ونزلتها بدري حناتي ,,😁 عاد دعواتكن ❤ وامبووووش وحدة تكتب قصيرة 😒
قراءة رايقه ,,
رواية #مناجي_والنصيب
الحلقه /8
وصلنا لمناجي بعد خذتها عمتها عندها وجهزت نفسها عشان المقابلة ووصل العريس وخش للمربوعه وخذت مناجي صفرة القهوة وخشت ورا معاويه بعد رفعت راسها وهي تنصدم.,, الراحل كان واضح عليه انه نش صغير ومع هضا ماعلقاش طلقت السلام ومدتله القهوة وخذاها وهو ايشوفلها 👀 ومناجي توترت وقمعزت جنب معاويه ,,
معاويه حب ايلطف الجو وهمس لمناجي : شنو بتقعدي ساكته ومنزلة راسك ? شوفيه واحكي 😐
مناجي بلعت ريقها ورفعت رلسها لقت الراجل اعيونه عليها وهو مقابلها انحرجت ونزلت راسها ,, المهم معاويه : تفضل اشرب قهوتك ,,
ورن فون معاويه طلع بيش ايرن طبعا رحاب اللي رنت عليه وهذي لشارة بيناتهن عشان ايفضو الجو للغندورة 😁
الراجل : انتي اسمك مناجي ?
مناجي حست بغصة بعد قال لسمها وانحرجت وقالت : اها ,, وانت?
الراجل : نا فيصل ,, خال رافع نسيب عمتك ,
مناجي : اهلا وسهلا ,
فيصل : طبعا اكيد حكتلك اختي عازة علي ظروفي !
مناحي باستغراب : لا الحق انا عمتي عازة ماشفتهاش بس حكت لامي ومازالت مش عارفه عليك شي الصراحه ,
فيصل : تمام ,, انقولك نا ,, انا فيصل ولد ****** وعمري 40 سنة خريج قانون محامي يعني ,, ونسكن جنب هلي فيلا عالدور الثاني وبسيارتي والحمدالله اموري تمام ,
مناجي علي قد مافرحت بمواصفاته بس انفجعت من العمر حست الفارق بيناتهم كبير ,,
مناجي : ماشالله ,, ربي يحفظك ,, بس ممكن سؤال ,?
فيصل : تفضلي ,
مناجي : مادام انت بشهادتك وعملك وبيتك شن اللي خلاك ماتجوزتش لتوا ?
فيصل بصدمة : كيف ماتجوزتش لتوا ? من قالك الكلام هضا ?
مناجي : هااا شن قصدك.?
فيصل : انا متجوز ومن عشر اسنين اخرا ,
متاجي جت مصبية من الصدمة وقالت بصوت عالي : شنوووو ? متجوز ?
فيصل : الواضح انتي ماعتدكش علم بس انحب انوضحلك انا متجوز من عشر سنين ومتريح في حياتي ,
مناجي قمعزت وقالت بعصبيه : نادامك متريخ شن ايخلي فيك تتجوز عليها مراتك واتشرد اولادك ?
فيصل بل شفايفه وبلع ريقه وشافلها وقال :اسمعيني يامناجي شكل اختي الله يسامحها ماقالتش اني متجوز مع اتي نبهت تحكيلكم بس مش مشكله ,,ياستي انا بننجوز عشان الاطفال لان لتوا ربي مارزقناش انا ومراتي بعيال ,, ورغم العلاج في كل مكان ماصار شي ,, واخر حل طبعا اني نتجوز رغم اني نحبها وماتهونش عليا ,,ولولا انها هي اصرت عليا مافكرتش نتجوز ,بس لما شفتك تريحتلك ونتمنى تعطيني فرصه واذا ماتبيش تحكتكي بيها عادي هي شقتها فوق وانتي حوشك تحت ,
مناجي تسمع ومنصدمة والعيون هك 😳 وفيصل زاد قال : انتي ماتعطينيش رد توا فكري وردي عليا مع اختي ونتمني اتوافقي ,
متاحي تماسكت روحها وبينت قوتها وقالت : باهي ممكن سؤال اخير ?
