احمد وقف على حيلو وشاف الشبح جاي عليهو لغاية ما قرب منو…عرفو دا بابكر رابط عراقيهو ف نصو ولافي وشو ب شال وشايل فاس(فرار) ف كتفو ...
بابكر وصل عند احمد .... واحمد واقف صبة…
بابكر : بتتحداني ااا زول ؟؟؟...
احمد ساكت ما رد عليهو ....
بابكر خت يدو ف صدرو وقال : انت اااا بتعرفني ااا زول… انا بابكر… انا المر… مافي زول ف الحلة دي كلها ولا الحلال الجنبنا بقيف قصادي ااا زول ….
احمد واقف سيخ…
بابكر رفع يدو بكل قوتو عايز يضرب احمد ب ضهر الفاس الحتة المكرضمة ديك ...(دايما لمن تكون بتتشاكل مع زول وعايز يضربك ...ما تزوغ ساي ..لازم تعرف اتجاه الضربة وين ومسافتها كم .. عشان تزوغ بالاتجاه المعاكس وتقدر تتفادى الضربة) ... احمد رجع ل وراء شوية عشان يتفادى الفاس… بس المسافة كانت قريبة والضربة جات ف رجل احمد ف الفخذ محل الجيب ...احمد رجلو اتعطلت ونزل ب ركبتيهو ف الارض ومسك الفاس ب يدو ...وبابكر يجر واحمد مكنكش ف الفاس .... وبابكر يجر واحمد معصب ف الفاس ... احمد طبعا بارك ف الارض وبابكر واقف على حيلو ...اها بابكر لمن شاف احمد مكنكش ف الفاس وما عايز يفكو ...قام ب رجلو دفر احمد ف صدرو واحمد فك الفاس ومسك رجل بابكر وجراهو جابو واقع ...والاتنين مسكو بعض ووقعو واطة بردلب بردلب بردلب بردلب ويضربو ف بعض ....احمد طبعا ضعيف شايل هموم الدنيا ...وبابكر شبعان ماكل فتريتة ...يعني مافي مقارنة بين احمد وبابكر ...
اها بابكر رمى احمد ف الارض وقعد من فوق عليهو واحمد يفرفر ....وبابكر عاتي وجهامة ... هاجر ليك احمد ف الارض و مد يدو شال الفاس المرة دي بالاتجاه السنين ...المحل البقطعو بيهو ...ووجه الفاس على راس احمد ....
احمد طبعا ما قادر يعمل اي حركة لانو بابكر راكب من فوق عليهو .... فااا ضم اكتافو وميل على جنب والضربة جات ف الترقوة ف كتفو ....شفففففف ... والدم طار .....
بابكر ثبت ليك احمد كويس ف الارض و تاني رافع الفاس وبكل قوتو على راس احمد و كففف ....
ف زول ثبتو من يدو ...
بابكر صرخ : فكني ااا عثمان ...
عثمان : بتكتل الزول ااا بابكر ...
بابكر : بكتلو وبكتل عمي زاتو لو وقف قصادي ....فكني ااا عثمان ...
عثمان : نحن اتفقنا نخوفو بس ااا بابكر ...
بابكر : زولك عامل فيها ما بخاف ااا عثمان ...قلت ليك فكني .....
بهناك حاج الرضي لمن احمد اتأخر ...قلبو اكلو وطلع جا وراهو وشايف ف ضو القمر الناس بيتصارعو ف نفس المكان الانقطع فيهو السلك قبيل وصلحوهو مع احمد ...فااا عرف انو احمد حاصلة ليهو حاجة… او بيتصارع مع زول ...
حاج الرضي دق الكروراك : عووووك ...ااا ناس الحلة ...احلقونا ...عووووووك ...اااا ناس الحلاااااااااااا… الفزعة ااااا ناس ...عوووووووك ...وروروووووك....
حاج الرضي جا جاري ب عصاهو ويعتر ويقع ويقوم ...عوووك ....
