ااحمد سمع الشباب بتكلمو عن المثلث وعربات البوكو والطريق ...ومن كلامهم عرف انو الشباب ديل قاعدين يمشو ليبيا ...
اها احمد جا قريب جنبهم والشباب انتبهو ليهو واحد منهم عاين ليهو ب دهشة وقال ل احمد : ف جاحة يا مان ؟؟؟…
احمد : معليش يا شباب ما قصدي اتصنت عليكم عليكم ..بس لو سمحتو ممكن استفسار بسيط ...
الشاب : احكي ...
احمد : سمعتكم قاعدين تتكلمو عن عربات البوكو ...انتو قاعدين تمشو ليبيا ؟؟؟...
الشاب استعدل ف جلستو وقال : اااي يا مان ...عايز ليك عربية ؟؟؟...
احمد : والله ياخ ما عايز عربية لكن عايز امشي ليبيا ؟؟؟...
الشاب : ياو بس يا عمك فهمك شنو ف ليبيا ماشي شغل ولا عايز تجيب عربية ولا عايز تعبر ....
احمد : عايز اسافر والله بس عايزك توروني الطريقة كيف ..
الشاب : يعني عايز تعبر ؟؟؟...
احمد : اااي والله ...
الشاب : والله يا عمك عشان ما اطلع بيك العالي… انا زول مثلث بس… بسلم وبستلم وبرجع…يعني ما دخلت جوة البلد ديك… لكن لو انت جادي ف البرنامج دا انا بوريك سان شغال ف التهريب يوصلك جوة ليبيا ويسلمك للجماعة البقطعوك البحر ....
احمد : خلاص عليك الله وريني ليهو او اديني رقم تلفونو ....
الشاب طلع تلفونو وفتش الرقم وقال ل احمد : استلم يا مان 09....اسمو وليد ....دا سيد الرصة.... رندق معاهو وهو بطرش ليك الحنك كلو ...
احمد سجل رقم التلفون وبقى يفكر ف موضوع السفر دا لانو من زمان ف راسو ...
يوم ويومين تلاتة واحمد بفكر ف موضوع السفر…وبعد تفكير عميق…وصل ل انو لازم يسافر ب اي طريقة… وقال اصلا البلد دي قلبو اباها وما عندو فيها اي هدف ولافيها حاجة تخليهو يقعد ...فااا احسن يهاجر ويشوف ليهو بلد تانية…يأسس فيها نفسو و يمسح جراحو وينسى آلامو …
بالمساء كدا الشاب صاحب المحل جاهم وقعد مع احمد سالو عن الشغل وقعد يتونس معاهو ...
اها احمد قال ليهو : تلفونك فيهو رصيد ...
الشاب : اااي ...
احمد : عايز اضرب ل زول دقيقتين بس ...
الشاب طلع تلفون ومداهو ل احمد : لا عادي اخد راحتك يا فردة ....
احمد اتصل على الرقم و رد عليهو صاحب الرقم : الو ...
احمد : سلام عليكم ...
صاحب الرقم : وعليكم السلام ...
احمد : وليد ؟؟؟...
صاحب الرقم : ايوا وليد… منو معاي ؟؟....
احمد : والله انا اداني رقمك واحد كدا وقال انت بتسفر الناس ....
وليد اتردد شوية وقال ليهو : عايز شنو انت ؟؟؟...
احمد : عايز اسافر ...
وليد : تسافر وين ؟؟... ومنو القال ليك انا قاعد اسفر الناس ؟؟....يا زول الرقم غلط ....
احمد قبل ما وليد يقفل الخط قال ليهو : دقيقة دقيقة ما تقفل عليك الله ....
وليد : يا شيخنا ما قلنا ليك الرقم غلط ف شنو تاني ؟؟؟...
احمد : ياخ اسمعني ...انت وليد وانا عارف انك البتسفر الناس لانو الزول الاداني الرقم دا كان جادي معاي وقال لي انت ال ح توريني اسافر كيف ...عليك الله عايز اتخارج من البلد دي وما بعرف لي زول يخارجني ....
وليد سكت شوية وقال ليهو : طيب يا معلم ...دا ما كلام بتقال بالتلفون ...خلينا نتقابل وبعد داك نشوف حنكك شنو ....
احمد : يا زول مافي مشكلة ...عايزني اقابلك وين ؟؟؟...
