"إلا أن يشاء الله"

الجزء الثامن عشر

✒...
🌻بعد تلاته أيام..
الساعه 3:00بعد الظهر..
في دار المعيشه..
جميله:والله كويسه كان هكي بس كيف بديري في قرايتك؟
وفاق:اني بنداوم تلاته ايام في الروضه الصبح وهالأيام اني ماعندي فيهم شي الصبح كله بعد الظهر..
جميله:المهم ماتهمليش قرايتك..
وفاق:لالا بإذن الله لا..
ع خشة دعاء بصفرة الغدي..
حطتها قدامهم وقعمزت..
جميله:قتلك دعاء..وفاق حصلت خدمه في الروضه اللي حدانا وقالوا يبوا مازال موظفات شن رايك اهي حدانا خطوة..
دعاء بإزدراء:قصدك تبيني نعاني في المفرخ ونجري في جرتهم عارفه بالي واسع للصغار ياماما!!
وفاق تشبحلها..
جميله رفعت حواجبها وقالت:وشن بديري مع صغارك بعدين!؟
دعاء وهي تاكل:هادوكا..صغاري..
جميله تنهدت وقعدت تاكل وهي ساكته..
ووفاق كذلك..
بعدين قالت دعاء:وانتي علاش تبي تخدمي بتفوتي قرايتك ولاكيف!؟
وفاق بشي من الفزع:بعيد السو عليا..اني نبي نخدم بش نصرف ع قرايتي زي ماتعرفي المنحه وقفوها وبابا يدوب يدفعلي في حق الكورسات..
دعاء وهي تاكل وتشبح للصونيه:اممم..
جميله في نفسها"مش عارفه شن جاك يادعاء يابنتي بس..انتي في حالك هادي مايصلحش بيك الا الزواج اما بش تقعدي في الحوش هكي وتضيعي عمرك ع الفاضي لا":احمم..العشيه بتجي مروة..
دعاء بفرحه:الله! استاحشت مرمورة..
وفاق بضحكه:حتى اني..
جميله بضحكه:كبرت وبدت ادخل في رويحتها بحركاتها هالنتفه..
دعاء ضحكت وقالت:ايه..يافرحة بابا بجيتهم..
جميله:يراجي من بكري..
دعاء..
بابا يحب الصغار هلبه..وماريه من لما جت وهو مولي انسان تاني شبه يوميا لحوش مروة ع خاطرها..
المهم اني كنت حاسه ان زيارتها ليها سبب لانها جت في نص الأسبوع ومروة بالعاده تجينا في أخر الأسبوع وتبات..ماوقفتش عند النقطه هادي هلبه..
🗝وجت العشيه..
بعد العصر كان مروة عندهم..
خشت ببنتها وحولت خمارها لقت بوها في الجنان واقف يسقي في الغرس..
مروة بإبتسامه:بابا..
شاف جيهتها وقال مرحب بحفاوة:اهلا اهلا اهلا..
ومشالهم طول سلم ع مروة وخدي ماريه لحضنه وهو يلعب فيها بعدين قال:وين الشيخ؟
مروة:حطني ومشي عنده مشوار ضروري في الليل بإذن الله جاي يتعشى..
محمد وهو يشوف لماريه:باهي باهي..
وخشت مروة مع بوها اللي قايم بنتها داخل..
سلمت مروة ا امها وخواتها والبنات خدوا ماريه من بوهم وقعدوا يبوسوا فيها ويلاعبوا..
قعمزوا في الدار هدرزوا شويه..
بعدين ناض محمد طلع من حداهم..
وناضت بعده دعاء بش ادير القهوة..
مروة:قلتيلها؟
جميله:لا نبيك انتي تفتحي معاها الموضوع..
مروة:باهي..
وفاق:ياوخيتي مرمورتي طالع عليها القفطان يهبل..
جميله:جديد هدا..
مروة بإبتسامه:بوها وين يفوت ع محل ملابس اطفال يشوف حاجه حلوة تعجبه يقولي نتخيل في ماريه لابستها وينزل طول ياخدها..
وفاق:التعليقه اللي لابستيها جديده حتى انتي..
مروة بضحكه:خدالي معاها حاجه بش مانغيرش منها..
ضحكوا وفاق وجميله..
وشويه وخشت دعاء بصفرة القهوة والكيكه..
وفاق شربت قهوتها وناضت بش تقرا..
وقعدوا هما يهدرزوا..
مروة:دعاء..
دعاء وهي مقعمزة ماريه في حجرها قالت:نعم؟
مروة:امم..ياحنه في واحد يخدم مع الياس..
