حاج الرضي اليوم التاني طوالي ضبح ل احمد خروف وعمل ليهو كرامة ب مناسبة خروجو من المستشفى بالسلامة و عزم ناس الحلة كلهم ب اخوهو السماني… لكن السماني واولادو ما جو الكرامة عشان هم لسه زعلانين من الرضي لانو رفض يدي بتو ل بابكر….
اها وكت الكرامة حاج الرضي اتذكر انو احمد المفروض ياخد حقنة الصباح وما اخدها وهم الاتنين نسو…يلا عندهم واحد ف الحلة بطعن الناس حقن وكدا… والرضي سأل الجماعة من الزول دا…و قالو ليهو الزول دا سافر الخرطوم والمشكلة انو مافي زول تاني غيرو ف الحلة بيعرف يطعن حقن…يلا حاج الرضي بعد الناس فرو جاب الكارو وقال ل احمد ارح نمشي المركز حق القرية الجنبنا…عشان يدوك الحقنة بتاعتك…
اها احمد ركب معاهو الكارو ومشو المركز حق القرية الجبنهم مسافة نص ساعة كدا… وصلو هناك وقابلو الدكتور والممرضة…
الدكتور شاف الجرح لقى فيهو نزيف بسيط… ول قدام ح يبقى خطير وهو ما عايز يتحمل المسؤولية…فاا قال ل حاج الرضي : يا حاج الزول دا المفروض ما يتحرك لانو الحركة بتأثر علي الجرح وما ح يبرى… وعضم الترقوة زاتو عشان يتلصق مع بعض وينمو… لازم اليد تكون ثابتة يا حاج وما تتحرك ومشواركم دا ح يزيد الجرح و يلتهب و العضم كمان ح ينمو غلط وتاني الا يتكسر…
الرضي : طيب نعمل شنو اا دكتور ؟؟؟… الزول عندو حقنة لازم ياخدها كل يوم …
الدكتور : خلي يطعنو هناك ف الحلة… ما عندكم زول بعرف يطعن حقن ؟؟؟…
الرضي : زول وااااحد ااا دكتور وقالو سافر الخرطوم…
الدكتور : طيب مافي اي زول ف الحلة غيرو قاري او بيعرف اسعافات اولية…
الرضي : والله مافي… نحن ناس زراعة ساكت…
الدكتور : والله يا حاج دي مشكلة… لازم تشوف ليهو زول قريب منكم او الزول دا يسكن هنا جنب المركز ويكون قريب… لانو مشواركم طويل وبأثر عليهو…
الرضي احتار يعمل شنو لكن قال خير… .
المهم الدكتور قام باللازم و ادا احمد الحقنة ووصى حاج الرضي انو الحقنة مواعيدها الصباح ولازم يتصرف ويشوف حل …
اها الرضي واحمد راجعين… وعمك ماسك الحمار عشان يمشي براحة و ما يجري…وهو سرحان ح يتصرف كيف… ما لاقي زول ف الحلة يطعن احمد وما بعرف زول ف الحلة الفيها المركز عشان احمد يقعد معاهو…
احمد كمان راسو لافي وحاسي ب طمام وجسمو كلو جايط من جوة لكن ما كلم الحاج…
وصلو البيت متأخرين والرضي سند احمد ووصلو لغاية التكية…وشال كيس الدواء معاهو عشان يختو جوة تحت الزير…
الرضي دخل البيت وهو حيران… قابل السيدة عند الباب…
السيدة : حمد لله علي السلامة ااا حاج… اتأخرتو مالكم ؟؟…
الرضي حكى ليها الكلام القالو الدكتور وقال ليها انو شايل هم احمد وكيف ح ياخد حقنتو و الحيديها ليها منو !!!…
السيدة : دقيقة بس ااا حاج ...
السيدة كوركت للزينة كانت ف المطبخ بتجهز العشاء : الزينة… ااا بت…
الزينة : ايا يمة…
السيدة : تعالي اا بتي ..
الزينة جات : نعم يمة…
السيدة : انتي ااا بتي… مش قلتي لي ادوكم شنو كدا ف المدرسة وقلتي بتعرفي تطعني حقنة اا بتي…
الزينة : ايا ااا يمة… قلت ليكي ادونا كورس اسعافات اولية…
الرضي : متين ااا بتي ؟؟؟ .. و ليه ما كلمتيني ؟؟؟...
الزينة : كلمتك اا يابا…لمن كنت يوم الخميس بتأخر عليك… كنت بخش الكورس ...بدرسونا ليه يوم الخميس اخر حصة للبنات العايزات بس ااا يابا…
الرضي : الشي القلتيهو دا… يعني بتعرفي تطعني حقنة ااا المبروكة ؟؟؟…
الزينة : ايا بعرف ااا يابا…
الرضي : ما شاء الله… الصلاة علي النبي ….
