"إلا أن يشاء الله"

النهايه"الخاتمه"

✒..
"هيا قصوها توا"
هادي المصورة تخاطب في دعاء وجمال اللي كانوا واقفين قدام تورته ع ادوار كبيره نوعا ما..
جمال بصوت منخفض يصل لمسامع دعاء بس:واحد تنين تلاته اربعه خمسه سته...هيييه..
دعاء:هههههههه..
وهو يشوفلها كيف تضحك وابتسامته ع وجهه..
نجلاء:شوفي كيف فرحان بيها..
رجاء:ايه محلاهم ياربي..
آلاء:يخلوا فيا نكذب انهم مش دايرين علاقه..
نجلاء بضحكه:حتى اني..
وعطاء تشوفلهم وخلاص وتقول في نفسها"توا هكي ياجمال بعدين تقعد تجري انت وياها ع الصغار..واخدها كبيره ياوخيي علاش بس شن ناقصك"
⚘وبعد ماقصوا التورته..كلوا منها هما الزوز بعدين وزعوا ع المعازيم..
هدا كله وجميله كانت تراقب من بعيد..واللحظه اللي قلبها يبيها تجي بش خايفه جت..
وبتروح دعاء مع راجلها...
قعدت تمشي هي وجمال ع طول الممر لين وصلوا في الدروج وبدوا يركبوا ورجاء وآلاء يساعدوا في دعاء مع جمال..
لين وصلوا فوق وطلعوا..
جميله مشت طول وين مافي الباب اللي بيطلعوا منه..قعدت تراجي لين جو بيطلعوا..
وقتها دعاء كانت لابسه كابها.. ونازل ع وجهها ماريتش امها..
وجميله استغلت هالفرصه وجت لجمال شداته من ذراعه..
هو استغرب..
وخواته كذلك..
جميله ودموعها ينزلوا قالت بصوت منخفض:خليكم معاها نبي جمال شويه..
هما فهموا عليها وجو لدعاء وقالت رجاء :تعالي دعاء شويه ويجي جمال..
دعاء:باهي..
جميله تنهدت وقالت:وليدي حلفتك بربي ترد بالك عليها وتتقي الله فيها..بنتي هادي تحملت هلبه راهو..وخاطرها تفرح دوم مش يوم..بالله وليدي ماتكسرها ولاتجرحها بالله عليك خاف ربي فيها..وحطت ايدها ع عيونها وقعدت تبكي..
وجمال وجعه قلبه هلبه..والام بالذات عنده ليها مكانه خاصه.
لهدا حط يده ع راسها وقرب كب عليه وقال:يشهد عليا ربي ياعمتي جميله اني ع قد مانقدر حنسيها كل شي مر عليها قبل ونخليها ديما مرتاحه وفرحانه..وعد ياعمتي..
جميله ابتسمت من بين دموعها وقالت:والله تريحتلك وليدي وان شاء الله مانخاف ع بنيتي معاك..
ابتسم جمال وقال:اطمني ياعمتي..
جميله رشفت وقالت:باهي خلاص سلم ولدي برا لمرتك..تصبحوا ع خير..ولفت ومشت بسرعه وجمال يشوفلها وقلبه ينعصر من الألم وهو يتخيل في اللي مرت فيه دعاء خلا امها موجوعه وخايفه عليها لهالحد.
بعدين التفت ومشالها..
بعدوا خواته لين جاها..وهو شدها وقال:هي بالشويه بالشويه عليك..
دعاء ابتسمت..
وقعد يديدش فيها وخواته طلعوا وراهم..
في هالوقت..
كانت الدنيا ملمومه ع جميله اللي داخت طول اول ماوصلت فيهم...
ومافاقت الا بالسيف ولما فاقت قعدت تبكي بعبرتها ع قد ماحاولوا يهدوها مافيش فايده لين روحت في سيارة ولدها مؤيد وهي تبكي..
⚘بينما وفاق ومروة اللي ماحضروش اللي صار لامهم كانوا ماشيات لاحقات اختهم..ومعاهم عمتهم شرقيه ووحده من خالاتهم..
⚘⚘⚘⚘⚘
في الطريق..
كان جمال يسوق وهو يغني في اغنيه من الزمن الجميل قديمه هلبه ليبيه..
ودعاء تسمعله وهو يغني وقلبها يرفرف..
دعاء..
كان خاطري نشوف شكله وهو يغني صوته كان حلو هلبه بس ماقدرتش نرفع الكاب..الاغنيه كانت حلوة اول مرة نسمعها كلماتها معبره وتوصل القلب..
🗝سكت جمال بعدين قال:تعرفي تفاجئت هلبه لما عرفت ان  عمي المهدي اللي كان جارنا عمك..
دعاء:اني اكثر...
جمال:اكيد كنتوا تجوهم؟
دعاء:ايه..
جمال ضحك وقال:سبحان الله..
دعاء ضحكت واحتفظت بصمتها..
بعدين جمال رجع يغني بس هالمرة الاغنيه مصريه وكذلك من الزمن الجميل..
دعاء..
حسيته كلاسيكي وفعلا راجل ناضج نعطيه عمره لما نشوفه تصرفات ونتعرف ع صفاته اكثر..
بس طبعا وقتها كان في فقلبي خوف بسيط لأن الإنسان ماينعرفش حق الا بعد العشرة..
🗝ووصلوا العرسان لحوشهم..اللي قلنا عليه قبل انه قصر..
اللي روه من اقارب دعاء فتحوا فامهم فيه..
طبعا دارولهم شوط قصير في الجنان بعدين خلوهم يخشوا..
واللي هدا روح ع حاله...
⚘⚘⚘⚘⚘
"قصر ياجميله قصر سياح نياح ماشاء الله"
جميله وهي مبتسمه من بين دموعها :ماشاء الله..
مروة؛ارتاحي ماما ع دعاء..
