عدت سنين وسنين ...عدت سنة ومرت سنة ...سنة ورا سنة وانا لسه يا قمر الزمان عايش على ذكراك انا ...
عدت سنين طويلة ...الكان صغير كبر ..والكان كبير عمرو زاد ....
تامر سرق عربية ابوهو بوكسي دبل كبينة موديل السنة نررررر ب اكياسو ومشى قابل صحبو هاني وسلم عليهو....
تامر : يااا مكنة ...
هاني : زولي والله ...
تامر : اها يا مان معاك العزة ؟؟؟ ....
هاني : ما عندي والله هسي كنت عايز اجسك ...اقول ليك حاجة نقد شارع النيل .....
تامر : قدام.....
تامر اتحرك بالبوكسي وماشي بسرعة زيادة والزمن داك الساعة اتنين بالليل الشارع فااااضي ....بووووووووووووو...جر فرملة اليد وبقى يفحط بالعربية....
هاني : تامر...ياخ امشي برااحة يا خوة ... تقوم تقلب بينا العربية زي المرة الفاتت .....
تامر : لا لا ما بمشي براحة… عايز اوريك… انت مش امبارح بتفصق ل ود اللواء وهو عامل لي فيها شفت ...انا الليلة اوريك الشفتنة زاتا يامان ...انا المقددا ...انا الراصيها...انا ال .....
بوووووووو ....تامر ماشي ويفحط وصلو شارع النيل ف مكان جنب الشجر ...ولع نور طويل وقصير تلاتة مرات وشغل مجمع وبعديها شغل الانوار الصغيرة ...
شوية كدا وجا واحد طالع من جوة الشجر اتلفت يمين وشمال وجا وقف جنب العربية ...بدون اي كلام ...تامر طلع قروش من جيبو واداها ليهو ..الزول حسبها ورجع جوة الشجر وجا تاني اداهم حاجة كدا ملفوفة واتخفى ورا الشجر....
تامر عايز يفتح الحاجة... هاني قال ليهو : لا لا ياخ ارح من هنا ؟؟؟...
تامر : مالك !! خايف يا مان ؟؟؟...
هاني : ما خايف لكن مش المعلم قال ليك مجرد ما تستلم المعلوم تتبخر من البلد دي عشان ما تجيب ليهو الكتمة ....
تامر : والله الراس معضي يا زولي .... لكن اقول ليك حاجة ... قمنا ...
تامر اتحرك بالبوكسي وكمان البوكسي يعجبك جديد وسنين وصوتو حنين ...بووووو شارع المطار....بوووووووو....وصل السوق المحلي جنب المخزن حق ابوهو ف دقايق ...وقعد يضرب بوري ..تيت تيتيت تييييييييت ...
غازي غرفتو جنب المخزن ...فتح الغرفة جا طالع سكران واقف ننننن... ما قادر يشوف لانو نور العربية ضارب ف عيونو ...
غازي : منو ؟؟...
تامر وقف العربية وقال ل هاني : انزل انزل تعال ...
تامر وهاني نزلو وجو عند غازي ....
غازي : تامر !!… يا ولد ياخ مالك عايز تطير لينا السكرة من راسنا ... هسي انا قايلك طارة ...
تامر : طارة شنو يا عمك ...كدا دخلنا جوة ...انت شكلك معاك النضيف ...
تامر دخل غرفة غازي ولقى ليهو نص كرستالة عرقي ....
تامر : ياااااه ..والله يا عمك هسي انا جاي كنت عايز اقول ليك ارح نجيب النضيف ....
تامر قعد ومسك الكرستالة اخد منها بقتين واداها ل هاني : خش خش يا مكنة ....
هاني اخد ليهو بقة وما قدر يبلعها لقى العرقي سخن ....رجع الكرستالة ل تامر وقال ليهو : لا لا يا مان الشغل دا مولع ...
تامر : دا الخام يا زولي ...دا النضيف...عمك دا كييف جد جد ...اقسم بالله المراة البتعمل الشغل دا عندها زباين بجوها من الولايات...ياخ دي عندها قلل بترسل ليهم سفري ....
غازي : ذكرتني يا ولد ...
تامر : ذكرتك شنو يا عمك ؟؟...
غازي : المراة ست العرقي سالتني منك ...قالت لي وينو الولد الفريع الطاعم الجا معاك المرة الفاتت ....
هاني ضحك ضحكة بتاعت طعمية وقال : ههههاااي فريع ؟؟.... والله يا تيمو شكلك جلبتا يا زولي ....
