خلي بالك ..اختك لمن تطلب منك قروش م تسالها عايزة بيها شنو عشان ما تحرجها او تخليها تكذب عليك… مرات البنات بيحتاجن قروش عشان حاجات خاصة بيهن… واا ما تحاول تحكها معاها وعايزة القروش ل شنو وتقعد تحقق معاها… لانو ف حاجات اختك محتاجة ليها وما بتقدر تقولها ليك فاا شنو اديها القروش من سكات ..او حتى لو هي ما طلبت منك يمكن خايفة منك تحرجها… فاا انت لو عندك باقي قريشات ف جليدتك (جزلانك) ما محتاج ليها… حاول اغمتها ليها وقول ليها عزي بيها نفسك… وتاكد تماما مهما كانت قيمة القروش اذا كانت كتيرة ولا بسيطة ... اختك ح تكون مبسوطة منك واكيد ح تقضي ليها غرض … وكل فترة والتانية حول ليها رصيد عشان ما تخليها تحتاج ل زول غيرك…لانها ما شغالة ومحتاجة قروش وما عندها مصدر دخل… طيب ح تعمل شنو !!!..ح تسرق من البيت… هو البيت زاتو مافيهو قروش ..ح تعمل شنو !!!..تطلب من زميلها !!!… صديقها !!! … حبيبها !!!... دا الكلام الما بنفع معانا لاننا عارفين انو نحن فهمنا وسخان (الاغلبية) … و اي بت طلبت من ولد قروش او اي حاجة اكيد الولد ح يطلب منها مقابل والمقابل معروف شنو…فااا شنو ما تحوج اختك ل راجل غيرك وكدا انت ح تكبر ف نظرها وما ح تخذلك ف يوم ان شاء الله … فااا ابقو عشرة علي اخواتكم….
نرجع ل روايتنا…
مروة طبعا سكتت وما قدرت ترد على احمد…
احمد طلع جزلانو من جيبو وفتحو وطلع منو قروش اليومية خلى حاجة بسيطة ل نفسو وادى الباقي ل اختو…
مروة : شكرا يا احمد…
احمد : لالا اصلا انا كنت عايز اديكي ليهم… يلا امشي خليني عايز اخد لي راحة شوية…
مروة : اجيب ليك الغداء ؟؟؟…
احمد : تعبان والله ما بقدر اكل هسي….خليني بعد انوم واصحى…
مروة طلعت واحمد رقد نام ….
حاج العوض ومحمد جو داخلين البيت ...شايلين اكياس الخضار والعيش…
حاج العوض : سلام عليكم….
حاجة سميرة : وعليكم السلام ورحمة الله وبركاته…
حاج العوض : كيف قيلتو يا حاجة !!!… مالك قاعدة براكي بتك وينا ؟؟؟…
حاجة سميرة : طلعت مشت الدكان …
محمد بصوت عالي : عندها شنو ف الدكان ؟؟؟…
حاجة سميرة : مشت تشتري ليها حاجات وجاية…
محمد : وجابت القروش من وين كمان ؟؟؟…
حاجة سميرة : شالتن من احمد…
محمد : يا حجة بتك دي انا مش قلت ليكي ما تخليها تطلع الا معاكي انتي ؟؟؟…
حاجة سميرة : يا ولدي الدكان القريب دا كمان عايزني امشي معاها ؟؟؟…
ف اللحظة دي مروة جات داخلة ومتكمكمة ب توب امها وداسة ليها كيس داخل توبها وجاية ماشة داخلة غرفتها…
محمد نهرها ليك : تعالي هنا يا زفت… جاية من وين ؟؟؟ ..
مروة وهي مدنقرة راسها : جاية من الدكان…
محمد مسكها بيدو الشمال ف رقبتها من ورا ..ودخل يدو اليمين تحت التوب وجرا منها الكيس…
محمد : و دا شنو الشايلا دا ؟؟؟…
مروة سكتت وما ردت عليهو…
الكيس طبعا كان اسود والحاجات الفيهو ما ظاهرة…
محمد ب نهرة : بتكلم معاكي انا… جايبة شنو من الدكان ؟؟… افتحي عفنك دا…
محمد ضربها بالكيس ف راسها والكيس انشرط ووقعت منو اغراض خاصة بالبنات….
محمد بعد شاف اغراض مروة قام ضربها ف راسها وقال ليها ب نهرة : اوعك تطلعي تاني سامعة الكلام دا… والله لو شفتك برا الشارع الا اكسر ليك كرعينك ديل… يلا غوري من قدامي…
مروة دنقرت لملمت اغراضها باحراج ودخلت غرفتها….