جميله تنهدت وقالت:ربي يهنيهم يارب..
كلهم بأصوات متقطعه:آمين..
🗝وقعدوا سهرانين لقرب الفجر وهما يضموا ويهدرزوا..
ومع اذان الفجر اللي هدا بعد ماصلى خدي تركينه ورقد..
ماعدا خوات دعاء..
كانوا في دارهم القديمه..
مروة حداها صغارها راقدين..ورويدا حتى هي..
ووفاق معاهم..
رويدا:لما بنجيب المرة هادي نبي امي معاي..
وفاق:جوازها واتي راهو..
رويدا:ايه وعبدالله بيديرلها التأشيره لكن ماتقولولهاش نبيها مفاجأة..
ابتسموا البنات..
بعدين مروة قالت:ماتتصوروش قداش فرحانه لدعاء..
رويدا:ايه صبرت ونالت..
وفاق:ربي يدوم عليها يارب..تعرفوا من توا فاقدتها..
رويدا:حتى اني..قبل هالوقتي معانا ماتبطلش هدرزه لين لسانها يجف..
مروة بضحكه:ايه تقول مانصدق نلتموا بش نهدرز..
تنهدت رويدا وقالت:امي نخمم فيها كيف بدير بروحها توا..
وفاق:اني قريبه عليها تو نقول لمحي يحطني  هني لما يمشي لعمله ماتخمموش فيها..
مروة :حتى اني كل اسبوع حنجيها ان شاء الله.
هزت راسها رويدا وهي تشوف لولدها ⚘⚘⚘⚘⚘⚘
بعد ماصلوا الفجر..
كل حد فيهم قعمز في مصلاه يقرا في القرآن..
جمال بعد كمل ورده قعد يشبح لدعاء وهي تقرا..
ابتسم وقال:دعاء..
سكتت وشبحتله وهي تقول:نعم؟
جمال:تقري في البقره؟.
دعاء بإبتسامه:إيه..
جمال هز راسه وهومبتسم وناض..
وهي تابعت قراءة..
هو حط المصحف في مكانه...بعدين مشي للسرير خشله وتغطي..حط يده ورا راسه وقعد يتفرج ع دعاء وهي تقرا وابتسامته ع وجهه..
كان النوم بيغلبه..ويسدل ستار عيونه بس هو كان يقاوم يبي يقعد يتأمل فيها وخلاص..
بس في الاخير النوم غلب..
شويه وهي كملت..
دعاء:سبحانك اللهم بحمدك اشهد أن لاإله إلا انت استغفرك واتوب اليك..
وناضت ومشت حطت المصحف في مكانه جنب مصحف جمال..
بعدين التفتت وشافاته كيف راقد..
تنهدت بإبتسامه..وقعدت تتفرج عليه شويه..
بعدين مشت للروشن تبي تغطيه بالستار بش مايخشش ضي الشمس ويضايقه..
فهاللحظه وقفت شويه وهي تشوف للسمي..
بعدين غمضت عيونها وقعدت تدعي في نفسها..
"ياربي لك الحمد حتى ترضى ولك الحمد ان رضيت ولك الحمد بعد الرضى..حمدا يليق بجلال وجهك وعظيم سلطانك"
بعدين صكرت الستار..
ومشت حولت ملاية الصلاة وعلقتها..
وجت للسرير خشتله...
حطت يدها تحت خدها وقعدت تتأمل فيه وهي تقرا في اذكار الصباح لين خداها النوم ورقدت..
⚘⚘⚘⚘⚘
الصبح..
كان حوش اهل دعاء زي خلية النحل..
دوشة الصغار...وهدرزة النساوين والرجاله..
وصفر فطور طالعه وخاشه...
في دار المعيشه..
رويدا:لاااااا ياحنه الا عبدو ايوااه حتى كان اخته مانسمحلكش..
ضحكوا..
ريمه بضحكه: عبدالله بالو بالو بالو بالو..هي باهي..
كلهم:ههههههههه
رويدا:طويل طويلي ياحنه ربي يئبرني طوله..
جميله:قليلة ادب الفرخه هادي..
ضحكوا...
ع رنة تليفون مروة..
رويدا:هدا الشيخ كان مايصبحش عليها اشبح شن يصير فيه..
مروة ناضت وهي ترقص في حواجبها وتقول:موتي قهر..
ومشت طلعت من خداهم وخلتهم يضحكوا..
 ع جية وفاق:نوضي رويدا مؤيد قال راجلك يبيك..
رويدا:جي!؟..
عيشه:حتى انتي جاك يتصبح عليك..
ضحكوا.
رويدا ناضت بتطلع  لاقت مروة خاشه قعدت تغني؛اوو حتى راجلي بيصبح عليا..وحتى راجلي يدلع فيا..
خشت مروة وهي تضحك وتحرك في راسها يمين ويسار..
نجيمه بضحكه:ربي يحفظها هالمهبوله..
جميله بضحكه:ويحفظ ماعندك..
.........
رويدا وصلت برا لقت عبدالله واقف..
رويدا:ياهلا هلا وكرتون حلا..
عبدالله بضحكه:صباح الورد..
رويدا:صباح الفل..شن جو..
عبدالله:مليح..شن جوك انتي..وشن حال عمتي اليوم..
رويدا:الحمد لله تمام التمام..
عبدالله:جبتلك القفطان اللي قتيلي عليه..
رويدا:ياوخيتي سلمه..
ضحك وقال:وبري قولي لعمتي التأشيرة واتيه..
رويدا بإندهاش:الله !
عبدالله بضحكه:قوليلها قالك عبدالله وتي روحك..
ضحكت بعدين قالت:مش عارفه كان يرضى بابا يبعتها مرتين توا..وفي جيابي..
عبدالله:خليه عليا تو نحاول معاه..
رويدا:نجيهولي ياربي..
عبدالله بضحكه:ترا طلعيلي المعفن مصعب..
