سميرة رمت الصينية وكوركت مروة مرواااااااا....وجرت مسكت بتها وبقت تهز فيها ... ومروة عيونها بيييض وبتشخر وخشمها بطلع زبد ...
سميرة صرخت : الحقني يا حااااج ...بتك بتموووت ....
العوض سمع صراخ سميرة وقام جاري ومحمد وراهو دخلو الغرفة لقو مروة بالمنظر البشع دا ...
العوض مسكها هزاها وقالت ل محمد : شغل العربية يا محمد سريع ....
محمد طلع شغل العربية والعوض شال مروة ختاها ف العربية وجري على المستشفى ....
طبعا المستشفى خاص ... مجرد ما مروة دخلوها المستشفى طوالي اسعفوها و على غرفة العمليات ركبو ليها اجهزة وعملو ليها غسيل سريع وركبو ليها دربات .... والحمد لله انقذوها وحالتها استقرت ....
طبعا راقدة ف المستشفى يومين عشان يطمنو عليها مع انها بقت كويسة الحمد لله ...بس ابوها كان قلقان عليها شديد .....
اها كان ف دكتورة متابعة حالتها وطوالي بتجي داخلة عليهم تتطمن عليهم ....يلا مع الاسئلة والونسة سميرة كلمتها ب كل حاجة ....
الدكتورة قالت ل سميرة : خليني عايزة اتكلم معاها لو سمحتي ....
الدكتورة جرت كرسيها وقعدت جنب مروة وبدت تتكلم معاها و سألتها عن سبب محاولتها الانتحار ... لانو الشروع ف الانتحار ف حد ذاتو جريمة بيحاسب عليها القانون وكمان لو ماتت حسابها ح يكون عسير يوم القيامة .....
مروة حكت ليها ب كل حاجة وانو ابوها عايز يغصبها تتزوج ود عمها وهي ما عايزاهو ....
الدكتورة : طيب انتي بتحبي زول تاني ؟؟؟....
مروة : ما بحب ولا اي شي ... وعمري ما عملتا علاقة مع ولد ....
الدكتورة : طيب السبب شنو انك ما عايزاهو ؟؟؟...
مروة كلمتها عن عبدالله وصفاتو السيئة.....وانو ما هو فارس احلامها ولا هو الزول ال كانت بتحلم بيهو....
الدكتورة : ما حاولتي مع ابوكي ولا لقيتي طريقة تخلي ابوكي يغير رايو ؟؟؟....
مروة : حاولتا معاهو ورفضتا بس ابوي مصر انو يزوجني ل ود اخوهو ...
الدكتورة : طيب كان تتكلمي مع ود عمك زانو وتقولي ليهو انك ما عايزاهو ....
مروة : اصلا ود عمي انا لو قلت ليهو ولا ما قلت ليهو ...هو ما ح يغير رايو ولو عرف اني ما عايزاهو يادوبي ح يتمسك بي زيادة طالما ابوي واخوي موافقين ....
الدكتورة : يعني انتي ما لقيتي قدامك اي حل غير تنتحري ؟؟...
مروة : اقسم بالله الدنيا مسخت لي وقلت اهرب من البيت دا… بس اهرب امشي وين… قلت احسن اموت وارتاح ....
الدكتورة : ما صاح منك الكلام دا ...انتي زولة عاقلة وفاهمة ....و و و…
الدكتورة اتكلمت مع مروة وقالت ليها كلام ايجابي وانو الدنيا ما وقفت علي كدا... وقدامها بنات كتار اهلهم غصبوهم يتزوجو رجال ما عايزنهم… وعايشين معاهم وولدو منهم …وقالت ليها الحياة لسه قدامها… و لازم يكون عندها امل و انها تحاول تغير من صفات ود عمها طالما انها ما عندها خيار غيرو… بس لا تفكر تهرب من بيت ابوها ولا تحاول تنتحر…
اها بعد كلام الدكتورة الايجابي…مروة ما اقتنعت بس مافي حل تاني… فااا سلمت امرها لله ورضت بالأمر الواقع…. لكن قالت ل ابوها كلام حار خلتو يتأسف علي اليوم قبل فيهو زواجها من عبدالله…مضمون الكلام انو ابوها ما عايز سعادتها وهي كانت بتحلم انها تتزوج الشخص المناسب وتبدأ معاهو حياة جديدة… بس زواجها من عبدالله يعتبر نهاية حياتها و ح تعيش معاهو بجسدها فقط بدون روح لانها خلاص حاسة ب انها ماتت حسيا ومعنويا…واخر حاجة قالت ليهو ما بقدر ادعي عليك لانك انت ابوي ... لكن بقول ليك الله يسامحك ..الله يسامحك ....
