"إلا أن يشاء الله"

الجزء الثالث

✒..
خدوا البنات فطور ومشوا مع بعض للملعب وطول الطريق كانوا اماني وسكينه ينكتوا ويتسوهكوا والبنات يضحكوا حتى امال اللي تحاول تنسى مصيبتها انسجمت معاهم وقعدت تضحك..
دعاء..
بهجة قروبنا هداكا الوقت سكينه واماني سكينه دمها خفيف وبصايريه هلبه واماني تعلق وتتسهوك هلبه وتعليقاتها ديما مضحكه...كنت ننسى معاهم فهمي بجديات...
🗝وصلوا للملعب وقعمزوا ع المدرجات تلاته فوق وتلاته تحتهم وبدوا يفطروا ويهدرزوا..
دعاء..
لحسن حظي يومها ان قعدلي فلوس من باقي حق شيت خديته قبل ولأول مرة نشري من غير ماننحرج قدام البنات وهما اللي يشرولي زي العاده..
لكن من سوء حظي في نفس الوقت ان رشاد وخطيبته مالقوش وين يفطروا حتى هما كان في نفس المكان اللي حني فيه...
🗝لما خش رشاد عيونه من ورا النظارات تلقائي جو على دعاء وهي تاكل وتهدرز..
لاإراديا ارتسمت على وجهه ابتسامه خفيفه..
فدوى وهي تشبح للمدرجات:وين نقعمزوا؟
رشاد قعد يشوف للمكان ويختار انسب موقع تكون مقابلاته فيه دعاء..ولقاه وقال:تعالي نمشوا غادي..
ومشوا هو وخطيبته وخطموا من قدام البنات..
دعاء قريب حصلت اللقمه في فرقبتها
وسكينه طول شبحتلها..
اماني وهي تشوفله:مايحساب فروحه..
ريم بضحكه:صار موقف بينه وبين أنوار تعرفيها صاحبة ايه وسجى
دعاء مركزة..
ايات:اه هديكا عرفتها تحسيها مسترجله شويه..
ريم:حتى هي بنت وحده بين 6اولاد..
سكينه:ماشاء الله..باهي شن هو الموقف؟
ريم:هي نازله تجري من الدروج وهو راكب يجري ويخبطها خبطه ع كتفها لين طاحت مقعمزة وقشيشها كله طاح..هي عيطت وقالتله..العزي والبلي فيك..
هو ضحك ونزل قاملها حاجاتها وجاها وتأسف...
وهي ناضت خدتهم منها بقوة وقالتله "وتضحك فوقها متفهك"..
ومشت تجري وهو ركب يضحك عليها..
اماني:باهي اللي محصلش بوني..
سكينه:برغم انها جميله لكن ظالمه روحها بشخصيتها ولبسها..
ريم:صاحباتها يحاولوا يغيروا فيها شويه ..
امال:ايه حتى اني ملاحظه بدت تتغير شويه فلبسها وتصرفاتها..
دعاء..
هما وقتها يهدرزوا على أنوار واني سرحانه فيه هو وخطيبته جوهم مع بعض يبان حلو يخي قعدت توكل فيه وهو يضحك عادي..غيرت عيوني عنهم واني نقول لنفسي معقوله يادعاء تعلقي قلبك بوهم وسراب..تعلقي قلبك بواحد خاطب وبينه وبين خطيبته قصة حب!..
قعدت نخلي في عقلي هو اللي يحكم فيا..صح جاذبني هلبه وعاجبني لكن شن فايده هالمشاعر مادام مافيش من وراها نتيجه..ماغير نستهلك فيها ع الفاضي وخلاص..
هدا علاش قررت وقتها نتجاهل مشاعري...
🗝كملوا فطورهم وناضوا لأن موعد المحاضرة قرب..
لما طلعوا رشاد قعد تقول مقعمز ع مسامير يبي ينوض بأي طريقه..
رشاد:هي خلاص فدوة اني بنوض عندي محاضره..
فدوى:محاضره! مش عندك الساعه 11!!
رشاد:لالا توا والساعه 11 هي نوضي نوصلك للواجهه..
اضايقت فدوى هلبه ودمعتها فعيونها..
ناضت وخدت الكيسه اللي فيها بقايا الفطور ومشت هي وياه لوحت الكيسه في مكانها المخصص..
بعدين هو وصلها للواجهه ركبت سيارتها ومشت..
وهو طول ولى بسرعه داخل...
⚘⚘⚘⚘⚘
يشرب فالقهوة هو وامه ويهدرزوا..
جمال:امي هادي خدمته الراجل ماعنده مايدير..
صابرين بحزن:واختك مسكينه لامتى بتقعد متحمله هالوضع..
رشف من القهوه وقال:امم..من الأول عارفه طبيعه خدمته وواقفت عليه تتحمل وتسكت هي مش اول ولااخر وحده متزوجه ضابط شرطه..
صابرين تنهدت وقعدت ساكته..