رويدا بإبتسامه:هي شويه بس..
ولفت وخشت داخل..
⚘⚘⚘⚘⚘⚘⚘
بخ من عطره..
ومشي طلع من الدار..توجه للدروج..
ونزل لوطا وهو مبتسم وحاجبه اليسار مرفوع ويقول:وين مشت؟!
لين وصل لوطا..
دور عليها في الصالون..والديار..والصاله..مالقهاش..
بعدين مشي للكوجينه..
خش..لقاها مقعمزه ع طاولة الاكل تاكل في التفاح وتقرا في كتاب..
ابتسم بتعجب وجاها وهو يقول:شكلك درتي رحلة اسكتشاف..
شبحتله ووجهها احمر من الخجل وقالت بشي من الربكه:نضت بكري ماعرفتش شن ندير قلت خل ندير دورة في الحوش نشوف شن فيه..آسفه..
قعمز وقال بعقدة حواجب:علاش تتأسفي !!؟.
دعاء:مش عارفه حسيت كأنك اضايقت..
جمال بضحكه:ياعبيطه اني نهدرز عادي وبعدين هدا حوشك اللي يعجبك فيه ديريه وكان في شي ماعجبكش فيه نغيره..
دعاء بإبتسامه:لالا كله حلو..امم..وطلعت زي ماتوقعتك تحب القرايه..
جمال:في الغربه حبيتها حببوني فيها الناس اللي برا تلقيهم في كل تركينه يقروا..
دعاء:ايه اني نحب نقرا..بس يعني ماحصلتش كتب هلبه بش نقراهم..ايه حقه خديت الكتاب هدا من غير مانقولك..اسفه..
جمال شد ذقنه بيده ورفع حواجبه وهو يشوفلها..
ضحكت وقالت:باهي خلاص اسفه معاش نعاودها..
نزل حواجبه ومط شواربه بملل..
دعاء غمضت عيونها بشده وقالت بضحكه:ووواك..
جمال:ههههههه..
بعدين خدي منها الكتاب وقال:ترا ذوقينا قهوتك..
ابتسمت دعاء وقالت:شن تحب سكرها؟
جمال :معدله..
دعاء:باهي..
وناضت طول قعدت ادور في الحاجات..
وهو معاها بعيونه...بعدين ابتسم وشبح للكتاب فيده وقعد يقلب فيه...
فالوقت اللي فيها دعاء طلعت حاجات القهوة...
وكيف بدت بديرها...
سمعاته يقول..
"حورائي.."
ابتسمت وقلبها دق بالقوة وهي تكمل في شغلها..
وهو كمل يقول...
صباحك سكر..
تضعين الماء في الركوة فتقول لك:أريد اجازة من النار في هذا الصباح فأغليني على حرارة قلبك..
تتوهمين ان الماء يغلي ولاتعرفين انه يقف على رؤوس أصابعه يحاول لمس اصابعك...
تفتحين درج الملاعق فتقول كل ملعقه:خذيني أنا!
وحين تأخدين ملعقة تشهق كما تفعل ملكة الجمال حين ينادي بإسمها في أخر المسابقه!..
وتبقى بقية الملاعق حزينه تنتظر حظها معك صبيحه الغد..
حطت البكرج ع النار والتفتت تشبحله..
هو شبحلها وقال :
تمسكين علبة القهوة فيقول البن:خلقت لأوقظ الناس من غيبوبه الصبح فمن يوقظني هدا الصباح من غيبوبتي بك!
ضحكت والتفتت للبكرج وخدت حكه البن فتحتها وبدت تحط في القهوة..
هو تنهد وقال..
تضعين الملعقه فالركوة وتحركين فيدوخ الماء!
تضيفين القهوة للماء فتقول لك:حركي برفق وذوبيني بك اكثر!
دعاء بضحكه وخجل قالت:جمااال خلاص..
جمال:هههههه..حويرتي الحشوميه..
ودعاء تضحك وبذوب من خجلها...
🗝وشربوا العرسان قهوتهم مع بعض..بعدين فطروا..
وبعدها جهزوا ارواحهم وطلعوا مع بعض خطموا ع حوش نجلاء...
جمال وهو واقف معاها هي ودعاء في الجنان:هي بسرعه عطينا غدانا..
نجلاء بضحكه:ثواني بس..
ومشت خشت داخل..
دعاء بضحكه:كان خديت بخاطرها وخليتنا نتغدوا معاها..
جمال رفع نظاراته وقال:اني نبي نتغدا مع مرتي بروحنا..
ابتسمت دعاء بخجل وهو ابتسم ونزل نظاراته ع عيونه وشبح للباب..
خفت ابتسامته لما شاف منال طالعه..
ودعاء شبحتلها وهي مبتسمه بإستغراب..
منال بإبتسامه:السلام عليكم..
ردوا عليها :وعليكم السلام..
منال:مبروك..
جمال ودعاء :الله يبارك فيك..
منال:شنو ناويين تتغدوا برا..
جمال:الجو قنين والتغدايه ع البحر توا مافيش احلى منها..وشد يد دعاء...
منال شبحتلهم وابتسمت بعدين قالت:توقعتكم تسافروا اليوم..
جمال:غدوة ان شاء الله..
ع طلعة نجلاء وولادها وهما قايمين الحافظات لما شافت منال ارتبكت وقال:اهو غداكم حبيبي..
خدي منها جمال وقال بإبتسامه:يعطيك الصحه..شبح لولدها ايهم وقال..اطلع معاي يابطل..
وطلعوا الزوز..
نجلاء:حيي نسيت حافظه البابا غنوج..وخشت تجري..
منال بإبتسامه:جمال يحب البابا غنوج هلبه ياكل فيه بروحه بالخبزة مرات..
دعاء وهي مبتسمه بعدم فهم:اها..
منال:حافظي عليه كويس جمال مافيش منه..
