هند : شوف يا محمد انا تاني ما بسألك ولا بقول ليك جاي تتقدم لي متين ... انا انتظرتك كتير وانت كل مرة بتقول لي دا ما الوكت المناسب عشان تكلم ابوك ....
محمد : انا ما عارف انتي شفقانة ل شنو ؟؟...علاقتنا يادوب ليها سنة ..
هند : يعني انت شايف السنة دي ما كتيرة ؟؟؟... دا كلو محسوب من عمري انا يا محمد ... انا حاسة بانك قاعد تلعب بي وعايز تقضي بي زمن بس…
محمد : اقضي بيكي زمن شنو يا بت الناس ...هسي انا مقصر منك ف حاجة ؟؟؟...مش اي حاجة قاعدة تطلبيها انا بجيبها ليكي ؟؟؟...
هند : المشكلة انو الخطاب بتقدمو الي وانا قاعدة ارفضهم عشانك وانت ولا بهمك ...وابوي كمان ضاغط علي لانو انا كل مرة برفض بدون سيب وقال لي لو جا زول تاني اتقدم لي ح يوافق طوالي من غير ما يشاورني ...
محمد : ياخ انتي ما فاهمة حاجة ...انا قلت ليكي عندي برنامج عايز اتمو قبل ما نعرس ....
هند : وبرنامجك دا شنو طيب ؟؟؟...
محمد : عايز ابني القطعة حقتنا واعمل لي مشروع خاص بي عشان اامن مستقبلنا...
هند : طيب انت عندك قروش ...خلينا نتزوج اول وبعدين اعمل الفي راسك ....
محمد : القروش العندي دي انا ما عايز المسها دي خليها ل قدام ...بس عايز اجازف من الحاج قروش ب اي طريقة ....
هند : ومنتظر شنو ؟؟... مش انت قلت اسرار ابوك كلها عندك ؟؟؟...
محمد : ما قلتا ليكي عندي ... قلتا ليكي عارف ممتلكاتو كلها لكن ابوي خاتي القروش والورق في خزنة والمفتاح عندو هو بس حتى انا ما قاعد يديني ليهو ....
هند : طيب والحل شنو ؟؟....اليومين ديل امي كمان قايمة علي وبتسالني زولك دا ح يجي يتقدم ليكي متين ....احسن خلينا نعرس عشان اكون جنبك واقدر اساعدك ....
محمد : انتي عارفة لو اتزوجنا ف الوكت دا معناهو ح ااجر ليكي ونسكن بعيد من البيت لانو دا طلبك ...ولو سكنا بعيد من البيت معناهو م ح اكون عارف تصرفات الحاج ف البيت ...يعني ممكن العملتو دا كلو يتهدا وشقى عمري ح يضيع ساي ...
هند : خلاص ما مشكلة خلينا نسكن في البيت الكبير مع اهلك عشان تكون قريب من الحاج وتكون عارف كل تصرفانو وتحركاتو ....
محمد : طيب انتظري يومين تلاتة نبيع المحاصيل الفي المخزن وبعد داك بكلم الحاج ف موضوع الزواج دا ....
هند : بس ما تطول يا محمد ....
محمد : لا لا ما تخافي ..... يلا ارح نوصلك عشان ارجع للحاج ....
هند : يلا ....
محمد وهند طلعو من المطعم بعد دفع وكان مطعم راقي ...وركبو العربية بوكسي موديل 96 وماشي يوصل هند…
هند : بعدين يا محمد لازم تغير العربية دي ... شوف لينا عربية صالون كدا جديدة...
محمد : اصلا دا كلو ح يحصل بس انا بحب البكاسي ...وكمان دا حق الحاج ما حقي انا…
هند : ما مشكلة بس جيب لينا بوكس تاني ..لانو حق ابوك دا دقة قديمة وريحتو ناس زمان ناس زمان ...
محمد : خليني بس اتم الفهم الفي راسي دا واوعدك ح اجيب ليكي بوكس موديل السنة ....
