"إلا أن يشاء الله"

الجزء التاسع عشر ماقبل الاخير

✒..
"إنهيار عصبي!!؟"
جميله وهي ترشف وتمسح في دموعها:لتوا قاعده راقده تفتح عيونها شويه تقعد تبكي بعبرتها بعدين تولي ترقد..
رويدا ودموعها ينزلوا:ياناري وخيتي قداش تحملت وكمدت في قلبها..وحق ربي ياماما من الاول ماتريحت والله لكن ماقدرتش نتكلم..
جميله بكره من بين دموعها:طقت نهارين في المستشفى لانشد عليها ولادورها المسخ..
رويدا:عطيه مايرفعه الحقير..طلقوها منه طلقوها وطز في الناس القلب اللي تقلب مابنخلوا اختي تموت ع خاطرهم..
جميله غمضت عيونها بشده ودموعها يقطروا وقالت بقهر:اني اني اني يعطيني نار درتها فيها..
رويدا بفجعه:بعيد السو عليك ماما ماتقوليش هكي بالله عليك..
وجميله تبكي بألم..
.........
"هدا مكتوب من الله سبحانه يامروة ماتقوليش هكي"
مروة ببكي:لالا ياالياس كله مني ياريتني ماادخلت ياريتني.. اني اللي وصلت اختي لهالحاله..تي من خوفها ماكانتش تشكي ولاتحكي لحد..لين صار فيها اللي صار..حسبي الله ونعم الوكيل فيه الحقير هدا..
الياس بأسف:إنا لله وإنا إليه راجعون..
⚘⚘⚘⚘
دعاء..
نسمع بالإنهيار العصبي في المسلسلات ونشوف فيه نحسابه زي هبوط الضغط..طلع اسوأ منه طلع عرض مرضي واعر هلبه..اعصابي حسيتها تالفه..جسمي مهدود..كل شي فيا منهار تماما مش غير اعصابي..
والدنيا في عيوني اسودت ع الاخر..
فقدت الإحساس بالحياة والرغبه فيها معاش في شي يقدر يضحكي او يخليني نرسم ابتسامه بسيطه ع وجهي..
قداش تمنيت من ربي ينهي آجلي وقتها لأني وصلت لأقصى مراحل كره الحياة..انعدمت رغبتي فيها..
بس الحمد لله..شوية الإيمان اللي قعدت عندي حالت بيني وبين تنفيد جريمة في حق نفسي"الإنتحار"
🗝السبب في هدا كله يادعاء طلاقك قبل الزواج..
دعاء..
ايه لأني نعرف شن بيصير بعد الطلاق..هما مطلقات بعد الزواج وماسلموش يابال اللي زي حالاتي..
🗝الطلاق للمراة نظرة الناس ليه وحده يادعاء سوا قبل الزواج اوبعده..الناس عندها الطلاق شي يشبه الامراض الساريه..زي الإيدز يكش لحمهم منه ويخافوا منه خوف زي الفوبيا
ناسيين ان الطلاق تشريع الهي..وان المطلقات في عهد الرسول كانوا مش متحشمين من شي وعادي جدا عندهم مافيشي اي مشكله..بل على العكس الصحابه كانوا يتسابقوا بش يتزوجوا وحده مطلقه..
تعرفي قصة حفصه بنت سيدنا عمر..
بعد طلاقها سيدنا عمر كان يبي يزوجها وعندهم زمان عادي الأب يعرض بنته للزواج بطريقه تحفظ كرامتها..
مشي لعثمان وعثمان رده..بعدين مشي لأبوبكر وحتى هو رده..
ضاقت بيه ع الآخر يحسابهم مايبوش بنته لعيب فيها..
حمل همه ومشي لأعظم مخلوق ع وجه الارض..
مشي لصاحبه وحبيبه الرسول صلى الله عليه وسلم وحكاله اللي صار معاه وشكاله من الصحابه اللي ردوه..
قاله الرسول..بنتك حتاخد اللي خير منهم..
هو اتفاجأ وقال..ومن خير منهم يارسول الله..الرسول رد عليه وقال..اني..
ويافرحة عمر اللي لايمكن وصفها..وين جي طالع من عند الرسول تلاقى هو وابو بكر ولان واخد ع خاطره منه تجاهله واعرض عنه..
جاه ابوبكر وهو يضحك وشده واعتذر منه وقاله والله مارديناك الا لاني سمعت الرسول يقول انه يبي يخطبها لنفسه واني حفظت سره لين هو يقول بروحه..
اهي مطلقه..واكابر الصحابه مع اشرف الخلق فكروا في الزواج منها..
