رواية #مناجي_والنصيب للكاتبه #Hamelo Gazala Bobacer
الحلقه 20 والاخيرة الجزء الأخير ,,
وصلنا في الحلقه اللي فاتت لعند مناجي مقمعزة بين مرت بوها وعمتها ومبسوطه صبت حاجة في طاسة المية ومناجي شرقت وقعدت اتكح ومبسوطه طول مدتلها طاسة المية علي خشت هديل شافت مناجي شارقة وعمتها غزلان تخبطلها علي ظهرها واتسمي في الله ,
مبسوذه اتمد في المية وتقول : مغي. اشربي بس هامي افتحي فمك ومناجي عالقه اتكح وهديل خذت الطاسة من مبسوطه تبي اتشرب مناجي ,
هديل : بسم الله عليك نوجا خوذي اشربي مية بسم الله كنك ?
مناجي اتكح وهي طبعا شرقت في ارياقها وخذت الطاسة من يد هديل بتشرب وفي اللحظه اللي بتخط الطاسة علي فمها تدعس عليها اختها نجلاء وخذت منها الطاسة وقالتلها ياخيه فجعتينا نا مانتحمل الفجايع بسم الله خيتي خلونا نشربو من الفجعه عليما تهاونت عليها الشرقه ,
وحطت الطاسه علي فمها وبدت تشرب طبعا غزلان وهديل انصدمن من حركة اخت مناجي لانهن بيشربنها لانها شارقه واختها خلتها شارقه وبتشرب المية وعمتكن مبسوطه من لغجعه والصدمة اندهبت شيرتها بتصبي تلتقط في عبايتها اللي لابستها جت علي وجهها وهي اتعيط لبنتها اتقول : هيييي انتي لااااا يافرخه ماتشربيييش المية لا لا 😨
ومناجي صبتلها هديل طاسة مية ثانيه وشربتها لها وردت الروح في مناجي اللي وجعتها من اختها كيف اتخليها شارقه بدموعها وتشرب منها المية ماتحساب ربي نقذها ورد كيد مبسوطه ,,
مناجي بعد تريحت : ينقنك الا بارده يانجلاء نا قاعده بنموووت قدامك وعمتي وامك وهديل بيشوبني وتاخذيها مني عيني عينك 😬
نجلاء شربت المية ودارت روحها منفجعه وامها خلااااص قعدت تندب وغزلان والجدة وهديل ومناجي منصدمات في حركتها ,
مبسوطه : ينعلي منك ينعلي منك غبيه يابنت خليل غبيه ينعليييييي ,😤
نجلاء : عليش يمي ماتقوليش خايفة علي مناجي تموت اهي قاعده اتقول جن مافيها شي,😒
علي خشت رحمة ورحاب جايبات الشاهي واللوز والفشار والفاكهه ,, واستغربن الوضع خصوصا ان غزلان تمسح علي ظهر مناجي اللي وجهه باقي زي حبة الطماطم ,, ومبسوطه صبت لبنتها تضرب فيها علي وجهها وتعارك فيها الشي اللي صدم الموجودين ,
مبسوطه بغل : ياغبيه ياكلبه يابنت الكلبه ضيعتي عليا اللي تعبت فيه من قالك خوذي منها الطااااسة ياعاااانس من دون البناااااات ,😡
وطبعا مع تشلفيط 👋كفوف عالشدوق خاصة ان نجلاء بشدوقها ويابسات يبن تشفليط بس 😒 ونجلاء اتعيط وتبكي ورحمة اتحز علي نجلاء هي ورحاب الا هديل عاجبها الجو اتفرج ومستكه ومناجي قارنة حواجبها واتشوفلهن بصدمة ,
رحمة : خلاااص يامبسوطه عيب اللي اديري فيه خلاص ,
مبسوطه : حيدي يارحمة مش ناقصتك ,
وشافت لبنتها وقالتلها : رجعي ياكلبه امشي رجعي بسررررعه ,
والكل منصدم ,ومناجي قلبها نغزها وصبت واجهتها وقالت : وعليش تبيها اترجع ? شن واكله نين اترجع ? والا عشان شربت مية ? ماهي كانت بين ايديك وانتي اللي مديتيها ليا ?
