دايما قبل العرس ب كم يوم كدا .... بتحصل توترات بين اهل العروس واهل العريس… والتوترات دي بتكون ف حاجات عادية جدا وما بتستاهل… لكن طبعا النسوان بسخنوها وبحصل زعل وكدا ولو مافي رجال حازمين الموضوع بفركش ...
اها سعاد طبعا طماعة والشيلة ما عجبتها مع انو الشيلة ممتازة ومافينا كلام ...لكن بس سعاد حسادة منها بس عايزة تقلع منهم قروش زيادة وكل شوية تحرش بتها هند ..اضربي ل محمد قولي ليهو الشاي الجبتو ما بكفي النساوين الجايات يدقن الريحة… والسكر زاتو خليهو يجيب تاني شوالين نحن اهلنا كتار ومعارف ابوكي ما عندهم عدد.... محمد عندو قروش كتيرة والعجب ابوهو تاجر قدر الليلة وبكرة ويجيبو لينا الحاجات البسيطة دي ؟؟؟ ...وهند كمان بتسمع كلامها وتضرب ل محمد ...وتقول ليهو عايزين وعايزين….
محمد طبعا اتضايق من الطلبات الكتيرة وهو ما عايز يغير رايو لانو بالجد شايف هند دي ما بلقى زيها تاني…
العوض بشوف ولدو مكشر ولمن يسألو بوريهو الحاصل ...العوض كمان ما عايز يصغر قدام التهامي ...فااا شنو بديهو قروش وبقول ليهو جيب ليهم العايزينو ...
محمد بشيل القروش وبمشي بيت ناس هند ويسلمهم القرو ويرجع ....
سميرة زعلانة من محمد لانو اي حاجة بطلبوها منو هو بوديها ليهم…فااا شنو قعدت واتكلمت معاهو…
سميرة : يا محمد يا ولدي…ما اي حاجة يطلبوها منك نسايبك ديل توديها ليهم… نحن ودينا ليهم شيلتهم كلها كاملة و بزيادة…
محمد : والله يا امي اي حاجة قالو ناقصة لانو ناسهم كتار….
سميرة : دي حركات نسابة ساي عشان يعرفوك انت كيف… لو رخيت ليهم الحبل بعرفوك انك اضينة ساي…و
محمد قاطع امو : كيف يعني اضينة يا امي ؟؟..
سميرة : اضينة يعني دلدول ساي… يودوك ويجيبوك علي مزاجهم…و زي ما بقولو لو انت ما ضبحتهم الكديسة من هسي ووقفتهم ف حدهم ...ح يبقوك زي الخاتم ف صباعهم…
محمد اتنفش : منو !!!..انا ؟؟؟…
سميرة : غايتو انا كلمتك… وتاني انت حر ما نسابتك .…
اها محمد بعد كلام يادوب فهم الحاصل وبقى تاني ما بستجيب ل طلبات هند ومرات ما برد ليها التلفون….
المهم بعد المناوشات والجوطة الكتيرة دي العرس تم ومحمد وهند قضو شهر العسل لافين من كسلا ل بورتسودان ل وين ما عارف ليك...
هند كانت عايزة تسافر برا السودان لكن محمد قال ليها انا ما عندي جواز ...وهو لو عايز يطلع جواز بالنسبة ليهو عادي… بمعارف ابوهو الجواز بيطلع ليهو بسرعة لكن محمد ما عايز يخسر قروش زيادة وهو حاليا شغال بجهاز المصافي (يعني قروشو الموفرها باقي ليهو شوية بس )...فاا شنو محمد قال ل هند نرجع بعد دا عشان ابوي بكون براهو ف المحل وعايزين نبني مستقبلها ...
يلا رجعو البيت والعوض ضبح ليهم وعمل ليهم كرامة وهند مشت بيت امها قعدت اسبوع ف بيت امها و ف الفترة دي امها شحنتها ليك فل ...اعملي حسابك من نسيبتك وبتها والنسيبة دبيبة وبتها ام عرقوب دي كمان ما هينة واوعك تشتغلي ليهم خدامة ولا تلمسي حاجة ب يدك ...خليكي قاعدة مستتة وهم يخدموك...هم لاقين وين عروس زيك ل ولدهم تلقيهم ما صدقو زاتو ....
