"إلا أن يشاء الله"

الجزء الثالث عشر

هديه مني ليكم🌷
✒..
حوش معبي ناس وزحمه..
اول ماسمعوا بالخبر جو طول قريب وبعيد حتى الجيران اللي شبه مايعرفوش بعض فهالحاله كانوا اول الموجودين..
ومنهم ليلى وازدهار..
كانوا متأثرات هلبه ودموعهم تنزل سيل وهما يشوفوا في حال بنات صابرين اللي مش صابرات بكل..
بالذات نجلاء ورجاء العروسه اللي اليوم تكون صبحتها...
اما حال جمال فكان حال المصدوم اللي مازال مش مستوعب فقد حد غالي عليه..
يستقبل في المعزين عادي لكن ماكانش مستوعب انه قاعد يستقبل في ناس تعزي فيه فأغلى مخلوق فالدنيا بالنسبه ليه..امه..
ونساباته كانوا يراقبوا في حاله وخايفين عليه بالذات وجدي..
⚘⚘⚘⚘⚘⚘
"في امور في الدين..فروض من الله تشريعات مايجيش معاها كيف وليش واشمعنى!.. العقل البشري محدود راهو مهما تعلم واخترع واكتشف ودار وحط يقعد محدود جدا..يعني في حاجات فرضها ربي ع العبد مش معروف السبب اللي خلتها تنفرض عليه..ولهذا لازم نقولوا سمعا وطاعه..
ونذكروا ديما الآية اللي يقول فيه سبحانه..
¤ومااوتيتم من العلم الا قليلا¤"
هدا كان كلام يوسف الشيخ وهو يعطي في محاضرة للطلبه ويناقش فيهم في بعض النقاط ..
ومروة معاه بالكلمه بالحركة بالنفس وكل مالها تزيد تعجب بيه اكثر واكثر
واحد من الطلبه:باهي ياشيخ نبي نسألك النقاب فرض ولامستحب؟
شبحله يوسف وقال:هو مستحب عند فئة من العلماء وفرض عند غيرهم
الطالب:وعندك انت؟
يوسف:اني نقول انه مستحب لان الآيه القرآنيه اللي نزل فيها تشريع الحجاب قال فيها الله"وليضربن بخمرهن ع جيوبهن" لأنهم زمان كان يخلوا في الرقبه تبان وتبان منها الزينه وماإلى ذلك من المفاتن وحتى شويه من الشعر فنزلت الآيه تأمر نساء المسلمين انهم يغطوا حتى الرقبه الى عند البطن بش مايبان منهم شي من هالمفاتن..
رد عليه وقال:باهي نساء النبي عليه الصلاة والسلام قدوة نساء المسلمين فرض عليهن تغطيه وجوههن..
يوسف:ويكلموا الرجال من وراء حجاب..وتحرم عليهم يتزوجوا بعده عليه الصلاة والسلام..ربي قال عليهم"لستن كأحد من النساء" لهذا انفرضت عليهم امور ماانفرضتش ع غيرهم من النساء..والاقتداء بيهم مطلوب واللي تبي تلبس زيهم تكون دارت الأفضل..
ع فكره امي وخواتي مختمرات بس مش اني ولاأي حد فرض عليهم يلبسوه هما منهم ليهم لبسوه..واني وبصراحة تامه نفضله للمراة..
وشبح لمروة...وجو عيونه فعيونها..ولاحظها كيف تشبحله..
هو وجهه ولى احمر..وهي نزلت عيونها للكتاب وقلبها يدق بقوة..
يوسف بشي من الربكه:احمم..نرجعوا لموضوع محاضرتنا..
⚘⚘⚘⚘⚘
"ماشاء الله تبارك الرحمن"
آيات:الحمد لله ياربي مش مصدقه اني وصلت هني فلحفظ..
دعاء بإبتسامه:كله خير من ربي..
آيات:نفكر نلبس الخمار..
دعاء:فكري كويس فالخطوة هادي ايوته..
آيات:فكرت كويس دودي خلاص بعون الله عن قريب حنلبسه..
دعاء ابتسمت وقالت:ربي يزيدك من الهدايه..
آيات:اجمعين يارب..
دعاء:يارب..
سكتوا شويه بعدين لمحوا اماني وامال ماشيات مع زوز ولاد..
دعاء بضيق:وضعهم مش عاجبني بكل..
آيات بضيق:بالذات اماني والله مانبي نتكلم لكن بصراحه اللي دير فيه غلط كبير
دعاء:ماتبيش تسمع لحد وتبي ادير مافي راسها
آيات تنهدت وقالت:ربي يهدي وخلاص..
شويه ورن هاتف دعاء شافاته وقالت:هادي رويدا..
ناضت وهي تسلم ع آيات:بنروح توا نتلاقوا غدوة ان شاء الله..
آيات:ان شاء الله..
دعاء:السلام عليكم..
آيات:وعليكم السلام ورحمة الله وبركاته..
ومشت دعاء..
