"إلا أن يشاء الله"

النهاية'1'

✒..
مروة:هو ولا؟!
دعاء مصدومه وخلاص مش قادره تتكلم..
سكينه:من هو هذا سبحان الخالق!!؟
التفت دعاء وشبحت لسكينه.
دعاء..
حسيت بحراره في وسط ضلوعي لما سمعت شن قالت سكينه..وقلت لروحي شن يادعاء هادي غيره!؟
امال:وحده من البنات اللي معاه جايه.
ولت شبحتلهم دعاء..
شافت وحده جايه وفي يدها باقة الورد وهي مبتسمه وصلت فيهم وقالت:السلام عليكم..
كلهم ردوا السلام..
ودعاء تشوف لجمال اللي كان يشبحلها وابتسامته ع وجهه..
:دعاء..
شبحتلها دعاء ..
:اني اسمي رجاء اخت الدكتور جمال..مبروك النجاح تفضلي..
رمشت دعاء عيونها بسرعه بخجل ووجهها بلون حبات الرمان..
بعدين مدت ايديها وخدت الباقيه..
رجاء:هادي من جمال ويقولك الف مبروك ياباش مهندسه..
البنات كلهم يشبحوا لدعاء بإبتسامه دهشه ممزوجه بالفرح..
دعاء شبحت لجمال...لقاته يمسح ع لحيته وهو يشوفلها بنفس الإبتسامه..
بالسيف تحكم في ملامح وجهها بش ماتبادلاش الأبتسامه..
بعدين شبحت لرجاء وقالت:شكرا..
رجاء:العفو..مررت نظرها ع البنات وقالت:صاحباتك..
دعاء ساوت شاربتها وقالت وهي تأشر بيدها:هادم صاحباتي..وهادي اختي.
رجاء ابتسمت وبدت تسلم عليهم بالوحده مصافحة وهي تقول:اهلا..
بعدين شبحت لدعاء وقالت:ممكن ناخد من وقتك شويه دعاء..
مروة حطت يدها ورا ظهر اختها وطبطبت عليها تشجيعا..
دعاء:احمم..باهي..
مروة:هي تعالوا صبايا..
صاحبات دعاء مشوا مع مروة وهما فرحانات وعندهم فضول كبير يعرفوا القصه..
رجاء:امم..شن جوك يادعاء..
دعاء ابتسمت وقالت:الحمد لله..
رجاء:دعاء راهو اني وخواتي التلاته واخدات منك موقف..
دعاء بإستغراب:علاش!؟.
رجاء:لأنك متعبه خونا وذاهبتيله شيرته..
دعاء عيونها قريب طلعوا من الدهشه والخجل ووجها قريب ينحرق من قوة الحرارة..شبحت جهة جمال..
لقاته يتكلم مع اخته نجلاء ويشوف جيهتها..
غيرت عيونها عنه وقالت:مافهمتش..
رجاء بضحكه:لافهمتي كويس..حبيبتي دعاء..خوك يبيك بصدق والمده اللي فاتت لو تعرفي قداش تعب وهو يدور عليك لين ربي دله من معلومات سمعها عنك منك انتي واهو جابنا وجينا بش نتمو موضوعه اليوم ضروري..
تنهدت دعاء وقالت:هو كلمني قبل واني وضحتله حاجات هو مايعرفهاش..
قاطعتها رجاء وقالت:نعرف اللي صار بينك وبينه من دوة ونقولك...اني اخته ارمله وعندي زوز ولاد تزوجت بعد بوهم المرحوم شاب عزابي وعايشه اني وياه احلا عيشه..
دعاء نزلت عيونها للورد وقعدت تشوفله بحيره..
رجاء:خوي راجل متفهم متعلم مثقف..خوي والله يادعاء لو خدتيه حتعيشي معاه احلا عيشه والله ولا لحظه حيندمك انك وافقتي عليه..ولو في بالك كلام الناس..طز..لوحي وراك وماتعدليش..ماتوقفيش سعادتك لانك خايفه من كلامهم ونظرتهم ليك بعدين لو قالوا كيف عزري ياخد مطلقه!!؟..ياما سمعت اني وطنشت..المهم عايشه مرتاحه ومتهنيه مع راجلي..
