"إلا أن يشاء الله"

الجزء الرابع

✒..
صوت هاتف ارضي يرن في حوش "محمد سالم"
طلعت زوجته جميله من الكوجينه وهي تمسح في ايديها بالفوطه
وصلت في مكانه قامت السماعه وردت.
جميله:ايوه....وعليكم السلام.....عقدت حواجبها وقالت..ايه إن شاء الله خير!
⚘⚘⚘⚘⚘
في الجامعة..
كلية الهندسه "الكافتيريا"...
كانوا آيات واماني ودعاء واقفات يراجو في طلباتهم..
دعاء:اني مانبيكمش تندموا بعدين ننصح فيكم على خاطركم لكن انتم ماتحبوش من ينصحكم
آيات:كلامك مش قاعده يادعاء..
اماني:ايه مش قاعده..غير امال كانت واقفه معانا وقتها ماقدرتش نتكلم مسكينه شن جنت من الخطوبة التقليديه ماهو فالأخير قال اهلي جبروني عليها..
آيات:نموت ولانتزوج واحد يبوني اهله وهو لا..
دعاء :حتى كلامكم انتم مش قاعده لأن الموقف هدا يصير لوحده من عشره من اللي ينخطبوا تقليدي لكن العلاقات 1 من 1000 تصدف معاها وتم حكايتها بالزواج..أين اضمن قولولي ترا..
آيات وهي ماشيه للكاصه:كل حد ووجهة نظره..
اماني ربعت ايديها وقعدت تشبح لآيات وهي ساكته..
ودعاء توزع فنظرها عليهم هي مبتسمه بأسف..
وماكانتش تندري وقتها ان في حد واقف وراهم سمع حديثهم كامل وعجبه كلام دعاء هلبه..
دعاء..
هههههه..ايه عاد هديكا القصه ماننساهاش برغم انها مش طويله بس قعدت معلمه في ذاكرتي..
🗝كانت في وحده واقفه وراهم..
لما جو البنات بيمشوا وقفت قدامهم وقالت بإبتسامه..
:السلام عليكم..
ردوا عليها كلهم السلام..
هي ابتسمت وقالت لدعاء:معليشي نبيك شويه..
دعاء استغربت وقالت:ان شاء الله خير!
هي ضحكت وقالت:بإذن الله خير..غير شويه بس..وشبحت لصاحباتها وقالت..من بعد اذنكم..
آيات واماني ابتسموا بمجامله..
وآيات قالت:تلقينا في الساحه..
هزت دعاء راسها بإيجاب..
ومشوا البنات واماني تشوف لدعاء بنظرات غير مريحه..
دعاء:تفضلي..
:احمم والله شن بنقولك اني من بكري جايه للكافتيريا ومن اول ماشفتك خاشه لفتي نظري وعجبتيني لما سمعت كلامك مع البنات
دعاء ابتسمت وقالت:شكرا..
:والحق يعني اي ام ولااخت وين تشوف بنيه زيك جميله ماشاء الله ومتربيه صح مادابيها تاخدها لولدها ولا خوها..واني عندي خوي يبي يتزوج وانتي فيك كل المواصفات اللي يبيها..
دعاء رفعت حواجبها وقعدت ساكته..
:خوي استاد في كلية ****** اسمه***** *** اسألي عنه تعرفيه مشهور هلبه..
دعاء..
(ههههه) هو وقتها ماكانش مشهور زي توا..بس الحق تحمست للموضوع استاذ في هديكا الكليه واسمه مميز هكي تخيلته وهي تحكي طول بعرض وسيم قمحاوي زيها..وهي وصفاته وصف قريب من اللي تخيلته غير انه ماطلعش طويل هلبه..
وطلعنا من الكافتيريا وقعدت تهدرزلي على مواصفاته وع اهلها وع شن يحب خوها وشن يكره واني قليل مانرد عليها..
لعند ماسألتني سؤال استغربتله هلبه.
:انتي شعرك طويل وناعم ؟.
دعاء:ايه طويل لكن مش ناعم ناعم فيه اللويه..
ضحكت وقالت:هو اهم شي عنده الشعر الطويل والناعم..
غير خليني نشوفه ترا..
دعاء:وين بتشوفيه!؟
اشرتلي ع مكان بعيد شويه عن الزحمه وقالتلي:طلعهولي نشوفه حتى من اللوطا...
دعاء..
خفت الحق..وقلت مش حنخليها تمسه..
