وهذي حلقة نزلتها بدري ,, مع اني زعلانة 😒
قراءة ممتعه ,,
رواية #مناجي_والنصيب
الحلقه /9
للكاتبه Gazala Bobacer Hamelo
وصلنا لعمتكن مناجي اللي خشت اتزر بعد شافت واحد شافها اترقص في المربوعه واندلشت علي رحاب اللي كانت تحكي مع خطيبها ,,
رحاب : كنك ? من يجري وراك ?😳
مناجي : ينعلي شافني ونا نرقص ,
رحاب : من ?
مناجي اعيونها دمعن والضحكة علي وجهها وعضت شاربها ووقفت تمسح عالخبطه اللي في خشمها من الطيحة وقالت : وسااااااام 😍
سامحني جماعة قيس خاب ظنكن 😂
المهم ,, اتشوفلها وقالت : وسام من ? وكيف خش عليك ?
مناجي فاقت لروحها ووقفت قمعزت عالسرير وحكتلها وبعد وصلت لعزقتها الصندل عليه سكتت وندبت عالساكت وقالت : حي عليا نا شن درت ? 😱
رحاب : شن درتي ? اااه شكلك قتلتي الراجل ? 😁
مناجي بصوت فيه نبرة تأنيب الضمير قالت : بعد شفته فجعني وكردت فعل عزقت فيه الصندل طب في وجه 😓
رحاب تضحك : وووك ينعلي مجرمة ,, الراجل اكيد انصدم وقال هذي مكلوبه 😂
مناجي بخيبت امل : عليك بخت يعني بعد شافني نضربه ,, هابا يارحاب هضا بنات شارعنا كلهن ميتات عليه واولهن نا 😍
رحاب بضحكة : اعترفي ياحنة شكلك اتحبيه 😉
مناجي : مش قصة حب بس الحق عاجبني ,, بس اللي مستغربته شن ايدير هنا 😕
عند وسام مقمعز في المربوعة وماسك جبهته ومبتسم خش عليه معاويه جايبله ثلج خذاه منه وحطه علي جبهته ,
معاويه باستغراب : مغير نبي نعرف كيف ازلقت بس ? وانت لابس سباط ?
وسام : فوت ياراجل عادي ,, تي باهي اللي ماشافني حد ,
معاويه : هههه خايف عالبرستيج ياطيري 😁
وسام وهو يضحك بعد خطر عليه مناجي وهي ترقص وبعد فجعها وعيطتها وضربتها له بالصندل قعد يضحك نين نزلن منه دموع ,, 😂 ومعاويه مستغرب فيه ووسام مسك روحه وقاله : هيا ياراجل ليل نوض نادي امي بنروحو ,, عشان ورايا شغل بكره ,
معاويه : مع ان مازال بدري يامان ,
وسام : بدري من عمرك ,, الحاجة من بدري ترن عليا ,
وفعلا خش معاويه كلم امه تنادي ام وسام طبعا الوليه اللي قلتلكن شافت مناجي وعجبتها وكانت في نهاية الخمسينات هذي ام وسام وطبعا قعدت ترجا في ولدها وخشت مع العزوز ورحمة لدار المعيشة بعد روحو المعازيم ,,وطبعا جارة الجده وصاحبة رحمة ,, واسمها (غزلان) وليه ملامحها جميلة وبشرتها بيضا وطيبة وعندها وسام ووسيم ولدين بس ربي رزقها بيهم حتتعرفن عليه لاقدام وسيم هضا ,, ✋ وراجلها مات من اخر خمس سنين ووسام متكفل بخوه وامه لعند تخرج خوه طبعا وسام عمره 29 خريج هندسة ميكانيكا وماحصلش عمل من الحكومة الزايطه فاول ماتخرج فتح عمله الخاص ودعمه بوه قبل مايتوفا براس مال بدا بيه مشروعه تعب في الاول لكن ربي وفقه وقعد ينجح في شغله وكان مثابر ومواظب ومصمم انه ينجح في مشروعه خصوصا بعد توفا بوه ,, مواصفاته شاب طويل وجسمه حلو وابيض البشرة وشعره ناعم وطويل وفيه غمازه في خده اليمين واعيونه سود ونقشه يجنن ياخياتي لا تعرفنه بقلاوة والا كنافه 😍 حاجة استغفر الله فتنه هكي 😂 المهم هضا وسام شاب جدي في معاملاته مع الكل ومحترم وبالرغم من جماله الا انه ماعمرش دار جو علاقات وحب لانه مقتنع ان اكيد ربي مخصصله صاحبة النصيب فما عليه الا انه يراجي النصيب عشان يجمعه بيها ,, وبالرغم من محاولات بعض بنات الحارة ايطيحنه ومرات في اللي ادزله رقمها ,,بس كان ديما ضارب الحوله ,,
هضا وسام ياحناتي 😁
المهم روح وسام بامه وطول الطريق يبتسم وسارح وامه قالتله : كنك ساكت حبيبي مش عادتك ?