دعاء هزت راسها وهي تشوفلها بإستغراب..
ع طلعة نجلاء عطت لدعاء الحافظه وقالت:هاك دعاء..
خدت منها..
ع خشة جمال وولد اخته..
جمال:هيا دعاء..
دعاء:هيا...بالسلامه نجلاء..وسلموا ع بعض بالخد..
نجلاء:صحتين ع قلوبكم..
دعاء بإبتسامه:سلمك..
ولفت ومشت طلعت وجمال صكر الباب..
نجلاء:خشي منال الغدي واتي..
منال:قنينه ماشاء الله عليها..
نجلاء بإبتسامه مجامله:ايه..هي خشي..
منال هزت راسها بإبتسامه..
وخشت مع نجلاء..
⚘في الطريق..
كان جمال فاتح الراديو وفيه اغنية ليبيه قديمه يغني معاها..
ودعاء تفكر في البنت اللي سلمت عليهم عند نجلاء كانت تبان غريبه وعليها اشارات استفهام..
جمال نقص الراديو وقال؛حويرة..هدرزي..
ابتسمت وقالت:بنسألك..
جمال:أسألي..
دعاء:من هي البنيه اللي شفناها في حوش اختك؟
جمال تنهد بعدين قال:تو بعد نوصلوا للبحر ونتغدوا غدانا نجاوبك ع سؤالك..
دعاء بأبتسامه مجامله وقلبها ناخصها قالت:باهي..
⚘وبعد طول مسافه..
وصلوا للبحر..
فرشوا ع قرب  الشط حصيرة وقعمزوا..
وبدت دعاء تحول في السلفر"القصدير" عن الحافظات..
وترتب فيهم وجمال يراقب فيهم..
بعدين حطتله كشيك..
وخدت هي وقال:هيا ابدا..
ابتسم ..وخدي اول كاشيك..وقربه ليها..
هي ابتسمت بخجله وكلت من يده..
دعاء..
زمان كنت نقرا في الحديث اللي يقول فيه الرسول صلى الله عليه وسلم..بما معناه ان اللقمه يضعها الراجل في فم مرته صدقه..
علاش صدقه لانها تفرح قلبها وتحسسها بشعور حلو اني حسيت بيه في هديكا اللحظه..
🗝بعد ماكلت..حتى هي وكلاته...
بعدين قعدوا يهدرزوا والهدرزة متاعهم كانت هدرزة تعارف..
لعند ماكملوا الغدي..
غطت دعاء الحافظات وخداهم جمال حطهم في السيارة..
بعدين خداها ومشي بيها للشط وقعدوا يتمشوا..
جمال:بكري سألتيني سؤال تراجي في اجابته ولا؟
دعاء:ايه..
جمال:هادي هي خطيبتي السابقه..
دعاء وقفت..
هو وقف معاها وجي قدامها وقال:اول مرة شفتها كانت عند اختي عجبتني من اول ماريتها..ولما تكررت اللقاءات زاد اعجابي بيها وع طول كلمت اختي تكلمها ولما هي قبلت طول خطبتها..قعدنا سنتين مخطوبين وكنا مع بعض عايشين قصة حب زي ماوهمنا ارواحنا..لين جي وقت صارت فيه ظروف بينتلي ان كل اللي عشته معاها كان مجرد وهم..لأن الحب الحقاني يبان وقت الشده..وهي في وقت الشده رخت بيا وخلتني..واني من بعدها مسحتها من حياتي تماما..
دعاء بحزن:نقدر نعرف السبب اللي خلاها تسيبك..
تنهد وقال وهو يشوف حواليه:لاني متحمل مسؤوليه عيلتي تبيني ليها هي بروحها...شبحلها وقال..فهمتي عليا..
دعاء هزت راسها وهي مضايقه..
جمال:الله يرحمها امي ماكانتش راضيه ع ارتباطي بيها بدون ماتقولي اني عارف بروحي..بس مابتش تمنعني لأني نبيها..
وبعد سيبنا اني وياها..تعبت امي هلبه..تعرفي..حلم حياة امي وقتها تشوفني متزوج مستقر بصغاري..حاولت تردنا لبعض..لدرجة انها قالت مانبيكش تقعد معاي في الحوش برا خود حوش قريب مني وتزوج.. عارفه اني مستعد نقعد عمري كله عازب ولانخليها تقعد بروحها..
بدوا الدموع يعبوا عيونه ويطيحوا وهو يقول..صكرت راسي وقعدت معاها ومع اختي بعد ترملت..
بخنقة عبرة قال:غصبتني نخطب وقتها..خيرتني بين اني نخطب وبين رضاها..وظلمت معاي بنت ناس وخطبتها اني مانبيهاش....بلع ريقه وغمض عيونه بشده بعدين فتحهم وقال ..لين جي عرفت فيه خبر اسود..عرفت بمرض امي الخبيث..اللي كانت مدرقاته علينا وقت بش ماتزيدش تربطني بيها..من لما عرفت واني الدنيا كلها ظلمت في عيني بس حاولت مانخليهاش اظلم في عينها..حاولت..والله حاولت..لكن ربي قدر وكان اللي يبيه..وماتت امي..
وحط ايديه ع وجهه وقعد يبكي..
دعاء..
هو يحكي..ويبكي ..وقلبي يتقطع...كنت مذهوله واني نسمع والحزن متملكني في نفس الوقت لين شفت انهياره قدامي..
دعاء بنبرة باكيه:الله يرحمها ويغفرلها جمال..ادعيلها بالرحمه والمغفرة ياجمال...جمال..
حول ايديه وقعد يمسح فدموعه وهو يقول:الله يرحمها ويغفرلها..الله يرحمها..سامحيني..لكن امي وين تجي في السيرة ولانذكرها مانقدرش نتمالك روحي..
هي رفعت ايديها وشدت راسها ورفعت روحها وقربت راسه ليها وباساته..
