الرضي : اها اتكلم ااا السماني… موضوعكم شنو الجايين عشانو ؟؟؟….
السماني : جيناك ااا اخوي الرضي… عايزين الزينة ل بابكر ولدي…
الرضي سكت شوية وقال ليهو : نحن اتكلمنا ف الموضوع دا قبل كدا ااا السماني ….
السماني : الكلام دا قبل سنة اا الرضي… وهسي جيناك تاني عايزنها…
الرضي : والله ااا السماني …البت لسه صغيرة و قالت عايزة تقرا وما عايزة العرس…
بابكر : صغيرة ااا حاج ؟؟؟…البنات ال في عمرها بي اولادهن….
الرضي : برضو صغيرة ااا بابكر…
بابكر : و دا كلاما هي ولا كلامك انت ااا عمي ؟؟؟…
الرضي : دا كلامنا الاتنين ااا بابكر… انا مع بتي و اي حاجة تقول عايزاها انا بقيف معاها…
بابكر : ونحن من متين بنشاور البنات ااا عمي ؟؟؟…
الرضي : البت بتي وانا حر فيها…هي وحيدة عندي وما برفض ليها طلب…
بابكر : خلاص اعقد لي عليها وانا بخليها تكمل قرايتها ااا عمي....
الرضي : لا لا ااا بابكر عقد مافي…
بابكر : طيب نقرا فاتحتها ااا عمي…
الرضي : شوف ااا بابكر… انا بتي ما بتكون ف ذمة راجل الا تكمل قرايتها وهي براها تختار…
بابكر : طيب النقول ليك ااا عمي… انا بنتظرها لغاية ما تكمل قرايتها… لكن تديني كلمة…
الرضي : البت ما معروف تخلص متين… عشان كدا احسن تشوف قسمتك وين اا بابكر… ولو هي خلصت من قرايتها وبقت قسمتك بتاخدها ... لكن انا ما بديك اي كلمة ولا بقول ليك انتظر بتي…
بابكر : انت رافضني ااا عمي و شكلك راقد لك فوق راي !!!…
الرضي : والله لا راقد لي فوق راي ولا اي حاجة… بس دا كلامي وما عندي غيرو…
بابكر اتنفس شرار شرار وقام علي حيلو وقال بنفس حار : خير ااا عمي…
بابكر طلع من بيت الرضي ومشى والسماني وعثمان طلعو وراهو…
احمد كان واقف برا التكية ومترقب لو ف اي حاجة حصلت عشان يتدخل…
بابكر لمن طلع من بيت عمو وشاف احمد واقف .... جا وقف جنبو وحدر ليهو مسااافة والشرر يتطاير من عيونو واحمد واقف صامد يعاين ليهو بنفس الكذلك وما رمش…
طبعا دي جسة من بابكر… يعني نظام عايز يخوف احمد وكدا…
*تعريجة *
دقيقة بس نحكي ليكم دي ...
( زمان ايام الابتدائي لما كنا ف الصف التالت ولا الرابع ما عارف…انا كنت شاطر بالجد وكنت كاري الدفعة يعني اول الدفعة… ما كضب والله بالجد كنت اول الدفعة والفضل بعد الله يرجع ل اخواتي الكبار ما كانن بقصرن معاي من ناحية المذاكرة والمراجعة اول ب اول والنضافة والاهتمام…عشان كدا كنت الاول…المهم دا ما موضوعنا…طبعا الطالب الصباح لمن يكون ماشي المدرسة يا اما اهلو ادوهو مصاريف عشان يشتري فطورو من البوفيه حق المدرسة… يا اما حشو ليك سندوتشات من البيت…يا اما فكوك ساي… تمشي المدرسة وترجع تاكل ف البيت… اها نحن البؤساء ديل اهلنا بفكونا ساي نمشي المدرسة ونرجع عيونا صغار وخشمنا ناشف من الجوع و ناكل ف البيت…ولو حنو عليك بعملو ليك مديدة يلفوها ليك ف كم كيس ويدوك ليها…و في فسحة الفطور تشوف ليك ركن تطلع كيس مديدتك وتشربها وتشرب ليك موية من المزيرة وتحمد ربك وكدا امورك وضحت… يلا الاطفال السنة ناعمة اولاد ميكي ديل طبعا اهلهم ما بثقو ف اكل البوفيه فااا شنو بيعملو ليهم سندوتشات ف البيت ويدوها ليهم… والسندوتشات بتكون ب فول ظابط عاملنو ف البيت او بيض او مربى او طحنية وعسل او سجوك… يعني ممتعين نفسهم بالطيبات…اها طبعا من يوم السبت لغاية التلاتاء او الاربعاء الحصص بتكون كتيرة يعني بنمشي البيوت قريب اذان الظهر وانا ف اللحظة ديك بطني بتكون اتكرفست من الجوع وعيوني خشو جوة زي برندات السوق العربي وخشمي بقى نااااشف لمن ما قادر اتكلم…ومرات بوصل البيت ب اخر نفس ...