اها محمد جا ساق هند وطبعا هند ما بوصوها نفذت كلام امها كلو ...بقت نايمة ف غرفتها وعايزة حاجة سميرة ومروة يخدموها ويجيبو ليها الاكل ف غرفتها ...
ف اليوم الاول سميرة قالت ل مروة امشي ناديها عشان تجي تاكل معانا ....
مروة مشت ليها وكلمتها وهند قعدت تلمس وتهبش ف الاكل ب اطراف اصابعيها ..اكلت شوية و لوت خشمها ورجعت غرفتها اتصلت على محمد وقالت ليهو انا جعانة ما فطرتا…
محمد : ليه ما فطرتي ؟؟...امشي بهناك افطري مع ناس امي ...
هند : مشيت يا محمد لقيت امك واختك بياكلو وما نادوني...
محمد : ومالك ما قعدتي اكلتي معاهم !!… انتي ما ضيفة…
هند : كرامتي ما بتسمح لي وبعدين الاكل العاملاهو امك زاتو ما بنفع معاي ....
محمد : خلاص خشي المطبخ.... اعملي الحاجة الانتي عايزاها ...
هند : انا لسه عروس عايزني اشتغل يا محمد ؟؟؟...
محمد : طيب يعني اعمل ليكي شنو !!!...اجي انا اطبخ ليكي ؟؟...
هند : لا لا بس جيب لي دلفري ....
محمد : اخلي شغلي يعني ولا كيف ؟؟؟...
هند : خلاص كلم اختك خليها تطبخ لي الاكل الانا عايزاهو ....
محمد : اففف كويس ...
محمد قفل منها وضرب ف تلفون امو ....
سميرة : اااي يا ولدي ...
محمد : يمة بتفطرو براكم وما بتنادو هند للفطور مالكم ؟؟؟...
سميرة : بري يا ولدي والله جهزنا الفطور ومروة مشت نادتها وانتظرناها لغاية ما جات ...قعدت معانا دخلت يدها ونفضتها ولوت بوزها وقامت ....
محمد ما عرف يصدق امو ولا يصدق مرتو… بس شنو مال اتجاه مرتو : يمة انا ما عارف انتو بتعاملوها كدا مالكم ؟؟؟...نرحل يعني ونخلي ليكم البيت دا ؟؟...
سميرة : يا ولدي هسي انت زعلان فوق شنو ؟؟؟...كان للفطور والله الصينية ملياااانة اكل ما خلينا ليها حاجة ما عملناها ...علمت ليها شوربة لحمة لحمة وشية ودمعة جداد واختك عملت المكرونة وسلطة الاسود وبطاطس محمرة بالجبنة والزيتون ...حتى الطحنية والعسل والمربى ما خليناهم...
محمد طبعا ما لقى سبب تاني لانو امو بالطريقة دي ما قصرت مع هند...فاا برد شوية وقال ليها : يا امي ياخ البت دي يمكن الحاجات دي ما بتاكلها ...شوفيها عايزة شنو واعمليهو ليها ....
سميرة : اها عاد تاني اسوي ليها شنو بعد دا كلو ؟؟؟...الا كان نقعد ليها ف الصينية تاكلنا نحن ؟؟؟...
محمد : كويس يا امي انا مرتي بعرف باكلها شنو لكن بس انتو ما عايزنها ف البيت معاكم ...
محمد قفل من امو واتصل على هند تاني قال ليها عايزة شنو وشاف طلباتها وشغل عربيتو مشى اشترى ليها اكل وداهو البيت ....
هند عرفت كيف تتدلع ف محمد ... وقالت ليهو ناس بيتكم ما عايزني اكل معاهم ...يا اما تفصل لي البيت وتعمل لي مطبخي براي ...يا اما تجيب لي اكلي معاك من برا ...لانو اهلك ديل بيكرهوني ....