دعاء شبحتلها وقالت:يعني كلكم مش معارضين..امك وبوك؟!
ابتسمت رجاء بألم وقالت:الله يرحمهم..
دعاء شبحت لجمال بحزن..
وهو كان ياخد من مؤيد في طرف بكلاوة ويكلم فيه ويضحك..
تبدلت نظرة الحزن لإبتسامه حلوة ..
رجاء:قولي موافقه يادعاء وعطينا موعد نجوكم فيه هيا..
شبحتلها دعاء وضحكت ضحكة خفيفه..
ع جية نجلاء قالت:السلام عليكم..
ردوا عليها السلام..
نجلاء:هايادعاء شن قلتي يبستيلنا ريقنا راهو..
ضحكت دعاء تاني..
رجاء بضحكه:اختي الكبيره نجلاء بعد جمال ع طول..وبعدها اختي عطاء وبعدين اني رجاء وصغيرتنا اسمها آلاء وكلنا متزوجات..
دعاء ابتسمت ومدت يدها صافحت نجلاء..
نجلاء صافحتها وقالت بإبتسامه:نبوا نديروا كنينه يادعاء فرحينا عاد.
دعاء شبحت لجمال..وهو شبحلها كان يمضغ في البكلاوة وقف مضغ..
هي ابتسمتله...هو رجع يمضغ بالشويه وارتسمت ع وجهه ابتسامه..
غيرت عيونها عنه وشبحت لخواته وقالت:تقدروا تجو معاي نعرفكم ع عيلتي..
رجاء ونجلاء ابتسموا..
ونجلاء قالت:اكيد..
دعاء بإبتسامه:تفضلوا..
ومشوا مع بعض وجمال  يشبحلهم..
هما قبل يدرقوا شبحوله الزوز مع بعض غمزوا بعيونهم..
هو ضحك...وهما ضحكوا ومشوا...
⚘استغربوا جميله ورويدا ووفاق لما شافوهم..
ودعاء عرفتهم عليهم عن انهم خوات الدكتور جمال اللي تعاين عنده..لعند ماقالت رجاء..
"خبطها ع جبهتها يومها"
اندهشوا هلبه...وقلب جميله قعد يرقص من الفرحه لانها شبه حسن بحاجه حلوة حتصير قريب وفي قلبها ومنه  تدعي لربي يكون احساسها في محله...
⚘⚘⚘⚘⚘
في الطريق..
"ايه خديت رقمها ورقم مامتها"
جمال ابتسم وهو يشوف القدام..
رجاء:عجبتني العيله خواتها مهضومات وامها تبان مراة طيبه..
جمال:حتى خوتها عجبوني بالذات الصغير مؤدب هلبه..
نجلاء:هي البنيه بروحها لاحظت انها محبوبه شفتي صاحباتها كيف فرحانات بيها..
رجاء:ايه..
جمال بإبتسامه:ماعرفتوش علاش هدا وين تخرجت..
نجلاء:هي قالت وقفت قيدها لفترة..
جمال:اها..
نجلاء:جملو لو صار نصيب بتخليها تخدم..
جمال سكت شويه بعدين قال بإبتسامه:النصيب صاير بإذن الله..لكن الحق مش عارف..مااظنش.
استغربوا فيه خواته لأنه زمان مع منال ماكانش عنده مشكله في الخدمه بالعكس شجعها عليها...
وقتها تأكدوا ان دعاء اثرت بقوة في خوهم اكثر من تأثير منال بهلبه..
⚘⚘⚘⚘
ودعاء في هالوقت كانت راكبه سيارة خوها من الخلف وهي شادة باقة الورد وتتأمل فيها بإبتسامه..وتذكر في اللي صار كله..من اول مرة شافت فيها جمال لغاية اليوم..
وفي جنبها امها تشبحلها مرة مرة وهي مبتسمه وعيونها معبيات دموع فرح..
بعد طول مسافه...
وصل مؤيد بسيارته للحوش ..
ووصلوا وراه النسابات..
نزلوا نساوينهم وكل حد توكل ع حاله..
وخشوا كلهم للحوش..
جميله:هيا معاش في وقت لازم نبدوا بكري..
مروة قامت خمارها وقالت:هو عشي ياماما علاش مستعجلين..