فيصل : ادللي ,
مناجي : عليش اخترتني نا ? اكيد في بدل البنت الف تتمني ترتبط بيك ليش نا تحديدا والا صدفة ?
فيصل : تبي الحق لا مش صدفه ,, نا عاطي مواصفات البنت اللي نبي نتجوزها من ناحية العمر والمؤهل العلمي واعتقد انك خريجة معهد مهن شاملة ولا ?
مناجي : اهاا ,, وعليش بالتحديد المواصفات هذين ?
فيصل : عشان وعدت زوجتي اني نش حنحيبها افضل منها في شي ,, اسف للكلام ,,بس زوجتي دكتورة تعطي في محاضرات في الجامعه وكانت بيناتنا قصة حب ,, المهم انتي توا شنو ?
مناجي وقفت والعبرة خانقتها خنق مش عليه لكن من كلامه وقالت بثقة : والله ياسيادة المحامي حنعطيك ردي من توا وانقولك اني انا صاحبة شهادة المهن الشاملة مش موااافقه وطلبك مرفوض ,, وربي يبعثلك وحدة اتكون اعطب شوي من مستواي اتكون جاهله بالمرة ومش قاريه عشان تراعي مشاعر زوجتك ,
فيصل وقف وشافلها وقال : ماتستعجليش في الرد فكري كم يوم اسبوع او حتى شهر وردي ننتظر موافقتك.
مناجي : اسفة مش مستحقه تفكير ,,,, وياريت تراعو مشاعر بنات الناس ماهنش لعبة لكي ولمراتك ولاهن مجرد خاضنات ويولدن في العيال ,, نش ارانب نحنا ,, عن اذنك😒
وطلعت وسيباته متفاجئ بقوتها وكلامها ومعاويه خش القي فيصل ياخذ في فونه ومفاتيح سيارته وودعه وروح الغندور ومعاويه خش القي البنات في الدار ومناجي ترخ وتبكي ,😭
معاويه : كنك تبكي شن دارلك ?
مناجي : 😭
رحاب : بابنت اسكتي وقوليلي شن صار بيناتكم شن قالك ?
مناجي بعد بكت تمالكت روحها وهي مازالت مخنوقه بالعبرة وقالت : ه.. هضا .. هضا طلع م..مت..متجوووزززززز 😭
انصدمو البنات ومعاويه ,
رحاب : كيييف ?
هديل : كيف متجوز ? عمتي ماقالتش انه متجوز ! كيف يشرد عويله ?
مناجي : عااااااا اصلا هو يبي يوز عشان العيااال 😭
وحكتلهم مناجي بعد ستين واسطه فهمو منها كل شي ومعاويه عصب والتفت علي رحاب وقال : قولي لخطيبك مش حركة ناس محترمة هذي وتا نغير انشوفه عندي معاه كلام ,😡
وطلع وهو معصب تلاطم مع مؤيد دفه بكتفه وطلع ومؤيد مستغرب في عصبية خوه ,,
مؤيد : هضا كنه ?😕
المهم تنكدت مناجي والبنات وبعد روحت رحمة حكتلها وانصدمت انه طلع متجوز ورنت علي عازه عاتبتها وعازة قالت ان زوجته بتطلق لانها حرجانه وهو يبي يتجوز وحدة صغيرة وكويسه ورحمة عاتبت انها ليش ماحكتلها من الاول وهكي ,, المهم عازه وجعتها ان مناجي رفضت وسكرت من رحمة زعلانة ,, ورحمة قعدت اتحاول تجبر بخاطر مناجي بالكلام ,,
مناجي لرحمة : مايسدش انه شايب عمره 40 سنة ولاا يشرط عليا ناقصه هم نا ,,😒
رواية مناجي والنصيب لهميلو Gazala Bobacer ,, ايواااه ,
وتعشن عن رحمة والعزوز ماحست بشي وروح بيهن معاويه ,, واول ماوصلو قدام الحوش معاويه بصوت عالي : اوييي ياطيري وينك لك فترة غااايب ?