دعاء..
كنت نبي نحسسه بالراحه والامان اللي هو حسسني بيهم امس..حاولت نديرله شي يهديه..
🗝هو ضحك من بين دموعه وقال:ياني طويله هلبه يانتي قصيره هلبه..
بعدت دعاء وهي تضحك وقالت:انت طويل هلبه..
جمال:وعلاش مش انتي القصيره..والله قصيره حق عاد راسك واصل لمرفقي!
دعاء:ههههههه..
وجمال ابتسم وهو يتأمل في ضحكتها..
⚘رجعوا تمشوا مرة تانيه وهدرزوا في مواضيع مختلفه..
بعدين لموا الحصيرة وركبوا سيارتهم..متوجهين لحوش اهلها بش تسلم عليهم قبل لتسافر..
استقبلوهم بالزغاريد..
بعدين خش جمال هدرز ع عمه محمد ونسيبه مؤيد شويه..
وكذلك دعاء هدرزت ع امها وخواتها..
ويدوب شربوا طاسة عصير وتوكلوا..
طبعا ماطلعوش الا بعشاهم اللي وتاته ع السريع جميله..
⚘⚘⚘⚘⚘
دعاء..
تاني يوم الصبح..
كنا في المطار الساعه 8ونص ورحتلنا كانت 9ونص بس طبعا لاننا في ليبيا ركبنا الطيارة الساعه عشره الا ربع ههههه..
المهم..
هادي كانت المرة الأولى اللي نركب فيها طيارة درت لجمال العار وهو مسكين يحاول يهديني ويسكتني..
وفالنهايه وصلنا لتركيا بسلام..
سبحان الله كان خاطري فيها..وجمال اختارها منه ليه..
ع قد ماهدرزت عليها رويدا جي خاطري نمشيلها وربي حققلي هالأمنيه..
طبعا مع من تعب الرحله ارتحنا في الفندق...
وبعد صلاة المغرب طلعنا ادهورنا في اماكن معينه كانت حلوة وعجبتني..بس اني كان خاطري نمشي للمكان اللي كله تلج خاطري نلعب بيه ونرقد عليه..ههههههه
................
الزوز كانوا يمشوا بشي من الصعوبه من ثقل اللبس اللي لابسينه..وكذلك خطواتهم اللي كانت مغرقه رجليهم في الثلج..
شبحت دعاء لجمال لقت خشمه وخدوده حمر ضحكت..
جمال شبحلها وقال وهو رافع حاجبه اليسار:خيرك تضحكي..
دعاء بضحكه:شي..
جمال:شي!! قولي شن يضحك فيك..
دعاء:ههههه..لالا..
جمال:اخر مرة نقولي قولي..
دعاء وهي تضحك حركت راسها يمين ويسار ..
شافاته جايها هربت تجري بصعوبه وهي تضحك..
وهو في جرتها يقول:تو نوريك لا شن شكلها..
دعاء:هههه..لالا..بنطيح..
جمال:اوقفي باهي..
دعاء بضحكه:لااالااا..
ومعاش قدرت تجري طيحت روحها ع الثلج..
جمال بخوف:دعاء!
دعاء:مافيا شي..مافيا شي..غير جرب انطرح عليه فيها جو يهبل..
جمال رفع حاجبه وهو يشوفلها..
دعاء:ههههه..غير جرب هيا..
هو تنهد..بعدين لف وجي جنبها وانطرح...
وتنطر الثلج ع دعاء..
دعاء بضحكه:انفجار ذري..
جمال حدف عليها التلج وقال:قولي شن يضحك فيك..
دعاء ردتهاله وقالت:لااااااا..
جمال:مازال تقول لا...
وقعد يحدف عليها وهي ترد..
بعدين انقلبت وبعدت عنه ورقدت وهي عاطيه بوجهها للارض بعدين شبحتله..
هو قرب منها بنفس الطريقه ورقد نفس الرقده وشبحلها..
قعدوا يتأملوا في بعض شويه بعدين قال:مهبوله وبتهبليني معاك..
دعاء بضحكه:وهو المطلوب..
ضحك جمال بإستسلام..
وهي قعدت تضحك معاه...
دعاء...
وحتى هو كان خاطره في شي بس في مكان دافي مش مثلج واللي خاطره فيه شي جنوني ويقولي اني مهبوله..
⚘في وحده من الاماكن الريفيه في تركيا..
كانوا ماشيين مع بعض في طريق وهما يمشوا في الدراجات..
جمال:ركبتيها وانتي صغيره..
دعاء:ايه هلبه..بس توا خايفه شويه..
جمال:قتلك معاي اني ماتخافيش..
وقفوا..
هو ركب وقال:هي اركبي..
دعاء قامت عبايتها وركبت...وخدت نفس..
مد يده وهو يشوفلها..هي ابتسمت وشدت يده..
جمال:واحد..اتنين..تلاته...هيا..
وبدوا يسوقوا في الدارجات وهما شادين ايدين بعض لكن مش بسرعه...
وكملوا الطريق وهما هكي واللي يشوفهم كان يبتسم تلقائيا...
وفي اخر الطريق..
دعاء:لاااا جمال ماتسرعش والله نعيط..
جمال:هههههههه...
وشويه ووقفوا...
دعاء:الحمد لله ربي سلم..
جمال بضحكه:خوافه..
شبحتله ع جنب وهو يضحك عليها..
⚘دعاء..
وكنت نبعت في الصور يوميا لماما وخواتي في كل مكان نمشوله..اااه..مع جمال اني قضيت احلا ايام عمري..والله العظيم تقول عمري مابكيت ولاضاقت بيا الدنيا ولاريت هم في حياتي..الحمدلله حتى يبلغ الحمد منتهاه..
🌻🌻🌻
وقبل رمضان بأسبوع روحوا العرسان..