بعدنا شويه وطلعت شعري من لوطا وشافاته يدوب ابتسمت وقالتلي شعرتك ذهبيه قلتلها قبل كان اصفر وكل مانكبر لونه يتغير..المهم حسيتها معاش متحمسه زي ماكانت في البدايه وصلتها للواجهه سلمت عليا وقالت تو نولي مرة تانيه وندورك..
وعرفت من وقتها ان الموضوع ماصارش منه لأني شعري فيه اللويه وخوها الشخصيه المرموقه حاليا واللي يعرفه مايقول كان ماشاء الله عليه اهم المواصفات عنده فالمراة اللي بياخدها ان يكون شعرها ناعم وطويل غير هكي ماياخدش..
اني الحق توا وين نشوف الشخص هدا نضحك من قلبي لاني نعرف عنه حاجه اغلب الناس مايعرفوهاش...
🗝ولت دعاء لصاحباتها وحكتلهم اللي صار..
آيات:تسنيم تعرفه وقالت يشكروا فيه هلبه..
اماني بهزوة:عليك عقليه عنده استاذ***** وهكي يفكر..
دعاء وهي تاكل في البطاطا:حقه فالنهايه هو يبي مرته شعرها طويل وناعم..
اماني:مشنى لونه..ربي يعوضك خير منه حبيبتي..
دعاء تنهدت وقالت:والله حسني مليت وكبدي درهت من هالمواضيع..
ايات:انتي شن ريتي مازال ياما بيفوت على راسك..
دعاء كلت من البطاطا وهي تفكر بعدين حركت عيونها يمينها شافت رشاد خاطم وهو يشوفلها قعدوا يشبحوا لبعض لحظات لين هو ادرق وهي غيرت عيونها وشبحت للبنات وقلبها يدق بقوة..
فجأة..
"بخخخخخخخخ"
انخلعوا البنات وشافوا لمصدر الصوت..
بإندهاش ناضوا وعيطوا بصوت واحد:اكرااام..
واكرام تضحك..
وبدي السلام الحار بالأحضان وهما يتحمدولها بالسلامه ويباركوا..
بعدين قعمزت معاهم...
اماني:تفضلي كوكي..
اكرام:لالا والله ماخاطري صبايا..مالا وين امال وسكينه وريم؟.
اماني:ماجاهمش الباص اليوم قال عنده ظرف وريم عندها موعد..
اكرام بأسف:خساااارة اموله وسونا..
آيات:ياهي احكيلنا ع موضوعك كيف صار!!؟.
اكرام بضحكه:والله هكي سبحان الله تقول ربي كاتب لبوي يمرض بش نتلاقى اني وياه..
المهم ياحناتي كنت ماشيه لبابا زياره مع خوتي قعدنا نراجو قدام الدار متاعه لين يطلع الدكتور اللي كان عنده وقتها..
واني واقفه لاحظت واحد واقف من بعيد شويه عيونه عليا وخلاص..اني خشيت بعضي قدام خوتي..المهم ياحناتي خشينا لبابا الغرفه قعدنا مشوار وبعد طلعنا شفته واقف حدا دار بابا..وقف واحد من خوتي واني مشيت مع التاني ونسمع فيه يدوي ليبي فرحت..
اماني بضحكه:شورك حسيتيه نصيبك!
ضحكنا..
اكرام بضحكه:مش عارفه عجبني واستريحتله الحق والباقي تعرفوه..
آيات:كيف كانت اجواء الفضانيه؟
اكرام:الحمد لله كلها حلوة ..
دعاء:مواليد كم..
اكرام وهي تأشر بإيديها:75..
دعاء..
انصدمنا بس مابيناش قعدنا نسألوا فيها عنه عادي ومتأكده ان كل وحده فينا فكرت في الموضوع متاعي..باهي اللي عرفنا مواليده قبل نحكولها.
اكرام:باهي خليكم مني وقولولي شن جو اموله؟.
اماني:مهبيه معاش زي قبل بكل..
اكرام بحزن:باهي اللي قاعده عايشه كان اني متت وقتي..
دعاء بحزن:قاعده تقاوم مسكينه راهو..
آيات:وحني نحاولوا نساعدوها..
اكرام تنهدت وقالت؛ربي يعوضها خير وينتقم منه هو..
كلهم قالوا بصوت واحد:آمين..
اكرام ابتسمت ومررت نظرها عليهم وقالت:وانتم شنو مافيش جديد!
اماني:حني ع حطة ايدك الجديد كله عند الست دودي..
دعاء بضحكه:فرقة حالي وجديدي كلها مشاريع فاشله ومافي عليهم مانحكي..
