هند دخلت الغرفة ل محمد شايلة صينية الاكل وصارة وشها… ختت الصينية ورافضة تاكل…
محمد : هند تعالي اكلي يا مراة مالك حردانة الاكل ؟؟…
هند : بس كدا ما عايزة…
محمد : يا بت الناس انتي حامل والجوع ما كويس مع الجنين لازم تتغذي…
هند : محمد قلت ليك ما عايزة ما تكتر كلامك معاي…خليني ف حالي ان شاء الله اموت زاتو ....
محمد : طيب وريني زعلانة من شنو والزعلك منو ؟؟…
هند : اختك دي يا محمد قاعدة لي ف الرايحة والجاية وقاعدة تراقبني….
محمد : مالا هي… ما تكون شافتك ولا حاجة ؟؟؟..
هند : ما عارفة والله بس يمكن شافتني…
محمد : شافتك عديل وانتي بتكبي ف الدواء ؟؟…
هند : لا لا ما شافتني بكب الدواء لانها كانت وراي…بس شكلها شكت فيني …
محمد : خلاص انتي وقفي الدواء شوية لغاية ما الامور تهدا…
هند : كويس…بس بكرة الصباح وديني بيت امي يا محمد….اقعد لي يومين تلاتة…
محمد : خلاص تمام…
الصباح محمد مشى وصل ابوهو المحل وجا راجع ساق هند وداها بيت ناس امها ورجع ل ابوهو…
طبعا هند بتستعين ب امها سعاد العقل المدبر ف كل حاجة… فااا كلمتها عن الحصل ليها مع مروة وانها قربت تقبضها وهي بتخت الموية ف اكل الحاج…
سعاد قالت ليها : مروة دي ح تكون باقية ليكي ف روحك وما ح تخليكي ف حالك و ح تفضل مراقباكي كدا لغاية ما تقبضك…اصلا هي قاعدة ساي لا عندها شغلة ولا مشغلة… عشان كدا لازم تكلمي محمد يشوف ليها عريس وتمشي تسيب ليكي البيت وبكدا تقدري تتحكمي ف البيت ب راحتك…
اها محمد لمن جاها اخر اليوم يشوفها ويتطمن عليها .... هند قعدت تتدلع ليهو… وهي عارفة كيف تاكل راسو… (اي مراة بتعرف نقطة ضعف زوجها وبتعرف تاكل قروشو كيف )…
محمد قال الا يسوق هند ويرجعو البيت… لانو ما بقدر يقعد بدونها .… بس هند رفضت ترجع معاهو…
محمد : ياخ خلينا نمشي يا بت الناس… عليك الله ف مراة بتقعد بعيد من راجلها ؟؟؟…
هند : انا دي يا محمد ..وما برجع معاك البيت واختك دي قاعدة فيهو…
محمد : قصدك شنو انتي يا هند ؟؟؟…
هند : قصدي اختك دي لازم تشوف ليها صرفة يا محمد لانها شكت فيني وطالما هي قاعدة ف البيت… تاني انا ما ح اقدر اعمل اي حاجة… ياخ دي بقت من تشوفني داخلة المطبخ تدخل وراي وتكون بتراقبني بعمل ف شنو…
محمد : نشوف ليها صرفة كيف يعني نطردها ولا شنو ؟؟…
هند : ما حكاية تطردها يا محمد لكن لازم تخارجها من البيت… اقول ليك حاجة شوف ليها عريس باسرع وكت…عشان لو نحن وقفنا الدواء من ابوك فترة طويلة… ابوك ح يبقى كويس ويرجع يتذكر كل الحاجات الفقدها و ح يعرف انك الكنت بتخبي الحاجات من وراهو…
محمد : طيب يجيبو ليها عريس من وين دي كمان ؟؟… امشي ادللها يعني ف المزاد ؟؟…
هند ب عصبية : محمد انت ما بتفهم !!!..يعني اي حاجة الا اقولها ليك انا ؟؟؟…
محمد : يا بت الناس انت عايزاني اعرس ليها كيف ومافي زول جا اتقدم ليها !!!… .
هند : ما انتو مشكلتكم ما بتخلوها تطلع من البيت… طيب الناس ح يشوفوها كيف ؟؟؟… هسي لو كنت بتخليها تطلع تمشي زيارات ل اهلكم ولا تمشي عند صاحبتها كان لمت ليها ف عريس وما قعدت بايرة لغاية العمر دا…
محمد : يعني رايك نخليها تمرق عادي ؟؟…
هند : اااي خلوها تطلع تمشي تتفسح او تمشي ل اهلكم مع امك او ل صحباتها… بس خليها تهوينا شوية ونتخارج منها ....
محمد : طيب انا ما بقدر اقول ليها الكلام دا… لاني انا المانعها تطلع من البيت…
هند : طيب اسمعني…ما عندك صاحبك ما متزوج ولا اي زول معاكم ف السوق ان شاء الله راجل مراة…عايز يتزوج…
محمد : بس انا ما بقدر اعرض عليهم اختي…
هند : طيب مافي زول من الحلة او الاهل اتقدم ليها قبل كدا وانتو رفضتوهو ؟؟؟…مستحيل يكون لغاية العمر دا وما زول اتقدم ليها…
محمد : ف بس ود عمي اتقدم ليها وانا رفضتو لاني مختلف معاهو من بدري….