لين وصلت في مكان الباص ركبت لقت رويدا مقعمزة مع وحده وهي مشت قعمزت في جهة تانيه..
دعاء..
هي رويدا زي اللي بدت تنسى اللي صار بس اني خديت منها موقف كنت نتجنب فيها لأني شايفه ان مالهاش الحق فوقفتها ضدي لما فسخت مادخلهاش اصلا..هدا علاش قعدت جابده روحي منها وهي معاش حاولت معاي..
⚘⚘⚘⚘⚘
الساعه 5:00عصرا..
مقعمزات حدا بعض في الدار يشربوا في السحلب ويهدرزوا..
مروة:هكي نحس في نظراته ليا مش عارفه كيف..
وفاق:ياكلبة الكلاب حرام اللي ديري فيه..
مروة:قسما بالله مادرت حاجه والله ولاحاجه الله بس مرات غصب عني نلقى روحي سرحانه فيه..
دعاء بضحكه:غضي بصرك ياقرده غضي بصرك ولاغيري التخصص..
مروة بضيق:ان شاء الله ربي يسامحني يارب والله ماقصدي استغفر الله واتوب اليه..
ودعاء ووفاق يشربوا في السحلب ويشبحولها وهما شادين ضحكتهم..
خشت عليهم رويدا خدت شيت محطوط في طاوله التلفزيون ومشت طلعت من حداهم..
مروة:دعاء طولت القطيعه بيناتكم..
دعاء:تمشي تقلب وجهها..
وفاق:هي قالت انها كانت واجعتها ماما..
دعاء:واني مانوجعش!بالله اسكتوا ترا..
في الصاله..
مكالمه هاتفيه..
جميله:العيله ماتنفعش وولدهم يمشي بودانه والله لو كملت معاه كانت حتعاني..
اختها:عندها حق اول الطريق خير من عقابه..
جميله :حتى اني بعد قعمزت مع روحي وفكرت كويس قلت هكي..لكن اللي قاهرني ياوخيتي ان توا بابها معاش ينطق كيف قبل..تو الناس بيبدوا يدوروا خواتها وهي معاش يعدلوا عليها..
اختها:لالا ماتقوليش هكي..كله نصيب من ربك ياجميله وان شاء الله يعوضها خير..
جميله بألم:ياااارب..
⚘⚘⚘⚘⚘
بعد مرور اسبوعين...
"عطيني رقمها"
رجاء وهي تشوفله قالت:باهي..
وطلعت تليفونها وطلعت رقم خطيبة جمال وقعدت تمل فيه عليه..
هو كان يتأمل في شكلها الحزين وملامح وجهها الباهته تنهد بعدين قال:الليله تروحي مع راجلك..
رجاء شبحتله وقالت:لالا..
جمال بحزم:كلكم بتروحوا الليله مانبيش وحده فيكم تبات..تعالوا كل يوم كان تبوا لكن بيات لا..هي كلمه معاش بنعاودها..
ومشي طلع من حداها برا الحوش بكل..
اما هي نزلوا دموعها ولفت خشت داخل وهي في قمة الألم..
🌻برا..
ركب جمال سيارته..
وكتب رساله بعتها لخطيبته..وبعد شويه اتصل بيها..
هي طول فتحت الخط..
جمال:السلام عليكم..
البنت:وعليكم السلام..كيف حالك وحال البنات..
جمال تنهد وقال:الحمد لله على كل حال..اسمعي نبي نكلمك في شي ضروري جدا..ونتمنى منك تتفهمي وتقبلي..
قعدت ساكته..
جمال:آلو..
البنت:تفضل نسمع فيك..
جمال:اسف جدا ع اللي بنقوله توا..اني ماكنتش نبي الزواج نهائيا والله يرحمها امي هي اللي ضغطت عليا بش خطبت عارف اني ارتكبت غلط كبير في حقك قبل اي حد لكن بش نرضي امي درت هالغلطه..انتي والله تستاهلي راجل يقدرك ويعطيك قيمتك وشوفي ربك سبحانه مايبنيش نظلمك صار اللي صار بش يوقف الموضوع كله...اني مانستاهلكش انتي تستاهلي خير مني..
البنت تنهدت بعدين قالت:حسيت انك ماتبيش وللاسف ماقدرتش نقول لأهلي اني نبي نفسخ لأن ماعنديش سبب مقنع بالذات وانهم شايفين انك عريس مافيش منه..برغم ان خالتي صابرين كانت تعز عليا هلبه الله يرحمها لكن كنت نتمنى لو يصير شي يوقف هالزواج غير موتها لكن هادي ارادة الله..
مسح جمال بيده ع وجهه بعدين قال:باهي يعني مسامحتيني..
البنت:اكيد وربي يسامحك..غير نبي نطلب منك طلب فض الخطبه يجي منك انت..تقدر دير اي سبب يخليك تفسخ الخطبه لأن اني بالذات بعد وفاة خالتي صابرين الله يرحمها مانقدرش نفكر حتى مجرد التفكير في فسخ الخطوبه..