الشخص : خيرات. ,, كنت مسافر والله ,, تعال نبيك ,
ومناجي النشاعر دغبشنها ورفعت راسها وتشوفلكن طرف الحارة 😂 والقلب قعد يدلف ويخبط وسرحت في شخصيته ووسامته ,, طبعا الحلو هضا اسمه وسام كان مازلن متذكرات ,, واسم علي مسمى حق طوله واكتوفه ولا اللحيه حي حي 😍 خبر مدوخ عيت حنة ماعلينا المهم مناجي اتبحت وسارحه وهو يحكي مع معاويه ونزلت حنها لقتها مازالت مانزلت خبطت علي قزاز الباب وقالتلها : انزلي يادعوة وانتي مادة خلقتك 😒
مناجي فاقت علي تهزيب حنها انحرجت وقعدت اتسب وتلعن في سرها ونزلت خشت للحوش مع حنها ,,ومعاويه نزل لوسام وقعدو يسلمو ويهدرزو مع بعضهم ,
المهم مرن ايام والاجواء عاديه لعند جا يوم حفلة بيان رحاب وكانت حفلة كبيرة لان معاها فاتحة رسمية علي قولت خوتنا الغرابه الفضانيه 😍 وكانت مناجي تمشي لعيت عمتها وماتروح الا في الليل وهن ايجهزن في سريب الموالح والحلو والفستان والحنة ووووووووو ,, مايغباكن عاد ,
المهم مناجي فرحانه لاختها رحاب بس متضايقه لانها ماعندهاش لبسة تلبسها ,, وقبل الحفلو بيوم مناجي وحنها عند رحمة ورحاب بتمشي للمزين عشان الفتلة وتتفق مع المزينة ,
رحمة لمناجي : جيجي البسي عبايتك وامشي مع رحاب ,
مناجي : حاضر يمي ,
وطلعن ورمبن مع معاويه وشالهن للمزينة وطبعا اول ماخشن لقت مناجي فستانين معلقات عالعلاقه والمزينة قالت لرحاب : اهوا الفساتين ياعروسه واحد ذهبي وواحد كحلي ,, اختاري منهن ,
متاجي لرحاب : مش انتي شريتي فستان الحفلة ?
رحاب وهي اتشوف للفسااين : اها بس هذين مش ليا ياحنة ,
مناجي بعدم فهم : امالا لمن ?
رحاب : قوليلي شن رايك الذهبي ولا الكحلي ?
مناجي شافت للفستانين الذهبي قصير لفوق الركبه واجد وكم للرسغ نشبك واكتافه عريان ورسمته حلوة بس ماحباتاش ,,شافت للكخلي رسمته حلوة ومخصر وطويل وفيه فتحه لفوق الركبه عجبه وقالت : الكحلي احلئ 😍
رحمة : خلاص قيسيه
متاجي : هااا شن قصدك ?
