✍️ Unicode
💕 မင်း
--------------------
" တောက်… အိမ်ပေါ်ကဆင်းသွားစမ်း…… "
ဖေဖေ့ဆီကထွက်လာတဲ့ တောက်ခေါက်သံအဆုံး ခက်ထန်စွာထွက်လာတဲ့စကားရဲ့နောက်မှာ ခေါင်းကိုမော့လိုက်ရင်း မျက်ရည်တို့ကိုထိန်းလိုက်သည်။
အဖေနဲ့သားနှစ်ယောက်ကြားကတင်းမာမှုဟာ အရှိန်တော်တော်မြင့်နေခဲ့ပြီမို့ တစ်ခန်းလုံးမှာအေးစိမ့်စိမ့်အငွေ့အသက်တွေကဖုံးလွှမ်းနေကြသလိုတေဇာမင်းခံစားနေရသည်။
ဖေဖေ နဲ့ တေဇာမင်းကြားမှာရှိနေတဲ့ ဒီပြဿနာကတော်တော်တော့ကြာခဲ့ပြီဖြစ်သည်။ ဘယ်အချိန်ပေါက်ကွဲမလဲ မသိရတဲ့ဗုံးတစ်လုံးကို ကိုင်ထားခဲ့ရသလိုအခြေအနေကနေ ဒီနေ့တော့ စနက်တံပြုတ်သွားခဲ့ပြီပဲဖြစ်သည်။
ဖေဖေ့ရှေ့ကနေလှည့်အထွက်မှာ မေမေ့ရဲ့မသွားပါနဲ့သားရယ်လို့ တားနေတဲ့မျက်ဝန်းအကြည့်တွေကိုမသိကျိုးကျွန်ပြုရင်းဖေဖေ့ကိုစကားတစ်ခွန်းတော့ပြောဖြစ်အောင်ပြောလိုက်မိသေးသည်။
" ဟုတ်ကဲ့ပါဖေဖေ…… "
ဒီတစ်ခွန်းထွက်လာသေးတဲ့နှုတ်ခမ်းတွေကိုပဲ တေဇာမင်းကျေးဇူးတင်ရသေးသည်။ ဒါမှမဟုတ်ရင် တေဇာမင်းဟာတော်တော်ကိုရိုင်းပြတဲ့သူဖြစ်သွားပေလိမ့်မည်။ဖေဖေ့ရှေ့မှာရပ်နေရာက အိမ်ခန်းဘက်ကိုခြေလှမ်းပြင်လိုက်တော့ မေမေ့ဆီကထွက်လာတဲ့ခေါ်သံမှာ ငိုသံတချို့ရောစွက်နေခဲ့ပြီ။
" သား…… "
လှမ်းခေါ်လိုက်တဲ့ မေမေ့ဘက်ကိုလှည့်ကြည့်လိုက်တော့ ဘာဆက်ပြောရမှန်းမသိဘဲ ငေးပြီးကြည့်နေတဲ့ မေမေ့ကိုတွေ့ရသည်။မေမေကဖေဖေ့ကိုလေးစားကြောက်ရွံ့ရသူမို့ ဝင်တားတာတွေပြန်ပြောတာတွေ ဘယ်တုန်းကမှလုပ်ခဲ့သူမဟုတ်။
အခုလည်း ဖေဖေ့ကိုဘာမှပြန်မပြောရဲသူပီပီ တေဇာမင်းကိုသာ အိမ်ကမသွားဖို့တောင်းပန်တဲ့မျက်ဝန်းတွေနဲ့လှမ်းကြည့်နေသည်။
မေမေ့ကိုကြည့်ရင်း စိတ်မကောင်းမိပေမဲ့ တေဇာမင်းရဲ့အခြေအနေကို လက်မခံနိုင်တဲ့ ဖေဖေနဲ့ဒီလို အခြေအနေမျိုးမှာအတူတူဆက်မနေချင်တော့။အငြိမ်းစားယူထားပြီးစည်းကမ်းကြီးသူကျောင်းဆရာပီပီ ဖေဖေကတေဇာမင်းအဖြစ်ကိုလုံးဝလက်မခံ။
YOU ARE READING
💕 မင်း
Romantizmအရမ်းချစ်တာ နဲ့ အရမ်းမုန်းတာရဲ့ကြားမှာ....အလွယ်တကူပေါက်ထွက်သွားနိုင်တဲ့ အလွှာပါးပါးလေးတစ်ချပ်ပဲရှိတယ်။ ဒါ့ကြောင့် အရမ်းချစ်နေမိရာက.... အရမ်းမုန်းသွားတတ်ကြသလို.... အရမ်းမုန်းတယ်ဆိုပြီးတော့လည်း.... အရမ်းချစ်သွားတတ်ကြတယ်။ ★★★★★★★★ အရမ္းခ်စ္တာ နဲ႕ အရမ္း...