تامر : ياخ دي كومر مصدي يا مان ...والله انا لو ما السكرة حكمت لي ما كان نمت معاها ولا قربتا منها زاتو ....
هاني : والله نانا لو عرفت انك نمت مع ست العرقي ح تشخط ليك يا مان ....
تامر : عادي يا مكنة ..غيرها في ...
تامر طلع تلفونو الايفون وفتح الاستوديو جاب صور بت زي القشطة ...وقال ل هاني : كشف كشف للزبون الجديد ....
بت سمحة سماحة حلاوة بقر بس ...وبيضا وصورها كلها ب بجامات وملابس بيت عادية....
المهم تامر شرب باقي العرقي و طلع الاخضر ...و لفى ليهو سجارة ومداها ل غازي وقال ل غازي : احترام الكبير واجب ...امسك يا عمك ولع الصاروخ دا ....
غازي شال السيجارة وولعها وقال ل تامر : ابوك لو عرف انك قاعد تجي تسكر وتشرب بنقو معاي هنا بوديني الدايات ....
تامر : يوديك الدايات ليه !!..حامل انت ؟؟؟...
غازي وتامر وهاني ضحكو سوا هههههههااااي ...
غازي : اااي حامل فيروس كورونا ...
تاني كلهم ضحكو سوا ههههههااااااااي لمن بسلمو ل بعض ....سكراني الجماعة يضحكو ساي…
اها سكرو واتسطلو وراسهم اتملى دددددددددددب ....
غازي نام وشخر ف محلو ...وتامر وقف على حيلو يااااالا ياالا...وقال ل هاني : نعمل قام يا مكنة ...
هاني وقف وعيونو صغااار وقال ل تامر : الباب ب وين ؟؟...
تامر : ما عارف والله ارح نفتشو ....
اها طلعو ماسكين الحيطة لغاية ما وصلو البوكسي ركبو واتحركو طالعين على الزلط لقو دورية شرطة واقفة ...تامر عايز يرجع خلف وناس الدورية شافوهو وشكو فيهو وجو وراهو وتامر قام ب كلو...وناس الدورية شغلو السارينا ووراهو ....بوووووو....شارع الهواء جاك بلا .... بووووو مطاردة شديدة...بوووووو.والبوكسي سنين والدورية وراهم ويو ويو ويو ويو.....
طبعا سواقين التريلات البطلعو من المخازن الفي شارع الهواء ...الواحد فيهم بجي طالع بالتريلا ويدخل شارع الهواء بدون ما يشوف الشارع فاضي ولا مليان ...اها تامر ماشي ب كلو ...فجاة طلعت تريلا شاحنة من المخازن ودخلت شارع الهواء طوالي قدام تامر ....تامر حاول يتفاداهو لقى الخور بالجهة التانية… حاول يخش الشارع. التاني لقى بتاع جرار جاي ماشي فرش… رجع و حاول يمسك فرامل بس العربية ماشة بسرعة زيادة ...و روووووووو ...دخل ف التريلا ب ورا .....
البوكسي من قدوم اتلجن كلو وكويس انو التريلا الصدام الورا كبير لو كان ما عندها صدام كان البوكسي دخل تحتها والكبينة كلها اتقصت ...
طبعا البوكسي جديد وفيهو اكياس هواء ومع الصدمة الاكياس طلعت....وعملت احماء ل تامر وهاني من القزاز ....
الدورية جات وقفت وكسرو الباب وطلعو الجماعة سليمين بس مجرد خدوش بسيطة ....
المهم اختبروهم ولقوهم سكرانين ساقوهم القسم وفتحو ليهم بلاغات ....واتصلو على اولياء امورهم ....
طبعا هاني ابوهو عميد يعني قلة... جا ف نفس اللحظة وساق ولدو وشطب البلاغ ...
محمد اتصلو عليهو قالو ليهو ولدك ف القسم قبضناهو سكران وعمل حادث ....
محمد قام سريع مخلوع وطلع سريع عاين للعربية لقاها مافي… محمد قرب يبكي .. ياخ عايز يموت من الزعل…
هند كانت نايمة وصحت علي كلامو وعرفت انو ولدها حصلت ليهو حاجة وقالت الا تمشي مع محمد القسم…
اها محمد وهند ركبو العربية التوسان و مشو القسم…
ف القسم طبعا وروهو الحاصل وانو ولدك سكران وعمل حادث ووو… وممكن يتعاقب بالسجن والغرامة ويودوهو اصلاحية لانو قاصر وما بلغ سن الرشد…
محمد قال احسن يودوهو السجن عشان يتادب…
هند بكت وصرخت ليك ف محمد وانو دا ولدها الوحيد ....( طبعا عندهم بت لكن بنرجع ليها بعد شوية )….
