"إلا أن يشاء الله"

الجزء العاشر

السلام عليكم..
حابه نوضح شي مهم جدا..
مش كوني نكتب بلسان صاحبة القصه معناها القصه ليا اني ياحبيباتي!..
ومش كوني مرة تكلمت عن شي في حياتي الخاصه في وحده من رواياتي مطابقه لاحداث فالروايه هادي معناها اني صاحبة القصه!!
يعني لو اراد الله وكتبت قصة وحده تانيه فروايه تكون لاقدر الله صايره معاها قصة مؤلمه"كالإغتصاب" او غيره من الحوادث والمآسي حديروني اني صاحبة القصه !!؟
وبعدين كانكم ع التفاصيل..
اني انسانه حتى في حياتي لما نجي نحكي لحد ع موقف شفته نذكر التفاصيل..كيف واقف شن لابس شن كان يدير بالزبط كيف يشبح..هكي نحس روحي عطيت الموقف حقه وفي من يسمعلي يمل ويقولي اختصري لأني انسانه نحب نحكي بالتفاصيل هلبه..
وبعدين الكاتب سوا كان روائي ولاكاتب نصوص لما بيجيب قصه من الواقع..
اكيد يابيكون سامع عنها..ياحد حاكيله القصه ياحد قدامه مثلا يشكي اويحكي عن امور في حياته الخاصه الكاتب يلقطها ويبدا يألف في عقله سيناريو كامل عنها..
يابال لو يجيك حد ويقولك بنحكيلك قصه وانت اكتبها روايه اكيد الكاتب بيستخدم كل امكانياته فيها..
مثلا زي روايه العشق المتمرد..هلبه ناس نعرف قصصهم وحكاياتهم عن طريق ناس تانيين قراب منهم خديت القصص وبنيت عليها سيناريوهات كتبتها..وفي من قصص اني تخيلتها بناء ع امور معينه سمعتها فهالقصص ودرت قصه من خيالي تماما فيها...
وبالنسبه لتفصيل المكان فهو ع حسب ماسمعت من وصف وزدت عليه بعض التفاصيل اللي شايفتها في حياش تانيه في نفس المنطقه..
بالمختصر..
الكاتب اللي خياله واسع يقدر يبنيله الف قصه في يوم واحد من تقعميزة وحده مع جاره ولاقريبه ولاحتى موقف صار قدامه في سوق او عياده او مستشفى او حتى الشارع..
ويديرهالك وكأنها قصه حقيقيه بمعنى الكلمه..
ياريت تفهموا الشي هدا كويس وتنتبهوله حبايبي...
⚘⚘⚘⚘⚘⚘⚘⚘⚘⚘⚘⚘⚘⚘⚘⚘⚘
✒...
دعاء..
اسعد...لما ماما تكلمت عنه وقالت اسمه حسيت بشعور غريب..اني فسرته وقتها على إنه الراجل هدا شكله هو نصيبي مادامه هو اللي شايفني وجي طول لأهلي يعني اول واحد يجي يخطبني وهو اللي شايفني مش قريبته ولاامه ولااخته..
ماكنتش عارفه وقتها ان هالشعور ممكن يتفسر على ان هالشخص حيصيرلك معاه قصة في حياتك مش معروفه نهايتها...
المهم..
وقتها قلت لماما اني نبي نستخير قبل وبعدين نعطيك الكلمه الأخيره...
🗝وقعدت دعاء اسبوع كامل تفكر وتستخير وفي نفس الوقت كانت متحمسه وتبي وخاطرها تنخطب وتتزوج خلاص هي توا وصلت للسن المناسب..
يعني هي شبه موافقه بس تبي تتأكد من حاجه وحده.
🌻وكيف شكله يعني بنادم..
دعاء بضحكه:قصدي يعني مقبول هكي افهمني مؤيد بالله عليك..
مؤيد:ياودي شكله كويس وخلاص..
دعاء هزت راسها بإيجاب..
مؤيد:اسمعي هو يبان راجل كويس حتى اسلوبه محترم هكي تستريحيله..
ابتسمت دعاء من كلام خوها..
مؤيد:ان شاء الله خير وخلاص..
دعاء:ان شاء الله..
ومشي من حداها مؤيد وهي تبع فيه بعيونها..
ع طلعة امها من الكوجينه وقفت حداها وقالت:يابنتي والله الشكل مامهم المهم راجل يخاف ربي يابنتي بس..
دعاء وهي تشوف لأمها قالت:عندك حق...
جميله:ربي يقدملك اللي فيه الخير بنتي..
دعاء تنهدت وقالت:ان شاء الله...
🗝وع طول مشت جميله لمحمد وقالتله يقول للراجل يجيب اهله..ومحمد فعلا كلمه واتفقوا ع موعد يوم الخميس...
⚘⚘⚘⚘⚘
يوم الأربعاء..
في الكليه...
في وحده من قاعات كلية الهندسه..
جيداء:دماغك خطير يابنت انتي..
ضحكت رويدا وهي تقول:قولي ماشاء الله!
جيداء بضحكه:ماشاء الله ماشاء الله..امم..باهي رودي اني نبيك في موضوع..
رويدا بفضول:موضوع شنو!؟
جيداء:هههههه..واتيه...
ضحكت رويدا وقالت:غير احكي هيا عاد..
جيداء بإبتسامه:امم..الموضوع يخصك..
رويدا عقدت حواجبها بإستغراب..
جيداء:احمم..في حد ليه مده حاط العين عليك وعاجبتيه هلبه وهو راهو نيته صادقه مش متاع لعب..
رويدا بضيق:اني المواضيع هادي مانبيش نفتحها..
جيداء:ماتفتيحهاش لما يكون الشخص اللي نحكيلك عنه واحد من المفرخ الصياع..مش خوي أمين..