مبسوطه توترت وارتبكت وقالت : مم... مماهو .. ماهو عشان انتي شرقتي و. ووو المفروض عاطتها لكي قبل ,
نجلاء عصبت من كلام امها بالذات بعد قالتلها عانس وقالت : ومن امتى تشغل فيك مناجي ? والا بعد اجوزت بديريها خير مني ? وبعدين شن خذيت منها اصلا مية زمزم والا مية من الجنة مية زرقا من الشيشمة 😡
واتلطها امها بكف اخرا البنت تورمن شدوقها اكثر ماهن متورمات 😁 المهم مناجي وهديل بحتن في بعضهن ومبسرطه اقعدت اتكر في بنتها اتريدها تنشي للتواليت عشان اتخليها اترجع وغزلان ياروحي منصدمة من اللي قاعد ساير وقالت لمبسوطه : وسعي بالك يامبسوطه بنيتك شربت مية بس ومناجي الحمدالله اكويسه توا وعليش مكبرة القصه ?
هديل بمكر : الحمدالله نوجا مافيها شي شرقت في رياقها أكيده شي حد كان جابد سيرتها بس ,, وتوا كويسة مش ضروري تشرب من الطاسة اللي تبي تعطيها لها شربتها بنتك مش حد براني يعني ,😏
مبسوطه انفصلت بدون ماتحس علي روحها : ماهو اصلا نا مانبيهاالش تكون اكويسه نبيها تشربها لاني ....... ,,
وسكتت بعد شافت نظرات الصبايا لها ومناجي اعيونها فنصن وفي اللحظه هذي يسمعن صوت كف قوي لشدوق مبسوطه ويفنصن من الصدمة لقنها الجدة واعيونها مليااانات دموع
مبسوطه بصدمة وغل : تضربيني ياعمتي ??😳 نااا تضربيني ?!!😳
الجدة بصوت عالي وغل : ونقتلك ياسحارة ياقليلة الخير والربايه ,😡
الصبايا كلهن اشهقن حتي عايشه وريم اللي منصدمات وفداء شافت لاختها فرات اللي اعيونها زارقات وخلاص. عليك فضايح قدام الوليه البرانيه ,, ومناجي مغير اتشوف لحنها بصدمة ,,
والجدة قالت : مش سادك خراب بيت امها من سحرك تبي تخربي بيتها حتى هي ? 😡
غزلان صبت وقعدت تلبس في عبايتها وقالت لمناجي : هيا يابنتي انروحو سادنا اليوم 😔
رحمة بعد استوعبت الموقف : لالالالالا اكيده انتي اتبصري سحر شنو وخراب بيت شنو ? شن قصدك.?
الجدة : الوليه هذي دايرة سحر لمناجي وتبيها تشربه ومن نيتها شرباته بنتها هضا بيش انكلبت وقعدت تضرب فيها ,
نجلاء بعياط : شنوووو ? سحر ??! لالالالا اكيده تخرفي انتي ,😨
الجدة : انشالله نطلع انخرف اسألي امك ياحنه عليش تعيط عليك بعد شربتي الميه ? وعليش تبي مناجي تشربها ?
مبسوطه حاولت اداري عملتها وقاات : لالا والله فهمتوني غلط انا .ااا انا شفت مناجي شارقه وتكح وانا نديتلها المية والبنت نجلاء ادعست عليها مني هضا بيش عاركت ,
رحمة : وكلامك اللي قلتيه توا شن معناه انك ماتبيهاش اتكون كويسه شن قصدك ?
مبسوطه : انااا.😓
هديل : اكيده دايرة شي عمله من نيتك جا في بنتك ,هه اشقي بيها كان شربت سحر صحبح حسبي الله ونعم الوكيل في كل سحار وسحارة ,😏
نجلاء قعدت اتهز في امها من عند كتفها وتبكي وتقول : ينعلي يمي قولي كذب ,, قولي مافيش منه الكلام هضا قولي نا ماشربتش سحر 😭
مناجي : قولي عليش ساكته يامرت باتي وكانك نظيفه احلفي ع المصحف ,
مبسوطه كثرت عليها الدوة والصبايا يعاركن فيها وبنتها تبكي وغزلان اتشوفلها باستحقار وخوف ,
عايشه لريم : ووك وك يابتي شكلها ساحرة خليل وسارة زمان ونا نقول خليل تغير عالوليه مرة وحده عليش ?
