الزينة صرخت : احمااد لااااااااااااااا…
يد احمد وقفت بدون ما يحس ب سنت واحد من قلب بابكر…زي الفي قوة كدا مسكتو…
ف اللحظة دي السماني ابو بابكر وصل عندهم وضرب السكين بالعكاز عشان يزحها من صدر ولدو…والسكين اتغزت ل احمد ف يدو…والسماني ضرب احمد ضربة تانية بالعكاز رماهو بعيد من بابكر…
رجال الحلة جو جارين ومسكو السماني وشالو بابكر ربطو ليهو بطنو ب عمة ورفعوهو ف البوكسي ومعاهو عثمان وشالوهم وجري علي المستشفى….
احمد ماسك يدو والسكين مغزوزة … والزينة بقت تصرخ بطريقة هستيرية : كتلتو ااا احمد كتلتو كتلو كتلوووووو…. تهيييييي….
السيدة مسكت احمد من يدو ودخلو ف الحوش ومسكت السكين براااحة طلعتها من يد احمد ..وقلعت الطرحة من راس الزينة وربطت بيها محل الجرح….
السيدة قالت للزينة : جرحك كبير اا ولدي الا تمشي المشتشفى….
احمد : ما مشكلة يا حاجة ..بس اديني ملح اكبو ف الجرح والدم بقيف…
الزينة لسه بتصرخ وتلطم ف وشها : كتلو ..كتلو كتلوووو…
السيدة : اسكتي ااا بت ما تصرخي فينا ...
الزينة بقت تضرب احمد ف صدرو وقالت ليهو وهي بتبكي : امشي امشي اهلك ااا احمد امشي…
احمد : امشي وينا يا الزينة !!!…من هنا ما بتحرك…
الزينة وهي بتضرب ف صدر احمد ب يديها الاتنين : امشي ااا احمد الليلة بكتلوك امشيييييييي…
احمد واقف : خليهم يكتلوني…انتي مرتي يا الزينة و ما بفوتك ولا خطوة…. ومستعد احارب الدنيا كلها عشانك…
الزينة تصرخ فيهو : لا تحارب عشاني و لاني عايزاك…امشي قلت ليكي ياخ امشييي…
احمد : ابوكي المرحوم وصاني عليكي…و ما بمشي من هنا الا جنازة او انتي معاي يا الزينة…
الزينة : انا حليتك من الامانة دي اا احمد طلقني…طلقني ااا احمد…طلقنيييي…
احمد ب دهشة : اطلقك كيف يا الزينة دا كلام شنو البتقوليهو دا ؟؟؟…
الزينة ب عصبية : طلقني ياخ ماني عايزاك طلقني قلت ليك طلقنيييي …
احمد : الزينة…
الزينة دخلت جوة الغرفة وطلعت ملابس احمد وشنطتو الصغيرة ورمتها ليهو قدامو وصرخت : طلقني وفوت ماني عايزاك… طلقنيييب…
احمد واقف مذهول من كلامها…قام عاين للسيدة امها…
السيدة دنقرت راسها وقالت ليهو : طلقها ااا احمد…طلقها…
احمد راسو عايز ينفجر من الكلام السمعو…معقولة السيدة والزينة يتخلو عن احمد بعد ما المرحوم وصاهو عليهم… معقولة يا الزينة بعد التضحية دي كلها وتقول ليهو طلقني !!!…
الزينة لمن شافت احمد واقف وما عايز يشيل شنطتو… قامت شالت الشنطة ورمتها برا ف الشارع ولزت احمد لغاية ما طلعتو برا البيت وهي بتقول ليهو : اطلع اطلع ياخي ما عايزاك طلقني ..طلقني…
احمد شال شنطتو لبسها ف ظهرو وبعاين للزينة وعيونو مرقرقة… الزينة قفلت منو الباب…
احمد الدنيا اسودت ف وشو وقال احسن يلملم باقي كرامتو ويتوكل…
احمد ما كان خايف من اولاد عم الزينة ولا الحلة كلها بتهمو…الزينة الوحيدة البتهمو… كان عايزها تبقى ليهو مصدر قوة يستمد منها قوتو ..لكن الزينة طردتو من البيت شر طردة…
(اصلا النسوان ديل لمن يتدخلو ف مشاكل الرجال بيجوطو الشغلة وبيخربو اي حاجة )…
احمد اتحرك ماشي وما عارف نفسو ماشي وين راسو شاطب…وجرحو بتنزف و ما حاسي ب اي الم …المو الوحيد ف قلبو …لانو من قام ما حصل اتمسك اي حاجة ف الدنيا دي غير الزينة…ساب اهلو وسافر…ياخ هو القروش واموال ابوهو خلاها ليهم وما بتعني ليهو اي حاجة…وقال ف نفسو… انا فقر انا شوم وما محظوظ ف الدنيا… لا لقيت اسرة تحترمني وتعاملني ك انسان ولا لقيت زول يقيف جنبي… حتى البت الكنت فرحان بيها وما مصدق اني اتزوجتها… ابوها مات بسببي انا وطردتني من بيتهم….انا عارض انا فقر…عايش ليه تاني انا !!!… المفروض اموت ..ان شاء الله اموت…يا رب اموووووووت…
اها احمد بس مدنقر راسو ف الارض و ماشي مسافة الساعتين ب رجليهو والشمس ضاربة فوق راسو وبندب حظو العاثر… ويدو بتنزف دم والطرحة كلها اتملت….