وسام : لا شي مغير نفكر في حاجه هكي ,
غزلان :ماشالله عليك حفلة نظام ورقي في كل شي. وعمتك رحمة الضحكة في وجهها لكل ضيوفها ,, وهالبنات تبارك الله شايلات المناسبه والضحكة علي وجوهن ,
وعمكن وسام خطرت عليه مناجي وحب يستفسر امه ويتأكد لانه شك في اللي شافها ,
وسام : ماشالله ربي يكمللهم علي خير ,قتلك يمي عمتي رحمة عندها البنت هذي اللي انخطبت بس ?
غزلان : لالا عندها اثنين هذي الكبيرة ,,وتقدر اتقول ثلاثه مع مناجي بنت خليل ,,لانها مرضعتها ومربيتها وتقوللها امي ,,
وسام بذكاء : اها ,, مناجي اللي ساكنه مع حنها يالانا ?
امه : اها ,,هذي هي,, طيبك مناجي وعليك زول ولون ,, ماشالله عليها اليوم شفتها تبارك الله اسمح وحده في البنات شايلة الحفله علي راسها ,,
وسام : ايوا ,, انا مبدري بعد جيت بنروح بيك معاويه حلفلي انخش للمربوعه وكانو معاه شباب ونا سبقته لمحت وحده طلعت تجري من المربوعه ,
غزلان حست ان ولدها بيسال علي بنت معينه فقالت : ايوااا وشن شكلها ?
وسام : ماركزتش بس تهايالي لابسه حاجة كحلا هكي او ازرق مايل للكحلي,
ااه ياطحااان صار ماركزتش باهي ركزت عالصندل اللي جا في وسط جبهتك 😒 Hamelo
ماعلينا ,, انكملو 👇
غزلان : لابسه كحلي ?? هذي مناجي ياليد ,, مافيش وحدة لابسه لون غامق اليوم الا هي ,,ربي يحفظها والعقبة لها يجيها ولد الحلال اللي يهنيها 😊
طبعا امه تعزق في الدوة عليه وهو تأكد انها مناجي مش شبيهه لها ,, ووصلو للحوش وخشو وهو طول خش لداره ورقد عالسرير وقعد يذكر فيها وفي اللقطه وبعد يذكر الصندل يقعد يضحك ويتلمس في جبهته 😂
المهم خلنه عنكن هضا وانطبو لريم وولدها فهد 👇
ريم : ياليد اسمع مني خيرلك ,, البنت نعرفها خديمة وحرة وشاطرة وهابا كان ريتها اليوم اتقولي يمي اخطبيها ليا توا هض ,, خيرلك ,
فهد وهو متكي وايبربش في فونه : ينقنك فكيني منها الا هذي ,, وبعدين شن بتكون طبعا البنات في المناسبات يااما ايحطن من طبقات علي وجوهن ,, فوتيني مش شوري ,
ريم تنهدت من عناد ولدها وقالت : باهي في عقلك وحده تبيها ?
فعد : لااالا ,, مانبيش حد ولا في عقلي حد اصلا نا مش مجنون نين نجوز هكي نا مرتاح ,, عازب وعايش حياتي ,مش خير مانجيب وحدة ياتشتغل جيب وشيل ولا تقرا تبي ترسم مستقبلها عندي ,😏
ريم : ياولدي ريحيني الله يربحك.,,خوتك اجوزو وعندهم اعيال ونا خاطري انجوزك وتشوف اعويلتك ,,وبعدين يالهبل هذي بعد تجوزها لاخدمة ولا شي وبنت عمك اكيد مش حيشرطو عليك خبر واجد وجرب عيش معاها عجباتك باهي ماعحباتك طلقها ,
فهد مصدوم من امه وشافلها وقال :😳 انطلقها ? تواربعد ناخذها ولو ماعجبتنيش انطلقها مش الشي هضا يسبب مشاكل بين باتي وبين عمي ?