انصعقت رويدا..توسعوا عيونها ع الآخر وهي تشوف لجيداء وجمدت تماما..
جيداء:من اول ماخشيتي الكليه وخوي حاط عليك العين ويبيك رسمي راهو..واليوم قالي نكلمك...هو طبعا يبي يتعرف عليك و تتعرفي عليه قبل..ومش حيديرلك دوشه ولفت نظر فالكليه..يبي يتواصل معاك ع الفيس وبس..
رويدا نزلت عيونها وهي عاقده حواجبها لإيديها اللي تفرك فيهم ببعض من التوتر..
جيداء:والله ماحتندمي يارويدا امين خوي يستاهل تحطي فيه ثقتك كلها..ولأني اخته نقولك هكي لاننا متربيين ربايه وحده وهو اللي مربيني يارويدا..
قامت عيونها رويدا وشبحت لجيداء وهي تفكر في اماني صاحبة اختها..
وفي نفس الوقت في داخلها فرحه ان امين مرة وحده معجب بيها ويبيها بجديات..
رويدا:قولي باهي..
ابتسمت رويدا ونزلت عيونها لوطا..
جيداء ضحكت وقالت:ايميل خوي اسمه امين عطيه هندسه وكله بالإنجليزي طبعا..نقوله يبعتلك طلب..
رويدا شبحتلها بجديه وقالت:عطيني يومين وبعدها نرد عليك..
جيداء بضحكه:باهي ياودي ثقلي روحك من حقك..
ضحكت رويدا وحركت راسها يمين ويسار..
🌻🌻🌻🌻
برا..
آيات:والله فرحتلك دودي وان شاء الله ربي يكمل ع خير..
امال بضحكه:والفال لينا ان شاء الله نلحقوكم..
دعاء بإبتسامه:يارب..
اما اماني وهي دايره روحها لاهية بتليفونها قالت:ربي يتمم ع خير..
دعاء شبحتلها وقالت:آمين وعقبالك.
امال بضحكه:كان سكينه هني راهي قتلك قولي الفال ليك مش العقبه..
ضحكوا..
اماني :شكلها دودي تبيني نعقب..
دعاء عقدت حواحبها وقالت:مبيخك..
اماني ضحكت نص ضحكه..
ع جية ريم خشت قعمزت في نصهم وقالت:شن جو..
امال:شكله خطيبك مبحبحها..
ريم بضحكه:ايه وقالي فرقي ع البنات..عطتهم الشكاره وقالت..هاكوا فرقوا .
خدتها امال وقعدت تفرق عليهم..
واماني خدت طرف شكلاطه بالسيف وقعدت ادور بعيونها في آمين..
شويه شافاته واقف من بعيد..ناضت وقفت وقعدت تتمشى..
ع طلعة رويدا وجيداء من القاعه..
رويدا لما طلعت شبحت ايمينها جت عينها في عين امين..
هو ابتسم..
وهي غيرت عيونها طول عنه ووجهها ولى احمر شبحت لجيداء وقالت:نتلاقوا غدوة ان شاء الله.
جيداء بضحكه:تمام..سلام..
رويدا:سلام...ومشت طول تلاقت مع اماني..
اماني:شن جو رودي..
رويدا ابتسمت بربكه وقالت:تمام..وين دعاء..
اماني:غادي..
ومشت رويدا وين مافي اختها..
واماني وهي تمشي كانت مرة مرة تلتفت وتشوف لأمين كيف واقف ع اخته ويكلم فيها..
وصلت في البنات..
لقت دعاء تسلم عليهم بتروح هي واختها..
بعدين سلموا عليها..
اماني:خلي تليفونك حداك رودي باهي..
رويدا بإبتسامه مجامله:باهي..هي سلام.
دعاء:سلام صبايا..
ومشوا الزوز مع بعض....
...........
في الباص..
"كيف!!؟"
رويدا:اني لتوا مش مصدقه!
ضحكت دعاء بصدمه وقالت:آمين المتعجرف!
رويدا شبحتلها وقالت وهي ترقص فحواجبها:بش تعرفي اختك بس هدا واني مش حاطه شي في بالي وقاعده عاقله..
مطت دعاء شواربها للأسفل وهي تضحك..
ورويدا تضحك..
دعاء بضحكه:باهي توا كيف بيصير..
رويدا تنهدت وقالت:والله حبيبتي فرصه زي هادي مستحيل نضيعها وانتي قولي لصاحبتك اللي فيها..
دعاء:مادامه جدي وناوي معاك الجد..وهو اصلا قالوا بتطلعله بعته قريب معناها يبي يتزوج ويسافر..نقولك حتى اني ونشجعك فرصه زي هادي ديري بالك اضيعيها..
ابتسمت رويدا وهي متحمسه..
دعاء..
قلت لنفسي امين مش متاع دوة فاضيه وعمري ماشفت عليه شي غلط وشاب فيه مميزات حلوة..خل اختي تحاول توصل للي اني ماقدرتش نوصله..هدا علاش شجعتها ع الموضوع..
🗝وموضوعك يادعاء بدي يوم الخميس العشيه مع العصر لما جو ام اسعد واخته..
تأنقت هداكا اليوم ولبست وكانت طالعه حلوة هلبه..
وفي هداكا اليوم كذلك حضروا شرقيه..
دعاء..
قلنا خل نصفوا النيه ونخلوها ع الله وخلاص..لو ربي يبي هالموضوع يتم مايقدرش ولامخلوق ع وجه الأرض يوقفه..
المهم..
نذكر يومها قعدت هلبه فالدار بروحي نراجي امتى ينادوني..
وكل شويه نشوف لروحي فالمرايه..
ع خشة شرقيه..