قبل بيبدوا يجهزوله..بس اتفاجئوا بأن عم جمال خدالهم قضية رمضان كامله من كل شي...
دعاء..
قبل رمضان كنا يوميا نطلعوا مانقعدوش في الحوش بكل..
ومرة بس مشيت لحوش اهلي تعشينا غادي..
ومرة مشينا لحوش نجلا وكانوا خواته وقتها كلهم ملتمات غادي قعدنا يوم كامل..
فهااليوم وحني مروحين..
دعاء:مش عارفه خيرني دخت فجأة..
جمال بقلق:اهو حبيبتي قريب نوصلوا..
وصلوا قدام وحده من المصحات..
وخش جمال بمرته داخل..لقوا دكتورة صحة عامه حكتلها دعاء شن حست..والدكتورة طول طلبت تحاليل الدم..
وبعد فترة مش طويله طلعوا التحاليل..
الدكتورة:لو سمحتي تعالي معاي لطبيبة النساء..
دعاء:نساء!!؟
الدكتورة:ايه..تفضلي..
دعاء وهي خايفه مشت طلعت مع الدكتورة لقسم النساء..
وجمال لحقهم وقلبه مشغول ع دعاء..
خشت لحجرة الدكتورة..وهو قعد واقف برا يراجي..
شويه وطلعت دعاء وهي مبتسمه بخجل..
هو جاها ملهوف وقال:شن في ؟!..
دعاء بإبتسامه خجل:طلعت حامل..
جمال جمد في مكانه..
دعاء بإستغراب:خيرك!؟
جمال ضحك وقال:مش عارف شن حسيت!! قلبي قريب طلع من مكانه..
دعاء بضحكه:يعني فرحان ولاشني!؟.
جمال بضحكه:فرحان طبعا من غير كلام هادي..
دعاء..
روحنا وفي الطريق خدينا طورطه واحتفلنا في حوشنا بروحنا..وتاني يوم الختوش اللي عندي دار زردة وعزم فيها حتى عيلتي ع خاطر الحمل..خلاني نتبخر من الحشم قدام بوي وخوتي..
بس فرحته هادي مع فرحة امي وخواته يومها خلتني فرحانه بزياده....
🗝وخش رمضان..
في اول عشرة ايام دعاء وجمال فطروا في حوشهم..ودعاء كان مدلعه راجلها اخر دلع حتى لما يمشي لخدمته تبعت معاه مايتسحر بيه لأنه يسهر غادي..
بعدين بدت العزايم..خواته..وخواتها...
وعمه حتى هو عزمهم...
ومرة عند اهلها عزومه كانت لخواتها كلهم ماعدا رويدا طبعا..
دعاء..
برغم انه اول رمضان مش مع اهلي..بس كان غير مع جمال..
ركزوا قاعده نقول مع جمال..مش مع الزواج..يعني اللي حلا حياتي وغيرها هو جمال الزوج الصالح بمعنى الكلمه مش الزواج بحد ذاته...اااه ربي يرزق كل بنيه باللي زي جمال واحسن منه..ولو نشك اني في احسن من جمالي هههه..
⚘⚘⚘⚘⚘
في العشر الاواخر..
كانت دعاء متفرغه للعباده تماما..وجمال ع قد مايقدر مع خدمته..
وفي يوم...
كانت دعاء تكلم في امها..حست من صوتها انها مضايقه بعد صكرت منها قعدت تبكي..
ع خشة جمال للحوش..
وهو ينادي.. "حورائي...حويرتي"
لين خش عليها دار المعيشه لقاها تبكي..
جاها وهو خايف وقعمز جنبها وقال:خيرك!!مريضه!!تحسي في حاجه!!؟
دعاء وهي ترشف:توا كنت نكلم في ماما..حسيت من صوتها زي اللي مستاحشه..كلهم مهناش وهي قاعده بروحها في الحوش وجعتني..وقعدت تبكي..
هو حط يده ع راسه اللي كان مغطي بحجاب الصلاة وقال بإبتسامه:باهي اغسلي وجهك واتصلي بيها قوليلها توتي روحها بنخطموا عليها ونطلعوا للبحر مع بعض..
دعاء وهي متفاجئة:توا؟!
جمال:ايه توا..هي بسرعه نوضي..
دعاء:لكن انت كيف مروح من الخدمه تاعب
جمال بضحكه:لاتاعب لاشي..ياودي هيا نوضي يبستي ريقي..
ضحكت بعدين ناضت..وكيف جت بتمشي ولت..باست ع راسه بعدين مشت بسرعه..
هو ابتسم من قلبه بعدين تنهد..
⚘وطلعوا من حوشهم لحوش اهل دعاء..
في الطريق جمال كلم عمه محمد خدي اذنه بش يطلع عمته جميله وهو اذنله..
وصلوا للحوش وخدوا جميله ومشوا للبحر بعد ماخدوا معاهم حاجات..
قعمزوا حدا الشط..هدرزوا وكلوا..بعدين تمشوا ع الشط..
بعدها روحوا وفي طريقهم وقفوا ع واحد من محلات الملابس خدي جمال لجميله لبسه وهي بالحلفان قبلته منه..
ومش هكي بس خدالها حتى حذاء وشنطه..وعرف منها مقاس عمه وخداله بدله عربيه وبلغه..
وجميله لو حلفانه ماكانت خدت منه حاجه..
دعاء..
واني كنت نزيد نحبه اكثر واكثر ونحمد في ربي عليه في دقيقة الف مرة..ياربي ماتحرمني منه طول عمري..
في نفس الوقت فكرت ندير لامه وبوه شي...طلعت عنهم صدقه...وخبرته عنها كنت نبي نفرحه زي مافرح امي..
ويااااه فرحته كانت لاتوصف باللي درته..
⚘وعاد وصلت المعلومات لباقي النسابه باللي داره جمال..
