هند مجرد ما رجعت البيت مع محمد… قالت تحاول تكسب الزمن و تبدا تنفذ خطتها ف اغتيال حاج العوض… بس اول حاجة تكلم محمد وتشوف رايو شنو بعد يعرف انو الدواء ح يقتل ابوهو…وقالت ف نفسها لو محمد رفض الدواء… لازم هي باي طريقة تحاول تقنعو … عشان بعدين ما يحملها المسؤولية براها ف موت ابوهو… فااا قالت ليهو : محمد… انا كلمت صحبتي الصيدلانية ب الموضوع الاتفقنا عليهو… .
محمد : اها وقالت ليكي شنو ؟؟؟…
هند : والله يا محمد قالت عندها دواء… بس …
محمد : بس شنو يا بت ؟؟… اتكلمي…
هند : قالت الدواء خطير وما معروف بعدين مضاعفاتو شنو ؟؟؟…
محمد : طيب كدا فهميني صحبتك قالت ليكي شنو عن الدواء ؟؟؟…
هند : قالت ابوك لو استعمل الدواء ممكن يم…
محمد : ممكن شنو ياخ تمي كلامك…
هند : ياخ ما عارفة… بس قالت الدواء دا ما مضمون ونتوقع تحصل ل ابوك اي حاجة….
محمد : لا لا كان ما مضمون خليهو…
هند : كيف نخليهو يا محمد ؟؟؟...
محمد : مش قلتي ما مضمون وممكن الحاج تحصل ليهو اي حاجة… فاا الاحسن نخليهو...
هند ب عصبية : كلامك دا يعني مستقبل اولادنا برضو نخليهو…واملاك ابوك ال هي مفروض تكون من نصيبك انت و ح تمشي ل اخوانك ... برضو نخليها … وظلم ابوك ليك وانت راجل قدر حالك دا وشغال معاهو بالسنين وبنقط عليك بالنقطة زيك وزي باقي العمال والعتالة برضو نخليهو …. وبالطريقة دي معناهو ف يوم من الايام لو ف زول ضربني ولا اخد حقي ...انت ما ح تبقى راجل تقيف معاي…
محمد ساكت ويسمع ليها…
هند : انا ما قايلاك بتتنازل عن حقوقك بالبساطة دي يا محمد…المفروض تبقى راجل وتقيف قدام اي زول عايز ياخد حقك .... يا خسارة حبي ليك يا محمد…
محمد : طيب انتي هسي متعصبة مالك ؟؟؟…
هند : معتصبة عشان لقيتك جبان يا محمد…والشي البغيظ اكتر .. اني مهتمة بالموضوع عشان مستقبل اولادنا وانت ولا هاميك… بس خليك متذكر كلامك دا… عشان لو بعدين اولادك سألوني من حقهم… ح اقول ليهم ابوكم هو الفرط ف حقكم…
هند عملت نفسها زعلانة….
محمد حاول يحنسها بس هند مكرضمة وعارفة كيف تخلي محمد يغير رايو واستخدمت كل حيلها لغاية ما محمد اداها القروش وقال ليها جيبي الدواء من صحبتك…
اها هند طوالي من اليوم التاني دخلت المطبخ عايزة تجهز العشاء لقت سميرة ف المطبخ ...
هند : اقعدي ارتاحي يا امي انا بعمل العشاء ...
سميرة : لا لا شيلي عشاكم انتي ومحمد وامشو اتعشو ....
المهم سميرة قفلت ليك هند وما خلتها تعمل ليهم العشاء ولا شاي الصباح ...لانو سميرة بقت ما عندها اي شغلة غير الحاج ...فااا بقت الصباح بدري بتقوم تجهز ليهو الشاي وتجي تشرب معاهو واخر اليوم المساء لمن يرجع من الشغل بتخت ليهو الاكل وتقعد تاكل معاهو ...ولو هند قالت عايزة تعمل اي حاجة...سميرة بتقول ليها اعملي ليكي انتي وراجلك ...انا لسه قوية بقدر اخدم ابو عيالي .....
اها هند ما عندها فرصة تاني غير الفطور ...لمن محمد يرجع البيت زي الساعة 10 او 11صباح ...ويشيل فطور من البيت ويودي ل ابوهو هناك ...فااا هند بتعمل البدرة ف فطور الحاج وبتزيد الجرعة....
والحاج كل يوم وضعو ماشي متأزم وصحتو ماشة ف النازل ....بس ما حاسي ب اي وجع ...غير انو مرات بتجيهو كتمة كدا ف صدرو ويحاول يكح لكن ما بقدر .....
العوض بقى يسأل عن احمد ويقول ل محمد فتش اخوك دا واسأل اصحابو واي زول بعرفو يمكن تلاقيهو ....