طبعا مافي بت اخوها بيتعامل معاها كدا وبيحرجها و ح تكون بتحبو… اكيد ح تكون شايلة ومغبونة منو شديد… ومروة هي زولة كيوت لكن محمد اخوها وتعاملو معاها ما خلى فيها كياتة ( سمحة كياتة دي )…. يلا هي بتكرهو كره ما عادي لانو هو السبب ف عدم دخولها الجامعة و تعليمها…. ياخ حتى من البيت ما قاعد يخليها تطلع والمشكلة انو امها وابوها ساكتين وكل ما يحاولو يتكلمو مع محمد… محمد بيقول ليهم البت دي لو ما انا اتعاملتا معاها كدا ح تخرب…. فاا بتكون قاعدة بين اربعة حيطان بتحضر ف التلفزيون وما عندها تلفون زاتو عشان تخش بيهو الفيس وتتسلى ولا اي حاجة زاتو… والكلام دا عمل ليها توحد بقت انسانة منطوية مع نفسها لا بتحب الطلعات ولا عندها صاحبات غير جارتها بالحيطة… مرات مرات بتجي تتونس معاها وتفرق ليها .... يلا دي حالة مروة عايشة نفسيات ف بيت ابوها…لدرجة انها كرهت البيت وعايزة ب اي طريقة تطلع…
احمد برضو منعزل مع نفسو يعني ما عندو حاجة لا ل ابوهو ولا ل اخوهو محمد…وفي البيت بس امو واختو وحتى الاكل لو ما جابو ليهو ف مكانو… هو ما بمشي يدخل المطبخ لو جاع وابوهو قاعد بيمشي الدكان ياكل برا وابوهو شايف وعارف بس بقول خليهو يبقى راجل ويعتمد علي نفسو طالما انو ما عايز يجي يشتغل معانا و دا شي مستحيل عند احمد…
المهم اصبح الصباح وحاج العوض ومحمد ولدو بعد شربو الشاي ركبو عربيتهم ومشو السوق فتحو محلهم…
زي الساعة 8 صباحا كدا جاهم مصطفى التاجر الامبارح… جا داخل عليهم الدكان وهو محرج…
مصطفى بانكسار : السلام عليكم…
محمد : مرحب…
حاج العوض : وعليكم السلام ورحمة الله وبركاته… اتفضل يا مصطفى…
محمد : دقيقة يا حاج… اها خير يا مصطفى ؟؟؟…
مصطفى : جيت ابيع ليكم البصل…
محمد باستفزاز : بصلك زاتو نحن ما عايزنو بكون عفن… خلاص اشترينا بصل جديد وسمح وبسعر اقل من سعرك زاتو…
مصطفى : والله يا محمد ما بتلقى زي سعري دا…وانا رجعتا ليكم عشان ابوك عزيز علي وما قاعد ابيع ل غيرو…
محمد : يا حبيبنا ابوي لا عزيز عليك ولا اي حاجة… انت امبارح مشيت ب بصلك ومفتكر انو ف زول ح يشتري منك…
مصطفى : ما كدا والله يا محمد بس انت عارف السعر الانت قلتو دا ما حقو…
محمد : اسمعني اقول ليك حاجة… انا زاتي نطيت من سعر امبارح وما عايز بصلك امشي فتش يمكن تلقى زول يشتري منك ولو ما لقيت وديهو ل ناس البهايم اتصدق بيهو ينفعك ف اخرتك…
حاج العوض ف اللحظة دي اتدخل وقال : دا كلام شنو يا محمد يا ولدي…مصطفى دا زولنا وبتعامل معانا طوالي ما صاح نرجعو ب بصلو…
محمد عاين ل مصطفى وقال ليهو : والله عشان خاطر ابوي وانا ما برجع ليهو كلمة لكن سعر امبارح م بديك ليهو… بنديك 4 ونص بس لو عجبك السعر امشي نزلو ف المخزن وتعال شيل جزو من قروشك لحدي ما نبيع البصل واحتمال زاتو م ينباع ويعفن لينا…
مصطفى : لكن يا محمد دا ما اتفاقنا الامبا…
محمد قاطعو : ايوااا اتفاقنا كان امبارح وامبارح السوق كان فيهو حركة والسعر كويس لكن الليلة زي ما انت شايف مافي اي حركة ف السوق واحتمال كمان السعر ينقص اكتر من كدا ونحن ال حنكون خصرانين ...وانا زاتي والله لو ما الحاج اتدخل ما بشتري منك البصل دا… و دا اخر كلامي يا مصطفى…ولو ما نفع معاك الله يفتح علينا وعليك….
