنك معاك..
ولفت دعاء ومشت لأختها...
وصلت فيها..
رويدا بلهفه:شن صار!؟
دعاء والدمعه فعينها:قالت صلى استخاره وماتريحش..
ومشت دعاء..ورويدا لحقتها ودموعها عبوا عيونها وجعتها اختها هلبه..
دعاء..
يومها اول ماركبنا الباص سمعنا نشيد اسلامي في قناة الإيمان اللي حاط عليها السواق..كانت كلماته..
"خيرا ان شاء الله..خيرا ان شاء الله"
اقسم بالله في لحظه امتسح الشعور اللي وجعني كله..
قعمزت وقعمزت جنبي اختي واني نسمع فالنشيد وبرغم ان دموعي كانوا في طرف عيني لكن ابتسامتي ع وجههي قعدت..
رويدا:ربي يبعتلك خير منهم..
دعاء شبحت لأختها وابتسمت وهي تقول:آمين..
🌻🌻🌻🌻
وعاد جميله لما عرفت احبطت هلبه ووجعتها دعاء لين خلاص والعذر حتى هي ماأقعنهاش ونزلت فيهم وهي تقول "خيرة بنتي مش فيهم"..
ودعاء بعد شافت امها تنكدت ع خاطرها رجعت تنكدت من جديد وهي تتفكر فكلام البنت..
وللأسف خشت ع الامتحانات بنفسيه زفته وفي هلبه مواد ماادتش كويس بكل..
وكانت حاسه انها حتخلي مواد هالفصل..
⚘⚘⚘⚘⚘
وجت الأيام ومشت الايام..
وعدت عطلة الصيف زي اللي قبلها مافيهاش اي شي مهم غير نتيجة الشهاده الإعداديه اللي يراجوا فيها لوفاق...ونجحت وفاق بتقدير ممتاز...وفرحوا بنجاحها وممكن فرحتهم بنجاحها كسرت روتين ايام العطله اللي كانت تمشي بملل...
وبعد تمت العطله...
طبيعي ترجع القرايه..
وخشت مروة ثالته تانوي..
ومؤيد تانيه تانوي..
ووفاق اول ثانوي...
وهالعام كان اول عام لعمر في المدرسه وامه كانت فرحانه بيه هلبه..وهو كان متحمس لابكي ولادور امه خش فجو المدرسه وانسجم طول..
دعاء..
مانذكرش ان في هداكا الفصل صارت حاجه مهمه..
غير ان صاحبتي سكينه وقفت قيدها و تزوجت هي واختها وللاسف ماقدرتش نحضر عرسها لان سكنها بعيد..
وفقدت وخيه ليا بعد زواجها خلت فراغ كبير..
اما ريم..دارت بيان كبير طلعت فيه ماشاء الله عليها وجوها مع خطيبها حلو هلبه منسجمين تماما...
لكن آيات هي اللي تغيرت تغيير مختلف..لبست جلابيه وشاربه..وقررت تلتزم..وفعلا فيها هلبه حاجات تغيرت للافضل..
واماني قاعده تحاول مع امين اللي مش شايفها بكل وزعميته رويدا اختي بتساعدها هي اساسا كبدها درهت من القصه وماعرفتش كيف تخلص من اماني..
وبالنسبه لرشاد سمعت انه سافر لبريطانيا يرتب اموره غادي ويوميا نشوف في انوار..ومرة مرة نشوف فيها وهي تكلم فيه بالتليفون يبدا واضح عليها من ابتسامتها ولمعة عيونها...
وتم هالفصل وعدا عليا اني عادي جدا...
وكذلك عطلة نص السنه عاديه...
ورجعت للقرايه عادي واني شبه فقدت فيها الرغبه...
⚘⚘⚘⚘⚘⚘
مقعمزة في معمل التحاليل مركزة في اللاب توب..
لين انفتح الباب شافتله.
شافت مراة كبيره خاشه وولدها وراها..
ناضت وقفت وهي تقول:تفضلي خالتي تفضلي..
مشت جبدتلها الكرسي وقعمزتها..
المراة:بارك الله فيك.