وليد : كدا اول حاجة خليني اتعرف بيك وتوريني شغال وين وبعدين بوريك نتقابل وين ...
احمد : انا اسمي احمد العوض شغال ف مغسلة عربات اسمها كلين كار ف امدرمان المكان الفلاني الشارع الفلاني ...
وليد : تمام با عمك ... انتظر مني رنة ...
احمد : دا ما تلفوني يا وليد ...دا تلفون صاحب المحل...لكن لو عايزني ما مشكلة اتصل عليهو وقول ليهو عايز احمد ...
وليد : منتهي يا جاح ...
احمد قفل الخط ورجع التلفون للشاب صاحب المغسلة وقال ليهو : معليش المكالمة جرت ...
صاحب المغسلة : لا لا يا مان ولا يهمك ...سامعك عندك نية سفر ...
احمد : اااي والله ...قهرتا ياخ ونفسي اتخارج من البلد دي ...
صاحب المغسلة : لكن سفر البحر دا فيهو مخاطر يا عمك ...والله ما بنصحك ...
احمد : وفر كلامك…كان نصحتني ولا ما نصحتني اصلا انا مسافر يعني مسافر ..
المهم صاحب المحل قعد معاهم لغاية بعد العشاء… شاف الشغل واستلم حاسباتو ومشى ...
احمد لاحظ ف عربية واقفة مقطع الظلط مقابل المحل وفيها زول ...العربية واقفة من بعد العشاء ما اتحركت من مكانها ولا اىزول الراكب فيها ما نزل منها ...بس احمد ما خت ف بالو حاجة وقال يمكن منتظر ليهو زول او العربية عطلانة وصاحبها منتظر المكنيكي....
اها الساعة عشرة الا ربع ... عايزين يقفلو المغسلة ... واحد من الاولاد مشى يستحم والتاني عايز يقفل ابواب المغسلة ...صاحب العربية الكانت واقفة قصادهم جا وقف قدام الباب وضرب ليهم بوري وقال : دقيقة دقيقة ما تقفل ...
الولد : خلاص يا عمك زمنا كبس تعال بكرة....
صاحب العربية : بودي بس على السريع يا مان خمسة دقيقة بس يا اصلي (قصدو يغسلو ليهو العرية من برا بس )....
الولد : ضيقة والله يا عمك ما تحركها لينا… تعال صباحات ...عايزين نتكل ياخ ....
احمد طبعا متضايق من صاحب العربية لانو واقف من قبيل وما جاب عربيتو عشان يغسلها وهسي بعد هم عايزين يقفلو يقول ليهم عايز يغسلوها ليهو !!...حركة غياظة...
صاحب العربية عاين ل احمد : يا حبيبنا ... ماشي المطار ياخ عندي زول جاي من السفر وما بلقى لي مغسلة فاتحة ...
اها صاحب العربية حنس احمد واحمد اتكلم مع الولد الغسال ووافق بعد تحنيس لكن قال ليهو العشاء عليك ...
صاحب العربية دخل عربيتو ونزل وقف بعيد ولع ليهو سجارة والولد قاعد يغسل ف العربية واحمد واقف يتثاءب نعسان وكل شوية يطلع الطرحة من جيبو يشمها ويسرح ....ويرجع من سرحتو يعاين للولد عايز يشوفو انتهى ولا لسه يلقى صاحب العربية بعاين ليهو ...
احمد استغرب الزول دا شبهني ولا مالو كل مرة بعاين لي كدا ...وهو زاتو شكلو غريب...عامل فيها راسطة… لابس ليهو سلاسل وخواتم كبيرة واسورة وعامل ليهو بكش كدا…ركشة بس ..المهم احمد ما اشتغل بالموضوع كتير ...رجع ل سرحتو ...
شوية كدا ويشوف صاحب العربية جا وقف جنبو ...
صاحب العربية : انت احمد العوض ؟؟....
احمد : اااي ...خير ؟؟؟...
صاحب العربية : انا وليد الاتصلتا عليهو قبيلك ....
احمد سلم عليهو : شايفك من بدري واقف ...مالك يا زول ما جيت داخل من اول ؟ ..
وليد : والله يا جاح البلد دي فنياتها كترت… عشان كدا الاحتياط واجب…
احمد : كويس انك ظهرتا… اها ااسفر كيف والمطلوب شنو ؟؟…
وليد عاين ل احمد كدا : اهلك ف السيتي هنا ولا وين ؟؟؟....