جمال تنهد وقال:فهمت عليك..هو اني قبل كنت نبيها تجي منك انتي ع خاطرك..بس مادام انتي تبي هكي خلاص..خليها عليا..
البنت:تمام متفقين..وربي يعوضك باللي ترتاح معاها وتتمناها زوجه..
جمال:حتى انتي ربي يعوضك باللي يستاهلك..هي السلام عليكم..
البنت:وعليكم السلام...
وصكر جمال وحط التليفون قدامه..
نزلوا دموعه مسحهم طول..وشغل السيارة وتحرك طول...
⚘⚘⚘⚘⚘⚘
كانوا ملتمين في حوش العيله..
دايرين حفلة ذكرى ميلاد الحاجه"حواء"ام محمد..
وهادي كانت فكرة بناتها..
هما يحبوا امهم هلبه ويحبوا يدللوها هلبه ويديرولها في كل شي تحبه ويفرحها..
دعاء..
وحتى حناي حنينه هلبه فيهم كلهم لكن علينا حني لا مافهمتش علاش ممكن لانها ماتحبش امي الله غالب ماعندنا مانديرولها..
المهم ليلتها كانوا دايرين كل شي طورطه وحلويات وعشي وكانت الاجواء قنينه الحق وقدامهم قعدت نكلم في ماما ورويدا وهما يكلموا فيا عادي وكأنه ماصار شي..
ناهد:بالله زوزو عندك صور لراجلك؟
ازدهار بضحكه:دقيقه بس..
وفتحت اللاب توب وشبحت لبنات عمها:تعالوا صبايا..
جوها وقعمزوا حداها..
ازدهار:وهدا هو راجلي..
ناهد؛عطيك الهني ماشاء الله يهبل..
ليلى"قل اعوذ برب الفلق"..
دعاء بإبتسامه:يشبه كريم عبدالعزيز الممثل المصري.
امل:مش قتلك اني..
ناهد:صح فيه منه..
ازدهار:ههههههه..هو اصلا قالهالي قال يقولولي فيها..
وقعدت تمشي في الصور والبنات يتفرجوا عليها...
كانت صور ليه هو في الجامعه..في شوارع في كندا..
في السيارة وهو يحاضر فالكليه..
لعند ماوصلت في صورة ليه وهو راقد ع جنبه ويضحك ويبان يكلم في ازدهار فيديو..
صكرت اللاب توب وهي تقول بضحكه:خديتهاله وهو مايعرفش..يهبل شكله وهو ع طبيعته..
ضحكوا البنات..
امل:عليك هبله..
ازدهار :خليك في حالك يامتاع عبدو"راجلها"
امل:بري يامتاع مودي..
ازدهار:رااااجلي..
امل:حتى اني راااجلي..
حناهم حواء:تحشموا انتي وياها ماتقول حداكم حد كبير بكل خزيي..
كلهم:ههههههههه..
ع خشة شرقيه وهي تقول:هي تعالوا عاونوني..
ناضوا ازدهار والبنات ومشوا مع شرقيه...
وقعدوا النساوين يهدرزوا مع بعض..
ورجعت حليمه لحالتها القديمه وولت ليلى تسكترد في جميله..وجميله كالعاده مطنشتها..
المهم..
مع الساعه 11 في الليل كانوا كلهم مروحين..
واخر من قعد ناهد..
كانت شاده جميله وتهدرز هي وياها ع الواقف..
ناهد:صدقيني كله من التصفيح ياجميله حوليه لبناتك خير..
جميله بقلق:باهي كيف نقدر نحوله؟
ناهد؛في مركز نعرفه كويس تو نبعتلك رقمهم وانتي كلميهم وخودي منهم موعد..
جميله هزت راسها وقالت:باهي..
ناهد؛هي تو تصبحي ع خير وراجي مني رساله..
جميله:ان شاء الله..تصبحي ع خير..
وكل وحده فيهم مشت من جهة..
⚘فهالوقت..
كانوا البنات منطرحات ع فراشاتهم بعد مابدلوا وفرشوا لرواحهم..
جت رويدا رقدت جنب دعاء وقالت:مروة رقدت بكري غدوة عندها مادة الشيخ..
ضحكوا..
مروة بضحكه:صكري فمك ياحيوانه..
رويدا:شيخة وتقولي في الفاظ زي هادي شيخة زلحه.
مروة:مش راده عليك بنرقد..
وفاق:خلاص ارقدوا بالله عليكم..
دعاء:باهي خلاص رقدنا..
وعم الصمت المكان للحظات..بعدين رويدة قالت بهمس:امين بيكلم ماليه عليا..
شبحتلها دعاء وقالت بنفس النبره:حقه؟
رويدا بإبتسامه:ايه..وقالي تطلعي معاي تكملي قرايه برا..
دعاء ابتسمت وقالت:احسن شي..
قعدت تشوفلها رويدا بإبتسامه..