ريم :نش شورك انت قول موافق وساهل من هنا لعتد اتزفها ايجيب الله مية طريق 😒
فهد وقف وقال : نا نعسان ونبي نرقد ,, فكيني منه الموضوع هضا توا ,بكرة نوضيني بدري بنمشي للمزرعه مع باتي ,
ريم : مغير بكره امشي لحنك ودير روحك تبي تهدرز علي حنك وشوفها وبعدها ساهل والمزرعه خليها يوم ثاني,
فهد طلع وهو غامتله من سكنان امه وخش لداره وغير دبشه وخش سريره ورن فونه القيه رقم وحدة من اللي معلقهن بعلاقة من علاقاته ,, وقعد ايشلط معاها ,,
انجو لحوش ثاني وهو حوش الصديق وطبعا قيس مقمعز في المربوعه وايخمم وخش عليه باته القيه سارح ,
الصديق : قييس كنك ياولدي ? كنك متضايق ?
قيس طبعا يتحشم من باته بس قرر يحكيله : والله ياحاج انفكر في كلام امي ,, وعليش ماابيش اتوافق علي مناجي بنت عمي !
الصديق : ياولدي لا تفكر ولا تحط في بالك,, امك خليها علي جنب واهم شي انت ,, ومادام رايدها وتبيها هذي بنت عمك اتشيل همك وبيني وبينك نفكر اتي نحمي لامي وباتها وعندي لهم كلام ايخليهم ايوافقو ,
قيس : المهم ايوافقو ,, وبصراحة تفكر نشري شقة حتي اتكون عالعظمة ونبدا انكملها وبعد اذنك طبعا ,,مانبيش كلام صبايا ,, ايكون كلام رجاله ونقرو الفاتحه طول ,
اللي يسمعهم ايقول مناجي موافقه وهس ماتحيب علم من بصيرة 😒 Hamelo ,,
المهم الصديق طمن ولده وقيس قعد يحلم وفرحان ,,
انجو للغافلة عااد 😁👇
مناحي بعد روحت ام رسام خشت ادوشت ولبست توتا نازكه مورده وقمعزت اتجفف في شعرها بالمنشف وهي تذكر في وسام وهو ايشوفلها وفاتح فمه 😍 العطيبه عايشه في الاخلام ماتخساب في عرب يخططولها علي اكشن ,,
وهشت رحمة علي مناجي الضحكة شاقتها من وذن لوذن ,وهديل مع مؤيد في المطبخ ورحاب مع حنها اتهدرز عليها ,,اتحسنها طيبه البنت هذي ورقيقه بكل 😊
رحمة : نعيمن حبيبتي ,😊
مناجي : الله ينعم عليم يمي ,, ☺
رحمة : تعرفي في خبر بنحميه لكي ومن الفرحة مش مصدقه ,😃
مناجي شافتلا وقالت : انشالله خير فرحيني معاك ,😀
رحمة قمعزت عالسرير وقالت : اليوم في الحفلة تشدني عليك صبايا واجد ,
متاجي : عاادي يمي ديما عيت حنة ينشدن ويقصقصن ☺
رحمة : لا ياحنة هالمرة كلمني عليك ثلاث صبايا ,, ملا وحده مرت حسن جارتنا ماتت عليك بس الحق ولدها ربي يهديه متاع شرب ونشاكل وزعتها بدون مانجرحها ,
مناجي تضحك : هههه نعنجد الجو بكل غابو غابووو وكثرو عليا مرة وحده ,, باهي والاثنين لخرات من ? 😁
رحمة : ريم مرت عمك عثمان تبيك لفهد وبعد حكتلي قتلها انشالله خير شن رايك انتي ?
مناحي بصدمة : من من من ? فههههد ?? لالالالا الا هضا يمي فكيني منه هضا مازال طايش وصايع امتاع بنات ووجيج ,, سكري عليه بكل الموضوع هضا راه اسمعه حتي 😨
رحمة : والله يهبل فهد مغير امه مهيبته ريتي خوته متجوزين ومريحين صباياهم ,,
متاجي : لالا يمي ارجوك ,, خي عليا راه تسمعنا حني اتحرشي باتي ويعطوني له بالغصب ,,فكيني منه مانبيييش خد من العيله مليت منهم يايني ماتزعليش متي بس والله مليت تبي نطلع من العيلة خاطري ايجبتي خد براااني عيلة جديده وحياة جديده ,
رحمة ياستي في براني وامه مبدري كلمتني 😊
مناجي حست بقلبها بيوقف : باهييي? من ?