اكرام بإبتسامه:ربي يبعتلكم نصيب يستاهلكم..
البنات بأصوات متقطعه:ان شاء الله..
شويه شبحت اكرام القدام وقالت:ماتغيرت انوار موليه تهبل..
ايات:هي من قبل حلوة غير ظالمه روحها..
اكرام:ايه صح...
🗝وبعد هالهدرزة...
خشوا داخل..
اكرام قعدت تجري على ايقاف قيدها لان عرسها فأخر شهر من القرايه..اما باقي البنات كملوا باقي ومحاضراتهم...
وفي نهاية الدوام
آيات روح بيها خوها..واكرام روحت مع اماني وريم فالباص
وكالعاده دعاء جاها بوها وروحت
🌻لما روحت..
وين خشت للحوش حست بشعور ضيق على قلبها..
خشت للكوجينه لقت امها تمسح فالغاز لما سلمت عليها امها ماردتش استغربت..
طلعت من حداها ومشت للدار..
لقت رويدا راقده وغامه روحها بالبطانيه..استغربت..
صكرت الباب وبدلت بعدين مشت للدار التانيه تبي تفهم شن في..
فتحتها..لقت مروة مقعمزة سرحانه..
ووفاق تبكي..
خافت صكرت الباب وقالت:خيركم شن صاير؟
مروة شبحتلها وقالت بخوف:حي علينا يادعاء حي..
الميه نزلت فركاب دعاء مشت قعمزت حداهم وقالت:شن في!!؟
فهالوقت..
بعد مابدل محمد حوايجه..
خش للحمام وطلع للمربوعه لقي غداه فيها صكر بابها وفتح التلفزيون ع الاخبار وعلا صوت وقعمز يتغدا..
وجميله بعد تاكدت انه خلاص لهي بحاجه..
مشت تجري للدار اللي فيها البنات بتحكي لدعاء..
انفتح الباب وطلعت دعاء وهي في قمة الغضب..
ومشت للدار التانيه وخواتها وامها وراها..
وصلت فرويدا وقعدت تخبط فيها وتقول بصوت غاضب لكن منخفض:شن مازال مادرتيه فينا ياحقيره شن مازال..وهي تخبط..
صكرت وفاق الباب..
جميله:دعاء خليها عطيتها ع راسها لين سدت المسخه..
دعاء شبحتلها وقالت:خنبه وشرطه يام!!
جميله:احمدي ربك اللي المديرة قنعت صاحب المحل انه يتنازل..كان هدا راهي ضاعت وضعنا فجرتها الكلبه..
ضربتها دعاء تاني وقالت؛ان شاء الله ترقدي معاد تنوضي..
جميله بقلق:قولولي كيف ندير الأبله قالت لازم نجي غدوة شن بنقول لبوكم..
مروة:زي ماقتلك ياماما قوليله مدايرين اجتماع بأمهات الطالبات وخلاص..
دعاء:وكان قال علاش؟
مروة:تقوله زي اجتماع الأباء دوة وخلاص..
دعاء:وبيقنعه كلام زي هدا؟
جميله وهي تفكر:تو نعرف كيف نقنعه..
دعاء..
قعدت نراقب في ملامح وجه امي كان اصفر وعيونها حمر جرتها باكيه وهي تحرك في ايديها لاحظت انهم يرعشوا..اه يارويدا ياوخيتي الله يسامحك وخلاص..
مر علينا هداكا اليوم وحني نتخيلوا لو الشرطه شدتها حق شن صار فينا..المشكله هي قعدت اليوم كله وهي حابسه روحها فالدار وخلاص...وبوي مالاحظ شي والحمد لله مؤيد مازال صغير مايدققش هلبه هداكا الوقت..
وفي عز همنا كملتها علينا شرقيه..
🗝دعاء كانت في الدار تقرا مع خواتها خش بوها وقال..
محمد:دعاء..
قامت عيونها وشبحتله..
محمد:تبيك عمتك شرقيه فالجنان..
دعاء استغربت وخافت لان وجه بوها ملخبط..
خافت هلبه لتكون شرقيه سمعت بمصيبة رويدا ولمحت بيها قدام بوها..
مشت دعاء طلعت وخواتها يشبحولها وهما خايفات..
وصلت دعاء برا طلعت للجنان اما بوها قعد فالحوش..
لقت شرقيه شاده مكنسه وتشوفلها من فوق لتحت..
وصلت فيها دعاء وقالت:نعم عمتي..