هند : شفت يا محمد انت براك بتفشل لينا خطتنا…
محمد : ياخ الزول دا اتقدم ليها قبل ما انا اعرفك وهو زاتو زول ما مسؤولل اتزوج تلاتة نسوان وطلقهن… عشان كدا انا خفتا يرجعها لينا مطلقة وتاني ما نلقى ليها راجل…
هند : طيب انت شوف ود عمك دا لسه باقي عليها ؟؟...
محمد : اشوفو شنو يا بت الناس… انا وهو الشحم والنار وما بنتفق نهائي…
هند : اقعد قولي لي انت ما بتتفق معاهو لغاية ما اختك تمسكني …ولا اقول ليك انا اصلا ما راجعة معاك البيت…
محمد : طيب شوفي لينا حل ؟؟…
هند : مافي حل غير انك تتصل علي ود عمك وترجع علاقتك معاهو واسالو ب طريقة ظريفة كدا هل هو لسه باقي عليها ولا خلاص نساها…
محمد : والله انا الزول دا ما قاعد اتفق معاهو ورقمو زاتو ما عندي…
هند ب زعل : يعني يا محمد غالبك تجيب رقمو وتتصل عليهو تراضيهو ...ولا عايزني انا كمان اتصل ليك عليهو !!!…انت مشكلتك ما مهتم بالموضوع كأنو الموضوع دا بخصني انا براي…ولا انت شكلك عايز تكون برا الصورة وانا الاتعب واعمل اي حاجة…ولو اتمسكتا وعرفوني… المشكلة كلها ح تقع فوق راسي انا…
محمد : ياخ ما كدا… لكن عايز افكر واشوف كيف ادخل علي ود عمي دا لاني لي سنين ما اتكلمت معاهو ..فاا ما ممكن اتصل عليهو فجأة وانا مختلف معاهو واقول ليهو تعال نديك اختي…
هند : خلاص يا محمد اقعد فكر ب راحتك… وانا خليني قاااعدة ف بيت ابوي هنا معززة مكرمة… لا زول يراقبني ولا ابراج مراقبة يتجسسو علي…
محمد : طيب وانا ؟؟…
هند : انت لو عايزني تجيني هنا ف بيتنا… بس انا ما بمشي معاك بيتكم و اختك قاعدة…
محمد : ما تصعبيها يا بت الناس…
هند : انا ما صعبتها يا محمد ..الحل عندك ف يدك… تعرس اختك ل ود عمك او تخارجها لينا من البيت ب اي طريقة…وانا برجع معاك البيت ....
المهم هند حرنت و ابت تمشي مع محمد ...ومحمد بقى كل يوم يجيها ف بتهم بس ما بيلقو راحتهم وهند رافضة تطلع معاهو اي مكان… والموضوع دا تاعب محمد شديد… فااا قال لازم يشوف حل للموضوع دا… وهو الاطرش ما فكر انو يستأجر ليها ف اي مكان تاني ويسكن معاها… بس هو فكر نفس تفكيرها انو لازم يخارج اختو من البيت….
المهم محمد قاعد ف المحل مع ابوهو…وعايز يشيل التلفون من ابوهو عشان يطلع رقم ود عمو ..بس ما عارف يقول ل ابوهو شنو… فااا قاعد كدا منتظر ابوهو يخت التلفون او ينساهو ولا حاجة…اها ابوهو قام سألو…
العوض : انت يا محمد… اخوك احمد وين انا لي كم يوم ما شفتو ؟؟…
محمد : يا حاج… احمد دا طفش من بدري ما معروف مشى وين…
العوض ب دهشة : كيف يعني طفش ؟؟…والكلام دا متين زاتو ؟؟...
محمد : الكلام دا قبل ما انا اعرس يا ابوي ....
العوض : طيب ما اتصلتا عليهو ولا امك اتصلت عليهو ؟؟…
محمد : انت يا حاج قلت مافي زول يسأل منو ونخليهو براهو يرجع…
العوض : لا حول ولا قوة إلا بالله العلي العظيم… اخوك طفش يا محمد وما اتصلتا عليهو… دا كلام شنو يا جماعة…
العوض طلع تلفونو وفتش رقم احمد ولدو اتصل فيهو بس مافي اي جرس… ولا بدي اي حاجة…
العوض : كدا يا محمد اتصل علي اخوك دا واديني ليهو… انا تلفوني دا ما عارفو مالو…
محمد قال دي فرصتو فااا قال : ما عندي رصيد يا ابوي ..اديني تلفونك كدا النجرب انا…
العوض مدا التلفون ل محمد ومحمد اتصل ومافي اي جرس…ولا بدي مقفول…
محمد : ولدك دا شريحتو برا يا ابوي… اسمعني طيب عندك رقم عبدالله ود عمي… نضرب ليهو ونشوف احمد عندو ولا لا…
العوض : اااي عندي… كدا اضرب ليهو واسألو…
محمد فتش اسم عبدالله ود عمو واتصل عليهو…
عبدالله : اهلا يا عمي…
محمد : عبدالله كيفك؟؟…
عبدالله لمن سمع صوت محمد نبرتو اتغيرت : مرحب…
محمد : كيفك ان شاء الله كويس ؟؟؟… وكيف اولادك ؟؟؟…
عبدالله : خير يا محمد ف شنو ؟؟؟..