ريم : هابا عليها من يوم يومي مانتريحلها ,, ريتي تبي اتضر البنيه ضرت بنتها ,
وطبعا مبسوطه تسمع في الكلام ,, واعيونها زارقات واتشوف لملامح الصبايا مشمئزات منها حتى نجلاء بنتها تبكي ومنقرفه من امها والحدة اتهزب فيها ومناجي حضنت عمتها رحمة ,, وتبكي ورحمة تعاتب قي مبسوطه وهديل تعزق في كلام وريم وعايشه ماسكتن والوليه قعدت ادوخ واعيونها ازرقن ,, وصارلها زي الازدواج في التظر وعمشت وكثرن عليها الاصوات وفجاءة اتعيط بعلو حسها نين زيم ةعايشه خضنن بعضهن ةالجدة تخزرطت ورحمة ةغزلان انصدمن ,
مبسوطه : عااااااااااااا اسكتتتتتاااااااااااان خلاااااص اااه نا اللي سحرتهااااا نا اللي طلقتهااا عارفات لييييش? لانها صغيييرة وخليل فضلها عليااا خليل اللي كان ماتجوزني راهو انكلب عليييش هاااا عليييش عشان اصغر منيييي ? والا عشان حلوة ? وانتي
وطبعا شافت لمناجي اللي قرنت حواجبها وقالتلها : نا كني ?
مبسوطه قعدت اتقرب منها ورافعة ايديها علي شكل انها بتخنق وقالت : انتييييي امفضلك عليا وعلي بناتي ,, انتييي بنت سااااره ,, وناااا نحرق في روحي حتي بعد سحرته يكرهك وينساك ايحنلك وايقولي حلمت ببنتي مناجي ,, وكنت لما انجيك انرش فيه لكي في دارك ودولابك عشان اتعنسي نا ... نااااا نكرهك يابنت سارة نكرههههك تمنيتك اتموتي حق بعد قالو لامك انك متي ,, مووووتييييييس
وهجمت علي مناجي تبي تخنقها والوليه اتقول جاموسه عاطها ماينزعها وغزلان اتحز ورحمة وهديل وفداء والجدة وعايشه طلعت تزر للمربوعه خبرت الرجاله طبعا راجلها وسلوفاها واعيالهم بس ومعاويه ومؤيد ,وخشو يجارو لقو مبسوطه ماسكه في شعر مناجي ومناجي اتعيط ومايجيبو علم نين ادعسو عليها معاويه ومؤيد وخليل وفهد زارقات اعيونه وفكوها من مناجي اللي تهر وتبكي ,,,رواية مناجي والنصيب لهميلو خلاص بلاش اعياط عارفة مش وقتي حتي نا 😅 المهم مبسوطه اتعيط واتخبط في الرجاله وهم يحاولو ايهدوها شي بصيرة منتلصه اتقول بقرة وتشلفط ايجيها كف نين طبعن الصوابع علي خدها ,, ولقاته خليل ,
مبسوطه : تضربني ياخليل ? تضربني ياولد مناجي ? ناااااا تضربني ??