رحاب : قصدي هضا شراته لكي امي ,, الحق ماعرفناش شن حتختاري فقالت انحيب الاثتين وانتي تختاري بينهن ,
مناجي الدموع في عيونها ومن الصدمو قصعدت ساكته ,
رحاب قربت منها وقالت : تحساببنا بننسو اختنا الكبيره مالا ? 😉
مناجي حضنت رحاب وقالت : نجك ليا انتي وامي وربي مايحرمني منكن ,, انتن سبب استمراري في حياتي وحق الله 😢
رحاب : ماعندنا فيك جميل يالهبله انتي قرعتنا اصلا وعيا ياحنة اختاري اكسسوارات عليه وحذاء واختاري التسريحة اللي تبيها عليه عشان بكرة نبيك تطلعي طرف راه ,😌
وفعلا اختارت مناجي طاقم الماس بلمعه وحذاء فضي بلمعة الماسيه وساعه وحلق وقالت للمزينة : نبيك اديريلي تسريحه بسيطه راه ,, سنقل راه 😁
المزينة : من عيوني ونش حتطلعي الا راضيه ,
وفعلا بعد تم موضوع الحجز والفتله والماسكات والخبارات اللي نموت عليهن 😁 وروحن ومناجي الفرحه بطيرها ,, وطبعا باتن عي وحنها عمس عايشه وبناتها اللي روحن وريم وكناينها روحن ,, وثاني يوم جا بامله واشراقته عالكل واولهن متاجي اللي ناضت من الفجور وهابا بعد تنوض متحمسه تقربيع من عين عينه 😂
المهم هي اللي جهزت الفطور وبدت العيلة اتنوض بالواحد ,, وحنها اتعارك ,
الجدة : عليش نايضة اتقربعي من الفجور يابنت 😡
متاجي قربت منها وخطتلها صفرة الفطور وقالت : صح النوم ,, مافي قطرتنا انوضو من فجور ربي شن جد عليك ? وبعدين اليوم مش يوم مرقد واي بلعومتك ولعلعي بنت بنتك اليوم فاتحتها غني ياحنة العلم وزغرتي ماتحشميش بينا قدام عزايز العرب 😂
الجده : عدي اشقي بحالك بلاش كشايف 😒
مناجي : هههههه ماتقوليش متحشمة ياحني 😂
المهم هديل ولعت منظومة مؤيد واجواء عرس عاد ,, وفطرو العيلة وبعدها جا الغدا وطيبت رحمة الغدا ورحاب ومناجي شالهن مؤيد للمزينة ,, العيل هضا مغير ايشيل وايجيب انشغلينه تاكسي للعيله 😁 ماعلينا ,,
عند عايشه والصديق ,,
عايشه بصوت مصدوم : شنووو ? ونا اخر من يعلم يالصديق ?😨
الصديق : اهو حكيتلك يامسكينة 😒
عايشه : بعد سئلت البنت جاي اتقولي ,,وبعدين من قالك اني نبيها لولدي ,?
الصديق: ولدك راجل وهو اللي اختار ,, وبعدين شن ايعيبها? حراره وشطارة وماشالله عليها ايسد انها متحملة مسؤوليه امي والحوش والعيلة بعد ايكبو عليهن ,,
عايشه : بس نا نبي وحدة علي ذوقي يالصديق وحدة تعجبني اتكون طيبة وساكته وماتلاطعش لما الواحد يقوللها كلمة ,
الصديق : بنت خوي مايعيبها شي ,, واللي تبي تختاريها علي ذوقك عشان تقهريها وماتقول ااه ,, هضا ولدك اللي اختار بينك وبينه وراني نا مع اللي يبيها ولدي ومادام اختار بنت خوي مانريد نلقاله احسن منها ,😒
وصبا طلع وخلاها تغلي وخشت تعارك وتهزب ةفرات وفدا بعد شافنها حكتلهن فداء فرحت لكن فرات طااارت وقبل ماتت ,
المهم قعدن ايجهزن في رواحهن عشان الحفلة ,,
المهم الكل منشغل وعمتكن بسمة مشت لمزينة
بدل ماتجي تساعد اختها ,, ماعلينا منها ,,
المهم جا وقت الحفلة وبدو الضيوف يوصلو ومناجي مع رحاب اللي لبست فستان وردي طويل حرير بلمعه ومخصر وبسير واحد عالكتف وتسريحة فلو لشعرها الطويل ومايكب خيااال طلعت خيال ,, ومناجي لبست الفستان الكحلي وكانت تجنن بيه ودارتلها المزينة تسريحة روعه رفعتلها شعرها ودارت مايكب بسيط طلعت طرف 😍ورحاب تشكر فيها وفي جمالها ,,ولبسن عبايتهن وروح بيهن معاويه طبعا الشوفير الخاص هضا 😁