وهلبه امثله لاحصر لها..
وحني في زماننا هدا اللي مفروض نظرتنا فيه للأمور تكون اكثر تحضر..بالعكس رجعنا للخلف مليون سنه..
دعاء..
مواجهة المجتمع صعبه هلبه..
🗝ايه واني صاحبة تجربه تختلف عن تجربتك ونقولك مواجهة نفسك بعد الطلاق اصعب بهلبه يادعاء..ونقولك ان الطلاق بعد الزواج اصعب بألف مرة من الطلاق قبله..
واعتقد ان كل وحده مطلقه بعد عاشت تجربة الزواج وطلعت منها بجروح صعب تبرا تفهم قصدي كويس..
بس في الاخير الطلاق مش نهاية المطاف تطلقي ولاتكملي حياتك مع انسان يقتلك بالعرق لين يقضي عليك مرة وحده..
تعيشي مطلقه بكرامتك ولازوجه ذليله حتى انوثتها اضيع في جرة كائن اقرب للحيوان من كونه بني آدم..
⚘⚘⚘⚘⚘
وماطلقش رضوان بالساهل الا بعد مامرمدها هي واهلها برغم محاولات الشيخ الياس معاه انه يسرح بإحسان لكن هو كان نذل لدرجة كبيره..
لهدا رويدا حكت لعبدالله عن تفاصيل اللي صار مع دعاء واللي داره رضوان..ولان عبدالله عنده معارف في طرابلس..
قرصوه من وذنه وخلوه يطلق زي الراجل الطيب..
دعاء..
فهالفترة كان بابا يحاول يطلعني من الحاله اللي كنت فيها..مرة نمشوا للسوق..ومرة يطلعنا للبحر ومرة رفعني لحوازة جدي من امي غيرت جوي غادي..كلهم كانوا يرفعوا فمعنوياتي الحق وينسوني همي..
وخبر طلاقي وصلني غادي..بكيت وضحكت..فرحت وانقهرت..
وخفت هلبه من بعدين..هلبه خفت..
⚘⚘⚘⚘⚘
اواخر سنة 2018..
مروة كانت حامل في السادس..
ورويدا في بداية حملها التاني...
والزوز كانوا في حوش اهلهم ملتمين ع عالة الشاهي والكاكاويه..
هما ومحمد ومؤيد...
مؤيد:بيطلع حرنيف ولدك يارويدا..
رويدا:ايه شكله بيشيبني..
جميله:غير شدوه ع العاله ياهمومي..
مؤيد بضحكه:شاده يام خيرك..
محمد شرب الطاسه وناض يقول:بنمشي نهدرز ع امي شويه ديروا العشي بكري..
جميله:شن تبي؟
محمد:اللي تبوه..
ومشي طلع من حداهم..
جميله:نديروا انفاص..
رويدا:دودي حبي بالله عليك ديريلنا مقلوبه..
مروة:الله مقلوبه دعاء!
مؤيد:اطلع طول والله ماكليت زيها برا
ناضت دعاء وهي تضحك قالت:ياودي باهي باهي خل نمشي نطلع صدور الدجاج...ومشت طلعت من حداهم..
راجوها لين تطلع بعدين قالت رويدا:نحس فيها ولت خير من قبل..
جميله:ايه الحمد لله..
مؤيد بغل:مازال قلبي مليان ع هداكا الكلب تزن في راسي نبعتله جماعه يكسروه..
جميله:لالا لاتبعتله ولايبعتلك المهم افتكت منه اختك وهو منه لربي ياخد فيه الحق
مروة:ياارب..
رويدا:الله لاتربحه وين مايحط..
ودعاء فهالوقت طلعت الدجاج وحطاته في الميه وكيف جت بتطلع من الكوجينه شافت وفاق مقعمزة ع كرسي في الممر تقرا في سورة البقرة..
دعاء..
ماخلتهاش بكل تقرا فيها في كل وقت..ومرات نشوف فيها مقعمزة في الجنان وفي يدها خاتم التسبيح ولسانها يلهج بالذكر..لهالسبب اختي هادي حياتها ماشيه صح وديما متفوقه وحتى لما جت تختار التخصص اللي بتقراه في الطب استخارت..وخشت مختبرات واهي قريب تتخرج..
🗝صكرت وفاق المصحف وناضت شبحت لدعاء وابتسمت وهي تقول:خيرك تشبحيلي هكي..
دعاء بإبتسامه:نبيك تجي تلحقي ع حصتك من الكاكاويه..
وفاق:مؤيد قاعد في الدار؟
دعاء:ايه..
وفاق:عليك حصله..