يلا عندي صحبي كدا دبدوب سنة نااعمة قاعد جنبي وهو شوية مخو تخين… .فااا طوالي بستعين بي اشففو واوريهو… وهو قاعد جنبي اصلا عشان كدا… اها وكت الفطور انا ما بطلع من الفصل عشان بائس لا عندي فطور ولا عندي قروش فطور… الا كان اطلع اشرب موية من المزيرة وارجع… فااا شنو بكون فاعد ف الكنبة ... و دبدوب صحبي بطلع السندوتش حقو وبفطر…والشباب العنقالة ناس كنبة ورا… طبعا ديل بفطرو اونطة ساي… بلفو علي الناس العندهم فطور ويقولو ليهم جيب معاك او اديني معاك…او ياكلو معاهم رجالة كدا بس،…
اها انا لمن شفتا دبدوب بدي الناس وانا جنبو اعاين ليهو وامطق… بقيت انا زاتي اقول ليهو جيب معاك وخشيت معاهو ف الطيبات….و طبعا دبدوب لمن يقسم لي السندوتش… الباقي ما بشبعو… فااا بقى يجيب سندوتشين معاهو… ياكل واحد ويديني التاني…
يلا ف واحد من كنبة ورا… عنقالي كدا وانتو عارفين ناس كنبة ورا كيف… اها العنقالي دا بقى متلحنا… بكون قاعد ف اخر الفصل ومن يشوف دبدوب طلع السندوتشات اداني واحد وهو شال التاني ... بجي جاري وبخطف السندوتشين مننا وباكل السندوتشات وبحدر لينا....( ديل ال هسي شغالين 9 طويلة… يعني بخطفو شنط البنات والتلفونات بالمواتر ويكبروها… يلا بدايتهم من المدارس بخطفو السندوتشات) …
اها الشغلة كترت وهو طبعا اطول مننا ونحن خايفين منو و ما بنقدر نقول ليهو حاجة… قلت ل دبدوب نشوف لينا جخنون تاني غير الفصل حقنا… فاا بقينا نطلع نلف ف المدرسة كم لفة كدا وفي الاخر نشوف لينا زقاق عشان نفطر فيهو ومجرد ما دبدوب يطلع السندوتشات…العنقالي بظهر من مافي وبجازف السندوتشات… الخسيس شكلو قاعد يراقبنا…وكل يوم بنغير محلنا والعنقالي ب ورانا ما مدينا نفس ...وانا ودبدوب كل يوم بنرجع البيت جعانين تلاليشنا ناشفة….
يلا الشغلة اتكررت كتير وانا اتضايقتا شديد لانو العنقالي حرمني من الطيبات… فاا قلت ل دبدوب تاني ما ناكل ف المدرسة… انتظر لغاية ما يفكونا البيوت ونمشي نفطر ف الشارع ونحن ماشين علي البيت…فاا بقينا نصبها ف الفصل لغاية فسحة الفطور تكمل والجرس يضرب… لكن دبدوب ما بقدر يتحمل الجوع والفطور ف شنطتو… فااا بشوف استاذ الحصة الرابعة يكون طلع من المكتب وجاي علي الفصل… دبدوب بقوم بطلع السندوتشين بديني واحد وهو ببلع التاني ف لقمتين قبل الاستاذ ما يدخل الفصل…وانا باكل بالرقراق اثناء الحصة…
العنقالي شافنا وزعل شديد مننا وبقى من جرس الفطور يضرب بقوم يجي يشيل شنطة دبدوب ويفتشها يشيل السندوتشات وياكلها…وعارفني طبعا بائس وشنطتي بتاعت القماش دي مافيها حاجة غير الكراسات….