شرقيه بتهكم:عمتك! اللي يسمع يصدق..كاني حق عمتك راهو مادرتيش معاي هكي ودرقتي موضوعك عني وقلتوا لبوك انتي وامك مايتكلمش قدامي..لكن بنقولك رساله وصليها لأمك شرقيه جوها العشرات وهي ردتهم ماناخدش اي حد ولانلوح روحي تلويح تقول قالقين مني..وقوليلها فالنهايه كل حد ياخد ع قيس نيته..
ولفت ومشت وخلت دعاء واقفه فمكانها..
دعاء..
ماهمني من فتفتتها شي المهم ان موضوع رويدا ماعندهاش علم بيه..اما بابا هدا الله يهديه تعرف شرقيه كيف تجبد منه الدوة وتخليه يطلع اللي هناك..ماقدرش يتخلى عن هالعاده..
🗝ولت دعاء ولقت امها تراجي فيها ع نار..
حكتلها دعاء شن قالت شرقيه بالتفصيل..
جميله بتهكم:العتب ع بوك مش عليها المريضه هادي..
ولفت ومشت لدار النوم..
اما دعاء ولت لخواتها بش تحكيلهم اللي صار..
⚘⚘⚘⚘⚘⚘
فتح باب الحوش وخش..
وصكره وراه بقوة..
امه اللي كانت مقعمزة تراجي فيه انفجعت وناضتله طول..
صابرين:خيرهم عمامك فشن يبوك؟.
جمال بعصبيه:ع خوهم الصغير..
صابرين:وشن يبوك اديرله؟
جمال:قالوا تنازله ع المطعم اللي ف***** لأنه متشارك فيه مع بوك زمان..ايه تشاركوا وهو فضها وتوا معاش ليه حق فشي ع اي اساس نتنازله!
صابرين:وانت شن قتلهم..
جمال:لا..
صابرين بقلق:تنازله ولدي..
جمال ضيق عيونه وقال:شن هيا!؟
صابرين:اني اللي نعرفه عمك هدا الله يكفينا شره مرات يدير فيك ولافخواتك حاجه والله مافيه خير ولاأمان مش زمان حرق معرض السيارات وخسر بوك خسارة كبيره قريب راح فيها بوك وقتها..خوه ودار فيه هكي مالا انتم شن يدير فيكم.
جمال:مايقدر يدير شي..بوي زمان ماقدرش يحط خوه فالحبس لكن اني نحطه عادي..
صابرين بخوف:شن بدير!!
جمال ضمها ليه وقال:امي انتي ماتتخممي فشي اني نعرف نتصرف..هي تعالي معاي..
امه مشت معاه وهي خايفه وتقول:ربي يكفيك شره ياولدي..
باس راسها وقال:ايوه اقعدي ادعي بس وبإذن الله مايوصل فينا شي..
وركبوا هو وامه فوق..
⚘⚘⚘⚘⚘
"حي عليا واخد عليها!!"
:ماتخبطيش على وجهك..
منال بصدمه:كيف ماتبنيش نخبط ياماما! كان عمي حق يطلع واخد على نجلاء معناها اني وجمال خلاص!
امها:صدقيني ماصايرة حاجه ونجلاء تموت ولاتطلق..
منال:مش كان تحملاته ع تفاهته وعينه الزايعه السنين هادي كلها تتحمل انه واخد عليها!
امها:لا حبيبتي تتحمل تتحمل وهو اصلا مايقدرش يخليها راهو عمك يحبها يموت فيها وماتزوج الا ع خاطر الصغار اكيد مش حيقعد على عيلين عمره كله..
منال بقلق: حي عليا والله بنموت من الخوف..تعرفي ياماما لو سيبني جمال بسبب عمي الاناني هدا عمري كله مش حنسامحه النسونجي المعفن..
امها عقدت حواحبها وقالت:تحشمي عمك هدا ياقرده..
ناضت منال وهي معصبه قال:عمام زي هكي مانبيهم..
ومشت ركبت لدارها..
امها مطت شورابها بملل بعدين قالت:احسن مادار كسر خشمها بنت ***** اللي تحساب ربي ماخلق كان هي..
⚘⚘⚘⚘⚘⚘
تاني يوم..
مشت جميله من الصبح معاهم للمدرسه..
ورويدا كانت صايمه عن الكلام بمعني الكلمه واداري فوجهها عن عيون اهلها وخلاص مخزيه من اللي داراته ومش قادره تسامح نفسها اللي بتحط امها في موقف فضيع زي هدا..
جميله:بعد نكملوا نتصل بيك..
محمد هز راسه..
ونزلوا جميله ورويدا...ودعاء تشبحلهم من الروشن وقلبها واجعها على امها..