بابكر وعثمان لمن شافو الكوراك حق عمهم ...وناس الحلة جايين جارين عليهم ...برااحة دخلو ف البيت المهجور وطلعو ب ورا… زحفو واختفو عن الانظار...
حاج الرضي وناس الحلة وصلو عند احمد لقوهو غرقان ف دمو وكتفو ينزف ....
اها ناس الحلة حاولو يسعفوهو بس المشكلة الدم بينزف ب غزارة ....فااا لفو ليهو كتفو ب عمة وجابو بوكسي من بكاسي الحلة ورفعو احمد وناس البلد كمان يعجبوك… ناس واجب… فااا كلهم ركبو ف البوكس ب ورا ...ومشو المركز حق القرية الجنبهم ...بس دكتور المركز رفض يستلمو لانو احمد حالتو خطيرة وممكن يحتاج عملية والمركز ما فيهو خدمات....بالجد الدكتور ليهو حق ...اذا كان هو مكتبو عبارة عن كرسي بلاستيك عادي زي كراسي البيت والطربيزة بتاعتو زي طربيزة المطاعم البياكلو فيها الزباين و مغطية ب مشمع ....وادواتو ...السماعة بتاعتو وقلم يكتب بيهو ودفتر يكتب فيها الروشتة ...وشغالة معاهو ممرضة واحدة بتساعدو وبتطعن الناس حقن ...وصيدليتهم عبارة عن تلاتة رفوف خاتين فيها بندول وبنسلين وجامع امراض ....و اي زول جاهم عيان ...عندو حمى ..وجع راس ..وجع نوايط ...رطوبة ...وجع ضهر ...طقاك عقرب ..عضاك دبيب... اكلك مرفعين ...بلعك تمساح ...وقعت ف بير ..المهم علاجهم يا حقنة يا حبة... يدوك ليها ويقولو ليك خلاص امشي نوم و بكرة حتبقى كويس ان شاء الله...والحاجة الغريبة انو الشخص المريض في اليوم التاني بيشعر بتحسن ..( دا دليل على انو نصف العلاج ف الحالة النفسية للشخص المريض... يعني لو انت مريض وشايل هم المرض ونفسياتك تعبانة ...كدا المرض ح يتمكن فيك وما ح تشفى بالساهل وممكن العلاج يطول معاك حتى لو بتاخد الدواء...لكن لو انت ماشايل هم للمرض ولا شغال بيهو كتير وعايش دنيتك وبتاخد الدواء الصحيح وحالتك النفسية فل الفل ..ح تلقى نفسك تدريجيا بقيت كويس ...
حمانا الله واياكم من الامراض وعافى مرضانا ومرضى المسلمين جميعا ).....
اها الدكتور قال ليهم من دربكم دا امشو بيهو المستشفى الكبير ف المدينة ....
السواق دور البوكس واتحرك فووووووو على المدينة ...طبعا حاج الرضي راكب قدام مع السواق وماسك احمد ...و لو شفتو عمكم حالتو تحنن جلابيتو مليانة دم وهو ماسك احمد ويعاين ليهو وعيونو مرقرقة تقول احمد ولدو..... واحمد كاضم ما فيهو لا نفس ولا اي حركة ...وسواق البوكسي يعاين ل احمد والدم الكتير ويزيد ف السرعة… ماشي ب كلو ...عاضي جلابيتو ب سنونو وقاطع الفيافي… دقداق على ترعة على حفير على سرابات ..الناس الراكبين ورا خجاهم ليك خج والزول الما ماسك قوي عادي بقع والبوكسي ماشي فرش.....لغاية ما وصلو المستشفى....
وصلو هناك ومع جوطة المستشفى هناك ف البوابة قالو ليهم ما يدخلو الا يعملو اورنيك 8 ....
الجماعة قالو ليهو : هااا زول انت عقلك دا ما كويس ولا شنو ؟؟؟...الزول ما فيهو ولا نفس وانت بتقول اورنيك 8 ؟؟؟...…
قال ليهم : دي اجراءات يا جماعة ولازم نعملها اول ...
