اليتيمه:-الحلقه«2»حقيقيه
روايات أربع بنات
بقلم:ألاء شليبك
نهى....نضت ثاني يوم الصبح طلعت برا كان عمي صالح وخالتي غاليه يتكلمو بصوت واطي ولما شافوني سكتو....قولتلهم...صباح الخير...قالولي..صباح النور...قالتلي خالتي غاليه...هي بنتي خشي للحمام اغسلي وجهك وتوضي وصلي وتعالي سعديني انتي وسهى....قولتلها...حاضر وجيت بنمشي بس وقفت...تلفتت لعمي صالح قولتله....بنسالك...قالي...تفضلي....قولتله امس بابا جي شن كان يبي منك....شن كان حامل على ظهره...في هديكا اللحظه عمي صالح لون وجهه انخطف وقعد يشوفلي وهو ساكت....الخوف كبس على قلبي وطلعت مني كلمه عفويه...قولتله...امي امي وين....قعد عمي صالح ساكت...قربت عليه قولتله عمي بوي شن دار في امي...جت عمتي غاليه قربت عليا وشدتني من يدي...قالتلي...هي نمشو...رفعت راسي فيها وعيوني دموع...قولتلها...نبي امي انا....علاش ما تبوش تجاوبوني...امي وين وشن صار فيها....طبست خالتي غاليه وحضنتني وانا زدت بكيت اكثر...بعدت عليا ومسحتلي دموعي وقالتلي....توا نخشو نتوضو ونصلو وبعدين نهدرزو....هزيت براسي بمعنى تمام وخشيت للحمام....فتحت الميه وغسلت وجهي....توضيت ودموعي ينزلو نمسح فيهم وينزلو....طلعت من الحمام ومشيت لدار مع خوتي.....خشيت الدار وكانو خوتي بس في الدار نايضين...شافلي ايوب وقالي.....وين ماما....قولتله وقلبي يتقطع توا تجي.....قالي مقداد...نبي نروح للحوش انا...قولتله...توا نروحو.....خديت عبايتي وصليت...رفعت يديه وبديت ندعي ودموعي سخونه نازله على خدي.....مقداد قدم خطوتين وقالي.....علاش تبكي....قولتله لالا ما نبكيش غير اتاوبت بس...قالي به شن نبي الحمام...قولتله...به تعالى ندخلك وطلعت انا وخوتي برا....طلعت لقيت خالتي غاليه هي وصغارها ومعاهم عمي صالح واقف....كان منظر حلو...شفت لخوتي كيف نحن برانيه بيناتهم...لاحظت خالتي غاليه عليا قالتلي...هي تعالو نفطرو..قولتلها...هي ندخل مقداد الحمام ونجي......دخلت مقداد وطلعنا...لقيتها حاطه سفره الفطور وادير في النفاص لخوتي قعمزت انا ومقداد وبدينا ناكلو.....كملنا الفطور وقمنا السفره وغسلنا الماعين وطلعت انا وسهى ضميت الحوش وطلعنا لسور برا سيقناه وقعمزنا نهدرزو.....قولتلها....نطلعو لوسط الحوش نهدرزو خير من هنا ضغط...قالتلي..هي وطلعنا قعمزنا....ونفس الشي كان عمي صالح وخالتي غاليه مقعمزين يهدرزو بصوت واطي ولما شافوني سكتو....قعمزت انا وسهى ودرت روحي ما شوفت شي بديت نهدرزو انا وسهى ومره مره نشوف لعمي صالح وخالتي غاليه من تحت لتحت....قعدنا على الحال هذا في حوش عمي صالح لمدة شهرين....شهرين كاملات ما نعرفش فيهم شي على امي...شهرين كاملات دموعي على خدي...شهرين كاملات وانا كل ما نسال عمي صالح يتهرب من الجواب....شهرين كاملات وخوتي هلكوني من السؤال على أمي...