اها هند بقت ل محمد ف رقبتو لغاية ما اتصل بمعارفو وطلع ولدو ساقو معاهو…
وصلو البيت هناك ومحمد مجرد ما دخلو قفل الباب وقال ل ولدو : انت بتشرب يا تامر ؟؟…
تامر بلا مبالاة : بشرب بنقو وبشرب عرقي وبعمل اي حاجة كعبة زاتو….
محمد عايز يضربو هند وقفت ف نصهم وقالت ل محمد : ما تضرب ولدي يا محمد…
محمد ب زعل : وكمان بتدافعي عنو !!!… شفتي دي اخر تربيتك الولد طلع سكاري وبيتسطل وكمان يقول بيعمل اي حاجة كعبة وفوق ل دا قليل ادب و بيرد علي....دي مصيبة شنو يا جماعة ؟؟….ياخ البوكسي الاول مشى فحط بيهو مع الشماشة اصحابو وقلبو لجنو مرة واحدة…والتاني دا جبتو لي شهرين ما ختيت فيهو كراعي كويس…سرق المفتاح كيف وساقو مشى سكر بيهو وعمل بيهو حادث… ياخ ولدك دا جنني… امسكو اكتلو ارتاح منو ولا اسوي ليهو شنو ؟؟….
وهند تمسك محمد عشان ما يضرب تامر…
محمد زعل و قال ليها ولدك دا لو جا البيت او مسكوهو سكران تاني الا يتسجن بس عشان يتأدب وحلف طلاق انو ما يطلعو ولا يسال منو…
المهم دايما الامهات بقيفن مع اولادهم حتى ولو غلطانين ..وهند مدلعة تامر دلع ما عادي و اي حاجة عايزها بتديها ليهو من قروش وحتى مرات هند بتسرق المفتاح من تحت المخدة او من درج محمد وبتدي ل ولدها لانو بقول ليها ماشي يتفسح مع اصحابو…
اها محمد قال تاني نهائي ما بجيب عربية ف البيت غير التوسان السايقها هو…
طبعا هند اجهضت كم مرة وما جابت بعد تامر الا بت واااحدة هسي عمرها سنتين لكن مسكينة مريضة عندها موية ف راسها…عملو ليها عملية مرتين وركبو ليها جهاز ف راسها… ربنا يشفيها ....
محمد عارف انو هند بتدي القروش ل ولدها فاا قال بالطريقة دي هند ح تضيع لي الولد و ح تضيع الممتلكات المسجلة ب اسمها لانها بتحب ولدها وبتعمل عشانو اي حاجة…
اها محمد حاول يخدع هند وقال ليها عايز يبيع جزو من المحلات و يعمل مول كبير و ح يسجلو ب اسمها ..يعني لازم تعمل ليهو توكيل عشان يبيع المحلات ال ب اسمها ويعمل المول… هند صدقت وعملت ليهو توكيل ومحمد رجع باقي الممتلكات كلها ب اسمو… وكل ما هند تسألو عن المول يقول ليها شغالين فيهو…
محمد بقى يمنع تامر ما يطلع من البيت ..يعني من المدرسة ويرجع تاني ما بخليهو يطلع ويقول ليهو اقعد اقرا بالغصب ....
تامر ف الثانوي و بليد ما بحب القراية نهائي ...بيطلع يمشي مدرسة خاصة ب ترحيل وما بيحضر الحصص بيمشي مع اصحابو الصايعين يشربو سجاير ويبلعو حبوب ويتعربدو مع البنات ويعملو اي حاجة….ومرات تامر برجع البيت ومعاهو حبوب…والقروش طبعا بتديها ليهو امو…
يلا تامر بقى مدمن حبوب…عشان ابوهو ما يعرفو…وعادي ممكن يبلعها قدامو ويقول ليهو دي حبوب صداع… اصلا ابوهو ما بعرف حاجة….