شرقيه بإبتسامه:ماشاء الله ياعروسه ماشاء الله طالعه زي الغزاله..
دعاء بإبتسامه؛عيونك الحلوة..
شرقيه بضحكه:شكلهم يبوا يحسنوا النسل الجماعه..
دعاء:مافهمتش؟
شرقيه بضحكه:سمر شويه ومش هداكا الشي..يعني ماينحطوش حداك..ماشاء الله عليك بنية خوي..
دعاء ابتسمت وقالت:مش مهم المهم ناس كويسه..
شرقيه ابتسمت وقالت:ايه عندك حق..هي تعالي معاي..
دعاء خدت نفس ومشت طلعت مع عمتها..
لين وصلوا للصاله..
خشت شرقيه  وبعدها خشت دعاء..
اخت العريس لما شافتها انصدمت ماتوقعتهاش تكون جميله لهالدرجه...اما امه فرحت لما رتها..
جتهم دعاء سلمت عليهم وامها تشوفلها بإبتسامه..
بعدين مشت قعمزت حدا امها..
ام اسعد:ماشاء الله ماشاء الله...
اخت اسعد وهي مبتسمه برفعة حاجب:شن جو يادعاء..
دعاء بإبتسامه:الحمد لله..شن حالكم انتم..
الام وبنتها:تمام..الحمد لله..
ام اسعد:تعرفي اطيبي بازين..
فنصت دعاء وهي تشوف للمراة..
وامها وشرقيه قعدوا يشبحولها..
اخت اسعد:عاد انتي وسلفتك بتسكنوا فوق امي نبوكم تنزلوللها بغداها وعشاها..
شبحوا جميله وشرقيه للبنت بصدمه..
ضحكت ام اسعد وقالت:نبصروا عليها..لالا بنتي الحمد لله اني مازال بصحتي وبنياتي معاي ندير غداي وعشاي بروحي..المهم نبيك تهنيني ع اسعد..واسعد ولدي مش نشكرلك فيه لكنه راجل ينشري بالذهب..مايفوته فرض في الجامع وخدوم وطيب هلبه اللي فيده مش ليه..
اخت اسعد:ايه والله وخيي طيب لين مفسد..
دعاء..
البنات اللي لتوا ماتزوجوش ريتوا التفاصيل هادي والبصاره وكلام اخت اسعد الحاجات هادي اللي نشوفوا فيها تفاصيل تافهه ومايوقف حد عندها...التفاصيل هادي راهي توضحلك كل شي من البدايه..اوقفوا عندها وهلبه هلبه..هللبه..
🗝شويه ورن تليفون البنت ردت عليه وكان واحد من خوتها..
ناضت وقالت:هي يام جي راهو..
دعاء..
ركزت ع لبس اخته كان جريء شويه الوشاح يدوب لفاته ع شعرها نصه برا..النقطه هادي ماريحتنيش خصوصا ان اخته تبان مش صغيره..
ناضت ام اسعد وقالت:مالا عطونا رقم تليفونكم..
دعاء:ترا عطوني تليفون خل نكتب فيه رقمي..
مدتلها اخت اسعد تليفون حجمه كبير اول مرة تشوفه دعاء..
خداته منها وقعدت تكتب فالرقم بعدين مداته لاخت اسعد..
اخت اسعد وهي تسجل في الاسم:اسمي عايده اخت اسعد الوسطانيه واكبر مني وحده اسمها نعمات واصغر مني وحده نديدتك اسمها روبين..
دعاء:اممم..
شبحتلها عايده وهي مبتسمه برفعة حاجب:فرصة سعيده..
دعاء ابتسمت وبس..
وصافحتها..
ام اسعد:تو نكلموكم ان شاء الله..
جميله:بإذن الله..
وسلموا على بعض..
وسقدوهم جميله وشرقيه..
ودعاء خشت داخل..
🌻🌻🌻🌻🌻
الساعه 9:00ليلا..
شرقيه وهي تكلم فمرت خوها ليلى:باين عليهم عيله مش مزبوطه..
ليلى:علاش خيرهم؟
شرقيه:تحسيهم هكي عيله مش محافظه هدا اللي نقدر نقوله..
ليلى:وزعمه محمد يرضى يعطيهم كانهم هكي!؟
شرقيه:قال اني بنسأل عليه وع عيلته ونشوف شن يصير..
ليلى:يللا ربي يتمم ع خير وخلاص..
شرقيه:امم..ان شاء الله..
⚘وسأل محمد ع ولد وعيلته..
والناس تمدح فيه هو وتشكر وكلهم يشهدوله بالخير..اما عيلته في اللي يقول مانعرفوهمش هلبه وفي اللي يقول..عيله كويسه..
وقرر محمد انه يكمل الموضوع وقعدوا يراجو في اتصالهم..
⚘⚘⚘⚘⚘
يوم الإثنين..
في الكليه...
نهاية الدوام..
في واجهة الكليه..
جيداء:هاه شن قلتي يافرخه..
ضحكت رويدا وقالت:قوليله يبعت..
جيداء:واخيرا..
رويدا وهي تضحك:هي سلام توا..
ومشت تجري لأختها..
وصلت فيها وقالت:يهبل هالآمين..
دعاء بضحكه:غير امتى كلمتيه انتي..
رويدا بضحكه:بديت نركز فيه شخصيه وقنين هلبه..
دعاء بضحكه:تصدقي ان اماني خدت الموضوع بروح رياضيه!
رويدا:حقه!
دعاء:والله وقالت اصلا اختك احلى مني اكيد وصغيره اكيد بيختارها هي..
رويدا:غريبه توقعت تسميني خطافة الرجاله..
دعاء:ههههههه..
وصلوا في الباص وركبوا هما الزوز...
