لـو غـيمت دنيـاي

البـارت الرابـع عشـر💚

#لـو_غــيّمت_دنـياي

#البارت_الرابع_عشر

#للكاتبة_زهراء_المظفر

___________________________________

ضغطوا على النجمة البرتقالية 🧡✨

قبل لا تبدون بالبارت لا تنسون تصلون على النبي

ـ اللهم صلِ على محمد وآل محمد 🧡"

قناة التلكرام ننشر بيها تغشوشات من البارتات الجديدة اسمها ( لو غيمت دنياي) حياكم الله❤️
__________________________________

يكول مظفر ..
گلبي أتلوّع أتلوّع بعد ميطيب !

.....

زينه

كاعده بحديقة البيت جوه فياي سدرة النبك وصوت العصافير منطي للجو جو ثاني كلش حلوو

انظف باگات الخضرة للغده وبين مااني كاعده بالي مو يمي ...

بالي يسرح ويتذكر حياتي شلون صارت من بعد 5 اشهر من زواجي وشلون تعودت على البيت ورافد ووجوده بحياتي الي مااكدر استغني عنه صرت احبه احب صوته من يحاجيني ، و يعلمني ويفهمني احسه هو امي الثانيه بحنيته وتفهمه وكلشي بي يعجبني

مرات نتعارك بس عركتنه عباره عن هو يحاسبني واني ابقه ساكته لان اسلوبه يجبر الواحد يسكت ويحس بالذنب الحمدلله ماعدنه مشاكل هواي اكثرها نقاشات عاديه واصلا مو عركات بس اني اذا حجه عليه بكلمه احسها عركه وازعل وابقه ابجي

بهاي ال3 اشهر رحت لبيت اهلي كم مره واخذني رافد لامي اكثر من مره كل مايحس بيه ضايجه لو مليت من البيت ياخذني يم امي ويطلع يدور اله شغله يشتغلها لان بس هو المعين للبيت وشغل ماكو

عمتي ما تتتعااااشر ابد متحملتها لخاطر رافد جنت اكول عن بيبي شديده وي امي طلعت عمتي اكثر منها بقاطات كلشي مايعجبها وعلى كلشي تحجي مثلا جاي اغسل ملابس تجي سوي هيج خلي هيج كومي شريهن كومي دخليهن تحسسني اني كلشي ماكو

لو اذا جاي اطبخ تجي خلي ملح خلي بهارات ككصي بصل تثبرني ثبر وتخليني اتيه دربي تحجيهم كلهن سوه وتخليني محتاره بزماني واني طبعي كلش انزعج من الي يحسسني اني كلشي ماكو وكلشي ماافهم

ماتحب تشوفني كاعده تريدني 24ساعه افتر بالبيت حتى من يجي رافد من شغله تدك الباب زينه تعاي اطلع يمها تستلمني رزايل بيوم من الايام .....

بيوم جان طالع بي رافد من الصبح مارجع الا المغرب ..اني اتعمد اخلص كل شغلي قبل لا يجي لان اضوج بدونه واتمنى بس يجي حتى اكعد يمه نسولف ونحجي يحجيلي عن يومه واحجيله شنو سويت بهاليوم

احضر اله اكل وانتظره يجي حتى ناكل سوه ...ماجنت احب اكل اذا هو مو بالبيت ادري بي ماياكل بره ويجي هلكان جوع فـ اني وياه
حالي من حاله