"إلا أن يشاء الله"

الجزء الخامس

✒..
وتقعد من اصعب المهمات اللي يتولاها البني آدم..
هي انه يخبر حد يحبه بموت حد يحبه..
ومش أي حد..الزوج..شريك الحياة..اب الصغار..
رجاء توا حامل فالخامس وعندها وليد كيف صكر السنه راح بوهم بكري وخلاهم كيف بيصير فيهم شن بدير من بعده هي وياهم؟!
هل ياترى اهل زوجها حيخلوا الصغار عندها عادي بدون مايديروا مشاكل حتى وان كان القانون يحكم بصغارها ليها هي..
حتى لو تزوجت الصغار يقعدوا عند اهلها..يعني مهما يديروا الصغار مش حيقدروا ياخدوهم..
مروان ولدهم الوحيد..ولهالسبب قعد جمال طول الطريق وهو مروح للحوش يفكر في هدا كله وفي أبعد من هدا..
لما خلاص وصل للحوش..
وقف بالسيارة فم الباب وقعد فوسطها وهو خايف..مش عارف كيف بيبلغ اخته؟! خايف من وقع الخبر عليها كيف بيكون بالذات وانها حامل..
غمض عيونه وقال من قلب موجوع..
"اللهم إني أبرأ من حولي وقوتي وألجأ الى حولك وقوتك"
وبنبرة مخنوقه كمل يقول
"فإنه لاحول لي ولاقوة إلا بك"..
حط يده ع الباب بعدين فتح عيونه وتنهد بعمق وفتحه ونزل..
......
داخل..
كانوا صابرين وبنتها مازال مقعمزات مع بعض يراجو في جمال اللي ليه قريب ساعتين طالع وماروحش وشكله كيف طلع هو اللي خلاهم مشغولين عليه لهالدرجه..
انفتح باب الحوش..
رجاء نزلت رجليها من ع الكنبه وقعد تشبح للجهة اللي بيخش منها خوها..
صابرين:جمال..
بان عليهم جمال وملامح وجهه ماتتفسرش..
قدملهم بخطوات ثقيله بعض الشي وجي لأخته..
قعمز جنبها وهي تشبحله بخوف وترقب ضمها لحضنه وقال:عظم الله اجرك في مروان..
هي تقول نزلت عليها صاعقه جمدت وهي فحضنه..
اما امها فخبطت بإيديها الزوز على فخادها بقوة وقالت بصدمه:شنو!!؟
جمال ودموعه فعيونه:كانت في عمليه في ****** صاوبوه وبعد سعفوه هني بيديروله عمليه بش يحولوا الرصاصه توفى تحت العمليه..
حطت صابرين ايديها الزوز على فمها وغمضت عيونها بشده وهي تبكي..
وفي نفس الوقت رجاء دفت خوها بقوة وهي تشبحله وتقول بصدمه:شن تقول انت شن تقول..من اللي مات مني..
وقفت وقالتله..كيف مات كيف..قصدك خلاص راح معاش يولي..مروان راح خلاص!!
تتكلم وهي حاطه ايديها ع صدرها ودموعها ينزلوا
امها تشبحلها وتبكي بحرقه..
وخوها ناضلها ضمها وهو يقول:الله يرحمه يارجاء شهيد واجب..
رجاء بصدمه والدموع يصبوا:باهي كيف يخلينا اني وصغاره..تي من بينا حني من بينا اني نبيه وصغاره يبوه يبوه ياجمال..كيف هكي ياربي كيف!
جمال:لالالا..استغفري ربك يارجاء كلنا ليها وهادي نهايتنا كلنا وربك هو اللي مقدر يارجاء..اصبري ياوخيتي اصبري..ع قد الصبر الاجر..
رجاء :منين بنجيبه الصبر ياوخيي..نار في صدري والعه نار..
وصابرين تبكي بعبرتها..
جمال:اطلبيه من ربي قول ياربي صبرني ع مكتوبك..قولي اللهم اجرني في مصيبتي واخلفني خيرا منها..
رجاء غمضت عيونها بشده وقالت ببكي شديد:وهو في خير من مروان ياجمال قولي..
جمال سكت ودموعه تنزل زاد ضمها ليه بقوة وقعد يمسح ع راسها وظهرها وهي تبكي بالعبره..
🌻وبعد لحظات..
خداها وخدي ولدها وامه ورفعهم لحوش اهل مروان لأنه العزي بيديروه غادي..
وجمال بلغ خواته اللي فجعهم الخبر وصدمهم..مشوا كلهم في نفس الليله بش يواسو اختهم ويوقفوا معاها..
🌻🌻🌻🌻🌻
دعاء..
روحنا ليلتها من حوش جدي يعد ماتعشينا وشبعنا تلقيح وحرق دم..وبالذات من ازدهار اللي تأكدت ان شرقيه اشبح شن موصلتلها على لساننا اللي مليون فالميه ان كذب بش تخرب بيناتنا وتجيبها فصفها وازدهار طول صدقتها..نعرفها شقشق عندها قدرة ع الإقناع سحريه ماتفهموهاش كيف..
المهم..
حسيت هديكا الليله ان رويدا مش مزبوطه مضايقه وحزينه..عارفتها مادام شافاته حيصير فيها هكي..غير قدامنا كامده في قلبها ودايره روحها مش مهتمه..
🗝وعدت هالليله وجي اليوم اللي بعده..
ناضوا البنات مع العشرة الصبح.. صلوا صلاتهم وفطروا وبدوا يضموا مع امهم فالحوش..