جمال خدي يد امه وباسها وقال:ماما حبي معاش تعبي روحك وتخممي فينا خلاص كبرنا ونقدروا نتحملوا مسؤولية انفسنا..
صابرين ضحكت نص ضحكه وقالت:والله ياولدي لو تولوا بأحفادكم واني ربي عطاني عمر لهداكا الوقت بنقعد نخمم فيكم..
ابتسم ورجع باس يدها مرة تانيه وحط خده عليها..
وهي تمسحله شعره وتقول:سلم وليدها ياربي نجي وليدها علي وليدها وزهي ايامه..وابعد عنه كل شر ياربي..
وجمال مغمض عيونه ومبتسم..
فجأة رن تليفونه..
صابرين:شوف مني..
جمال:فوتيهم اكيده الخدمه..
صابرين ضحكت..
فصل وعاود مرة تانيه..
صابرين:رد حبيبي اكيده تليفون مهم..
ناض قعمز كويس وهو يتأفف طلع التليفون من دجاكته شاف المتصل وجهه ولى احمر وابتسم..
امه ابتسمت...
فتح الخط ورد..
جمال يإبتسامه:ياآلو..
منال:وينك انت من بكري نتصل..
جمال:من بكري شني توا بس يانصابه ..
ضحكت وقالت:باهي خيرك ماتردش؟
جمال:مقعمز حدا امي نهدرز عليها..
منال:شن حالها..
جمال شبح لأمه وقال:خودي امي منال تبي تكلمك..
ومدلها التليفون..
خداته صابرين وقالت:السلام عليكم..
منال وهي محرجه:وعليكم السلام عمتي شن حالك وحال صحتك؟
صابرين:الحمد لله..انتي شن حالك وحال اهلك..
منال:الحمد لله..شن حال البنات..
صابرين:كويسات الحمد لله فخيار خيرهم..
منال:امم باهي الحمد لله..
صابرين:ايه الحمد لله..
سكتت منال شويه..
وصابرين شبحت لجمال وقالت:اهو معاك جمال..
ومدتله التليفون خداه وناض ومشي للباب..
وامه تشبحله بضيق..
جمال:ايوه..
منال بعصبيه:كم مرة قتلك الحركه هادي معاش اديرهالي..
فتح الباب وطلع وصكره وراه .
جمال عقد حواجبه ورد يقول:واني كم مرة قتلك امي يامنال عندي بالدنيا تبي تحافظي عليا خليك باهيه مع امي..اتصلي بيها انشدي عنها تعالي زوريها عودي نفسك ع العيشه معاها من توا..كم مرة قلته الكلام هدا قولي..
منال:الناس انشغالات يا جمال واني نقرا وتعرف كويس قراية الطب شن شكلها..
جمال بعصبيه:ت تكلمي فيا فاليوم قريب 30مرة..وتطلعي مع صاحباتك وبنات عمتك وخالتك ومش عارف مني فالاسبوع قريب 4مرات..مستخسره في أمي مكالمه..
تأففت بغضب وسكتت..
جمال:وتنفخي فوقها معناها مش عاجبك كلامي!
منال وهي تحاول تتمالك نفسها:بهدوء ياجمال مش هكي..
جمال:لا هكي ونص..اسمعي يابنت الناس لو ماتبيش امي قولي من توا رانا قاعدين ع البر خل كل حد يمشي ع حاله ايوه..
وصكر فوجهها ومشي طول للباب الخارجي فتحه وطلع وصكر الباب بقوة..
اما هي بعد صكر عليها قريب ماتت عاودت عليه مرة اتنين تلاته ماباش يرد وفالأخير دارلها تحويل..
انهارت بالبكي وصارت فيها حاله..اول مرة يصير بينها وبين جمال نقاش حاد لهالدرجه..
جمال كان حاس ان منال مش متقبله فكره يعيشوا مع امه بعد الزواج وفعلا منال تبي تستقل في حوش بروحها..
وهادي حاجه مستحيله عند جمال امه مالهاش غيره معقوله يتزوج ويخليها بروحها!..
يفضل يقعد عمره كله عزابي ولايخلي امه بروحها..
⚘⚘⚘⚘⚘
كملوا البنات محاضرتهم الساعه 11 وطلعوا..
ريم بإستعجال:سيف جاني سلام بنات توا..
ومشت تجري لموعدها..
البنات ابتسموا..
دعاء:الا اكرام لتوا ماروحتش من تونس!
اماني بضحكه:اسكتي اكرام جاها عريس غادي..
دعاء:تونسي!!
ضحكوا البنات..
اماني:ياعبيطه ليبي جاي يعاين امه قالت شافها في العياده غادي وعجباته وكلم اهلها عليها اخر الاسبوع هدا الفضانيه..
دعاء:وين في تونس!..
ضربتها سكينه ع ظهرها وهي تضحك...
دعاء وهي تتوجع:ايي..
ايات:ياهبله غدوة بيروحوا من تونس هما..