⚘⚘⚘⚘⚘
طلعت من مخبر التحاليل.
ومشت لسيارتها..شبحت قدامها لقاته مازال قاعد واقف ع سيارته..
لبست نظاراته وهي راسمه ع وجهها ملامح الامتعاض وركبت السيارة..
شغلتها وتحركت وهو لحقها طول للحوش..
وهدا هو حال اسامه الشاب اللي جاب امه ادير تحاليل في المخبر اللي تخدم فيه رجاء اخت جمال..
ورجاء انبهتله واضايقت من تصرفاته وتفكر لو شافت منه اي تمادي تقول لخوها عليه..
فهالوقت..
كانت صابرين في الحوش..
متمدده ع مندار في دار المعيشه وعلامات التعب باينه في وجهها...
والصغار حداها يلعبوا..
ع جية الخدامه:نديرلك فليه مدام؟
صابرين بتعب:ايه ديريلي ديري..
الخدامه بقلق:يامدام لازم تمشي تعاين حرام اللي ادير فيه فروحك..راهو لو قعدت مصكر راسك ومامشيتش اني بنبلغ السي جمال..
صابرين:باهي باهي تو نمشي تو نمشي غير بري ديري فليه بري..
الخدامه تنهدت بضيق ومشت طلعت من حداها..
وصابرين حاطه يدها ع بطنها وتتألم..
لين سمعت باب الحوش انفتح..
دارت روحها حالها باهي..ناضت قعمزت ورسمت ع وجهه ابتسامه..
شويه وخشت رجاء..
فتحت ايديها وقالت:بدو وميرو حبايب مااامي..
وجوها يجروا هي طبستلهم لما وصلوا فيها وضموا بعض..
وصابرين تشوفلهم وهي مبتسمه..
قامت رجاء عيونها فيها:شن جوك ماما اليوم؟
صابرين بإبتسامه:الحمد لله بنتي الحمد لله..
رجاء وقفت ع حيلها وقدمت لأمها وقالت:ماما وجهك اصفر..
صابرين:لالا عادي..
وقفت عليها رجاء وحطت يدها ع جبهة امها بعدين شدت وجهها وقالت:غدوة بنرفعك معاي المخبر اديري تحاليل باهي..
صابرين:مش لازمات بكل..
طبست عليها رجاء وقالت:لا لازم ونص..وباستها ع راسها بعدين قالت..خل نمشي نبدل ونتغدوا باهي..
صابرين :باهي باهي..
مشت رجاء وخدت صغارها معاها..
ع خشة الخدامه بطاسة الفليه جابتها طول لصابرين..
خدتها وقالت:حطي غدي لرجاء..
الخدامه:حاضر..ومشت طلعت من حداها..
وصابرين بدت تشرب فالفليه وحطت يدها ع بطنها..
⚘⚘⚘⚘
في واحد من محلات الذهب اللي تخص اهل جمال...
جمال:والله مجبور نسافر يبوا حضوري الشخصي فالشركه..
عمه:مادورش كون هاني ياجمال.
جمال:سامحني بنزيد نتعبك..
عمه بضحكه:ياودي تعب شني اني مانرتاحش كان فحاجتين واني نصلي..واني نخدم..
جمال ابتسم وقال:بنأمنك حتى العيله ياعمي..
عمه ابتسم وقال:واني نقولك كون هاني ياولد خوي..
تنهد جمال براحه..
وعمه قال:هي هي خل نشوفوا خدمتنا..
جمال بضحكه:هي..
⚘مش بالساهل كسب العم ثقة ولد خوه..جمال قعد وراه لين تأكد ان حاله فعلا انصلح..ومع هدا قاعد واخد احتياطه ومتابعه زي مامتابع كل اللي يخدموا عنده ومعاه⚘
🌻🌻🌻🌻🌻🌻
الساعه 7:00مساءا..
"باهي باهي..ان شاء الله...وانتي من اهله..سلام..سلام..."
وصكرت دعاء بعد كملت مكالمتها مع عايده اخت اسعد..
جميله:هاه شن قالتلك؟.
دعاء:الخميس هدا ان شاء الله بيجي يدير مقابله شرعيه..
رويدا:واخيرا بنشوفوا السي اسعد..
مروة:اسمعي الشكل مش مهم بكل دعاء المهم اخلاقه..
دعاء ضحكت..
جميله:ايه سلم بنتي ساد ماشكروا في اخلاقه الراجل..
دعاء ابتسمت وقالت:خلاص ياماما خلاص والله اقتنعت..
رويدا:يارب نديروا عرس يارب..
مروة ووفاق:آمين..
ودعاء وامها يضحكوا..
⚘⚘⚘⚘⚘⚘
وعدت الأيام..
وجي يوم المقابله الشرعيه..
كانت في شهر ابريل من سنة 2013..
يومها اسعد جي هو واخته نعمات..
لبست دعاء يومها فستان وطلقت شعرها وكانت طالعه حلوة هلبه..
لما طلعت لاخته هادي كانت ردة فعلها زي ردة فعل اختها عايده قبل..
ماتوقعتش تكون دعاء جميله هكي..
ابتسمت ابتسامه مجامله..بالغصب..
جتها دعاء وهي ناضتلها وسلموا ع بعض..
نعمات:اهلا حبيبه كيف حالك..
دعاء:الحمد لله كيف حالك انتي..
نعمات:الحمد لله..
وبعدوا عن بعض..ومشت دعاء قعمزت حدا امها..
ونعمات قعمزت وقعدت تشوفلها وتتفحص فيها...
جميله:ايه ماقتليش شن شهادته هو؟
نعمات:خوي خريج معهد عالي حاسوب..
دعاء ابتسمت..
جميله؛ماشاء الله..