محمد طبعا ما بقدر يفصل عيشتو عشان ابوهو ما ح يرضى ب كدا ...فااا قال ليها : ما بقدر كل يوم اجيب ليكي اكل من برا يا هند…
هند : طيب ما مشكلة ...كل يوم الصباح وديني عند ناس امي والمساء تعال سوقني ...كدا احسن عشان ما احتك ب اهلك ديل ...
اها محمد برضو الكلام ما عجبو لكن قال دا اسلم حل مع انو مشوار ماشي وجاي كل يوم متعب بالنسبة ليهو ...لكن عشان يرتاح من النقة الكتيرة ....
فاا بقى كل يوم الصباح يوصل ابوهو المحل ويرجع يلقى هند جاهزة يسوقها يوديها بيت امها وبالمساء بعد يرجع ابوهو… بمشي ل هند ف بيتهم ويتغدى معاهم ويرجعو اخر اليوم…
عدت الايام والاسابيع وهند جاتها اعراض حمل ومحمد وداها الدكتور فحصو ليها الدم.. الحمل ظهر…
محمد فرح فرح شديد وهند كمان زادت ف دلعها وطلباتها كترت وكل يوم والتاني عاملة نفسها زعلانة و لازم محمد يراضيها بهدية …
طبعا هند بتجيب ل امها من الهدايا والحاجات البجيبها محمد…يعني مثلا توب او جلابية او شبشب…
يلا امها لمن شافت هداياها كلها ملابس قالت ليها : انتي ما تبقي هبلة… كل ما يجيب ليك توب تقومي تفرحي ...الملابس دي دلاقين ساي وبتكمل يا بتي !!... اطلبي منو دهب لانو الدهب بنفعك ل قدام…
هند فكرت ف كلام امها وفعلا لقتو صاح… فااا لمن محمد جا ساقها وراجعين البيت قالت ليهو ب دلع : انت يا محمد ليه ما قاعد تجيب لي دهب ولا انا ما غالية عندك ؟؟؟…
محمد : انت الغلا كلو ي هندوية… بس الدهب دا خليهو بعد تجيبي لينا ولي العهد…
هند : لا لا ولي العهد دهبو براهو بعد الولادة يا محمد….انا عايزة دهب هسي لانو الدهب بحفظ الجنين…القروش عند ابوك راااقدة ..
محمد : والله ياخ انا شوية اموري جايطة اليومين دي وانتي مصاريفك كتيرة والحاج كمان بقى يدقق في الحسابات وما قادر اطلع منو ب حاجة…
هند : انت لو عايز تتصرف ما بتغلبك الحيلة يا محمد…
محمد : ياخ اقول ليكي حاجة ابوي شكلو شاكي فيني عشان كدا بقى يحسب ويسجل…
هند : طيب بالطريقة دي ما ح تقدر تشتري لي دهب ولا ح تعمل لي بيت براي ولا ح تشتري لي العربية القلتها ليك…
محمد : هو انا لو قدرتا اوفر ليكي حق الولادة كويس…
هند : لا لا يا محمد لازم تلقى ليك طريقة تسحب قروش من ابوك…
محمد : طريقة وين يا بت ؟؟؟… انا احترت زاتي اسوي معاهو شنو…
هند فكرت كدااا وقالت ليهو : اسمعني…
محمد : اها…
هند تاني اتراجعت وقالت ليهو : انت تفكيرك محدود يا محمد وابوك دا عايز ليهو زول فاهم اكتر منك… فااا انت خليني افكر واوريك الحل شنو مع ابوك دا….
اليوم التاني هند استعانت بالخبيرة امها وكلمتها بالموضوع وقالت ليها الحل شنو مع حاج العوض دا يا امي…
سعاد : العوض دا ما عندو حل غير الفكي اب قناية ...قومي ارحكي ليهو…
وقامن مشن للفكي اب قناية…
…
..
.
كونو بخير…
.
..
…
