السلام عليكم ,, اولا سامحني عالتاخير اللي انجبرت عليه والله ,, مرضت يومين نحساب روحي الا انودع يعني سيبت الشتاء الطويل العريض ومرضت في الربيع خبر ماتعرفله راس من رجلين 😑 المهم وين تنعوشت اشوي وقلت هاا بنكتبلكن الحلقه نلقا الرصيد بح كمل ومن بختي وبختكن المحلات اللي يالاي مايبعنش في رصيد الواي ماكس فأظطريت نرجا الغندور اللي باله اوسع من سروال مسعود جار عيت جدي الدبة 😒 وجاني اليوم بقدرت قادر ونسقتها لكن واهو نزلتها وياريت تعذرني نا زعلت من روحي عشان قصرت في التنزيل ,, اسفة عالاطاله ونخليكن مع الروايه ,,قراءة ممتعة. 😁
رواية #مناجي_والنصيب
الحلقه /17
وصلنا في الحلقه اللي فاتت لعند الجدة طلبت من مناجي تلحقها لدارها وفعلا مشت معاها مناجي واول ماقمعزت العزوز عالسرير قالت لمناجي : افتحي الدولاب وفتشي تحت الدبش والقفاطين هذين تلقي صندوق قهوي جيبيه جاي ,
وفتشت مناجي ولقت الصندوق ومداته لها ومناجي كانت ديما تشوف فيه الصندوق لكن لانه مقفل بالمفتاح ماعمرهاش دورت ,, وطلعت الجده مفتاح صغير معلقته معاها في دبشها من جوا وفتحت الصندوق ومناجي مازالت مش فاهمة شي وطلعت الجده صور ومدتهن لمناجي اللي قعدت اتفرج عليهن وفي كل صورة كانت اتشوف في ولية صغيرة في العمر يوم زواجها باين عليها الحزن وجنبها خليل وطول عرفت ان هذي امها خاصة ان فيها شبه كبير بينها وبين مناجي نفس العيون ونفس الشعر والبشرة ومناجي اعيونها رقرقن والصورة اللي بعدها شافتهم زي اللي كانو في زرده وخليل بين مبسوطه وسارة باين عليها الحزن وكانت حامل وعمكن خليل الضحكة من وذن لوذن والصورة اللي بعدها شافتها في حضنها بيبي ورغم حزن سارة كانت في ابتسامة خفيفه علي شفايفها ,,
مناجي : هذي ,,,هذي ,,!
الجدة : هذي امك سارة , نبي نحكيلك علي امك يامناجي ونريدك تفهمي كلامي زييين
مناجي : 😢
الجدة : زمان باتك خليل طول وماتجوز وبعد اجوز خذا مبسوطة رواده من خوها وطلعنا الفرح وسكن جنبي زمان في حوش عربي ليا صينه وزوقه وجاب فيه كم حاجة وسكنو فيه ,, لكن مبسوطه ماكانتش مريحته وليه السانها طويل وهرجتها وااجدة وكان ديما ايتعارك معاها وحملت عمتك مبسوطه وجابت بنتها الكبيرة وخليل فرح ونشهد بالله نا كنت انريدلا ولد ,,وبعد سنة حملت ابنتها الثانيه نجلاء وبعدها لا عاد شالت ولا حطت وباتك قعد في خاطره عيل ,وبعد قريب 34 سنة خليل ماتريح مع المنجوهه عرايك وهرجه وتوصل بيناتهم للضرب وتحرج عند هلها ومايرد فيها ولايدور فيها ,
مناجي : وانتي ! ليش ماحليتي مشاكلهم ليش مادخلتي بيناتهم ,وانتي الكبيرة وكلمتك مسموعه?
الجده : اللي ماوريه عقله لا وريه كبير ولا صغير ,, المهم نا ياما نصحت فيها مبسوطه وعاركت خليل لاكن كان باين عليه ماهو طايقها ولا يريد اردودها ,, المهم مشا لواحد رفيقه له زمان ماشافه في مدينة بعيده وقعد عنده اسبوع وبعد روح قالي بنجوز وراني خطبت وحدة هي اللي نبيها ومتمنيها من زمان ,
مناجي : كيف !?