دعاء:قولوا هكي من الأول..سبحان الله النصيب..شوفوا ع قد ماتعرفت ودارت علاقات نصيبها وين وكيف جاها!
سكينه:صدقتي..
اماني:راهو ياما بنات دارو علاقات تمت بالزواج..
دعاء:مش هلبه ياأماني..صدقيني العلاقات ماتجيب خير..
اماني سكتت مش عاجبها الكلام..
ايات:صبايا بنمشي لمنذر طلع من محاضرته..
ومشت طول تجري..
دعاء...
وخرفي يادعاء..ع قد ماحاولت ننصحهم بطرق غير مباشرة كانوا يايهزوا عليا يايطنشوا فكلامي..تو يعني زي اكرام اللي من اول ماخشينا الكليه وهي متعرفه قريب ع سبعه اولاد وكل واحد تقول هدا هو الراجل اللي بنكمل معاه وفالاخير يطلع مشروع فاشل لما جاها نصيبها بينها وبين نفسها مش حتندم ع اللي داراته قبل وتقول ياريتني قعدت هكي لين ربي بعتلي نصيبي..باهي تتخيل يوم من الايام اطيح فيهم فأي مكان سوق منتزه او غيره وهي مع راجلها مش بيشبحوا لراجلها بنظرة هزوة ويقولوا كلام فقلوبهم عنه وعنها خيي..
علاش نحط روحي فهالموقف من الأول..اللي يبيني يجي لأهلي طول..مالي ومال اللبز ماغير ذنوب وقلة بركه وخلاص..الحمد لله اداركت نفسي من الأول...وربي يهدي ويستر على كل بنيه...
🗝 ومشي باقي النهار فالكليه عادي..ودعاء فعلا حاولت ع قد ماتقدر تتجاهل رشاد ونجحت فالتجاهل بس قلبها من داخل واجعها...
⚘⚘⚘⚘
الساعه 4:00عصرا..
وشن قصته هدا التاني!..
جميله:متخرج من الهندسه الكهربائيه وعنده محل احذيه مشهور خالك قال راجل خلوق وكويس شهدله خالك عاد..
تنهدت دعاء وسرحت بتفكيرها..
جميله:هاه شن قلتي خالك يبي الرد الليله..
شبحت دعاء لأمها وقالت:قوليله باهي..بس هاه اهم حاجه شرقيه ماتعرفش وصي بابا...
جميله:ماتخافيش وصيته..
هزت دعاء راسها وهي ساكته..
.......
كان من جهة خالي حسين واقفي من غير ماتفكري..
دعاء بضيق:مش عارفه مش متحمسه للموضوع..
مروة:علاش!
رويدا بتهكم:ماهو العبيطه عاجبها هداكا المعيد اللي يشبحلها من بعيد لبعيد..
رفعت دعاء حاجبها وشبحتلها من فوق لتحت..
مروة:حقه دعاء؟
دعاء تنهدت وقالت:مش بالزبط..بس يعني هكي نتمنى يجيني واحد زيه..قنين شخصيته حلوة عنده مميزات مش غير اهو راجل والسلام..
مروة:مش كل شي الشكل يادعاء..
دعاء:لكن حتى هو لازم منه..تاخدي راجل يفتحلك نفسك ع الدنيا وين تتصبحي فوجهه..
رويدا:ههههههه..
دعاء بضحكه:ضمي فمك انتي..
مروة:الحق اني مهم عندي اخلاقه وبس..
دعاء:انتي زي الغزاله مرمر احلا وحده فينا.انتي بالذات لازم تاخدي راجل قنين..
رويدا:خليها تطلع من الاعدادي قبل بعدين تفكر فهالمواضيع.
دعاء:عندك حق اول مرة تقولي كلام ناس عاقله..
ضحكت مروة..
رويدا:خليتهولك انتي العقل يامعقده..
دعاء ناضت وطلعت من حداهم..
ومروة شبحت لرويدا وهي تحرك فراسها يمين ويسار ورويدا طنشتها...
🌻🌻🌻
ومر باقي اليوم..
ودعاء تقرا شوي وتفكر فالموضوع اللي جابه خالها شويه ومش عارفه شن ادير..اكثر شي مخلي دعاء تفكر فالزواج هو وضعهم المادي...
الوضع المادي اللي كان فوق الريح لجمال بس مع هدا مش عايش مرتاح البال..
عقله يفكر في مية حاجه..وفوقها العركه اللي صارت بينه وبين خطيبته..مشكلته يحبها هلبه ومايتحملش بعدها بس في اولويات..
ومنال اللي تموت فيه فات عليها باقي اليوم وهي حابسه روحها فالدار وتبكي ولاتبي تاكل ولاتشرب لين اضطرت امها تتصل بسلفتها اللي هي نجلاء اخت جمال وتقوللها تجيها..
في دار منال..
