غازي بعاين ل محمد ومحمد مقلع عيونو كبااار وبحمر ل غازي نظام ما يتكلم…
غازي : والله ما عارف يا حاج…
حاج العوض : كيف يعني ما عارف ؟؟… مفاتيح المخزن مش عندك انت براك ولا ف زول غيرك عندو نسخة ؟؟؟؟…
غازي : ااي عندي انا… لكن انت ال حسبتا الشوالات يا حاج… يمكن تكون غلطتا ف العدد…
حاج العوض : الحساب دا مافي زول بغالطني فيهو…
الشفيع قال ليهم : يا عوض كدا ح تعمل شنو ف الشوالات الناقصة دي… انا ما عايز اتأخر اكتر من كدا…
عوض عاين ل غازي وقال : خير ..الكلام دا بنشوفو بعدين…. يا محمد اركب مع الشفيع دا وامشي ل عمك نوري خلي يرفع ليهم 25 شوال من عندو …
محمد لقاها طريقة عشان يتخارج من اسئلة ابوهو وقبل ما يركب مع الشفيع… حمر ل غازي شديييد ... وركب مشى مع الشفيع شحن ليهم الشوالات ورجع المخزن لقى غازي مافي…شكلو ابوهو ساقو معاهو المكتب…
محمد سريع مشى المكتب قبل ما ابوهو يعصر غازي ويقوم يعترف….
اها محمد دخل المكتب لقى ابوهو قاعد يحقق مع غازي…
حاج العوض : الطبلة ما مكسورة ومافي زول قد المخزن عشان نقول شالها حرامي ...يلا الكلام دا معناهو شنو بس وريني ؟؟؟…
غازي : يعني بتتهمني انا شلتا ال 25 شوال يا حاج ؟؟…
حاج العوض : طيب اديني عذر انك ما شلتها…
غازي : يعني قصدك انا حرامي يا حاج ؟؟.. .
محمد ف اللحظة دي اتدخل قبل ما غازي يعترف وقال ل ابوهو : لا حول ولا قوة إلا بالله العلي العظيم… ليه كدا يا حاج ؟؟… ليه بتقول ل غازي الكلام دا ؟؟… غازي دا تربيتك يا ابوي وانا بعتبرو زي اخوي الكبير…
غازي بعد سمع كلام محمد… بدا يمثل… دموعو رقرقت وقال : شفتا يا محمد ابوك بتهمني انا حرامي ...وانا عمري كلو مخلص و امين ل ابوك وما حصل يوم حبة عيش نقصت من المخزن دا… طيب انا لو عايز اسرقهم يا حاج اسرقهم كيف بعد ما انت حسبتهم ؟؟…الله يسامحك يا حاج .… الله يسامحك…
محمد طبطب على غازي وقال ليهو : معليش يا غازي معليش ياخ مافي داعي للبكاء… ابوي بعتبرك زي ولدو وما قصدو يقول انت حرامي… انت واحد مننا وفينا يا غازي…معليش ما تزعل من الحاج برضو زي ابوك وكدا…
غازي ب تمثيل : ياخ المخزن دا انا ما بخلي نملة تدخل فيهو لو ما جابت اذن من الحاج… بكون صاحي ليل ونهار وعيوني دي ما ب تغمض… دا كلو عشان انا شايف مخزنكم دا محل اكل عيشي ولازم اكون امين واحافظ عليهو…الله يسامحك يا حاج ..
محمد : خلاص يا غازي… امشي شوف شغلك….
غازي : والله يا محمد لو ما انت انا تاني ما بشتغل مع ابوك…
محمد حمر ل غازي : ما قلنا ليك معليش والحاج ما قاصد يا غازي… خلاص امشي شوف شغلك ....
غازي طلع من المحل وعامل نفسو متأثر… وحاج عوض يهز ف راسو ويقول : استغفر الله العظيم… استغفر الله العظيم…
محمد ب خبث : يا ابوي انت اليومين ديل مالك بقيت ما مركز وبتتكلم ساي…
حاج العوض : كيف يعني بتكلم ساي يا محمد ؟؟… انت قايلني جنيت ولا خرفتا ؟؟…
محمد : بعد الشر عليك يا ابوي… لكن تتذكر امبارح حصل نفس البرنامج… اديتني قروش اوردها ليك ف البنك ولقيتها ناقصة ما نفس القروش الانت قلتها لي… لمن انا غالطتا المحاسب وحسبتها معاهو بالآلة وحسبتها بيدي كمان…وبرضو لقيناها ناقصة… و كلمتك قلتا لي خلاص وردها زي ما هي…فاا اكيد برضو انت بتكون حسبتا شوالات العيش غلط واتهمتا غازي المسكين…
حاج العوض : والله انا زاتي مستغرب القروش دي نقصت كيف مع اني حسبتها اربعة مرات….وشولات العيش دي كمان انا متأكد من عددها لانو هي صفوف مرصوصو وكل صف معروف فيهو كم…
محمد لمن شاف ابوهو بدا يشك ف نفسو وانو بقى ينسى ويغلط ..قال يطلع بيهو العالي : لا لا يا ابوي اكيد ف حاجة شاغلة بالك… بس ما تكون ف مراة دخلت ف حياتك… و عايز تجدد وتعرس تاني؟؟ ...