نعمات:هي تنوضي معاي غير هو مستعجل عنده خدمه...
جميله:نوضي البسي ماما..
ناضت دعاء وهي تقول:حاضر ..
ومشت طول طلعت من حداهم..
وصلت للدار...لبست العبايه والوشاح اللي كانت موتيتهم..
والقت نظرة ع شكلها قدام المرايه بعدين طلعت..
وصلت فالصاله لقت نعمات واقفه تراجي فيها..
نعمات بإبتسامه:هي تعالي...
ابتسمت دعاء ومشت معاها..
طبعا كلموا مؤيد يطلع مادام اخته بتخش وهو طلع طول..
وخشوا نعمات ودعاء..
دعاء..
يدوب شفتله..كان لابس سوريه جينز وسروال جينز زرق..متكي بمرافقه ع ركابه وشاد تليفونه بإيديه..لما جي بيقيم راسه اني نزلت راسي وقعمزت مقابلاته..
واخته قعمزت جنبه..
🗝هو لما قام عيونه وشافها ابتسم من وسط قلبه..
قعد يشبحلها..وهي قعدت منزله راسها وساكته..
نعمات:خيركم ساكتين هدرزوا..
ضحك اسعد ومسح بيده ع وجهه..
ودعاء ابتسمت وراسها لوطا..
نعمات ناضت وجابت لخوها طاسة العصير وقالت:هاك اشرب..
خداها منها وقال:شن حالك يادعاء..
دعاء قامت عيونها وشبحتله وقالت:الحمد لله..
هو لما جو عيونها فعيونه..شرب طاسة العصير في مرة..
نعمات وهي متفاجئة:اسعد!!..
ضحك ونزل الطاسه وقال لدعاء وهو مرتبك بعض الشي وابتسامته ع وجهه قال:من اول مرة شفتك فيها كنتي نازله من الباص لما شفت عيونك ضعت..
هي نزلت راسها خجلا ووجهها ولى احمر..
هو فرك ايديه ببعض وقال بضحكه:مش عارف شن نقول عارف روحي نفترش..اصلا من لما خشيت عليا..اللي هناك من العقل..طار..هههههه..
وهي ضحكت ضحكه خفيفه بخجل...
نعمات بضحكه:لا حني نوضوا نروحوا خير..
اسعد:خيرك!؟
نعمات بضحكه:كان خليتك شويه تانيه معاش تروح..
ناضت دعاء وهي متحشمه ع الأخر وقالت:السلام عليكم..
وطلعت من حداهم..
دعاء..
استغربت الجو اللي بينه وبين اخته فري يعني وعادي..بس في نفس الوقت حسيته طيب فعلا ودمه خفيف ومش عارفه كيف تقبلته طول..
او ممكن وقتها..كنت نبي ننخطب وخلاص...
🗝لما خشت لخواتها فالدار طول استقبلوها بالأسئله..
رويدا:هاه شنو؟
دعاء وهي مبتسمه بإستغراب:الحق مش عارفه حاسه روحي استريحتله..
مروة بضحكه:وباهي شكله شني؟!
دعاء برفعة حاجب:بتفهموني انكم ماشفتوشي يعني!!
رويدا بضحكه:طويل ولا..
دعاء:ماركزتش بش شكله مقبول..
مروة:المهم ارتحتيله...
دعاء تنهدت بإبتسامه وقالت:ايه..بس لاحظت اخته صح لابسه عبايه لكن جو الكبه الكبيره والقصه اللي طالعه من الوشاح..
رويدا:مش مهم المهم ناس سمعتهم كويسه..
دعاء وهي تفكر:اممم..
ع خشة جميله:هاه دعاء شن رايك؟
دعاء ابتسمت بخجل وقالت:كويس ماما باهي يعني عجبني..
ضحكوا خواتها..
جميله بإبتسامه:باهي باهي ع بركة الله نفوتوا تلاته ايام ونردوا عليهم..
وانسحبت من حداهم رويدا..
شافت هاتفها وخشت ع الفيس لقت امين باعتلها رساله...ابتسمت وفتحتها...
(وينك اليوم لاشفتك ولاتردي عليا)
كتبت وبعتتله..
(كنت لاهيه..اسفه)
شافت جنب اسمه لقاته نشط منذ ساعه..
صكرت ومشت ولت للدار...
⚘⚘⚘⚘⚘⚘
وعدوا التلاته ايام..
وردت عليهم دعاء وقالت انها موافقه..
وبعدها بأسبوع كانت الفضانيه..
دعاء..
هدا اول موضوع يوصل لهالمرحله..كنت فرحانه او طاهقه مش عارفه المهم وقتها كنت طايره وخلاص...
الفضانيه كانت عشي..وداروها في مربوعة حوش جدي..
ولما تمت...
نذكر لتوا في فرحة امي وزغاريطها هي وخالاتي..
وماحضر من عماتي حد غير شرقيه حسيتها عاديه وقتها وكانت تبان فرحانه زيهم..
ومن نساوين عمامي ماجي حد غير ناهد وكانت حتى هي تعول وفرحانه وتزغرط تقول ليها..يللا حني وقتها ماهمنا شي غير فرحتنا وخلاص..
⚘⚘⚘⚘⚘
فالوقت اللي كانت فيه عيلة دعاء عايشين الفرحه..
كانت ام جمال صابرين..مقعمزة بروحها في دارها..
قدامها ملف طبي..تشبحله وتبكي وتقول:انا لله وانا اليه راجعون..انالله وانا اليه راجعون...
ولوطا..
بناتها مجتمعات يجوها يوميا لأن جمال مسافر..
رجاء:هونا دمها طلع ناقص خديتلها حبوب حديد وقعدت تاخد فيهم..
نجلاء بقلق:مش متريحه..