ودعاء كذلك بعدين غيرت عيونها عنها وقالت:ربي يجعل حظك خير من حظي..
ماحستش دعاء بعد كملت هالكلمه الا ورويدا ضامتها..
ابتسمت وحطت يدها ع ذراع اختها وقعدت اطبطب عليها .
لحظات وغمضوا عيونهم هما الزوز ورقدوا..
⚘⚘⚘⚘
تاني يوم..
كلهم مشوا لقرايتهم ماعدا دعاء ماكانش عندها نيه تمشي..
قعدت في الحوش..
كانت اضم مع امها من فم ساكت..وامها تراقب فيها وحتى هي ساكته..
لعند ماجي وقت مشي عمر للمدرسه..
لبساته دعاء ووتله شنطته وفطوره..
وسقداته لمدرسته..
لما جت خاشه داخل..
لقت امها قدامها..
جميله:تعالي قعمزي حداي في الجنان..
دعاء هزت راسها بإيجاب..
مشت جميله ودعاء لحقتها..
⚘⚘⚘⚘⚘
يوسف:فصل الدين عن اي جانب من جوانب الحياة البشريه يعتبر علمانيه
نفس الطالب:الا السياسه..
مروة:هدا ينطبق على اي دين تاني الا دين الأسلام..
يوسف قعد يشبحلها..
مروة:الأسلام لما جي للعرب خلاهم اقوى قوة اقتصاديه وسياسيه واجتماعيه..
ماننسوش ان اللي حكموا نص العالم لسنين كانوا اقرب الصحابه اللي هما ابوبكر اللي في فترته هو صارت حروب الردة اللي خططلها عسكريا وعرف كيف يرد هلبه قبائل ارتدت وتخلص من مدعين النبوه مش بس بالسيف حتى بالسياسه المحنكه اللي تعلمها من الرسول عليه الصلاه والسلام..
جي بعده عمر اللي قاد الدوله سياسيا وعكسريا واقتصاديا وهزم اكبر امبراطوريات الأرض وقتها..
ترا قولي شن كانوا العرب قبل الإسلام وكيف ولوا بعده..لامقارنه..
الطالب:في فرق بين قبل وتوا.
مروة:ايه في فرق كبير قبل كانوا فاهمين وعارفين الإسلام كويس بس توا مافي حد عارف منه الا اللي يعجبه وينفعه بس..
يوسف:شن اسمك ياطالبه؟
استاقظت مروة اللي خداها الحماس وهي تناقش في زميلها وشبحت ليوسف وقالت بربكه؛اسمي..مروة محمد..
ابتسم يوسف ونزل راسه وشاف للورقه ودار اشاره قدام اسمها..
طالبه قالت:كلامها برا موضوع المحاضرة ياأستاذ..
يوسف شبحلها وقال:شفت درجة امتحانها لقيتها مصكره زدتها درجه لانها تستاهل..والطالب الجامعي ياطالبه لازم يكون طالب واعي ومثقف ومطلع ع كل شي..
رفعت البنت حاجبها وقعدت ساكته.
رجع شاف لمروة بعدين مرر نظره ع الطلبه وقال:نرجعوا لموضوع المحاضرة..
وكان باين ع وجهه ملامح ابتسامه بس هو غلبها بقوة..
ومروة قلبها يدق بقو قوه وهي مبتسمه ابتسامه خفيفه..
⚘⚘⚘⚘⚘
"تصفيح!؟"
جميله:ايه زمان صفحتكم انتي وخواتك كلهم..
دعاء..
اذكرت زمان لما رفعتنا امي لحوش مراة كان معبي هلبه وقتها..
وكان في قدامها مسدة كبيره..نذكر قعدت نمشي ونجي من نصها وناكل في تمره ونردد في جمله..تقريبا..
"اني حيط والراجل خيط"..
هو هدا التصفيح..الله يسامح اغلب الامهات يحسابوا ارواحهم هكي يحموا في بناويتهم..
جميله:قالتلي مرت عمك علاء ع مركز يحول فيه بنمشيلهم اني وبوك ونشوف الوضع وبعدين نقولك..
تنهدت دعاء وقعدت ساكته وهي تفكر..
جميله:اني حالك مش عاجبني كل شي صاير معاك..خليني نجي معاك لما سيبتي اسعد..لكن نبي نفهم علاش انتي يصيرمعاك هكي علاش..التصفيح هو السبب..الله لايسامحك يابدريه انتي اللي خليتني نرفعهم غادي..
دعاء شبحت لامها واذكرت جارتهم القديمه بدريه كيف كانت تقنع في جميله بش ترفع البنات للمراة..
🌻🌻🌻🌻
ومشت جميله عشية نفس اليوم للمركز لقاته نظيف ومرتب وكل شي فيه بنظام..
هدرزت مع الشيخه وحكتلها كل شي والشيخه عطتها فازوا عسل معبي اعشاب بهداكا الحساب وقالتلها خليها تاخد منه الصبح والمغرب لمدة معينه بعدين تجي للمركز وتحجم..
