حاج الرضي ب حدة : الغريب دا جاي معاي انا ااا بابكر… عندك مانع ؟؟؟…
بابكر : لا… بس عايزين نعرف عندو شنو هنا ف الحلة دي وجاي ل شنو ؟؟؟…
حاج الرضي : الضيف ااا بابكر ود صاحبا لي… ابوهو رسلو لي من الخرطوم عشان اشغلو معاي… عندك شي تاني عايز تعرفو ؟؟؟…
بابكر حدر ل احمد شديييد وقال : خير ااا عمي الرضي… خير…
بابكر طلع ومشى…
حاج الرضي طبعا من الزعل و الضيق عروقو ظهرت ف وشو… واحمد حس ب انو بعد دا وجب الخروج من هذه القرية… عشان ما يجيب ل نفسو مشاكل وما يجيب ل حاج الرضي الزعل والمشاكل…
احمد : معليش يا حاج… سامحني اذا انا سببت ليك مشاكل مع ود اخوك… انا بشيل شنطتي وبمشي ....
حاج الرضي : تمشي وين !!!… انت مش قلت جاي ل شغل ؟؟؟… شغلك عندي ااا ولدي ..وما بتمشي من هنا الا ب ارادتك انت…
احمد : لكن يا حاج ما انت شايف ود اخوك زعلان كيف… وممكن ناس الحلة برضو متضايقين…
حاج الرضي : ناس الحلة مافي زول فيهم بتكلم غير بابكر واخوهو….وبعدين ااا ولدي… بابكر دا ما قاصدك انت ؟؟؟…اصلا عندهم معاي مشاكل من بدريييي…وبداقروني ف اي حاجة… هسي لو انت كنت جاي ل زول تاني ما كان سألك…
احمد : طيب ليه يا حاج ود اخوك يقصدك ؟؟…
حاج الرضي : دي قصة طويييلة ااا ولدي… مشاكلنا دي من زمااان …
حاج الرضي هدا شوية و جر نغس طويل وقال ل احمد : نحن تلاتة عند ابوي ..انا الكبير واخوي السماني ابو بابكر وعثمان وعندنا اختنا فاطمة… ابوي قبل ما يتوفى ربنا يرحمو… وزع الارض بالتساوي وجمعنا كلنا التلاتة وقال اي زول يختار الواطة حقتو عشان بعد ما انا اموت ما تتشاكلو… اها السماني اختار ارضو واختنا اختارت ارضها وانا اخترتا اخر واحد عشان ارضيهم… اختنا طبعا عايشة بعيد مننا ف ولاية تانية وبعد سنة من ما ابوي وزع لينا الارض… اختنا احتاجت ليها ل قروش فاا عرضت ارضها للبيع وكلمت ابوي… وابوي قاليها اخوانك الاولى اعرضي عليهم الارض… انا الوكت داك ما كان عندي جنى… وقلت ليها كلمي السماني لانو عندو ولدين لو عايزها خليهو يشتريها منك بتنفعو ل قدام… بس السماني كان سكاري وقروشو كلها مضيعها ف السكر… المهم السماني قال ل فاطمة شوفي ليكي زول تاني… هو ماعايز الارض… فاطمة جاتني تاني وانا اشتريت منها الارض قدام ابوي واخوي ومعانا شهود… اها يلا اولاد السماني اللي هم بابكر وعثمان بعد كبرو بقو يعملو المشاكل وكيف انا الارض حقتي اكبر من ارض ابوهم وما كانو راضين… فاا عرضتا ليهم الارض يشتروها بس هم قالو ما ح يشتروها والارض لازم تتقسم بالنص بيني وبين ابوهم…ومن هناك والمشاكل لغاية اليوم… ف الزراعة والموية وبقو يعارضو العمال وما بخلوهم يشتغلو و يسقو الزراعة لمن انا اكون ما موجود معاهم… .
احمد : طيب يا حاج اخوك ما كلم اولادو انو انت اشتريت الارض من اختكم ؟؟؟…
حاج الرضي : هم عارفين الكلام دا بس عناد منهم عايزين يقلعو مني الارض قلع… قالو عشان ما عندي ولد …
احمد : واخوك موقفو شنو من اولادو ؟؟؟.
حاج الرضي : والله هو بتكلم معاهم…بيسكتو لكن بعد يومين تلاتة تاني بمشو يشاكلو العمال ف الزراعة… علا بقيت انا امشي كل يوم الزراعة واقيف ليهم…
صوت حنين بينادي : ابوي… يابا…
حاج الرضي : ااي ااا الزينة ..