الله يسامحك… الله يسامحك ..الله يسامحك…الكلمة دي هي قالتها مرة واحدة و بقت تتردت ف اذن العوض…بس ما قادر يرجع من كلمتو الاداها ل اخوهو…ومحمد كمان قاعد يوسوس ليهو…
طبعا هم ما كلمو عبدالله واهلو بالشي الحصل ل مروة… لانو ما معروف بعدين ردت فعل عبدالله ح تكون شنو فااا عملو المراسم عادي وتم الزواج وعبدالله ساق مرتو ومشو شهر العسل….
اها بعد انتهاء الزواج هند رجعت البيت وبقت تعمل الدواء حق الفكي للحاج… وسميرة طبعا بتفكر ف بتها وما فاضية ل هند …
حاج العوض بقى يطش شبكة كتير وبقى يفقد الحاجات بطريقة غريبة...قروش وايصالات وفواتير و حتى مفتاح الخزنة فقدو وما عارف ختاهو وين ....ويفتش ما يلقاهو ...ويسأل محمد ...محمد بقول ليهو ما عارف ...وبحاول يضللو ....
اها العوض لمن حالتو اتأزمت ونسيانو بقى كتير… قال يمشي للدكتور ويفحص ويشوف الحاصل شنو ....
كلم محمد عشان يوديهو الدكتور وطبعا محمد استشار هند ف الموضوع دا وهند قالت ليهو امشي معاهو عادي عشان ما يشك فيك لكن لو الدكتور قال ليهو اي حاجة او الفحصوصات ظهرت فيها حاجة… ما تكلم ابوك وحاول خبي منو الفحوصات… .
اها محمد مشى مع ابوهو الدكتور وحاج العوض حكى للدكتور وعمل ليهو فحص عام لكن ما في حاجة ظهرت ... فاا قال ليهو امشي ل اختصاصي مخ واعصاب…
محمد وابوهو رجعو ... بس العوض قال في نفسو انو دا ما مرض دكاترة يعني احتمال يكون مرض كبر… يعني شايف نفسو عجز وجاهو زهايمر….
العوض رجع البيت المساء وبعد ارتاح شوية سميرة سألتو….
سميرة : اها يا حاج ان شاء الله عافية ؟؟؟… الدكتور قال ليك شنو ؟؟؟…
العوض : قال مافي حاجة يا سميرة… بس والله انا حاسي نفسي ما كويس… وكل يوم النسيان بزيد… اي حاجة بختها ف مكانها ما بلقاها… مرات بتذكر ومرات ما بتذكر نهائي…
سميرة : سلامتك يا حاج ان شاء الله ما تشوف شر…
العوض : وعرس مروة اثرني شديد والله حاسي باني اتسرعت واديتها ل عبدالله…
سميرة : خلاص يا حاح ما تشغل نفسك… الموضوع تم وبتك ف بيت راجلها… .بس ادعي ليها ربنا يسترها ويهنيها…
العوض ب حسرة : قاعد ادعي ليها ف كل صلاتي والله…
سميرة حست ب انو العوض ندمان… لكن بعد دا ما بفيد الندم…
العوض عاين ل سميرة ب نظرة بائسة وقال ليها : نادي ولدك محمد دا عشان عايز استشيركم ف موضوع…
سميرة : خير يا حاج ؟؟ موضوع شنو ؟؟؟…
العوض : كدا نادي محمد…
سميرة نادت محمد وجو الاتني قعدو قدام الحاج…وهند طلعت من الغرفة وعملت نفسها داخلة المطبخ…
العوض شاف هند وقال ليها جيبي لي موية يا بتي،…
هند جابت الموية وادتها للحاج ووقفت جنب محمد…
العوض : اسمعوني كويس يا جماعة… انا حالتي دي بقت تزيد كل يوم… فاا قررت اوزع املاكي للاولاد … واكتب ل محمد واحمد و مروة اي زول حقو براهو… عشان انا ما معروف ل قدام يحصل لي شنو…
سميرة : ربنا يديك الصحة والعافية وطولة العمر… بس لسه انت شديد مافي داعي توزعها عليهم…
العوض : اصلا المال دا حقهم ياسميرة و ح يستلموهو كان الليلة ولا بعد ما اموت…عشان كدا انا عايز اريح ضميري واديهم حقوقهم… علي الاقل احمد ومروة يرضو عني …انتي ما شفتي كلام مروة دا اثر فيني كيف !!!… واحمد برضو مرق من البيت وهو زعلان …
سميرة : والله ياحاج ما عارفة اقول ليك شنو… لكن البتشوفو مناسب اعملو… .