وجي اليوم يلي كنت فيه نوتي في حوايجي انا وخوتي بنروحو للحوش...خشت خالتي غاليه وعيونها دموع...قالتلي...كيف بتمشي وبتخليني هما صح كانو شهرين بس الشهرين هذم كنتي فيهم بنتي....شفتلها وخاطري مكسور قولتلها....حتى انا درتك في مكان امي...بس توا نكلم بابا نجي انا وخوتي وامي معانا☺️تتعرفي عليها حتى هي طيبه وقلبها ابيض زيك....بس في اللحظه هذه عيون خالتي غاليه زادو دمعو وجت حضنتني وهي تبكي بصوت عالي...حطيت يديه الصغيره على رقبتها وحضنتها حتى انا وبديت نبكي وفي نفس الوقت مستغربه في طريقة بكاها القويه.....بعدت عليا خالتي غاليه وقالتلي ديما قولي لبوك يجيبك انا امك مش في مكان امك....قولتها حاضر...وقربت على خوتي وبدت تحضن بالواحد وتبكي....جتني سهى وعطتني ورقه وقالتلي هذه رساله مني ليك خليها عندك ما تلوحيهاش بش كان ما جيتيناش تفتحيها وتقريها حتحسي انه انا جنبك ومعاك.....خديت الرساله ودسيتها وقولتلها حاضر وحضنتهاوانا نبكي وهي تبكي.....طلعت انا وخوتي برا وشاده الشنطه وكان بابا واقف على عمي صالح....خوي مقداد اول ما شاف لبابا مشي يجري لبابا فرحان وبابا قامه لحضنه طول.....جي عمي صالح وقف جنبي وقالي....مش تقطعونا بش تجينا باهي ردي بالك ما تجيناش مكانك قاعد موجود....وببتسامه بريئه قولتله اكيد بنجيكم......شاف عمي صالح لبابا وقاله رد بالك الصغار لازم يجونا هذم بدو زي صغارنا....قاله بوي ببتسامه صفراء...اي اي ان شاء الله وقالي هي...قولتله هي ومشيت سلمت على خالتي غاليه وصغارها لاخر مره وركبت السياره......قعمزت وجنبي خوتي وعيوني معلقه عليهم....كانو يأشرولي بيديهم بمعنى باي وانا وخوتي كذلك...بعدت السياره عليهم وانا نودع فيهم بعيوني...تلفتت القدام وقلبي مرتاح فرحانه بنروح لامي في الحوش استاحشتها....نشوف لخوتي حواليه كانت الفرحه في عيونهم💙
وصلنا للحوش نزلت انا وخوتي ونتفرج على الباب وقلبي بيطير من الفرحه كان نلقى نمشي نجري نفتح الباب ونرمي نفسي في حضن امي...نزل بوي وخوتي وشدينا الساكو ووقفنا فم الباب....لحظات توتر...لحظات شوق...لحظات منتظره وبنشوفو امي...فتح بوي باب الحوش وخشينا نجرو انا وخوتي.. ندور بعيوني في كل دار وين امي موجوده....خشت اختي عبير وخوي ايوب وهما ينادو في امي خوي مقداد مشي يجري لدار النوم بش يشوف امي...قلبي يدق بسرعه...ريقي جاف....الشوق قتلني....ابتسامه مرسومه على وجهي...اختفت بمجرد ما شفتها واقفه قدامي...دقات قلبي زادت...جو خوتي يجرو خايفين وشدو في عبايتي...تلفتت لبوي نشوفله بعيوني...بمعنى هذه شنو...هذه منو...قرب بوي عليها وقالي هذه امكم....كانت مراءه غريبه اول مره نشوفها.....كان شكلها يخوف والبسمه على وجهها زادت خوفتني اكثر....قولتله....يابوي وين امي....شافتله«ربيعه»مرت بوي وقالتله ما قولتلهمش....شفت لبوي ودموعي في عيوني...كيف شن صار من هي هادي ووين امي...يابوي لينا شهرين وين امي...فرحانين بنروحو يا بوي وين امي....قرب عليا بوي...يا بنتي انتي مش صغيره....انتي تعرفي انه هلبا ناس تكون تمشي في هالدنيا فجأه يختفو....انتي قاريه قران وعارفه ربي قال((كل نفسـ ذآئقه آلمـوت))....انطفي عليا الضي في هديكا اللحظه....هلبا كلام قولته في لحظتها....{يا بوي علاش تحسس فيا انه انا في عمر العشرينات...يا بوي انا را عمري 8 سنين....يابوي المسؤوليه يلي متحملتها يلي في العشرينات مش متحملينها.....يابوي شن الخبر يلي قولته...يابوي ليش ما قولتليش انه امي مريضه في حوش جدي ...يا بوي وين الرحمه في قلبك....يا بوي وين امي....يا بوي وجع قلبي حس بيه....شفت لخوتي وانا نبكي...كانو يسالو فيا بعيونهم...شن في ومن هاذي ووين امي....شفت لبوي ومرته وراه...حطيت يديه على فمي ومشيت نجري لدارنا...لوحت نفسي على السرير وانا هاربه من الواقع هذا..تمنيت الموت يأخدني...يارتني ما روحت ولا عرفت على أمي حاجه...جي بوي لدار قالي يا نهى.....قولتله والعبره خانقتني....خليني بروحي يا بوي تربح...طلع وسيبني نبكي....بكيت وبكيت وبكيت وامي مش جنبي...تذكرت خالتي غاليه لما قولتلها بنجو انا وخوتي وامي عيونها كيف دمعو وعرفت سبب الطريقه يلي كانت تبكي بيها بلحظتها....بكيت وانا نذكر في أمي...فتحت عيوني والداركانت فاضيه ما في حد جنبي دفنت روحي في المخده لين خداني النوم من كثر البكي........
أنت تقرأ
اليتيمه
Misterio / Suspensoللكاتبه:ألاء شليبك الرحمه يلي انتزعت من قلوبهم💔 البسمه يلي خفوها من وجوهنا💔 البراءه والقلب الطيب والنيه الصافيه زرعولنا مكانها حقد وغل حسد💔 الكلمه الحلوا كانت ممنوع في قانونهم... علمونا الشر مكان ما يعلمونا الخير... ربونا تربية شارع ما ربوناش ترب...