اها تامر ف يوم دخل غرفة ابوهو وامو يفتش ف دولابهم عايز يسرق ليهو قروش يجيب بيها الحبوب لانو مصدع والحبوب حقتو كملت ...يلا ف اثناء ما هو بفتش لقى تحت الملابس القديمة فتيل او علبة صغيرة كدا عامل زي علبة الفوليك اسيد ..الحبوب بتاعت الحوامل… فتح العلبة لقى فيها بدرة شماها لقاها ريحتها شاذة كدا ...وقال دا بكون فلفل مسحون… واستغرب امو خاتاهو هنا ل شنو ولا بكون نستو …اها قام رجعها ف مكانها…يلا لما ما لقب قروش،وامو كانت مافيشة طلعت الجيران ..قام شاف تلفونها ف الشاحن ..شالو ومشى باعو واشترى ليهو كمية حبوب وجابها البيت… اتذكر العلبة اللقاها ف دولاب امو قال احسن يخت فيها الحبوب عشان ابوهو لو سألو يقول ليهو دي حبوب صداع ولا اي حاجة…
اها مشى شال العلبة من دولاب امو ومشى المطبخ فتح ليهو برطمانية وفرغ فيها البدرة وغسل العلبة وخت فيها حبوبو وبقى عادي يبلع ف بيتهم وعايش دنيتو ..طاير ف السماء…
طبعا البدرة ديك اتذكرتوها… دي البدرة ال هند سممت بيها المرحوم العوض…
هند لمن جات من الجيران لقت تلفونها مافي والبيت مبشتن افتكرت انو ف حرامي جا البيت لانو مافي زول ف البيت وتامر كان مافي…
كلمت محمد وفتشو باقي اغراضهم لقوها موجودة بس التلفون مفقود… قالو دا حرامي ف الحلة شال التلفون لانو خفيف واتخارج… ونسو الموضوع علي كدا… .
يلا البدرة دي مع مرور الزمن والكتمة اتفاعلت ومفعولها بقى قوي…
هند بتطبخ عادي ومفتكرة انو ال في البرطمانية دا فلفل وبتكب منو ف الملاحات والطبيخ حقها…
اسبوع بس ..محمد ظهرت ليهو الاعراض بقى يحس ب وخز يعني طعن ف صدرو لكن ما اشتغل بالموضوع كتير وهند كمان مرات بتحس انو جواها مقبوض كدا ومرات لمن تتنفس زي البتحس ب فراغ….
اها ف يوم بالليل محمد وهند نايمين… هند اتألمت وبقت تشكي من صدرها وتقول حاسة بسخونة شديدة زي ال ف نار جواها وبقت تكح بطريقة غريبة لمن الكحة معاها صوت…محمد وولع النور لقى ف روايش دم ف الغطاء من كحة هند… ف قاام سريع وشغل العربية وقامو طالعين علي الدكتور بس محمد راسو مصدع وبقى يشوف طشاش،… مشى صحى ولدو تامر عشان يوديهم المستشفى…
تامر كان بالع ليهو حبة ونام عليها وتاني لمن ابوهو صحاهو بلع ليهو حبة تاني وركب التوسان ..اصلا التوسان دي ما لاقي فيها فرقة… ساقها ومشى ب احترام…
محمد شاف هند تعبانة قام صرخ ف ولدو : اسرع يا ولد… امك تعبانة ..اسرع…
تامر مرتاح والحبة عاملة مفعولها… وعلي صراخ ابوهو…
وراهم السرعة…
####
في مكان تاني…
سميرة كبرت ونظرها بقى ضعيف ما بتشوف الا ب نظارة…
ومروة ولدها احمد كبر ما شاء الله وبقرا ف الثانوي وطالع شاطر زي امو وخالو سميهو…
طبعا مروة بتحب ولدها دا حب ما عادي بالرغم من انو ابوهو عبدالله ود عمها اكتر زول بتكرهو ف الدنيا دي… بس تعمل شنو احمد جناها وضناها… ياخ من شدة ما بتحبو لدرجة انها رفضت الزواج وقالت نهائي ما عايزة راجل ف حياتها غير ولدها ربنا يخليهو ليها…والولد كمان تربية امو وحبوبتو طالع مؤدب ومحترم…
المهم مروة محلها قريب وجابت بت تانية شغالة معاها ف البوتيك…
اها ف يوم مروة جات راجعة البيت العصر كدا وفتحت الباب لقت امها مادة يدها ومبتسمة وبتقول ليها : احمد احمد ..احمد…
مروة : يمة احمد برا بلعب كورة مع اصحابو ف الشارع…
سميرة بس مادة يدها ومبتسمة وبتقول : احمد احمد احمد…
مروة طلعت الشارع وكوركت ل ولدها : احمد يا احمد ..