⚘⚘⚘⚘⚘
(الحوار باللغة الأمازيغيه)
"عربيه!!"
جيداء تلاشت ابتسامتها وقالت؛ايه ياماما عربيه..
ام امين:لاطبعا مستحيل ناخدله عربيه..في عيلتنا كلها مافي حد لاخدي منهم ولاعطاهم..
امين:واني شن دخلي بيهم كل حد حر في حياته واني نبي البنت وكلمت بوي في موضوعها..
ام امين؛واكيد قالك شاور امك ولا؟
شبحت جيداء لأمين اللي كان يشبح لأمه بحده.
ام امين:اسمعني هني هي كلمه عربيه ماهي متسميه علينا ولاحني نعطوا بناتنا لعرب وانت مش غابي في عاداتنا بالذات مدينتنا حني مستحيل ناسبوا العرب..
امين:وشن العرب يهود!!هاك مجاورتيهم ومصاحبه ناس منهم تواصلي فيهم ويواصلوا فيك!..
ام امين:هدا شي وهداكا شي تاني..وماتكترش نقاش معاي في الموضوع انساها وطلعها من راسك والله ماني خاطبتهالك..
وناضت مشت وخلتهم..
امين ناض وهو معصب مشي لداره..
وجيداء قعدت مقعمزة في مكانها وهي تفكر فالوضع اللي تعقد فجأة وهما ماحسبولاش حساب...
⚘⚘⚘⚘⚘
ومرت الأيام..
كان أمين يحاول في امه..ويحاول مايبين شي لرويدا ويمشي فيها ويقول
"بعد تمي السمستر هدا نكلم العيله"...
فالوقت اللي فيه كان يوسف يراقب في مروة في الكليه وفي عقله بدي ينشغل بيها وتفكيره فيها جدي جدا...
وهي حاسه بيه وحاسه انه حيجيها فيوم ويفتح معاها الموضوع..
اما دعاء..
فكانت ماشيه ع العلاج وامها معاها اذكر فيها لما تنسى وتشجع فيها..
فهالفترة معاش بدت اداوم في الكليه نهائي وبوها وامها هني فهموا انها تبي تسيب الكليه لكن مابي حد يحكي معاها في الموضوع لين هي تتكلم..
دعاء..
لاحظوا فتوري فالقرايه وقلة رغبتي فيها اللي بدت معاي من فترة وممكن اللي صار معاي زادني علي مابيا..وللأسف اني جيت في اخرها ولبزت..
🗝من جهة تانيه..
كانت ازدهار توتي لعرسها اللي تحدد في شهر 4 من هالسنه وكذلك احمد يوتي فروحه بش بيولي لليبيا بعد غياب عنها دام لسنوات...
كانوا مخططين يقعدوا في ليبيا لبعد رمضان بعدين يسافروا لكندا...
🥀🥀🥀
وفي من كان مخطط لشي حيصدم بيه كل احبابه فهاللحظه اللي لمهم فيها معاه..
في حوش اهل جمال..
الصاله..
كانوا كلهم ملتمين فيها البنات وصغارهم وخوهم وعمهم...
العم:ان شاء الله خير ياجمال ياولدي!
خواته قعدوا يشبحوله بخوف وترقب
جمال طبع قبله ع راس بنت اخته آلاء بعدين قال:احممم..بعدين تنهد وقال...بعد وفاة بوي الله يرحمه..اني مسكت كل شي من بعده..وتخليت عن اكثر شي نحبه..الطب..في التخصص اللي كنت متمنيه من وين صغير..طب العيون..تخليت عنه ع خاطر امي بالدرجه الاولى كنت نبي نقعد لامكم حداها..رزقكم كله يقعد تحت يدي بش ماتلهوش بحياتكم وتنسوها..عارف عارف انها امكم زي ماهي امي وانتم تحبوها ممكن اكثر مني..لكن البنادم غصب عنه الدنيا تاخده..ممكن هدا علاش حتى زواج ماتزوجتش كنت نخاف نلهى عن امي...ومع هدا مرضت وتعبت واني ماعرفتش بيها الا لما قربت من الموت..
نزلوا دموعه..
البنات بدوا يبكوا بصمت...وعمهم متأثر هلبه..
رشف ومسح دموعه وقال:الله يرحمها ربي خدي امانته توا خلاص..واني والله حتى بعد ماعدى ع موتها 45 يوم لتوا لاقادر نصدق ولانستوعب..ولاعاد متحمل نقعد في مكان هي مش فيه ولابلاد هي مش فيها..
خواته شبحوله بخوف..
مسح دموعه وهماينزلوا وقال:بنطلع نكمل قرايتي برا..
خواته وعمه انصدموا..
جمال رشف وقال:لكن قبل هكي..قسمت بيناتكم الورث كله ع حسب الشرع في حضور محامي وحتى شيخ..كل وحده فيكم خدت نصيبها...وبالنسبه ليك انت عمي تنازلتلك ع المطعم اللي كنت مشارك الوالد فيه..