امشي ياإلياس حتى انت طلع عمتك جميله لوحده من المنتزهات..وخودلها عباية قنينه وشبشب نازك..
ودير مادارو حتى انت يامحي وطلعها تتسحر في وحده من المطاعم وخودلها قفطان وريحه..
وياعبدالله لولا عفسه محمد فيك راك توا تتدهور بيها في قبرص...
والكاسب الوحيد جميله كسبت ولاد فعلا مش بس نسابه💖
⚘⚘⚘⚘⚘⚘⚘
عيد الفطر المبارك...
الساعه العاشرة صباحا..
كانت دعاء لابسه ومتأنقه وتبخر في الحوش..
ع خشة جمال..
جمال:حورائي..
ضحكت..
جاها وعيدوا ع بعض..بعدين كبت ع راسه وايديه...
جمال:حورائي كل شي واتي.!؟
دعاء بضحكه:ايه ياروح حوارئك..
قرصها من انفها وهو يضحك بعدين مشي ركب فوق..
دعاء..
محلاها ملاطفته ليا والاسم اللي ينادي فيا بيه"حوارئي" يخطر عليا لما السيده عائشه رضي الله عنها كانت تقول الرسول ينادي فيا "حميراء" لانها بيضا حمرا زي مانقولوا..
واني لاني عيوني حور جمالي ينادي فيا حورائي..خلاني ننسى اسمي...ههههههه..
⚘وشويه وجو خواته عيدوا عليهم...وقعدوا للغدي بعدين مشوا لحياش متاعينهم...ودعاء وجمال طلعوا يدهوروا...
وتاني يوم🌷
كانت اللمه في حوش اهل دعاء...
خواتها كلهم كانوا غادي حتى رويدا...
بعد لقاء حميم بين افراد العيله ومعايدات..
قعمزوا مع بعض وبدوا يهدرزوا وكلهم لهفه وشوق لمعرفة اخبار بعض...
⚘⚘⚘⚘⚘
جميله وهي تلبس في ملايتها:هي بسرعه وتوا السفر خل بنطلع نسلم ع وليداتي..
وفاق:ماما وين يلتموا نساباتها تنسى بناويتها..
جميله بضحكه:بري تحركي انتي وياها ديروا اللي قلت عليه..
دعاء ضحكت وقالت:باهي غير ابدي بالكبير باهي ماما..
مروة ورويدا مع بعض:ابدي بالقديم..
شبحوا لبعض من فوق لتحت..
وفاق:نقولك ماما ابدي بالصغير وخلاص..
جميله دفتهم من عليها ومشت وهي تقول:بروا عليا غادي..
وين وصلت في باب المربوعه خشت وهي تقول بإبتسامه:السلام عليكم شن حالكم..
هما ناضوا وقفوا واللي هدا بدي يرد..
"وعليكم السلام..كيف حالك عمتي..اووو عمتي جميله.."
وجميله مشت تسلم عليهم وبدت بكبيرهم...
البنات برا وهما يتصنتوا..
دعاء بصوت واطي وهي ترقص في حواجبها:بدت بالكبير صقع عليكم..
ومشت للكوجينه..
شبحوا التلاته لبعض بعدين ضحكوا ومشوا لحقوها بش يوتوا الغدي...
⚘⚘⚘⚘⚘
بعد المغرب..
دعاء وهي تلبس في شاربتها ع مراية المدخل..
جميله:امتى عندك مراجعه؟.
دعاء:سادس يوم العيد..
جميله:باهي ديري تحاليل وشوفي دمك ديما تأكدي منه في فترة الحمل..
دعاء بإبتسامه:حاضر ماما...
عمر فم الباب:دعاء قالك جمال هيا..
دعاء:طلع؟
عمر:ايه..
دعاء:باهي...وجت لأمها سلمت عليها بالخد..هي بالسلامه ماما..
جميله:بالسلامه بنتي..
بعدين مشت دعاء طلعت وعمر مشي معاها بش يسقدها..
وامها قعدت واقفه في الباب تشبحلها لين ادرقت..
بعدين تنهدت وخشت داخل..
لقت قدامها محمد قال:خيرك..
جميله بإبتسامه:شي..شن رايك نديرلك زميته؟.
محمد بإبتسامه:ديري..
جميله:شويه وبس..ومشت طول للكوجينه..
وهو مشي للمربوعه وفي نفسه يقول..
"هادي سنة الحياة ياجميله ربيناهم وكبرناهم وحني عارفين ان بيجينا يوم يفارقونا فيه ويشوفوا حياتهم..ربي يهنيهم العمر كله"..
وقعمز وخدي ملف من ملفات الخدمه ولبس نظراته وبدي يقرا فيه...
⚘⚘⚘⚘⚘
بعد ثلاثه أيام...
في حنان حوشها وهي تسقي في الورد كانت تغني..
هنعيش ونشوف..معاناة وظروف..
والفرحه حترجع من تاني..والدنيا حتبقى مصالحاني
حالنا بيتغير في ثواني ..وفي غمضة عين..
فجأة انفتح باب الفيلا..
خش جمال وقال:شنو حورائي واتيه..
حطت اللي فيدها وقالت:ايه..ومشتله..
جمال:بنطلعوا من العياده لحوش عطاء طول..
دعاء:تمام..
ومشوا طلعوا للسيارة وركبوا مع بعض وتحركوا بإتجاه العياده...
دارت دعاء مراجعتها واطمنت ع نفسها والبيبي..
بعدين خداها جمال ومشوا لحوش اخته عطاء اللي كانت عازمتهم هما وخواتها ع الغدي...
⚘في حوش عطاء..
تحديدا الكوجينه..
نجلاء:غير كان هنيتي روحك يادعاء..
دعاء وهي تحط فالسلاطه:والله مافيا حاجه يانجلا..
عطاء:هيا طلعي البخش الاء..
الاء:هيا هي..
وطلعت الاء بالبخش ولحقتها نجلاء بالفوط..