منال ببكي وعيونها متورمات وحمر:هو ديما متسرع..ديما هكي يانجلا يحكم عليا غلط ومايعطيش فيا فرصه نشرحله..
نجلاء بضيق:برغم اني مش عارفه سبب المشكله وانتي واضح انك ماتبيش تقولي بس تو نكلمه حاضر..
ناضت نجلاء من ع السرير وضربت على رقم خوها..
نادى مرة وفتح..
نجلاء:جيمو شن جو؟
منال قعدت تشوفلها بترقب..
جمال:من الاخير نجلا اطلعي من الموضوع وماتدخليش بكل بيني وبينها ولانبي حد يدخل بيني وبينها اني نعرف نتصرف بروحي..
نجلاء:لكن حرام عليك ياجمال البنت صايره فيها حاله تبكي بس ولاتبي تاكل ولاتشرب..
جمال قلبه وجعه عليها لكن عفس عليه وقال:مادخلكش انتي مادخلكش..وسامحيني بنصكر..وصكر فوجهها..
غمضت نجلاء عيونها وفتحتهم ونزلت التليفون وقالت:شكلها الحكايه كبيره يامنال اللي واخد منك موقف قوي هكي..
منال رجعت تبكي من جديد..
ونجلاء تشبحلها وهي عاقده حواجبها وتفكر فسبب المشكله بيناتهم...
🌻وعدت هالليله كيف ماعدت..
وجي اليوم اللي بعده...
الساعه 7:45 صباحا..
في احدي محلات مواد الزينه المقابله مدرسة رويدا..
كانوا موجودات صاحبات رويدا...آمنه ومعاها وحده تانيه..
عيونهم كانت ع تليفون صاحب المحل ولأن المحل زحمته لاتوصف حتى عالصبح..
هما استغلوا انشغال صاحب المحل ومشت امنه لوين مافي التليفون خداته...وبسرعه طلعت هي وصاحبتها...
امنه:هيا اجري..
:مقواك يافرخه..
وامنه تضحك..
قبل يخشوا للمدرسه داساته امنه كويس..
وخشوا داخل...
تلاقوا هما ورويدا..سلموا على بعض..
وطول دارولهم الطابور...وبعد تموا ركبوهم للفصول..
........
في الفصل..
امنه:هدا تليفون واحد نعرفه قتله دبرلي واحد عطاني هدا مؤقت..فيه شفرة متاعه اسمعي ردي بالك تردي علي اي مكالمه باهي اتصلي بس بالمنجوه متاعك لين يدبرلي الولد فواحد جديد باهي..
رويدا وهي مبتسمه وشاده التليفون:باهي..
امنه:خليه مقفل لين تروحي تمام!
رويدا هزت راسها وقالت:سلمها صاحبتي..
ضحكت آمنه وقالت:باش تعرفي بس..
ضحكت رويدا..ع خشة الأبله..
طول دست التليفون فشنطتها...
⚘⚘⚘⚘⚘
الساعه الواحده ظهرا...
روحت دعاء مع بوها وخوها مؤيد للحوش..
لما خشت لقت رويدا فالدار تبدل فحوايجها..
دعاء وهي تصكر فالباب:مروة ماروحتش
رويدا وهي تساوي في فانيلية التوته:من بكري مروحه وحتى رقدت..
ومشت للباب فتحاته وطلعت وصكراته وراها..
فالكوجينه..
جميله:وقالوا غدوة بيجوا..
محمد:هي شن رايها؟.
جميله:قالت نشوفهم قبل..لكن هاه يامحمد رد بالك اختك شرقيه تندري على شي..
محمد هز راسه وقال:باهي باهي..
ومشي طلع من الكوجينه..
ع خشة دعاء:شن غدانا اليوم..
جميله:مكرونه مسقيه..
دعاء:يمييي..
جميله قربتلها وقالت:راهو كلمني خالك وقالي الناس بيجوا غدوة..
دعاء بصدمه:غدوة !!؟
جميله:ايه من توا وتي روحك..
ولفت ع الطنجره تغير في مكانها..
ودعاء خدت كسرة خبزة من اللي جايبها بوها كلتها وهي تفكر...
🌻🌻🌻
تغدوا..
وبعد الغدي كلهم قيلوا..
البنات مع امهم فدار...ورويدا بروحها في دار البنات..
تأكدت من انه الحوش كله راقد وبوها يشخر تشخير..
وطلعت التليفون فتحاته وحطاته ع الصامت..
فجأة رن..
خلاته يرن لين يفصل..
وبعدها طول ضربت ع رقم ابراهيم..
وحطاته ع وذنها وهي تراجي...
عند ابراهيم..
كان مقعمز هو صحابه فواحد من الكافيهات..
ابراهيم:تو نتكملكم جو الإستراحه وانتم جيبوهم وتعالوا لكن اسمعوا بتحسبوني..
واحد منهم ضحك وقال:عيب يامان قسمة خوت..
ضحكوا
رن تليفون ابراهيم قامه من ع الطاوله وفتح الخط ورد:ايوه..