ارتسمت ع وجه دعاء ملامح الضيق..
مروة:غير خل نكمل قبل..المهم راجل سمعته كويسه هلبه والياس قال في العمل كلنا نحترموا فيه راجل خلوق..من عيلة حالتهم الماديه ميسورة وليها مدة يدور في بنت الحلال..بس قالي حوشه يبيله حاجه 6شهور بش يكم بعدها يتزوج..
دعاء..
اني هالمرة مابيتش نقول اللي حاسه بيه من اول ماكلمتني عنه مروة ماتريحتش وقلبي قبضني..بش خلاص عاد يادعاء عمرك 28 سنه والعمر يجري..يعني اقل شي تلحقي تجيبي صغار وتربيهم بدون ماتعاني..وهالحاجه اكثر حاجه تفكر فيها اي بنت تعطل في الزواج الامومه والصغار واني مؤخرا بديت نفكر فيهم من بعد ماجابت اختي مروة وحملت رويدا..
دعاء:مواليد كم؟.
مروة:86..
جميله:كويس بكل لا؟.
دعاء:مش مقياس..
جميله:عاد ماعندك ماتقولي فيه ساد انه من طرف الشيخ..
دعاء:واني شن قلت ماقلت شي..تنهدت وكملت تقول..باهي..
ارتسمت ع وجه جميله ملامح الإرتياح..
مروة:يعني نقول لإلياس يقوله يجيب العويله..
دعاء:قوليله..
ابتسمت جميله..
ودعاء سرحت بتفكيرها فهالموضوع اللي حست اتجاهه بخوف اول مرة تحسه...
⚘⚘⚘⚘⚘⚘
في المربوعه..
محمد:كان هي قالت باهي مافيش مشكله بس من توا ياجميله ضغط ع البنت لا خليها ع راحتها..
جميله:شن وراها لاقرايه ولاتخدم ولاتقدم ماغير مقعمزة في الحوش وخلاص ماديرش في حاجه فيها ثمرة لعمرها تتزوج خيرلها..
محمد:حتى لو..ماتجبريها على شي..
جميله ع مضض قالت:باهي باهي..ومشت طلعت من حداها للكوجينه..
كانت مروة موجوده في الكوجينه تغسل في الماعين..
جميله:نديروا العشي رز وشربه؟
مروة:عادي مافيش مشكله ماما اني ندير الرز وانتي الشربه..
جميله:باهي..
في الدار..
كانت دعاء مقعمزة حدا ماريه المحطوطه ع الفراش حداها راقده..
فجأة رن تليفون دعاء..مكالمة ماسنجر..
خداته طول من جنبها وناضت طلعت من الدار وفتحت الخط وهي تضحك..
دعاء:تعالوا ماما مروة..رويدا رويدا.
جميله بضحكه:رويدا..
وكلهم جو جري قعمزوا مع الدعاء بين الديار..
رويدا وهي تأشرلهم بيدها:هااااي..
مروة ودعاء:يااااي..
جميله:ايااه اياااه..
رويدا:هههههه..شن جوكم يابقرات ماعدا ماما طبعا..
ضحكوا وقالوا الزوز:تمام..الحمد لله..
جميله:انتي رويدا شن حالك يابنتي وشن حال راجلك؟
رويدا بإبتسامه:الحمد لله ياماما تمام التمام..انتي شن حالك وشن حال بابا؟
جميله:الحمد لله كويسين..
رويدا:فرخة مروة وين بنتك استاحشتها..
مروة:راقده راقده..
رويدا:لامادخليش فيك حتى كان راقده جيبيها..
ضحكوا..
ومشت مروة تجيب بنتها..
دعاء:في السيارة انتي؟
رويدا:ايه عبدالله نزل يجيب حاجات..
دعاء:اها..
جميله:شن الجو عندكم غادي..
رويدا:اهو معدل مرة سخون ومرة معدل..
جميله:شن دايرة مع الحمل..
رويدا:الحمد لله ع كل حال..متعبني شويه ياماما..
جميله:معليشي بنتي طبيعي راهو..غيرانتي حافظي واشربي مية هلبه والفيتامينات خوديهم..
رويدا:ان شاء الله..
ع جية مروة:واهي ماريه نوضناها ع خاطرك ياباش مهندسه..
رويدا:ياعممري كبرت العسوله..
وقعدوا يهدرزوا مع بعض ودعاء شاده التليفون وتمرر في نظرها عليهم بإبتسامه وعيون مليانه دموع وشغفها بالأمومه يكبر ويزيد..