عطاء:يابنات افهموا امي تخمم في جمال تبيه يتزوج ويستقر  راهو قريب يخش35..
الاء:حتى اني نقول هكي...لما يروح نتلاقوا عليه نقعدوا وراه وراه لين يتزوج ويريح امي..
نجلاء تنهدت بضيق وهي تفكر..
🌻ياريت هم امكم هو زواج ولدها..امكم اللي ليها فتره تطلع من وراكم وتمشي تعاين اكثر من مرة..ومرة بعد مرة..اكتشفت انها مصابه بالخبيث
في معدتها وللاسف في مرحلة متطورة...
🌻🌻🌻🌻🌻
وعدا شهر..
كانت فيهم دعاء هي وامها يجروا ويوتوا للبيان اللي بيجيبوه اهل اسعد في اول اسبوع من شهر 6..
حجزوا في المزينه..
وشروا لوازم العشي والضيافه وكل شي يخص هداكا اليوم..
دعاء..
كنت متحمسه هلبه..وفرحانه..ياودي طاهقه المعنى الأصح..
واخيرا انخطبت وبنلبس دبله خلاص..
ههههههه..عليك تفكير عبيط وأهبل..
⚘⚘⚘⚘⚘
يوم البيان..
محمد رفع دعاء وشرقيه معاها للمزين..
كانت مزينه تخدم في حوشها..
حطوا دعاء غادي ووصت شرقيه المزينه عليها ومشت بش تعول مع جميله وباقي نساوين العيله..
عزموا للبيان نساوين العيله كلهم عاد هادي اول مناسبه ليهم..
دعاء..
كنت فرحانه هلبه ونهدرز مع المزينه وهي تمكيجلي واخترت اني التسريحه وهي دارتهالي..
وبعد كملت..لبست وهي ساعدتني وحطت اخر لمساتها..
بعدين قالتلي" بري شوفي روحك في المرايا توا"
دعاء بدهشه:ماشاء الله ع ايدياتك تبارك الله..
المزينه بإبتسامه:انتي اللي ماشاء الله عليك اساسا حلوة تهبلي..
دعاء بإبتسامه:شكرا..
شويه طق باب حوش المزينه..
طلعت طول ..
 وقعدت دعاء واقفه تشوف في روحها ع المرايا وفرحانه..
ع خشة شرقيه لما شافتها انذهلت وحطت ايديها ع راسها وقالت..ماشاء الله تبارك الرحمن..
دعاء ضحكت لردة فعلها اللي مافهمتهاش..
نزلت ايديها وشبحت للمزينه وقالت:يعطيك الصحه..
المزينه بإبتسامه:سلمك..
🗝وعطت دعاء الفلوس للمزينه..ولبستها شرقيه ملايه وطلعتها معاها برا..
كان عمها علاء برا..
نزل وركبها مع شرقيه من الخلف..
بعدين ركبوا هما...وتحرك علاء..
ماكانتش بعيده المزينه في نفس المنطقه..
دعاء..
لما وصلنا الحوش..استقبلونا بالزغاريط..الله قداش كنت فرحانه..
نزلتني شرقيه ودخلتني داخل وكلهم حواليا يزغرطوا..
لما خشيت داخل وحولولي العبايه والخمار..
شفت قدامي امي وخواتي وخالاتي وبناتهم يشبحولي وهما مبهورين
جميله وهي مبتسمه بفرح ودموعها فعيونها:تبارك الرحمن..
وحده من خالاتها قالت:دخلوها للمربوعه حدا المكيف الدنيا نو..
جميله:ايه ايه صح..
وخدوا دعاء دخلوها للمربوعه..
قعدوا هدرزوا حداها شويه بعدين طلعوا وخلوها بروحها..
وهي لهت بتليفونها تبعت في رسايل لقروبها تخبرهم بكل خطوة ديرها فهاليوم..
⚘⚘⚘
بعد نص ساعه..
جو اهل اسعد..
دعاء..
سمعت الكلاكسات والالعاب الناريه توترت..
وشويه وسمعت الدربوكه..والغني..فرحت وتوترت بزياده..
قعدوا يغنوا شويه..بعدين سمعت الدنيا هديت..
شويه خشت عليا مروة
مروة بإبتسامه:شن جو
دعاء:شن جوهم هما
مروة وهي مبتسمه:تمام
خشت وراها رويدا كان وجهها مقلوب بس تحاول تبتسم وهي تقول:حاجاتهم كلها ماشاء الله..
ابتسمت دعاء..
رويدا:كل شي يهبل دودي..
لاحظت دعاء الدمعه فعيون اختها حست ان في شي..
شبحت لمروة لقتها تشبح لرويدة وتفنص..
دعاء عقدت حواجبها وقالت:شن في؟!
ع خشة مرت عمهم علاء بالكاميرا..
ناهد:هيا دعاء نوضي..
ابتسمت مجامله وناضت وقفت..
وبدت تمشي دعاء..
ومرت عمها تصور فيديو..
لين طلعت برا ووصلت فالصاله..
كانوا جايات امه وخواته كلهم ووحده من اقاربهم فقط..
لما شافوا دعاء زغرطوا..
وهي جتهم سلمت عليهم..بعدين مشت قعمزت ع كرسيها..
وفتحوا المنظومه..
دعاء..
لبس خواته كان اوفر هلبه..واني ماعجبنيش جوهم حسيت انهم متفتحين هلبه بس حاولت نتجاهل وخلاص..
جتني الكبيره هدرزت عليها..وبدت تاخدلي فالصورة..
في الأول مع اختها الصغيره..
ولما جت اختها عايده تصور..قعمزت ع يد الكرسي وحطت مرفقها في وجهي..
نعمات وهي تصور فنصت وقالت:حولي شويه شن هكي.
