اليتيمه

الحلقه الخامسه

اليتيمه:-الحلقه«5»حقيقيه
روايات أربع بنات
          بقلم:ألاء شليبك

لايك قبل لتقري......
يآ ليل!مـآ تصـنع آلنفسـ آلتي سـكنت
                     هل آلوجود،ومـن آعدآئهآ آلقدر؟
ترضـى وتسـكت؟هذآ غـير مـحـتمـل
                     آذآ فهل ترفضـ آلدنيآ،وتنتحـر؟
فآنمـآ آلمـوت ضـربــٌ مـن حـبــآئله
                     لآيفلت آلخـلق مـآ عآشـوآ،ومـآ آلنظـر؟
••••••••••••••••••••••••••••••••••
مـآ كنت آحسـبــ بــعد مـوتك يآ آبــي-..
..................................ومـشـآعري عمـيآء بــآلآحـزآنِ

هذه الكلمات لشاعر:أبو قاسم الشابي.....تتكلم شوي عن وجع بطلت روايتنا... تتكلم شوي على خمسه اطفال اليوم ايتام....تتكلم شوي على الليله الصعبه...تتكلم شوي على الدموع السخونه....
اليوم نهى....مقعمزه ومطبسه راسها......دموع نشفو من كثر ما ليله كامله تبكي.....اليوم عبير شاده تركينه وحاضنه نفسها بنفسها....لانه اختفي من يحضنها....اليوم ربيعه مقعمزه والصدمه مازال على وجهها.....لانه كان الصبح موصيها....بس ياترى شن هي كانت الوصيه؟؟.....اليوم مقداد مقعمز وجنبه خوه صابرين ومتحملين وهذا يلي كان واضح لناس.....بس من الداخل متحطمين مساكين.....كان يراقب شكري فيهم ويذكر....قلبه يعصر فيه اكثر واكثر.....خاطره يبكي يعيط....بس زيه زي تفكير اي راجل.....لا الراجل ما يبكيش وشن بيقولو عليه....واكبر دمار لاي شاب يكتم وجعه واحساسه.....هو بشر ربي خلقه عنده قلب ويحس....يبكي ويتوجع....يفرح ويضحك....
اليوم الدنيا زحمه عند اهل نهى....
خيمه منصوبه......ما تسمعي كان يلي تبكي....خيمه منصوبه.....تحكي وجع الناس يلي داخلها....يلي يخطم من جنب الخيمه يسال من مات؟؟.....ينصدمو في الخبر....لانه واحد كان واقف معاه....وواحد صبَح عليه...وواحد شرب عنده القهوه...ووو

كمـ مـن فتى آمـسـى وآصـبــح ضـآحـكآ
                           وقد نسـجـت آكفآنه وهو لآ يدري
وكمـ مـن صـحـيح  مـآت مـن غـير علة
                           وكمـ مـن سـقيم عآشـ حـينآ مـن آلدهر