وشويه وطلعت وفاق من الدار وقعدت تهدرز ع رويدا لحظات وصكرت رويدا لما جاها عبدالله..
بعدين تفرغوا جميله ودعاء ومروة للعشي..
وخلو وفاق مع ماريه وعمر بعد كمل كمل واجباته جاهم وقعد يلعب فيها..
ومع العشي..
روحوا مؤيد والياس تلاقوا مع بعض في الباب..
سلموا ع بعض وخشوا للحوش..
ومع وصولهم حطوا العشي...
وبعد العشي خدي الياس عيلته وروحوا..
🌻🌻🌻🌻
بعد مرور 4ايام..
فهاليوم بيجوا اهل العريس الجديد لدعاء اللي من لما ناضت الصبح وهي مش مرتاحه بكل..عكس قبل اما متبلده او متحمسه..لكن هالمرة خايفه..
قعمزت في الكوجينه تشرب في قهوتها وتفكر بس في سبب خوفها...
وقتها امها كانت في المربوعه تكنس فيها بالمكنسة الكهربائية وماكان في حد موجود في الحوش اخطاهم..
وفي عز سرحانها..
"صبيلي فنجان"
فنصت عيونها والتفت وشهقت بأعلي صوتها..
"هههههههه"
دعاء :يتجيبيلي سكته قلبيه يافرخه..
وجت لأختها وحضنوا بعض بقوة وهي تقول:الحمد لله ع سلامتكم..
رويدا بضحكه:الله يسلمك..
ع خشة جميله للكوجينه شهقت هي تانيه من الخلعه..
ورويدا تضحك..
جميله:ياقرده اني وحركاتك..
وجت رويدا لأمها وحضنوا بعض وامها تتحمدلها بالسلامه..
.........
في دار المعيشه..
كانت دعاء مركزة ع بطن اختها البارزة وتسمع فيها شن نقول..
رويدا:حطني ومشي لواحد صاحبه في المستشفى داير حادث مسكين..
جميله:معناها جاي الغدي؟
رويدا؛ايه اكيد..
وخرت شعرها المصبوغ ورا وذنها والذهب في ايديها يلمع وهي تقول لدعاء:شن معنوياتك؟
تنهدت دعاء وقالت:عاديه زي قبل..
جميله:بالله عليك تفائلي..
دعاء:ماما اني ماقلت شي مش عارفه خيرك انتي..
رويدا:هاه هاه خيركم شن في هدو هدو.
جميله:من الصبح نايضه قالبه وجهها..
شبحت دعاء لرويدا وقالت:اني بنسكت..
رويدا:خلاص ماما عاد فكونا من المشاكل كيف جيتكم راني..
دعاء..
كترت بيني وبين ماما المناقرات..الفترة الاخيره معاملتها معاي تغيرت حسيتها زي اللي تبي تفددني بلعاني واني كنت نشكي للبنات منها وهما كانوا يمصوا في غضبي ويهدوا فيا..
🗝وعدى باقي النهار عادي..
جو باقي افراد العيله وتفاجئوا بجية رويدا وسلموا عليها بحرارة..
بعدين اتصلت دعاء بمروة خبرتها بجية رويدا وبعد ساعه كانت رويدا عندهم..
وخشوا دعاء وجميله للكوجينه دارو الغدي..
وتغدوا النسابات عندهم..بعدين اللي هدا مشي ع حاله وقعدوا النساوين يوتوا لجية الضيوف..
ودعاء توتي في روحها..
دعاء..
الموعد اللي عطوه لجيتهم بعد العصر..
وكنا نحسابوهم بيجوا بعد العصر..مانحسابوش انهم يقصدوا انه بيجوا في اي وقت بعد العصر..تصدقوا اننا استنينا لقبل المغرب بنص ساعه بش شرفوا حضرتهم..
وهادي اول علامه...
🗝بعد جو واستقبلوهم..
يدوب ضيفوهم ونادوا ع دعاء...اللي جو زوز من خواته بس..
دعاء..
وياسبحان الله..من اول ماخطيت عتبة الصاله قلبي انقبض بقوة وصدري انغم..هما كانوا عاديات ومحتشمات ووجوهم مبتسمه بس في شي مش مريحني بكل..مخوفني هلبه..
وحده من خوات العريس:والله خوي راجل ماشاء الله خدام ع راسه ويطلع في القرش من الصخر زي مايقولوا يخدم في الدوله وعنده محل كبير خضرا وهو اللي يمشي ويجي ع تونس بش يجيب البضاعه..خوي راجل مستقيم والناس كلها تمدح فيه وفي العيله مش شكرانيه فارواحنا لكن هدا الحق..
