رواية #مناجي_والنصيب
الحلقه /11
طبعا وصلنا لعتد مناجي لبست عبايتها وخذت فلوس من حنها وتبي تطلع للدكان وحطت وشاحها عالسريع وطلعت من الحوش وهي قارنة حواجبها وغامتلها ,, واتشوفلكن الغندور 😍 وفكرت اتمايل وادير جو انوثه وبرستيج بعدها أذكرت طيحتها اللي تكردمت قدامه غيرت رايها ومشت عادي ووسام لابس هذكي اللبسه اللي ادوخ 😍 والمرايات علي عيونه والشعر اللي تهبهب فيه الريح ينعليا ,,😍 ومناجي القليب يردح جوا مرة يشطح ومرة يدلف ومرة يرعش نين الرعشه اركبتها ,, وهي ماشيه رفعت عينها جت في عيونه وهو ابتسملها هذكي البسمة نين غمازته بانت ومناجي لروحها (ينعلي نا شن ايطلع فيا نا توا ? بنسيييح ياخياتي ,, 😍)
هابا وكان زفك شن ايصير فيك ياحنه 😁 رواية مناجي والنصيب Gazala Bobacer ,المهم
مناجي طلعت عالطريق ووسام اعيونه معاها واستغرب وين ماشيه فلحقها ,, وهي وصلت للمحل وكانو في شباب مقمعزين قدام المحل واحد منهم شكله متاع مشاكل وشاف لمناجي بنظرة اعجاب وخشت مناجي للمحل وخذت كم حاجة تبيها شامبو علي صابون وحاجات ناقصاتها وجت بتخلص حقهن الشاب خش وصبا عالراجل اللي يبيع وكان سوداني ,,
الشاب : خليها علينا هالمرة ياسمحه 😉
مناجي بنظرة غل: كذا حول الله يرحم والديك مش ناقصتك راه ,😒
الشاب قرب وشافلها وهو يضحك :هههههه مغير بالشويه بس وسعي بالك معايا وخليها شوري ,
ومناجي : لا شكرا ,,
ومدت الفلوس للسوداني :تفضل ,
والسوداني خذاهن وبيردلها الباقي ,
الشاب للسوداني : احميدا ردلها الفلوس قتلك شوري ,
مناجي بصوت عالي : ونا قتلك شكرا ,, ممكن بلاش جو زايد 😒
وخش وسام ولاحظ التوتر اللي بان علي مناجي ,ودار روحه يشري في حاجات خذا شوكلاطات وعصاير وبشاكيط ,, ومن تحت لتحت اعيونه علي مناجي ,
السوداني بيمد باقي الفلوس لمناجي خذاهن الشاب ,
السوداني : مهليش ياشاب هات فلوس البنيه 😐
الشاب : مش شورك يااحميدا خلي بيني وبينها ,
مناجي عصبت والبوري قريب يبان مغير ماسكه روحها قدام وسام ماتبيه يشهد عاللسان 😁
مناجي : هيت الفلوس وفكني من سوك احسنلك ,
الشاب برفعت حاجب : وشن بديري ?
مناجي اتلم في الشكاير وقررت تطلع ,, الشاب عرضلها وقال : باهي رقمك بس ,
مناجي : ابعد عن طريقي لو سمحت ,😡
الشاب : باهي فلوسك بتسيبيهن ? 😁
مناجي : خليهن لروحك صدقة ,😏
السوداني للشاب : يا همد خلي البنيه في هالها ,, وردلها الفلوس ,عيييب كدا 😐
الشاب : مش شورك يازول اطلع منها ,,
ومناجي طلعت والشاب مسك شكايرها وهي تمسك عصا الكناسه اللي في المحل و بدون وعي وشلفااااط علي يد الشاب نيين عيط وطلق شكايرها ,
وتمحطه بوحده ثانيه علي افخاذه نين تباعد ومناجي خلااص هي من قبل طلعت متضاايقه وزاد عليها هالبغدد. يستاهل ,,
مناجي : انت واحد قليل ادب وتبي تربايه ياحيوان ,, قتلك من الاول فكني من سوووك ,
وشلفط ,,امحطاته والشاب عيط ,: ااااه يامكلوبه 😨
مناجي : وهي رافعه العصا عليه : جيب الفلوس ياقرد جيييب ,😠
وعطاها الفلوس ,
الشاب : هاكي الزف شكلي طحت في مكلوبه ,
مناجي بعصبية : مكلوبه عينك ,, هيت ولو تعاودها مرة ثانيه والله انكسرك تكسير , هضا ماناقص 😒
واعزقت عليه العصا وطلعت ونست اللي يشوفلها باعجاب ,,
السوداني باعجاب : والله تستاهل ياهمد اقولك سيب البنيه وانت شي زي اللوصقه ,, 😒 والله قدعه البنت دي😁
تحية لكل وحدة تكلمت بالسوداني 😁😂
رواية مناجي والنصيب ل Gazala Bobacer ,,
