اسفة عالتأخير ,, والله ساهرة لتوا عشان التحميل عطل ,, مع ان بكرة قرايا ,,
قراءة ممتعه حبيباتي ,💚
رواية #مناجي_والنصيب
الحلقه / 7
للكاتبه Gazala Bobacer (هميلو ) ,,
في الحلقه اللي فاتت وصلنا لمناجي وعمتها رحمة وين ايديرن النظرة الشرعيه مع العريس وبعد كم خيار ومناجي ترفض قررت عمتها رحمة وقالت ,
رحمة : القيتهااا ,,, خلاص المقابلة اديريها في حوشي ,, شن رايك ?
مناجي وهي تخمم : قولك هكي ?
رحمة : اكييد وبعدين مافيش داعي حد يعلم الا نا ومعاويه ومفتاح وانبهم مايقولوش لباتك ولا عمامك ,, شن رايك ?
مناجي : والله فكرة كويسه ,, بس امتا زعما ?
رحمة : خليها عليا وانتي في هاليومين انرن عليك مرات بكرة راه ,
مناجي : انشالله خير ,, حسني خايفه وكان اعلمها باتي ?
رحمة : ماتخافيش ,, وبعدين نا عارفه باتك حنون وطيب مغير مغيرته هالعقرب اللي عنده حسبي الله ونعم الوكيل فيها ,😡
وبعدها طلعن بعد ماتفقن خلاص ويسمعن في حس ولية اتسلم وترحب خشن للدار ويلقنها ريم مرت عثمان الابن الكبير للعزوز الحرفه 😐 ومراته قلنا بنت اخت العزوز كان مازلتن متذكرات !! والا ادقن وخلاص 😁 وطبعا عندهم ثلاث اولاد اثنين متجوزين وواحد زاطل قصدي عازب 😁 لانه نسونجي وعلقاته واجدات وهكي ,, المهم ريم كملت سلام عالموجودين والتفتت اتسلم علي رحمة ومناجي ,,
رحمة لريم : كيف حالك ياريم و كيف حال ضناك ?
ريم : الحمدالله بخير يارحمة بخير كلنا ,, كيف حالك انتي والشباب ومفتاح ?
رحمة : الحمدالله اكويسين ,
طبعا ريم وعايشه مش تمام في العلاقات مع بعضهن ولا تمام مع مرت خليل اللي هي مرت بات مناجي ,, لكن يجاملن في بعضهن وخلاص لكن العزوز الشايطه غاليه عليها بنت اختها اللي هي ريم طبعا ,,
ريم لمناجي : شخبارك انتي يامناجي شن دايرة ?
مناجي فوق من النفس : الحمدالله اهو عايشه 😒
مناجي ماتحبش النفاق ولا تكون بوجهين اللي في القلب علي اللسان طول ,😁,, وزارقه عليهن وعلي طروحهن ,,ومكايدهن لبعضهن ,,
بسمة لمناجي : وكنك تحكي من راس خشمك 😒
مناجي لعمتها : لا بالعكس عاديه نا راه ,, وبعدين عمرك اسمعتي بحد يحكي من خشمه ? 😒
بسمة عاطت مناجي نظرة قريب طيرتها وشافت لرحاب وقالت :شخبارك يارحاب ? 😒
رحاب بابتسامة : الحمدالله اخويلة بخير ,, 😊
بسمة : مافيش جديد هكي ولا هكي ?