التانيه قالت:حني عيلة ربي ناعم علينا وعندنا والحمدلله..
دعاء..
ايه بعلامة ماخاشين تصفقوا بإيديكم..ايه حنقعد نقيم في الناس ع هالاساس لأن اساس تقييمي هدا ديما يبين اني ع حق..وطبعا عاد خواته كملوا يشكروا ويمدحوا في ارواحهم لين كبدي درهت..لاحظت خواتي ماتقبلوهمش ولا ماما بس مافيش سبب يخليهم يردوهم..حتى لو في حيتغاضوا عنه المهم دعاء تلحق ع عمرها وتتزوج..
اخته:حني نبوا مراة تهنينا ع خونا وترد بالها منه من ماكلته وشرابه ولبسه يعني مايحتاج الراجل..وهو راهو يبي ربة بيت مايبيش مراة تخدم..
جميله:ايه هي ربة بيت..
اخته تانيه:متخرجه من شني!؟
دعاء:كنت نقرا في الهندسه وحاليا موقفه قيدي..
اخته:عادي مش مشكله زايده ناقصه القرايه..
دعاء..
مش مرتاحه..مش مرتاحه ابدا بدا ابدا..وقلب المؤمن دليله..
🗝واتفقوا قبل مايروحوا ع موعد النظرة الشرعيه الأسبوع الجاي..
كانت دعاء في الفترة تحاول ادير روحها عاديه قدام امها بالذات بش مايصيرش بيناتهم نقار..
وكانت تصلي في الإستخاره يوميا..
اما رويدا فمشت قعدت عند متاعينها نهارين بعدين مشت لحوشها في طرابلس..
وقعدوا في هالفترة يمشوا عليها اهلها ويجوا وعبدالله مرة مرة يحطها غادي..
وقعدت في ليبيا لليوم اللي فيه المقابله الشرعيه متاع دعاء واليوم اللي بعده حتسافر..
......
يوم المقابله الشرعيه..
صوت طقة ع الباب..
"خشي"
كانت هدا صوت مؤيد يأذن لدعاء بالدخول..
خشت دعاء..
عيونها تلاقوا مع عيون الخاطب"رضوان"..
هو نزل عيونه وابتسم وهي قعمزت..
مؤيد:عن اذنك لحظه...وناض طلع من حداهم..
رضوان:كيف حالك يادعاء..
دعاء شبحتله وقالت:الحمد لله..
رضوان:كم عمرك انتي دعاء..
استغربت دعاء ومع هدا جاوبت:28سنه..
رضوان:امم كويس..
دعاء:وانت؟.
رضوان رفع حواجبه وقال:32..
دعاء:امم..تمام..وشن تخدم..
رضوان:نخدم في الإتصالات هني مقر خدمتي عليكم مش هلبه بس في جيهتكم..
دعاء:انت خريج شني؟
شبحلها وقال:معهد عالي اتصالات وتقنية معلومات..
دعاء:قالوا قبل تبي تطلع برا لكن ماصارلكش..
ابتسم وقال:ايه مانبيش نطلع برا البلاد..وانتي..خريجة شني؟
دعاء:اني كنت نقرا هندسه ووقفت..
هو ابتسم ع جنب وقال:اممم..
دعاء..
طلعت من المقابله واني عاديه يعني ماحاسه بشي لاخوف ولاراحه مش حاسه..مافيه شي لفتني الحق بس مع هدا قلت لأمي وخواتي تقبلته...
🗝وفوتوا كم يوم واتصلوا بيهم وقالوا ان في قبول...
وجو جيه تانيه مع امهم بش يتموا الموضوع...
واتفقوا يديروا تلبيسة بسيطه والعرس العام الجاي..
دعاء..
ماكنت حاسه بشي..غير اهو موضوع ويكمل وخلاص..
لعند ماجي رمضان وكانت التلبيسه فيه ماحضر حد غيرنا حني وياهم وبس..لااقاربنا ولااقاربهم...
وسمعت العيله بعدين بخطوبتي وكلهم باركولي بطريقه حسستني وكأني كنت راقده في غيبوبه في المستشفى ونضت منها..عليك حاله..
⚘هدا مجتمعنا يادعاء..هادي معاييره..هادي عقليته..وهادي تفكيره اتجاه المراة..اللي تتزوج خير من اللي تخدم وتنجح عمليا وتنجز..عندهم الزواج في حد ذاته انجاز..