محمد : والله يا ود عمي صلة رحم وكدا… قلت اتصل عليك واشوف اخبارك شنو ؟؟؟…
عبدالله : من متين قاعد تسال عن اخباري يا محمد؟؟….
محمد : طوالي بسأل منك ابوي عشان هو القاعد يتواصل معاك…
عبدالله : كدا خلينا من الكلام دا… هسي ضارب لي عايز شنو ؟؟…
محمد : والله كنت عايز اقول ليك احمد اخوي دا طلع من البيت ليهو فترة وما رجع ....قلت يمكن جاك بهناك ولا شفتو ف محل ولا حاجة ؟؟؟…
عبدالله : لا لا ما جاني ولا شفتو…
محمد : خير يا عبدالله…بس الجفا ما كويس يا ود عمي…نحن ف النهاية اولاد اعمام يعني لحم ودم ...
عبدالله : كلامك دا لو قالو احمد اخوك كان قبلتو منو… لكن انت يا محمد عارفني ما عندي كلام معاك
محمد : ليه يا ود عمي… الزعل ف شنو ؟؟؟…
عبدالله : انت عارف سبب اختلافي معاك…
محمد : باركها يا زول … الموضوع ما يستاهل…
عبدالله : كيف اباركها وانت طلعتني ما راجل … وقلت انا لو اخر زول ف الدنيا دي ما بتديني اختك…
محمد قال كويس انو عبدالله جاب السيرة براهو… فااا قال ليهو : كدا خلي الموضوع دا بتصل عليك ب رواقة كدا ونتفاهم معاك فيهو…
محد قفل من عبدالله وسجل الرقم ف تلفونو…
العوض : اها يا محمد… عبدالله ما قال حاجة عن اخوك ؟؟؟…
محمد : والله يا حاج قال ما شافو ولا ظهر عليهو ب هناك…
العوض : الولد دا مشى وين يا جماعة ؟؟…
محمد : ما تشيل ليهو هم يا ابوي… ولدك دا بكون زي كل مرة ...يمشي شغل بعيد مع صحبو ويرجع بعد اسبوع او شهر …
اها محمد طلع برا وخلى ابوهو يطنطن براهو… وهو طلع اتصل علي عبدالله من تلفونو ..
عبدالله : الو ..
محمد : ااي يا عبدالله معاك محمد…
عبدالله : اها خير يا محمد… انت الليلة مالك بتتصل علي كتير كدا؟؟؟…
محمد : يا عبدالله ياخ مافي داعي للكلام دا …انا ود عمك يا زول…
عبدالله : علي الطلاق وتطلق مرتي الهسي معاي دي…انا كلامك القلتو لي داك… للآن حارقني…
محمد : انت لسه متذكر الكلام داك يا عبدالله ؟؟…
عبدالله : عمري ما انساهو يا محمد…يعني انا ود عمك وترفضني…
اها محمد حاول يراضي عبدالله ب كلام ظريف وحاول يجرجرو ف الكلام ب صورة مزح كدا ولقاهو لسه عايز مروة…
محمد : طيب انت هسي متزوج تلاتة… ولسه بتفكر تتزوج مروة…
عبدالله : هسي واحدة بس ف عصمتي والاتنين طلقتهن … بس مروة دي لو عايزاني اطلق ليها المراة دي زاتها بطلقها ليها ؟؟؟..
محمد : يعني انت لسه باقي عليها ؟؟؟…
عبدالله : ايوا باقي عليها…
محمد : خلاص يا زول اتوكل وتعال اتقدم ليها وربنا يجعل الفيهو الخير…
عبدالله : غريبة يا محمد… الغيرك شنو !!… مش انت حلفت انك ما بتديني ليها…
محمد : الناس بتتغير بين يوم وليلة يا ود عمي…والله صلة الرحم دي زيها مافي…وبالمناسبة انا كنت عايز اتصل عليك من بدري واتصالح معاك لكن بس كنت متحسس شوية…
عبدالله : خير يا زول مافي عوجة…اها بالنسبة ل زواجي من اختك كيف ؟؟؟...بتمزح معاي ولا جادي…
محمد : والله جادي و انت لو جاهز تعال ...
عبدالله : وعمي كيف ح يوافق ؟؟…
محمد : الحاج مسؤليتي انا… بس انت تعال…
طبعا يا جماعة عبدالله بالنسبة ليكم شخص مجهول ما بنعرف عنو اي حاجة غير انو ود عمهم واتقدم ل مروة ورفضوهو… بس السبب شنو !!!…
كدا نشوف عبدالله دا منو وهو زاتو شنو …
…
..
.
كونو بخير…
.
..
…