محمد بمشي يلف كدااا من غير ما يفتشو ويرجع ل ابوهو يقول ليهو مافي اي زول عارف مكانو ....
اها ف يوم المساء العوض قال ل محمد : احمد اخوك دا مش كان عندو صاحب كدا طوالي بمشي معاهو ...اسمو صالح ولا خالد ولا منو ما عارف ؟؟؟؟...
سميرة : اااي يا حاج اسمو خالد ...عليك الله كلم محمد خلي يسالو....
محمد : سالتو يا حاجة قال ما بعرفو ....
العوض : طيب امشي جيبو لي ولا جيب رقم تلفونو انا عايز اتكلم معاهو....
محمد : والله يا ابوي انت تعبان ساي ...خالد دا انا سألتو. كم مرة وهو زااااتو قال ما عارفو وين وسألني منو كمان ....
العوض : شوفو لي يا محمد… انا قلبي بقول لي خالد دا عارف عنو حاجة…
سميرة : انا امس قابلت امو ف الدكان يا حاج… .لو كان كلمتني كان سالتها من ولدها …. كدا امشي يا محمد ناديهو ل ابوك ...لو ما لقيتو ف بيتهم بتلقاهو ف النادي زي المواعيد دي ....
محمد طنطن ومشى التادي لقى خالد قاعد ف ركن وبوسوس ب تلفونو…
محمد : خالد .... ياااا شيخنا ..
خالد استغرب طبعا لمن شاف محمد واقف قدامو وبناديهو… لانو محمد دا اصلا زول مفتري شوية وما عندو حاجة ل زول ف الحلة… بس الناس بشوفوهو سايق بوكسي ابوهو ويعاين ليهم بطرف عينو…. وسلام ما بسلم عليهم…
خالد زح التلفون بعيد من اضانو بدون ما يقفل الخط… وعاين ل محمد وقال ليهو : مرحب…
محمد : ابوي عايزك ف البيت… .
خالد : خير ان الله ؟؟؟…
محمد : قال عايز يسألك من احمد لو بتعرف مكانو…
خالد : احمد اخوك ما عارف مكانو يا حبيبنا…
اها محمد الح علي خالد انو يمشي يقول الكلام دا ل ابوهو لانو طالب حضورو ضروري…
فاا خالد قام ومشى معاهو البيت… ودخل على الحاج وسلم عليهو وعلي سميرة وضيفوهو …
العوض قال ليهو : يا ولدي… انت صاحب احمد الوحيد...بس عايز اسألك… عليك الله ما عارفو مشى وين ولا عارف عنو اي خبر ؟؟؟….
خالد : والله يا حاج اخر كلام كان بينا يوم كان مسافر ل قريبي… لكن ما وصل عندو …
العوض : طيب كدا وريني قريبك دا وين واحمد كان مسافر ليهو ل شنو ؟؟؟…
خالد حكى للحاج اي حاجة بيعرفها عن سفر احمد لغاية الكلام القالو ليهو قريبو انو الزول دا وصل هناك واتصل عليهو لكن ما اتقابلو…
المهم العوض سال واستفسر من خالد عن قريبو واخد كل التفاصيل وسجلها ف ورقة… وشكر خالد…
طبعا هند حست بالخطر وانو الحاج بيسأل عن احمد و حيفتشو يجيبو ويستعجل ف توزيع املاكو ...فاااا اتكلمت مع محمد ....
هند : شوف يا محمد… اول حاجة ابوك دا ما يلقى احمد اخوك… لانو لو لقاهو وجابو ح يمسكو المحلات عشان هو قاري جامعة…و اي حاجة كدا ح تضيع من يدنا… وثانيا حاول تخليي ابوك يتأخر شوية وما يستعجل يوزع ليكم الاملاك ....
محمد : ما ح يقدر يسجلها لانو الورق كلو معاي ...
هند : ابوك لو فتش الورق وما لقاهو اكيد ح يكلم محامي ويشوف ليهو طريقة تانية يطلعو الاوراق .....عشان كدا انا قلت ليك ما تخليهو يستعجل وانت تقدر تتصرف شوف ليك اي محامي شاطر خليهو يسجلها ليك ...
محمد : خلاص انا من بكرة بفتش لي محامي اخليهو يشوف لي طريقة يسجلها ب اسمي ...
هند : لا لا ما تسجلها ب اسمك ..كدا اهلك ح يعرفوك انت سرقتها من ابوك .... بس خليك فاهم وسجلها ب اسمي انا وكدا مافي زول ح يعرف وما ح يفتشو وراي ....
محمد ب دهشة : ليه يعني ب اسمك انتي ؟؟؟...
هند : انت ح تسجلها لفترة مؤقتة ...وبعد ما الوضع يهدا ..انا بعمل ليك توكيل وتغير الملكية ب اسمك انت ....اصلا انا وانت واحد يا محمد والحاجة لو مكتوبة ب اسمي ولا باسمك كلها ماشة ل اولادنا ....ولا انت ما بتثق فيني؟؟؟....