رواية مناجي والنصيب لHamelo ,, ,
المهم اول ماوصلن استقبلتهن رحمة وهديل وطبعا صالة حوش عمة مناجي كبييرة وراقيه ,, وحطن كرسي العروسه في زواية والعزوز حنهن مقمعزة عالصالون جنب مرسي العزوز ,, مش عارفه شن وضعها بس تهايالي اططير في العين هذي ,😒 ماعلينا ,, المهم اول ماخشت رحاب والكل مبهور بجمالها وفستانها ومناجي واقفه عالندخل متاع الصالة اتشوف لروحها و اتسقم في خصلات شعرها ,, وابتسمت وخشت في الاول صبايا واجد ماعرفنهاش بعد ركزن وعرفنها قعدن ايتهومسن شي اعجاب وشي حسد وشي مره ,,
طبعا في وحدة مقمعزة مرا كبيرة بس مش واجد تقريبا في نهاية الخمسين من عمرها وعجبتها مناجي وبعد عرفتها ابتسمت ,, ومناحي اتسلم وتضحك واكثر شي محليها ضحكتها وطيبتها ,, وفرات بعد شافتها قبل انشلت وقعدت ااشوف لمناجي بنظرات غل وحسد ,وغيرة
طبعا جت مرت بات مناجي وبناتها وحدة متجوزة ووحدة مازالت واول ماشافن مناجي تهايالي الدخاخين طلعن من ذانهن 😒
المهم الكل منعحب بمناجي وصبايا واجد نشدن عليها وعايشه لاحظت هالشي وقررت شي وريم لاحظ غل عايشه جتها اترمي وقالت : كنك ياعويشه انشوف فيك متضايقه ?
عايشه : لا شي مغير انشوف في مناجي ماشالله طالعه اتهبل اليوم ,,
ريم : ايواا ماشالله حتي بناخيتي قالتلي هذي من عندها خو ايدوروله علي بنت وتبي تكلمها ,
هنا عايشه قررت تسبق الكل وتوافق علي خطبة قيس لمناحي مش عشان عيون مناجي ,,لاااا لكن غشان ماتتجوزش حد ثاني ايريحها او اتريح معاه وهي مصممة انها تقهرها ,
المهم جو هل العريس وصفيق ولعب من عين عينه وعمت رحاب بعد شافت مناجي انعجبت بيها اكثر وزادت حكت مع رحمة لكن رحمة قالت : ياخيه سامحيني لكن خيك متجوز ونحن مانحبوش نبنو سعادة بناتنا علي حساب بنات الناس ,, انشالله ربي يرزقهم بالذريه ويفرحو يارب ,, كل شي نصيب ث,
وخاب امل عازه لكن جت لمناجي واعتذرت منها ومناجي بطيبتها ماشالتش في قلبها وقالتلها كل شي نصيب ,, وقدمن البنات الضيافه عالمعازيم شي حلو ومشاريب ومايغباكن مانبي نحكيلكن بالتفصيل لكن عاد اجواء بيان راقي وحلو وبسمة ساكته وااشوف للبنات والصبايا برفعت خشم واطنش وماتشوف في والي وعمت رحاب لبستها الطاقم والدبلة وطبعا خشت غيرت بفستان عربها كان بيج بالذهبي راقي وحلو مخصر وفيه فتحه اتبين الستقين من قدام بعد تمشي ومن خلف ايكر واسيوره نازلات عالكتوف ومخصر وحاجة صح 😍
وفرات بتموت من رحاب والغيرة تنهش فيها ,
المهم بدو الضيوف يروحو والبنات يهيجن عالمنظومة وبعدها روحو المل الا من بسمة الا عايشه وبناتها روحن مع ان فدا تبي اتساعد البنات لكن عااد امها عويشه 😏 المهم ريم قبل ماتطلع لاخظت ان فرات وامها يحكن علي مناحي ووذانها القطن كلام وفهمت ان مناجي يبوها لقيس وقررت شي,, واول ماروحت وغيرت وطبعا كناينها روحن قالت لعثمان : قتلك ياعثمان نبيك في موضوع ,
عثنان : انشالله خير احكي ,
ريم : شن رايك في مناجي بنت خوك خليل ?