"رهيما"..
هو فنص وناض مرة وحده وطلع من حداهم..
برا الكافي..
ابراهيم:رويدا!
رويدا:ايه حبيبي استاحشتك موت..
ابراهيم:من وين جبتي التليفون ؟.
رويدا:صاحبتي دبرتلي فيه..المهم توا خلي نهدرز عليك والله استاحشتك هلبه..
ابراهيم:باهي قلبي اني مع الولاد توا لما نروح نكلمك..
رويدا:لا اني نتصل انت امتى تفضى ابعتلي رساله..
ابراهيم هز راسه وقال:باهي باهي..تشاو توا...
وصكر..مط شواربه لداخل بضيق..وكيف جي بيلف ويولي لداخل انخبط في حد..
ابراهيم:اووو نصري..
نصري"ولد عمتهم":برهوم شجو..
ابراهيم:تمام..
نصري:شبحتك من لما طلعت جيت بنسلم عليك لقيتك تتكلم بالهاتف..
ابراهيم بضيق:علقت فهاالحصله بنت خالك بيني وبينك من تهديدات اختها اخر مرة كل بنفوتها لكن مش عارف كيف واجعتني الحق..
نصري:اجبد عليها وخلاص..
ابراهيم يشبحله وهو يفكر...
نصري:معاش ترد عليها لما تكلمك فوتها تو لما تشوفك هكي هي بروحها تأيس وتنهي الموضوع..
ابراهيم رفع حاجبه وقال:هكي تقول!؟
نصري:ومافيش غير هكي..
هز ابراهيم راسه بعدين قال:تمام..هي تعال خش..
نصري:لالا والله مستجعل عندي ماندير..
ابراهيم ابتسم ومد يده وقال:مالا نتلاقوا يوم تاني..
نصري:مش جاي لحوش جدي فالميلود..
ابراهيم:تي مش قتلي فوتها!
ضحك نصري وقال:تمام تمام..هي اوينا..
طلقوا ايدين بعض وابراهيم قال:تشاو..وخش للكافيه..
ونصري وهو ماشي تلاشت ابتسامه وتبدلت بملامح الغضب وهو يقول:واطي ولد كلب..
⚘⚘⚘⚘⚘
الساعه 5:30 عصرا..
في احدى اشهر محلات الذهب..
كان مقعمز جمال ورا المكتب يراجع فالحسابات..
والعامل عنده مهتم بالزباين..
شويه ووقفت ع المكتب وحده وقالت:مساء الخير..
قام عيونه وقعد يشبحلها
هي ابتسمت ابتسامه حب ماقدرتش تخفي ملامح ذبول وجهها قالتله:اسفه..
هو ماتحملش اكثر من هكي...تنهد ونزل عيونه لوطا..بعدين ناض خدي دجاكته..
وقال لعامل تاني:دس مذكرة الحسابات ورد بالك من الفواتير..
العامل:حاضر..
وجمال طلع وجي لمنال وقال:تفضلي..
مشت وهو لبس نظاراته ومشي وراها..
طلعوا برا هي ركبت سيارتها وهو ركب سيارته..
تحرك وهي مشت وراه..
⚘وصلوا للكافي اللي يحبوا يتلاقوا فيه..
قعمزوا مع بعض وماطلبوا شي...
جمال:نعم..
منال:ماتكونش قاسي هكي جمال حرام عليك..باهي اني غالطه واسفه هلبه هلبه ونوعدك من اليوم ياجمال نعشش لعمتي صابرين اتصالات زيارات لين نفددها مني..
جمال:امي ماتفدش منك امي تعزك لأن ولدها..وأشر ع نفسه..يحبك..واشر عليها هي..واني اللي نحبه امي تحبه..
منال نزلت عيونها وهي مضايقه..
جمال بهدوء:منال اني نحبك من كل قلبي وبصدق وانتي تعرفي الحاجه هادي كويس يشهد عليا ربي عمري مادورت ولا حبيت غيرك من اول ماريتك قلت لروحي هي هادي ياجمال اللي حتكمل معاها عمرك وطول جيتك من الباب...ومن اول مرة تكلمنا فيها اول حاجه تكلمت عنها امي اول واخر شرط يامنال وقتلك يساعدك الوضع كان بيها مايساعدكش كل حد يمشي ع حاله..
مسحت منال دمعتها وقالت:عندك حق..شبحتله..واني اسفه حبيبي اسفه هلبه والله معاد ندير حاجه توجعك والله..
ابتسم بحب وعطاها كلينكس وقال:امسحيهم مانتحملهمش..
خدت الكلينكس وهي مبتسمه وقعدت تمسح فيهم وهو يتأمل فيها بإبتسامه بعدين غمزلها بعينه..
ضحكت..
جمال:مش معقوله انتي تهبلي حتى وانتي تبكي!
ضحكت بخجل وقالت:جمااال.
ضحك جمال...