وهجمت تبي تضرب الراجل وماشدوها الا الشباب وحكتله رحمة عالسريع والصبايا يعاركن ومبسوطه معش ركزت علي شي ولا كانها تسنع فيهم اعياااااط وخلاص واتهزب واتسب ومحرمتها طاحت واتقول في كلاة ايحشم وخليل من القهر رما عليها الطلاق بالثلاثه وهضا الخبر اللي زاد كلبها 😒 وبعد مابتش تهدا طلب فهد خبل عشان ايكتوفوها لان واضح الوليه مش بعقلها وفعلا هديل مشت تجري جابت حبل البنت هذي كبدها دم 😁 وعطاته للشباب اللي كتفو مبسوطه ومن الكلام اللي اتقول فيه حطو محرمتها علي فمها وبنتها منهااارة وتبكي وغزلان ترعش ورحمة مشت للمطبخ جابت كسبر مسحون عاطت الصبايا وامها وخذت حتى هي بيش تحول الفجعه ,, افجعتهن هالضبع 💦😒 ماعلينا والجدة قالت : هذي انكلبت من كثر حقدها وقلبها لسود دزو علي خوتها ايجو ياخذوها 😒
نجلاء راسها نازل وتبكي وفجاءة قعدت اتلوا وتتوجع ورحمة والبنات والصبايا لاحظن الشي هضا وجنها يجارن ,
نجلاء : اااااه بطنييييي يايمي ينعلي شن درتي فيا اااااااه ,
مناجي بخوف : نجلاء كنك ? شنو فيك ?
نجلاء : حووولي خطيني كله منك ,
مناجي بصدمة : ونا شن درتلك ? حسبي الله 😢
الجدة : نوضي بلا بودعه زايده كان صارلك شي من امك مش من مناجي ,, 😒
وزادت وجيعة نجلاء ورجعت عالفرشه والصبايا تفجعن وهديل راااحت لخوتها وخالها خليل خبرتهم ,
معاويه بغل : تي شن في الهم ,, 😤
خليل : وهذي كنها حتي هي اقطع ضنوها مبسوطه 😡
تي منقطع من زمان ياشيخ وين كنت راقد 😑
ماعلينا المهم لبسنها البنات عبايتها لان هليل بيشيلها للعياده مع معاويه ورحمة ومشت معاهم ريم بطلب من رحمة الصبايا خافن دارت فيهن يوم مبسوطه الثعلب ,, 💦 المهم شالوها ومناجي انهارت تبكي وحضنتها حنها وقالتلها : سامحيني يابنتي نا كنت شاكة انها السبب بس مادورتش ولا عدلت وهذي غلطتي كان هضا راك بين بوك وامك ومرات عندك خوت وخوات اشققا 😢
مناجي بعبرة : حسبي الله ونعم الوكيل 😢
وقعدت رحاب وهديل ايهدن في الصبايا وشالن الكاس اللي فيه المية من الخوف والفجعه اعزقنه في الكناسه ابميته بكل ,😂 مريوحات ,,وجابن كاس جديد سمح صبن فيه مية وحطن معاه طواسيه ومبسوطه مسكر عليها في الدار وغزلان خايفه ونصدمت من كمية الحقد اللي شافاته في مرت بات مناجي وبعد ساعه روحت ريم ورحمة والحزن باين في عيونهن والجدة والصبايا شافلهن بقصقصه ,
الجدة : شن صار معاها نجلاء ووينهي ? كنها ماروحت معاكم ?
رحمة : م..ماطلع عندها تسمم و.ودارولها دخول الليله ,
والكل مستغرب وروحت غزلان ومناجي وهن كرعيهن مرقدات من الفجايع والفيلم اللي صار قدامهن ,, وخشن لقن وسام ووسيم يلعبو في بلاستيشن في الصالة وماحبنش يحكن شي توا ,, ومناجي ركبت لشقتها ولحقها وسام ,,
انجو لحوش الجدة رحمة بدت تبكي والصبايا مستغربات ,
عايشه : كنكن ياخياتي شكلكن مايطمنش شن صاير ?
ريم : ياحنة ماحبينا نحكو قدام مناجي وعمتها ,, نجلاء اللي شرباته سم نوع قوي مايبانش علي صاحبه الا بعد وقت طويل ,, والبنت ..