دعاء بضحكه:تعاركتوا!؟
وفاق بضحكه:لالا..
ومشت للدار ودعاء معاها..وين وصلوا في فمها قابلهم مؤيد طالع وفيده ماريه..
دعاء:وين ماشي .
مؤيد:بوي اتصل قال جيبها لحناك تبي تشوفها..
دعاء بإبتسامه:اها..
ومشي مؤيد وخشت دعاء قعمزت حدا رويدا وخدت مصعب منها وقعدت تلعب فيه..
وفاق وهي مقعمزة مقابله امها قالت:نبيكم في موضوع مهم..
كلهم شبحولها بإنتباه..
وفاق وخرت شعرها ورا وذنها وقالت:ماما في واحد يبي يخطبني..
كلهم اندهشوا..
جميله:من هو هدا!؟
وفاق بإبتسامه:مش حتصدقي لو قتلك مني!
رويدا بنرفزة:تي تكلمي ياداره الكبد..
وفاق:هي بنسكت معاش قايله شي..
رفعت جميله اللقامه ع اساس بتحدفها بيها..
ضحكت وفاق وقالت:باهي ياودي..احمم..ولد خال بابا محي الدين..
فتحوا عيونهم ع وسعها من المفاجأة..
جميله:وين راك وين ريتيه؟!!
وفاق:ماهو بنت اخته فريحه عندنا في الروضه..
مروة:قصدك انتي وياه دايرين علاقه ياغبارتك!!
وفاق:لالا اعوذ بالله والله لا..هو كلمني بروحه امس وقالي نبي نطلبك من بوك واني قتله عطيني وقت نفكر..
رويدا:وعاد ديما يشبح فيك فالروضه..
وفاق ضحكت وهزت راسها بإيجاب..
جميله:والله عيلة خال بوك ناس باهيه الحق وولادهم وبناتهم ماشاء الله عليهم..لكن خليني نرد الشيرة على بوك قبل..
وفاق:باهي..
رويدا:مايطلع منك فرخه وفاق طحتي ع محي الدين مرة وحده اللي بنات العيله قريب يطيروا عليه..
مروة:تذكروا زمان كيف كانت تحاول معاه نسرين..
رويدا:ههههه..عليك ايام..من قال النصيب يجيبه لهالفزغوله..
دعاء:مظني وقتها كنتي تقري صف تاني لما كان يجي لحناي بعدين خف جيانه معاش زي قبل..
جميله:ايه خدمته في الزاويه خلاته معاش يشوف حتى اماليه...
وفاق:قصدكم حتى اني هكي بيصير فيا!
جميله:خودي وقتك وفكري كويس ايوه..
وفاق سكتت وهي تفكر..
دعاء...
وماطولتش هلبه وفاق في التفكير لانها فالحه طول مشت قالت مخاوفها لمحي الدين وهو طمنها ع الآخر..ولأنه عاجبها هالفزغوله ههههه..وافقت عليه..
⚘⚘⚘⚘
وجو خالهم ومرته وطلبوا وفاق رسمي..
وفي نفس الأسبوع دارو الفضانيه..
والعرس تحدد موعده شهر 3 خلاص وفاق ماقعدلها شي وتتخرج نوت تكمل عنده...
وعدت الشهور...
وهما يجروا ويوتوا للعرس ووفاق جاها كل شي باهي..باتتت خير من رويدا ومروة..
دعاء..
عرس وفاق كان فرصه كبيره ليا لأول مواجهه ليا مع الناس هلبه منهم ماتلاقيتش معاهم نهائي بعد طلاقي ووصلني كلام انهم ديما يهدرزوا عليا بشفقه ع اساس اني واجعتهم في نظرهم نصيبي توا وقف واكيد هالشي متعب نفسيتي..طبعا هدا في نظرهم..
بينما اني بفضل الله..ثم دعم عيلتي ليا وليت في حال افضل الف مرة من قبل وعايشه حياتي عادي والحمد لله..
بس كانت ناقصتني جرعات قوة كبيرة بش نرجع نوقف ع رجليا من اول وجديد..
⚘⚘⚘⚘
أسبوع العرس..
"اطلعوا اطلعوا"
هدا محمد يأذن للنساوين بش يطلعوا بعد ماكملوا بني الخيمه..
والنساوين ماصدقوا طلعوا كلهم..
العمات والخالات ونساوين العمام ونساوين الخوال..
وبنات العيله المتزوجات وماكانتش فيهم الا صبيه وحده اللي هي دعاء..
كلهم تعالت زغاريدهم لما شافوا الخيمه...بعدين خشولها ودارو فيها شوط ناشط..