جميله:موليه ركيكه يامروة راهو..
ومشت خشت داخل..
خواتها ضحكوا عليها..
هي حولت ملايتها وقالت بتحدي:تو نوريك شن دير الركيكه ياماما..
ومشت خشت داخل بأنفعال..
وخواتها يضحكوا..
بعدها بدوا يجروا ويعولوا ع عشي العزومه بمناسبة تخرج دعاء..
بعد ساعه..جاهم الياس..
جاب طلبيات الحار والحلو اللي حجزوهم جميله ودعاء..
وجاب من عنده شيش عصير هافانا وفواكه وصفرتين بكلاوة..
جميله:تي غير علاش هدا كله ياولدي بس..
الياس:شن تقول ياعمتي ربي يهديك راني ولدكم..
جميله بإبتسامه:ربي يحفظك ويبارك فيك وفي صغويرتك ورزقك..
الياس بإبتسامه:ويحفظك عمتي جميله..هي السلام عليكم..
جميله:وعليكم السلام..في امان الله ولدي..
وخشت داخل وصكرت الباب..
حولت ملايتها ومشت للكوجينه..لقت البنات كلهم فيها..
رويدا:مش تقولوا الياس بس نسيبنا الباهي حتى عبدالله جاب ارقى انواع الشكلاطه..
جميله بضحكه:بارك الله فيه لكن اني نبي منه شي تاني..
رويدا بضحكه:شن هو..
ع خشة محمد:دعاء..
طلعت دعاء بسرعه..
هو لما شافها فتح ايديه وقال:مبارك ياباش مهندسه..
طول ارتمت في حضنه دعاء وهي بطير من الفرحه لما شافت فرحته..بعدين كبت ع راسه وايديه..
دعاء..
كنت مش متخيله يجي هاليوم بكل..وسبحانه ربي جابه جابه..الحمد لله..
طلعت رويدا بعدين..
محمد:اووووو قبرصيه..
ضحكت رويدا ومشت تسلم ع بوها..
وشويه وجت جميله وخداته وخشت معاه المربوعه بتكلمه في موضوع مهم..
محمد:دكتور! عزابي!؟
جميله:ايه وعليك شاب وعليك عيله باين عليهم ناس عز وراقيين..
محمد؛وين رايها!؟
جميله:هدا اللي عاينت عنده..
محمد رفع حاجبه وقال:اممم..
جميله:شن امم هادي بنتك ملتزمه ياراجل مش متاع الكلام الفارغ 
ضحك محمد وقال:ياودي ماقلنا شي..تنهد بعدين كمل يقول..ربي يكمل ع خير هالمرة وان شاء الله تصيب..
جميله رفعت عيونها وقالت برجاء..
"يااارب"..
⚘⚘⚘⚘⚘
ودارو عشي العزومه رز بالبصله..
ووتوا الضيافه وماعينها..
بعدها قعمزوا المتزوجات في الدار يغيروا لصغارهم اما وفاق كانت تستشور..
وفي الكوجينه دعاء وامها يسقوا في الغدي لمحمد ومؤيد وعمر..
شويه خشوا مروة ورويدا لقوا دعاء حاصله مع امهم في الكوجينه..
جميله بتهكم :باهي اللي رينا وجوهكم..
مروة:خدتنا الهدرزة ماما..
رويدا:بالله دعاء سقي صونيه مليحه لراجلي..
مروة:حتى اني دودي..
دعاء:نسقي للشيخ احلا صونيه مسكين تعب وتمرمد معانا..
رويدا برفعة حاجب:وخيره راجلي اني ياحنه!؟
جميله بضحكه:كان يديرلي تأشيره بش نجيك غادي نديرله صونيه خير من صونية الشيخ بمية مرة..
مروة وهي متصنعه الزعل:صار هكي ياماما!!
جميله وهي تغمز :غير يديرولي تأشيره بس..
رويدا:هيييي..
قعدوا يضحكوا ودعاء تضحك وهي تسقي فالصواني..
رويدا:باهي ياجيجي باهي..
ع خشة مصعب ولدها...
مصعب:نبي اكل..
رويدا:تبي عينك بكري كليت..امشي اطلع هيا..