بينما هو سنة الله في كل مخلوقاته حتى البهائم تتزاوج يعني مش حاجه خارقه للعاده..
وللأسف مع تقدم السنين نزيدوا نوخروا اكثر واكثر..
لدرجة انهم بدوا يزوجوا في القصر المراهقين ويديرولهم في اعراس كبيره..وبعد مده لاتتعدا سنه يجروا هما وياهم في المحاكم..
عذرهم لما يزوجهم بش يعفوهم ويحصنوهم ع الحرام..
وليش ماتعبوش ارواحكم وتربوا كويس وتنشأوا جيل عفيف بذاته يكبر بطموحاته في تحقيق النجاح في القرايه والعمل..
تربي الولد بش يكون راجل ناضج محترن قد المسؤولية
والبنت بش تكون ام صالحه تربي صغارها احسن تربيه.
لكن مع الأسف في وقتنا الحالي ابهات وامهات هالوقت ماعرفوش يربوا...والمصيبه الاكبر انهم يزوجوا صغارهم المش متربيين بش يجيبوا صغار ومايعرفوش يربوهم حتى هما وممكن يشردوهم..ويغرق مجتمعنا في الجهل والانحطاط اكثر واكثر دام هدا حال اجياله الجايه⚘
⚘⚘⚘⚘⚘⚘
في الحي اللي يسكنوا فيه اهل دعاء..
تحديدا الروضه..
وقت مرواح الأطفال اللي يقروا في الفترة الصباحيه..
"خيرك تشبحي للبنيه هادي هلبه؟"
وفاق:مش عارفه وين شايفتها حاسه روحي نعرفها..
زميلتها:جت امس بس هادي..
وفاق مطت شواربها للاسفل وقالت:مش عارفه..شايفتها قبل متأكده...
شويه نادت المديرة وفاق وهي تقول:طلعي روعه لولي امرها ياوفاق..
وفاق:باهي..
ومشت وفاق لروعه وخدتها من يدها وطلعت بيها..
وفاق:من جايك بابا ولاماما؟
روعة:خالو..
ابتسمت وفاق وقالت:محلاك ياروعه حتى اسمك تحفه..
روعه:تحفه!؟
ضحكت وفاق ..
وصلوا برا..
روعه:اهوا خالو موحا.
قامت وفاق عيونها وشافت وين مشت البنت..
توسعوا عيونها بدهشه..
هو تلقى بنت اخته ورفعها في حضنه وجي لوفاق..
رفع نظراته فوق وقال :السلام عليكم..
وفاق بوجه لونه احمر:وعليكم السلام..قصدك هادي بنت اختك فريحه؟!
هو ابتسم وقال:ايه..
خبطت وفاق ظهر يدها اليمين ببطن كفها اليسار وهي تقول:واني نقول وين شايفتها!!
ضحك محي بعدين قال:شن حال بوك والعيله..
وفاق:الحمد لله..شن حال خالي ومرت خالي..
محي:الحمد لله تمام..
وفاق:باهي اني نستاذن..سلم ع الجميع..
محي بإبتسامه :يوصل..
لفت وفاق وخشت للروضه..
ومحي قعد معاها لين خشت الروضه بعدين قال لبنت اخته:حلوة ولا؟.
روعه:ايه وعيوناتها كباار وخضرات..
محي:ههههههه..
بعدين لف ومشي لسيارته..
⚘بعد ربع ساعه..
روحت وفاق للحوش..
وين جت خاشة داخل سمعت نقاش حاد...
وفاق بخوف:خيرهم هادم..
وقعدت تمشي لين وصلت للدار اللي صاير فيها النقاش..
دعاء بإنفعال:وعلاش الفاتحه قبل العرس بشهور ياماما !؟.
جميله بعصبيه:باهي شن فيها فهميني شن فيها!! ياما منهم اللي انقرت فاتحتهم قبل العرس بوقت واولهم بنت عمتك..
دعاء:هديكا لانها بتسافر مع راجلها بعد ماتتزوج اما اني علاش!!
وفاق:وانتي علاش معارضه هكي خيرلك تتعرفي عليه اكثر قبل تتزوجوا..
جميله:اهي الناس اللي تفكر..
دعاء:ايه مال شنو اني مانعرفش نفكر واني الغبيه ومانعرف شي..وفي الاخير تمشوا تمشوا وتولوا لكلامي..