رجاء بإبتسامه:فيك بارك الله..
"معليشي ياختي عندكم التحاليل كلها هني"..
شبحتله رجاء وقالت:ايه..
هو ابتسم وحول نظاراته ومدلها ورقه وقال:طلبوا عليها لأمي التحاليل هادم..
خدت منه الورقه وشافتها وقالت:امم..تمام..
ومشت خشت داخل..
هو يشوف للمكان وامه سرحانه..
ع طلعة رجاء وقفت ع اللاب توب وبدت تكتب:اسم الحاجه وعمرها..
المراة:اسمي برنيه سعيد *****..عمري 62 وان شاء الله نحج يابنتي .
ابتسمت رجاء وقالت:ان شاء الله يارب...
والشاب يشوف لرجاء بإبتسامه..
رجاء:مانبيش نتعبك تو نجيبلك كل شي لعندك..
ومشت خشت لمكان اخد العينات..
جابت الحاجات اللي تبيهم وحطتهم حداها..
رجاء:هي ياخالتي ارفعي كمك..
رفعت برنيه كمها..
رجاء وتت اليبره وهي تقول:ان شاء الله مافيك سو يارب..
وبدت تاخد فالعينه وهي تقول...الله ريحتك مسك تهبل..
برنيه:اني دايرته..
رجاء خدت العينه وقالت بإبتسامه:ماشاء الله..
والشاب يشوفلها وبس..
مشت رجاء وكتبت الأسم ع العينه وقالت:بعد ساعتين ونص تعالى خود النتيجه..
ماردش عليها..
قامت عيونها لقاته يشوفلها...
رجاء:بعد ساعتين ونص تعالى خود النتيجه.
برنيه:سمعك سمعك..
الشاب:ايه سمعتك..وضحك..
ورجاء ابتسمت..
الشاب:هيا يام..
وطبس ع امها وساعدها توقف..
برنيه:السلام عليكم..
رجاء:وعليكم السلام..
اما الشاب اكتفي بالإبتسامه..ورجاء ردتها مجامله ..
طلعوا وصكروا الباب...ورجاء مشت تخدم ع العينه..
بعد ساعتين..
جت البنت اللي تخدم معاها..
رجاء:في نتيجه تحاليل بإسم برنيه سعيد***** بيجيك شاب ياخدها منك اني راجيته وهو عطل..
زميلتها:مافيش مشكله تو نعطيهاله..
رجاء:تمام..هي سلام توا..
زميلتها:سلام..
ومشت رجاء طلعت من المعمل..
ركبت سيارتها وشغلتها وتحركت..
ع وصلة سيارة الشاب..
درس ونزل طول..
خش للمعمل شاف وحده غير اللي كان جاي ملهوف لشوفتها..
البنت:تفضل خوي..
هو تنهد وقال:نبي نتيجة تحاليل برنيه سعيد****
البنت:اها اللي خدتهم رجاء..
الشاب:اسمها رجاء؟
البنت:نعم!؟
هو ضحك بإحراج وقال:قصدي اللي تشد الصبح هني..
البنت:ايه..وخشت تجيبله النتيجه..
اماهو فقعد يفكر في رجاء وابتسامته على وجهه..
⚘⚘⚘⚘⚘⚘
في حوش جمال..
كانوا الصغار قدام التلفزيون يتفرجوا على طيور الجنه..
اما حناهم..
كانت في الحمام..
ترجع..
صابرين وهي تشوف للحوش بخوف:هدا شنو؟
شويه سمعت صوت رجاء برا تكلم في صغارها..
نضفت كل شي كويس ودارت منظف ومعطر في الحمام..
بعدين طلعت منه..وهي تمسح في فمها..
وصلت فدار المعيشه وقالت:روحتي رجاء..
رجاء:ماما..شن جوك توا..
صابرين بإبتسامه:كويسه بنتي كويسه..
وخشتلها الدار...
رجاء:ماروحش جملو؟
صابرين:متغدي عند نجلا شكله..
رجاء ضيقت عيونها وقالت:شن صاير ماما؟..