ضحكت عايده وقالت؛اها اسفه اسفه ماركزتش..
وعدلت وضعيتها وبدت نعمات تصور..
ودعاء مبتسمه بالسيف..
من جهة تانيه..
كانت ليلى تكلم في بنتها ازدهار في التليفون ماجتش حضرت بحجة ان عندها خدمه..
ليلى:الحق طلعت حلوة هلبه..لكن اهل العريس مش لعيلتنا بكل..تصدقي جايبيلها قفطان لونه اسود..
ازدهار بصدمه:اسود!
ليلى:ايه والله العظيم اسود..
ازدهار:حي هادم بيسودهالها من أولها!
ليلى بضحكه:شكلهم..
"ليلى بري قعمزي بنحطوا العشي"..
ليلى:هيا هي..سلام توا زوزو..
ازدهار:باي ماما..
صكرت ليلى ومشت خشت الصاله..
فاللحظه اللي طلعت فيها شرقيه دعاء من الصاله وترفعها للدار بش تغير وتلبس القفطان اللي جابوه هما..
خشوا للدار وخشت وراهم رويدا وصكرت الباب..
شرقيه قامت القفطان اللي جابوه وقالت:شوفي شن جابو قفطان اسود!
دعاء انصدمت.
رويدا بإنفعال:وخيره الاسود...اهو انتي لابسه اسود.
نزلت شرقيه القفطان وقالت:شن قصدك انتي!!؟
رويدا:انتي فاهمه قصدي زين..من بكري وانتم تتسوهكوا نسمع فيكم انتي وليلى وعماتي..
شرقيه:اني!!؟
رويدا:ايه انتي..
شرقيه خبطت بيدها ع وجهها وقالت بعيطه:حرام عليك اني فرحانتلها تقول ليا اني البيان..
رويدا رفعت حاجبها وقالت:ايه باين..
جت شرقيه لرويدا ضربتها ع ذراعها وقالت:شن قصدك ياحقيره..
رويدا فنصت فيها وقالت:ماتضربنيش..
دعاء بخوف:حي عليا حي لابالله عليكم لا ماتحشموناش..
جت لرويدا قعدت ادف فيها وتقول:اطلعي امشي اطلعي بالله عليك..
رويدا لفت وطلعت وهي معصبه ع خاطر اختها وصكرت الباب..
لفت دعاء لشرقيه وقالت:ماتعدليش عليها عمتي هيا لبسيني..
شرقيه وهي ادمع:والله ماقصدي حاجه اني استغربت بس..
ع خشة ناهد قالت:خيركم شن في.
شرقيه:قليلة الأدب رويدا هادي..
ناهد صكرت الباب:ماتعدليش عليها..
شرقيه مسحت دموعها وقالت:نحرش فيها امها الحقيره هادي..
ومشت طلعت من حداهم وصكرت الباب..
دعاء بقلق:رعشوني..
ناهد:اكيده قالتلك ع تسهويكهم ولا؟
دعاء:مانيش معدله ع حد..
ناهد:ايوه..هكي خير..هي بسرعه خل نغيرلك القفطان..
دعاء..
اني صدمني لون القفطان بس مابيتش نوقف هلبه عنده..
لكن اللي صار بين رويدا وشرقيه خوفني توقعت تصير مصيبه وتتفركس الدنيا..لكن عدت ع خير..
🗝طلعت دعاء وهي لابسه القفطان الأسود..برغم انها طلعت فيه حلوة هلبه..بس العيله ماتفائلوش بيه ابدا..
قعمزت شويه..بعدين جتها ام اسعد..
لبستها دبله ذهب طرفين ماجابولها ذهب غيرها..
زغردوا عليها وبدي شوط الدربوكه..
رقصت دعاء هي وعزوزتها وحمواتها..
بعدين رقصت مع امها وخواتها وخالاتها..
بعدين عماتها..واخر من رقص معاها شرقيه..
اللي خطر عليها بوها الميت من سنين وقعدت تغني عليه وتبكي..
المهم تنكد..
لين جوها خواتها جبدوهاو قعمزوها..
دعاء..
وعدت هديكا الليله ع خير..المهم اني لبست الدبله اللي مش مصدقه اني لبستها..بس يعني توقعت وقتها ان وحده من خواته حتاخد رقمي بس ماصارش..واني اضايقت الحق..كنت نبي نعرفه اكثر كنت مقتنعه ان المكالمات فترة الخطوبه ضروريه جدا..وباهي اللي قعدت مقتنعه بهالشي في هداكا الوقت..
⚘⚘⚘⚘⚘⚘
"ايوه نجلا"
جمال وهو يخش بالسيارة لقراج الحوش ويتكلم بالتليفون:ايه توا كيف خشيت..ابتسم وقال..الله يسلمك..تمام..سلمي ع منصور والصغار.....تصبحي ع خير..سلام..سلام..يوصل..سلام...صكر..ونزل التليفون
وحول مفتاح السياره ونزل..
مشي لباب القراج وصكره بالبطمه..
فالوقت اللي خطمت فيه سيارة ابراهيم ولد عم دعاء من قدام حوشهم..
كان مروح بأمه من حوش عمه..
وصلوا لحوشهم وخش حتى هو..
مجرد مادرس داخل امه فتحت الباب ونزلت...وكانت تتكلم بالتليفون..
ليلى:مانحكيلكش ياأموله حالة....
امل:عاد قفطان اسودمرة وحده!
ليلى:ريتي..ع العموم اني حسيتهم عطوا البنت هكي وخلاص المهم يعطوا وبس..
امل:حتى هما 4 شن بيتمهم..
ضحكت ليلى..
امل بضحكه:هيا ماما اني بنرقد خلاص تصبحي على خير..