جميله بنفاذ صبر:اسمعي اني قلت لبوك وقال باهي مانبيش كثرة دوة ايوه..سادك لامتى بتقعدي في وجهي شاده تركينه في الحوش لادايرة لروحك ثمرة ولافايده..ندادك صغارهم في المدارس وانتي 24 ساعه شاده النقال والتلفزيون..خواتك اصغر منك كملوا قرايتهم وتزوجوا وقاعدين يبنوا في مستقبلهم وانتي قاعده هكي زياده عدد بلافايده...
هي تتكلم ودموع دعاء يطيحوا ورا بعض وهي تشبح لأمها بصدمه..
ووفاق تشوف لدعاء بحزن..
جميله:ياسرك عاد ياسرك فيقي ع عمرك كبرتي راك بتخشي التلاتين معاش فيها ايوه..معاش فيها..
ومشت طلعت من حداهم وهي تمشي بعصبيه..
ودعاء قاعده جامده في مكانها ودموعها مابطلوش نزول.
دعاء..
كلامها حرقني..قتلتي الف مرة في لحظه..زاد دمرني اكثر من اني مدمرة من داخل..وحسسني هالمرة اني عالة عليهم وهم ثقيل...ياه قداش تمنيت الموت يومها..
وبسبب كلام ماما هدا..قبلت بالفاتحه واني مجبورة مكسورة مقهورة..وقلبي قبضة الخوف فيه زادت اكثر واكثر..
⚘⚘⚘
وبعد اسبوعين ..
انقرت فاتحه دعاء..
بحضور نساوين العيله...لما جاهم خبر قرايتها..
كلهم زغردوا وجوها يهنوا..وهي تسلم عليهم وتتصنع في ابتسامه وخلاص..
دعاء..
هما يزغرطوا واني من داخل نعيط..هما يغنوا..وصدري يزيد يطبق..هما فرحانين ليا واني مقهورة على روحي..
اللي جاني نصيب اني مش راضيه بيه ومانبيشي وضغط اقرب الناس ليا هو اللي جبرني عليه..
كلمتني رويدا يومها تبارك واني نرد عليها متصنعه الفرح قدام الناس بس..تمثل وخلاص ونكذب عليهم وع روحي ونحاول نصدق كذبت هالفرح لعل صدري ينشرح شويه..
🗝وفي هديكا الليله..
خدي رضوان رقمها وكلمها..
دعاء:اممم..نعرف..
رضوان:اني ماعنديش الروح مع القديد لازم تتعلمي اديريه..
دعاء:اني مانحباش...
رضوان:مادخليش بيك تعلميه ع خاطري..بعدين ضحك وقال..ونبيك تتعلمي هلبه حاجات تانيه..
دعاء..
وبدي يتكلم في هديكا المواضيع المقرفه بطريقه مقرفه واني مصدومه من اول مكالمه..ووللأسف مجبورة نسمع ونساير اني مرته توا..بس كنت لما نحس ان خلاص معاش قادره نكمل ننهي المكالمه..
ياااه..قداش كنت نتمنى ربي ياخدني لما يتصل المهم مانردش عليه ونسمع لمواضيعه التافهه..كنت نرد ونساير بعدين نتحجج بان في حد ينادي فيا ولامشغوله بحاجه..
ونهرب منه اتصالات يجيني فايبر....
مخلوق مقرف وسطحي وتافه..
🗝واستمرت دعاء متحمله الهم اللي هي فيه ومسكره فمها وساكته..ماعندها لمن تشكي ولاتحكي..مافي حد جيجي معاها واللي هدا بيقوللها..راجلك..
وفي يوم..
دعاء:اختي اليوم جابت..
رضوان:اه هادي اللي قاعده في قبرص..
دعاء:ايه..
رضوان:امم..تعرفي اني ماطلعتش برا ليبيا كان لتونس والجزاير والمغرب بس..
دعاء:الخدمه..
رضوان:خدمه ودهواري..
دعاء:اممم..بعدين قالت..رضوان شن صار في الحوش..
رضوان:معاش لهيت بيه بكل..
دعاء:كيف معاش لهيت بيه راهو مازال شهرين بس..
رضوان:مرات اطول..
دعاء:كيف اطول!؟ لالا رضوان لازم نمشوا ع اللي اتفقنا عليه ع الكلمه اللي عطيتوها لبوي..
رضوان:تي خيرك تعيطي انتي!؟
دعاء:مانعيطش اني لكن يارضوان حني عندنا الخطبه ماطولش حتى قبل لما انخبطت شرطنا عليهم مايطولهاش وخواتي نفس الشي..غير رويدا بس بسبب قرايتها..
رضوان:غير دقيقه دقيقه..اني كنتي مخطوبه قبل!؟
دعاء بإستغراب:كيف انت ماتعرفش!؟
رضوان بعصبيه:لا مانعرفش مانعرفش..
