يوم يومين تلاتة ومافي اي اتصال بين التهامي ومدام ليلى…
كدا نونسكم شوية عن مدام ليلى ومحلاتها…
طبعا مدام ليلى مؤجرة ليها صف كامل بتاع محلات يعني من الناصية للناصية ومحلاتها بتفتح علي الزلط…دكان واحد عاملاهو مكتب ادارة وباقي المحلات كوفير ومحلات ملابس نسائية فاخرة…
المهم كل الطاقم الشغال معاها ف المحلات بنات فقط…من محاسبات ل ميك اب ارتيست ل مساعدات ( المساعدات ديل شغلن شنو…المساعدات الشغلات ف محل الملابس بيساعدن الناس البجو يشترو يعني يوروهم نوع الملابس والخامة والتشكيلات والمقاسات وكدا وطريقتن زاتا ف التسويق طريقة عجيبة يخلوك تشتري غصبا عنك… .والمساعدات الشغالات ف الكوفير ومحل التجميل بشتغلن تجهيز ادوات التجميل ونضافة الجسم وكدا … يلا محلات الملابس عادي ممكن اي زول يدخل يعني رجال ونسوان ممكن الراجل يجيب امو او زوجتو وبناتو او يجيب خطيبتو … لكن الكوفير مافي راجل بعتب ف الباب ما زي اغلب الكوافير تلقى الراجل متحكر وقاعد جوة عشان الكوفير حقو او بكون مشغل معاهو اخوانو او اصحابو وتلقاهم قاعدين ف الاستقبال يعني محاسبين ومسؤولين من المحل وكدا…
لكن كوفير مدام ليلي مافي راجل بدخل… والراجل الوحيد المسموح ليهو يدخل الكوفير العريس فقط يعني الا تكون عريس وجاي تستلم عروستك من الكوفير… والعريس مسموح ليهو لانو اصلا يوم العرس بكون طاشي شبكة وما بقعد يعاكس البنات او يعاين ليهن… بكون جاي يشوف عروستو وهو اصلا خارج التغطية وما فاهم حاجة فااا بدفع القروش العليهو والامنية بتاعت فستان الزفاف والوردة وبسوق عرستو ويبقى مارق…
يلا المحلات كلها بتفتح من بعد الظهر وتقفل الساعة 9 لكن يوم الخميس والجمعة والسبت بقفلو الساعة 11 ومرات ل 12… يعني شغالين دوام مسائي فقط وعندهم ترحيل من و الى…فااا يوم الخميس دا بكون مولد بالنسبة ليهم والكوفير بكون مزدحم من النهار لحدي ما يقفلو بالليل… طبعا نسوان كتار بجن المحل بعملن نضافة عامة للجسم …و في بنات فتوات برضو بجن المحل …
يلا عندهم نضافة بالحلاوة وبالليزر حسب اختيار المراة او البت… فااا يمسكوها المساعدات ديل يخلوها ليك نااااااعمة و ملساااااااااء زي كيس الدكوة … .ياخ الموية ما بتمسك ف جسمها من شدة النعومة… وبالجد هم شغلهم نضيف عشان كدا زبوناتهم كتيرات…
*تعريجة*
بيني وبينكم كدا لكن … انا كنت فاتح لي طبلية جنبهم هناك ... هي ما طبلية لكن ف نظري زي الطبلية ...جبتا لي طربيزة خشب صغيرة من البيت من طرابيز الحجة…هي زاتها طربيزة اتيمة يعني واااحدة ف البيت…المهم ختيت فيها علبة سجاير وكبريتين وعلبة لبان شكلت الملون داك وحلاوة مصاصة وقلم حواجب وقعدتا ابيع فيهم هناك…صاح ما كنت ببيع كتير لكن نفسياتي كانت ف السماء…والله صحي المظهر الحسن بيشرح النفس…