احمد : نعم يا امي…
مروة : تعال حبوبتك بتناديك…
احمد : يمة الكورة مسخنة خليني العب شوية…
مروة : تعالي يا ولدي عليك الله حبوبتك دي من قبيل بتناديك…
احمد جا داخل مع امو ومشى قعد جنب سميرة مسك يدها وباسها وقال ليها : اااي حبوبة عايزة شنو ؟؟…
سميرة تاني مدت يدها علي الباب وبتنادي : احمد احمد احمد…
احمد قام طلع ورجع يلعب مع اصحابو… ولسه سميرة بتنادي احمد احمد…
مروة : يمة احمد هسي مش كان معاكي ؟؟ ..
وسميرة بتنادي…احمداحمد…
مروة قالت تمشي تجيب احمد يقعد مع حبوبتو ...عشان تسكت…
قامت وطلعت علي الشارع شافت عربية كدا غريبة GMC واقفة قدام الباب ومظللة ما شايفة الزول الجواها….
طبعا الناس البخطفو الاطفال كترو ف الزمن دا ومروة خافت لانو العربية شكلها غريب وصرخت ل ولدها ..احمد تعال…
احمد : يمة عليك الله دقيقة بس…
الزول الراكب فالعربية نزل منها شاب لابس ليهو نظارة مظللة وطاقية وجاي علي مروة…
مروة خافت زيادة وصرخت ل ولدها : احمد ياخ تعال قلت ليك…
الزول الغريب وصل عندها و نزل النظارة وقلع الطاقية…
مروة عاينت ليهو وصرخت : احمااااااااااااااد…
احمد ولدها اتلفت علي امو لقاها حاضنة الزول ..وطبيعي اي ولد ف عمرو يشوف امو حاضنة زول غريب اكيد بيتضايق ..فاا قام جرا عليهم وبقى يضرب ف الزول ويقول ليهو : زح من امي خلي اي ..
مروة حاضنة الزول وتبكي وقالت ل ولدها : دا خالك يا عوير دا خالك…
المهم احمد ظهر كيف الله اعلم نخليهو يحكي لينا بعدين بس هو مستعجل يسلم عل ناس عزيزين عليهو…
دخل لقى سميرة صوتها مرتفع وتنادي ف اسمو…ياخ فرحة كدا ما عادية ....
وبعد السلام والاحضان والبكاء…
سميرة ومروة حكو ل احمد الحاصل كلو ف غيابو…
احمد راقد يومين ف حضن امو وقال ليها : يمة ليه من زمان ما حضنتيني كدا !!!… ما كان دا كلو حصل….
بس كل شي مقدر وكتوب جايز يكون لحكمة يعلمها الله…
احمد اليوم التالت الصباح بدري باس يد امو و قال ليها ماشي قريب هنا وجاي عندي امانات عايز اسلمها ل ناس وبرجع ليكي بسرعة…
احمد طلع واتحرك سافر البلد وصل الضهر ...وقف قدام بيت ناس الزينة… البيت كما هو والتكية وقعت ومافي زول اشتغل بيها تاني…
احمد فضل واقف ويعاين ف بيت ناس الزينة… شوية كدا و جا طالع من البيت ولد صبي شايل عكازو… ووراهو جات طالعة الزينة…نفس الملامح والجمال… نفس العيون الساحرة… ياخ لمن قلب احمد عمل شحححححح… كدا…
الزينة : تعال ااا ولد ماش وين ؟؟…
الولد : ماشي ل ابوي ااا يمة…
الزينة : ابوك ماشي ليهو ف الحر دي !!!.. تعال ادخل خلي الشمش تبرد ونسوق حبوبتك نمشي ليهو كلنا…
الزينة مسكت ولدها وعايزة تدخل جوة البيت لاحظت للعربية قامت غطت وشها بالتوب ...
احمد عرف انو الزينة ب اسرتها بس كان عايز يطمن عليها ويرجع… اها عايز يرجع بالعربية لكن قال يشوفها ح تعرفو ولا نستو…
احمد نزل القزاز بالبطيء ووشو بقى يظهر شوية شوية لغاية. ما ظهر كامل…
الزينة شافتو وعرفتو…حضنت ولدها ب حسرة ودموعها جرت… .
جاي بعد ايه ؟؟؟...
بعد ما الطير اكل العيش !!!...
…
..
.
كونو بخير…
.
..
…