اها محمد وصل شارع ناس هند ووقف بعيد من بيتهم ...
محمد : يلا انزلي عشان انا اتأخرتا على الحاج ...
هند ما عايزة تنزل ...
محمد : يلا يا هندوية… ولا تمشي معاي ؟؟...
هند : يعني ما ناسي حاجة يا محمد ؟؟؟...
محمد : شنو ؟؟؟...
هند : عايزة قروش ...
محمد : يا بت الناس قبل يومين مش اديتك 10 الف ...متين لحقتي كملتيهم ؟؟؟...
هند ب زعل : خلاص ما عايزة يا محمد ...انت كل ما اقول ليك عايزة قروش بتقعد تحقق معاي ...والكلام دا انا ما بنفع معاي...
محمد : ياخ ما حكاية احقق معاكي لكن انتي بتودي القروش دي وين ؟؟؟...
هند : انت ناسي انا بت عز وابوي منو يا محمد ؟؟؟ ...
محمد باستهتار : بت عز !!!..الكلام دا كان زمان يا منقة… ابوكي هسي بقى ع الحديدة…
هند : انت بتستهتر ب بابا يا محمد ؟؟؟…
محمد : م حكاية بستهتر ب ابوكي… لكن انتي كمان ما تركبي مكنة غير مكنتك…عيشي واقعك يا شيخة…
هند ب زعل : انا واقعي كدا ولحدي ما انت عرفتني بابا كان معيشني ملكة لغاية م اتخرجتا من الجامعة… انت براك حميتني من الشغل وقلتا بتتكفل بمصاريفي ... ولو ما بتقدر علي مصاريفي انا عفيتك منها خليني براي بتصرف .... بس تاني لا تجيني و لا تتصل علي والافضل انو ننفصل يا محمد…
محمد : اها قمتي ل حركاتك ؟؟...
هند ب زعل : ما حركات ولا اي شي ..انت شكلك نسيت الحاجات الوعدتني بيها وانك مسؤول من كل احتياجاتي وح تعيشني ف نفس الوضع الكان بابا معيشني فيهو و…
محمد قاطعها : خلاص خلاص عليكي الله فكيني من السيرة دي ....لانك ح تخلقي لي برنامج وتقعدي تحكي لي حياتكم السابقة وابوي كان وحبوبتي كانت والمعطة بتاعتك دي…
محمد فتح درج العربية وطلع منو ربطة قروش ابو مية وقال ليها : امسكي دي 10 الف تاني... بس ما تبزري يا هندوية ... انتي عارفة انا بحبك قدر كيف وقروش الدنيا كلها ما بتسوى عندي ضفر من اضافرك ...
هند مسكت القروش ودخلتها جوة شنطتها ونزلت من العربية وقالت ل محمد : يلا باي ...بس حاول استعجل ف موضوع زواجنا يا محمد ....
محمد : تمام ...يلا بعدين برن ليكي ...
هند ب دلع : شاااو...
محمد اتحرك ورجع السوق المحلي ل ابوهو ....
محمد دخل المحل لقى ابوهو بتكلم مع تاجر من التجار ....
ابو محمد : خلاص يا مصطفى امشي المخزن ونزل البصل وتعال لي احاسبك...
محمد : دقيقة يا حاج تحاسبو على شنو واتفقتا معاهو على شنو ؟؟؟...
ابو محمد : اتفقتا معاهو نشتري منو شوال البصل الواحد ب 6 الف...
محمد : لا لا كيف 6 الف يا حاج ؟؟؟...انا من اول اديتو سعر قلتا ليهو 5 الف بس ما بزيدك ولا جنيه ...
مصطفى : انت عارف دا ما سعرو يا محمد وانا لو بعتو ليك بالسعر دا بكون خسران ...لانو انا مشتريهو ب 5 وعلي حق ترحيل وانت شايف الجاز غالي ومعدوم عديل...