الجدة : البنت كنها ? ادون
رحمة بدموع : ماااتت ,,مااااتت يايمي ماتت 😭
والصدمة سكتت الكل وخليل خش واجعته بنته وقال : إنا لله وإنا إليه راجعون ,, اليوم الدفينة ,😔
والصبايا قعدن يبكن يعني موقف شين سبب موت نجلاء امها واللي يصدم انها كانت تبي تقتل مناجي ,, المهم بعد ساعه كانت خيمة العزاء قدام الحوش ومناجي وعكتها اعلمن وقعدت مناجي تبكي علي اختها وجعتها الحق ,,وجت لحوش حنها ومعاها عمتها ومبسوطه اتعيط واتريش بالذات بعد علمت بموت بنتها قعدت تبكي وتضحك وصارت فيها حال عدوكن ,,وشالوها خوتها وانظني لمستشفى الامراض العقليه طووول ,, المهم مرن ايام العزاء والعيلة تستقبل في العزايا وطبعا لانها حالة تسمم حققت الشرطه والكل قال اللي شافه وسمعه ,,ومبسوطه حطوها في النفسيه او مستشفى الامراض العقليه ,, ومناجي باتت ثلاث ايام العزاء بس وبعدها روحت لشقتها لان الموقف ماينتسى الحق ومر شهر والكل بدا ايروح لحوشه الا بسمة قاعده مع امها ورحمة تبرم علي امها لان بسمة ماتخدمش في امها كويس ,,وعند مناجي خش وسام القيها مقمعزة في الصاله وسارحة ,
وسام : كنه حبيبي شارد ? ,
مناجي ابتسمت بخفه وقالت : لا ابددا ,, خطرت عليا حاجة هكي ,
وسام : ياستي فوتي اي حاجة تبي تزعلك عندي لكي مفاجاءة اتهبببل ,
مناجي : سنو ?
وسام : بنمشو رحلة للشرق شن رايك ? منها اتغيري جو ومنها رحلة ليا ولكي بس ,😘
مناجي فرحت وحضناته وقالت : ربي يخليك ليا ومايحرمني منك حبيبي ,
وسام : ولا ننحرم منك ,هيا يالشينة جيبيلنا حاجة نسحرو بيها جعان راه ,
مناجي وقفت وابتسمت وقالت : من عيوني ,
ودارتله صفرة مشكله وقعد وسام ايغيرلها في جوها وطبعا اتكلم في امها لالفون ديما وحكتلها ع اللي صار من مبسوطه واللي داراته ,, المهم بعد اسبوع جهزت مناجي ووسام ارواحهم للرحلة ومشو بسيارة خاصة ,خلوهم هاضوم نفسيتهم محتاجه هالهجة 😁 انجو لقيس اللي يكلم بالفون وذايب ومكبد ههههه بتقولن حي وامتا ومن ? حتعرفن بالشويه بس ,,
قيس : حاضر ياعمري انكلم باتي وانجي نخطب ونقرا فاتحه وبعدها الفرح ساهل امتا مايعجبك ,
وفعلا سكر من الغتدورة وهو فرحان ومشا حكا لباته وباته فرح وقاله تم الا عويشه اتخزر وخلاص نش عاجبها الوضع لكن غصبن عنها ,,
وانجو لفهد اللي حكا لامه وهي تكرب في روحها عليه وتلوي في شوربها مرة توافق ومرة اتنق ,, المهم غهد سكر راسه وفعلا مشت ريم حكت مع رحمة علي موضوع خطبة فهد لهديل ورحمة رحبت بالموضوع بالذات بعد حكتلها هديل ,,
وبعد اسبوع روحت مناجي وهي نفسيتها احسن ووجيهه ناير ومر شهر اخرا وخطبو عيت عثمان هديل لفهد ولدهم ةاتفقو الفاتحه الكبيرة مع الفرح والتلبيسه قريب ,, وبعدها رافع خطيب رحاب حدد موعد عرسه عاد صبر الا واجد الراجل وفعلا بدت رحاب اتجهز ورحمة اتزر معاها للسوق والجدة قعدت مع رحمة وسيبت بسمة اللي تتصل براجلها واول مارن الخط فتح راجلها ,بسمة بلهفه : الووو وينك كنك معش جيتني شن في ?
راجلها : كنك اترني مش مليتي مني ومتحملة القهر اللي نا اندير فيه لكي ? خلاص ياستي هليك في حوش هلك اريحلك ولا لا ?