⚘وكمل ترضايته ليها وطلعها خدالها ساعه وشنطه..ورفعها عشاها في مكان قنين وروح بيها للحوش..
خش معاها هدرز على اهلها شويه بعدين روح..
⚘⚘⚘⚘⚘
وفي من كملت الليل وهي تراجي فيه يتصل وهي تتصل وهو مايردش وقلبها يغلي عليه تحساب صارت فيه حاجه..
وفي نفس الوقت كانت تجيها رسائل ماتفحتش فيهم تفوت فيهم وفالنهاية لما آيست صكرت التليفون ورقدت..
⚘⚘⚘⚘⚘
وجي اليوم اللي بعده..
موعد جية الخطاب لحوش محمد...
درسوا سيارتين قدام الحوش..
فالوقت اللي كانوا فيه البنات يتفرجوا من فتحة باب  الكوجينه الخارجي
ويخشوا النساوين اللي فتحلهم مؤيد..
وحده..
والتانيه خاشه فيدها صفرة حلويات كبيره..
واللي بعدها حتى هي شاده بوكس كبير متاع شكلاطه..
واللي وراها صفرة بكلاوة...واللي بعدها صندوق عصير الريحان..
وخشوا بعدهم تلاته فاضيات..
دعاء بصدمه:هدا شنو..
رويدا بضحكه:نساوين العيله ونساوين شارعهم مش مزعل حد..
ضحكوا وفاق ومروة..
وخروا عن الباب وخشوا الكوجينه وقالت مروة؛باين عليهم كريمين مش زي هديكا القفاصه..
رويدا:صح..
دعاء بعدم ارتياح:لكن تحسيهم شلافطيه..
رويدا:عاديين..
مروة:ايه حتى اني حسيتهم عاديين..
رويدا:خل نطلع نسلم..
ومشت تجري وطلعت..
ومروة ووفاق قعدوا يشيكوا ع حاجات الضيافه..
ودعاء سرحانه بتفكيرها..
شويه وخشت رويدا بالحاجات حاجه ورا حاجه..
صكرت الكوجينه وقالت:تحسيهم ناس كويسه..
دعاء بقلق:زعما!..
رويدا:هكي حسيت..
تنهدت دعاء وقالت:ان شاء الله..
في الحوش اللي في جنبهم..
شرقيه في دار المعيشه مع امها..
شرقيه:تي والله الا موضوع خطوبه يما وداسينه حتى ولدك ماقالش..
امها:وليش بيدرقوه خايفين نحسدوهم!
شرقيه وهي تسحن؛دباير هديكا اللفعه مرته..
امها:ايه والله هالجميله الشيطانه من نهار جابها واني مانبيها..
شرقيه بغيظ:باهي..باهي ياجميله الشلافطيه..
دعاء..
كلنا عارفين ان شرقيه ديما تراقب في تحركاتنا لكن راح من بالنا وقتها الشي هدا..
المهم..وقتها طلعت للناس وهما عاد قعدوا يفصفصوا فيا زي العاده وحسيتهم يشبحوا لبعضهم في شبحات مافهمتهاش وقتها..قلت فخاطري شكلي ماعجبتهم..
اني ماطولتش طلعت واني ابداااا ماتريحتش..
بعد روحوا...جتني ماما وقالت..
جميله:ها شن رايك.
دعاء بضيق:مش عارفه ماعجبونيش هلبه..
جميله:بالعكس كويسين هلبه واخر السبوع بيجي ولدهم يدير المقابله وتي روحك..
دعاء..
ع النظرة الشرعيه وقتها لو قلت ماعجبنيش مايقدر حد يجبرني على شي..لأني حسيت ان ماما تبيني ننخطب وخلاص..
⚘⚘⚘⚘
وعدوا يومين..
وجي يوم المقابله...
كان موجود عم دعاء علاء بش يقعمز معاهم..
هالمرة جي الشاب ومعاه وحده من خواته..
وماجابوا معاهم شي..
لحظة اللي خشوا البنات كانوا فالباب يراقبوا..
شافوا اخته خشت بعدها هو..انصدموا..
وخروا ع الباب وقالت؛رويدا غباره!
مروة:تي هي اهم حاجه عندها الشكل..
وفاق:استغفر الله ياربي..
خشت دعاء للكوجينه وقالت:هاه جو..
التلاته هزوا روسهم بإيجاب وهما مصدومات..
دعاء:خيركم وجوهكم هكي!
رويدا؛لاشي غير ماجابوا معاهم شي..
دعاء بضحكه:ساد اللي خشوا بيه المرة اللي فاتت..
ع خشة جميله ووجهها فلون تاني:هي بسرعه تعالي قالوا مستعجل..
دعاء بطنها وجعتها وقالت:باهي..
ومشوا هي وامها للمربوعه..
دعاء..
واني في قمة التوتر خشيت للمربوعه وراسي لوطا وماشبحتلاش بكل حدي طلقت السلام وقعمزت..