دعاء:قلنا لخواتك من اول يوم جونا فيه..
رضوان؛صكري #### صكري..
وصكر في وجهها...وهي قعدت جامده ع لقطه من الصدمه..
وقعدت بعدها ساعتين غامه روحها في البطانيه وراقده..او تبكي وتفكر شن بيصير...
ومافي حد من عيلتها اهتم لأمرها كلهم واخدين عليها ترقد اغلب الوقت..
ومع المغرب ناضت صلت ومشت طيبت العشي وكانت طول الوقت تتحاشى في اهلها..
وامها حاسه ان فيها شي بس طنشت..
وقعدت دعاء هالحاله لين ليل الليل واتصل بيها..
ردت عليه بالسيف..
دعاء:نعم..
رضوان:خيرك تتكلمي هكي..
دعاء:اسأل روحك..
رضوان بإنزعاج:خلاص خلاص صكري ع الموضوع معاش تفتحيه بكل..
دعاء:شن الألفاظ اللي بكري قلتها معقوله انت تتكلم هكي..
رضوان:اسمعي ماطيرهاليش من غير شي اعصابي راكبات..المهم توا نبي نغير جوي..اسمعي قوليلي..
دعاء:مانبي نسمع شي ولانقول شي..
رضوان:خير امك انتي خيرك..
دعاء:احترم نفسك شن خير امك هادي..
رضوان:باهي باهي..صكري صكري..
وصكر في وجهها..
وهي نزلت تليفونها وقعدت تبكي بصمت ع حظها المايل..
🌻🌻🌻🌻
واستمرت تمشي ايام دعاء كلها هم في هم وهي مجبورة تتحمل رضوان اللي قاعد يتمادى معاها يوم عن يوم..
........
رضوان:قتلك صكريه الفيس معاش نبيه
دعاء:نبي نفهم علاش شن خطر عليك..
رضوان:انتم معشر النساء مافيكمش امان نندري عليك في من تكلمي ولمن تعلقي اني اكيد مدايرة عرم توا..
دعاءبصدمه:شن تخرف انت احترم نفسك..
رضوان:قتلك صكريه ماتخلنيش نحرش فيك بوك..
دعاء:شن بتقوله !!؟
رضوان بمكر:نعرف شن نقوله كويس..
وانتهت هالمكالمه بنقاش حاد وهو اللي صكر عليها كالعاده..
.......
بعد اسبوع..
دعاء:كيف انتم تلعبوا كل مرة كلام شكل..
رضوان:اسمعي ضمي فمك ماتخلنيش نبدا فيك..كانك مستعجله ع الزواج هلبه نسكنوا في الايجار لكن بتتحملي بعدين..
دعاء:حني من الاول قلنا ايجار لا..ياحوش ملك يالا خواتي كلهم خدوا رجاله بحياشهم..
رضوان:احسن منك وعايشين في ايجار ومتحملين..
دعاء بصدمه:احسن مني!؟
رضوان:ايه بنات عز عاشوا في الإيجار انتي مني بش ماتعشيش فيه..
دعاء وصلت عندها حدها وردت تقول..
"اني دعاء محمد سالم اللي لولا الظروف ماكنت رضيت بواحد زيك"
وهالمرة هي اللي صكرت عليه..
دعاء...
واتصل بعدها مئات المرات ومابيتش نرد..واتصل ايام متواليه واني مانردش عليه..
خلاص طفح الكيل معاش قادره نتحمل كيف بنعيش مع مخلوق زي هدا كيف!!..وااه الله يسامحك ياماما درتيها فيا..
وخليتيني نرضى بقراية الفاتحه..وقتها كنت زي اللي طايح في بير غريق مافي حد يقدر يطلع منه..
غير واحد بس..هو بس..اللي طلع يوسف من البير..ويونس من بطن الحوت..
ماليش غيره..
وطول توجهت لله في جوف الليل..
ارتميت بين ايدين ربي وبكيت وشكيت وتوسلته وترجيته يخلصني من اللي اني فيه..
🌻🌻🌻
بعد يومين..
الساعه السابعه مساءا..
كانت دعاء طالعه من الحمام بعد ماتوضت لصلاة المغرب..
خشت للدار..
لقت وفاق فيها واقفه تفرك في ايديها ببعض بتوتر..
لاحظتها دعاء وقالت:خيرك؟
وفاق:رضوان يكلم في بابا في التليفون..
لون وجه دعاء انخطف..
وفاق:شن صاير بيناتكم؟!