انا قلت ل دبدوب اسمع تاني لمن الجرس يضرب نطلع اول ناس ونمشي ناكل جنب مكتب الاساتذة هناك… كدا العنقالي بخاف وما بقدر يجي يشيل مما السندوتشات ..فااا الخطة نجحت وبقينا كل يوم بنمشي جنب مكتب الاساتذة وناكل… وانا مبسوط و عازي نفسي بالطيبات مع دبدوب…ياخ الشقوق الفي خشمي راحت … والعنقالي قال الا يدقنا وصنف لينا اخر اليوم ف الشارع بعيد من المدرسة لكن نحن شفناهو وغيرنا مسارنا ب طريق تاني ومشيت وصلتا دبدوب بيتهم وانا شاققت ورجعت بيتنا ... واليوم التاني بعد طلعنا ..العنقالي كان منتظرنا قريب جنب الباب ومكفكف يدينو… قلت ل دبدو ب نغير الشارع ونكبرا … وجرينا بالشارع التاني والعنقالي جا جاري ورانا…طبعا دبدوب مدردم ما بقدر يجري ...وانا ضعيف بيت سيف بس…فاا قمت جاري قدام دبدوب وكتلت ملف ووقفتا ف الركن انتظرت دبدوب لغاية ما جا بعد زمن ونفسو كاتم ولمن لف شافني واقف قام وقف جنبي وانا بقول ليهو اجري قدامي ياخ…ودبدوب مسكين نفسو قاطع وما قادر يتحرك من مكانو… اها العنقالي جا لافي وانا ختيت ليهو كراعي وشنكلتو وقع علي بطنو وانا قعدتا ليهو ف ضهرو وكوركت ل دبودب… اجري يا عوير… اجري ياخ… ودبوب نفسو قاطع ما قادر يجري ..بس بهز لي ف راسو وانا بكورك فيهو… دبدوب لمن شافني قاعد فوق العنقالي ...هو كمان جا قعد معاي ومسكو ليك عضاهو ف كتفو عمل ليهو ختم ..والعنقالي بقى يصرخ واك وااااك واااك… ودبدوب يعضعض فيهو وانا بقيت البع فيهو والعنقالي يصرخ… ودبدوب كمان عندو سنون كجامة بس… ياخ ختم ليك جسم العنقالي كلو… والعنقالي يكورك…لغاية ما جا عمك كدا فكاهو مننا والعنقالي قام جاري ويبكي…
ومن اللحظة ديك والعنقالي عمل لينا الف حساب و بقى يشوفنا عشرة عشرة ...و تاني ما حصل قرب مننا…وبقينا نخلف كراع فوق كراع وناكل و دبدوب بقى يجيب معاهو عصير ف زمزمية… ياخ انا مع الطيبات والعصاير لمن عملتا لي شدوق (جضوم) ولوني فتح… وبعد مرور الزمن العنقالي احترم نفسو وبقى صاحبنا )…
معليش جريت بيكم هواء… بس القصة دي حكيتها عشان اقول ل اي واحد عندو مخاوف من حاجة لازم يواجهها…لانك لو ما واجهتها ح تفضل طول عمرك خايف منها… والخوف بيخليك تفكر دايما ف الشي البتخاف منو و تتوتر وبيحصل ليك ضغط نفسي وذهني ويسببو ليك مرض … فااا شنو ما تبقى جبان و واجه مخاوفك ايا كانت نوعها…
المهم بابكر حدر ل احمد كدااا وبتنفس شرار شرار… واحمد كمان بحدر ليهو وما نزل عينو من بابكر…
بابكر مشى ومعاهو ابوهو واخوهو…
احمد ما فاهم حاجة لكن اصلا عندو حساسية مع بابكر واخوهو من يوم ضربوهو…
عمك الرضي جا طالع من بيتو ويتحسبن واحمد ما سالو قال الموضوع اسري مافي داعي يتدخل ....
الرضي واحمد دخلو التكية…والرضي يهز راسو ويطنطن : بابكر ؟؟؟… لا حول ولا قوة الا بالله العلي العظيم… والله بتي ما اديها ل بابكر لو اقطعها و اوزع لحمها للكلاب ….
احمد ساكت وما اتكلم…بس فهم حاجة ....