العم بصدمه:شن تقول انت!؟
نجلاء بصدمه:جمال رانا تيتمنا ع كبر ياخوي وانكسر ظهرها علاش تبي تكسر جناحنا ياخوي!؟
البنات قعدوا يبكوا..
جمال بنبرة باكيه:اني مكسور اكتر منكم ياخواتي..مدمر..كل شي فيا ادمر..كرهت كل شي بعد غابت عين امي والله معاد تبننت حاجه في الدنيا..خايف نفقد ايماني وندير لروحي حاجه في ساعة شيطان..
خواته قعدوا يشبحوله بألم..
جمال رشف وكمل يقول:اني..اني مطمن عليكم مع رجاله يخافوا ربي..وعمي معاكم...اني معاش نقدر نديرلكم شي صدقوني..لأني والله تعبان تعبان هلبه..
ناضت نجلاء من مكانها وجاته ضاماته..
وخواته ناضوا وجوه..
رجاء رقدت ع كتفه...والاء شدت يده وعطاء وقفت وراه وقعدت تبوس في راسه..
نجلاء:اللي يريحك حبيبي ديره..
آلاء:حني معاك في كل شي ديره..
رجاء:غير ماتنسناش بس..
هو بعدشويه وفرد ذراعاته وضمهم..
وعطاء اللي وافقه وراه حاوطت رقبته بإيديها وضماته..وهو ابتسم..
وعمهم يشوفلهم بإبتسامه..
بنت آلاء:حتى اني خالو حتى اني..
جمال:حولوا حولوا خلوني لهالحلوة بس
ضحكوا خواته من بين دموعهم وبعدوا عنه
وهو رفع بنت آلاء لحضنه وضمها بعدين عطي هاتفه لآلاء وقاللها تصورهم مع بعض..
وقعدت هالصورة في هاتفه للذكرى..
🥀🥀🥀
وبعد تلاته ايام بالزبط..
سافر جمال لأوكرانيا بدون مايودع خواته ماكانوش يعرفوا بموعد سفره نهائيا
وحوش العيله بعد ماخدي موافقتهم باعه ووزع حقه عليهم
وبهكي كل شي كان يربط جمال بليبيا زي الوتد راح لغير رجعه...
⚘⚘⚘⚘⚘⚘
🌸اسبوع عرس ازدهار....
درست سيارة محمد قدام حوش خوه المهدي..
جميله:شكله في ناس جدد جايين يسكنوا هني..
محمد:ايه باينه من كناتر الأثاث اللي قدامه..
شويه وانفتح باب الفيلا..
وخشت سيارة محمد..
وعيون دعاء ع الفيلا اللي جوها سكان جدد غير جمال وعيلته..
لعند مادرقت من قدام عيونها...
دعاء..
كان عرسها حلو احلى من عرس اختها وكل شي جاها حلو ع قيس نيتها..
حتى الكسوة داروها فالصاله وجتها كسوة ماشاء الله..
بس اغرب شي لاحظناه في العرس هو شرقيه وطرحاتها ولبسها..الحق ياربي كانت طالعه حلوة بالمرة واصغر من عمرها..
عارفتها اني شقشق كانت تستغل في الفرصه تقول بالك نطيح ع حد من عيلة راجل ازدهار...هههههههه..
اااه..لعند ماجي يوم حفلة ازدهار يوم لين نموت ماننسى الموقف الحقير اللي صارلي فيه..
⚘⚘⚘⚘⚘
يوم الخميس..
الساعه 12:00قبل الظهر..
"قولي الحق ياجيداء مادرقيش عليا"
جيداء بضيق:الحق يارويدا امي ماتبيش والعيله كلها بعد عرفوا..
رويدا قلبها قريب وقف..لكن شدت روحها وحاولت تثبت رفعت حاجبها وقالت:علاش!؟
جيداء:لانك عربيه ووالله ماكنت نعرف ولاامين يعرف بحاجه زي هادي..ماصارش قدامنا موقف يخلينا نفكروا في الحاجه هادي..وصدقيني والله امين حاول وقاعد يحاول ويارب ماما تقتنع..
رويدا هني عرفت ان موضوعها هي وأمين انحكم عليه بالفشل النهائي..
ولو قالت نعطي فرصة لامين بش يقنع امه ع الغالب مش حيقدر يقنعها وع هكي حيسيبها أمين زي مادار ابراهيم..
وهي مستحيل مازال ترضاها ع روحها..
استجمعت كل قوتها
وحبست دموعها بقوة ومشت بسرعه من حدا جيداء..
جيداء:رويدا يارويدا راجي..
ومشت وراها..
ورويدا مابتش تعدل عليها لين وصلت للمكان اللي فيه أمين.
لقاته واقف يشوف في مخطط..
وقفت قدامه وقالت:لوسمحت..
تفاجأ اول مرة يصير شي زي هدا في الكليه ع الملأ قدام الكل يكلموا بعض..