والعروس حاضرة معاهم وتتفرج عليهم وهي مبتسمه مرة بخجل لما يغنوا عليها ومرة بفرح لما تشوف خواتها وامها يغنوا ويرقصوا..
بس الانظار كانت ع دعاء اكثر منها هي..
دعاء اللي فاجئت كل من توقع يجي يلقاها ضاعفه وشاحبة اللون والهم بادي في وجهها خاب توقعهم لما شافوها زايده جمال ومهتمه بروحها وتبان اجمل حتى من خواتها المتزوجات..
دعاء..
لاحظت بشكل او بأخر نظراتهم ليا واني نغني ونرقص حسيتهم متفاجئين هلبه..اما اني فكنت فرحانه هلبه اللي خليتهم مصدومين ههههه..وحسيت ان مؤشر الثقه بالنفس بادي يرتفع...
⚘⚘⚘⚘⚘
وجي يوم الكسوة والفاتحه..
لبسوا وفاق البودري في حوش اهلها..
وبعد وصلهم خبر قراية الفاتحه...انقلب الحوش كله قلب اغاني وزغاريد ودربوكه..
وعماتهم هما اكثر من قامها..
وبعد المغرب..جت الكسوة..
وكانت كسوة قنينه...كل شي فيها يبين ذوقهم الرفيع وتقديرهم لرواحهم وللعروسه واهلها..
دعاء..
نذكر الجبهة اللي فتحناها في كسوة وفاق كانت اقوى من الجبهة اللي فتحناها في كسوة رويدا ههههه..صابت حناجرنا البحه بعد روحوا عرب الكسوة يومها..
وكالعاده في الليل حنوا العروس اللي كانت شبه راقده وهما يفيقوا فيها بالشتاوات والأغاني..
⚘⚘⚘⚘⚘
يوم الحفله..
اول من كان في الصاله دعاء وامها..
يشرفوا ع اخر التجهيزات قبل الحفله..
جميله:جابوا الحلوات كلهم؟
دعاء:ايه العبمبر والكيكه..
جميله:باهي كويس..ترا اشبحيلي مكياجي قنين؟
دعاء بضحكه:والله حلو ياماما تهبلي طالعه..
جميله بإبتسامه:حتى انتي..
ضحكت دعاء..
وشويه وبدوا يجوا الناس وجميله ودعاء يستقبلوا فيهم..
بعدين وصلت رويدا من المزين..
رويدا:شن رايك..
دعاء:حلوة حلوة بالذات قصة شعرك..
رويدا:بالله حق!
دعاء:هههه والله العظيم تهبلي..
رويدا بإبتسامه:حتى انتي .
دعاء ابتسمت وقالت:وجعتني مروة بيفوتها..
رويدا:قالت الشيخ بيجبها لما بيروحوا بوفاق بش تبعها..
دعاء:ايه قالتلي..
سكتوا شويه وقعدوا يراقبوا في المعازيم..
رويدا:رنيم ماتشبح في حد..
دعاء:زي امل..
رويدا:هديكا بروحها..لكن شقشق عجبتني..
دعاء بضحكه:حتى اني عجبتني..
ع جية جميله:اختكم وصلت..
طول طاروا رويدا ودعاء بش يستقبلوها..
فتحوا الزوز دار العروسه..
ع جية وفاق وناهد اديدش فيها لأن علاء هو اللي جابها..
لما خشت..
حولتلها دعاء الكاب..
رويدا بإنبهار:الله يبارك الله يبارك..
دعاء بإعجاب شديد:ماشاء الله لاقوة الا بالله..
وفاق بإبتسامه:حقة حلوة؟
ناهد؛ماشاء الله عليك تغيرتي هلبه هلبه..
ع خشة جميله ضحكت بفرح وقالت:اللهم صل ع النبي..الله يبارك على بنيتي..
ضحكت وفاق وقلبها يرقص من الفرح
⚘⚘⚘⚘⚘
انطفي ضي الصاله كله..
بقعة ضوء تسلطت ع البوابه..
واشتغلت الزفه اللي خشت عليها "فرح الهادي" في عرسها..
وانفتح الباب ع مصرعيه..
وخشوا مؤيد ووفاق ..
والعروسه تدرج مع خوها..والمصورة تصور فيهم..
كل الحضور عجبتهم وفاق هلبه..
رقيه:متغيرة هلبه..
رنيم:ايه طاحت في مزينه مقومه..
......
امل:طلعت احلا من خواتها..
ليلى:خسارة تمنيتها لإبراهيم خوك لولا الفرخه رويدا مش عارفه شن عجبه فيها..