وطلعت هي وياهم..
جميله بصوت عالي:عطيه كيكه يارويدا..
رويدا:لالا ياماما يلبز حوايجه..
شويه خشت ماريه تقول:ماما نبي تفاحه..
مروة:وااااك ياربي..
شدتها من يدها وقالت:تعالي هني..
جميله:تي عطوا الصغار ياكلوا خيركم هكي..
دعاء:غدوهم بكري ياماما..
جميله:هادوا صغويرة مفروض مايخلوا شي في خاطرهم..
دعاء بضحكه:هدا دلع..
جميله:ايه بندلعهم وصغارك انتي بالذات..
ابتسمت دعاء بخجل..
جميله بإبتسامه:هالمرة قلبي مستريح ع الآخر..
دعاء:حتى اني..
جميله:ربي يكمل ع خير يارب..
دعاء تنهدت وقالت:يارب..
⚘دعاء..
ومع المغرب بدوا يجوا العيله عمامي وعماتي وخوالي وخالاتي والحوش تعبا..
وكانت ليله حلوة واللي زاد حلاها تفكيري كل لحظه في جمال..وفي اللي داره اليوم ومرة مرة نشوف للورد اللي جابه واني حطيته في احسن مزهريه في الصاله..الله قداش خلاها حلوة💖..
🌻🌻🌻🌻
وعدوا يومين..
وجي اليوم اللي عطوا فيه موعد لخوات جمال بش يجوا يخطبوا..
فهاليوم كانوا خوات جمال مستنفرات..
زي ماكان حوش دعاء مستنفر حتى هو لان الجية رجاله ونساوين يبوا يتموا الموضوع فيسع..
مادام الطرفين شايفين بعض وقابلين ببعض..
🌷🌷🌷🌷
بعد العصر..
بعد مالبس عربي وتأنق...طلع من داره..عيونه جو ع دار الغاليه...امتلوا عيونه بالدموع ومشالها..
فتح بابها وخش..
قعد يمرر في نظره عليها..
للحظه تخيل امه واقفه ع المرايه وتوتي في روحها وتقول..
"هاني واتيه ولدي شويه نلبس عبايتي"
خنقاته العبره..
بعدين قال:امي..يما...ماما...ماتمنيت شي في حياتي قد ماتمنيت تكوني موجوده في هاليوم..اليوم اللي كنتي تراجي فيه..
اليوم اللي تمنتيه اكثر مني..
لتوا مش قادر ننسى اخر مرة هدرزنا فيها..
في وذاني يرن كلامك  ياماما قاعد..لهاللحظه..
<< اني نبيك تعيش مرتاح مع بنت حلال تفرح قلبك وتهنيك وتجيب منها صغار يكونوا زيك انت يبروك انت وامهم كيف مابريتنا اني وبوك الله يرحمه..>>
غمض عيونه بشده والدموع تنزل وقال:يارب..نسألك يامن ع كل شي قدير ..انك تخلي امي تعرف اللي اني فيه توا..كيف مانعرفش..لكن انت تعرف يارب ريحها في قبرها يارب العالمين..يارب...ياالله..
"جماااال عمامي جو"..
فتح عيونه ومسح دموعه..بعدين رشف..
مرر اخر نظراته ع الدار بعدين مشي طلع وصكر وراه الباب..
⚘⚘⚘⚘⚘
"لفي..لفي..لفي"
قعدت دعاء تلف وهي توري في خواتها فستانها..
رويدا:ئمممر..ئمر ياخواااتي..
مروة بإبتسامه:الله يبارك دودي عسل طالعه..
دعاء :حقه!؟.
وفاق بإبتسامه:حلوة بزياده المرة هادي..
جت رويدا لدعاء نخصتها بمرفقها وقالت:حتى هي بتاخد من يريده القلب..
ضحكوا البنات ودعاء ضربتها وهي تضحك..
ع خشة جميله:الناس جو اطلعوا.
دعاء توترت..وخواتها طلعوا بسرعه..
شبحتلها امها وقالت:الله يبارك..
ابتسمت دعاء...
وجميله مشت وصكرت الباب..
⚘استقبلوا الرجاله في المربوعه..
محمد وولده مؤيد..وخوته علاء والمهدي ونساباته التلاته..