زادت اصوات العياط....لما دخلو الثابوت....
نهى.....جيت نجري تلوحت على الثابوت.....نبكي بحرقه.....عبير تبعد فيا تبي تجي مكاني....رفعت راسي وعمي شادني.....فتح الكفن علي بوي....وهنا خلاص انهرت نبكي......عيطت وقعدت نضرب في عمي يلي شادني....عبير مطبسه على راس بوي تبوس فيه....عماتي حوالينا واقفين يتباكو.....ربيعه مقعمزه وتبكي معانا.....جي عمي بيسكر على بوي......شدت يديه وبديت نبوس فيه نقوله يا عمي خليه.....ناضت عبير تعيط بصوت عالي وتقول بوي ما ماتش اهو راقد....عمي يقوللها استغفر الله....قولي انه لله وانه اليه راجعون....رنت الكلمه في وذني وقعدت نكرر فيها بصوت عالي.....نعيط ونعيط وبدون فايده بوي روحه عند ربي.....طلعت ومشيت وراء عمي....لعند ما طلعت الشارع نشد في عمي ونقوله نبي بوي.....لين شفت راجل شدني من يديه ودخلني.....ماكنتش نبي ندخل ونقوله خليني نمشي لبوي بنقعد معاه......عيط عليا وهنا شفته وشفت الدمعه على خده....كان شكري ولد اخت ربيعه.....عيط عليا والباين حتى هو موجوع......دمعته سخونه نازله من عينه على خده.....قالي.....خشي الداخل وبوووووك ماااات خلااااص انتهي....نزلو عليا كلامه زي السم.....تلفتت وجي خوي مقداد في وجهي......حاط يديه لوطه وواقف ووجهه وعيونه حمر....كإنه يقولي شن بيصير فينا توا!!
كإنه يقولي خلاص معش عندنا حد غير ربي!!
كإنه يقولي انتي الوحيده يلي توقفي معاي وتحضني فيا ومتحملتيني مره في امي وتوا في بوي!!
كإنه يقولي تعالي احضنيني وطبطبي عليا وقولي توا يرجعو طمنيني!!
هلبا كلام فهمته من نظره وحده.....جيت طول ضميته لصدري....نحسسه بالحنان يلي بيفقده....نطمنه شوي...نحكيله شن في داخلي......يشكيلي وجعه.....بكي مقداد وهو عندي....مهما كبر قاعد طفل.....عياطه وهو عندي ذكرني بيه وهو صغير.....نمسح في شعره وانا كنت نبي من يمسحلي شعري...بعدت عليه وحطيت يديه على خدوده.... خدوده يلي كانو ورديات...يشوفلي وساكت.....رجعت ضميته ليا ونشوف لعبير تشوفلنا.....تلفتت للجهه الثانيه لقيت ربيع حتى هي تشوفلنا.....وين ما نمشي يزيد قلبي يعصرني.....جي ولد عمي ونادى خوي مقداد بيمشي يحضر الدفن.....بعد عليا وهو يمسح في دموعه......قعدت عيوني عليه لين تباعد وطلع....مشيت خشيت لدار ودفنت نفسي جهة الحيط.....كنت في هديكا اللحظه ما نبي حد معاي...نبي نقعد بروحي.....مره مره تجي وحده تعزيني.....قربت مني وحده ولابسه خمار......سالتني انتي نهى....شفتلها وما رديتش عليها قعدت نشوفلها وخلاص.....قربت عليا وحضنتني بقوه.....حضنتها وبكيت معاها ومن غير ما نعرفها.....قعدت لحظات طويله وهي حاضنتني....بعدين بعدت عليا وهي تشوفلي.....تلفتت ومشت جهة عبير ونفس الشي حضنتها بقوه اكثر.....بعدها سيبتنا ومشت قعدت تحكي مع ربيعه لين شفتهم خاشو لدار النوم....ما ركزتش لانه مش في وقتها.....بس ياريت في هداكا اليوم ركزت اكثر لانه......
#ألاء:ولا نقوللكم ما نبيش نقوللكم عليها اكثر خير ما نحرق الحلقات الجايه😂🔥
نختصرلكم الاحداث.........
فات شهر على وفاة بوي.....ما نبيش نحكي كيف فاتت....مانبيش نحكي على الصبح لما انوضو نطلعو برا نشوفو الفراش يلي كان يقعمز فيه يفطر ويتغدى ويتعشى....يضحك ويلعب معانا.....يهزب ويضرب فينا.....اول ما نوضو انا وخوتي طول نمشو للفراش نتفرجو.....وجع وجع ياناس.....حرقه في القلب يا ناس.....
وكإنه الوجع مكتوب علينا من لما انولدنا....
اليوم روحت من القرايا تاعبه......جتني ربيعه قالتلي شن بنديرو الغداء......قولتلها ديري اي حاجه.....قالتلي ما عندنا شي حتى فلوس معش في....شفتلها.....قولتلها تحكي جديات.....قالتلي...اي....قولتلها.....باهي..شو....بس قاطعني الباب....قالتلي بري افتحي.....مشيت فتحت ويطلع في وجهي شكري.....المره هذه وقفت قدام الباب وما مشيتش....كإنه بعد وفاة بوي معش يهمني شي....قالي اهلين كيف حالك.....سيبته واقف ومشيت ناديت خالتي.....طلعتله وانا رميت حوايجي....قعمزت نفكر كيف بنقعد هكي من غير فلوس....لازم ندور اي خدمه نخدمها....جتني ربيعه وقالتلي شكري روح.....