وقعدوا عطاء ودعاء برواحهم..
عطاء:مشيتي للمراجعه؟.
دعاء وهي تحط فالصواني:ايه..الحمد لله الامور كلها تمام..
عطاء:باهي الحمد لله..من قال بيه والله ماتوقعتك تحملي طول في عمرك هدا..
ومشت طلعت بصفرة فيها شيش ميه..وخلت دعاء واقفه في مكانها مصدومه..
ع خشة رجاء شافتها هكي قالت:خيرك دعاء!؟.
شبحتلها دعاء بعدين ضحكت وقالت:شي..ترا بالله رجاء تعالي شوفي شن ناقص تاني..
رجاء جتها وشافها تنسيقها في الصواني قالت:لايعطيك الصحه ياباش مهندسه ابدعتي..
دعاء بإبتسامه:سلمها ياربي..
دعاء...
ماوقفتش هلبه عند كلمة عطاء ولابيت نعطيها اكبر من حجمها..مادام راجلي معاي كويس وخواتها يعاملوا فيا احسن معامله مش حنكد علي روحي بسببها..
نقوللكم...الحياة هادي مهما كنا فيها السعداء لابد ويكون لينا فيها منغصات...السعاده المطلقه كلها في الآخره اما الدنيا هادي مرة هكي ومرة هكي..
وحني لازم نحمدوا الله ع كل احوالنا..
نقوللكم تاني..
وهدا اهم مانقول الحياة لو كانت كلها تعب القريب من ربي حيهون عليه كل شي..لهدا اهم نصيحه ننصحكم بيها..
احفظ الله..يحفظك..من كل حزن وكسرة وشر حيساعدك ويقويك ويحميك..ويكون ليك كل شي...
ولبنات جنسي نقوللكم..
حافظي ع روحك..ماتفرطيش في نفسك وفي سمعتك وفي تربية اهلك..وفي دينك قبل كل شي..
تمسكي بقرايتك ع قد ماتقدري الناجحه حق هي اللي نتجح في قرايتها ودير شهادتها سلاحها..
الزواج مش كل شي..اهم شي تختاري صح..ياأما تختاري صح ياأقعدي عزبا طول عمرك افضلك...لعل الله يعوضك خير في حاجات تانيه في الدنيا وبزوج صالح في الآخره حيث بقاء لافناء...
وفي النهايه نقوللكم..
لو عندك نصيب حيجيك حيجيك لو ربي كاتب حيجيك..
مهما عطل حيجيك..بس لكل وقت قدر معلوم..
ولما يشاء الله حيجمعك بيه...لهذا تزوجي زواج ربي يبارك فيه وانتي تكون فيه مرتاحه وضميرك مرتاح...
⚘⚘⚘⚘⚘⚘
في الكوجينه..
يتساعدوا مع بعض في غسل الماعين والضمان..
ع خشة جمال:عطيكم الصحه..
كلهم ردوا عليه:الله يسلمك..
عطاء:حبيبي تبي حاجه؟
جمال حك لحيته وقال وهو رافع حاجبه اليسار:نبي حويرتي..
خواته قعدوا يضحكوا ونجلا تصفر..
ودعاء قريب ماتت من الخجل..
نجلاء:بريله ياحويرته..
دعاء ووجهها احمر من الخجل:نكمل قبل..
جمال:تعالي خيرلك راهو..
شبحتله وضحكت بعدين مشتله..
خداها من يدها وطلعوا مع بعض..
نجلاء:يهبلوا..
رجاء:ربي يدوم هناهم..
والاء:آمين..
اما عطاء صمت تام تغسل وبس..
وخواته شبحولها بعدين شبحوا لبعض..
بعدين اللي هادي لهت باللي دير فيه..
💖برا..
"الله!"
جمال بضحكه:عجبني ونبيه يتنفد..
دعاء:مشروعي متاع التخرج..
جمال:ايه يابنتي مشروعك..
ضحكت وهي تقول:الله مش مصدقه..
فجأة رن تليفون جمال..
شبحتله دعاء ع جنب..
هو ابتسم وفتح الخط والمايك..
جمال؛ايوه..
"ايوه دكتور حضرتك جاي اليوم"
جمال:ايه ان شاء الله..
"تمام لان في هلبه حالات اليوم"
جمال:تمام..السلام عليكم..
وصكر..وشبح لدعاء برفعة حاجب..
دعاء:اممم شن رايك نمشي معاك؟!
جمال:ههههههههه...غيورة..
دعاء:والله من حقي..
جمال:عيني مليانه  من يوم يومي يادعاء..وانتي خليتي عيني وقلبي مليانين بيك ع آخرهم..
دعاء ابتسمت وقالت:ربي مايحرمني منك ويعمي عيونك على غيري..
جمال:ههههههههه..
وهي تشبحله وتضحك..وقلبها يرفرف بحبه..
وفي نفسها تقول..
" الحمد لله اللي وهبني اياك وخلاك ليا قرة عين"
⚘⚘⚘⚘⚘⚘⚘⚘⚘⚘⚘⚘⚘⚘
بعد معاناة وكبوات ومصاعب جي العوض في وقته لجمال ودعاء....همامكتوبين لبعض من قبل ماتخلق الدنيا بس وقت لقائهم واجتماعهم كان ليه وقته المناسب..
بعد ماهيأهم الله سبحانه بش يكونوا لبعض بكل مامروا بيه في حياتهم من سقوط وارتفاع..من خيبات ونجاح...
برغم انهم كانوا قراب لبعض بس ولا مرة تلاقت عيونهم حتى بالصدفه لأن الوقت مازال ماحانش..
ولما جي الوقت المناسب..وشاء الله...اجتمعوا وعاشوا احلا الأيام..وكانوا لبعض الجبر والعوض الجميل...💖

النهايه....

مع حبي.....جمان فريد.....