ومع 12 بالزبط كانوا مكملين..
خشت دعاء للحمام دوشت وطلعت وخشت بعدها رويدا..
كانت فهالوقت مروة مقعمزة تتفرج ع برنامج كوميدي حتى دعاء تحبه لما شافاته جت قعمزت جنبها ومازال منشفها قاعد ع راسها وقعدت تتفرج وتضحك هي ومروة..
🌻🌻🌻🌻
خش ياجمال خش..
خش جمال يجري لصالة لحوش نساباته اهل مروان..
خدي اخته رجاء اللي كانت فاقده الوعي وطلع بيها يجري وعطاء وراه..
وقعدت صابرين ونجلاء والاء في حوش العزي وهما يبكوا على حال رجاء..
وام مروان وخواته حالهم اسوأ من حال اهل رجاء..
برا..
ركب جمال اخته وركبت معاها عطاء..وطار بالسيارة جري ولحقوه نادر ووجدي رجالة عطاء وآلاء..
🌻🌻🌻🌻🌻
"ههههههههههههه"
دعاء:عطيها دعوه الحيوانه..
مروة بضحكه:حركاتها ياهمي..ههههه حركاتها...هههههه..
فجأة سمعوا صوت حاجه انخبطت..
خفت ضحكاتهم وشبحوا لبعض..
مروة بعقدة حواجب:صوت شنو هدا؟
دعاء:بالك ماما اشبح شن اضم برا..
شويه انفتح باب الحمام..
وهما الزوز رجعوا يتفرجوا ويضحكوا..
سكتوا لما سمعوا صوت آنين..
التفتوا الزوز..شافوا رويدا تمشي بالسيف وجبهتها مفتوحه وينزل منها الدم..
بعدين طاحت فاقدة الوعي قدامهم..
الزوز ناضوا وقعدوا يعيطوا ويقولوا..
"رويداااا"..
ع جية بوهم وامهم يجروا..
محمد بخلعه:شن في شن في!!!
وجميله جايه وهي حاطه ايديها على صدرها وملامح الفجعه مسيطره على وجهها..
دعاء تعيط وتقول:رويدا يابابا رويدا راسها دم..
جوها امها وبوها يجروا طبسوا عليها وقعدوا ينوضوا فيها..
هي تفتح فعيونها بالسيف ويرجعوا يتسكروا
لونها كله شاحب وفمها ابيض..وكلها مصقعه
جميله بعياط:البنت بتموت يامحمد
محمد طول طبها وطلع بيها يجري
وجميله جبدت اللي ع الشماعه وطلعت تجري
اما دعاء بسرعه لبست جلابيه ووشاح وحولت الفوطه ولحقتهم
وقعدت مروة مع وفاق وخوها الصغير..
وفاق ترعش مع بعضها والوليد الصغير مفجوع..
فهالوقت
كان مؤيد واقف ع عمته شرقيه يمدلها في بضاعه هي بعتاته بش يجيبها..
ماسمعوش اصوات العياط..
لعند ماطلع محمد برويدا وجميله تبكي وتقول
"رويدا بنتي"..
شرقيه عقدت حواجبها وقالت:هادي امك!
فات مؤيد يجري لحوشهم وشرقيه لحقاته..
وصل لما شافهم راكبين السياره..
مؤيد بفجعه:خيرها رويداا خيرهاا!؟
ركبوا كلهم واخر من ركب دعاء اللي قالت:شكلها ضغطها نزل..
وركبت..
مشي يجري مؤيد وهو مفجوع فتح باب الحوش بسرعه..
وطلعت سيارة محمد..
وشرقيه اللي خافت هلبه ولت للحوش تجري بش تتصل بواحد من خوتها يلحق محمد للمستشفى..
دعاء..
رويدا عندها حاله تصيرلها من زمان يهبط ضغطها فجأة من لاشيء..هي صح مش وكاله هلبه لكن مش لدرجة انه يهبط هكي..بس اني حسيت ان هالشي مربوط عندها بالحالة النفسيه يعني لما تخاف ولاتضايق هكي يصير فيها..
لكن هالمرة غير وضعها كان يخوف هلبه وفوقها تنزف والخبطه حصلتها ع الراس وكنت ندعي لربي ان شاء الله ماديرش مضاعفات..
🌻🌻🌻🌻
ضغطها هبط..والحمد لله الجنين سليم ماصارله شي..
عطاء:مافيش خطر عليهم يادكتوره ولا؟
الدكتورة:لا ابدا بس لازم تقعد عندنا الليله..
عطاء هزت راسها وقعدت ساكته.
الدكتورة:عظم الله اجركم وان شاء الله ربي يصبرها..
عطاء بحزن:اللهم آمين..
ومشت الدكتورة وجمال جي لأخته طول..
جمال بخوف:هاه شن حالها؟
عطاء:الدكتورة قالت هبوط لكن مافيش خطر عليها وع العيل..
جمال تنهد براحه وقال:الحمد لله..
عطاء:قالت بيشدوها الليله عندهم..
جمال هز راسه وقال:تقعدي معاها؟
عطاء :نسأل نادر قبل..
جمال هز راسه ..وعطاء مشت نادت راجلها..
ووجدي جي لجمال وقال:ان شاء الله خير..
جمال:بسيطه..هبوط بس...
وجدي:المهم حالها باهي؟
جمال:ايه الحمد لله..
وجدي:مال خل نكلم آلاء من بكري تتصل وتسأل..
جمال:قوللها اطمن امي طول..
هز وجدي راسه وهو ماشي والتليفون ع وذنه..