العوض عاين ل محمد وقال ليهو : وانت يا محمد رايك شنو ؟؟؟…
محمد عاين ل هند لقاها بتحدر ليهو… شكلها ما راضية بكلام ابوهو… فااا قعد يتمتم ب كلام كدا ما مفهوم ...
المهم العوض خلاص اخد قراوو و ح يوزع ليهم ممتلكاتو…
محمد وهند بعد مشو غرفتهم…
هند : سامع ابوك بقول ف شنو يا محمد ؟؟؟…
محمد : اااي سامعو…طيب مش كويس يدي اي زول حقو عشان الواحد يقدر يتصرف ب راحتو ؟؟…
هند : انت فاهم يعتي شنو ابوك يقسم ليكم املاكو ؟؟؟… يعني انت ح تطلع بالتلت بس… ولو ادى امكم معاكم معناها نصيبك ح يكون الربع بسس…عارف يعني شنو الربع ؟؟؟…
محمد : طيب ومالو ؟؟….
هند ب غضب : محمد والله انت ح تجيب لي المرض…ياخ افهم الربع دا ما بيعنيايحاجة بالنسبة للانت عملتو مع ابوك …يا محمد انت خليت الدراسة وضحي ب عمرك ومستقبلك عشان تقيف جنب ابوك… انت السبب الخلى ابوك يبقى تاجر كبير ويكون عندو الاملاك دي… وبعد دا كلو انت راضي بالربع يعني ؟؟؟…واخوك واختك حقهم يجيهم ف مكانهم وهم مرتاحين وما تعبو زيك…واحتمال زاتو ابوك عشان يرضيهم يديهم اكتر منك لانو حاسس انو ظلمهم…
محمد : والله صحي كلامك… بس الحاجة الكويسة اني لميت منو قروش كويسة والمخزن حقي اتملا محاصيل… وشلت الورق حق المحلات والمخازن من الخزنة بتاعت الحاج…
هند : انت مفتكر شوية القريشات الشلتها دي ولا الشوالات البسيطة دي بتعني حاجة ل ابوك ؟؟؟… ياخ انت عارف المحل الواحد ف السوق المحلي ايجارو كم ؟؟؟… ولا ابوك كل شهر بيدخل ف حسابو كم من ايجار المحلات ؟؟؟… يا محمد شوالاتك الانت شلتها دي بكرة بتبيعها وتاكل حقها… بس المحلات بكون دايمة…يعني كل شهر بيدخل جيبك مبلغ وقدره…
محمد : طيب نعمل شنو يا هند وريني ؟؟…
هند زنت ف راس محمد ب قروش واملاك ابوهو وانها لازم تكون حقتو هو براهو او علي الاقل تلاتة ارباعها يكون ملكو ..عشان لمن ولدك يجي للدنيا يلقانا امنا ليهو مستقبلو و عملنا ليهو حاجة للزمن… فااا قالت ليهو ابوك دا لازم نشوف ليهو طريقة لانو الدواء دا ما نفع معاهو… فاا لازم نشوف دواء اقوى من دا…
محمد قال ليها : طيب شوفي صحبتك الصيدلانية وخليها تديكي دواء تاني…
هند : خلاص بكرة الصباح وديني عند امي وانا بتصل علي صحبتي وبكلمها تجيني ف البيت عشان انا تقيلة ما بقدر امشي ليها…
محمد : طيب بوصلك انا بالعربية لغاية عندها…
هند : لا لا بس وديني عند امي وتاتي ما عليك…
الصباح محمد بدري وداها عند امها واداها ربطة قروش ورجع ل ابوهو ساقو ومشو الشغل…
هند مع امها سعاد…
سعاد : خلاص يا بتي ..بعد دا البيت فضى ليكي وتقدري تعملي الانتي عايزاهو ....