لكن تأت الرياح بما لا تشتهي السفن…وصدق اللي قال الايام الحلوة بتعدي ف ثواني …
اها فجأة كدا كبسو ليك ناس المحلية الله لا جاب باقيهم وكتموها ليك فيني… شالو طربيزة الحجة وبضاعتي ورموها ف دفارهم وانا طبعا كبرتها زمااااااان ..كرهتي ف الدنيا دفار الكشة ...و المصيبة انو ف واحد من العساكر شكلو جديد وفرحان بالشغل… اها تلب من الدفار وجا فاتح وراي… هو قصير وجراي جري الجنى دا... ياخ لمن يجري بفرش بالجنبات زي لساتك المرسيدس…اها كتلتا الملف الاول وهو وراي…والملف التاني وهو ف خطراتي لقيت لي حيطة قصيرة كدا تلبتا بيها وهو قدامي ... دقشت الباب ومرقتا ب كلو وهو فحط زي توم اند جيري ومعاي لحام…بس ما قدر يمسكني… يمد يدو وانا بزوغ ليك منو… بقيت ليك معاهو زي اقطاب المغنطيس المتشابهة…
اها انا خلاااص الفيني كملت و لساني مرق سلبة ونفسي بقى مافي عديل ..وبعد دا كلو ما استلمتا…الخوف صعب والحراصة سخنة يا جماعة… اها للتعترني مع الجري والخوف ما انتبهتا ل الشوارع ولقيت نفسي قدام الدفار…البحر امامك والعدو خلفك… الله اكبر عليكم…
من شفت الدفار قدامي سرعتي قلت و العسكري القصير دخل تحت كرعيني واتكومنا انا وهو ف الدايمة….
بعد نفس طويل قلت للعسكري : ياخ انت جاري وراي كدا انا كاتل لي زول !!!… ان شاء الله يدوك نجمة بعد دا كلو…
الضابط راكب قدام ف الدفار عاين لي وقال : تعال يا مواطن…
قمتا نفضتا هدومي من الغبار وقلت اصلا انا الليلة شكلي بايت ف الحراصة بايت ف الحراصة… مشيت علي الدفار عايز اركب براي عشان العساكر المعفنين ديل ما يكرفسوني ويدعوني فوق… فاا ختيت كراعي عايز اركب قام الضابط تاني كورك لي : تعال هنا قلت ليك يا ملكي…
نزلت ومشيت وقفتا جنب الضابط وانا ساكت…
الضابط : جانا بلاغ انك مشوه المظهر العام ب طربيزتك دي… والمفروض نوديك الحراسة نحبسك اسبوع ونحلقك صلعة عشان تتأدب… لكن رفقا بحالك شيل حاجاتك ديل وتاني ما اشوف خلقتك دي هنا… سامع ؟؟..
قلت ليهو ب صوت مبحوح : حاضر يا سعادتك…
الضابط ب نهرة : يلا شيل طربيزتك دي واتوكل…
العساكر الخسيسين رمو لي الطربيزة من الدفار وقعدو ياكلو ف اللبان ويشربو ف السجاير حقي ان شاء الله ما ينفعهم…
شلت طربيزتي واتفكفكتا زعلان زعل عايز اطق… ياخ ما حارقاني الا الجرية الجريتها دي والعسكري السكاني … انتو قايلين شنو انا اصلا طربيزة الحجة دي ما كنت ح اخليها ليهم وكنت عايز احرق الدفار بي عساكرو… اي شي ولااا طربيزة الحجة لانو لو شالوها انا الا اشوف لي بلد تاني ..لكن عرفوها الخسيسين ورجعوها لي عيال ام زقدة…
ومن ديك وعيك… تاني ما مشيت بهناك…
ما علينا نرجع ل قصتنا….