وزرقت 💃 مش وقتي ولا ? ماعلينا 👇
وطبعا تمشي وهي راقيلها وبعدها اذكرت وسام فنصت بعدها زعلت وقالت لروحها : ياااعليك بخت مغبر ,,لازم يشهد علي فضايح الساني من قبل مانطب عنده ,, انشالله غير مايغير رايه ولا انصدم ,,اخخخخ يامناجي حبكت تطلعي اليوم 😤
وتسمعلكن رجاله ايحزو واصواتهم عاليه التفتت وتشوف شباب اللي قدام المحل اطلعو يجارو من المحل والشاب اللي كان يضايق فيها انعزق من جوا وهي وقفت وقعدت مستغربه وتشوفلكن وسام طلع من المحل ويمشي بشخصيه مهيبه والشعر داير جو معاه ,,😍 والبدي لاصق عليه وشكله راكلكن الشاب بونيات مورملا اعويناته 😁 ومناجي في حالة صدمة من الموقف ومن وسام في حد ذاته وبعدها اضحكت والسنون تاقن والعيون قلوب وقالت : نجك ليا ايجنننننن 😍
بعدها افطنت لروحها في الشارع سكرت فمها لكن مازلت مصبيه واتشوف لوسام اللي ماخلا في الشاب عظمة ملايمة علي بعضها ,, وبعد كمل منه شاف لمناجي القيها مصبيه وتشوفلا باعجاب والبسمة علي شفايفه خذا الحاجات اللي شاريهن و مشا ناحيتها وهي تحساب روحها تحلم وبعد وقف قدامها مدلها الشكاير ,
وسام : مناجي للحوش طوووول ومعش تطلعي مرة ثانيه فااهمة.
مناحي : هااا 😍
وسام : خوذي الشكاير وروحي يابنت خيرلك ,😬
مناجي فطنت لروحها وتلبكت في الدوة والوجه انحمر علي انصفر وانزرق ولفت بتمشي نادها وسام ,
وسام : هييي تعالي هن ,
مناجي : نعم ?
وسام : خوذي الشكاير ودغري للحوش فاااهمة ,
مناحي بضحكة حلوة : حاضر ,
وخذت الشكاير وهي مرتبكه وماحتى فطنت شن خذت تحسابهن شكايرها ,,مريوحه بكل البنت ماتوا دايرتلي روحها لبوة وركت الراجل طريحة ,, 😂
ماعلينا وقعدت تمشي بسرعه وبعد وصلت لباب الحوش فتحاته وبتخش التفتت بتشوف وسام لقاته ايشوفلها ببسمة علي وجه وهي مدت رجلها وهي سارحه فيه وتلتقط كالعاااده 🙆 وتشلبخ علي وجهها وصبت بسرعه اتلم باقي الكرامة والبرستيج اللي ديما مترهند قدام وسام 😁
وخشت وطبقت الباب بقوة وعمكن وسام ضحك عليها نين وجه انحمر ,,😂 وقال لروحه ( مجنونه البنت 😂,,بس اتخش الخاطر وكلها عفويه وبراءة 😍)
وركب في سيارته وولعها وطلع لشغله بحكم شغله خاص ,, والا نسيتن ? ماعلينا ,✋
المهم انجو لخليل اللي لبس وطلع من حوشه هو والثعلب اللي معاه قصدي مراته ,, وركب سيارته وهي قمعزت جنبه ومشو لحوش امه ,, وبعد وصلو رن الجرس وفتحتله مناجي وانصدمت بعد شافت باتها وغمتلها بعد شافت الثعلب قصدي مرت باتها ,, وسلمت عليهم وخشو عالجده اللي سلمت عليهم وخليل قمعز جنب امه عالسرير ,ومبسوطه اتخزر في مناجي اللي اطبق في دبش حنها واتحط فيه في الدولاب ,,
الجدة : وينك ياخليل غايب كل هالفترة هذي لا تقول عندي ام ولا تنشد عليا ولا علي بنتك ? 😒
خليل بكسرة : الله غالب يمي ,, ظروف وقلت فضوة ,😔
الجدة : ظروف شنو اللي ايخلنك ماتنشد ? حتي بالمعطوب هضا اللي يكلمو بيه ماتتصل 😒
مبسوطة ادخلت : والله ياعمتي الايام اللي فاتن ظروف وشغل ,, وبعدها نا مرضت وقعدنا لاهيين 😏
مناجي في سرها ( انشالله بطلعت روحك ياثعلب 😒)
هالمرة مناجي اللي قالتها مش نا 😁 Hamelo ,,
الجدة : وانتي عليش زارقه في النص نا ننشد في ولدي مش انتي ,! تمرضي والا تموتي مايهمنيش ,المفروض اولدي ايجيني وينشد ويبرم عليا وعلي بنته ,, والا كيف قولك ? 😒
مبسوطه غمتلها ولوت شوربها ,😏
خليل : خلاص معش بنغيب عليكن وانشالله نقعد ديما نبرم عليكن
مناجي : شن تحب تشرب قهوة ولا شاهي ?
