Mga Hindi Masabi Ng Puso (Poem Collection)

Pangalawa

Natulog akong ikaw ang aking kayakap
Sa piling mo ay tila ba isang panaginip sa alapaap
Bawat dampi ng kamay ay marahan kong nilalasap
Daliri mo'y nakakadarang may dalang sarap

Nagising akong ikaw ang aking katabi
Humalik ako't humawak nang walang pasabi
Tumango ka lamang at idiniin ang iyong labi
Dama ko ang indayog na sa umaga ay tila naging gabi

Natulog muli ako at ikaw ulit ay nariyan
Tila ahas na sa mga sanga ay gumagapang
Sa'yong pag-ibig mong nakamamatay ay ayos lamang
Ito naman ang nais ng puso kong naghahanap ng tahanan

Umaga na't nagising at ikaw pa rin ang kasama
Hindi na mabilang ang mga araw na walang iba ngunit tayong dalawa
Iba man ang mundo ngunit sa akin ay walang pagsasawa
Sabay tayong nagsayaw na walang tigil kahit iyon ay nagawa
Ito ang ating nais, bulong ng kaluluwa

Kung ang mga araw ay sadyang matagal
Ang gabi sa atin ay ginawa nating mabagal
Sila na maraming pikit at hindi makasinghal
Tayo ay mulat dinadama ang ulos ng pagmamahal

Ngunit sabi ko nga'y mahaba ang araw
Lahat ng may simula ay nagtatapos sa huling dalaw
Sa huling yakap mo naiwan akong hindi makagalaw
Ako pala ay pangalawa lamang, umaasa sa pag-ibig mong sa aki'y maging tanglaw