اليوم الرابع التهامي عمل ل ليلي مفاجأة ومشى ليها ف المكتب والكلام دا كان بعد العصر لقاها قاعدة ومعاها نساوين اتنين…
التهامي سلم عليهم ومدام ليلي قالت ليهو اتفضل…قعدتو ف كراسي الجلوس وكلمت البت جابت ليهو عصير وشاي ....واستأذنت منو ومشت للنساوين…
يلا مدام ليلى كانت بتتناقش مع النساوين ف موضوع كدا انها عايزة تأجر الشقة الفوق محلاتها وتعمل صالة رياضية gym كمال اجسام نسوي…ما عشان يبقن معضلات اصلا هن معضلات لكن شنو نظام fitness لياقة وكدا عشان يكونن رشيقات و يتخلصن من الكرش…والشغلة دي ظهرت موضة للنساء وخاصة الفتيات…
اها الموضوع طول والتهامي قاعد منتظر…
مدام ليلى حست بالتهامي قلق فاا قامت اعذرت للنسوان وقالت ليهم نكمل وكت تاني بتصل عليكم بكرة او بعدو ونتشاور ف الموضوع دا…
النسوان طلعن ومدام ليلى قدمتن للباب ورجعت ل التهامي…
التهامي : معليش يمكن انا جيتك ف وكت ما مناسب…
مدام ليلى : لا لا عادي المحل محلك تجي ف اي وكت يعجبك…
الكلام دا خلى التهامي يتشجع ويقول ليها : انا والله ما كنت عايز اجيكي لكن ما قدرتا اصبر اكتر من كدا… بس عايز اعرف رايك شنو ف الموضوع الطرحتو ليكي…
مدام ليلى : اممم…والله يا التهامي انا شايفة انو دا ما وكتو وانا ما مستعدة للزواج ولا بفكر فيهو ف الوكت الحالي …
التهامي : وكتو متين طيب !!!… انتي لسه صغيرة وعايزة زول يقيف جنبك ويكون سندك… ولا انتي رافضاني انا شخصيا ؟؟؟…
مدام ليلى : لا ما قصة اني رافضاك والله… بس ما عارفة اقول ليك شنو !!!… ف حاجات انا لسه ما فكرتا فيها …
التهامي : طيب فكري فيها ب صوت عالي ووريني شنو هي الحاجات دي ولو عندك اي سؤال اسأليني ليهو وانا بجاوبك بكل صراحة…
مدام ليلى : يعني انا بفكر ف اولادي وامي.. هل هم ح يوافقو علي زواجي ؟؟؟… وبعد ما اتزوج وضعهم ح يكون كيف و انا وانت ح نقعد وين وكلام كتير بفكر فيهو …
التهامي عرف انو مدام ليلى عايزة العرس بس مترددة شوية فاا قال ليها : اول حاجة امك واولادك علي عيني وراسي ووضعهم ح يكون زي ما هو مافي شي ح يتغير…وثانيا انا وانتي ح نأجر لينا شقة تكون قريبة هنا من شغلك ونتلاقى فيها…
مدام ليلى : يعني عايزني اكون بعيدة من امي واطفالي ؟؟؟…
التهامي : لا لا ما كدا… ما نحن ح نكون مع بعض ف اي وكت تختاريهو ف زمن دوامك وباقي يومك عادي تكوني مع امك و اطفالك وتنومي معاهم ف البيت…
مدام ليلى : طيب دا ما اسمو زواج يا التهامي…
التهامي : دا وضع مؤقت بس… ولو عايزاني اجيكي ف بيتكم عادي انا ما عندي مشكلة بس قلت مراعاتا ل اطفالك وامك والموضوع ح يكون غريب بالنسبة ليهم…
مدام ليلى : والله يا التهامي انا ما عايزة امي تاخد مني موقف وتقول لي مشيتي شفتي حالك واهملتي عيالك…
التهامي : امك عارفة انك محتاجة ل راجل يقيف جنبك وانا متأكد ما ح تعترض علي زواجك بس انتي وافقي…
مدام ليلى : طيب وزوجتك واولادك ؟؟…
التهامي ب تردد : بيني وبينك كدا انا ما عايز اكلمهم ....دا ما معناهو اني خايف من زوجتي ... لكن بس عشان ما في داعي للمشاكل والمشاحنات…
مدام ليلى : طيب افضل خلينا كدا احسن يا التهامي ... لانو لو اتزوجتني… زوجتك ح تعرف و ح تعمل ليك مشاكل و انت ح تطلقني ....و ح اكون بالنسبة ليك مجرد نزوة وعدت ....
