التهامي امورو جاطت ودخل ف ضيقة… فكر انو ما يطلق ليلى ويخليها كدا معلقة ضر وحسادة عشان كلامها القالتو.… لكن بعد فكر كويس و حس بالخطر وانو ليلى ح تتعبو و ح تحاول تشوه سمعتو وتطلعو ما راجل ..فاا شنو ..قال احسن يتفاهم معاها بالذوق ويحاول يرجعها….
يلا التهامي شال ليهو هدية كدا سلسل دهب و مشى ل ليلي و حاول يتأسف ليها و يراضيها وقال ليها نرجع ل بعض… لكن ليلى كانت واقفة سيخ و مصرة علي موقفها وقالت ليهو مافي اي رجوع… طلاق بس…
التهامي لمن شافها مصرة علي الطلاق حاول يساومها وقال ليها لو عايزة الطلاق ادفعي لي قروش الحاجات الاشتريتها ليكي ورجعي القروش الخسرتها فيكي وبعدين بطلقك…وليلى قالت ليها الحاجات دي انا ما طلبتها منك انت ال بذات نفسك جبتها لي و دا كلو حق فترة زواجي القعدتها معاك وما عايز مني حاجة ولو ما طلقتني انا بعرف بتطلق منك كيف و تاني ما تلوم الا نفسك……
التهامي عرف انو براهو دخل نفسو ف الورطة دي….زواج وجهجهة وخسارة املاك واموال وندم شديد وطلقها وخلص من شرها…
ليلى لغاية هنا وبرنامجنا معاها انتهى كانت مجرد نزوة عابرة من التهامي…
التهامي خلاص بقى ما عندو اي حاجة غير عربيتو وطبعا البيت القاعدين فيهو دا حق سعاد… وشغلو كمان بقى مجهجه لانو خلاص فقد اسمو ف السوق… بس بقى يمشى السوق ويتحكحك جنب السماسرة الكبار ويدخل معاهم ف البيعة… طلاقات وحرامات و التجار بحنو علي حالتو وبدوهو الفيها النصيب زيو و زي الصبيان …والموضوع دا كان مأثر مع التهامي شديد لانو كان تمساح من تماسيح السوق وحاليا السماسرة بستحقروهو وبعاملوهو معاملة الصبيان… فااا خلى السوق وباع عربيتو كملها مصاريف ف البيت… وبقى دايش ساي…ما عارف يشتغل شنو…
اسرة التهامي ما متعودين علي حياة الناس الكادحين ناس رزق اليوم باليوم وياكلوها كسرة ب موية ... فاا شنو… سعاد لمن شافت الحالة بقت بطالة…بقت كل يوم تخلق مشاكل مع التهامي وجوطة وكوراك بسبب المصاريف البسيطة ومرات مافي وهم طبعا مصروفاتهم كتيرة لانهم عايشين عيشة الناس البرجوازيين…
يلا التهامي طرح ليها فكرة انهم يبيعو البيت ويشترو ليهم بيت ف ضواحي الخرطوم وباقي القروش يستثمروها ف اي حاجة تانية… وفعلا سعاد واقفت لانها استاءت من صحبتها منال وباقي الجارات لانهن بيشمتو فيها و بيعاينو ليها ب اشمئزاز كدا نظام الدنيا دقت بيهم الواطة…
عشان كدا سعاد سمعت كلام التهامي وقررت ترحل من الحي… .فااا باعو البيت واشترو بيت ف ضواحي الخرطوم ورحلو… والقروش الفضلت… التهامي اشترى بيها هايس نص عمر وحاليا شغال فيهو…
وبالنسبة ل اسرة التهامي…طبعا سعاد كان باقي ليها دهيبات شوية… باعتهم للمصاريف والباقي كملتو كلو مع الفكي…و بقو علي الحديدة….
بتهم الكبيرة هبة كانت بتقرا ف جامعة خاصة والحاجة الكويسة انها كملت الدراسة قبل ما ابوها يفلس واتزوجها واحد زميلها وطفش بيها خارج السودان ….