لف المخطط وقال بصدمه:شن في؟
رويدا:علاش كذبت عليا!علاش ماقتليش ان اهلك مايبوش..
امين شبح لجيداء اللي كانت واقفه بعيد شويه تشوفلهم بقلق..
امين عقد حواجبه وقال:باهي بري توا وبعدين نهدرزوا ع الهاتف مكالمه مش رسايل..
رويدا:لابعدين ولاقبلين..معاش في بعدين ياامين..
ضيق عيونه وهو يشوفلها..
رويدا بلعت ريقها وقالت:انت اصلا الفترة الاخيره تغيرت وكأنك بديت تسحب في نفسك شويه شويه لانك عارف ان موضوعنا مش حيصير منه
امين:رويدا ماتقوليش هكي ماتظلمنيش
رويدا ابتسمت بألم وقالت:لانظلمك ولا تظلمني ياامين..خل نقصروها بدال ماتزيد تطول ع الفاضي..خلاص ياأمين خل كل حد يمشي ع حاله..
امين بصدمه؛شن تقولي انتي!!
رويدا:اللي سمعته..اني بالنسبه ليا لايمكن نرضى ناخد واحد اهله مايبونيش مش مستعده نعيش هالعيشه..اسفه جدا..انسى ياامين خلاص...سامحني معاش نقدر نكمل..
ولفت ومشت بسرعه...
وكأنها خايفه تتراجع عن القرار السريع اللي خداته..
وخلاته وراها واقف جامد في مكانه ومش قادر يصدق اللي صار حاليا..
واخته جيداء تشوفله بحزن..
🥀عدا باقي اليوم عليها في الكليه وهي تبكي وخلاص..
لكن لما جي الباص وروحت..بدلت وجهها بوجه تاني وجه وحده متحمسه تحضر حفلة عرس بنت عمها..
لما روحت..
لقت خواتها لاهيات..
اللي تجبد في شعرها اللي توتي في قفطانها..
وجميله امهم مشت المزين...
هي طول بدلت وتوضت وصلت وبدت توتي في روحها..
⚘⚘⚘⚘⚘
الساعه 7مساءا..
في اخر ايام شهر ابريل سنة 2014..
بدت حفلة ازدهار في اشهر صالات الافراح بالعاصمه..
كانوا جايبين منشطه قالبه الدنيا..
غير خشة ازدهار بروحها حكايه..
ازدهار بروحها كانت طالعه آيه من الجمال..
واحلى شي ميزها انها كانت بسيطه وحتى تسريحتها خلت فيها شعرها مفرود ع طول وبلونه الطبيعي..
كانت حلوة هلبه..
واجواء الحفله كانت مش عاديه..
البنات هيجوا فيها لين عيوا بالذات رويدا اللي تحاول تهرب من حالة حزنها..
المهم..
بعد العشي..
دخلوا الطورطه...
وحطوها في مكان مخصص للعرسان في الصاله..
بعدين طلعوا ازدهار...
وبلغت المنشطه النساوين ان العريس بيخش..
لبسوا كلهم..
ولحظات وخشوا أحمد وازدهار
دعاء..
خشوا عأغنية اليسا بعيونك..
قداش كانوا طالعين ع بعض حلوين هلبه هلبه والاغنيه هكي زادت حلت طلتهم..وهو بصراحه فضيع فضيع احلا من راجل اختها بوييين..وشخصيته طاغيه في حضورها هلبه..
اكتر حاجه حبيتها ان في نص التدريجه غيروا الاغنيه وحطوا"يامحلا الدنيا لما تبي تجمع بينهم" والله تقول تحكي عنهم فعلا..
ع العموم ازدهار نيتها طيبه وربي عطاها ع قيس نيتها..
🗝وفي عز ماهما منسجمين ويتفرجوا ع العريس والعروسه وهما يوكلوا في بعض من الطورطه ويهدرزوا مع ليلى وامل واخت العريس هديل اللي جت معاه..
جت وحده لطاوله دعاء وخواتها وامها وعمتها شرقيه ومرت عمها ناهد..
المراة:السلام عليكم..
ردوا عليها السلام..
المراة ابتسمت وقالت:اني ولدي يكون زميل ازدهار وصديق ليها وديما يشكر فيها وفالعيله..
شرقيه وجهها تغير..
وجميله فرحت في داخلها اكيد تبي تخطب وحده من بناتها لولدها..
المراة شبحت لدعاء وقالت:مواليد كم حبيبتي انتي؟
دعاء :اني مواليد 90
المراة:كويس بكل هدا المطلوب..عندي جاري راجل ماشاء الله عليه ملتزم ومحترم ومن عيله معروفه قداش ليه يدور وطلبه انتي..
كلهم يشبحوا لدعاء..
ودعاء شبحت لأمها..
المراة؛طبعا هو مواليد 68..
كلهم شبحولها بصدمه..
جميله:قصدك 86..
المراة:لالا لا 68..