خليل التفت عليها وقاللها : قهوة ساده سلم بنتي ,
ومش عارفه ليش مناجي حنت لباتها ولكلمة باتي ,, وابتسمت وقالتله : حاضر ,
وصبت اطلعت ولا عبرت اللي تخزر فيهم ,
وطيبت قهوة وجابتها لهم بعد ربع ساعه رن الجرس وطلعت مناجي تفتح لقاته عمها الصديق وولده قيس وخشو وتفاجئو بخليل وسلمو ورحبو ,,
المهم مناجي حست ان جيتهم مش ابلاش ,, ودعت ربي يسترها ,,
انجو لوسام ,, بعد روح من مشواره اتصل علي عمه وخبره انه يبيه في موضوع وقاله بكره تعالي ,,
غزلان وهي اتجيب في قهوة لولدها : ها ياباتي شن صار معاك ?
وسام خذا منها الصفرة وحطها عالطاوله ,وقال : تسلم ايديك ياست الكل ,
غزلان : الله يسلمك صحتين , ها طمني !
وسام : كلمت خالي مبدري وقالي نتلاقو عند عمك وعمي اتصلت بيه وحكيتله ووافق وقال انتلاقو ,,بعد ننشو لعمي حنحميلهم ونتفقو علي يوم نمشو لعمي خليل وايتمو معاه الكلام ,
غزلان بفرحة : علي خير يارب ,
وسام: يارب ,,وين وسيم مش مبين ?
غزلان : طلع للنادي مع اصحابه وقال عالمغرب ايروح ,
وقعدو ايهدرزو وايخططو ,, ادعولهم جماعة وسام 😂
انجو لفهد جاي هو وباته وامه لحوش حنه وغامتلا ماحتى يبي الجيه وساكن ايرن علي رقم وحدة كانت اتكلم فيه بس فاتاته بعد حكالها ان امه تبيلا بنت عمه وهو مايبيهاش ,, وايدز في رسايل عالرقم ,,ويتنهد بغل ,, ووصلو ورنو الجرس بس هالمرة فتح قيس عاد 😁 وسلمو وخشو والكل ملتم في دار العزوز ومناجي بعد عرفت بجيتهم وهي توترت والقلب يرجف وخشت اتزر لدارها ومن ذهاب الشيرة التيشرت متاع التوتا يعلق في الباب وهي عاد عالقتلها اتقول النعامة اللي تزر في الرسوم اللي يجري في جرتها الذيب كان تعرفنها 😁 والتيشرت اعلق وتكردمت علي راسها وظهرها والتوتا تمرمدت ,, وفكتها وهي اتعارك في جنون راسها ,
مناحي : يووووه حتي انت اطلق امي توا 😡
وخذت فونها وقعدت اترن علي عمتها رحمة وهي تخبط علي خدودها واول مافتحت عمتها ,
مناجي بصوت قريب للبكا : يميي ? الحقيني 😢
رحمة : كنك يابنتي شن في امي فيها شي ?
مناجي بخوف : اي امك حتي انتي قاعده مطنبرة اتقول صل في الدار الحقيني نا 😵
رحمة : كنك يابنتي شغلتيني 😳
مناجي : جماعة الناتو مجتمعين 😭
رحمة : كيييف ?
مناجي : يمي صحصحي معايا الله يربحك مش وقت غبونه راه ,, خوتك ملتمين حتي باتي خليل ومعاه الثعلب مراته ومرت عمي الصديق وعمي عمثان ومراته ومعاهم اللي اسمه فهد ,,. لمتهم مش عاجبتني😟
رحمة : حكو شي لباتك ?
مناجي : مش عارفه بس اللي اسمه قيس يشوفلي بنظرات هكي مافهمتهنش ,, قلبي مش مطمن 😭
رحمة : خلاص انتي اسكتي وبلاش شهدرة ونا تو انحاول انطب عندكم ماتخافيش ,
وطمنتها وسكرت منها ومناجي سقمت وشاحها وطلعت للمطبخ وخشت حطت الشاهي عالنار وطلعت حفاظة البيتزا من الفريزر بتسخنها لهم مع الشاهي وهي تررجف وخايفه ايخربو عليها خطبت وسام ,, وتدعي لربها يجبر بخاطرها ,,وفي اللحظة هذي رن فونها لقاته رقم ......
مناجي ,: 😱
توقعاتكن وعلي فكرة مش طويلة الروايه اصلا ,,فوسعن بالكن 😊
#Hamelo 💚
