احمد شال شنطتو وطلع من راكوبة الحاجة وقف ف الشارع عاين يمين وشمال… ما عارف يمشي وين ولا عرف يعمل شنو !!!… والجيلي كمان احرجو وقفل منو التلفون… فاا ما بقدر يتصل عليهو تاني… والمطرة جاية…
شوية كدا جا عمك كدا كبير ف السن راكب ليهو كارو و جا ماري من قدام الراكوبة وكورك : يا بخيتة يا ام بخت…
الحاجة بخيتة اتلفتت وابتسمت ابتسامة طيبة وقالت ليهو : بسم الله… حاج الرضي انت لسه حي ؟؟؟…
حاج الرضي : اموت كيف يا ام بخت وانا لسه منتظرك توافقي عشان اعرسك !!…
بخيتة : هي يا حاج يا مخرف انت بتقدر علي العرس …
حاج الرضي : انتي بس وافقي وبعدين شوفيني ....
احمد اتلفت بعاين ل حاج الرضي وبخيتة…
حاج الرضي وقف حمارو جنب راكوبة بخيتة ونزل سلم عليها…
حاج الرضي شايب كبير ف السن منحني الظهر يتكيء علي عصاية وبتسند بيها عشان يمشي ...اعصابو مرتخية وعندو رجفان ف اليدين….
حاج الرضي : كيفك اااا بخيتة وكيف بنياتك ؟؟؟…
بخيتة : بخير الحمد لله مافي اي عوجة… كيفك انت وكيف البنية وامها…
حاج الرضي : كويسااات والله يحمدن الله…
بخيتة : مالك يا حاج طولتا مننا كدا… والله انا افتكرتا انك حصلت ليك حاجة…
حاج الرضي : الجسم ما خلاااص اااا بخيتة بقى ما شايلني…
بخيتة : الله يديك العافية…..ومالك تاعب نفسك و جاي ف المطرة دي ؟؟؟؟…
الرضي : والله تقولي شنو بس !!!...مطرة امبارح صبت للحاجة ف مطبخها والليلة من الصباح قعدت تنقنق فيني قالت الا امشي السوق اجيب ليها مشمع…لانو الظروف ما معروفة وخريف السنة شكلو تقيل…
بخيتة : الله يهون يا حاج …
بوووم برووووم… صوت الرعد من بعيد…
الرضي : كدا النلحق الدكان قبل ما يقفل نشيل المشمع وارجع قبل المطرة دي ما تجي…
بخيتة : اااي الحقو يا اخوي الله يسهل ليك…
الرضي اتكأ علي عكازو وركب فوق الكارو وبخيتة قبلت بالاتجاه التاني شايفة احمد لسه واقف ف الشارع ويتلفت حيران…طوالي اتذكرتو…فااا قامت كوركت للرضي : الرضي… يا حاج…دقيقة بس…
الرضي اتلفت عليها : نعم يا ام بخت…
بخيتة نادت احمد وقالت ليهو : تعال يا ولدي…
احمد جا وقف جنبها …
بخيتة قالت ل حاج الرضي : عايزاك ف خدمة يا حاج لو ما تقيلة عليك…
الرضي : افو افو !!! تقيلة علي يا بخيتة ؟؟؟… دا كلام شنو كمان ؟؟؟….
بخيتة : عارفاك يا حاج والله ما بتقصر… بس كنت عايزة اقول الولد دا مسكين جاي من الخرطوم عشان يشتغل ف المشاريع واتقطع هنا وما عندو زول بعرفو… والله مطرة امبارح دي كلها صبت فوق راسو…جيت لقيتو قاعد ف الراكوبة بتاعتي دي وحالتو تحنن الكافر… بس لو بتقدر تسوقو معاك يبيت الليلة وتوصلو ل زولو او تشوف ليهو شغل تكون ما قصرتا…
الرضي : انا ابوك ااا الزينة…. انتي ما سمعتي ب تكية ود الزين ولا شنو ااا بخيتة ؟؟...ود الزين دا ابوي الله يرحمو…كان عندو تكية بيكرم فيها الغاشي والماشي…علا الزمن دا الناس نفوسهم بقت ما طيبة…
بخيتة : والله صحي كلامك يا حاج…
الرضي عاين ل احمد وقال ليهو : اركب ااا جنى… خلينا نشيل المشمع ونمشي سريع…
بخيتة : كتر خيرك وبارك الله فيك…
احمد ركب ف الكارو مع حاج الرضي ومشو وقفو جنب الدكان وحاج الرضي اشترى المشمع واحمد ساعدو ورفع ليهو المشمع ف الكارو…
حاج الرضي : يلا يا ولدي خلينا نمشي سريع…كويس انو نحن ماشين عكس المطرة ولحدي ما تلحقنا بنكون وصلنا او قربنا من الحلة…
المهم حاج الرضي احرك ب حمارو واحمد راكب معاهو ماشين علي القرية… يلا حاج الرضي يسأل ف احمد…اسمك منو ؟؟؟…انت من وين ؟؟؟.. اهلك وين ؟؟...الجابك البلد دي شنو ؟؟… و و و اسئلة الشياب دي …
المطرة نقطت فيهم وهم لسه ما وصلو الحلة…
احمد فك المشمع وربطو ف اطراف الكارو عشان ما يطير واتغطو بيهو وواصلو مشوارهم…وصلو القرية قبل ما المطر يشتد عليهم…
طبعا القرية كلها بيوتها مبنية بناء بلدي…
اها وقفو قدام بيت كدا وحاج الرضي اشر ل احمد علي تكية قدام البيت وقال ليهو : ادخل هناااك يا ولدي…انا بربط الحمار دا وبجي عليك…
احمد مشى دخل التكية ( صالة كبيرة مبنية ب جالوص واعمدتها عيدان وشعب ومعروشة ب حصير وقنا )…
طبعا احمد مجرد ما دخل قعد ليهو ف ركن… حس بالدفء ونفسو كدا ارتاحت ما عارف ليه…
الدنيا كان قربت تمغرب والمطرة بدت تزيد…شوية كدا جا حاج الرضي داخل وشايل معاهو لمبة جاز (حبوبة ونسيني )….وشايل ليهو عراقي جديد ومعاهو سروال طويل (اب تكة) وملاية جديدة….