امل:خلاص ماما توا ابراهيم خاطب بلاوفاق بلارويدا..
ليلى تنهدت بملل وسكتت..
.....
شرقيه:حظ وفاق خير من حظ خواتها كلهم اللي طاحت في محي الدين..
عيشه:حتى هي ماشاء الله عليها زي الغزاله..
⚘ووصلوا مؤيد ووفاق للكوشه..
خدوا صورة مع بعض..بعدين طلع طول..
وبدت الحفله..
دعاء..
ممكن يومها مافي وحده قعدت مقعمزة ع كرسيها اللي شاده المنظومه كانت ناشطه ..اكثر شي ضحكني يومها لما حطت اغنية..
"اني في حوشي زايطه والناس عليا شايطه"
ناضت اختي رويده وقعدت ترقص وهي تغني معاها..
واني وامي وحتى وفاق قعدنا نضحكوا عليها عارفينها في من تغيظ...
⚘وبعدين نزلوا العروسه ووصلوها للمسرح وبدوا يرقصوا فيها...
ووفاق خدت يد دعاء وقعدت ترقص هي وياها..
دعاء..
كنت نرقص واني فرحانه هلبه وضاربه بكل شي عرض الحيط..مش حنموت لاني مطلقه بالعكس..حنعيش ونفرح ونكمل حياتي..ومش حيهمني شي في الدنيا غير رضا ربي وبس لأنه الغايه التي لاتترك..وحنلوح وراي الغاية التي لاتدرك وهي رضا الناس..
حنكون اعقل من اني نعيش بش نرضي الناقص وخوه..
⚘⚘⚘⚘⚘
وع نغمات زفة طلي بالأبيض..
خشت وفاق هي ومحي الدين..
دعاء..
قداش كانوا طالعين ع بعض..ومحي الدين طلع ماشاء الله عليه ماينعطاش عمره هو مواليد 85 هلبه من الحاضرات يحسابوه مواليد 90...الحق ماشاء الله عليه احلا واحد في نساباتنا لتوا...ههههههه..قاعد مهم عندي الشكل ههههه..
⚘⚘⚘⚘⚘
وفي اخر الحفله لما جو بيروحوا بوفاق..
وصل الشيخ الياس بمروة وطول طلع وراهم..
وتبعوهم عبدالله ورويدا..وشرقيه وعيشه وناهد رافعهم علاء...
وكانت الأجواء غادي في حوش خال محمد حلوة بالمرة..
استقبلو وفاق احلا استقبال..
وبعد نص ساعه روح محي بمرته لحوشهم..
واللي جو مع وفاق روحوا لحوش محمد وكملوا سهرتهم للصبح..
⚘⚘⚘⚘⚘
دعاء..
واهي تزوجت وفاق واني قعدت بروحي في الحوش..
نفكر في الجاي من حياتي وشن بندير فيها..
نذكر ليلة اسبوع وفاق...صليت قيام الليل..
وناجيت الله وسألته يهديني السبيل الصحيح ويردني ليه ويساعدني نغير حياتي للأفضل...
فهديكا الليله رقدت ع الصلاية ودموعي تنزل..بس كنت حاسة براحة عجيبه..وكأن ربي طبطب عليا بيد عونه وعطفه الخفيه..
⚘⚘⚘⚘⚘⚘
كانت دعاء مقعمزة ع الصلايه تقرا في القرآن بعد ماصلت العصر وين جتها امها بخبر وضع مروة لمولودها التاني اللي كان ولد..
طول وتوا ارواحهم ورفعهم محمد للمستشفى اللي جابت فيه مروة..
وقعدوا معاها لليل وروحوا مع بعض لحوش مروة..
دعاء..
كانت ناويه مروة لمه كبيرة لولدها زي مادرات لماريه..لكن مع الاسف باغتنا الحرب..هديكا الحرب اللي سيبنا بسببنا حوشنا لمدة عام كامل..
وتشردنا كل مرة في تركينه..
مرة عند مروة مرة عند وفاق...
وتشتتنا..بابا ومؤيد مشوا قعدوا مع حوش جدي وعمامي في استراحه لعمي المهدي..
لكن مع الاسف القلوب كانت اضيق من الاماكن.. وبابا ماتحملش ولامؤيد خوي..
وفي مرة كان يشكي الحال لصديق ليه برا طرابلس..
الراجل حلف على بابا يجي بعيلته يقعد في شقة عنده مصكرة ليها وقت هو مش محتاجها..
وبابا بعد ماخدي وقت في التفكير مش طويل هلبه خلانا نلموا قشيشنا ونطلعوا كلنا من طرابلس..