بسمة انكسرت وقالت بتجداي : معقوله حبيبي انهون عليك نا بسمة حبيبتك وعشرة عمر معاك تتحمل انعيش بلاي هالشهور هذين شن فيك حبيبي شة مغيرم عليا ,
وفجاءة اسمعت صوت بكا بيبي واعيونها قبل بلطن وقالت بلهفه : من يالاك ? وين قاعد احكي انت مع من ?
راجلها : سكري توا نا مش فاضي بعدين نحكيلك ,
وسمر في وجهها وهي عاودت اترن لقاته مقفل صبت فتحت الدولاب وطلعت عبايتها ووشاحها ولبستهن وخذت شنطتها فيها فلوس لها طبعا بعملها هي لكن لها فترة تاخذ في اجازات ,, وطلعت طبعا العزوز ماهي معاها ولا هي مدورة امها ,, وقعدت تمشي بسرعه ةوقفت تاكسي وطلع بيها للعنوان اللي عطاته له وقف التاكسي بعد وقت قدام فيلتها ولقت سيارة راجلها بره وقعدت اترن لان مغير قفل الباب وسكنت عالباب نين فتحلها راجلها ,وانصدم بعد شافها دفاته وخشت للسور ,
بسمة : كنك انت شن مغيرك ? وعليش مغير قفل الباب ? ,
راجلها : بسمة روحي توا وحنجيك وانفهمك ,
بسمة : لا نبي نفهم توا نا ,, وبعدين نا بعد حكيت معاك كان في صوت عيل صغير يبكي ! من معتك انت جوا ?
راجلها : بسمة اطلعي روحي توا مش وقت كلام ,
بسمة : مش وقت كلام ?
وخشت للحوش وراجلها لحقها واول ماخشت للصاله تنصدم بلعب الاطفال كور ودببه وقطار وسيارات ومشاي اطفال ورفعت راسها لقت وليه ماسكه وليد عمره 7 شهور في يدها وخايفه منها ,
بسمة بعصبيه : انتي من ? وشن اديري في حوشي ?
الوليه ياروحي خافت وكان باين عليها انها صغيرة وانيقة لابسة روب بيتي قصير ودايرة مكاج وشعرها قصير لكتافها وبيضا والعيون ملونه وخش راجل بسمة قال بعصبيه لبسمة : بسمة قالك روحي توا ,
بسمة مسكت في ياقة رقبته وقالتله : اتخون فيا ياكلب نا بسمة اتخوني ?? جايبه وليه بعيلها في حوشي ياخاااين يا حرايمي والله انفضح بيك ونقولها لهلك ,
راجلها غمتله منها ومن عصبيتها واعياطها وغرورها ودفها وقال : صكري فمك انا مش واحد حرايمي نا راجل صلاي ونخاف ربي وعمري ماندير الحرام ,
بسمة : وهذي من ياللي تصلي وماتخاف ربي جايبها في حوشي ولابستلك روب ?
راجلها : هذي مراااتي واللي في يدها ولدي ,ونا متجوز ليا سنة ونا عانيت فيك واجد لكن توا خلاااص معش نقدر نصبر عليك واناي زايرتتي نا المعيوب وتقولي فيها للكل حتي هلي ,, وااحمدالله تجوزت اخت صاحبي بنت محترمة حسها مايعلا علي حسي واسمع في الكلام وربي اكرمني وجابتلي ولد اللي يشيل اسمي ,وتوا حامل اخرا ,😠
بسمة بصدمة واعيونها دموع : وناااا?
راجلها : انتي معش تلزميني يابنت الناس وانتي السبب في طلاقي لكي انتي طالق بالثلاثه ,
ويغما عليها عمتكن بسمة وهابا ايرن رتجلها علي خوتها وجا عثمان والصديق وشالوها بعد فهمو منه اللي صار وقالوله حقوقها بس جيبهن لها وفعلا عطاها حقوقها وعاش مع مراته وولده اللي فعلا تريح معاها هكس بسمة ,, وتوا معش نقولو راجلها ولا 😁 قعد طليقها ,, المهم طلع فرح رحاب وزفها عريسها ةهو فرحان بيطير ومناجي طلعن تخبل بفستان زمري بلمعه طويل وبعد فترة تعبت وعاينها وسام طلعت حامل المنجوهه ووسام فرح وخاف عليها لانها تطايح ديما العطيبه ,, ورنت عليها امها في يوم ,
سارة : نوجا حبيبتي بنسألك اختك مسرة جايها عريس ,
مناجي بفرحة : ماشالله مبروك ,
سارة : مغير بنسالك عليه قبل ,
مناجي : ونا نعرفه ?