عثنان قرن حواجبه وقال : قثتهايالي اكويسه ماعمر حد حكا عليها حاجة بطاله , كنها ?
ريم : ابصرااااحة نا عاجبتني ومالقياش خير منها اتكون كنتنا وتكون مرت فهد ?
عثمان شافلها بتركيز وبعدها قال : وشن خطر عليك توا انك بتجوزي فهد ?
ريم : اولا هو مش صغير امداداته بعيالهم وشقته واتيه ,, وثانيا بنت عمه اولاله من غيرها ,, منا وفينا وعلي قولت العرب لوله بنت عمك اتشيل همك ,
عثمان اقتنع وقال : خلاص بعد نمشو لامي احميلها وخوذي راي البنت ,, واولدك احكيله قبل مش يخشمني مع خوي ,
ريم بفرحه : لا كون هاني خليه شوري ومايكون اللي موافق ,
ونجو لمناجي والبنات بعد روحو العرب ومناجي مازالت بالفستان وحتي هديل ورحاب وخشن للمربوعهبعد لزتهن العزوز انها حست راسها من الوجيج وخذن المومري بيحطنه في الاب توب وايشغلن الموسيقى عليه ,, طبعا فاضيه ومناجي ماسكه الصندل في يدها وترقص والبنات يرقصن وفرحانات ورحاب لاحظت فونها ايرن طلعت من المربوعه وخشت لدارها تحكي مع ❤ عاد حلالها صار 😁 وهديل نادتها امها شيرت لمناجي وخشت اتشوف امها ومناااجي سااارحه وفي عالم ثاني وماتجيب علم نين اتشوف واحد مصبي علي باب المربوعه ومواريه بجهامته وفاتح فمه وبدون شعور عيطت واطلقت الصندل فيه خبطه الكعب في جبهته وهي فط خذت وجهه تجري وخشت جوا وهي منصدمة وترررعش والغندور اللي شافها قال : اخخخخ يابنت اللذين ,, يدك ثقيلة ,, هذي من توا ? هذي هذي معقوووله اتكون هي ? نعنجد جمالها الفرخه اتجنن ,😍
ههه مغير اشقي بجبهتك اللي انفريت 😁Hamelo ,, حاله 😁
المهم,,مناجي خشت اتزر وفتحت الباب بقوة خلت رحاب تنفجع واتعيط واتجي مصبيه استعداد البنت دوبها انخطبت وقبل خشها السكر 😂 وعمتكن مناجي اتقول مداهمة مندعبة عليها ,,
ومناجي من نداهمتها تلتقط في الفستان طويل وكربااج علي وجهها 😂
سبحان اللي متلايم وجهها هالبنت من كثر الطيحات ,,ولا عالوجه اخرا ,
ماعلينا هي طاحت وكملت تزحف جوا الدار وسكرت الباب وهي الوجه طمااااطم واعيونها مرقرقات ,,والضحكة علي وجها ,
رحاب بفجعه : كنك ياخيه شن فيك ? من ايلز فيك ?
مناجي : ينعلي خش عليا ونا نرقص في المربوعه😓
رحاب : من ?
مناجي : ..........
اااه الشاطرة اتقولي من اللي شافها اتلوا قصدي ترقص 😂
توقعاتكن عاد 😘
#Hamelo ✒