شويه جو عطاء ونادر..
نادر:تقعد عطاء مافيش مشكله واني نقعد لوطا اليوم..
جمال:وصغاركم؟
عطاء:في حوش جدهم مايصيرلهم شي..
نادر:مالا اني نازل..ومشي..
جمال:خشيلها..
عطاء هزت راسها ومشت خشت لدار اختها..
ع جية وجدي:اهو بلغتها..
جمال حط يده ع كتف وجدي وقال؛برا روح انت قاعدين اني ونادر..
وجدي:تمام خل نمشي نروح بآلاء..
جمال هز راسه ومشوا هو ووجدي مع بعض..
...........
باهي اللي جبتوها بكري لو عطلتوا شويه كنتوا فقدتوها..
جميله بصدمه:نهاري احرف!
محمد بصدمه:لهالدرجه يادكتورة!
الدكتورة:ضغط هبط هبوط حاد لما قسناه لقيناه واصل لمرحلة ضغط الميت...حني درنالها اللازم وانتم خودولها حاجات مالحه بش تساعد التغديه
بوها مشي بسرعه..
الدكتورة:الجرح اللي فراسها خيطانه بس لازم نعرفوا كيف صار.
دعاء وهي ترعش:كانت فالحمام حاشاك..وشكله ضغط هبط وهي داخل ياجي راسها ع اللاوندينو ولا البانيو..لأن سمعنا حاجه انخبطت بقوة وماعرفناش وين من البدايه لين طلعت هي من الحمام..
جميله ببكي:ياناري بنيتي..
الدكتورة:باهي اللي طلعت ووقظتكم وانقدت نفسها..
جميله:الحمد لله ياربي.
الدكتورة:ان شاء الله لاباس عليها..
جميله ودعاء:لايوريك باس...
ومشت الدكتورة..
ودعاء شدت امها وقالت:تعالي قعمزي ماما..
مشت جميله مع بنتها وقعمزوا ع الكراسي..
جميله وهي تبكي:حتى حني زدناها عليها هي نادمه وحني زدنا قسينا عليها يادعاء..
دعاء قعدت ساكته وهي تمسح فدموعها وترشف..
🗝شويه وجي محمد ومعاه بطاطا مالحه وجبنه مالحه وبشكوطي مالح ومعاه خوه الصغير..
خشوا جميله ومحمد لرويدا..
ودعاء قعدت مع عمها برا..سألها ع اللي صار بالزبط وهي خبراته..بعدين مشي نزل لوطا بش يكلم شرقيه ويبلغها باللي عرفه...
اما دعاء مشت خشت لغرفة اختها..
لقت التغديه معلقه ..
وامها ضامة رويدا وبوها يوكل فيها..ورويدا مازال باين عليها التعب ووجها شاحب..
دعاء..
خوف بوي وامي عليها ورضاهم هو هدا اللي تبيه رويدا وهدا اللي يخليها ديما فأحسن حال..
برغم من عنادها وتصرفاتها العوجه الا انها تقعد اختي اللي نتمنى انها في كل وقت تقعد بخير ومايمسها سوء
🌻🌻🌻🌻
الساعه 4:15عصرا
بنمشي نروح بأمي للحوش تاخدلها شن يلزمها ونولي بيها هي هني وانتي روحي مع راجلك وصغارك
عطاء:علاش نادر قال حاجه؟!
جمال:لالا والله مسكين ماقال حاجه لكن اني مش عاجبني الوضع روحي لحوشك وصغارك وغدوة بإذن الله تعالي..
عطاء:لكن ام..
قاطعها وقال بحزم:عطاء..
تنهدت وقالت:باهي..
ومشت وجمال مشي معاها..
لما نزلوا لوطا استغرب نادر فعطاء بتروح وقاله جمال روح بيها لصغارها..نادر فالأول حايله انه يخليها الليله حدا اختها خير ماتقعد امهم المراة الكبيره لكن جمال صكر راسه...
وروح نادر بمرته...
وجمال روح بطريقه لحوش اهل مروان..
💎طول الطريق وهو يفكر في حالة اخته وكيف بيصير فيها مابطلش تفكير وفي نفس الوقت منال كانت تتصل بيه ماباش يرد عليها لأنه يسوق..
لعند ماوقف في طريق زحمه والإشاره كانت حمرا..
قام تليفونه واتصل بمنال..
جمال:ايوه قلبي..
منال بنبرة حزينه:حبيبي شن حالك وحال رجا توا..
وبدي جمال يحكيلها...وفي السياره اللي فجنبه لا اللي فجنبها..
دعاء:تقيس في غلاها عارفينها تحب ادير الشو...
رويدا وهي مبتسمه بتعب:حسودة..
محمد بضحكه:تحسي فروحك باهيه بابا؟..
رويدا:ايه غير نبي نرقد..
جميله:ارقدي ماما ارقدي..
غمضت رويدا عيونها...
ودعاء بعد ماكانت تشبحلها غيرت عيونها للروشن وشافت الاشاره لقت الرقم واصل للعشره...تنهدت واتكت براسها ع المرش وسرحت بتفكيرها..
وكذلك هو كان سرحان بتفكيره بعد ماانهى سريعا مكالمته مع خطيبه..
استاقظ ع اصوات الكلاكسات...تحرك..
وتحركت معاه سيارة محمد..
قعدوا يمشوا في جنب بعض فطريق واحد لين وصلوا مفترق طرق وكل سيارة مشت في طريقها...
⚘⚘⚘⚘⚘
وروحوا عيت محمد لحوشهم..