سارة : اها قيس ولد عمك شكلها تحكي معاه من فترة ويبو بعضهم وهو حا لبوها مع بوه الصديق وخطبوها شنو طبعه ويوتثق فيه ولا لا ?
مناجي بفرحة : ينعلي عاطيها وانتي مغنضه قيس عسل وراحل يعتمد عليه راه ,
وفعلا هدرزت مع امها وفرحت ان اختها بتقعد قريبه يالاها , ومعاويه خطب فداء ولبسها الدبله طبعا تلبيسه بسيطه وفرات تحرق , ومعاويه بيطير من الفرحه وفعلا اللي خطبو من العيلة ثلاث شباب ووسيم حكا لامه ان في بنت يبيها اخت صاحبه وغزلان طارت من الفرحه ومشو خطبوها وسريبنا لولي عاد ,
المهم الامور هانيه ومل بعد فترة حد يطلع فرحه في الاول قيس وبعدها فهد واخرهم معاويه ومناجي خشت شهرها وفي ليلة اتفرج عالتي في ووسام راقد حست بوجع بس فاتت وتامل في فوشار وتجي لقطه رعب واتعييييط بقو قوتها جابت تسام مصبي ,
وسام : كنك شن في ?
مناجي : ااااه جنبي جنبي ,
وسام شاف للتي في وشاف اللقطه وقاللها : نش قتلك فكينا من الرعب يانوجا عيب عليك ,
وجا جنبها ورقد
مناجي : نوض ياغالي انت بترقد ?
وسام : ورايا عمل بكره ارقدي نوجا ,
مناجي : وسام نوض شكلي بنولد ,
وسام : كل مرة اتقولي فيها ويقولو مازال , مغير انتي خايفه بس ,
مناجي زاد عليها الوجع وقعدت امية تنزل منها وخافت وعرفتها ولاده وقالت ببكا: عااااا نوض ياحيوان المية نزلت متي نوووض لنولد ينعلي ياحني ينعلي يابوي ومي ينعليا نااااااا 😭
وسام ناض منفجع وقعد ايزر في الدار مناجي اتعض في المخده واتقوله : خف روحك حرام عليم جيبلي العبايه ياراجل وانت مرخي ,😭
وسام : 😨
مناجي : واااااااك 😭
ووسام طلع يجري لامه خبرها جت تجري معاه ولقت مناجي في حاله ياروحي تتوجع ,
غزلان : بسم الله عليكي يابنتي هيا ساعدي روحك بنلبسك هيا لا تخافي ,
مناجي : عااااا بنمووووت ياعمتي 😭
غزلان : بعيد السو عليك غير هيا بلاش ذل وين نوجا القويه اللي ماتخافش هيا قولي يارب ,
وقعدت ادودش فيها ووسام متخزرط والتفتت عليه مناجي : جيب الشنطه والكتيب راك تنساهن فيش اتبحت تحرررررك 😭
وفعلا جاب الشنطه ولبس سباطه وركبوها في السيارة وعمتها معاها وشالوها لعياده خاصه وقعدت ساعه وهي في حاله وياما صار فيها بين تعصر ووجع ومرة اتعيط ونرة تطلب ربي ومرة تدعي ينعلي شعور ماتعرفه الا الام فقط 😖
ولعقبة لكل مشتاق ,, المهم ولدت المنجوهه وصار منها ام وطلعت الدكتورة علي وسام وعمتها ,
وسام : شنو يادكتورة ?