رحمة : عمتك غزلان مبدري تنشد ولمحت انك عاجبتها وقالتلي نرجا منها فون هاليومين ,
مناجي في لخظة انصدمت وقعدت اتشوف لعمتها بصدمة والفم مقتوح والعيون مفنصات ومش مستوعبه ,علي خشت هديل ,
رحمة لمناجي : جيجي كنك سكتي ? انتي يابنت ردي ,بسم الله مناااجي 😳
وعمتكن مناحي اتصكها عيطه وتقعد تحضن واتبوس في عمتها ورحمة انفجعت وهديل مستكه وتحضنها مناجي واتبوس فيهن واتنطر عالسرير ,
هديل : شن في كنها البنت اقريب تلصق في السقف شن صاير ?
رحمة : مش عارفه انا ....
وتقاطعها مناجي وتحضن هديل واتقول : انخطبت انخطبت 😃
هديل : ماشالله قيسه رحاب جرتها خضرة عليك 😁
رحمة : شن في ياجيجي توا قتلك علي جارتي ومرت عمك رفضتي وبعد حكيت علي ولد غزلان طرتي شن القصة ? 😒
مناجي احضنت عمتها وقالت : بصرااحة مش لشي لكن عاجبني من زمان وهو ماشالله عليه الحق وعمتي غزلان وليه طيبة واهم شي براااااني 😍
هديل : هههههه مجنونة ,, اصلا اعيال عمتي غزلان طروف مافيش وحدة بعقلها ترفضهم ,😁
رحمة : يعني انتي موافقه علي ولد غزلان بدون حتى مقابلة ?
مناجي قمعزت وقالو : هو صاح عاجبني واخلاقه معروفه والكل يشكر فيه ,, بس اعتقد النقابلة ضروريه حتي الشرع محلل فيها ,
هديل لامها : عندها حق ,, لازم تحكي معاه وتفهم منه اشروطه ويفهم شروطها ,
رحمة : انشالله خير ,, بعد اترن عليا عمتكن غزلان ساهل ,, وباهي رين ?
هديل : ريم من ?
مناجي : مرت خالك عثمان ,
هديل بصدمة : كنها ?
رحمة : كلمتني علي مناجي مبدري تبيها لفهد ,
هديل انصدمت وتوترت وقالت لمناجي : و.. وشن رايك ?
مناحي : انتي عبيطه ولا غبيه ولا تستعبطي ماتوا كنت موافقه علي وسام ?! تي فهد هضا خصلة ويسد ان امه ريم ,,لو انوافق عليه احتمال نرتمب في امه جريمة فكيني من سوها 😒
هديل وقفت وقالت : بالعمس فهد ماشالله عليه ,, مغير تفكيره فري واجد عن باقي خوته ,
رحمة : المهم ان مناحي رفضاته وامه حتمسك فيها شنو الراي توا ?
مناجي بتحذير : اهم شي ماتحكتش لحني راه ,,عند بنت اختها تبيعنا كلنا ,
وخشت رحاب لقتهن مجتمعات وقالت : شن في ?
رحمة صبت : نا تعبانه ونعست ونبي نرقد حيحكناك خواتك تصبحن علي خير ,
البنات : وانتي من اهل الخير ,
رحاب : هااااا احكن شن في ?