ولقوا الحوش معبي امه واخته شرقيه ونساوين خوته من غير ليلى لانها تسكن بعيده
تلقتهم شرقيه اللي خدت رويدا في حضنها وخشت قعمزت بيها داخل فالصاله حدا حناها والزوز ينشدوا فيها ع حالها وكذلك ينشدوا في جميله عادي وهي ترد عليهم..
دعاء..
ديما هكي تصير بيناتنا مشاكل ونتقاطعوا بالشهور ومرة وصلنا للسنه وتصير حاجه كبيره تردنا لبعض..
شرقيه كنت قبل مش فاهمتها هل هي فعلا تحبنا غير اطباعها سيئة ولا هي تحب تبين نفسها فالمواقف هادي انها خير منا؟!
ومع الوقت عرفت شرقيه شنو بالزبط..
المهم..قعدنا حوالي اسبوع والناس تمشي علينا وتجي ع خاطر رويدا..
ورويدا فهالأسبوع ادلعت اخر دلع خلتنا نحسدوها على طيحتها...هههههه 
🌻🌻🌻🌻🌻
وفي مكان تاني..
مر اسبوع كذلك ع وفاة مروان زوج اخت جمال..
ولحسن الحظ ان اهل مروان من البدايه تكلموا وقالوا انهم عارفين بالوضع القانوني والشرعي لرجاء ومش حيعارضوا ابدا لكن بشرط تجيب العيل يقعد عند جدوده كل نهايه اسبوع ورجاء وافقت..
⚘⚘⚘⚘⚘
يعني توا يامنوله اخته بتولي تعيش معاهم وهكي تقدري تستقلي في حوش بروحك بعد الزواج..
منال:مش وقته الكلام هدا ماما..
امها:عارفاته مش وقته..لكن اهو نريح فيك..
تنهدت منال وقعدت تفكر ومن داخلها فعلا كانت فرحانه بهالشي..
⚘ومصائب قوم عند قوم فوائد⚘
🌻🌻🌻🌻
وخش الفصل الدارسي الجديد..
في أول يوم..
رويدا وهي واقفه ع مرايه:شن بيدرقها الهم هادي توا..
مروة بضحكه:اهو تحصلي من يدلعك حتى فالمدرسه..
رويدا:نحصل طياح سعدك...وخدت شنطتها وطلعت..
ومروة تساوي فوشاحها وتضحك..
ع خشة دعاء وهي لابسه:بكري اليوم مرمر..
مروة:قالولنا من قبل مع بدايه السمستر الجديد بيبدوا الطابور بكري..
وفاق من برا"هيااا يامروة"..
خدت مروة شنطتها وطلعت تجري...
ودعاء قعمزت وخدت واحد من شيتاتها والمخطط متاعها فتحاته وقعدت تراجع..
ع جية مؤيد:هيا دعاء..
ناضت دعاء وخدت حاجاتها وطلعت وين وصلت برا..
مالقتش الكندرة اللي بتمشي بيها..
قعدت ادور وادور وللأسف مالقتهاش وبوها يكلكس..
دعاء بضيق:اكيد مروة خدت كندرتها سبيدروها تمزق..
تنهدت ومشت لبست كندرتها الاولى وطلعت تجري وهي تسمع في بوها يهزب ع صبح ربي..
وفات عليها صبح منكد..
لين وصلت الكليه وخشت وهي مضايقه..
شافت البنات كلهم جايات..طرحات جديده وبكامل اناقتهم وهي قاعده بنفس اللبس من بدايه الفصل اللي فات..
رسمت ع وجهها ابتسامه وسلمت عليهم سلام حار وقعمزوا يهدرزوا..
سكينه:شن جو العطله دودي..
دعاء:كساد في كساد..
ريم :حني مشينا لتونس..
اماني:وحني هيجنا فالجبل..
سكينه:قعدت في حوش اختي ع خاطر جايبه نعاند ونضم بس..
منال:اني قعدت ندور من حوش عمي لعمتي لخالي لخالتي ومرة لمينا بعضنا ودرنا زرده ومشت العطله ع هكي..
ايات:حني مشينا لحوش جدودي في مصراته قعدنا قريب العطله كلها..
دعاء:باهي ماكلمتوش اكرام فالعطله والله ماحصلتها..
اماني:اني كلمتها توتي وتجري ليه ليه..
سكينه:خساارة فاتتنا يومها..
امال:قداش خاطري نشوف شكله خطيبها..
سكينه:كلنا خاطرنا..
اماني:مواليد 75 اكيد شيباني بشيبه..
ريم:مش شرط راهو عندي عمي في عمره مايبانش عليه..
اماني:اييه مادام هي مقتنعه بيه ربي يهني سعيد بسعيده..
شافت دعاء لساعتها وقالت:بتبدا المحاضرة صبايا..
سكينه:هيا هي...
وناضوا كلهم مع بعض ومشوا..
سكينه:مايطلع منك فرخه دودي ماشاء الله 7مواد صفيتهم مرة وحده وبمعدل..
شبحولها البنات بإبتسامه..
بس اماني قالت:فرخه تقرا من ورانا..
دعاء:لا والله معاكم بس فوقت الفراغ نراجع بروحي..
اماني:مش قتلك تقري من ورانا..
ضحكوا البنات..
اماني بضحكه:لكن انتي الوحيده اللي ماتغير فيك شي قاعده زي ماانتي .
دعاء تلاشت ابتسامتها وقالت:كيف يعني؟
اماني:هههههه ..قصدي لاضعفتي ولاسمنتي..