محمد : يا شيخنا دا سعرنا ...لو نفع معاك امشي نزل البصل ف المخزن ولو ما نفع معاك ...بين البايع والشاري يفتح الله ويستر الله....
مصطفى ب اسى : حسبنا الله ونعم الوكيل ...
محمد : يا زول لو ما عايز تبيع لينا امشي اتحسبن بعيد من هنا .....
مصطفى طلع ومشى يشوف تاجر تاني يبيع ليهو البصل...
ابو محمد : مالك يا محمد ما خليتنا نشتري من مصطفى… اليومين ديل البصل سعرو كويس…
محمد : عارف يا حاج ..لكن برضو 6 كتيرة عليهو وانا لمن جاني قلت ليهو خمسة وعارفو ح يمشي ويرجع لينا تاني…
ابو محمد : تاني ما حيرجع يا ولدي… ح يلقى تاجر يشتري منو ..خصوصا انو الليلة سعرو سبعة ونص تمانية ونحن لمن نشتري من مصطفى ب 6 اكيد نحن الكسبانين….
محمد : ما تخاف يا حاج برجع براهو وببيع لينا بالسعر العايزنو نحن…ولو ما باعو لينا… بصلو دا الا يعفن…
محمد طلع تلفونو واتصل علي تجار الجملة الفي السوق كلهم وقال ليهم : البصل العند مصطفى دا بصلي انا ولو جا ل اي واحد فيكم مافي زول يشتري منو…..
وقفل علي كدا….
نقيف هنا عشان نتعرف علي جماعتنا…
( ابو محمد اسمو حاج العوض ... تاجر محاصيل وجلابي كبير ... عندو مخازن ومحلات في السوق المحلي … وتمساح من تماسيح السوق وكلمتو ماشة على التجار…
يلا حاج العوض دا زول صعب صعب صعب… عندو قروش النار ما بتاكلها… لكن مافي زول عارف قروشو وممتلكاتو غير ولدو محمد ..وهو زول ناااااشف نشاف حجر بس (بخيل)…ومع انو عندو قروش الا انو اسرتو ما ضايقة حاجة من القروش دي ولا متمتعة بيها….لانو حاج العوض عندو فهم واحد ف الدنيا دي… انو الحياة اكل وشراب وبس ... يعني موفر ليهم الاكل والشراب لكن تاني قروش بعينهم ما بشوفوها…وما عندو حاجة اسمها رفاهيات وكماليات…دي بيعتبرها بزار ساي…ومقرضها عليهم تقريضة مفتاح انجليزي بس… القروش دي ما بمسكوها الا ماشين يعملو بيها واجب.. وبديهم قريشات بالعدد… وبعد تحنيس و سف تراب كمان…
زوجتو اسمها حاجة سميرة ... امرأة من نساء بلادي الطيبات…يعني زولة الله ساكت زي ما بقولو… لا بتودي ولا بتجيب… حاج العوض ببقى ليها ود عمها… اتزوجها وجابها الخرطوم…وعايشة معاهو وساترة حالو…
عندهم ولدين وبت… محمد ( 29سنة )الولد الكبير…طبعا كان بليد وما بحب القراية ف قام ابوهو طلعو من المدرسة وخلاهو يشتغل معاهو ف السوق من هو صغير….وقدام ح نعرف عنو اكتر….