دعاء:سمعتي بابا شن يقول!؟
وفاق:بابا يتعارك معاه..
حطت دعاء يدها ع صدرها بخوف..
ع خشة جميله وهي في قمة الغضب..
جميله:حتى هدا بطفشيه بقلة عرفك ورفعة خشمك..
دعاء قعدت تشوفلها بصدمه..
جميله:تعرفي لو اطلقتي بعد الزواج ارحم من طلاقك قبله..والله معاد في واحد معبرك وتشوفي الدوة اللي تطلع عليك..
ع جية محمد:اسكتي ياجميله..دعاء بنتي..الكلب كيف كان يكلم فيك..
دعاء بإنفعال:وهاك قلتها يابابا كلب مسخ حقير ياما هاني ووصل في شرفي وفيكم ياما تمسخر عليا وعاملني بأسلوب قذر ..
محمد:والله زبطته من المرتين اللي ريته فيهم واحد مش مزبوط..حتى الشيخ توا قالي والله ماكان باين عليه كلمه حتى هو وقال اسلوبه معاي كان زفت..
جميله وهي فاتحه عيونها ع وسعهم:يعني شني تبيها تطلق توا!!؟ تطلق قبل العرس!!؟ حي عليا حي!؟
محمد:توا ولابعدين مع واحد مسخ زي هدا ماهيش مكمله..
جميله:لا تكمل وتتحمل ياما غيرها تحملوا..
دعاء بغضب:ماهو هدا همك انتي كلام الناس وشن يقولوا الناس وشن تقول اختك وجارتك وحماتك وسلفتك اني اخر همك...ان شاء الله نموت..
جميله:ياريتك تموتي ياخايبه يلي مانافعه في حاجه بعد هكي موتك خير من حياتك انتي..
محمد بصدمه:جميله!!
جميله بإنفعال شديد:جميله لو تطلق هادي ماضاله الاماشيه ومسيبتهولك..
ع جية شرقيه تجري ومعاها مؤيد..
شرقيه بخوف:خيركم شن في خيركم!!
ضحكت جميله بسخريه..
اما دعاء اللي معاش بدت تشوف في شي قدامها قالت:بنطلق استريحتي بنطلق بري انشريه في الدنيا كلها هدرزي بيا وتسوهكي لين تشبعي..
مؤيد بصدمه:شن تخرفي انتي!؟
شرقيه:الحق فيا اللي جيت اصلا..
ولفت ومشت وهي تقول...الحق فيا اني..
مؤيد:شن تقطفي انتي طلاق شني!!؟
دعاء:انت اطلع منها مادخلكش بيا فاهم خليك في حالك..
محمد:خلاص يابابا خلاص اني من غدوة بنمشي نرفع قضيه..
جميله:قبلها ارفعني لحوش ماليا..
وفاق بعياط:ماما..
مؤيد؛والله نطلع امي نعدمك..
دعاء خلاص فقدت اعصابها؛اعدمني اعدم اقتلي وخلصني من هالعيشه السودا خلاص..اني معاش قادره نتحمل عييت فديت خلاص..
وبدت تخبط ع وجهها وتعيط بهستيريا..
كلهم انصدموا فيها..
وجميله اللي دموعها طاحوا جتها وهي تقول:خلاص بنتي خلاص دعاء..
لكن دعاء اللي كانت في حالة نفسيه صعبه واعصابها منهارة دفت عنها امها وهي تقول:كله منك انتي كله منك ..
جاها محمد وضمها وهو ميت خوف ع بنته:خلاص يابابا خلاص..
ودعاء تبكي وتقول بصوت عالي:عييت ياربي فديت مليت خودني ياربي..
محمد:خلاص يابابا خلاص..
ووفاق تبكي وترعش..
وجميله نشوف لدعاء بصدمه ودموعها سيل..
ومؤيد كذلك كان مصدوم وموجوع عليها..
وعمر الصغير يشبحلها ويبكي..
محمد ودموعه فعيونها:بنتي استهدي بالله..
ودعاء اللي بدت شبه مجهده:نبي نطلق يابابا..
محمد:حاضر يابابا حاضر..
دعاء بصوت يدوب طالع ووجه شاحب:نبي نموت يابابا..
محمد:لالابنتي لاماتقوليش هكي..
ومجرد ماكمل كلامه..طاحت دعاء من طولها فاقده الوعي...
🥀خيبه..فشل...انهزام...ضعف...ذبول...والضغط يولد الأنفجار..وهالانفجار ياخد كل مافينا من قوة..⚘

...يتبع....