رحاب انحرجت وقالت : هااه ,, انشالله خويلة 😓
مناجي لرحاب : رحوبا هيا معاي للمطبخ انطيبو قهوة ☺
وماصدقت رحاب انتقذت من اسألة خالتها المحرجه ,, ونطت هديل : استنن خوذني معاكن 😊
فداء : حتي نا 😃
روايتي نا 😁✋ مناجي والنصيب لهميلو ,, تحمست اسفة مليشيا 😂 كملن كملن 👇
فرات بنظرة قهر : هه علي أساس القهوة تبي عرم بنات بيش ايطيبنها ?! 😏
ماعدلنش عليها وطلعن ,, والعزوز اتقصقص وتنشد في مرت ولدها وكيف ماخش عثمان سلم عليها ,,
خطرها عثمان هضا طبعه واااعر نااار بصيرة هكي لا تعرفنها وعارة والا عصر حاجة ملخبطة لكن قاسي القلب اشويه ,,
وقالتها ريم : متحشم ياخالتي ساع ايجيك ايسلم بعدين هكي 😊
طبعا عايشه لوت شوربها مش عاجبها كلام سلفتها وشقلبت اعيونها ,, ورحمة اتهدرز علي امها واختها تبي اتغير جو امها والصبايا لانها حست بشحنة زارقه 😁,,
المهم صبت مناجي ورحاب وهديل وفداء للمطبخ مايغباكن في سريب الضيافه والعصور والعشيه وايهدرزن ويضحكن وفداء عاجبها جو البنات وماكنتش تحسابهن طيبات بحكم ساكنين بعيد ومايشوفو بعضهم الا من عيد لعيد او مناسبة ومرات اتجي امها وباتها بس ,,
المهم ,, مدن البنات القهوة والحلو عالكل الرجالة في المربوعه شاللهم معاويه قهوتهم ,, وبسمة كل شوي متنطرة وحدة من البنات ومناجي اتفوت في عمتها بسمة ماتبيش تعلق معاها ,,
المهم وقت المغرب تطوعت رحمة انها اطيب العشا بعد حست ان عايشه منسحبة وبسمة كراع علي كراع وريم دوبها جت ماااحتى اطوعت 😒 والحق وجعتها مناجي اللي شايلة حوش العيلة فوق راسها ,, وخشت بدت اتطيب ومناجي ورحاب خشن للدار بيهدرزن وهديل مع فداء ,,
عند رحاب ومناجي 👇
رحاب : ياحنة سئلته امبارح ,
مناجي :: هااا وشن قالك ?
رحاب : الحق رافع ماحكش علي طول ,, بس لما سكنتلا قالي هو راجل طيب وحنون وبحوشه وبسيارته وعمله ,
مناجي : باهي ماشالله ,, ماقالش حاجة ثانيه ?
رحاب : لا ,, سئلته مرة ثانيه قالي في المقابلة حتشوفه واتفاهم معاه ,
مناجي : انشالله خير ,, متوترة وخايفه الحق
رحاب : ياخية بلاش نكد وتفائلي واذا فيه خيرة لكي انشالله ربي يقربه وكان العكس ربي يبعثلك احسن منه ,
مناجي : عندك حق ,, وانا عليش خايفه ,, بعد المقابلة حنصلي استخارة وربي ينورني باذن الله ,
وتعيط رحاب علي غفلة نين مناجي كشت في روحها واعيونها ازرقن وحواجبها منقرنات ,
رحاب بغيطه : ييييييييي اتسيت ماحكيتلكش 😃
مناجي منفجعه : كنك بسم الله ,, رقدتي اعظامي. 😨
رحاب : ههههههه سامحيني حبيبتي بس من الحناس انسيت انقولك حاجة صارت امبارح 😁
مناجي وهي تعاود تقمعز جنبها : باهي احكي بلاش رعايش مش ناقصه راه ,😒
رحاب: امس باتي جاه اتصال من بات رافع وحكا معاه شويه واتفق معاه يجونا بعد بكرة ومعاه رجالة وباتي قاله تفضل ,, ورافع حكالي انه بينهي موضوع الخطبة قريب عشان. بعد ايكمل الشقة طول انطلعو الفرح 😍
مناجي بفرحة : ماشالله ربي يكملك علي خير ياخيتي ,, ويهنيك مع الحب 😘
رحاب : عقبالك يارب ,😉
مناجي : انشالله ياحنة يسمع منك ربي ,👐
ومر اليوم بدون احداث وتعشو العيلة وغسلن الشبابات الماغين الا فرات طلعت منها كالعاده 😒
وروحت رحمة وبناتها بعد نبهت علي مناجي ماتحميش لحد نين ادير مقابلتها ,, وخشت مناجي لقت بسمة وريم مرت عمها يهدرزن وعايشة مش قاعدة وفرات خشت رقدت وفداء اتفرج عالتي في ,, وقمعزت عالسرير جنب حنها وبسمة شافت لمناجي وقالت : شن رايك يامناجي ,
مناجي بعدم فهم : رايي في شنو ?
بسمة : في الزواج من الاقارب نحكي نا وعمتك ريم قالت ادور لولدها حسين بتزوجه ,فقلتلها تاخذ برانية احسن ,شن رايك ياخذها برانيه ولا تقربله 😏
مناجي : كل شي عالنصيب ,, وبعدين قصة روادة مارواده هذي اللي مخربه الموضوع احسن شي الواحد يرود لروحه ,,😒
ريم : لا ياحنة سد اعيالي الثانيين كل واحد خذا وحدة هو اختارها اللي تقرا معاه واللي اخت صاحبه ,, هه ومانشوف فيهم الا بعد وين حسين بنزوجه وحدة علي ذوقي 😒
مناجي في سره ( هه لان هو صفا البنات اللي يعرفهن وكمل عليهن وانتي بدوريله بنت تاخذي ذنبها ,, هه من بترضا بيه اصلا حسين العار 😏)
وهي تحكي لروحها وسارحه وخش قيس ومناجي كانت بدون وشاح وقال وهو عالباب : وين امي مش هنا ?