ليلى:وانتي من اهله ماما...وصكرت وركبت الدروج..
وين وصلت فوق لقت قدامها ازدهار طالعه من الحمام بتخش لدارها..
ازدهار:روحتي لولا..
ليلى:ايه شويه خل نغير حوايجي ونجي نهدرزلك..
ازدهار بضحكه:باهي..وخشت لدارها...
............
يبانوا ناس بيئة ومش لينا بكل..
ازدهار:معقوله عمي محمد يعطي ناس هكي جوهم؟
ليلى:يبي يعطي وخلاص عمك بناته هلبه..والله ياماما عندي تقعدي هكي طول عمرك ولانلوحك هالتلويحه..
ازدهار:مادام دعاء مقتنعه بيه ماما مش مهم لاتلويحه ولاغيرها..
ليلى:طياح سعدها صبرت هدا كله بش تحصل هالحصله..
ازدهار:هدا نصيبها وجاها..
ليلى:وان شاء الله يجيك انتي نصيب خير حتى من نصيب اختك..
ابتسمت ازدهار وقالت:آمين يالولا..هي توا نوضي لولا بري لدارك بنرقد..
ناضت ليلى وهي مبتسمه وقالت:تصبحي على خير..
ازدهار:وانتي من اهله...
مشت ليلى طلعت من الدار بعد ماصكرت الضي..
وازدهار مجرد ماأمها صكرت الباب فتحت ضي الوناسه وبدت شويه شويه تبكي بصمت وهي تفكر في حالها وخايفه هلبه تقعد من غير زواج..والسنين تجري والأصغر منها فالعيله قريب كلهم مشوا..
حاولت تهدي بكي شويه..
وخدت تليفونها وفتحت الفيس وهي تمسح فدموعها تبي تغير جوها قبل لترقد..
وهي تتصفح..جي قدامها اقتراح قروب اسمه..
"فضل سورة البقرة والإستغفار"..
قعدت تشبح لإسم القروب هلبه..
بعدين خشتله ودارت انضمام...وفورا قبلوها..
وخشت ع منشوراتهم وبدت تقرا فيهم....
⚘⚘⚘⚘⚘
في دار البنات..
دعاء مقعمزة تتعشى..
ومروة لاهيه بالفيس..
ورويدا مع أمين..
(لالا الموضوع هدا جاها من شهرين تقريبا)
أمين
(قصدك اختك ماكانتش مخطوبه قبل ولاعاطيين فيها كلمه)
رويدا بإستغراب
(لالابكل)
عطل أمين فالرد..
رويدا..
(علاش انت سامع عنها انها كانت مخطوبه؟)
أمين
(لالا غير هكي كنت نحسابها بس)
رويدا
(اها)
امين
(عقبالنا)
رويدا ضحكت وكتبت..
(قول الفال لينا مش عقبالنا كم مرة بنعلمك)
امين
(😂😂😂 الفال لينا ياأبله اخر مرة معاش نعاودها)
ورويدا تضحك كتبتله..
(ايوه )..
امين
(هههههه..ربي يحفظك رويدا)
ابتسمت..
"جبتيلي قلبي في مصاريني بكري"
شبحت رويدا لدعاء وقالت:ماك ماريتهمش الحقيرات وهما يتسوهكوا ويضحكوا..
مروة:حتى اني شفتهم..شرقيه ومرت عمك ليلى ..ومرت منعم..وعمتك ناديه..تسهويك وضحك ع الناس وع اللي جابوه..
دعاء:خزي..
رويدا:شرقيه هادي بالذات قالت من توا سودا كحلا ع راسها وقعدت تضحك..
دعاء:عارفتيها انتي هي تبي تنكد علينا تبي هالليله تتفركس علاش تعطي فيها الفرصه قوليلي..
رويدا:حرقتلي دمي..
دعاء تنهدت ونزلت عيونها وشافت للدبله..
مروة شبحت للدبله وقالت:لازم تشري عمليه..
دعاء:ايه هادي اللي نفكر فيها..
رويدا:قنينه الدبله..
دعاء ابتسمت وقالت:حتى اني عجبتني..
برا..
في دار المعيشه..
جميله وخواتها في فراشاتهم يهدرزوا..
اخت جميله:قداش اضايقت ريمه بعد عرفت ان دعاء عطيتوها..
جميله:هي ماكلمتنيش في الموضوع يابنات..
اختها:ايه صح هي مفروض كلماتك طول..ايااه توا قالت بيشوفوله بنت خاله.
جميله:نصيبه مش فدعاء..
اختها:ايه نصيب حد ماياخده حد..
اختها التانيه:لكن والله حمواتك وسلفاتك مايتحشموا..
جميله:عارفتهم حتى اني ماجوش حبا فينا يبوا يقصقصوا ويتسوهكوا بس..لكن اني والله ماهامني واحد..المهم بنتي متريحه وراضيه..
اختها:ايه هو هدا..وربي يكمللها ع خير..
جميله:يارب..
اختها:ماقالوش امتى العرس..
جميله:شهر 11 بإذن الله..
:قريب بكل..
جميله بضحكه:ايه بش توتوا ارواحكم...
دعاء...
يعني كان مازال 5شهور اول اقل وقتها..كيف يعني مش حنكلمه فيهم!؟..هديكا الليله مارقدتش واني نفكر فهالموضوع كنت حاسه اني ضروري جدا مانكلمه ولازم..
بس كيف كان هو ماطلبش الرقم !؟؟..
ومرت عليا هديكا الليله واني نخمم في بعدين هلبه..وبدي القلق يسيطر عليا...
وزي مايقولوا...راحت السكرة وجت الفكره...

....يتبع....
مواعيد التنزيل..
بإذن الله..
السبت....الاثنين....الأربعاء