وبدت مناجي تحكيلها ورحاب فرحت لمناجي ,,
وقالت : حييي خطرها حتي خال رافع بيخطبك وشكلك عجبتيه يابنت وقال لرافع احكي لخطيبتك اللي هي نا طبعا نقنعك عشان تعاودي اتفمري من جديد ,
مناجي : كيييف ? البارد هضا مازال مصدق روحه قيسه ,, فكيني منه ,,تا هلاااص الامل بان بعد عمتي غزلان حكت لامي عليا فاكيد معش انشوف حد الا وسوووومي ياخياتي بنهبل عليه 😍
هديل : هههههههه اما انتي حاله غريبة العرسان جوك حية وحدة 😁
رحاب : سبحان الله يايجو مع بعضهم يايريحو مع بعضهم 😂
مناجي : هههههه من قال ام وسيم الحارة تحكي عليا نا 😍
وقعدن البنات يهدرزن والليل مارقدن وهن كل وحده تحلم بشخص في حياتها ,,
المهم ثاني يوم بعد الغدا روحت مناجي وحنها للحوش وطبعا قيس هو اللي روح بيهن هالمرة معاويه تريح من التقطمير 😁 وقيس معدل مرليات السيارة علي مناجي اللي اتفرجمن روشن السيارة والضحكة علي وجهها وقيس حنه تخرط معاه وهو مش معاها بكككل ,, ورصلن وخشت مناحي وحنها ايدودش فيها قيس ومسكاته العزوز يهدرز معاهن ويشرب قهوة العشيه معاهن وماصدق العطيب وطبعا وسام كان قدام حوشهم وشافهم وكان معاه واحد من اصحابه ,,
المهم روتين معتاد تنكيت وضم لمناجي للقطرة وعالعصر طيبت القهوة وقيس مغير هي قعدته ماشافهاش واجد بحكم اتزر نرة في النربوعه ومرة في الحمامات حشاكن اثتنظف واتسيق وماحا المغرب الا وهي مكمله ,, ونصبت العشا وقيس روح ومرن ثلاث ايام ومناجي علي اعصابها وحنها تنق علي راسها جيبي هيتي وتعارك فيها ,
متاحي لحنها : ياوليه خطيني كرهتيني حياتي 😒
حنها : كرهك جلدك ,, سقدي روحك جيبي الدواء رقيتي عليا الضغط 😒
مناجي جابتلها الدواء وهمست : نا اللي رقالي الضغط والبغدد من العيشة الزفت معاك ,😬
ومدتلها المية ,, وحنها قالت : ديري العشاء عيش علي حليب اليوم خاطري فيه 😒
مناجي : حاااضر حاجة ثانيه ? 😒
الجده : توا لا ,, كانشي بعدين 😒
المهم ناقر ونقير مع حنها نين اذن المغرب صلاته مناجي وخشت للمطبخ اعجنت العجينه وبدت اطبخ واتقرض الضرايب للمقطع ورن فونها ردت لقتها عمتها ,
مناجي : خير يمي كيف حالكم ?
رحمة : الحمدالله يمي شخبارك انتي وامي ?
مناجي : الحمدالله قاعده اتهارج من صبح ربي اليوم مش عارفه كنها ?
رحمة : الله غالب ياحبيبتي تحمليها حنك ولية كبيرة ,
مناجي : متحملتها والله لكن مليت يمي انخس في حياتي مالهاش طعمه نفس الروتين لا هدف ولا جديد ,
رحمة : هانت يمي خلاص اليوم كلمتني عمتك غزلان ,
مناجي بلهفه : وشن قالتلك ?
رحمة : قالت بتجي وتعطي فيك كلمة ,
مناجي بصدمة : يعني وسام موافق?
رحمة : اكيد يالهبلة مادام بتجينا الوليه ,, المهم هي بتجينا بكرة راه نبيك سلم بنتي تبرمي عالحوش والحلويات والموالح حنحيبهن معايا عندي حفاظات ملايا ,
واتفقن ومناجي الفرحة بطربقها اطربيق 😁 وكنلت الغشا وهي اتغني وسعيده وحطت لحنها وقالت : تفضلي ياحني اهو عشاك ,
حنها : الله يربحك ,, وين الرب ?
مناحي : يي انسيته قاعد عالرخامه ساع انجيبه ,
ومشت جاباته لها ,رطبعا متاجي ماتخبش تامل العيش عالحليب دارت نص دحي وهريسه وصبت عصير ,,
المهم وقت النوم متاجي ماجاها نوم وهي تخمم وافكر والفرحة طيرت النوم من عيونها وترجا في يوم بكره علي نااااار ,,وجا صبح ثاني يوم نلضت عالسبعه جهزت الفطور لحنها وبدت في الحوش تسييق وتنشيف وفرشت الحوش وطيبت الغدا وقعدت ادور في دولابها شن تلبس في العشية علي خشت عمتها رحمة والبنات و...........
توقعاتكن مليشيا 😁 اهو ليا يومين انزل بدري 😉
وزعنا من اللي فيه النصيب وياخذ مناجي والا التصيب عنده خطة ثانيه يستر الله ,,
#Hamelo ✒