🗝استقروا في شقة الراجل..
اللي لقوها مفرشه كامله..
ولان الحرب طولت هلبه والوضع المادي زاد صعوبه..
خدم مؤيد في وحده من المحلات..
ومحمد قعد يوصل في سيارته العاليه في طلبه للمدرسه مع ولده عمر اللي سجله ضمن الطلبه النازحين..
دعاء..
تعرفنا ع اهل الراجل اللي عطانا الشقه ودرنا حني وياهم صحبه..وبنتهم دبرتلي خدمه في محل تغليف هدايا..ترددت في البدايه اني نوافق..بس بعدين خديت القرار ووافقت نخدم..
وبديت في الخدمه وقعدت نساعد في اهلي ع المصروف ووضعنا المادي ولى كويس..
مانحكيلكمش قداش الحاجه هادي زاد ثقتي بنفسي وقوتني هلبه وخلتني نفكر بعد تنتهي الحرب ونولوا اول حاجه نديرها هي اني نكمل قرايتي خلاص..
🌻وزياده ع الحرب ظهر وباء الكورونا..والحكايه زادت تعقدت من جميع النواحي..
بس مع هدا قعدوا يعافروا في الحياة ويعيشوها زي ماهي..
دعاء..
رمضنا لاول مرة برا طرابلس..وجونا في رمضان وفاق ومروة..
وفاق كانت متفقه مع محي انهم يلغوا فكرة الانجاب من روسهم لبعد عام بش تكمل وفاق قرايتها بس مع الأسف الحرب والوباء وقفوها هالفتره ومع هدا قاعدين ماشيين ع اتفاقهم..
بينما مروة كانت عايشه حياتها عادي زي قبل وصغار ملوا عليها حياتها وخلوها مش لاهيه غير بيهم بس مع هذا فاقدتنا هلبه..
اما رويدا ماتقدرش توصل فينا الا بمكالمات الفيديو وبس..
كلنا اكثر شي كنا نفكروا فيه هو حوشنا..
زعما مازال يقعدلنا ولا نلقوه مسوى بالأرض..
وبري ياأيام وتعالي ياأيام..
ويجي اليوم اللي تضع فيه الحرب اوزارها..
ماصدقنا لمينا حوايجنا ونوينا المرواح..
وبابا شكر الراجل وعطاه مبلغ حق قعادنا هالفتره الطويله فشقته والراجل حلف ماياخد منه قرش واحد..
بس بابا خلاله الفلوس ومشي..هو هكي بابا مايحبش يقعد مديون لحد..
المهم..
روحنا لطرابلس ع حوش مروة..
قعدنا عندها اسبوعين..
فهالأسبوعين بابا ومؤيد مشوا للحوش شافوه ولله الحمد هو وحياش المنطقه مش مضررين هلبه..بس الباين كانوا قاعدين فيهم..
لهدا لوحوا اللي لوحوه وجاب من يغسل الحوش وينظفه ..
وبعد تموا شغلهم روحنا لحوشنا..
🗝زي هلبه مناطق كانت عندهم مشاكل في الضي بعد وقت تصلح..وبدت الحياة شويه شويه ترجع للعاصمه...
⚘⚘⚘⚘⚘⚘⚘⚘⚘⚘⚘⚘⚘⚘⚘⚘⚘
ديسمبر 2020..
في المطار..
خش من مكان الواصلين..
وهو يجر في شنطته ..
كان لابس بالطو شتوي مش ثقيل لونه اسود..ع قميص لونه رمادي محشي في سروال لونه بيج اسود وكندرة شاموا لونها بيج غامق..
حول نظاراته وارتسمت ع وجهه ابتسامه لما شافهم الأربعه برجالتهم يشبحوله من بعيد ويأشروا بإيديهم يحيوا فيه وهما يضحكوا..
قعد يمشي ومرة مرة يشوفلهم بإبتسامه لعند ماوصل فيهم..
نجلاء بضحكه وهي فاتحه ايديها:جملو حبيبي..
وانقضوا عليه الاربعه وضموه بحرارة وهما مش مهتمين نهائي للمكان الموجودين فيه ولا الزحمه اللي حواليهم..
جمال بضحكه:تي حولوا يامهبولات حولوا حشمتونا..
بعدوا عنه خواته وهما يضحكوا ودموعهم تنزل..
رجاء:مش مصدقه..
عطاء:ياروحي وخيي كيف ضاعف..
نجلاء وهي تمرر في نظره عليه:ايه صح..
آلاء:معاد مسافرها ياجمال مرة تانيه والله مانا مخليينك..
وجدي بضحكه:غير عطونا دورنا..