مروة (25سنة ) جاية بعد محمد…زولة كيوت طالعة زي امها… كانت بتحب القراية و شاطرة شديد…امتحنت الشهادة وجابت نسبة كويسة جدا وكانت رغبتها تقرأ طب بشري او اسنان ... بس لازم دفرة شوية من الحاج يدفع ليها ويدخلها قبول خاص…والحاج كان بين بين ..يعني عايز يعلم بتو ويفتخر بيها وما عايز يخسر قرش واحد…ومحمد زاد الطين بلة وبقى ينق للحاج… ما عندنا بت بتقرأ يا ابوي… انت شايف بنات الجامعات فسدن كيف… والله لو دخلت الجامعة بكرة تشوف صورها ف التلفونات وماسكة يد زميلها وقاعدة متلصقة فيهو وبقت ما نافعة تاني…ياحاج البت اخرها تتزوج وتمشي بيت راجلها وتربي عيالها…يعني لو دفعت ليها قروش ودخلت الجامعة راجلها هو ال ح يستفيد منها لو اشتغلت وممكن ما يخليها تشتغل زاتو ..يعني انت الخسران ضياع قروش بس…بلا قراية بلا كلام فارغ… القراية لو كانت نافعة شوف جارنا عبدالله دكتور وساكن ف بيت اجار وبيتدين من الدكان…و و و و… .
الحاج سمع كلامو ورفض انو مروة تدخل الجامعة وخلوها تقعد ف البيت مع امها تساعدها في الطباخة والغسيل والمكوة….
وطبعا الحاج اتجاهو وااااحد و كلمتو زي السيف… و مروة ما كانت عندها زول تستعين بيهو عشان يتكلم مع الحاج ..فاا قعدت ف البيت ونست حاجة اسمها قراية ..ونست أحلامها وطموحاتها....
احمد (23 سنة ) اصغر البيت لكن زول قلبو حار…كان بحب القراية زي اختو مروة وكمان كان اشطر منها لكن مع الدغوتات (الضغوطات) والمشاكل الكتيرة بينو وبين اخوهو محمد ودايما ابوهو واقف ف صف محمد عشان ساندو وشغال معاهو…يلا دا الشي الخلى احمد يكون متضايق من ابوهو واخوهو و ما يركز ف دراستو…وطبعا من ايام كان صغير لما كان بطلب من ابوهو قروش .... ابوهو كان بزفو ليك ويسمعو ليك نغمة ويقول ليهو ابقى راجل وتعال اشتغل زي اخوك واعتمد علي نفسك افضل من انك تمد يدك وتشحدني قروش…وطبعا هو ومحمد اخوهو الشحم والنار ما بتلمو ف مكان واحد يعني مستحيل يشتغلو مع بعض… ياخ ف البيت محمد قاعد ف غرفة وبرندة براهو… و احمد قاعد ف الصالون…
يلا احمد ما بحب الاحراج و كلام ابوهو بقى ليهو حلقة ف اضانو ومن وصل الثانوي ما حصل طلب من ابوهو جنيه واحد… كان بندرش زيو و زي شباب الحلة ...بيشتغل اعمال شاقة… غضب الوالدين (طلبة) … برد جوفك (ببيع موية باردة وعصاير )…واكياس ..كيس كبير بشيل كتير… كيس نايلون جميل اللون…واشتغل حنينة (يسوق درداقة) ف السوق المحلي جنب ناس ابوهو واخوهو لكن ما قاعد يجيهم ف المحل واخر اليوم بيرجع البيت ب مواصلات رغم انو ابوهو عندو البوكسي…
وباقي التفاصيل بنعرفها قدام…
####
في مكان تاني…
في بيت ناس هند…
ام هند : اها يا بت… ان شاء الله طلعتي منو ب حاجة ؟؟..
هند : ااي يا امي… بس موضوع العرس دا انا ما عارفاهو مؤجلو ل شنو ؟؟؟…
ام هند : اصبري انا اوريكي تعملي شنو عشان يجي سريع يتقدم ليكي…
…
..
.
كونو بخير…
.
..
…
روايتنا بتحكي عن ...دقيقة هي عنوانها غدر الزمن … بس الزمن ما بغدر ب زول وما عندو علاقة بالغدر… انما الغدر عند البشر… واصعب شي انك تتغدر من شخص مقرب ليك ويكون اعز الناس اليك…. ما نحاول نتعمق ف الكلام و شنو... التفاصيل كلها ح نشوفها ف الرواية ..واتمنى ليكم متابعة ممتعة…
قدام بس ✌…
.
..
…