محمد حك راسو وقال ليها : ماا حكاية ثقة يا هند...لكن ...
هند قاطعتو : لكن شنو !!!...يعني انت متردد ولا خايف !!!؟؟؟... خلاص اسمعني انت سجلها ب اسمي وخلي الاوراق معاك عشان ضميرك يرتاح ....
محمد : طيب اصبري لغاية ما القى لي محامي يقدر سجلها وبعدين نشوف نسجلها ب اسم متو ...
هند : انت لو ما عندك محامي انا بعرف واحد قريبنا كدا شاطر ...لو عايزني اكلمو بخلي امي تتصل عليهو ونشيل الورق نمشي ليهو ...اها رايك شنو ؟؟؟...
محمد ب تردد : اااا....لا لا كدا خليني براي بتصرف ...
هند : خلاص كويس ...بس لو عملت اي حاجة كلمني ....و كنت عايزة اسألك ...مش ابوك عندو قروش ف البنك ؟؟؟...
محمد : اااي عندو ...
هند : يلا انت لازم تسحب منو القروش دي وتختها في حساب تاني ....
محمد : طيب القروش دي يسحبوها كيف كمان؟؟؟...
هند : تقوم شنو يا محمد ... كل مرة تخلي ابوك يمضي ليك شيكات وتشيلها ....
محمد : لا لا دي ابوي ما بعملها يا هند ...
هند : يا محمد ياخ ابوك ما بتذكر…لازم انت تستغل الحتة دي… وكل مرة تقول ليهو فلان عايز مننا قروش اشترينا منو محاصيل وما دفعنا ليهو حقو…وتقول ليهو التاجر قال ليك اكتب ليهو شيك… او تقول ليهو يرسلها ليهو ف رقم حساب وانا بديك رقم حسابي وتقول ل ابوك دا رقم حساب التاجر…
محمد ب دهشة : ااا…
هند : ااي يا محمد عشان ابوك بكون عارف رقم حسابك او عارف الاسم… لكن لمن تديهو رقم حسابي ما بحاول يدقق وبرسل طوالي… وانا برسلها ليك… ما تخاف….بس لازم تستغل اليوم البجيكم فيهو تاجر وببيع ليكم محاصيل…وبعد نص ساعة انت ترجع ل ابوك وتقول ليهو التاجر قال ليك حول ل القروش وتديهو رقم حسابي تخليهو يحول … وتاني ترجع ليهو بعد ساعة بكون نسى وبرضو تخليهو يحول ...وتكرر العملة دي كم مرة ف اليوم… عشان نقدر نلم حاجة من قروش ابوك دي قبل ما يوزعها…
اها محمد سمع كلام هند… وهند سجلت ليهو رقم حسابها ف ورقة وقالت ليهو نفذ الخطة سريع…عشان انا ولادتي قربت عايزة اجهز حالي…
وطبعا الشيطان خاتي يدو ف خدو وفاتح خشمو ومحتار وبعاين ل هند…
####
في مكان تاني
حاج الرضي لمن سمع كلام الدكتور جسمو برد وقال ب صوت مبحوح : قلت شنو ااا دكتور؟؟؟...
الدكتور هز راسو : ولدك يا حاج انتو جايبنو من هناك ميت.... ربنا يصبرك يا حاج ....
الدكتور ركب سماعات التلفون ف اضانو مشى منهم…
الجماعة : لا حول ولا قوة الا بالله العلي العظيم...
حاج الرضي مشى وراء الدكتور ومسكو من يدو تاني وقال ليهو : عليك الله ااا دكتور ...
الدكتور جر يدو من الرضي وقال ليهو ب تعالي : يا حاج الزول دا جاي منتهي وما فيهو ولا نقطة دم ....يعني ما في فايدة خلاص هو مات ....وانا ما ح اقدر اعمل ليكم حاجة تاني....
الدكتور واصل مشيهو واختفى.....
حاج الرضي الفيهو كلمت وبقى يبكي ويتحر علي احمد المات ف عز شبابو وهو لسه ما شاف حاجة من الدنيا ...
الرضي يبكي وهو راجع على نقالة احمد ويتكي على عصاهو ويترنح لغاية ما وصل قريب من احمد ...العصاية انزلقت منو في البلاط وعمك اتعتر ف رجل واحد من الجماعة ووقع وقعة قوية ف صدر احمد ...
كح كح ....
الكحة الا ف اضان حاج الرضي لانو وقع ف صدر احمد ....
يا جماعة الدكتور مش قال الزول دا مات ؟؟؟…تاني قام بعاتي ولا الحاصل شنو !!!...
...
..
.
كونو بخير…
.
..
…