قولتلها شن يبي.....قالتلي.....جابلي فلوس....حسيتها اخي علينا معقوله لين الناس تصرف علينا.....قولتلها....اسمعي انا بنخدم....قالتلي....شن بتخدمي.....قولتلها....ما نعرفش اي خدمه قدامي نلقاها كويسه بنخدم لامتى الناس حتقعد تتصدق علينا.....قالتلي....توا نقول لشكري يشوفلك خدمه....قولتلها.....لااا شكري هذا لاا توا نشوف بروحي....قالتلي وين بتلقي.....قولتلها...توا ندبر راسي وطلعت وسيبتها.....طق الباب وكانت اختي عبير.....مروحه من القرايه....واول ما شافتني فنصت فيا.....استغربت فيها.....خشيت وراها لدار....سكرت الباب علينا وقالتلي....اسمعي بنقولك على ربيعه.....قولتلها....ربيعه!!خيرها.....قالتلي.....اليوم قبل لنمشي المدرسه كانت وراء بابا دارها مطلعه ستيكه فلوس....ولما طلعت وبدير الفطور قالتلي....كيف بنديرو  معش عندنا مصروف....قولتلها....وفلوس بوي.....قالتلي....بوك مخلا شي....شفتلها بصدمه وقولتلها ربيعه متاكده.....قالتلي اي....يانهى ربيعه في الاخير مرت بونا مش امنا بتفكر في نفسها توا مش فينا.....
ومن يومها بدت عيني على ربيعه.....حصلت خدمه في مزين قريب منا....وبديت نخدم والحمد لله فلوسي كلهم مصروف للحوش...حتى فيا ما فكرتش اهم شي خوتي.....عندي لبستين نلبس فيهم طول العام ولما نطلع نشري لخوتي لما بنجي نشري لروحي نلقى الفلوس معش يسدو يذوب مصروف.....ومن يومها بدت المشاكل بيننا وبين ربيعه.....بعد وفاة بوي تغيرت هلبا علينا....بدت كل شي تكوش عليه يلي تحصله تحصله
وفي يوم25.9.2002بزبط كان يوم ما توقعته يجي.....كانت صدمه ما توقعتهاش تجي منها.....كانت ربيعه رمت عدتها.....واقف في وسط الحوش بزبط وحاطه يديها في وسطها....وقفتها وكلامها لتوا بين عيوني.....مطلعه ورقه....وشدتها....قالتلنا يومها وبالحرف الواحد.....عندكم اسبوع وتطلعو من الحوش لانه بنبيعه.....صدمه كانت كبيره لينا....كيف وامتى ووين؟؟.....قولتلها.....انتي شن تقولي حوش بوي انتي شن تحكي.....قالتلي حوشي هذا......وبوك كتبه باسمي.....لانه عارفكم بتكبرو وبتاكلو حقي.....قولتلها....شن يلي وذاني تسمع فيه هذا....قولتلها....بوي مستحيل يدير هكي....قالتلي شوفي.....وفعلا كانت ورقه تنازل بوي عن الحوش لربيعه....شفتلها بصدمه....قولتلها...مزور هذا.....قالتلي عليه توقيعة بوك وبصمته....ناضت عبير فيها وما خلت ما قالتلها....شفت لعبير وقولتلها اسكتي.....شفتلها...وقولتلها....تبي تلزينا حوش بوي.....شفتلي ونظرتها ثقه....قالتلي....حوشي....شافلها مقداد...قالها وحني.....قالتله....الله غالب جايني سعر كويس فيه....ومستحيل نضيع الفرصه من يديه.....قعدت نشوف لخوتي مصدومين.....شن قصة المصايب يلي تجي على راسنا وحده وراء الثانيه...قالت شوفو اي مكان او اي حوش وشافتلي.....ونظرتها مش حننساها لين يحطوني في قبري....نظرة احتقار....وقالتلي....انتي تخدمي دوري حوش من هنا للاسبوع الجاي....ومشت وسيبتني....
وين الرحمه يا ناس.....هي علاش الناس اصبحت هكي....علاش الناس طماعه....تبي تاخد كل شي....وحني يتامه من بينا....قعدت حايره وحاطه راسي بين يديه......وفعلا فات اسبوع ودارت ربيعه يلي في راسها.....اجتمعو عمامي وعماتي وكلموها بس شي....كلموها خوتها بس شي....ولا عدلت على حد باعت الحوش ونحن طلعنا منه...وقعدنا نتنقلو من مكان لمكان...مره عند عمتي ومره عند عمي....مره هذه تهزبنا ومره هذه تعيط علينا...مره هذه تشبعنا ومره هذه تخلينا راقدين وميتين من الجوع....نشوف لخوتي ونتوجع.....نشوف لحالي ونزيد نتوجع.....سنه2002....كانت سنه مستحيل نوصفهالكم....الواحد لما يضايق من حد يروح لحوش اماليه لكن ويشكي لاهله....لكن حني نشدو الفراش ودموعنا على خدنا.....مافيش من قرب علينا ومسحها.....مافيش من جي وقاللنا شن ناقصكم نجيبلكم...مافيش من جي وقاللنا تعالو نحضنكم.....كان ظلام الليل يحضن وجعنا....كنا نحضنو نفسنا بنفسنا.....وصلت بينا معش حد قبلنا كل واحد يسكر الباب في وجهنا....واليوم مكاننا في دار الايتام.....اليوم مكاننا مع ناس زينا زيهم.....