لـو غـيمت دنيـاي

مشهد

مشهد من المستقبل ..

#لـو_غــيمت_دنـياي

#للكاتبة_زهراء_المظفر

___________________________________

كاعدة وغيم بحظني تناغني وصوتها مالي الغرفه

فرحتي بيها وبرجعتها لحظني بالسلامه تعادل الدنيا وما بيها

بحركات عشوائيه منها جانت تدفع ايدي عنها بأيديها ورجلها

رفعت وجهي عنها وصارت عيوني بعيونه من صاح بصوت عالي  " الله اكبر "

تنهدت بضيق واني اشوف ملامح وجهة تعبانه
صار اله يومين وهو مو على بعضه

تعبان والوجه اصفر وشاحب والكبر مبين عليه
وتجاعيد وجهة برزت اكثر

نزلت غيم من حظني بكل هدوء وخليتها بنص الفراش .. سحبت المخدات وخليتهن على جوانبها اخاف تنكلب

تمشيت بخطوات هادئه وكعدت يمه ..

رفع  ايده اليسرى وبده يسبح وهو يخلي ابهامه ع الخطوط الي تقسم اصابعه لثلاث اقسام  .. 

وشقوق الجلد كأنها ارض صحراويه متعشطه لقطرة الماي جانت تغزو كل سانتيمتر بكف أيده وتنطيها منظر متعرج

كل تعرج ، كل انعواج وانحدار بالجلد بي قصه وحادث خلته يكون بهاي الهيئه

خليت ايدي بأيده اليمنى الي جان مستند عليها بتعب .. خليت كل ثكل جسمه على ايدي

امتزجت اصابعي بين أصابعه الخشنة الملمس

كام من مكانه وكال وهو يسحب نفسه بضيق وتعب يادوب كمل كلمته..

ـ عطشان ..

كمت من مكاني بسرعه وكلت واني امشي بخطوات اسرع من خطواته

ـ تدلل هسه اجيب الك

خله ايده الضخمه ع كتفي وهو يكول ..
- لا خليج انا اريد امشي رجيلاتي شوي

جنت ناويه ما خليه يطلع من البيت وهو بهذا الحال التعبان لولا غيم الي بدت تبجي

طلع من يمي واني توجهت لغيم نيمتها بحظني وبديت الوليلها بصوت خافت ..

دللول يالولد يبني دللول

عدوك عليل وساكن الجول

أنه من أگول يمة يموت گلبي والله يمه

يمه… يحگلي لاصير دلي

ترة …أطلگ الدنية و اولي

يمة… على ظليمتي من دون حلي

يمة.. هب الهوى واندكت الباب

حسبالي يايمة خشت احباب

اثاري الهوى والباب كذاب

خوية ما اريد من جدرك غموس

والله يايمة ترة ولا اريد من جيبك فلوس

يا ابني يالولد يا ابني يمة

يمة…ترة ابني واريد إرباي منه

يمه… جبتيني للضيم يا حبيبة يا يمة

بدت غيم تغفي واني رحت لمكان بعيد بتفكيري ودمعتي الي نزلت واني اتذكر هالكلمات بصوت امي الدافي بأيام الشتا ونلتم اني وخواتي داير مداير الصوبه الي لونها اخضر فااااتح حيل والاله تضوي النه عتمة الليل ومن نكعد الصبح نشوف خشومتنه صايره سود من الدخان

رحت بذاكرتي لـ( لو غيمت دنياي )

رحت بذاكرتي لاصواتنه اني وخواتي الممزوجه ببعض واحنه نغنيها

رحت بسفرة طويله ومتعبه ، رحت بيها لأيام الضحكه والسالفة المشتركه بين 8 خوات ..

للدجاج و الوز والزرع ، للبساتين وشجرة الرمان الي احتفظت بكل اسرارنه  ..

واستقريت بذكرياتي يم حمد ..

ابتسمت بخجل بيني وبين نفسي ومسحت دمعتي ..
ـ صرت اكول حمد مثلهم .. لهجتي جاي تصير مثل لهجتهم ، ودائما اكول كلماتهم بدون قصد

احنيت رقبتي ع غيم وبستها بخدها واني اكلها ..

_ هلا والله ومسهلا ببنت الشيوخ والمضايف بنت الدلة والفنجان ياحبة عين امك انتي  ..

نزلتها عن حظني وخليتها ع الفراش وثبتت المخدات على جوانبها

طلعت من الغرفة .. مديت عيني ع حيدر تراقبه وهو يلعب وي الجهال ..

تأكدت من الغده كله كامل ماناقص غير يجي حمد

حسيت بي تأخر بره هو الحبْ (او الزير عبارة عن فخار يستخدمونه قبل يحفظون بي الماي )

جان موجود وره البيت ما المفروض يتأخر هالكد

طلعت من البيت ورحت بخطواتي باتجاه الزير ..

رغم مساحة بيتنه  مو جبيرة بس حسيت بي صار كلش جبير والمسافه جاي تزيد ما تنقص

تقربت اكثر واكثر ..
اول ما خلصت زوايا البيت درت وجان اشوف شي ماكدرت استوعبه

انجن جنوني وصرت أركض بسرعه خياليه ...

__________________________________

رواية حقيقيه جديدة
راح نعيش بيها 8 قصص مختلفه ل8 اخوات

نرجع بيها لثمانينات القرن الماضي

نرجع بيها لزمن اجدانا ونشوف حياتهم

نرجع لزمن الراديو والاغاني الي نسمعها هسة ونكول ياريتنه جنه بهذاك الزمن
لـكريم منصور ورضا الخياط حسين نعمة وياس خضر  وقحطان العطار

الرواية راح تنسرد بـأكثر من لسان لكثرة ابطالها 

رواية راح نعيش بيها معنى الاية الكريمة
" وإذا الموؤدة سئلت بأي ذنب قتلت "

صدق الله العلي العظيم

انتظروني بالايام القادمة بروايتي الجديدة

اختكم زهراء المظفر 💙