حاج الرضي خت اللمبة ف نص الصالة و مد ل احمد العراقي والسروال وقال ليهو : انت ملابسك لينة يا ولدي امسك البس العراقي دا ...
احمد شال من حاج الرضي العراقي… وحاج الرضي طلع وجاهو بعد عشرة دقايق كدا شايل ليهو صينية فيها صحن عصيدة ب ملاح نعيمية وصحن صلطة وشطة….
احمد قام سريع مسك الصينية من الحاج… مع انو عمك يدينو بترجف لكن مافي اي حاجة اتدفقت منو…
احمد : مافي داعي ل دا كلو يا حاج … ما كان تتعب نفسك مع المطرة دي…
حاج الرضي : المطرة خفيفة يا ولدي… وبعدين عيب ف حقنا لو ما ضيفناك… نحن لمن يجينا ضيف نص الليل بنجيب ليهو الاكل…قوم غسل يدينك الابريق جنب الباب….
احمد مشى غسل يدنو و جا قعد اكل مع الحاج…
طبعا احمد مع مسافة الطريق وهو من الصباح ما اكل حاجة غير الزلابية بتاعت الحاجة بخيتة… فاا قعد ليك ف العصيدة دي واكل اكل لمن شبع وكمان الملاح طعمو عجيب وفيهو سمن…ياخ انسو بس…احمد اول مرة يضوق اكل بالطعم دا…
اها بعد ما اكلو حاج الرضي شال الصينية وطلع رجع بعد عشرة دقايق شايل سيرمس شاي وصينية فيها كباية واحدة… قال ل احمد : اشرب الشاي انت يا ولدي… انا ما بشرب شاي بالليل…
احمد : ما كان تتعب الحاجة يا حاج…
الرضي : يا ولدي دي اصلا عاداتنا كدا… اشرب الشاي ونوم اخد راحتك… شكلك تعبان…والصباح رباح…
المهم حاج الرضي طلع واحمد شرب ليهو كباية شاي يتدفأ بيها…وقام غير ملابسو بالعراقي الجابو ليهو الحاج وفتح شنطتو طلع الملابس اللينة كلها وشراها ف الفرشة جنبو واتغطى بالملاية رقد…
احمد رقد وقعد يفكر عن المواقف الحصلت ليهو من ما اتحرك من الخرطوم لغاية ما وصل عند تكية حاج الرضي وطعم الاكل الحلو من يد زوجتو والشاي الفيهو كل البهارات ليهو طعم تاني… ونعس ونام…
طبعا احمد تعبان تعب تقول شغال عتالي ....وهو ليهو يومين ما نام من يوم قرر السفر وامبارح المطرة دقتو ف راكوبة حاجة بخيتة… فااا نام نومة عميقة لمن قعد يشخر…..
اخينا صحى قربب الظهر… فتح عينو اتلفت جاي وجاي شاف ليهو صينية مغطية ب طبق وسيرمس شاي وجك موية…
اها احمد قام وصلى صلواتو وجاب الصينية اكل…وشرب الشاي…سامع ليك صوت حاج الرضي ومعاهو الحاجة…
الحاجة : حمد لله على السلامة يا حاج…
الرضي : الله يسلمك اااا السيدة…
السيدة : انزل ارتاح خليني النربط الحمار ونعلق ليهو ..
الرضي اتكأ علي عصايتو ونزل : الضيف صحى ختيتي ليهو الاكل ؟؟؟…
السيدة : اااي يا حاج… دقيت الباب ما رد علي… قمت ختيت ليهو الاكل جنب الباب ومشيت….