ايات:صح دودي جسمك هو هو..
لين وصلوا للقاعه وخشوا ودعاء مازال تفكر في كلمة اماني..
دعاء .
اماني فيها حاجات ماتعجبش فيا واحيانا مانستريحلهاش بس نحبها الحق وديما نحسن الظن فيها لأن على بالي ان هدا اسلوبها معانا كلنا هكي.
⚘⚘⚘⚘⚘
شفتها انت بعيونك...
:والله بعيوني الزوز وراسها مربوط بفاشه...
تنهد رائد بقلق ع خشة زباين للمحل اضطر يرسم ابتسامه ع وجهه بش يمشي بضاعته...وعقله وقلبه مع رويدا...
اللي كانت في الفصل مركزة مع حصة الإحصاء وماتفكر في شي غيرها..
⚘⚘⚘⚘
بعد ساعه ونص..
تمت المحاضرة..وطلعوا البنات..
وهما طالعين دعاء شبحت ايمينها لقت رشاد واقف مع صحابه..
لما شافها عدل وقفته..
وهي غيرت عيونها عنه وشبحت للبنات جت عينها فعين اماني اللي طول غيرت عيونها وقعدت تشبح للشيت فيد سكينه وهي تشرح..
دعاء رجعت لفت وجهها ناحية رشاد لقاته مازال يشبحلها...
تنهدت بضيق..ومشت غيرت مكانها وادرقت عنه...
وهو عقد حواجبه لما شافها دارت هكي..
ايات:خلاااص صبايا بليز..جعانه ونبي نفطر...
اماني:شن تبي توا؟.
ريم:كيكات بريوشات ونسكافيه..
ايات:واني مالفي ونكسافيه..
سكينه:اني شاهي اخضر زي العاده..
اماني:رووجييم..وانتي دودي..
دعاء وهي تحاول تخفي احراجها:توا ماخاطريش..
اماني:مادوريش تو ناخدلك معانا
دعاء:لالا والله مانبي توا
اماني:اسكتي اسكتي..وقالت..هيا صبايا..
ومشوا مع بعض
فاتوا من حدا رشاد وصحابه..
اماني علت صوتها وقالت:تبي ناخدلك كيكه ولاشكلاطه دودي
دعاء استغربت في نبرة صوتها وقالت:شكلاطه..
اماني بضحكه:اطلبي اللي تبيه ياحنه دافعه حاجه من جيبك!؟
والكلمه تجي فوذان رشاد هو واللي معاه ماحد اهتم غيره هو وصاحبه امين..
ودعاء قريب ماتت من الإحراج...
وصلوا برا..
دعاء بعصبيه:ولا مرة قتلك خوديلي ولاطلبت منك ولامن غيرك ومن يوم وبرا غادي والله معاد قابله من وحده فيكم حاجه..
ومشت بسرعه ودموعها يطيحوا وايات وسكينه لحقوها..
امال:كلمتك خيي يااماني..
ريم:وتقولي فيها وانتي تلعلعي في من تسمعي!؟.
اماني وجهها تغير وقالت:من بنسمع يعني مانسمع في حد وبعدين انتوا تعرفوني هادي بصارتي مش جديده عليكم..
امال:لكل شي حدود..
اماني وهي تحرك فيدها قالت بإنزعاج:بالله فوتوني ترا..
ومشت بروحها..
🌻ماتعدليش عليها دودي تعرفيها انتي تتسهوك هلبه  مش قصدها..
دعاء ببكي:لاهدا مش تسهويك عادي ياسكينه اصلا من لما جينا وهي تلقح مش عارفه خيرها!..
آيات:باهي حبيبتي خلاص امسحي دموعك ومادوري حد حني ناخدولك وع قلبنا زي العسل انتي اختنا دودي ومافيش بين الخوات الدوة الفاضيه هادي..
سكينه بضحكه:وبعدين راك تنسي انتي تعطي فينا في معلومات لاتقدر بثمن لولاها راهو من زمان فصلونا..
ضحكوا دعاء وايات..
ع جية ريم وامال...
امال:ماتعدليش عليها دودي..
ريم:هدا لسانها من يوم عرفتها مادوريهاش..
دعاء مسحت دموعها وهزت راسها بإيجاب..
🗝وصكرت راسها دعاء ماتاخد شي من البنات ومشت ركبت فوق تقرا وخلتهم هما يمشوا يفطروا...لكنها بدل ماتقرا كملت وقتها كله وهي تبكي وواجعتها روحها هلبه..
⚘⚘⚘⚘⚘
الساعه 12:46 قبل الظهر..
وقت المرواح..
جي باص رويدا للمدرسه طلعتله وهي ماشيه لقت رائد واقف قدام محله يشوفلها بإبتسامه..
شبحتله من فوق لتحت وركبت باصها ومشي..
هو تنهد وقال:غير كان شن صاير معاها بس!..
وولى خش لمحله..
⚘وروح الباص برويدا لحوشهم..
وهي خاشه للحوش..
سمعت صوت هدرزة جاي من جنان حوش جدها شبحت ايسارها لقت نصري وشرقيه واقفين يهدرزوا..
شبحوها لما جت..
شرقيه؛رويدا تعالي..
قدمتلهم رويدا وجت وقفت حدا السور اللي ماكانش عالي..
نصري:شن حالك اليوم..
رويدا بإبتسامه:الحمد لله..
شرقيه:امتى تحوليهم البونتوات؟.
رويدا:اخر اسبوع هدا..
نصري:ماتعبتيش اليوم فالمدرسه؟
رويدا:لالا عادي جدا..