حاج العوض : عرس شنو انت كمان ؟؟… هو ف زمن عشان الواحد يفكر ف النسوان ؟؟؟…
محمد : طيب مالك يا حاج ؟؟؟… والله قلقتا بي… .
حاج العوض : والله ما عارف مالي يا محمد يا ولدي …
محمد : انت عارف يا حاج ضغط العمل الكتير بخلي الواحد ما مركز…عشان كدا اخد ليك اجازة شهر كدا وسافر فيها انت والحاجة… امشو البلد ولا اي مكان فرقو شوية وغيرو جو… طولتو ما سافرتو…
حاج العوض : اسافر كيف يا محمد والشغل اخليهو ل منو ؟؟؟…
محمد : يعني ما بتثق فيني يا حاج ولا انا ما قدر المسؤولية ؟؟؟…
حاج العوض : لا لا يا ولدي ما قصدي كدا… لكن انا شغلي ما بخليهو…انت شايف السوق بقى كيف والناس بقت تقابض من طرف… فاا لو غبت يوم واحد بتجي تلقى السوق اتقلب عليك….
محمد : خلاص يا حاج ما مشكلة خليك بس حاول ركز شوية… ولو عندك اي حاجة كلمني… انا ماشي اجيب ليك الجبنة تروق بيها اعصابك شوية وبمشي ل غازي بعتذر ليهو عشان ما يزعل…
محمد طلع جاب ل ابوهو كباية جبنة وختاها ليهو ومشى المخزن ل غازي لقاهو قاعد يلف ف سجارتو…
محمد : هه ممثل بارع لكن… ياخ انا زاتي صدقتا…
غازي : مش كدا يا معلم… انت عارف لو ابوك كان ضغط علي زيادة وانت ما جيت… انا كان قلتا ليهو…دافنينو سوا نحن ..
محمد : والله لو فتحتا خشمك دا يا غازي والله انا اوديك ورا الشمس… حسك عينك ابوي يعرف حاجة….
غازي : خلاص يا معلم ...خليني بعيد من اسئلة ابوك…
محمد : كويس… بس اليومين دي هدي شوية… انا خليت الحاج يفتكر انو هو الغلطان ف الحساب… لكن برضو نحن نوقف شوية لحدي ما الجو يهدأ…
غازي : تمام يا معلم…
####
في مكان تاني…
طبعا التهامي من التوتر الشديد ما قدر ينتظر مدام ليلى تتصل عليهو فاا اتصل عليها ما ردت… قام ركب عربيتو ومشى وقف جنب المحلات والوكت داك سعاد جات ومشت…
اها انتظر كدااا لغاية قريب المغرب… ليلى جات والتهامي طوالي نزل من العربية و دخل معاها المكتب وقال ليها افتحي الكاميرا وشغلي الفيديو خلينا نشوف ديل منو النسوان القالن من طرفي…
ليلى : و ليه الاستعجال دا كلو ..مالك ف شنو ؟؟..
التهامي وهو متوتر : مافي حاجة… بس شغلي الفيديو…
اها ليلى فتحت الكاميرا عندها ف كمبيوتر المكتب ورجعت الفيديو ورا وقالت للتهامي ديل النسوان الامبارح قالن من طرفك…
الصورة كلنت من زاوية ما واضحة… والتهامي قعد يدقق كدا… وقال ليها : كدا جيبيهم من قدام…
ليلى جابت الفيديو من قدام وكبرت الصورة وجابت وش سعاد ومنال… والتهامي من شاف سعاد اتخلع : وي الليلة ... دي سعاد … دي هي زاتها…
ليلى ب حيرة : سعاد دي منو ؟؟…
التهامي شر راسو قام وعيونو مرقن كيااار .: سو سو ...سعاد دي مرتي… ام العيال…انا ما عارف الجابها هنا شنو !!!… وعرفت المكان دا كيف زاتو ؟؟؟…
التهامي مسكتو ام هلة هلة وبقى يجقلب…. ماشي وجاي جوة المكتب ويمسح ف يدينو وينفخ فيهم… طبعا يدينو سخنت لمن ولعو نار عديل …
التهامى ماشي وجاي وبقى يهضرب : من سألتني اسئلتها الغريبة دي انا شكيت انها عرفت… معقولة تكون شافتني ؟؟… يا رب ما تكون عرفت…
مدام ليلى لمن شافت التهامي بتراجف قدامها كدا قالت ليهو : ف شنو يا التهامي ؟؟…مالك ؟؟ انت خايف من مرتك ولا شنو ؟؟…
التهامي متوتر : آااا ؟؟؟…منو ؟؟؟…انا ؟؟… خايف من منو ؟؟....