عمي استأذن وطلع..هو قالي "كيف حالك يادعاء." الصوت كان مرخي كسرلي رقبتي ورفعت عيوني وننصدم..
ياربي لاتؤاخذني بس شين شين هلبه وفوقها شلافطي..الله يسامحك ياخالي..ماكملتش دقيقتين مقعمزة وطلعت طول..
🗝خشت ع خواتها الكوجينه وقالت..
دعاء بصدمه:مستحيل ..لالالالالا..
ضحكوا خواتها..
دعاء بعصبيه:علاش ماقلتوش ياحقيرات!
رويدا بضحكه:امي قالت ماتقولولها شي لين تطلع تشوفه هي بروحها شين ولاقنين..
دعاء بقرف:اااعععع سامحني ياربي سامحني انك جميل وتحب الجمال..وهدا ياربي سامحني مش انتقاص فما خلقت لاماعجبنيش ياربي سامحني..
وخواتها يضحكوا عليها..
ع خشة امها وعمها بعد سقدوا الناس..
علاء بضحكه:مشروع فاشل..
دعاء بإنفعال:اكييييد.
ضحكت جميله غصب عنها..
........
هههههههههههه...
ام شرقيه بضحكه؛باهي ياسرك ضحك..
شرقيه بضحكه:يستاهلوا هادي نيتي..ههههاااه..وووه..
وامها تضحك...
🌻🌻🌻
دعاء..
هديكا الليله بعد ماكلهم رقدوا...
صليت قيام الليل بعد ماكنت مسيبتها ليا وقت..
بعد ماصليت دعيت ربي انه يبعتلي زوج يكون ليا قرة عين وسألته يغفرلي اللي رفضت هالعريس بسبب شكله..
ورجعت دعيت اكثر انه يهبلي زوج صالح تقي غني عفيف كريم جميل يكون ليا قرة عين ونكون ليه قرة عين ومش عارفه ليش حسيت ربي استجاب دعائي وتفائلت ان ممكن قريب الدعاء يصير..
بعدها قريت قرآن...
وصلت عند اخر ايات فالسورة اللي كنت نقرا فيها
¤فلا اقسم بالخنس ○الجوار الكنس○ والليل اذا عسعس○ والصبح اذا تنفس○ انه لقول رسول كريم ○ذي قوة عند ذي العرش مكين○ مطاع ثم أمين○ وماصاحبكم بمجنون ○ولقد رآه بالأفق المبين ○وماهو على الغيب بضنين ○وماهو بقول شيطان رجيم ○فأين تذهبون○ ان هو الاذكر للعالمين○ لمن شاء منكم ان يستقيم ○وما تشاؤون الا ان يشاء الله رب العالمين¤
دعاء تنهدت وقالت..
"إلا ان يشاء الله رب العالمين"...
⚘⚘⚘⚘⚘
ليلة الميلود
كانت العيله مجتمعه في حوش جد دعاء..
العمات والعمام..
وشرقيه كانت قايمه خشمها ع جميله والبنات..تكلم فالكل ماعداهم هما استكراد تام..
ولاحظوا حتى ازدهار بنت عمهم قالبه عليهم..وماعرفوش السبب..
ورا الجنان..
كانوا نسرين ورويدا واقفات يهدرزوا..
نسرين:كان عندنا عطي التليفون لنصري ونصري عطاهولي وقال كان اتصل رقم غريب ردي هدا خالك محمد وقوليله انك كنتي تكلمي فرويدا..
رويدا؛اها..باهي معاش جاكم!!؟.
نسرين:لالا ليه فتره..
ع جية نصري..
جاهم وقف عليهم:ترا بري نسرين نبي رويدا بروحها شويه..
رويدا استغربت..
نسرين:لالا نصري تو ادير للبنت مشاكل كان شافوها معاك..
تنهد وقال:باهي اقعدي لكن ياويلك تطلع منك كلمه يانسرين..
نسرين:تعرفني نعاود فالدوة اني!!
نصري:المهم..رويدا يعلم الله اني نحسب فيك زي نسرين بالزبط ومانرضاش فيك اللي مانرضاشي فيها..فوتي ابراهيم راهو والله مايصلح بيك اقسم بالله يكذب عليك يارويدا..
رويدا وهي تشوفله بحده:كذاب..
نصري:عارفك بتكذبيني..طلع تليفونه وفتح ع التسجيل وسمعهولها..
"نصري:قصدك انت توا مع رويدا بنت خالي محمد! معناها جديات الحكايه..
ابراهيم:لاجديات لاوحده هي قعدت اديرلي فالجو تبي اطيحني واني طيحت روحي بروحي ومشيت معاها زي ماتبي مش مطول معاها اصلا فتره ونفوتها فالنهايه بنت عمي"
ووقف التسجيل..
رويدا كانت فاتحه عيونها ع وسعهم بصدمه ودموعها يطيحوا ورا بعض..
ونسرين حاطه يدها على فمها وتشوفلها..