الدكتورو : الحمدالله علي سلامتها جابت وليد ايهبل وصحتها اكويسه ايتربى في عزكم ,
و غزلان اتركها بزغروته اقلبت العياده 😁
ووسام فرح وطلع جاب شوكلاطه وزعها عالممرضات والدكاترة كلهم ,
وباتت مناجي يومين برغم ان الدكتورة قالت تطلع ثاني يوم عادي بس وسام خاف عليها وطبعا ولده سموه نجم الدين علي جده وفرحت غزلان بالاسم ,, وروحت متاجي لحوشها واصرت غزلان تقعد عتدها وخطولها سرير في دار الضيوف وعليك فرحه مانحكيلكن علي رحمة والجده والبنات اللي جنها ورحاب حامل وفرحلوها واخت متاجي اتجيها من الصبح وتخدم فيها هي وهديل ورحاب ويروحن في الليل بحكم غزلان ماعندهاش بنات ,, ودارولها اسبوع كبير عزمو عليه الناس كلهم وبعد قريب ربعنت دارت لمة سمحه وبعد اللمة رنت عليها رحمة : نوجا تعالي لحوش حنك تبيك ضروري راه ,
وفعلا خذت اذن راجلها ومشت لحنها واول ماخشت لقتها راقده عالسرير وبسمة قاعده في الدار واتخزر وخلاص في مناجي وتستكرد فاتتها متاجي وعاطت ولدها لعمتها رحمة وقمعزت جنب حنها : حني كنك ? شن فيك ?
الحدة بوهن وصوت تاااغب : من ..من..مناااجي بنيتي الحنونه ,س..سام..سامحيني ..س..سام.. سامحيني
مناجي دموعها نزلن : مسامحتك ياحني مسامحتك من زمان 😢
الجدة : ن..نا درت.. ف..فيك واجد ..ل..لكن غ.غاليه عليا راك ,وم..ومانب..يش انم..وووت .. وانت..ي زعلانه م.مني .
مناجي : بعيد السو عليك ياحني ماتقوليش هكي 😭
وجا خليل والصديق وعثمان والعيلة ملتمة لان الحدة كانت تودع بالذات بعد قال الدكتور خلاص ترجا في رحمة ربي ,وفي لحظه توقف نفسها وهي اتبحت في مناجي فراقت الروح جسدها ومناجي انهارت تبكي ورحمة وكناين العزوز الا بسمة اللي لاويه وجهها وقارنه حواجبها وخلاص ,ودارو عزا الجده ومناجي تبكي من جد جدها حنها وربتها حتي بالقسوة لكن ماينسى العشرة الا قليل الاصل , وفاتن ايام العزا وكل حد روح علي حوشه ورحمة روحت لحوشها اخر وحده بعد هزبتا بسمة وبعد اربع شهور بالزبط جا واحد يخطب في بسمة شايب كبير وعنده وليتين ووافقت بسمة وعطوها خوتها بيفتمو من جلاطتها وحوش الجده تسكر ومناجي ياما صار فيها بالذات الحوش في شارعها وخليل اجوز ةليه كبيرة في السن مش ضانيه وزفها ليلة وحده وجابها لحوش هله بيتونس بيها اخر عمره ,, وباع الحوش اللي كان فيه وعاطه حقه لمناجي اللي شرت بيه حوش صغير واجراته فكرت في اختها اللي متجوزه في الجنوب ومهما كان لازم باتها ايكونله حوش يلقاه وعاشت مع وسام عالحلوة والمره وحملت اخرا وهالمرة بنوته قالتلها الدكتوره ,😍 وفرحت بطير وتوتا توتا خلصت الحدوته ,, واكيد الحياه فيها الزين وفيها الشين واللي اديره تلقاه سوا خير ولا شر وفي ناس مهما كانت قاسيه بس اتحبك وماتعرفش اتعبر عن حبها الا بالقسوة زي الجده الله يرحمها ,, وناس تخساب روحها اتحب من اول مرة وتلقا روحها اتحب من جديد زي قيس وهااااذي الدنيا انعيشوها كيف ماربي رايدلنا ,💚
وشكرا لكل متابعاااتي واسفة لو طولت عليكن ,, ونتلاقو في رواية جديده في العطلة بإذن الله ,
كاتبتكن هميلو ,, ❤
#Hamelo ✒