والرجاله اللي جو هما..
جمال وعمامه التلاته وخاله الوحيد..
اما النساوين..
خوات جمال الأربعه مع خالة ليهم ووحده من نساوين عمامهم..
في الكوجينه كانوا ناهد وشرقيه يعاونوا...
ومع النساوين..جميله وعزوزتها وليلى مرت المهدي اللي تفاجئت هلبه وين رتهم..بل انصدمت وماصدقتش بكل..
هدرزوا مشوار بعدين نادوا دعاء..
دعاء..
وكأنها اول مرة..رجليا يرجفوا..وقلبي يدق بقوة..نسمع في اصوات الرجاله من المربوعه ابتسمت تخيلت روحي سمعت صوته بيناتهم..
ولما وصلت في الصاله حسيت كل جزء فيا كل جزء يرقص من الفرحه..
🗝خشت دعاء عليهم..
خواته الأربعه ابتسموا لما شافوها..
وعطاء اعجبت بيها هلبه..
مشت هي سلمت ع النساوين الكبار..بعدين سلمت خواته..
ومشت قعمزت حدا حناها..
حواء:وهادي دعاء مكانها بروحها وغلاها بروحه..
ابتسمت دعاء مجامله..
نجلاء:ربي يحفظها..شن جوك يادعاء..
دعاء:تمام الحمد لله..
رجاء:ارتحت بعد كملتي..
دعاء:ايه معاش عندي شي نخمم فيه..
نجلاء بضحكه:لا وين هدا وين بيبدا التخميم..من بعد اذنكم طبعا خوي يبي العرس في نص تلاته..
كلهم تفاجئوا..
عطاء:وخيي قاعد بروحه في الحوش..وماكلته وشرابه كل يوم عند وحده فينا...مش مستقر بكل..وحني مادا بينا في رمضان نكونوا متريحين عليه اللي عنده مراة تهني عليه..
نجلاء:اكيد متفهمين الوضع يعني مرات يتحشم ومايجيش ويقعد ياكل من برا..ومايحبش يقعد في الحوش بروحه شن بيدير فيه بروحه من غير ونس..وزي ماقالت عطاء نبوا مرته تحضر معاه رمضان..
دعاء..
من داخلي كنت تقول حتى اني نبي والله..مش مهم نمشي معاها ففراشيه عادي...ههههههه..
جميله:والله فاجئتونا الحق..يعني مازال شهر وممكن اقل..
آلاء:والله اني زيها بالزبط في شهر وتيت روحي ودرت عرسي بعده..ضغط صح..بس الحمد لله مشت الامور..
مرت عمه:الصاله نبوها مشتركه بين العيلتين..
شرقيه:مشتركه!؟
نجلاء:ايه صالة فندق*****..
جميله وجهها تغير..
نجلاء:مادوروا شي والله جمال هو اللي قال يبي هكي قال نبي دعاء تعيش احلا فرحة عمر واني مستعد لكل شي..
رجاء:حني بنولوا عيله وحده ياخالتي جميله ماتفكروا في شي ولانبوكم تتحسسوا من شي..
شرقيه:مع هدا حني مش حنقصوا ع بنيتنا شي وبعون الله نديروهولها عرس كامل...
نجلاء:اكيد..وحني تحت امركم في اللي تبوه..المهم العرس يكون في الموعد اللي قلنا عليه..
جميله:الراي الاول والاخير لبوها..
رجاء؛وهما اكيد توا يتفاهموا ع الموضوع هدا..
.........
محمد:ماعنديش مشكله ونص حق الصاله من توا نعطيهولك..لحظه بس..
وناض مشي طلع من حداهم..
جمال شبح لعمامها وقال:اني من اللحظه معتبر نفسي ولدكم ولما نقول اني مستعد لأي شي تبوه هدا لأني اعتبرت روحي وليت من العيله خلاص..
المهدي:والله ياجمال ياولدي ماعندي شك في نيتك ويعلم الله ان فرحت من قلبي لما عرفت انك انت اللي جاي تخطب بنت خوي مش حنلقوا خير منك..
جمال ابتسم وقال:بارك الله فيك..
عم جمال:وهو عرف من يناسب نعم الناس..