هند : ما ح الحق اعمل حاجة يا امي…
سعاد : ليه يا بتي ؟؟… مش خلاص مروة عرست وخلت ليكم البيت ؟؟…
هند : المشكلة انو ابو محمد عايز يوزع املاكو ويسجلها ب اسم اولادو… يعني عايز يدي اي زول حقو…
سعاد : وانت تطلعي ساي يا بتي ؟؟؟…
هند : شفتي المصيبة يا امي !!!..يعني محمد تاني ما ح يقدر يتصرف الا ف حاجة ب اسمو…
سعاد : انتي عارفة الحاج دا بكون عندو املاك كتيرة… محلات وقروش ... عشان كدا الحقي سريع خلي محمد يكتب ليكي كم حاجة ب اسمك قبل الحاج ما يوزعها عليهم…
هند : طيب اعمل شنو يا امي ؟؟؟…انا جيتك عشان تشوفي لي حل…
سعاد : كدا خلينا نمشي للفكي ونشوفو ح يعمل لينا شنو ف المصيبة دي…
هند : يلا يا امي ارح…
سعاد وهند طلعن ومشن للفكي… وحكو ليهو كل حاجة وانهم جايات عشان يشوف ليهم طريقة ويلحقو الحاج قبل ما يسجل الاملاك ب اسم اولادو….
الفكي : شوفو يا جماعة… انا ما عندي حاجة اديكم ليها الا ( راح فيها )…
هند : راح فيها دا شنو يا الفكي ؟؟؟…
الفكي : راح فيها دا بخلي الزول ينترم يعني بودي الاخرة طوالي…بدون الم بدون ما يحس ب اي حاجة…يعني مجرد ما يستعملو بخلي يموت بالبطيء وفجأة يقع ويروح فيها…
هند عاينت ل امها وامها هزت ليها راسها بالموافقة…
هند : خلاص اعملو لينا يا الفكي ..بس نحن عايزينو يموت بسرعة ما يموت بالبطيء…
الفكي : دا بتوقف علي استعمالو… يعني كل ما اديتوهو كتير… الشي دا بتغلغل ف جسمو وياكل اعضاؤو الداخلية من كبد وكلى ورئتين وقلب وفجأة يكتم كتمة واحدة ويقع كاضم يروح فيها…
هند : طيب يا الفكي الشي دا بيظهر انو الزول مكتول لو ودوهو المشرحة…
الفكي : لا لا راح فيها دا مجرد ما يدخل جوة الجسم بتلصق في جدار الاعضاء من برا وبياكل فيها… ومجرد ما الشخص يموت خلاص نص ساعة راح فيها بتحلل… وما بظهر ف الدم…
هند : بس خلاص ادينا ليهو يا الفكي ؟؟؟..
الفكي : راح فيها دا بكلفك يا بتنا…
هند : ما مشكلة يكلف قدر ما يكلف… بس انت ادينا ليهو…
الفكي : يلا وريني…
هند : اوريك شنو يا الفكي ؟؟؟…
الفكي حدر ليها…
هند طلعت ربطة من شنطتها ورمتها قدام الفكي…
الفكي : هو اووو… (اقفل خشمك وانطقها…زي الزول لمن يئن… بس الفكي قالها بالطريقة دي )…
سعاد لكزت بتها عشان تزيد للفكي…
هند فتحت شنطتها ومافي قروش تاني : خلاص ما عندي قروش تاني يا الفكي… لكن بجيب ليك حقك…
الفكي قعد يحدر ليها… وهند عاينت للفكي لقتو بعاين للغوايش الفي يدها…
هند كانت لابسة ليها اربعة غويشات طلعت ليها غويشة ورمتها للفكي…
الفكي : هو او او اووووو…
هند : انت مالك طماع كدا يا الفكي ؟؟…
الفكي ب زعل : انا طماع ؟؟؟… طيب انتي الحتلقيهو من وراي دا شوية ؟؟؟… خلاص امشو شوفو ليكم زول تاني يعمل ليكم الانتو عايزينو مجاني…
سعاد : لا لا يا الفكي خلاص معليش ..
سعاد مسكت يد بتها وقلعت منها الغويشات كلهن ورمتن للفكي…
الفكي فتح المخلاية بتاعتو وطلع منها اكياس كدا فها بدرة وخلطها مع بعض وكباها ف علبة صغيرة واداها ل هند…
هند وامها طلعن من الفكي…
سعاد : ما تنسيني معاكي يا بتي ... سجلي لي ان شاء الله محل واحد …
هند : حاضر يا ست الكل .…
هند المساء رجعت البيت مع محمد وبدأت تنفذ خطة اغتيال حاج العوض…
…
..
.
كونو بخير…
.
..
…