الرضي : كدا النمشي عليهو…
حاج الرضي دخل علي احمد ف التكية وسلم عليهو وقعد معاهو يتونسو…
المهم احمد قاعد يومين ما بطلع من التكية الا يمشي الحمام بس والاكل بوصل لغاية عندو جنب الباب من برا لمن الحاج يكون مافي…بس يسمع صوت الباب بيدق… بيمشي بعد دقيقتين يلقى صينينة الاكل والشاي…وبعد يخلص يمشي يختهم جنب باب البيت ويرجع…
وحاج الرضي لمن يجي… ب يمشي يجيب الاكل ويرجع يجيب الشاي والموية…لغاية المساء… و يشيل ويخدم ف احمد…
احمد طبعا شاف انو بقى تقيل علي حاج الرضي وما حصل يوم سألتو… والمفروض بعد دا شنو ... يشوف ليهو قبلة يمشي عليها…
احمد : ااا يا حاج كنت عايز اقول ليك توصف لي مكان المشاريع وين عشان عايز امشي هناك…
الرضي : تمشي هناك ب تفتش ف زول ولا شنو ؟؟… .
احمد : والله ما عندي زول ..لكن عايز افتش لي شغل…
الرضي : المشاريع دي فيها شغل زراعة بس يا ولدي وانت ماااك زول زراعة…
احمد : اعمل شنو !!..الظروف بس جبرتني يا حاج…
الرضي : ظروف شنو دي البتخليك تجي من الخرطوم عشان تشتغل ف الزراعة وهي ما شبهك يا ولدي؟؟؟…
احمد من جوة : آااااااه… خليها بس يا ابوي …ظروفي دي انا بسببها خليت الخرطوم وكرهتها عديييل كدا ومتمني ما ارجع ليها تاني…
الرضي : والله يا ولدي انا ما عايز اتدخل ف حياتك لكن مهما كانت ظروفك المفروض ما تبعد وتسيب اهلك…
المهم احمد عشان حاج الرضي ما يفهمو غلط ويقول انو كاتل ليهو زول ولا عامل جريمة عشان كدا هارب منهم… فااا حكي ليهو قصتو كلها وتعامل ابوهو واخوهو معاهو والسبب الخلاهو يسيب ليهم البيت ويمشي…
الرضي حس ب انو احمد صادق ف كلامو فااا ارتاح ليهو و اتعاطف معاهو و قال ليهو : يا ولدي انا ما عارف السبب لكن ابوك غلطان… الاخوان انا بعرفهم فيهم الخساسة ...لكن ابو يكره ولدو دا ماا لاقاني… ابوك دا شكلو ما عارف غلاوة الولد…
حاج الرضي جر نفس طويييل وقعد يحكي ل احمد : عارف يا ولدي انا ما عندي غير بت وااااحدة ربنا اداني ليها ف آاااخر عمري بعد خمسة وعشرين سنة زواج من عمتك السيدة… اتزوجت السيدة وهي لسه فتاة صغيرة ...عشت معاها سنة وسنتين ومافي لا حمل ولا اي حاجة…و طبعا عندنا هنا ف القرية لمن المراة ما تولد ف سنتين او تلاتة بالكتير معناهو العيب منها… والراجل طوالي بتزوج فيها… ف رجال ما بصبرو يعني من السنة الاولى بتزوج ف مرتو لو ما ولدت ليهو… ولو ما مستطيع علي مرتين بطلقها ويعرس غيرها….وانا والله الناس اصلو ما ريحوني ... لحدي ما نويت اتزوج….وكلمتها قالت لي اتزوج ساي انا عافية و ربنا يعدلها عليك ....وطبعا انا استغربتا من ردها وقلت انتظر ها يمكن تغير رايها ولا اشوفها زعلانة ...لكن والله ما اتغيرت مني وبتخدمني كل يوم لا كلت ولا ملت ....انا طوالي غيرتا رايي وقلت السيدة دي ماااا المراة البدبلو فيها وعشتا معاها والله مبسوط ونسيت حاجة اسمها اولاد لغاية ما ربنا رزقنا ب الزينة زينت حياتنا ....
كو كو كو كو ...باب التكية دق بطريقة شديدة ...دخل عليهم شاب كدا مربوع شنبو طويل شايل ليهو عكاز مضبب...
الشاب ب صوت غليظ : سلام عليكم...
حاج الرضي و احمد : وعليكم السلام ورحمة الله وبركاته....
الرضي : اها خير ااااا ود اخوي ؟؟؟...
الشاب وهو بحدر ل احمد : والخير يجي من وين ااااا عمي وانت جايب لينا غريب ف الحلة قاعد ليهو يومين ف التكية ؟؟؟ ....
يا جماعة دا شنو دا كمان ؟؟؟...
الله يستر...
...
..
.
كونو بخير...
.
..
...