الزينة : جبت ليكم الغداء ااا يابا…
حاج الوضي : ختي جنب الباب وامشي…
الباب فتح شوية … احمد نزل راسو تحت ف الارض وحاج الرضي شافو انبسط منو شديد ومن حركتو و حس بيهو ود ناس ومحترم …
الزينة ختت صينية الاكل ورجعت سريع…
حاج الوضي قايم عشان يجيب الصينية احمد قال ليهو خليك قاعد يا ابوي…
احمد جاب الصينية وقعدو ياكلو…
حاج الرضي : اسمع يا ولدي…كان انت جاي تشغل… انا بشغلك معاي ف الارض… تزرع وتشتغل لغاية ما براااك تقول ماشي…
احمد : والله يا حاج… صاح انا جاي للشغل… بس ود اخوك شايفو ما راضي ب قعادي هنا… فاا لو شفتا لي مكان تاني يكون افضل...عشان ما اجيب ليك المشاكل…
حاج الرضي : مافي زول ح يتكلم معاك… ولو واحد فيهم سالك تعال كلمني ..وانا بتصرف معاهم… بس انت ما تسألهم ولا تتكلم معاهم… عشان هم ناس مشاكل…
احمد : خير يا حاج ...
الدنيا مغربت وحاج الرضي ولع لمبة الجاز وقال ل احمد : معليش يا ولدي نحن هنا كهربتنا شغالة ب بابور…واليومين ديل المطرة صابة والواطة لينة عشان كدا البابور واقف لانو سلوك الكهرباء كلها موصلة تحت ف الارض و ح تضرب الناس…
احمد : لا لا يا حاج عادي…
حاج الرضي : خلاص ارقد ارتاح عشان بكرة نقوم فجر نمشي الزراعة…
احمد : حاااضر يا حاج…
المهم حاج الرضي مشى واحمد رقد يفكر ف قصة حاج الرضي ومشاكلو مع اولاد اخوهو…معقولة حتى الريف فيهو مشاكل بين الاهل والاخوان… احمد قال احسن ما يقعد كتير مع الحاج عشان ما يسبب ليهو مشاكل زيادة…بس يشتغل كم يوم كدا يلم ليهو قريشات يسافر بيهن اتجاه تاني…ويبعد من المشاكل ...
طبعا احمد بكرة الصباح لازم يقوم بدري عشان يمشي مع الحاج الزراعة… فاا قال لازم يشغل المنبه ..قام لملم تلفونو بعد ما كان ختاهو عشان ينشف من موية المطرة… و دخل البطارية لكن التلفون ابا يشتغل… واحمد رقد نام…
الانسان طبعا عندو منبه داخلي ..لمن عقلك يكون مشغول ب حاجة وخاتيها ف بالك و عايز تقوم بدري ح تقوم بدري…(( لكن انا شغال عكس… لمن اشغل المنبه… بصحى قبل المنبه …واليوم التاني لمن اوقف المنبه واقول اقوم براي… بصحى متأخر ))…
احمد صحى الصباح بدري وقام اتجهز افتكر نفسو قايم بدري ولسه الحاج ما صحى ..لكن شوية كدا و جا عمك شايل الشاي وصبح عليهو وشربو الشاي وحاج الرضي شال اغراض من البيت (دقيق وويكة وعدس وبصل )… وركبو الكارو ومشو الزرع…
مسافة الارض من الحلة ما بعيدة شديد ..يعني مسافة نص ساعة كدا بالكارو…
وصلو هناك عند الارض وعمك ربط الحمار ونزل مع احمد وبقى يلف بيهو ف الارض والعمال شغالين ويوريهو طريقة الشغل وهم زارعين عيش وقطن وفول وسمسم وجزو بسيط من الارض زارعينو عدس للإكتفاء الذاتي…
اها الحاج وصف ل احمد الارض حقتو وكانت ما شاء الله كبيرة ووصف ليهو ارض السماني اخوهو جنب ارضو طوالي…
احمد طبعا شاف الشاب الكان جاهم ف التكية اللي هو بابكر ومعاهو واحد اصغر منو كدا ..بكون اخوهو عثمان لافين وسط العمال ف ارضهم…وكل شوية بعاينو ف اتجاه احمد وحاج الرضي…
المهم يوم يومين واسبوع واحمد كل يوم بطلع من الدغش مع حاج الرضي ويرجعو بالنهار وتاني يمشو العصر ويرجعو بعد المغرب…
احمد فهم الزراعة كويس لانو حاج الرضي كلمو عن اي حاجة بتخص الزراعة من بداية قلب الارض لغاية ما بعد الحصاد…وطبعا اي زول لمن يكون عندو نية ف حاجة بيفهمها… واحمد طبعا خلاص الزراعة وقعت ليهو وفهمها كويس وبقى يشتغل مع العمال…