الجماعة رفعو عكاكيزهم ووقفو الف احمر ....دفرو الباب وخشو جابو النقالة وختو فيها احمد ودخلو المستشفى ...وبدت المساككة ورا الدكاترة ...حاج الرضي والجماعة لازين النقالة قامو دخلو غرفة لقو فيها دكتورة ومعاها مريض ... و مجرد ما شافت حالة احمد ...اشرت ليهم على الغرفة الجنبها .....الجماعة لزو النقالة للغرفة الجنبو لقوها فاضية ما فيها دكتور ...فااا بقو لافين ف الصالة بالنقالة يفتشو ليهم ف دكتور وحاج الرضي ينادي : اااا ناس ...شوفو لينا دكتور ااا ناس… الزول بموت اااا ناس....
ومافي اي زول شغال بيهو ....
حاج الرضي شاف ليهو واحد كدا لابس لاب كوت وشانق ليهو سماعة ف رقبتو… وجاي داخل من باب المستشفى وشايل تلغونو بطبز فيهو ....
حاج الرضي مشى عليهو ومسكو من يدو وقال ليهو : تعال ااا دكتور شوف لينا الزول دا…
الدكتور مشغول ب تلفونو ..عاين ل حاج الرضي ب جلابيتو المليانة دم… زح يدو من حاج الرضي وواصل ف مشيهو…
حاج الرضي تاني مسكو من يدو ...واترجاهو ب عيونو المرقرقة وقال ليهو : عليك الله ااا دكتور تعال شوف لي ولدي دا…حلفتك اااا دكتور…
الدكتور وقف واخد خطوة ل ورا من حاج الرضي وقال ليهو ب تعالي : طيب يا حاج ياخ وينو ولدك ؟؟؟…
حاج الرضي اشر للدكتور علي النقالة الفيها احمد ومشى قدامو لغاية ما وصلو النقالة والجماعة محاوطينها…
الدكتور طقطق ليهم : زحو شوية يا جماعة لو سمحتو…
الجماعة زحو وخلو فرقة للدكتور دخل وعاين ل احمد وشاف حالتو وجسمو كلو دم…
الدكتور خت يدو ف رقبة احمد و جس نبضو ... وعاين ل حاج الرضي ب يأس وهز راسو وقال : للأسف يا حاج…
حاج الرضي حيلو برد وقال للدكتور : ف شنو ااا دكتور ؟؟؟…
الدكتور ب يأس : …
####
في مكان تاني …
عبد الله جاب الشيلة والشنطة وحاجات العرس كلها… زول جاهز ما صدق زاتو انو عمو وافق علي زواجو من مروة …
اها مروة ما كانت متوقعة انو الكلام دا يحصل بالسرعة دي… لانو الاسبوع الفات ابوها كلم عبدالله… وعبدالله الاسبوع التاني طوالي جاب حاجاتو وابوها قال العرس الجمعة الجاية طوالي…
مروة كانت مفتكرة انو عبدالله ما جاهز و لحدي ما يجهز هي ف الفترة دي تحاول تقنع ابوها ب اي طريقة… بس بعد دا تاني مافي طريقة لانو العرس موعدو اتحدد… وكتمت فيها… مسكينة…
مروة طبعا ما بتطيق عبدالله نهائي…لانها الخبر واصلهم وهي عارفة افعالو مع نساوينو… يعني ما زول عشرة ولا بمسك ليهو مراة…
مروة الدنيا قفلت ف وشها ودخلت غرفتها بقت تبكي ب حرقة…
سميرة ما بيدها شي تعملو ل بتها فاا بس قالت ليها اصبري يا بتي وربنا يسهل ليكي…
اها مروة بقت قاعدة جوة غرفتها حزينة وما بتطلع منها… وامها بتجيب ليها الاكل تختو ليها لكن مروة ما بتاكل…
يلا لمن سميرة شافت بتها ما بتاكل قالت تتكلم معاها…
سميرة : يا بتي اكلي احسن ليك… انتي عروس وصحتك كل يوم ماشة ف النازل…
مروة : ما عايزة عرس ولا عايزة اااكل يا امي… ان شاء الله اموت زاتو عشان ترتاحو مني ..