نزل مؤيد وركب من القدام في مكان امه وتحرك طول..
..........
الساعه 8:45 في حجرة الإداره..
المديره:اني قلت حننقل ملفاتهم لمدارس تانيه وفعلا نقلت امنه وهاله لكن رويدا لا بعد كلمتك امس..شهادة مدرساتها فيها وحتى الأخصائية خلتني نعطيها فرصة تانيه تقعد في مدرستنا هني لين تكمل السنه..لكن السنه الجايه مش حنقبلها هني.
جميله شبحت لدعاء لقتها منزله راسها وعيونها يدمعوا..
رجعت شافت للمديرة ووجهها منسود من عملة بنتها قالت:بارك الله فيك ياأبله..
المديرة:فيك بارك الله ونصيحه يااختي راقبي بنتك كويس راقبي تصرفاتها ماتخلولهمش الحبل ع الغارب لين يجيوبلكم مصايب ماتترقعش وفضايح ماتنلمش حني هني عندنا دور وانتم عندكم الدور الاكبر..
جميله هزت راسها وقالت:ان شاء الله ان شاء الله..
دعاء..
حكتلي ماما انها تمنت تموت ولاانحطت في هداكا الموقف حست روحها انها ماتسوى شي قدام المديره ولاعرفت ادافع عن نفسها وهي اللي تعبت فربايتنا وتعلمينا الصح من الغلط..
خي ع الموقف اللي حطت فيه رويدا امي..
⚘والله اعلم يادعاء قداش بنت حطت امها وبوها في مواقف افضع من هادي..⚘
🗝اللي صار خلا رويدا تكره نفسها وتكره كل تصرفاتها الغلط اللي دارتها...
بالذات بعد ماامها روحت وهي مشت خشت للفصل النظرات اللي حاوطتها خلتها تمنت الأرض تنشق وتبلعها تمنت لو يرجع الزمان بيها ماكانتش دارت اي حاجه غلط من اللي دارتهم..
وزادتها الأبله متاع الدين في اخر الحصه لما قالت..
"البنت زي الورقه البيضا لو ناشتها بقعة حبر خلاص معاش تنظف..زي المرشه لو انشقت خلاص معاش ترجع زي قبل..راس مال اي بنت سمعتها واللي تخسر سمعتها تخسر كل شي"
وهالكلام قعد يرن فودان رويدا هلبه وهي تتفكر في وجه امها كيف كان شكله قدام المديره..
وفي نفس الوقت حمدت ربي ان الحكايه انتهت على هكي وربي نجاها من فضيحه كبيره...
وين جي وقت نهاية الدوام..
جاها الباص وطلعتله وين جت بتركب شافت صاحب المحل واقف قدامه وهو حاط ايديه فجيوب سرواله ويشبحلها..
هي خافت منه هلبه...ركبت..
وجت جهة الروشن شبحتله لقاته مازال يشوفلها غيرت عيونها عنه وهي ترعش..
ومشي الباص وعيون صاحب المحل معاه..
⚘⚘⚘⚘⚘
فالكليه..
ركبت دعاء الدور التاني بتقرا..
البنات كلهم بين اللي عندها موعد واللي خاشات لمحاضرات هي مش معاهم فيها..
وصلت لقاعه فاضيه بتقرا فيها تفاجئت وين شافت في اخر الممر رشاد واقف مع خطيبته شبحتله من فوق لتحت وخشت..
رشاد بضيق:تس..
فدوى:خيرك..
رشاد شبحلها وقال:هي خلاص ولي لكليتك عطلتي..
فدوى بصدمه:كيف قصدك تلز فيا!
رشاد:تس..يافدوى فكينا من الجو اللي ديري فيه اني مانبيش الكل يشوفك واقفه معاي بالساعات حتى لو كنتي خطيبتي..
فدوى هزت راسها وهي مضايقه وقالت:باهي..
لبس نظاراته وقال:هي انزلي..
فدوى لبست شنطتها ومشت للدروج..نزلت وهو نزل وراها..
🗝كان يبي يمللها ويفددها منه بش تسيبه وكان مانفعش هو اللي حيسيبها خلاص معاش يبيها ورسمي دعاء استحوذت على كل تفكيره..
دعاء..
ماتفهني اني وحركاتي غير علاش شبحتله هكي بس..وين نذكر في حركاتي الغبيه هادي نكره روحي..حركات تلقائيه تطلع بروحها وماعرفتش علاش..خلاص مفروض نطلعه من راسي الراجل خاطب خاااطب خيرني مانفهمش..