احمد راسو لف و ررررررررررب دق الدلجة وقع داخ…
احمد فاق لقى نفسو ف مستشفى ومركبين ليهو درب…ولافين ليهو يدو المجروحة ب شاش…
شوية كدا وجات داخلة عليهو ممرضة ومعاها واحد شاب ...بتكلمو…
الممرضة عاينت ل احمد لقتو مفتح عيونو قالت ليهو : حمد لله علي السلامة…
احمد : انا وين والجابني منو هنا ؟؟؟…
(( احمد ف مستشفى ف منطقة تانية غير المستشفى الاتعالج فيها لمن بابكر ضربو بالفاس… لانو لمن طلع من البيت ما كان عارف نفسو ماشي وين ومشى ف اتجاه عكس ))....
الممرضة ورتو وقال ليهو الشاب الواقف دا لقاك واقع ف الطريق وجابك المستشفى ولو ما هو كان انت مته…
الشاب : حمد لله علي السلامة يا بطل…
احمد : الله يسلمك…وشكرا ليك ...
الشاب : الحاصل ليك شنو يا زول !!..لقيتك مطعون ب سكين وواقع ف الشارع…
احمد اتذكر الحصل وسكت ما رد عليهو…
الشاب عاين للمرضة وقال ليها : خلاص انا عملت كل الاجراءت وعايز امشي بعد دا لاني مسافر والله …الزول خلاص فاق وشنطتو ف عربيتي بجيبها ليهو ..
الممرضة : اصلا الجرح وخيطناهو… وتاني ما عليهو حاجة … ممكن عادي يطلع هو زاتو لو عايز ترجعو مكانو…
احمد اتلفت يمين وشمال و قال للمرضة : القطعة وينا الكان مربوط بيها الجرح ؟؟…
الممرضة : ما عارفاها والله ... بس اظن تحت ف كيس الزبالة ....
احمد : طلعي لي الفراشات دي …
الممرضة طلعت الفراشات ل احمد وقالت ليهو امشي للدكتور خليهو يكتب ليك حبوب للجرح حقك دا…
اها احمد ما اشتغل بكلامها ومشى برميل الزبالة لقى الطرحة موجودة فوق… شالها وختاها ف جيبو…
الشاب واقف يعاين ل احمد وقال ليهو : ارح اديك شنطتك يا حبيبنا…
احمد مشى مع الشاب برا المستشفى عشان يديهو شنطتو …
الشاب : اسمع لو عايزني اوصلك اي مكان انا ما عندي مشكلة… بس انت شكلك ما من البلد دي …
احمد : اااي انا من الخرطوم…
الشاب : والجابك البلد دي شنو !!… عندك اهل هنا ؟؟؟…
احمد : جيت البلد دي ل شغل وما اتوفقتا…
الشاب : طيب هسي متجه وين ؟؟؟…
احمد : والله ما عارف زاتو انا ماشي وين… ياخ خليني بس…
الشاب : لا بس ..انا متجه علي الخرطوم… لو ماشي الخرطوم ارح اركب معاي…رافقني…
احمد فكر فيها وقال هو ما عندو قروش ف جيبو لانو القروش حقت العرس الاداها ليهو المرحوم سلمها للزينة… فااا قال احسن يركب معاهو ويمشي اصلا تاني ما عندو حاجة هنا ف البلد دي…
اها احمد ركب مع الشاب واتحركو علي الخرطوم ... وفي الطريق الشباب اتعرفو علي اسماء بعض والشاب قعد يتونس مع احمد ووراهو انو ساكن امدرمان وكان مغترب ف الخليج و جا استقر ف السودان فتح ليهو مغسلة عربات و تلميع.. ليهو زي ستة شهور كدا وجا البلد هنا جاب زوجتو عايزة تولد وهو راجع الخرطوم ..…
طبعا احمد ما سامع كلامو وسرحان ف الزولة الفارقها… الزينة البت الحراز ...يتذكر زواجو منها والايام الحلوة القضاها معاها ... وابتسامتها الجذابة وضحكتها العذبة…ضحكاتك النغم الجميل ..راقي ومثير يا ستنا…
تذكر عهدنا الاول …. صحي الايام بتدول
قريب يوم داك ما طول ....مضت ايام و يا حليلا
بقت احلام بتتأول
احمد عيونو رقرقت ونزلت منو دمعة…
الشاب : ياااا حبيبنا… سرحتا وين يا حاج ؟؟…
احمد قشه دموعو و جاب من جوة : ااااااه…
الشاب : شنو يا فردة شكلك ممكون ...ناس البلد ديل صعبييين ...اوع يكون انطعتا ف بت ولا مراة ؟؟؟…
احمد جر نفس طويل وعاين للشاب وسكت…
الشاب : بس معليش عشان الطريق طويل لازم نتونس مع بعض عشان الواحد ما ينوم وكدا…وانت عارف براك الشارع كعب والحوادث وبتاع...