كلهم بأصوات متقطعه:بارك الله فيك..
ع خشة محمد بظرف متوسط الحجم فيه مبلغ قعمز ومده لجمال..
جمال بإبتسامه؛عطيه لمؤيد ولاانت نتعبك تجي للفندق وبنفسك تسلم الفلوس بش يطمن قلبك..
محمد:تمام بإذن الله..
جمال:اهم شي توا اتفقنا خلاص ع موعد العرس..
محمد ابتسم وقال:ع بركة الله..
فهاللحظه قام عم جمال كيسه سودا ومدها لمحمد وقال:وهدا المقدم ..
محمد شبح للكيسه شويه بعدين خداها وقال:ربي يتمم ع خير..
كلهم بأصوات متقطعه:ان شاء الله..
والياس وعبدالله ومحي يشوفوا لجمال..
وتحركت الغيره في قلوبهم شويه حسوه حياخد الجمل بما حمل ويولي الكل في الكل..
⚘باك تحسابوا الغيرة محصورة ع السلفات بس..حتى غيرة العدايل عندها ماتحكي⚘
⚘⚘⚘⚘⚘
دعاء..
تعرفوا قداش عطونا والله ماقدرت نصدق وقتها..سبحانك ياربي لما يعوض عوضه يليق بيه هو..عطونا 20 الف..صدقوا اولا تصدقوا..
صدمني وصدم عيلتي المبلغ بجد..لكن مااستغربناش هلبه لان ربي عاطيهم وواضح عليهم ناس كريمه..
لكن مع هذا ماصرفتش منهم الا حق الكسوة بس درت كسوة كامله ومن احسن شي..
اما بتاتي فكان اغلبه هدايا من خواتي واني بابا عطاني فلوس وخديت حاجات..
وباقي امور العرس كل حد في العيله خدي حاجه..تقول اول عرس نديروه في اول عرس ماداروش هكي اصلا..
ماتستغربوش..هذا الكريم العظيم يعطي فوق مانبوا نتمنوا يعطي هلبه عطاء مذهل مدهش لايصدق..
ع قد ماريت من وجع وكسر في السنين اللي فاتوا..
ربي سبحانه مسح عليه بيد عطفه وكرمه ورحمته وده..خلاه كأنه لم يكن..والله كأنه لما يكن..
خطر عليا وقتها سيدنا سليمان ربي ابتلاه بموت صغاره وزوجاته مايقعدولاش صغار..قداش انقهر والحزن تملكه وقتها..هدا وهو نبي ولد نبي..بس لانه صبر وسلم الامر كله لله عوضه ربي عوض فوق الوصف..ولى ملك ع الانس والجن والشياطين الريح مسخره ليه...علمه حتى لغة الحيوانات..
وكل مايزيده نعمه تعرفوا شن يقول..
ربي يمتحن فيا ويشوفني أاشكر ام اكفر..
واني هني اذكرت الآيه اللي ليها هالمعنى وقعد في كل صلاة مع كل سجده نشكر في الله..وخليت نعمه هادي تزيد تقربني منه اكثر واكثر...
⚘⚘⚘⚘⚘
وجي اسبوع العرس..
الخيمه منصوبه من يوم السبت..
السهريات باديه من السبت والفرح كان فرح بمعنى الكلمه..
⚘في الخيمه..
العيله ملتمه ودايرين شوط ورويدا تغني..
رويدا..
ترجم ترجم ترجم ..ترجم ترجم ترجم..
ترجم ترجم ترجم..ماناخد غير المترجم..
والبنات يصيحوا...هيييي..
هندس هندس هندس...هندس هندس هندس..
هندس هندس هندس هندس..ماناخد غير المهندس..
هييييي..
ووفاق ادربك وتضحك..
كيخ كيخ كيخ..
وقفوا دربوكه وقعدوا يضحكوا..
رويدا:تي غير هيا..
كيخ كيخ كيخ ..كيخ كيخ كيخ.
كيخ كيخ كيخ..ماناخد غير الشيخ..
حدفتها مروة بكندرة ماريه..
خوتها وهي ميته بالضحك..
وكلهم يضحكوا..
بعدين قالت رويدا:هيا دربكوا..
رجعوا يدربكوا..
رويدا..
