တစ်ဖက်လူရဲ့စကားကြောင့်ခန္ဓာကိုယ်တစ်ခုလုံးမှာရှိတဲ့ဝင်လေ၊ထွက်လေတွေကတဒင်္ဂမျှရပ်တန့်သွားကြကုန်၏။ထိုတစ်ခဏအရှိန်မပြယ်သေးတဲ့စိုးရိမ်ပူလောင်ခြင်းတို့ကသူ့တစ်ကိုယ်လုံးကိုအထိန်းအချုပ်မဲ့ဝါးမြိုတော့သည်။ကြားလိုက်ရတဲ့စကား၊ရုတ်တရက်ဆောင့်တက်လာတဲ့ခံစားမှုတွေကြောင့်မြင်မြင်သမျှအရာအားလုံးကဝေဝါးပြီးသူ့တစ်ကိုယ်လုံးလေဟာနယ်ထဲမှာမျောလွင့်နေရသလိုပင်...။
ဒါ့အပြင်...။
ခန္ဓာကိုယ်ထဲမှာလှည့်ပတ်စီးဆင်းနေတဲ့သွေးတွေအားလုံးကလည်းတစ်ပြိုင်နက်တည်းမှာပဲအပေါ်၊အောက်ပြောင်းပြန်စီးသွားသလိုသူခံစားလိုက်ရသည်။ယုံကြည်ဖို့ခက်ခဲနေတဲ့စကားလုံးတွေကြောင့်အချိန်တစ်ခုကြာတဲ့အထိလူကကြက်သေသေနေမိ၏။
" Hello...Hello..."
အတန်ကြာငြိမ်သက်လို့နေတဲ့ Connection ကိုတစ်ဖက်လူမှပြန်လည်ပြီးအစပျိုးလိုက်ပေမယ့်သူ့ရဲ့နားထဲမှာတော့ထိုအသံကနီးကပ်လာလိုက်၊ဝေးသွားလိုက်ပင်...။တုံ့ပြန်ရမယ်ဆိုတာသူသိသည်။သို့သော်နားထဲမှာတဝဲလည်လည်ကြားယောင်နေတဲ့စကားလုံးတွေကြောင့်လူကရှင်လျှက်နဲ့သေဆုံးနေသလိုတောင့်တောင့်ကြီးဖြစ်နေ၏။
'နောင်လေးကားတိုက်ခံရတယ်'တဲ့လား...။
ဟင့်အင်း...။
မဟုတ်ဘူးမလား...။
ဒါအမှန်မဟုတ်ဘူးမလား...။
ကျေးဇူးပြုပြီး'သူအိမ်မက်မက်နေတာ'လို့တစ်ယောက်ယောက်ကပြောပေးကြပါ...။
ယောက်ယက်ခတ်နေတဲ့အတွေးတွေရဲ့အလယ်မှာသူ့ရင်တစ်ခုလုံးဝုန်းဒိုင်းကြဲနေခဲ့သလိုဘယ်အချိန်ကတည်းကခိုတွဲနေမှန်းမသိတဲ့မျက်ရည်ဥများကလည်းပါးပြင်ပေါ်ကိုပြိုဆင်းလာကြ၏။တင်းကြပ်လွန်းတဲ့စိတ်တွေကြောင့်မျက်ရည်ကျနေပေမယ့်ရှိုက်သံကတော့ကင်းမဲ့နေသည်။
သူ့အနေနဲ့အရူးတစ်ယောက်လိုအော်ဟစ်ငိုကြွေးလိုက်ချင်သည်။သို့သော်ထုံနေပြီဖြစ်တဲ့နာကျင်ခြင်းတွေကြောင့်ဘယ်အရာကိုမှနင့်နင့်သည်းသည်းသူခံစားလို့မရပေ...။
YOU ARE READING
ကိုယ့်ရင်ထဲမှာအလွမ်းမိုးတွေစွေ{ Completed }
Romanceဤဇာတ်လမ်းသည် Real Life နဲ့ကိုက်ညီမှုမရှိတဲ့စာရေးသူ၏စိတ်ကူးယဥ်ဇာတ်လမ်းတစ်ပုဒ်ဖြစ်ပါသည်။