سميرة : يا بتي استغفري… دا كلام شنو ؟؟؟…
مروة : مش دا الانتو عايزينو…يا رب اموت هسي دا….
اها سميرة قدر ما حنست بتها عشان تاكل ومروة رافضة تاكل… سميرة كلمت حاج العوض ومحمد وقالت ليهم شوفو ليكم صرفة مع البت دي ...
العوض : كلمي بتك دي يا سميرة وقولي ليها تعقل…. عبدالله مالو يعني مشكلتو شنو ؟؟…
محمد ب صوت عالي عشان مروة. تسمع : دا دلع منها بس… خلوها مافي زول يتكلم معاها و لو جاعت براها بتمشي تاكل…وقولي ليها العرس دا قايم يعني قايم… كان اكلت ولا قعدت جعانة…
*تعريجة*
(ف مقولة محمد دي انو الزول لو جاع براهو بمشي يفتش الاكل…
اها مرة من المرات ايام كنت راسطة (عاطل)… الحاج شاكلني ف موضوع كدا وزفاني ليك سمعني نغمات وانا عملتا زعلان حردتا الاكل جابو العشاء وانا محنبك وشي وعامل كاتم وقلت ما عايز اكل… عزة. نفس وكدا… الجماعة ولا اشتغلو بي ولاااا في زول حنسني… حتى نبع. الحنان عزت نفسها ولا راعت ل جوعي... وانا جعان كلب بس… اها راقد ف سريري وبتنفس شرار شرار من الزعل…ومصاريني بتشاكلو جوة لمن بعملو صوت كررر كرررر كرررر… ياخ انا خشمي بقى مر من الجوع وعامل فيها عزة نفسي…اها خليت ليك ناس البيت بعد رقدو صلطة…وانا طبعا ما قادر انوم…ياخ انوم كيف وانا جعان ؟؟… يلا قمتا اتسحب براااحة زي حرامي الجداد… وفتحت المطبخ برااحة دخلت جوة وولعت تلفوني اب لمبة لقيت لي باقي اكل وقعدت اضرب…يا دوب بديت احس بالحياة… اها شوية كدا وباب المطبخ فتح والنور ولع…وعيني تقع ف عين نبع الحنان ...انا طوالي صريت وشي وقلتا لها ب زعل : عايز اتسمم واموت زاتو… ان شاء الله اموت ليكم وارتاح زاتو…
نبع الحنان ولا اشتغلت بي… فتحت التلاجة شربت ليها موية وقفلت التلاجة وطفت النور وجرت باب المطبخ ومشت ...ولاااا عبرتني ب كلمة كأنها ما شافتني…ياخ انا بقيت صغير نملة بس…
المهم كملت اكلي ووقفت دب…وشربت لي موية وطلعت اتسحب لغاية ما رقدتا ف سريري…
يلا من اللحظة وانا قلبي بقى ميت….وما بفرط ف بطني…بعمل معاك مشاكل وبتلبط فيك… لكن وكت الطقة انت زولي…ومجرد ما انتهينا وغسلنا يدينا… بركب ليك وش حديد عادي…
فااا شنو با جماعة .. ما اصويكم )…
نرجع
المهم سميرة مشت دخلت المطبخ وختت ل بتها اكل وشالت الصينية قالت تمشي تاكل معاها ف غرفتها …
سميرة لزت باب الغرفة ودخلت… شافت بتها مسطحة ف السرير وعيونها بيييض وجنبها شريط حبوب فاضي ....
سميرة رمت الصينية وصرخت : مروة… مروااااااا…
…
..
.
كونو بخير…
.
..
...