نصري:راهو مسخ ومتاع جو مسخ واستراحات حرام تقعدي معاه..
رويدا طول مشت من حداهم وخلتهم وروحت للحوش..
نصري بحزن :نسرين بري قولي لدعاء قالك نصري الحقي اختك روحت للحوش..
نسرين هزت راسها ومشت بسرعه..
دعاء..
كلمني نصري اليوم اللي قبله وحكالي ع كل شي وحرص عليا مانقوللها شي لين هو يخبرها بش تقتنع..
لما روحت للحوش...لقيتها فالدار راقده ومغطيه روحها وتبكي وبالعبره..
ماقدرتش نكلمها قعدت معاها وخلاص لعند مارقدت...
🌻🌻🌻
وعدى يوم وجي اللي بعده...
في المدرسه..
بين الحصة الاولى والتانيه..
رويدا بعيون دبلانه من الحزن:هاك التليفون رديه ماعندي ماندير بيه..
امنه خداته وقالت:سحيقته المسخ ديري غيره الحقير واحسن منه..
فجأة..
انفتح باب الفصل بقوة..
وخشت المديره ومعاها الأخصائيه وابلة الحصه..
البنات خافوا..
وقفوا طول..
المديره:امنه وهاله اطلعوا...
امنه؛علاش!!
المديره بغضب:اني قلت اطلعوا..
هما الزوز مشوا مع بعض طلعوا هما الأولات...والمديره والاخصائيه وراهم وصكرت الباب..
الأبله:فالطه هكي كبرها داروها..
حطت شنطتها وقالت:اللهم جيرنا..هيا انتي وياها افتحوا كتباتكم..
ورويدا تفتح في كتابها وهي ترعش مع بعضها مش عارفه علاش..
بعد حوالي 5دقايق بالزبط..
طقت الأخصائيه باب الفصل وفتحاته وقالت:معليشي ياابله..شبحت لرويدا وقالت..رويدا..
كلهم شبحولها..
هي ناضت وقفت وترعش..
الأخصائيه بحده:تعالي..
طلعت من مقعدها وهي تقول:شن في ياأبله؟!
الاخصائيه هزت راسها وقالت:تو تعرفي لوطا شن في..
رويدا بتموت من الخوف..
طلعت والاخصائيه صكرت الباب..
ومشوا مع بعض..
الاخصائيه:خسارتك يا رويدا ماكنتيش هكي غير شن لمك ع هالشكالات..
رويدا بخوف:بالله ياابله قولي شن في.
الاخصائيه:تو تقولك المديره..
نزلوا الزوز من الدروج وصلوا مكتب الأدراه..
وخشوا وصكرت الاخصائيه الباب..
كان في غير البنات زوز ولاد واقفين..
واحد منهم قال:اني هادي ماشفتهاش معاهم يومها..شفت هادوما بس قربوا من الكاصه وطبست راسي ورفعته مالقيتهمش..
رويدا وهي ترعش:فهموني شن في بنموت راهو!
المديره:بتموتي!!وانتي اللي باعتيهم يخنبولك تليفون صاحب المحل..
شبحتلهم بصدمه وقالت:اني !!! اني بعتكم تخنبوا..
امنه برفعة حاجب:ايه قلتي دبرولي فتليفون بش نكلم صاحبي..
خبطت صدرها بيدها وقالت والدمعه تنزل من عينها:اني ياحقيره!!!
قلبت امنه وجهها..
امنه شبحت للمديره:اقسم بالله ماقتلهم يخنبوا والله العظيم..
المديره:لكن قتيلهم دبرولي في تليفون بش تكلمي صاحبك!
سكتت رويدا ودموعها ينزلوا..
صاحب المحل:اني والله لما قالي ماصدقت قلت هادو زبايني والله مايديروها لكن بعد مادورت لين عييت وتأكدت ان هما خدوه حق جيت طول هني وطلع عندهم فالأخير..وهادي ياابله حاجه مانيش ساكت عليها سامحيني راهو بلغت فيهم والشرطه قريب توصل..
امنه وهاله خبطوا بإيديهم على وجوههم..
ورويدا عيطت وهي تقول:لالالا بالله عليك ياوخيي لا تربح..
صاحب المحل:خلاص تم توا..
ومشي طلع ووراه صاحبه..
رويدا جاته تجري بش تشده وتترجاه شدتها الاخصائيه..
وهما طلعوا وصكروا الباب ..
رويدا ببكي وعياط:لااا والنبي لااا...
والزوز التانيات يندبوا ويبكوا..
المديره:اني حنخلي مسؤوليتي السرقه صارت قبل يجوا للمدرسه..
هني رويدا معاش تحملت خلاص..
جوا بين عيونها بوها وامها وخواتها وعيلتها اللي حضيعهم معاها بسبب طياشتها وقلة عقلها...
طول طاحت بين ايدين الاخصائيه فاقده الوعي...

...يتبع..