شرقيه؛باهي بري للحوش عطلناك..
رويدا بإبتسامه:سلام..
نصري وهو مبتسم:سلام..
ومشت رويدا..
شرقيه بصوت عالي:قولي لأمك تجي تهدرز العشيه..
رويدا وهي راكبه الدروج قالت:حاضر..
وشبحت لنصري لقاته يشوفلها بإبتسامه بادلاته بمجامله وكملت طريقها لحوشهم..
شرقيه:بتمشي توا؟.
نصري:ايه ومولي العشيه خلولي غدي..
شرقيه:باهي..
نصري:هي سلام..ومشي..
شرقيه:في امان الله..ومشت خشت للحوش من باب الكوجينه..
⚘⚘⚘⚘⚘
بعد العصر..
كانوا جميله وبناتها في حوش جدهم عماتهم غادي واحسن شي ان ليلى وبناتها مش موجودات جت بس مرت علاء..
كانت الاجواء قنينه هالمره وجميله تهدرز عادي وشرقيه جوها معاها كويس..
وقعدوا معاهم للمغرب وبعدين روحوا..
فالكوجينه..
كانوا يحوسوا شرقيه واختها الكبيره ومرت خوهم علاء ع العشي..
عيشه"العمه الكبيره:غير كان قعدوا للعشي قبل بنهدرز لدعاء ع الموضوع..
تنهدت شرقيه وقالت:كان ماتستعجليش ياعيشه..عيلة سلفك ناس فوق الريح كل شي عندهم بالبطمه وخوك وعيلته ماكينة التست ماخشتش لحوشهم..
عيشه:كلنا كنا مانعرفوهاش..
شرقيه:مش زي ياعويشه..صعب هلبه في فرق كبير هلبه هلبه صدقيني تويحشموك..
عيشه:وعلاش بيحشموني بنات خوي فالحات ومتربيات كويس .
شرقيه:كانك ع الفلاحه نص نص مش هلبه وبعدين ماعندهم مايديروا بيها كان بياخدوهم ناس زي عيلة سلفك خدم وحشم..
عيشه:انتي عطيني رقم دعاء اني نتصل بيها..
شرقيه تنهدت وقالت:اني تو نكلمها وانتي تصطفلي..
وخدت سطل الملح ومشت بيه للمخزن..
راجتها مرت علاء لين مشت بعدين جت لعيشه وقالت:عيشه..
عيشه:نعم..
وفهاللحظه شرقيه ولت بش تاخد سطل الدقيق وتعبيه حتى هو ..
وقفت في مكانها لما سمعت مرت علاء تقول..
مرت علاء:فيه وجهة نظر كلام شرقيه ياعيشه الناس توا بدت ادور في التكافؤ الإجتماعي والمادي هلبه وعيلة سلفك اني ريتهم وريت اللي عايشين فيه مايمشوش مع جميله وبناتها..
عيشه رفعت حاجبها وهي تشوفلها..
مرت علاء:اني ع خاطرهم حتى هما قلت الكلام هدا لأنهم حيتعبوا هلبه بعدين..
تأففت عيشه وقالت:لخبطولي دماغي انتي وشرقيه..
مرت علاء:انتي لما تبي تجيبي وحده لولد سلفك فكري في اللي ماتجيبلك احراج بعدين قدام عزوزتك بالذات اللي ديما رافعه خشمها...
عيشه رفعت حواجبها وقالت:والله صدقتي..
ابتسمت مرت علاء وقالت:ع العموم لو مازال تبي تجيبي انتي العروسه اهي اختي مواليد 90..
وبدت مرت علاء تمدح في اختها وتحط وتشكر...وشرقيه تسمع وهي مبتسمه بصدمه..بعدين رفعت حواجبها وضيقت عيونها وقالت بصوت هامس:ياما تحت السواهي..
ولفت وولت للمخزن بش تجيب الملح وفاتت الدقيق..
🌻وياكثرهم اللي زي مرت علاء 🌻
وفوتت شرقيه يومين واتصلت بحوش خوها محمد هدرزت على جميله وحكتلها ع الموضوع..وبعدها قالتلها تعطيها دعاء..
جميله:عمتك شرقيه تبيك..
مطت دعاء شواربها بملل وخدت السماعه وقعمزت وجميله مشت من حداها..
دعاء:ايوه عمتي كيف حالك..
شرقيه:الحمد لله:انتي شن جوك وجو القرايه..
دعاء:الحمد لله..
شرقيه:بنكلمك في مويضيع دعدوعه..
دعاء؛اكيد خطوبه...
شرقيه ضحكت:ايه..ومن طرف عمتك عيشه ولد سلفها الكبير يخدم في السفارة الايطاليه وعنده حوش غادي وعنده فيلا هني..وعيلة سلف عمتك تعرفيهم ناس عز وفلوس عندهم حتى حياش في سويسرا زوز شقق..وخدم وحشم شي لايوصف..وعمتك وداتك بيه قالت نتمنى نصيب دعاء يكون حلو هكي..
دعاء...
اني بصراحه خفت فرق شاسع بيناتنا واني نعرف حوش اهل راجل عمتي ناس تقيم في غيرهم ع حسب الماديات فكيف بياخدوني لولدهم؟..
خليت شرقيه تحكي لين تشبع وان في نفسي نقول كيف موضوع زي هدا تسعى فيه شرقيه خصوصا بعد الموقف اللي صار بعد اخر موضوع جاني!؟
وجي الجواب..