طبعا مديرة المدرسة البتقرا فيها الزينة مرت ب موقف زي كدا… اللي هو كان عندهم مريض ف البيت ومافي زول ف الحلة يطعنو وكانو بعانو شديد لغاية ما يوصلو المركز والحقن زاتا ما كان بيدوها ليهو ف اوقاتها لانو ف حقنة بتكون نص الليل… يلا المديرة بعد المعاناة دي…كلمت ليها ممرضة تجي تدي البنات كورس حق اسعافات اولية كل يوم خميس اخر حصة للبنات الراغبات فقط،…والكورس كان مجانا … بس المديرة بتشيل من البنات حاجة كدا رمزية بتديها للمرضة حق المشوار … والزينة عشان ابوها عايزها تطلع دكتورة خشت الكورس ..وهي كلمت ابوها بس عمك ما عارف اسعافات اولية يعني شنو ..لكن كان مبسوط من بتو طالما هي بتقرا حاجة تستفيد منها…
الرضي اداها كيس الدواء تختو تحت المزيرة وقال بصحيها الصباح بدري عشان تدي احمد الحقنة وبعدين عمك بمشي الزراعة…
الصباح اصبح وناس البيت كلهم صحو وعمك طلع ل احمد ف التكية لقاهو شبه صاحي لانو عمك مجرد ما فتح باب التكية احمد رفع راسو ...
اصلا احمد ليهو يومين ما نام اول حاجة لانو الالم شديد عليهو وثم ثانيا الحبوب الاداها ليهو الدكتور فيها مسكن الم وحبوب منومة…الحبوبة المسكنة يبلعها عند اللزوم والحبوب المنومة يبلعها بعد العشاء وعمك الرضي فاهم انو الدواء حقن وحبوب بياخدها كلها الصباح ..فااا شال الدواء يدخلو معاهو البيت يختو ف مكان بارد زي،ما قال الدكتور والصباح يجيبو ل احمد…واحمد كمان نسى وما اتذكر الا لمن عمك مشى ينوم… فااا ساهر الليل واكلها لباد…
الرضي دخل التكية : كيف ااا زول ؟؟؟…
احمد عيونو وارمة من عدم النوم : الحمد لله يا حاج…
الرضي : قوم نسندك غسل وشك عشان تشرب الشاي ويدوك الحقنة…
احمد : لالا بقدر اقوم براي يا حاج…
احمد طلع غسل وشو ورجع التكية وشوية كدا جات السيدة شايلة الشاي وصبحت علي احمد وقعدت جنب حاج الرضي…
الرضي : وينا المبروكة ؟؟؟…
السيدة : جايبة الدواء وجاية ااا حاج….
وكالعادة نفس الدقة الحنينة…ونفس الزولة ...ونفس النسمة…
الرضي : خشي ااا دكتورة…
و…
كبست وكتمت نفسنا معاها…
الزينة ب صوتها الحنين الرقيق ال اي شي زاتو : سلام…
طبعا عارفين احمد شعورو بكون كيف…
المهم ابوها قال للزينة ادي احمد الحقنة… والزينة عبت الحقنة بالدواء وفرغت منها الهواء…ياخ البشوفها بقول دكتورة محترفة... في اللحظة دي ابوها وامها بعاينو ليهو ب كل فخر…طبعا الزول لمن يكون عندو رغبة ف الحاجة…بيعملها ب اتقان ويتفنن فيها…
ااها الزينة فرغت الهواء من الحقنة… وطبعا ح تديها ل احمد ف عضلة اليد السليمة…واحمد كمان يدو التانية فيها الجرح ما بقدر يرفع يد العراقي …
الزينة رفعت يد العراقي وياريت لو ما عملت كدا ...اصابعيها ثبتت بيهم يد العراقي ف كتف احمد عشان تديهو الحقنة… ياخ البت دي اصابعيها لينة وباااااااااااااااردة تلج بس ... لا لا البت دي ما اظن بشر… سبحان الخالق…( زحو مني يا جماعة مافي زول يقرب جبني والله بتضارب معاكم )…
احمد ما معروف مشى وين بس هو اتبخر واختفى عن وجه البسيطة…
الزينة : خلاص…
هو شنو هو الخلاص ؟؟…ما تطعني الزول اا بت…
الزينة زمااان ادت احمد الحقنة وطلعتها واحمد ما حاسي ب اي شي،… ياخ الزول دا ما حاسي ب نفسو زاتو… وانا متأكد لو الزينة طعنتو ب سكين ولا سيف عديل ... احمد ما ح يحس ب شي…
الرضي وعيونو مرقرقة قال ل بتو بكل فخر : ما شاء الله تعالي ااا دكتورة ...تعالي ل ابوكي…
الزينة جات عندو… وعمك مسك وباس راسها وقال ليها : والله ااا بتي امنيتي الوحيدة بس ربنا يطول ف عمري و اشوفك دكتورة كبيرة…
الزينة : ربنا يحفظك لي ااا يابا…
الحظة اسرية والسيدة دموعها جرت .... الزينة قشت ليها دموعها بالتوب ...والتوب وقع من وشها للمرة التانية ... ياخ البت دي قمرة من اقمار الضواحي ....