احمد : خير ...
الشاب : انت مش قلت لي جيت البلد دي ل شغل ؟؟...كنت شغال وين بالضبط ومجالك شنو انت ؟؟؟…
احمد : شغال عامل ف المشاريع…
الشاب : مهندس زراعي يعني ؟؟…
احمد : ما مهندس ولا اي شي ... عامل يوميات عادي…
الشاب : طيب مجالك شنو انت و خريج شنو ؟؟…
احمد : خريج وخلاص… هو ف زول شغال ب شهادتو ف البلد دي ... ما كل الناس شايلة شهادات وداخلة السوق…
الشاب : لا لا تمام… بس الحصاد لسه انت خليت الشغل ليه ؟؟؟...
احمد : والله مشاكل وكدا…
الشاب : ايوااا…بس ما تكون مشاكل ف بت ؟؟…
احمد سكت وما رد ليهو…
الشتب حالول يغير الموضوع : لكن والله انت زول غريب ... يعني ف الخرطوم ما لقيت اي شغل ؟؟؟…
احمد : انا لو لاقي فيها شغل بمشي الولايات !!!.. الخرطوم دي انا ما نافعة ياخ…والله كان نفسي اتخارج برا البلد دي… بس ربنا ما سهل…
اها الشباب ياخدو ويدو مع بعض ف الكلام… واحمد ما كان عايز يتكلم لكن الشاب بقلع منو الكلام قلع…
وصلو التفتيش ودخلو الخرطوم …
الشاب : اها يا حبيبنا… بيتكم وين عشان اوصلك…
احمد : نزلني بس ف اي مكان واتوكل انت…
الشاب : لا لا يا حبيبنا… الدنيا ليل ... انا جايبك معاي من هناك ... يعني ما قادر اوصلك بيتكم؟؟…وبالمناسبة… اديني رقمك كمان عشان اتواصل معاك….
احمد : والله الشريحة ليها شهور ما دخلتها ف تلفون… ما عارف بكون اتقفلت…
الشاب : ما حنك يا مان ... بتواصل معاك …بس وصف لي بيتكم عشان اوصلك…
احمد طبعا ما عارف انو ابوهو اتوفى فاا عشان كدا ما عايز يمشي ليهم البيت…لانو لسه زعلان من اخر حركة عملوها فيهو هو ومحمد قبل زواج محمد ….
احمد : ياخ انا ما عندي بيت ... لو انت عندك لي مكان ابيت فيهو لغاية بكرة الصباح ارح وديني ..ولو ما عندك مكان نزلني ف اي مكان وخلاص….
الشاب : طيب اسمعني…تمشي معاي البيت لانو الزمن فات وما ح تلقى محل تبيت فيهو…والصباح رباح ...و لو عندك فهم تشتغل معاي ف المغسلة لغاية ما امورك تظبط… انا ما عندي مانع…
المهم الشاب ساق احمد معاهو بيتو و بات معاهو …والصباح طلعو من البيت جو المغسلة ...
المحل عبارة عن مغسلة وتلميع عربات… والشغل ما على قدر كدا لانو المحل جديد ….
المهم احمد وافق انو يشتغل معاهو ف المغسلة… محاسب لانو يدو فيها الجرح وما بقدر يشتفل بيها غسيل…
المغسلة شغالين فيها تلاتة اولاد…واحد ساكن قريب و اتنين من ابناء الولايات… وفيها غرفة واحدة… بينومو فيها الولدين ال من الولايات لانهم ما عندهم اهل هنا… واحمد بقى ينوم معاهم ف الغرفة….
اها عدت الايام واحمد كل يوم يطلع الطرحة. ويشمها ويتذكر ف الزينة الرزينة ... وصورتها اصلو ما راحت من بالو… كل يوم بناجي طيفها صباح وبالليل قبل ما ينوم لازم يتذكر ذكرياتو الجميلة معاها ودموعو تنزل واخر حاجة يتذكر لمن طردتو… يقوم يمسح دموعو بالطرحة وينوم…
يلا ف يوم جو شباب كدا جايبين ليهم عربية بدون لوحات عايزين يغسلوها ويعملو ليها تلميع ...وقفو عربيتهم وقعدو يتكلمو عن عربات البوكو وطريق ليبيا والكلام دا…
واحمد بقى منتبه معاهم…
…
..
.
كونو بخير…
.
..
…