هند دخلت الجامعة بعد الفلس وقرت جامعة النيلين وخلصت ب مجازفات… ف الجامعة كانت عندها علاقات مع كم من زملائها ف الدراسة وبرضو مع الغرباء لكن كلهم اولاد مرطبين ضاربين النسمة… .فاا هند عشان ف حياتهم السابقة كانت عايشة عيشة رفاهية وابوها كان بدلعها شديد… وبعد الفلس الامور اتغيرت… فااا هند بقت تقابض من طرف ف اولاد الراحات بحيث انها تستغلهم وتمشي معاهم الاماكن والمطاعم الراقية ال كان زمان ابوها بوديهم ليها… و طبعا بتحصل بينهم بعض التجاوزات لكن ما وصلت معاهم ل مرحلة بعيدة… هي شايفة انها كدا محافظة علي نفسها بس كانت بتتجاوز معاهم عشان تاخد منهم قروش… يعني بالمعنى الواضح انو بحصل بيناتهم مسك يدين و بوس واحضان و و و و لكن ما بتوصل ل مرحلة انها تنوم معاهم… (( طبعا الجيل الحالي شايف انو الحاجات دي عادية جدا بين اي حبيبين او اي اتنين مخطوبين و بسموها نكهة العلاقة وشايفنها بتزيد الترابط بينهم ....وهم عارفين انو دا حرام بس الوحد بتعمد انو يعمل الحرام… ربنا يهدينا جميعا ))…
يلا هند بعد خلصت الجامعة بقت لافة دايشة و لمت ف محمد ود العوض وبقتو نجيلة… و ح نشوف باقي قصتهم قدام …
مجاهد جاي ورا هند امتحن الشهادة وجاب نسبة ما بطالة واستعان بواسطات ابوهو الزمان ودخل الكلية الحربية وهسي طالب حربي ف المعسكر…
منذر ف سن المراهقة… هو صغير البيت اتربى ف عز الفقر…والخلافات والمشاكل البين ابوهو وامو عملت ليهو نفسيات وبقى يسرح براهو ويقعد يتبسم ومرات يتكلم مع نفسو… .امو سعاد لمن شافتو كدا مشت ودتو للفكي عشان يعالجو… زهلل بيهو زيادة وعقلو طش…وبقى لافي يلقط اكياس ..مرات امو بتربطو ف البيت عشان ما يطلع الشارع… هو صاح ما عندو ذنب ف حالتو… بس امو وابوهو الخلوهو يوصل للمرحلة دي بسبب مشاكلهم الكتيرة والسحر والعمل والخزعبلات القاعدة تجيبها امو من الفكي…
سعاد قالت ل بتها هند كيف تخلي محمد يتقدم ليها… .فاااا مشت ودتها للفكي ودفعو القروش الشالتها هند من محمد والفكي عمل ليها العمل داك و زي ما انتو عارفين محمد شالو منها…
يلا كدا اتعرفنا علي اسرة التهامي وعرفناهو كيف امورو جاطت وبقى علي الحديدة…
روايتنا طبعا ما انتهت… دا كان مجرد اختصار لقصة التهامي ويادوبي روايتنا بدت…
قدام …
####
في مكان تاني ....
مروة الصباح قامت تنضف البيت ولمن جات الصالون شافتو مقفول والمكيف ما شغال… افتكرت انو احمد اليوم عندو شغل وطلع الصباح بدري…
فتحت باب الصالون و دخلت لقت الدنيا مقلوبة ودولاب احمد فاتح ومافيهو ملابس…قالت ف نفسها ف حرامي جا البيت وعايزة تكورك تنادي امها… شافت ليها ورقة ف الطربيزة مشت شالتها وفتحت لقت مكتوب فيها…
السلام عليكم ورحمة الله وبركاته…
اختي العزيزة مروة… انا كتبتا ليكي الرسالة دي عشان عارفك انتي الوحيدة المهتمة ل امري ....انا مسافر بس ما ح اوريكي وين عشان ما عايز زول يفتشني ولا يسأل عني… واصلا عارف انو مافي زول من الاسرة ح يهمو غيابي كتير… انا عايش معاكم ف البيت وكنت متضايق لاني بالجد كنت حاسي بانهم ما اسرتي…باستثناءك انتي طبعا…وكلام محمد الاخير دا ووقوف ابوي وامي معاهو خلاني احس اكتر اني غريب عنكم… اصلا انا كنت عايز اجمع لي قروش واودعكم واسافر برا البلد دي ....بس هو استعجل… دا السبب الخلاني اسيب البيت بدون ما اكلم زول…عموما خلي بالك من نفسك يا مروة ولو حيين ان شاء الله بنتلاقى… والسلام عليكم…
اخوكي البائس… احمد
مروة بقت تبكي وجرت ل امها وحضنتها وتبكي ب صوت عالي… تهيهيهييي ..