صابرين بخلعه:شنو شن صاير!!؟
رجاء:خيرك خفتي ماما!! اني قصدي ع جمال ونجلا..ناويه تردهم هو وخطيبته لبعض؟
صابرين رخت ملامح وجهها وقالت:يارب ان شاء الله..
رجاء ارتسمت ع وجهها ملامح الضيق وقالت:باهي ماما اني بنمشي نبدل ونصلي...
صابرين هزت راسها وقعمزت حدا الصغار...
ورجاء طلعت من حداها..
⚘⚘⚘⚘⚘
ماتحاوليش يانجلا الموضوع عندي منتهي خلاص..
نجلا:لو تعرف قداش واحد ردت ع خاطرك عندك علم ماتكلمش في امها..امها تبيها تتزوج وهي قالت ياانت يالا..
جمال وهو مضيق عيونه:بعد شني يانجلا بعد شني..اني قبل عطيتها فرصه تفكر هي مابتش تاخد حتى الفرصه..واني توا مش مستعد نعطيها غيرها ولانبي اصلا..
نجلاء قعدت تشبحله بضيق..
جمال:نجلا..اني عرفت منال كويس ومستحيل مازال نرجع نرتبط بيها بعد اللي عرفته منها خلاص..منال صفحتها انطوت عندي..خديت علي قلتها وقربت ننساها معاش نبي ندخلها حياتي من جديد..خلاص..تم..كل شي انتهي الى غير رجعه..
نجلاء تنهدت بأسف وقالت:براحتك جمال مادام انت خلاص معاش تبي..معاش فيها..
غير جمال عيونه عنها وهو يشبح للفراغ بضيق..
هو خلاص طلع منال من قلبه ومعاش يبي يرجع يضعف ويولوا لبعض بعد ماعرف معدنها الحقيقي وقت الشده..اللي تسيب مرة تسيب مرتين وتلاته وعشره...
وهو لايمكن يرجع يحط نفسه في الموقف ذاته مرة تانيه..
⚘⚘⚘⚘⚘⚘
الساعه 8:00 مساءا..
في الدار..
رويدا:قوليلها في وحده يبيها قالتلي اخته..
دعاء:هو حق في وحده؟
رويدا:ايه والله في..لكن اخته مابتش تحكي...
دعاء:باهي تو نقوللها..
جميله وهي تتفرج ع التلفزيون:حس الباب ولا؟
مروة وهي تقرا:ايه حتى اني سمعته..
شويه وخش عليهم عمر..
عمر:في راجل جي لبوي يما قالك ديري عصير..
جميله وقفت وهي تقول:نجيلي هالسمح ياربي..
مشتله طبست عليه وباساته بعدين طلعت هي وياه..
ودارت جميله العصير وطلعه مؤيد للضيف..
بعد حوالي نص ساعه..
روح الراجل..
وجي مؤيد للدار وين مافي امه وخواته..
مؤيد:ترا شويه يام..
جميله استغربت وناضت وطلعت من الدار..
البنات شبحوا لبعض..
رويدا:زعمه شن في!؟
دعاء بقلق:ان شاء الله خير وخلاص..
شويه..
وخشت جميله وهي تضحك..
مروة بضحكه:شن في ماما خيرك تضحكي؟!
جميله قعمزت وقالت:جاك موضوع يادعدوعه..
ضحكوا البنات..
ودعاء ابتسمت بإستغراب وقالت:موضوع !؟ وجي لبابا كلمه طول!؟
جميله:ياحنه قال رايك من قبل 6شهور وقبل بيجي لكن صارتلهم ظروف حادث خوه ماحادث خوه المهم ظرف قوي..وتوا بس سخر ربي وجي طول..
دعاء:وين شايفني!؟
جميله؛بالك في الجامعه..
رويدا:مافيش مكان غيرها..
جميله:المهم..يخدم اعمال حره وعنده خدمه فالدوله..وباني شقه فوق حوش اهله ناقصها الأثاث بس..
مروة:واسمه وعمره؟
جميله وهي تشوف لمروة:مواليد 84..وشبحت لدعاء وقالت..
"واسمه اسعد"

.....يتبع...