ضحكوا..
وجو النسابه سلموا ع نسيبهم..
وبعدوا كلهم توجهوا لخارج المطار...
⚘⚘⚘⚘⚘
"هيا يام"..
ليلى:هيا هي..
وركبت سيارة ابراهيم..
بعدين شبحت للحوش وقالت:والله ماهاين عليا نخليه اول حوش ناخد عليه هكي..
المهدي اللي كان راكب جنب ولده:لكن كبير علينا اني وياك بعد يتزوج ابراهيم معاش تنفع بينا كان شقيقه صغيرة ع قدنا..
ليلى ابتسمت وقالت:ايه عندك حق..
ابراهيم:هي نتوكلوا..
المهدي:هي توكل .
وطلع ابراهيم من الحوش اللي قرروا ينتقلوا منه للعيش في شقة في احد البنايات في احد الاحياء الراقيه في العاصمه..
⚘⚘⚘⚘⚘
في الطريق..
جمال:لاخلاص ان شاء الله نويت الأستقرار هني..حصلت خدمه في مصحة وعيادة تخصصيه..وفي المستقبل تفكر نفتح عياده خاصه ان شاء الله..
رجاء:ربي يوفقك حبيبي ويفتح عليك..
اسامه:موفق ان شاء الله..
جمال:آمين..بالله قولولي عمي وينه..
رجاء ابتسمت واسامه قال:تو لما نوصلوا تعرف..
عقد حواجبه بإستغراب وهو مبتسم ماباش يلح عليهم بالسؤال يبي يتفاجئ ..
وقف اسامه عند الاشاره الحمرا..
⚘في السيارة اللي جنبهم بالزبط..
دعاء:لازم تتمشى يوميا نص ساعه يابابا جميله:عندي ليه جهد المشي اني..
محمد:لاعندك جهد كل عشيه بإذن الله نمشوا لساحه من الساحات ونتمشوا غادي واني معاكم..
دعاء:ماما كان تبي تنجي من مرض الضغط ياماما امشي بنصايح الدكتور .
جميله تنهدت بإبتسامه وقالت:حاضر..
وقدم محمد شويه بالسيارة..
دعاء وهي ادور بعيونها بين السيارات قالت:زحمة هلبه..
محمد:الليبين كلهم برا...
..........
جمال:ماريتش اثار الحرب كان شويه من لما وصلت..
اسامه:في اماكن مدمرة تدمير..
جمال:لاحول ولاقوة الا بالله..
وقعد يدور بعيونه بين السيارات ويقول:لكن زادت الزحمه..
رجاء:برغم اني ديما نموتوا مش عارفه كيف تزيد تزحم.
اسامه وجمال:هههههههههه..
وصوت ضحكاتهم كان مسموع..وصل لآذان دعاء..
شبحت لمصدر الصوت..
وشافت بالجنب صورة شاب اشقر غايه في الوسامه والشيب غازي شعره الذهبي..
ارتسمت ع وجهها تلقائيا ابتسامه..بعدين شبحت القدام..
فجأة دار محمد كلاكس لما شاف الإشارة ولت خضرا..
الكلاكس متاعه خلا جمال يشوف لسيارتهم..
شبحله هو بعدين جو عيونه ع بنته تشبح لتليفونها وهي تضحك..ع عاطيه بالجنب..
ارتسمت ع وجهه ابتسامه خفيفه وهو يشبحلها وقعد معاها بعيونه لين تحركت سيارة بوها..
وتحرك اسامه بالسيارة..
وكل حد فيهم مشي في طريق مختلفه...
⚘وبعد ماقطع اسامه مسافه لابأس بيها وصلوا لمكان
اندهش هلبه جمال لما شافه وقال:لالا ماتقولهاش..
رجاء بإبتسامه:حكينا لعمي ع ندمك ع بيعته وهو دار المستحيل بش رجع شراه مرة تانيه..
تعبوا عيون جمال دموع وهو مبتسم بفرح وذهول وماقدرش يقول كلمه..
لما درست السيارة ونزلوا..
ودرسوا وراها سيارات باقي النسابه..
زاد ذهول جمال وين سمع صوت النوبه اللي بدت تخبط..
منصور رفع يده وقال:هديه مني لنسيبي الدكتور..
ضحك جمال وقلبه طاير من السعاده..
ع جيه عمه..
لما شافه جمال قدمله طول وحضنوا بعض بشوق..
العم:مبارك الدكتوراه يادكتور..
جمال ودموع الفرح تنزل رغما عنه:الله يبارك فيك وفي عمرك ياعمي..
وفجأه..