وياريتني فهمت وقتها وبطلت تفكير فيه..
🌻🌻🌻🌻🌻
وعدت الأيام..
وخشت سنه 2010..
ومعاها الامتحانات..امتحنوا الطلبه كلهم تعليم عالي ومتوسط واعدادي وابتدائي مع الاختلاف فالتواريخ..
وفاق ومروة قريب كلوا كتاباتهم ماكله..
وعاد مروة شهاده اعداديه شاده بإيديها وسنونها..
اما رويدا اللي كانوا كلهم مقاطيعنها امها وخواتها..
انشغلت انشغال تام بقرايتها وبس كل همها انها تنجح نجاح باهر يخلي امها ترجع ترضى عليها مرة تانيه..
اما دعاء..فكذلك لهت بقرايتها هي وصاحباتها واسكتردت رشاد بالمرة وهو لما يشوفها كيف رافعة خشمها عليه ومتجاهلاته يزيد يهبل عليها..وين ماتمشي يلحقها بدون متلاحظ ولو وقفت في مكان هو فيه يقعد فمكانه مايتحركش عيونه عليها وبس...
وهي ظاهريا تتجاهل فيه بس من داخل كانت مشاعرها تتحرك بقوة اتجاهه وهي تحس بوجوده حواليها..
ومش بس هي اللي ملاحظه تصرفات رشاد حتى سكينه بدت مركزة عليه ومستغربه في حاله شن يبي من دعاء وهو خاطب غيرها..!
⚘⚘⚘⚘⚘
بينما الحياة عند جمال كانت مليانه بالأحداث بعد مابلغ ع عمه وشدوه بالجرم المشهود وهو يمارس فالقمار..
عمامه كلهم عرفوا ان جمال وراها..وجوه للحوش تعاركوا هما وياه وانتهت العركه بالمقاطعه..
مااهتمش هلبه جمال لقرارهم المقاطعه لان عمامه من لما كان بوه حي وهما بعاد عنهم..
لكن امه كانت خايفه هلبه وقلبها مش مرتاح..
🌻🌻🌻🌻
في اخر يوم فالمدرسه قبل عطلة نص السنه..
رويدا كانت مقعمزة تراجي في الباص..
وباب المدرسه مفتوح ع مصرعيه..
شويه جتها بنيه في عمر 8 سنوات لابسه قرمبيول وشنطه
خاشه للمدرسه وجتها طول..
البنيه:انتي اسمك رويدا..
رويدا بإستغراب:ايه اني..
البنيه حولت شنطتها وطلعت منها كيسة هديه ومدتهالها وقالت:خودي من عمو رائد..
خدتها رويدا وهي مستغربه هلبه..
والبنيه مشت تجري..
رويدا وقفت وهي تنادي فيها:وين مشيتي تعااالي!..
جت بتلحقها لقت ابله تنظم فالصغار للطابور..
تأففت بضيق بعدين التفتت للباب وشافت برا..
لقت صاحب المحل واقف ويشوفلها بإبتسامة..
هي طارتلها..رفعت حاجبها وولت قعمزت في مكانها وهي تهز فرجلها..
ع جية الباص..
طلعتله تجري وقفت ع باب السواق وقالت:لحظه وجايه..
السواق:تمام..
لفت ومشت تجري لجهة المحل وصاحبه يشوفلها.
فاتاته وخشت داخل..
هو طول لحقها..
حطت الكيسه ع الكاصه بعصبيه واللي يخدم معاه يشوفلها..
ولفت لصاحب المحل وقالت بغل:تعاودها مرة تانيه اني اللي نبلغ فيك حق مش بلعاني فاهم..
هو قعد يشوفلها بإعجاب وخلاص..
هي فاتت من  حداه وطلعت وهو طلع وراها..
صاحبه ضحك وقال:طاح بكبده..
برا..
قعد واقف وهو يشوفلها كيف ركبت الباص وتحرك طول..
هو خبط بقبضة يده اليمين ع كفه اليسار بقوة وولى للمحل..
⚘⚘⚘⚘⚘
قدام واجهة كلية الهندسه..
اماني:بينانتا الو وارضي..
ضحكوا البنات..
سلموا اماني وريم ع البنات ومشوا مع بعض للباص..
رن تليفون امال..
امال:هند ترن ..هيا سونا..
سكينه:هي..وسلموا ع ايات ودعاء ومشوا مع بعض..
وقعدوا دعاء وآيات..
دعاء:غريبه اليوم ماجاش منذر..
آيات بضيق:خلاص سيبنا..