احمد : اهلي خليهم ..انا عايز اتخارج و بس ...لو عندك طريقة يا حبيبنا ..انا من يدك دي ل يدك دي ...ولو ما عندك طريقة خليني اشوف غيرك ...
وليد : لا لا انت وصلت يا مان ...بس الشغلة دي ما بتتجازف … يعني صعبة شوية ...
احمد : صعبة من ياتو ناحية كدا فهمني واشرح لي الكلام كلو ...
وليد : اول حاجة لازم يكون جيبك تقيل يعني عندك قالب...من هنا بنوديك المالحة بيستلموك جماعة شغالين هناك بدخلوك البلد ديك ومن هناك بتلقى ناس عابرين بتدفع ليهم وتعبر معاهم يا مان ...بس لازم يكون قلبك قوي وبتعرف تعوم عشان لو حصلت كتمة خفر السواحل وكدا الناس كلها بتعمل جمبلق وبعد داك بتشتغل مهارات فردية ....
المهم وليد شرح ل احمد طريقة السفر وانو السفر ح يكلفو مبلغ كبير لانو صاحب العربية الحيسافرو معاهو عايز حقو وفي الطريق ح يمرو بتفاتيش وبرضو عايزين كسرة ف كل راس…لغابة ما يوصلهم ليبيا جوة ويسلمهم للزول البقطعهم البحر ...
احمد ما كان مفتكر انو المبلغ كبير كدا ...ووليد قال ليهو لو انت عندك النية جازف بس حق دخولك ليبيا وامشي اشتغل هناك واعمل ليك خمارة كويسة وبعد داك ادفع واعبر البحر ....
احمد : بس الشغلة دي مضمونة يا وليد ؟؟…
وليد : متر متر ... دقيقة كشف الكلامة… اوريك صور الجماعة العبرو وامورهم وضحت….
احمد شاف صور الشباب ف اوربا وهم متجدعين…
وليد : لو جاهز يا مان ف اي وكت رن لي وانا بتم ليك الشغل....
احمد : تمام يا زول…
وليد : قدام…
اها احمد نوى للسفر والسفر عايز قروش ....وشغل المغسلة دا ما ح يجيب ليهو القروش الهو عايزها ف زمن بسيط ...لانو وليد قال ليهو انو الزمن دا مناسب للسفر لانو ف الشهور دي البحر بكون هادي ..لكن بعد شهرين تلاتة ..البحر بزيد. و السفر بكون صعب والجماعة بقيفو…
طيب ح يعمل شنو ؟؟....
نتابع ونشوف ...
####
في مكان تاني ...
تاني رجعنا للتهامي…
سعاد زي ما قلنا بتطلع من الصباح وبترجع اخر اليوم بالليل وترقد تنوم… التهامي لمن لقى البلد خلا وهو قاعد براهو وسعاد بتجي هلكانة ومرات بتنوم طوالي و ما بتعبرو… شعر بالوحدة…
اها الايامات دي بقت تركب معاهو واحدة موظفة من الموظفات البيستحمن ب جردل خمرة وتطلع من بيتها…
المراة دي عاملة زي دعاية الريحة… من تطلع من البيت لغاية ما توصل الشغل الخمرة ما تديك الدرب…وهي طبعا بتركب قدام مع التهامي… وبعد ما تنزل التهامي ما بخلي زول تاني يركب معاهو قدام ....الكرسي بكون فاااضي والتهامي ماشي وجاي ف الخط ...والزول البقول عايز يركب قدام التهامي بقول ليهو الكرسي دا مكسور اركب ورا اركب ورا....
الخمرة صمغ بس لاصقة ف الكرسي والتهامي يقعد يشمشم ف الكرسي زي الكلب ....
التهامي بعد ما كان تاب من النسوان تاني رجع يفكر فيهن… اصلا دا حال اب جيقة ..مجرد ما مرتو تنشغل عنو بولادة او تربية او سفر او اي حاجة ..اب جيقة ما براعي للحتة ولا بيعذرها ...طوالي بفكر ف اللحمة البرا…
التهامي بالرغم من انو وصل الخمسين من عمرو لكن لسة فيهو روح الشباب… يعني لسانو حلو وبياع كلام …و لقى ليهو موظفة مطلقة غايتو ربنا يهديها…
…
..
.
كونو بخير….
الصبر يا جماعة ... بس في حاجات بسيطة كدا نوضحها ونختم…
.
..
…