جبد منصور جمال من عمه ودخله معاهم في النوبه اللي كانت قالبه الشارع..
جمال في الاول كان متحشم بس فرحته خلاته يرقص معاهم..
وخواته يتفرجوا عليهم من بالكونة الدور التاني وهما يصفقوا وفرحانات بيطيروا..سندهم وبوهم وخوهم وكل اهلهم واخيرا روحلهم وهو ناجح نجاح باهر...
⚘وبعد شوط النوبه..
خشوا للحوش..
وقعد جمال يدهور فيه وهو مش مصدق انه واخيرا ولاله قعد يمشي فيه ويتنفس في ريحة امه اللي حس انها مازالت عالقه في كل حيط من حيوط الحوش..
مشي طول توضا..بعدين صلى لله صلاة الشكر ودموع الفرح مابتش توقف بكل..
💖وع شرف مرواحته واحتفالا بحصوله ع شهادة الدكتوراه في طب العيون دارو عزومه كبيره حضروها الأقارب والأصحاب..اللي كان موجود بيناتهم جمال عايش فرحته وفي قلبه يقول"الواحد ماليه غير بلاده وناسه"💖
🌻🌻🌻🌻
بعد تلاته ايام...
الساعه الخامسه عصرا..
"صقع يامحمد"
محمد:لاصقع لاشي الجو قنين هي تحركي..
دعاء وهي تساوي في شاربتها:هيا ماما هيا والله تغيري جو..
جميله:باهي هي..
ومشت طلعت مع عمر ومحمد..
ودعاء طلعت وراهم وصكرت الباب..
لبست في رجليها كندرة حاطيه..
ومشت نزلت معاهم من الدروج وتوجهوا للسيارة..
ركب عمر من القدام...وجميله ودعاء من الخلف..
دعاء..
عاد عموري ولى راجل ماشاء الله طويل وعريض ويقرا في الأعدادي عيب يقعمز لتالي هههه..
ايه حقه الحمد لله اني بديت نلبس في الحجاب الشرعي عبايه واسعه وشاربه كبيره...يومها نذكر اني لبست عبايه سودا وشاربه بنفسجيه غامقه هلبه..اكيد مش حننسى شن لبست في هداكا اليوم بالذات..
🗝طلعوا من الحوش..
وبعد ماقطعوا مسافه لابأس بيها..
وصلوا لساحه كبيره فيها ألعاب كانت منظمه ومرتبه وشكلها ملك لأحد ما..
المهم..
حطهم محمد ومشي يجيب نتايج تحاليل الغده الدرقيه لجميله وعمر سايره..
اما دعاء وجميله بدوا يتمشوا مع بعض..
دعاء:ماما..
جميله:اممم..
دعاء:نبي نتعلم السواقه اقل شي نمشي ونجي للكليه من غير مايضطر بابا ياخد اذن من عمله بش يرفعني..
جميله:والله ياريت مادام بوك يمشي لعمله بسيارة خاصة بالخدمه انتي تتعلمي ع اللي قاعده في الحوش..
دعاء:معناها فكره كويسه!؟
جميله:اكيد من غير كلام..
ابتسمت دعاء بإرتياح..
وفاتوا هي وامها حدا كراسي وطاوله كانت مقعمزة عليها عيلة تانيه..
نجلاء هي تراقب في جمال كيف يمشي قالت:خايفه ندوي معاه في الموضوع يضايق...
عطاء:باهي لعند امتى بيقعد هكي عمره توا39سنه راهو!
رجاء:خلوه يبدا خدمه قبل..
نجلاء:حتى اني نقول هكي..
عطاء:باهي..
بعدين شبحت للآء وهي واقفه حدا الصغار وهما يلعبوا بالالعاب..
........
جميله بتعب:بنقعمز شويه..
دعاء:باهي ماما قعمزي هني اني بنكمل..وعطتها شيشة المية..
خدتها جميله وقعمزت..
اما دعاء كملت طريقها وهي اطلع في تليفونها بش تفتح اغنية لحمزة نمرة..
"احلم معايا"..
قعدت تمشي وتشبح للنقال ولما كملت وجت بترفع راسها تجيها خبطه ع جبهتها بمرفق شخص ما قريب افقدتها الوعي...
........
نجلاء:حيي جمال شن دار!!..
التفتوا خواتها شبحوا وين ماتشبح..
عطاء:شن دار للبنيه!!
نجلاء وهي تراقب في الموقف:كان يمشي ومركز ع تليفونه ماشفهاش..
رجاء:ياناري البنيه شكلها داخت..
وناضت رجاء طول بتمشيلهم....

....يتبع....