شرقيه؛فكري كويس وخليك فالحه وردي بالك تخليه لغيرك يادعدوعه..راهو هديكا ناهد مرت علاء بعد سمعت عيشه تكلم فيا عليك جبدتها ع جهه وقعدت تعرض في اختها وتقول اختي تمشي معاهم اكثر..
دعاء بصدمه:مرت عمي علاء!!
شرقيه:قسما برب العزة..
دعاء..
لو حلفت شرقيه  معناها صادقه ميه فالميه..وصدمتي وقتها كانت صدمه فيها مرت علاء واني اللي نمدح فيها ونحبها ونشوف فيها غير عن عيت جدي كلهم تطلع في الاخير اوطى واحقر منهم..
وقتها ماكنتش فاهمه ان هدا غرض شرقيه الوحيد من اتصالها..
ولا الموضوع تصكر قداش ليه وعمتي عيشه صرفت نظر مرة وحده يعني لااني ولااخت المنافقه هديكا..
لكن حني لهداكا الوقت ماكناش نعرفوا..
🗝بعد ماكملت دعاء هدرزة مع عمتها مشت لأمها طول بتحكيلها اللي سمعاته..
في دار البنات..
رويدا بصدمه:الكلبه!
مروة بصدمه:معقوله!!ناهد تطلع هكي!
جميله ابتسمت بتهكم وقالت:هدا حظنا مع الناس الله غالب..
وفاق بغضب:خزي واطيه..سافله..
دعاء:اني خلاص بالنسبه ليا الناس فقدت ثقتي فيهم..
جميله:مادام القريب مايحبلك الخير تبي البراني يتمناهولك!
رويدا:صدقتي ياماما مالقينا الخير في اللي من دمنا ولحمنا بنلقوه فالبراني..
جميله:باهي توا قوليلي شن بتقولي في الموضوع اللي كلماتك عليه؟.
تنهدت دعاء وقالت:يستر الله وخلاص ياماما..نستخير ونشوف..
🌻واستاخرت دعاء وفاتوا يوم واتنين وتلاته..
واسبوع..واسبوع تاني تلاقوا فيه مع العيله شرقيه وعيشه لكن ولاوحده فيهم هدرزت في الموضوع ..
ولاحظوا ناهد مرت علاء لاصقه في عيشه لصوق وفهموا ان الموضوع ولى شور ناهد واختها..
الا ان عيشه خالفت التوقعات وخيبت امال ناهد:ريتي ياشرقيه ولد سلفي اللي يدور..
شرقيه:ايه شن صار فيه حقه؟
عيشه:امه خطبتله بنت حماتها يقولولهم عيت ***** معروفين..
امهم:ايه هادم من العيلات الكبيره فطرابلس معروفين..
وحصلت ناهد كف..
وخابت امال جميله..
اما دعاء فكانت مضايقه ع خاطر امها بس..
دعاء..
عادي لااول ولااخر بنت يجوها مواضيع ومايصيرش منهم النصيب مش فيهم ويقولوا البنت تنخطب لميه وتنكتب لواحد..
وعقلي وقتها قالي..كل مابتجي تنسي رشاد بموضوع ربي يوقفه..بالك هو حق نصيبك يادعاء..بس خاطب الراجل خاطب باش نفهم!!؟
⚘⚘⚘⚘
وقعدت دعاء تصارع في نفسها بخصوص موضوع رشاد..
الا ان هو بتصرفاته وحركاته كان يفرض في نفسه عليها..ويشغل فيها بيه..
لعند مافي يوم كان في عندهم امتحان نصفي..
خش راقب عليهم فيه رشاد وصاحبه امين..
دعاء لما شافاته رعشت مع بعضها حتى معلوماتها طاروا..
وسكينه تشبحلها واماني اللي مازال متعاركه هي وياها كذلك..
الأستاذ عطي لرشاد وامين الوراق بش يوزعوهم..
لما جي رشاد بيعطي لدعاء الورقه حطتها بقوة..
هي قامت عيونها جو فعيونه..
نظراته اربكتها..وهو مشي وكمل توزيع الأوراق..
وبعد كملوا توزيع..
بدوا في الإمتحان..
ورشاد وامين يراقبوا...
رشاد طول الوقت عيونه عليها..
تقيم راسها شويه تلقاه يشبحلها تنزل عيونها طول..
وسكينه تراقب فيه..
واماني كذلك ومرة مرة تشبح لدعاء بنظرات غيرة..
بعدين بدي عمكم رشاد يلف ع الصفوف وين جي حداها هي وقف..
كانت مغطسه راسها في ورقتها ولاهيه في امتحانها..
وهو يبي ينبهها لوجوده جنبها قال بصوت عالي:كل وحده عيونها فورقتها..
انخلعت وقامت راسها وشافتله..
هو شبحلها ع جنب..
عقدت حواجبها ونزلت عيونها وكملت حلت..
دعاء..
وترني هلبه خفت بسببه نعك فالإمتحان..بس حركاته كانت حلوه وتخلي في قلبي مايبطلش دقان بقوة قوته..
لما جي فايت ركزت على يده اليمين بش نشوف الدبله ونذكر روحي انه خاطب...اتفاجئت لما مالقيت شي فيها..شفت لليسار مانعرفش مرات تزوج فالعطله واني مانعرفش لقيتها حتى هي فاضيه..مش عارفه علاش فرحت واني مازال مش متأكده من شي...
🗝بعد كلموا امتحاناتهم سلموا اوراقهم وطلعوا..
