رواية #مناجي_والنصيب
تعريف الشخصيات ،،
هالمرة بنحكيلكن علي بنت اسمها( مناجي) عمرها 22 متخرجة من معهد مهن شاملة وماحصلتش عمل من البخت ,, لا جرولها علي عمل ولا خلوها تجري علي حالها ,, المهم مناجي هذي بنت ملامحها عاديه بشرتها بيضا بس مش واجد واعيونها بنيات مش صغار ومش كبار بس جذابات ونقشها اكويس وشعرها لنص ظهرها مش ناعم واجد ومش حرش تقدرن اتقولت رطب بس بتلواي ,, لونه بني غامق فيه لمعه ,,وطولها متوسط ورقيقه لكن مش معظمة يعني جسمها انثوي جذاب بس مش باين من الهداميل اللي تلبس فيهن وديما متبهدله من الجري والضم في الحوش ,, خطرها ماقلتلكن مع من ساكنه ,,
عمتكن مناجي ساكنه مع عيت جدها هل باتها طبعا امها مطلقة من باتها بعد سنة من جوازهم وكانت نتيجة زواجهم الفاشل مناجي طايحت السعد ,, ومن البغدد والقهر اللي شافاته ام مناجي مع بات مناجي ماصدقت اطلقت وطبعا خذو منها مناجي وهي عطتها لهم مغير اطلق الحاج بجرده 😒
والضحيه اللي جت علي راسها ,, هي مناجي اللي خذوها عيت جدها وسموها علي ام باتها مناجي وياريت غير واخذه الغلا ,, خلني انعرفكن علي عيلة جدها هل باتها ,,
الجدة واسمها مناجي طبعا عزوز منجوها واااعرة عمرها قريب اتخش نهاية الثمانين ومازالت اتزر صاحه بكرعيها واسنونها وعندها ثلاث اولاد وبنتين ,, شايبها مات من زمان ,,من البغدد اكيد 😒
المهم اولادها هم (عثمان ) وعمره 55 متجوز من بنت خالته واسمها (ريم )وعنده منها ثلاث اولاد حتتعرفن عليهم مع الاحداث اثنين متجوزين والصغير مازال لانه طايش ونسونجي ,,
والعيل الثاني للعزوز مناجي هو (صديق ) وعمره 53 متجوز من بنت جيرانهم واسمها (عايشه ) وعنده منها ثلاث بنات وولد وهاضوم ساكنين بعيد في مدينة ثانيه وحتتعرفو علي بناته وعيلته مع الاحداث.,,
والثالث اللي هو بات مناجي واسمه (خليل) وعمره 50 طبعا متجوز من قبل ماياخذ ام مناجي يعني ام مناجي كانت الزوجة الثانيه ,, وطبعا مراته اسمها (مبسوطه) ومن عمر راجلها يعني عمرها 50 حتى هي وجايبتلا بنتين ووقفت معش ضنت السبب اللي خلا راجلها يتجوز عليها ام مناجي اللي كانت صغيرة في العمر كانت في ال 25 لما تجوزها وقعدت عنده سنة وحدة اللي جابت فيها بنتها مناجي وطلقت وخذت وجهها ,, وخلت وراها بنتها حتى الاسم ماسمتها ,, الشي اللي خلا العزوز الحرفه تشوخ واتسميها علي اسمها ,, بالرغم ان كل اعيالها ماحد مسمي عليها لان صباياهم مايبنش اسمها بحكم قديم واع وهكي 😏
وسمت بنت ولدها خليل اللي مالقت والي يقول لا ,, وسجلها باتها في الكتيب باسم مناجي ,, وطبعا مرت باتها مابتش اتربيها ولان امها سيبتها بعمر ثلاث شهور رضعتها عمتها اخت باتها وأسمها (رحمة ) وعمرها 48 كانت في الوقت هضكي دوبها والده ولدها الثاني ورضعتها لان مناجي مابتش ترضع صناعي فخذتها عمتها معاها لعند قعد عمرها اربع سنين بعدها خذتها حنها مناجي بعد عياط وشياط انها وحدها وشايبها مات واعيالها متجوزين وبناتها متجوزات ,,