دعاء بصدمه:كيف!!امتى؟!
آيات:هو تغير هلبه معاش ولى يدور ولايهتم زي قبل حسيته يبي يسيب خليتها تجي مني وهو بكل بساطه قالي ع راحتك معرفة خير...
دعاء بإزدراء:واطي والله مايستاهلك..
آيات بضحكه متهكمه:شكله عندك حق يادودي..
دعاء شبحتلها بحزن..
شويه رن تليفون آيات..
شافاته وقالت:خوي جي..
ضموا بعض هي ودعاء هلبه..
بعدين بعدوا عن بعض ودعاء قالت:خليك قوية زي مانعرفك..
ضحكت آيات من بين دموعها وغمزت لدعاء ولفت ومشت لسيارة خوها..
ودعاء قعدت واقفه بروحها تراجي في بوها..
ع طلعة رشاد وصاحبه..لما شافها قال..
رشاد بصوت منخفض:خليك هني شويه..
امين تنهد بملل وقعد يشبح لدعاء بكره..
ودعاء كانت سرحانه ماركزتش عليهم..
شويه في شباب طلعوا وقفوا ع رشاد وصاحبه وقعدوا يهدرزوا...ورشاد بش يلفت انتباهها علا صوته وهو يتكلم..
هي استاقظت وشبحتلهم.
جو عيونها فعيونه..
قعد يشوفلها ويتكلم..
وهي عقدت حواجبها وغيرت مكانها وبعدت عنهم..
دعاء..
عاجبني ونتمناه صح..بس نقطة انه خاطب ويدير في تصرفات كانت واضحه لفت نظر مش توهم مني مخلييني نافره منه..
شويه رن تليفونها قاماته وردت:ايوه بابا..
"تعاليلي حدا الزراعه"
دعاء:باهي..
وصكرت ومشت طول وعيون رشاد معاها
......
في الطريق..
امين:ماتقعدش تلعب يارشاد انت مش هكي حدد موقفك وخود قرار..
رشاد وهو عاقد حواجبه:خديته وفات خلاص..
امين:شن هو!!؟
.........
في داره
بالهاتف
رشاد بعصبيه:اني معاش نتحمل الوضع هدا نقان ليل نهار وغيره فارغه وطبان كل يوم فالكليه لين خليتيني نكرهك..
فدوى ببكي وغضب:اني اللي فديت وعييت اني اللي كرهتك ومعاش نبيك خلاص..رشاد من الاخير نبي نفسخ..
رشاد:هدا احسن شي ليا وليك وغدوة ان شاء الله تو نمشي لأهلك ونفضها كيف ماخطبتك منهم ننهيها معاهم..
🌻🌻🌻
وفسخ رشاد خطبته..
وكسر قلب بنيه حبه بصدق..
اهله احترموا قراره وماادخلوش فيه..واهلها احترموا جيته ليهم للحوش وشرح اسباب فسخ الخطوبه بدون مايعيب فيها بالعكس شكرها هلبه وقال انهم مااتفقوش وخلاص..
وهي مسكينه صارت فيها حاله لدرجة انها تعبت وخشت المستشفى وهني اهلها حسوا ان رشاد هو اللي يبي يسيب مش بنتهم..
⚘بعد مرور عشرة أيام..
في جنان حوش اهل منال..
كانوا مقعمزين ع الكراسي حدا بعض وقدامهم طاوله..
جمال:عمري خلاص سادك بكي..الله غالب هدا نصيبها..
منال ببكي؛هو الحقير والواطي والله مايستاهل ظفرها النذل..
جمال:تمام هو اللي ماينفعش بإذن الله يجيها خير منه..
منال:وسيد سيده الوضيع هدا
جمال ضحك وقال:سيد سيده..رفع حاجبه وقال..اممم..شن رايك نخبطها اني..
قامت تليفونها زعميتها بتضربه بيه..
جمال بضحكه:صاحبتك هادي مسكينه مجروحه خل نداويها ونكسبوا فيها اجر وبالمرة تقعد معاك لاخر العمر..
قرصاته من ذراعه..
هو صكر فمه بقوة ووجهه تعكرش من الوجع:اممم..امم..خلاص..ههههه..خلاص..
طلقاته وهي عاقده حواجبها وتساوي في وشاحها وهو يضحك عليها ويتحسس فذراعه..
⚘⚘⚘⚘⚘
كانوا ملمومين في حوش جد دعاء..
جميله مشت هي والبنات غصب عنها ع خاطر محمد..
وتحملوا التلقيح وتطنيش..وقعدوا دابهم وداب مرت علاء وخلاص..