هوي يا جماعة فكونا من الغزل الكتير دا وخلونا ندخل ف الجد لانو قدام ح يحصل موت وما معروف البموت منو والبحيا منو ....
المهم احمد بعد اخد الحقنة وحاج الرضي مشى الزراعة ...احمد رقد دكوة ...نام نوم ...ميت بس ..ما صحاهو الا حاج الرضي لمن رجع من الزراعة وجاب الاكل اكل معاهو ...
عدت الايام ونفس البرنامج حقن وحبوب واحمد ماشي ف تحسن شديييد ...دا كلو عشان نفسياتو مرتاحة عشان الزينة كل يوم بتجيهو الصباح وبتديهو الحقنة في حضور والديها ....
احمد شاف انو بقى تقيل علي حاج الرضي لانو راقد ساي و عمك ما قصر معاهو عمل ليهو الكرامة وكل يوم بضبح ليهو جوز حمام ويوم جدادة…ويوم فروجتين ويوم يجيب ليهو لحمة والترمس دا جابو ليهو بالملوة ختاهو ف البيت وكل يوم بيعملو ليهو بليلة يختوها ليهو يقسقس بيها…
يلا حاج الرضي ف يوم جا شايل قروش ومداها ل احمد…
احمد : دا شنو يا حاج ؟؟؟…
الرضي : قروش الشغل ااا ولدي…انا حاسب ليك من يوم جيت اشتغلت معاي لغاية اليوم عندك شهرين ونص وانا ما اديتك قريشاتك…قلت احفظها ليك لغاية ما تقول ماشي اهلك وبعدين اديك ليها…
احمد : يا حاح انت العملتو معاي ما شوية… دفعت لي قروش المستشفى وحق العلاجات والاكل القاعد تجيبو لي دا قروشي زاتها ما بتكفي… يعني لسه ح اشتغل معاك شهور عشان اسدد ليك حقك…
الرضي : افو ..دا كلام شنو ااا ولدي ؟؟؟… الخير راقد والقروش زاتها انا ما عارف اوديها وين… وكان للاكل والشراب كلو موجود ف البيت انا ما قاعد اشتري حاجة من السوق…
احمد : لا لا يا حاج ما بشيلهن منك… انت خيرك علي كتير وانا زاتي خجلان منك ومن العملتو معاي…
الرضي : عارف ااا ولدي…انت من يوم ختيت يدك معاي ف الزراعة والارض زاتها خضرت والسنة دي ما شاء الله محصولنا ح يكون كتير ان شاء الله… يعني انت الخيرك علي اااا ولدي…
احمد : لا لا يا حاج…انت الخير والبركة...بس خلي القروش معاك وانا من بكرة بنزل معاك الشغل…
الرضي : اااولدي ما تتحرك ولااا خطوة واحدة…دا كلام الدكتور…
احمد : عادي يا حاج انا حاسي ب نفسي شديد…
الرضي : لسه باقي ليك اسبوع حسب كلام الدكتور… بعد نوديك المقابلة نشوف بقول شنو…
احمد : الدكتور خليهو يا حاج انا جسمي كويس الحمد لله ما حاسي ب اي شي… وبعدين انا زهجت من قعدت البيت و اشتقت للارض والزراعة عايز اتمشى شوية…
المهم اليوم التاني الصباح…احمد صحى من النوم بدري زي كل يوم بس وبعد اخد حقنتو طلع مع حاج الرضي وقال ليهو لو عندك عكاز كبير اديني ليهو عايز اسند بيهو نفسي ...
عمك كمان عندو عكاز مضبب حق حرامية كان خاتيهو فوق الراكوبة ...جابو ل احمد ...وركبو الكارو مشو الزراعة .....
وصلو الزراعة هناك واحمد شاف بابكر وعثمان لمن دمو فار بس حاول يتماسك عشان عمك الرضي ما يفهم حاجة ....وبابكر بهناك برضو بعاين اتجاه احمد وبتنفس شرار شرار ....احمد دا عدوه اللدود ....بس ما حصل اي شي بينهم لغاية ما رجعو البيت ...
بالليل كدا بعد احمد وحاج الرضي اتعشو وحاج الرضي دخل البيت ينوم واحمد كمان رقد نام ...نص الليل يسمع ليك كووووووووو لمن احمد قام مخلوع ...ف زول ضرب باب التكية ضربة قوية ب حجر ...
احمد فتح الباب وطلع ب عكازو لف على التكية واتلفت يمين وشمال ما شاف زول ...رجع التكية ورقد ....
بعد نص ساعة كدا ...كوووووووووو
####
في مكان تاني
...
..
.
كونو بخير ...
.
..
...