ورشاد قد يدقق في ورقة دعاء من اجاباتها عرفها شاطره ابتسم وزادت خشت راسه اكثر واكثر..
برا القاعه..
دعاء:لا الحمد لله برغم ان المراقبين يوتروا..
ايات:ايه حتى اني رشاد وترني هلبه حركاته اشبح كيف..
ريم:لاحظتوا انه دبلته مهناش..
سكينه شبحت لدعاء وقالت بإبتسامه:حتى اني اول مرة نشوفه محولها..
اماني:لا لاحظته قبل يحول فيها ويرجع يلبسها عادي..
امال:مش شرط كان مالبسهاش اليوم معناها في حاجه..
اماني:ايه الرجاله مايدوروش في الحاجات هادي هلبه..
سكينه بضيق:ايه صح مرات..وقعدت تشبح لدعاء اللي بان ع وجهها انها اضايقت هلبه..
امال:هي نمشوا للساحه..
ريم:اني اللي بنقعمز فالظل.
وفاتت تجري...وهما لحقوها بش بياخدوا المكان..
ورشاد وصاحبه يشبحولهم..
امين:باهي امتى ناوي تفتح معاها الموضوع؟
رشاد بإبتسامه؛لما نتأكد منها قبل..
امين؛عارفك ماتبيش من يردك..
ضحك رشاد..
فهاللحظه..
والبنات يجروا فاتوا من خداهم..
قصدا اماني عفست ع كندرة دعاء من الخلف..
تحولت وتمزقت وتنطرت وجت حدا رشاد وامين..
البنات ماركزوش كملوا طريقهم..
واماني معاهم ولاكأنها دارت حاجه..
اما دعاء اللي قعدت في هالموقف السخيف بروحها..
وطت راسها اللي كان متلون من الاحراج..
ومشت خدت كندرتها من حداهم..
وقعدت تمشي وهي تعكز وهما يشبحولها..
كان منظر الكندره يرثى له واضح انها قديمه واكل عليها الدهر وشرب..
دعاء من كثر ما وجعها الموقف وحست روحها ولاحاجه..
اتصلت ببوها يجي يروح بيها..
ولحسن حظها بوها كان قريب وجاها لفم الكليه..
مشت الطريق بعقاب كندرتها وركبت السياره..
محمد:خيرها كندرتك؟
دعاء ودموعها ينزلوا:بادت يابابا بادت من العيد راهو مانبلسش في غيرها..
وخنقتها العبره وسكتت..
محمد وجعاته بنته هلبه..تحرك بالسيارة بدون مايتكلم..
وهي تليفونها قعد يرن..صاحباتها يتصلوا بيها ومابتش ترد على ولا وحده..
......
سكينه بقلق:كيف وين مشت هادي؟
ايات بقلق:ماتبيش ترد..
وخشوا الزوز داخل يدوروا..
لقت سكينه رشاد واقف هو وأمين على معيده كانت تقرا  معاهم زمان..وهما يهدرزوا ويضحكوا..
تنهدت وقالت:تعالي نركبوا فوق..
ايات:ايه صح مرات فوق..
وكيف جو بيركبوا جتهم الزوز رساله..
فتحوها طول..
(بابا جاني بكري صبايا سامحوني روحت وماسلمتش عليكم)
شبحوا لبعض..
سكينه: جاتك رساله منها؟.
ايات:ايه..
سكينه:حتى اني..باهي تعالي نولوا للبنات..
ايات وهي مضايقه؛هي..
ومشوا مع بعض طلعوا برا..
🌻🌻🌻🌻
دعاء..
من اسوأ المواقف اللي تعرضتلها ومانحبش نذكره موقف خلاني نستصغر نفسي ونحس بالنقص لدرجة كبيره..
طالبه جامعيه اني من حقي نلبس لبس كويس ويكون هندامي لائق..بس يعني الله غالب هادي ظروفنا اني مش بروحي عندي خوت حتى هما يبوا مانبيش نكون انانيه ونفكر في نفس وبس..
🗝يومها دعاء لما روحت صلت ورقدت طول..وتصلي وتولي ترقد ومابتش تاكل..
امها وخواتها يحسابوها ماجاوبتش كويس في امتحانها فخلوها في حالها لانهم تعودوا على حالتها هادي..
وجن الليل...
وكلهم رقدوا وهي قعدت ساهره مهمومه وتفكر..
وبعد ساعات من التفكير..شافت ساعة تليفونها لقت مازال ع الفجر نص ساعه..
تعوذت من الشيطان..
وناضت توضت..وخدت ردي الصلاه ومشت للصاله..
سلمت نفسها لخالقها..
وبدت تصلي...وفي كل سجده تدعي..
"اللهم اكفني بحلالك عن حرامك..واغنني بفضلك عن من سواك"..وتتفكر في كل شي عاشاته وقاعده تعيش فيه ودموعها تنزل..
💎💎💎💎
اللهم ياربي عيني وقويني ع هالحمل..ياربي خليني اهل ليه كيف ماحملت مسؤولية رزق بوي كله خليني 
اقوى بش نتحمل مسؤولية اختي وصغارها..يارب انت سندي ماليش غيرك..قوي ظهري يارب..قوي ظهري..
نزل ايديه بعد كمل دعاء بعدين ضم ركابه لصدره..وحط راسه عليهم..وغمض عيونه وقعد يسمع في اذان الفجر..
🌻زي ماكانت هي حاطه راسها ع المندار ومغمضه عيونها ودموعهم تنزل وتسمع في الآذان...

                  "الله اكبر الله اكبر....لاإله إلا الله..."

...يتبع...