ليلى : شايفاك زي الخايف منها تكون عرفت انك متزوجني…
التهامي : عشان هي امبارح كانت بتسالني اسئلة غريبة…يمكن عرفت ولا حاجة…
ليلى : طيب افرض انها عرفت…يعني شنو ؟؟.. انت ما عامل حاجة غلط عشان تخاف منها… انت متزوجني بالحلال… مافي داعي للخوف دا يا التهامي خليك راجل…
التهامي خلاص فقد كل الحواس بقى اطرش واعمى وابكم ما سامعها ولا عارفها بتقول ف شنو… قام طوالي مرق ركب عربيتو وفووووو علي البيت…
التهامي دخل البيت وهو مقلع عيونو كبااااار بعاين جاي وجاي عايز يشوف سعاد لكن مافي ليها اثر ولااا ف المطبخ ….لقى اولادو بلعبو بلاي استيشن ف الصالة… قاليهم : امكم وين ؟؟… زووول رد ليهو مافي…
صاحبنا مشى غرفة البنات وسالهم امكم وين قالو ما عارفين…
التهامي بقى يسال نفسو… المراة دي مشت وين يا جماعة !!!. .ما تكون قاعدة تدبر لي ف حاجة !!.... الله يستر…
مشى فتح باب الغرفة ودخل لمن اتهجم ....لقى سعاد قاعدة جامدة ووشها وارم وعيونها حمر مولعة جمر بس…
سعاد قامت براااحة وقفلت باب الغرفة… والتهامي ..الغرفة بقت ليهو زي غرفة الاشباح عرق و دخلت فيهو خوفة ما يعلم بيها الا الله ... زي الزول لمن يقفلوهو مع اسد جوة القفص…
سعاد ربعت يديها وقالت ليهو ب صوت مرعب : ليلى دي منو يا التهامي ؟؟؟…
التهامي بقى يتمتم و يقش ف وشو من العرق : لي لي لي لي ليلى منو ؟؟؟….
سعاد ب صوت عالي : انا البسألك ليلى دي منو قلت ليك ؟؟؟…
التهامي : لي لي لي ليلى دي… م م م ما بعرفها يا سعاد…
سعاد : يعني الكلام السمعتو كذب ؟؟؟… وانا الشفتك ب عيني يا التهامي وانت ماشي معاها…
التهامي بقى موية والفيهو كملت …
سعاد ف اللحظة دي و في عز قوتها انهارت ودموعها جرت وقالت للتهامي ب صوت مبحوح : انا عرفتا كل حاجة يا التهامي وعرفتا انك متزوجها… ليه عملتا كدا ؟؟؟... قصرتا منك ف شنو انا ؟؟؟…العيب فيني شنو ؟؟؟… وريني يا التهامي… دا اخر جزاي ...ضيعتا معاك شبابي وخليت اي حاجة عشانك… سلمتك كل املاك المرحوم ابوي عشان وثقتا فيك وقلت انت الوحيد الحتحافظ علي… حبيتك يا التهامي ل درجة اني ولدتا اولاد بشبهوك وكل يوم بتمنى انهم يطلعو طموحين زيك… لكن يا خسارة سنيني الضاعت معاك… اخر جزاي تمشي تتزوج فيني يا التهامي … تهيهي هي…
سعاد بقت تبكي…
(طبعا المرأة لمن تكون ف لحظة قوة بتقدر على الراجل وبتخوفو عديل…و ف لحظتها لو نهرتو وقالت ليهو وه ساي روحو بتطلع من الخلعة… لكن مجرد ما تضعف قدامو… هنا اب جيقة راسو ب يكبر ويعمل نفسو مسيطر )…
اها التهامي بعد ما سعاد ضعفت فدامو وبقت تبكي … يادوبي التهامي الهواء ضربو وبقى يتنفس والحياة دبت ف جسده…
التهامي نفش ريشو وقال ليهو : دا حق من حقوقي و افتكر اني ما غلطتا… وانا ما وريتك بس عشان ما عايز اجرحك…
سعاد ب حسرة : ما عايز تجرحني ؟؟؟… طيب انت حطمتني يا التهامي… كسرتا قلبي يا التهامي…
التهامي : عليكي الله بطلي الدراما بتاعت النسوان دي… انا اتزوجتا وخلاص الموضوع انتهى عشان ما تقعدي تقلبي لينا البيت بيت بكى….
سعاد وهي مكسورة : اتزوجتا وخلاص بس كدا بالبساطة دي يا التهامي ؟؟…
التهامي ب زهج : اففف ..عشان كدا الواحد ما عايز يجي البيت دا زاتو…
التهامي طلع واتخارج…
سعاد طبعا احساسها ما بيعرفوهو الا النسوان العرسو فيهن…
المهم هي قررت تمشي ل ليلى وتواجهها وتوريها ليك كتاب عفن… خطافة الرجال…
ابو الزفت زاتو…
...
..
.
كونو بخير ..
.
..
...