سميرة (امها) : بسم الله…بتبكي مالك يا بت ف شنو ؟؟....
مروة وهي بتبكي : وااااااي احمد يا امي احمد…تهيهييي…
سميرة : احمد مالو يا بت انضمي ؟؟؟…
مروة : تهيهييي… احمد ساب البيت ومشى… تهيهيهييي…
سميرة : مشى وين كمان الولد ؟؟…
مروة : ما عارفاهو يا امي قال ماشي ما راجع تانيييي تهييهيهيهييي…
سميرة : هو وينو طيب دقيقة النتكلم معاهو…
مروة : مشى يا امي لقيتو كاتب لي الورقة دي وخلاها ف الصالون… تهيهيهييي…
سميرة : اسكتي ما تبكي يا بت يعني ح يمشي وين… ما هو كل مرة بيمشي شغل مع اصحابو بالايام والاسابيع وبرجع…
مروة : ما ح يرجع تاني يا امي ....ما ح يرجع …
سميرة : خلي ابويك يجي النكلمو يخلي محمد يمشي يفتشو ويجيبو راجع…
اها قاعدين منتظرين لغاية ما حاج العوض ومحمد رجعو من الشغل…
مروة. وامها قاعدين ف المطبخ يجهزو ف الاكل ومروة بقت تلكز ف امها عشان تكلم ابوها… وامها عارفة انو العوض لمن يرجع من الشغل ما بتفاهم… الا يروق ويرتاح شوية ولو عندهم اي موضوع بكلموهو بعد العشاء ...
ومروة مصرة علي امها لازم تكلم ابوها هسي عشان يلحقو احمد وما يمشي بعيد…
سميرة قالت ليها : اصبري يا بت خلي ابوكي يرتاح شوية…
مروة : لا لا يا امي كلميهو هسي عليك الله…
العوض سمع وسوستهم وكورك ليهم : هوي… مالكن بتوسوسن ؟؟…
سميرة : لا لا يا حاج مافي شي…
مروة : ف يا ابوي…
العوض ب صوت مرعب : ف شنو طيب اتكلمن ؟؟؟..
سميرة ومروة ف وكت واحد : احمد طلع من البيت….
العوض : ويعني شنو لو طلع !!!… وين المشكلة ؟؟...
مروة : طلع يا ابوي… قال زعلان من كلام محمد وما راجع تاني…
العوض : يعني زعلان من كلام محمد ؟؟؟… هو البيت دا حق محمد ولا حقي انا ؟؟… البيوت دي كلها فيها مشاكل وعادي الاخوان بختلفو وبرجو تاني…وهو عامل زي البنات يقعد يتزاعل ويطلع يخلي البيت زي المراة الحردانة…
مروة : يا ابوي خلي محمد يمشي يفتشو…
العوض : والله ولا يتحرك خطوة عشان يفتشو…وبعدين ف راجل بمشي يفتشوهو ويحنسوهو يقولو ليهو ارجع البيت ؟؟.... اخوكي دا راسو ناشف … لكن لو الدنيا دقتو بعرف الله حق وبرجع زي الكلب…ود المراة…
مروة : عليك الله يا اب…
العوض نهرها ليك ب صوت زي الرعدة : اسكتي يا بت ...وما تجيبي لي سيرتو تاني… ولو ما رجع براهو مافي زول بمشي بفتشو…
طبعا محمد سامع الكلام كلو ومبسوط من الخبر دا لمن عايز يطير من الفرح… قال خلاص الجو خلى ليهو وكدا اي حاجة ف راسو ح يبقدر يعملها…
المهم مروة دخلت غرفتها وبقت تبكي بحرقة ..عرفت انو كلام احمد اخوها صاح ومافي زول ح يهتم ل امرو…وبقت حزينة و متحسرة علي فراق اخوها…ليه طيب يمشي يخليها وهو عارف انو هو والوحيد البفهمها وبقيف معاها …وهو الوحيد سندها ف الدنيا دي بعد ربنا…
اااااه ..دنيا فراقة…
…
..
.
كونو بخير…
.
..
…