بسمة : لا طلعت انظني في دار البنات ,
قيس لمناجي : مناجي يبيك باتي ,مناجي ,, مناااجي !!
ومافطنت نين عيطلها ,,
مناجي : هااااه نعم تحكي معايا ?
قيس : سلامة عقلك اللي واخذه يتهنا بيه 😏
مناجي بنرفزة : كنك ياييس مش رايقتلك راه ,, شن تبي ?😒
قيس : باتي اللي يبيك مش نا ,
وطلع ومناجي تنهدت وبسمة قالت : انتي كيف اقعدي قدام ولد عمك بلا وشاح علي رلسك ياحنه ?
مناجي المست راسها هضا وين افطنت علي روحها وقالت : هيييي صاح نا مش لابسة وشاح ,,😨
بسمة : ايواااه ديري روحك محترمة و ناسية قدامي نا وريم ,, شكلك متعودة تقعدي بلا وشاح قدامه 😬
مناجي هنا معش تحملت وقفت بعصبية وقالت : اولا ياعمتي انا محترمة وغصبن عن كل حد وثانيا من جيت عيت عمي الصديق ونا وشاحي علي راسي مانسلحش فيه الا بعد انخش داري ونرقد ,, وثانيا اذا مش مصدقة اسألي حني وعمتي عايشه والبنات وثالثا والاهم نا مايهمنيش راي حد فيا لاني عارفة روحي شنو ,,
وصبت خشت لدارها ولبست وشاحها وطلعت للمربوعه خبطت وخشت بعد سمحلها عمها الصديق ,
عند بسمة بعد طلعت مناجي قالت : هذي السانها طويل وتبي تربايه 😡
الجدة اللي شافت وسمعت كل شي قالت : بسمة خاطي مناجي يابسمة ,, مناجي تربيتي بعد تغلطي فيها معناها اغلطتي فيا 😒
بسمة : حشاك يمي مش قصدي عليك ,,بس البنت هذي اترد واتلاطع كلمة بكلمة ,,😒
الجدة بتحذير : اللي ايحي شورها يتحمل جلاطتها ,, وهي ماجتش شورك , ريحينا 😒
بسمة.تنرفزت بس سكتت لانها عارفه امها وزادت حطت مناجي في راسها ,,
وريم خطرت عليها حاجة وابتسمت وشافت للجده ,
وعند مناجي بعد خشت عالمربوعه اللي فيها الصديق وعثمان اللي سلمت عليه ,,
مناجي للصديق: خير ياعمي قالولي تبيني ?
الصديق : ...................
وبعد يومين الصديق شرا الحوش اللي يبيه وانقلو فيه الاثاث ,, ومناجي ارتاحت من الهم اشوي ,, وبسمة باتت ليلتها عند امها وثاني يوم عالمغرب روحت ,,
المهم مناجي جتها عمتها خذتها للحوش مع البنات عشان اتجهز روحها للمقابلة ووصت معاويه عليها ,,ومشت مع امها لعيت خوها عثمان بسبلة مرت ولد ريم عتدها حالة وفاة وتبي اتعزيها ,,
وعند مناجي لبست سروال جينز ازرق وطرف للركبه ابيض في الزهري والسماوي ,,وحطت لمسات بسييطه وحطت وشاح زهري طلعت اتهبل المنجوهه 😍 وجا وقت العشية وجيت العريس والبنات ايجهزن فيها وجهزن القهوة والحلويات ويفهمن فيها شن ادير ,, ومعاويه سمع صوت الجرس ومشا فتحه القيه العريس وفضله للمربوعة وخش للبنات ,
معاوية : مناجي : هيا جيبي القهوة وتعالي ,
مناجي : جااا?
معاوية : لا مازال مغير تبيك ترجيه في المربوعه ,, تي اكيد جا ياهمي ,,😒
هديل : بالشويه عليها البنت متوترة راه ,
معاويه : سقدني مش حياكلها راه ,
وخذت مناجي الصفرة ومشت ورا معاويه اللي خش وخشت مناجي ةاول مارفعت راسها ............
هذي بكرة تعرفنها نعموشاااتي 😂
وزعمك عمها الصديق شن قاللها ? توقعاتكن هيا 😌
#Hamelo ✒