حاج الرضي طبعا مبسوط منو شديد واتمنى كان يكون عندو ولد زي احمد…
المهم جا وكت السقاية وحاج الرضي واخوهو متفقين من بدري انهم يقسمو ايام الاسبوع ف سقاية الزرع لانو المجرى او الخور واحد…يعني مثلا يوم ل حاج الرضي ويوم ل اخوهو السماني واولادو…وملتزمين طبعا بالتقسيم دا… الا مرات اولاد السماني بيعملو مشاكل مع عمهم او يعملو حركات للعمال وكدا…
حاج الرضي لمن شاف احمد فهم الشغل و مجتهد معاهو ف الارض وبيشتغل مع العمال…بقى يخلي ليهو المسؤوليه ..يعني يمشي معاهو الزرع يفرش ليهو فرشة تحت راكوبة عاملنها هناك ويقعد… واحمد بيهتم بالزراعة…
يلا شنو… بتحصل شوية مناوشات بين احمد وبابكر وعثمان…
بابكر وعثمان لمن يشوفو عمهم حاج الرضي نايم… هم طوالي بجو داخلين ف الزراعة بتاعتو ويجو ل احمد ف مكانو ويقعدو يضحكو فيهو ويستحقروهو ب طريقة غير مباشرة … لكن احمد ما كان برد ليهم حسب وصية حاج الرضي… وبابكر وعثمان بجو ماشين قدام العمال ويعملو حركات نظام رجالة كدا بس… و ما بخلو العمال ف حالهم الا لمن يشوفو عمهم صحى او رفع راسو… بيقومو ينسحبو ويرجعو ارضهم…
اها ف يوم الحاج كان تعبان شوية ومجرد ما جو الارض الحاج فرش ورقد نام…
طبعا شغالين سقاية و احمد عارف انو اليوم دا حق حاج الرضي… فاا شال الطورية و مشى يفتح الموية من المجرى ف ارض الحاج…
اها احمد قاعد قاعد يفتح ف الموية… شوية كدا و ف زول لكزو بالعكاز…
احمد وقف وعاين للزول لقاهو دا عثمان اخو بابكر … وبابكر واقف بعيد وخاتي عكازو فوق رقبتو ورافع يدينو ...
عثمان : هاا زول هااه…عندك شنو هنا ؟؟…
احمد : جاي افتح الموية ؟؟… ف حاجة ؟؟؟…
عثمان ب تهديد : احسن ليك ترجع بلدك ااا جنى… ولا شوف ليك مكان تاني امشي ليهو…
احمد : ما ماشي يا زول… عايز تعمل شنو يعني ؟؟؟…
عثمان كفكف يدينو ورفع يد الجلابية فوق لغاية سكينو الخاتيها ف ضراعو ظهرت : ااا زول… ارعى ب قيدك… والله سكيني دي تاكلك…
احمد مسك الطورية ب شكل استعداد وقال ليهو : كدا وريني تاكلني كيف ؟؟؟ ....
يا جماعة الشغلة جابت ليها سكين وعكاز…
####
في مكان تاني…
حاجة سميرة عزمت قريباتها ومشت ودت شيلة ولدها وكانت شيلة سمحة عديل بمعنى الكلمة ...الشنطة ستة ف ستة و جايبنها من برا ومعاها الدهب والريحة برضو كانت اصلية وبزيادة كمان…يعني عادي ممكن تقعد للولادة لو ربنا قسم ليهم من اول سنة…. والمواد التموينية كمان ما قصرو فيها…
لكن شنو !!!…بعد سماحة الشيلة… ما عجبت هند وسعاد امها…(( للمعلومية انو سعاد زمان ما كانت كدا ولا كانت شنافة ولا بتاعت كلام وقوالات… لكن مجرد ما بارت درب الفكي…اتغيرت وبقت شخص تاني ))…
اها سعاد طبعا شنفت ليهم الشيلة وقالت بسيطة وبتها المفروض تتوزن بالدهب و و و… دا كلو عشان محمد خريج مريم الشجاعة ( قرا ابتدائي بس ) ...وبتها هند قرت جامعة وعندها شهادات… عشان كدا شايفين نفسهم…
حاجة سميرة طبعا اتضايقت من حركة سعاد وهي من اول خايفة من الكلام دا… لانو المراة الشنافة وشيالة الحال ظاهرة ف وشها…
وعشان الكلام دا من اول سميرة قالت ليهم نديكم متكفي وتجيبو حاجاتكم براكم لكن سعاد رفضت وقالت اسعار السوق ما ثابتة… وسميرة قالت ليها لو نقصت ليكم حاجة كلمونا نحن ب نتمها بس سعاد قالت تجيبو الشيلة انتو بس…
وحصل الكلام دا…
كدا نشوف العرس ح يتم ولا ح يتفركش !!…
…
..
.
كونو بخير…
.
..
...