تور تور تور..تور تور تور..
تور تور تور ماناخد غير الدكتور..
دعاء؛تور اللي ينطحك ياعاهه..
ورويدا تضحك وكلهم يضحكوا معاها.
جميله:معاش تخلوها تغني..
ريمه:والله مافيكم جو كنتنا ياغاليه ماتعبرهين ياحنه تعالي حداي نغنوا برواحنا..
ناضت رويدا ومشت لحماتها وهي تغني:ياربي نجيلي حماتي..ورد مفتح في جناناتي.
ريمه:لاياحنه ماصارش ولي من وين ماجيتي..
والخيمه كلها تضحك..
وبعدين دارو شوط تاني اقوى من اللي قبله..
وشارعهم كله مسموع فيه اصواتهم وهما يغنوا..
"هوها ياهوها..العيله هدا جوها"..
ع جية مؤيد..
مؤيد:امي..
جميله؛خش تعالى مافي حد غريب ..
مؤيد:تي غير تعالي يام..
طلعتله رويدا تغني:خويا خويا ياخويا..
وبدوا داخل يدربكوا ويغنوا في الاغنيه..
ورويدا ترقص فيه وهو يضحك.
وخطيبته في الخيمه داخل تضحك وقلبه يدق بقوة.
دعاء..
تلاته ليالي وهادوا سهرياتنا حتى مع الجيران..
الله قداش كنت فرحانه..فرحانه ع الآخر..وكل مانحس بروحي غارقه بفرحتي..
ننسحب طول نتوضا ونصلي شكر لله...
⚘⚘⚘⚘⚘⚘
يوم الفاتحه والكسوة..
لبست دعاء البودري...وكانت طالع فيه حلوة بالمرة..
واكثر شي فرحها يومها جية صاحباتها..
سكينه واكرام وريم..ايات ماقدرتش تجي بسبب المنظومه بينما جتها اليوم اللي قبله..
مقعمزات في الصاله يهدرزوا..
دعاء:بوه وامه متوفيين..
سكينه؛ياناري..
دعاء:حتى وجعني قلبي لما عرفت بالذات لما قالولي ام امهم توفت من تلاته سنين اواكثر تقريبا..لما تكلموا حسيتهم بيبكوا..
اكرام:الله يرحمها..
ريم:هو الولد الوحيد؟
دعاء:ايه واكبرهم..خواتي حسسوني انه بوهم مش بس خوهم..والحاجه هادي زادت كبراته في عيني..
سكينه غمزت وقالت؛والقلب شن اخباره..
دعاء بضحكه:قلبي بيطلع من مكانه توا في الجامع هما..
اكرام؛كلنا جربنا هالشعور وكأنك تراجي في النتيجه..
سكينه:والله حق..
ضحكوا البنات..
فجأة..
سمعوا صوت زغاريط..
دعاء حطت ايديها ع صدرها..
خشوا عليها امها وخواتها ونساوين العيله يزغردوا..
ناضت دعاء ودموعها طاحوا غصب عنها..
جتها امها وضمتها وهي تقول:ان شاء الله بهناك ياماما ..
دعاء:اللهم آمين..
باست دعاء ع راس امها..وباست ايديها...
بعدين هنوها عماتها بالوحده وبعدين خالاتها..
وبعدهم خواتها اللي دموعهم مابطلتش نزول ولادموعها هيا..
بعدين هنوها نساوين عمامها وخوالها وبنات العيله وصحابتها..
وبدي بعدها شوط الدربوكه..
وسكينه ولعت الجو..وقلبتها قلب..
بعدين وقفوا الشوط.
ومشت رويدا للمنظومه فتحتها..
وجت لاختها نوضتها..
وكانت الاغنيه..
"محلاها الدنيا لما تبي تجمع بينهم"..
قعدوا يغنوا معاها..
ورويدا ترقص في اختها..ودعاء ترقص وهي تضحك..
دعاء..
تذكروا امتى جت سيرة الاغنيه هادي قبل..ايه في عرس ازدهار وقتلكم وقتها كأنها تحكي عليهم..ماكنتش حاطه في بالي ولاحتى تخايلت ان حيجيني يوم والاغنيه هادي حتحكي عليا اني وصاحب النصيب💕