الرضي طنطن شوية وقال : انت عارف ااا احمد اااا ولدي…السماني اخوي عايز الزينة بتي ل ولدو بابكر وهم قبل كدا جو طلبوها وانا رفضتا من غير ما استشير بتي لاني عارفها ما بتدور بابكر وبتدور تقرا…تااااني الليلة جو يطلبوها مني…وهم عارفين رايي سلفا…وبتي زاتها قالت لو ما كملت قراية ما عايزة تتزوج ...وانا والله ااا ولدي امنيتي ف الدنيا دي بس ربنا يمد ف عمري واشوف بتي دكتورة…
احمد : ربنا يديك طولة العمر يا حاج وتشوف بتك دكتورة كبيرة ان شاء الله…
الرضي : غايتو بس السماني واولادو ديل… الله يكفينا شرهم…
اها الدنيا مغربت والبابور اشتغل واحمد وحاج الرضي صلو المغرب والسيدة جابت ليهم شاي حليب وقاعدين ف التكية ويتونسو… وحاج الرضي يحكي همومو ل احمد…
طق… الكهرباء قطعت…..طبعا عادة الكهرباء لمن تكون شغالة وفجأة تقطع… بكون ف عطل ف البابور والحلة كلها بتكون قاطعة… حاج الرضي طلع عشان يمشي البيت يجيب لمبة الجاز… شاف الحلة كلها مولعة الا بيتهم بس…
الرضي : الحاصل شنو !!! ... عيسى مالو كمان قطع كهربتنا !!!… .
احمد طلع من التكية علي كلام حاج الرضي وشاف الحلة كلها منورة…
احمد : انا بمشي ليهو يا حاج وبشوف الحاصل شنو…
الرضي : خلاص ارح نمشي سوا…
حاج الرضي واحمد وصلو عند عيسى…
الرضي : عيسى مالك ااا زول فكيت السلك حقنا ؟؟…
عيسى : لا لا ااا الرضي سلكك ياهو موصل ما فكيتو ....
الرضي : طيب كهربتنا قاطعة مالا ؟؟؟…
عيسى : قبل شوية شفت كهربة البابور عملت راجع…بكون سلكم اتحرق ف مكان…امشو راجعوهو يا حاج… شوفو يمكن لمباتكم حرقت ولا حاجة….
الرضي واحمد طلعو راجعين يشوفو كهربتهم مالا قاطعة ... وطبعا احمد ماسك درب السلك وحاج الرضي ماشي وراهو… وصل جنب بيت كدا مهجور… لقى السلك مقطوع بفعل فاعل… لانو السلك زي المقطوع ب فاس او طورية لانو تحتو ف حفرة و ف اثار ضربة …
احمد عرف انو ف زول قاصد يقطع كهربة حاج الرضي ...فااا ما كلم حاج الرضي بالحقيقة ... بس قال ليهو السلك مفصول من هنا يا حاج… دقيقة نوصلو والكهرباء بتشتغل…
احمد وصل السلك ولفاهو ب كيس…و اللمبات ولعت ف البيت…
احمد وحاج الرضي رجعو التكية وقعدو يكملو ونستهم… واحمد ف بالو السلك المقطوع بفعل الفاعل…بيسأل نفسو دا منو القطعو ؟؟؟… و ليه قطعو ؟؟؟…
اها بعد ما اتعشو تاني الكهرباء قطعت ف بيتهم…
احمد قام ماشي يشوف السلك…
الرضي : دقيقة ااا ولدي النمشي معاك…
احمد : لا لا يا حاج خليك قاعد ما تتعب نفسك… انا بوصل السلك وبرجع ليك سريع…
احمد تبع السلك لغاية ما وصل جنب البيت المهجور… لقى السلك مقطوع ف مكان تاني وبرضو ضربة زي الضربة الاولى يعني ب فاس او طورية…
احمد اتلفت يمين وشمال ما شايف زول ..فااا قعد يوصل السلك…
سمع صوت بقول : الليلة البحلك مني شنو ااا زول ؟؟؟…
احمد اتلفت يمين وشمال ما شايف اي زول… شوية كدا وشاف شبح زول جاي طالع من البيت المهجور وشايل ليهو فاس ف رقبتو لمن الفاس بيلمع ف ضو القمر …
ايا ياي ياي ياي ياي…
احمد طبعا براهو وما شايل ليهو حاجة ف يدو غير زردية وشريط كهرباء…فاا ما معروف يعمل شنو !!! ..
غايتو انا لو ف مكانو بعمل قام و بكبرا … ويا روح ما بعدك روح …
عييك….
…
..
.
كونو بخير…
.
..
...