التهامي : يا بت الناس نزوة شنو عليك الله وانا ف عمري دا ؟؟؟...والله انا من اتزوجتا ام عيالي دي ما حصل فكرتا اعرس فيها ولا في مراة ف الدنيا دي جذبتني غيرك ... ولو انتي خايفة من انها تعرف ...انا بطمنك انها ما ح تعرف لاني ح اكون حذر جدا وما ح اخليها تشك فيني ...ياخ نفترض انها عرفت…. مافي مشكلة بالنسبة ليك...انتي زوجتي وعندك حقوق زيك زيها.... وبالمناسبة انا زوجتي عارفها كويس ح تزعل يوم يومين اسبوع و ح ترجع عادي ... يعني اتطمني من الناحية دي ....
مدام ليلى : ما قادرة اتطمن لانو مافي مراة بترضى الضرة ...
التهامي : انا غايتو نويت خلاص اعرسك كان هي ترضى ولا كان تابى .....الا كان ترفضيني انتي بس ...
اها التهامى رقد دكوة ل مدام ليلى ... وبعد حنك دقاق مدام ليلى شبه وافقت بس قالت عايزة تشوف راي امها ف زواجها وبعدين بترد علي التهامي ....
التهامي مشى وقال بكرة ح يتصل عليها عشان يعرف راي امها شنو وهو متأكد انو مافي ام ح تقيف قدام سعادة بتها يعني الموضوع دا تامي يعني تامي ...وهو كمان مصر انو يتزوج مدام ليلى ب اي طريقة…
يلا اليوم التاني من الصباح التهامي قاعد ف المكتب ومنتظر اتصال مدام ليلى ولغاية الساعة عشرة صباحا مدام ليلى ما اتصلت عليهو فااا شال تلفونو واتصل عليها… وبعد جرسين تلاتة اربعة مدام ليلى ردت : الووو…
التهامي : صباح الخير يا ليلى…
مدام ليلى : صباح النور …
التهامي : اسف علي الاتصال لكن انا من امبارح بالليل ما نمتا ... بس قاعد وماسك التلفون منتظر منك اتصال او رسالة توريني امك قالت شنو …
مدام ليلى : طيب ف كلام عايزة اقولو ليك بس ما ينفع بالتلفون…
التهامي : خلاص بجيكي بعدين ف المكتب…
مدام ليلى : لا لا الافضل انو نتلاقى ف مكان تاني غير المكتب….
التهامي : خلاص تمام… لمن تطلعي من بيتكم كلميني…
مدام : اوكي يلا سلام…
نشوف مدام ليلى عايزة تقول شنو للتهامي وهل ح يتزوجها ولا لا .....
####
في مكان تاني ....
احمد قاعد ف النادي يشرب ف الشيشة ويتونس مع صحبو اسمو خالد …
خالد : انت يا احمد عايز تضر نفسك ولا شنو ؟؟؟… مالك قاعد تشرب شيشة كتيرة كدا ؟؟؟…
احمد : من العلي ياخ… والله الدنيا مقفلاها معاي من كل الاتجاهات…خليها بالنية بس…
خالد ب دهشة : انت بتقول الكلام دا ؟؟؟…
احمد : وانا مالي !!.. ما انسان ولا ما عندي احساس ؟؟؟…
خالد : لا ما كدا… لكن انت ود العوض بتقول الكلام دا… طيب نحن البؤساء ديل نقول شنو ؟؟؟…
احمد : ود العوض يعني شنو !!… ما اهو شغال يوميات وباكل فتة معاك ف الدكان…وبنطلوني واحد…
خالد : انت براك مشاقي نفسك… هسي لو اشتغلتا مع ابوك ساي امورك بتوضح…
احمد : والله كان اشتغل يوميات ولا اقعد عاطل طول عمري ما اشتغل معاهو… ياخ اسكت انت ما عارف حاجة ساي…
خالد : طيب يعني فهمك شنو !!… انت من التفكير الكتير لمن راسك شيب ….
احمد : الشيب هين… انت لو ف مكاني كان جنيت…
اها خالد قعد يتكلم مع احمد وسمع منو كلام غريب… لانو زول ف وضع احمد المفروض ما يقول كلام زي دا…
اها احمد كان كلامو شنو ؟؟؟…
نتابع ونشوف ..
...
..
.
كونو بخير…
.
..
...