مصطفى اتضايق شديد من كلام محمد لانو لو باع ليهم البصل بالسعر دا اكيد ح يكون خصران والمشكلة انو مافي تاجر من تجار السوق عايز يشتري منو والمشكلة التانية انو مصطفى شال البصل من المزارعين بالدين وقال يمشي يبيعو ويجيب ليهم حقهم وهو يشيل حقو… وبالسعر دا هو ح يطلع مطالب وكمان لو زعل ومشى ب بصلو الا يديهو ل تجار البهايم لانو البصل م بستحمل…ممكن يخرب وامورو تجوط ويدخل السجن…
اها مصطفى قال ف نفسو حسبي الله ونعم الوكيل ووكل امرو لله ووافق علي السعر …
محمد : خلاص امشي نزل البصل ف المخزن وتعال راجع…
مصطفى طلع ساق الدفار ومشى المخزن…
حاج العوض : ليه يا محمد اتعاملتا مع مصطفى بالطريقة دي… مالك طمعان فيهو كدا !!!..دا زولنا يا ولدي…
محمد : يا حاج انت مسكين ساي ونوع مصطفى دا مستغل طيبتك وعايز يربح من وراك….
حاج العوض : ياخ مصطفى دا نحن بنتعامل معاهو بالسنين و ب طريقتك دي تاني ما ح يجيب لينا محاصيل وممكن تاني يمشي يتفق مع تجار غيرنا قبل ما يجيب زاتو…
محمد بكل ثقة : ما بقدر يا حاج…التجار ال ف السوق ديل انا ماسكهم كلهم ب يدي…و لمن اقول ليهم حاجة مافي واحد بكسر كلمتي…وانت عارف الوضع اتغير والسوق ما زي اول وكل فترة بيظهرو تجار جداد ف السوق يعني لازم نكون حذرين وندرس السوق كويس…
حاج العوض : يعني قصدك انا خلاص كبرتا وبقيت ما بعرف السوق ولا شنو يا محمد !!!… طيب ما احسن انا اقعد ف البيت واخليك تقوم بالشغل براك طالما انا مخي قديم وبقيت ما بفهم السوق…
محمد : لا لا ما كدا يا حاج انت الخير والبركة وانت المعلم الكبير… بس ف النهاية انا ولدك وما عايز زول غيرنا يتحكم ف السوق….و كل ما عصرنا علي التجار كل ما ربحنا زاد…
حاج العوض : لمن تعصر علي التاجر زيادة يا محمد تاني ما بجيك وانت ما جديد ف السوق عشان انا اقول ليك الكلام دا…
محمد عايز ينهي الموضوع مع ابوهو و قال ليهو : خلاص يا حاج ولا يهمك وكلامك علي العين والراس… بس تاني قبل ما تتفق مع زول كلمني يا ابوي… انا برضو ولدك وضراعك اليمين….
حاج العوض : غايتو ي محمد يا ولدي اليومين ديل بقيت عندك تصرفات وكلام غريب…
محمد : كلو ل مصلحتنا يا ابوي….كدا خليني اتصل علي غازي ف المخزن عشان ينزل بصل مصطفى…
محمد طلع برا المحل ومشى بعيد شوية واتصل علي غازي (المخزنجي ..يعني الحارس ليهم المخزن )…
غازي رد : الوو محمد …
محمد : محمد ساي كدا يا غازي…
غازي : لا لا قصدي يا معلم…
محمد : ايوا كدا ..اسمعني مصطفى دا وصل عندك ؟؟؟…
غازي : اااي وصل وواقف قدام المخزن… هسي كنت عايز اضرب ليك…
محمد : طيب اسمع…نزل نص الشوالات جوة والنص التاني خليهو قريب جنب باب المخزن… انت فاهمني ؟؟…
غازي : اااي يا معلم فاهمك…عارف بعدين بالليل اشيل النص الجنب الباب واوديهم المخزن الجديد…
محمد : ياخ ما تتكلم بوضوح كدا يمكن ف واحد جنبك يقوم يسمع كلامك ويكلم الحاج…
غازي : لا لا اتطمن مافي زول جنبي ..انا دايما لمن اتصل عليك بمشي بعيد ومافي زول بسمعني…
محمد : خلاص خلاص… يلا زي ما قلت ليك…
غازي : تمام يا معلم…
محمد قفل من غازي ومشى ل ست الشاي الجنبهم جاب منها اتنين قهوة وجا داخل المحل قال ابوهو : قهوتك يا حاج …
####
في مكان تاني…
التهامي طبعا ب حنكو وكلام الحلو حاول بشتى الطرق انو يقنع مدام ليلى عشان تتزوجو وقال ليها انتي فكري ف الموضوع دا كويس وانا ف انتظارك وما عايز ليكي الا الخير يا ليلي…
اها كدا نشوف الحصل شنو بعد داك…
…
..
.
كونو بخير…
.
..
...