في الصاله ملمومين ع عالة الشاهي اللي كانت ادير فيها حناهم..
ام نصري قالت لبنت خوها امل:اموله وين ماشيه ببطنك!
امل:والله معاد عرفت شن نديرلها عمتي من لما جبت رنيم وهي هكي..
ليلى امها:لالا نقصت عن قبل..
ام نصري:غير قولي الحق اموله باك دايرتيها مرة تانيه..
شبحتلها شرقيه..
امل:لا والله العظيم ياعمتو لا وكاني حامل نقولها ماعندي علاش ندس ولاعندي فيه جو الدسان والخبث اني..
جميله وجهها تغير..
ودعاء وخواتها طنشوا..
ازدهار:مش عارفه علاش الناس ادس في حاجات زي هادي ماهو سيورها بتطلع!
شرقيه:اييه يابنية خوي هدا من سواد النيه والنيه سودا تولي على صاحبها تولي..
ازدهار:صدقتي..
امل:ربي يجعل نيتنا ديما صافيه يارب..
شرقيه:آمين..
دعاء..
انتم وين وصفا النيه وين..وبعدين اي حد يبي يقضي حاجة ليه من حقه يكتمها لين اتم وهدا من السنه النبويه..وتاني شي حنى شرقيه دسينا عليها لأننا عارفينها حدير حاجه تفركس بيها الموضوع مش اول مرة اديرها..
🗝شويه..
وخشوا عليهم الولاد..
ابراهيم ونصري وزوز من ولاد العيله..
نصري وابراهيم لما خشوا شبحوا لرويدا..
ورويدا لاهيه مع مرت عمها ويهدرزوا..
امل تغني:ع العالي عالي اني يانجي خوي اني..اللهم بارك راح راجل حبيبي..
شرقيه:سلمه حبيب عمته غير امتى نهيجوا في عرسه..
ابراهيم وهو يحرك فيده:مازاااال..
ازدهار:ايه خلوه يعيش سنه لاحق عليه الزواج..
ابراهيم:تبنيش نتزوج قبلك عارفك..
ضحكوا..
ازدهار بضحكه؛صدقت فيها ياحيوان..
وشرقيه تضحك بالسيف..
عمة البنات:تعالي رويدا بنت فرقي الشاهي..
ناضت رويدا وابراهيم يشوفلها من تحت لتحت..
خدت الصفره من عمتها وبدت تفرق ع حناها الاولى وكملت للباقي..
لين وصلت في الولاد..
ودعاء وخواتها يشبحولها..
مدتلهم ووصلت في ابراهيم..
كانت تبان عاديه جداولامهتمه لأمره وهو يشبحلها..
جت لنصري وقالت بضحكه:الحمرا هديكا..
ضحك نصري وخداها وقال :صحيتي..
وابراهيم يشبحلهم الزوز وحاجبه مرفوع..
هي ولت بالصفرة لعمتها..وولت لمكانها..
عمتهم اللي دير فالعاله:دعاء قداش مازالك بنتي..
دعاء:سنتين ونص بالراحه..
عمتها ابتسمت وقالت:بالتوفيق..
وشرقيه توزع فنظرها على اختها ودعاء وهي رافعه حاجبها...
⚘⚘⚘⚘⚘
الساعه 9:00ليلا..
شوفيه ماما كيف يبي يوقف بروحه..
صابرين:نجيه ياربي صكر السنه ولا؟..
رجاء بإبتسامه:ايه...
شويه وسمعوا صوت جمال نازل بسرعه من فوق وهو يلبس في كبوطه..
صابرين ورجاء استغربوا..
صابرين:بتطلع جمال..
وقف جمال وشبحلهم وجهه في لون تاني شبح لاخته وهو يقول:في واحد عاطيه موعد ونسيته..هي سلام..
ومشي بسرعه للباب فتحه وطلع وصكره وراه..
صابرين بضيق:ياريتني جبت معاه وليد تاني راهو عاونه الله غالب..
ورجاء سرحانه تفكر وقلبها مقبوض..
.........
نزل جمال من سيارته وخش للمستشفى وهو يجري..
سأل الإستعلامات وركب فوق بسرعه..
وين وصل للمكان المقصود..
لقي ضباط واقفين قدام غرفه العمليات منهم اللي يبكي ومنهم المتأثر..
بلع ريقه وقال:شن في منصور!؟
واحد منهم قاله؛تقربله..
جمال:نسيبي..
الضابط:عظم الله اجرك توفى تحت العمليه..

....يتبع....