دعاء من صدمتها ناضت من مكانها وهي ساكته ومشت قعمزت بعيد عنهم وهي مصدومه..وخواتها يشبحولها..
جميله:من جدك انتي جايه تقولي هكي!؟
شرقيه:ياريتك جيتي كلمتيني حتى اني مواليد 76 وقريبه من سنه طول نقزتي ع 90!!؟
ناهد:اصغر من محمد ب5 سنين!؟
المراة انحرجت وقالت:هو هكي طلبه..ع العموم سامحوني اني اسفه..
ومشت من حداهم..
جميله:مصح وجهها...وشبحت لبنتها..
لقتها مقعمزة ومعلقه عيونها في ازدهار وراجلها..عيونها تعبوا دموع..
دعاء..
كنت مقهورة لأبعد حد..يعني مع الطبقه هادي من الناس وين تجي تخطبني وحده منهم تشوفني مناسبه لواحد في عمر بوي معقوله!!!؟
يومها ايقنت ان اللي اني فيه هدا من التصفيح اكيد مافيش غير هكي..
⚘⚘⚘⚘
بعد 4ايام..
مشت دعاء مع امها لموعد الحجامه في المركز..
قعدت تستنى جميله برا مع الزباين..
وخشت دعاء مع مجموعه بنات..
قعمزت كل وحده في المكان المخصص ليها..
دعاء..
وبدت فينا كلنا مع بعض..
يعني بالدور..
ولما وصلت فيا اني وبدت تجرح باللاميته..
فهاللحظه حسيت بجسمي زي اللي بدي ينهار...
كان ضغطي يهبط..
طحت قدامها...
🗝المراة انخلعت..
واللي معاها كذلك..وبدوا يفيقوا فيها..
وبعد فاقت شويه وطلعوها برا وهي يدوب تمشي..
امها لما رتها ماتت من الخوف..
ناضت وجتها تجري وهي تقول:خيرها!!؟
المراة وهي مخلوعه:بنتك الوحيده اللي صارلها هكي..قعمزوها ع الكرسي خل نمشي نكمل شغلي..
خدت جميله بنتها ومعاها وحدات يخدموا في المركز قعمزوها...
ودعاء تأن وتتوجع..
شويه حطت يدها ع بطنها وهي تقول:بنموت ياماما بنموت..في هني شي يقطع فيا ياماما بنموت..
وحده من العاملات فتحت المعوذات في تليفونها ووقعدت تسمع في دعاء..
دعاء بوجع شديد:اااه ياماما..اااه..بيتقطع ياماما ااااه..
جميله خبطت ع وجهها وهي تبكي:حي عليا بنتي حي..اني نبي نصلح ياربي مانبيش نخسربنتي..
العامله؛صلي ع النبي ياوخيتي ماتخافيش مايصيرلها شي ان شاء الله..
ولحظات وهدت دعاء وولت احسن..
واتصلت جميله بمحمد وروحت طول ببنتها...
دعاء..
وجعتني ماما يومها هلبه هي تحاول تنفعني بس مش عارفه كيف..واني هالمواقف اللي نمر بيها كانت تزيد تأزم في حالتي النفسيه اكثر واكثر...
⚘⚘⚘⚘⚘
"جي ساهل الامتحان"
مروة بإبتسامه:ايه الحمد لله..
زميلتها:اهو بابا يتصل..نتلاقوا غدوة مروة..السلام عليكم..
مروة:وعليكم السلام..
ومشت صاحبتها..
وهي كيف جت بتلف وتمشي للكافتيريا..
وقفت في مكانها لما شافت يوسف واقف قدامها..
هو عقد حواجبه وابتسم ونزل عيونه وقال:السلام عليكم..
مروة ووجهها احمر وقلبها يدق بقوة:وعليكم السلام..
يوسف:نبي ناخد من وقتك شويه لو فيها كيف..
مروة بلعت ريقها وقالت:تفضل استاذ..
هو مرر نظره ايمينه بعدين قال:امم..انتي من افضل الطلاب عندي وعند كل اعضاء هيئة التدريس اللي يعطوا فيك..
حتى  اخلاقك ماشاء الله الكل يمدح ويشكر فيها برشة..
هي ضحكت بإستغراب..
هو ضحك ضحكه خفيفه وقال:واني ليا فترة ندور ع بنت تتوفر فيها كل المواصفات اللي راسمها في عقلي..وكلها سبحان الله..اجتمعت فيك..
مروة ذابت في حوايجها من الخجل..
يوسف شبحلها وابتسم بعدين قال:كل اللي نبيه منك تعطينا موعد مع الوالد بس وخلي الباقي عليا..
رن تليفون مروة قالت وهي في قمة الارتباك؛هدا بابا..تو نقوله باهي باهي...ولفت ومشت بسرعه وهي ترعش مع بعضها ومش مصدقه اللي صار بكل..
وهو يشوفلها ويضحك..بعدين قال..
"واهو لقيتها  الكنه التحفونه ياامي"

....يتبع....