الجده : اصبري بس ,, المهم عاركت وهارجت قتله بعيد وكيف وكلم خوته والصديق وعثمان مشو معاه وقرو فاتحتها وبعد روحو قالو يوم واحد عند العرب وانزفو مرت خليل ,, وطبعا مبسوطه لما اعلمت اباتك قرا فاتحة جت تجري وقعدت في الحوش العربي اللي يالاي ومعاها بناتها وخليل ومراته بعد وصلو عطاهن عثمان حوشه اسبوع عشان ايتعرسو فيه ومايضايقهم حد وعايشه واعويلتها قعدو معايا ونا قتلهم ايجهزولا دار من هالديار وايجيبها معاي وخلاص ,,
مناجي : قصدك امي سكنت معاك ?
*هابا قيسه اللي شفاته مناجي شافته امها وهضا اللي خطر ببال مناجي Hamelo ,,+
الجدة : ايوا سكنت معاي ,
مناجي : ينعلي عرفت عليش هجت خلاص ,😓
الجدة : بلاش حناطه خيرلك راهو نسكت 😒
مناجي : لالا خلاص كملي ولو اني عارفه السبب 😑
الجدة : وبعد اسبوع روح خليل وامك واول ماجت سلمت عليا وكان باين عليها صغيرة وسمحه وهاديه وخشو لدارهم وفي الليل درنا عشا عشان العرسان وطيبت عايشه مرت الصديق رز بالتقليه علي لحم وطني وهالمشاريب وكانو عمامك ملمتمين والجيران الا مبسوطه عاد مازالت زعلانة وماخشت علينا ,, ونا حكيت لباتك وقتله مبسوطه ردت وقاعده في حوشها وهو مادورها بككككل ,,
المهم الحق امك كانت ماتفتح فمها بحاجة مفيت تصبح عليا الصبح وكان حد نشدها اتجاوب خاطيها ساكته وفي حالها وماعمرها ردت عليا وخليل كان فرحان بيها ماتقول عمره اجوز ولا عرف وليه الا هي ,, وهالشي ماكنش ايسر في مرت بوك طبعا ,
مناجي بغل : شن دارتلها وجه الضبع ياحني 😬
الجدة : بعد خليل معاد دورها قعدت اتجي لعندي وتغدا واتعشا واتروح في الليل وكانت ادور في سبلة علي سارة اللي ماكنتش اترد ولا تحكي , ومبسوطه بخبثها قعدت اتزن عليا ان امك دايرة سحر لباتك عشان امسيبها ومايبحت فيها ,وكانت ادير في مكايد لامك وتطلع مبسوطه منها وكنت انهزب في امك ونعارك فيها وهي الشهادة لله مفيت قولت والله مادرت حاجة ماتزيد في حاجه, ومبسوطه زادت في المشاكل بينها وبين ساره لدرجه عيطت بحقها الشرعي في خليل عيني عينك قدامي وقدام عمك عثمان لاحشم ولاجعرة ,
مناجي : سخسخ وجه الكشايف 💦😒
الجدة : وعمك عثمان قاله مادام مازال علي ذمتك اعدل بين صباياك وفعلا بدا باتك يبات كل ليلة عند وحدة ونا الحق كنت لا طايقة مبسوطه ولا امك قابيتني كنت نبيله بنت خوي زمان قبل مايعطوها ,, وكنت دايرة راسي براس امك وضرتها ,لكن مبسوطه كانت في حوشها يعني قليل وين انهارجها لكن الكيد كله كان من حظ امك ,
مناجي بزعل : حرام عليك ياحني ,,عليش درتي فيها هكي 😢
الجدة : الله غالب هضا طبعي معاهن كلهن حتى مع عايشه مرت عثمان وريم مرت الصديق لكن الحق ريم قابيتها روادتي نا وبنيت خيتي فرحت بيها وااجد بالذات بعد الصديق كان يبي وحدة وماصارش منها ,, علي طول خطبتلا بنت خالته وهو وافق ,
مناجي : يعني ياياخذو صبايا يقربلك ياتقهري صباياهم ?! اما انتي ياحني ,, اخخخ شن بنقول بس 😤
الجدة : فكيني من وكال الشوارب واسمعي الكلام راهو نسكت ,😏
مناجي : لا دخيلتك احكي ياحنة ,😒
وكملت الجدة وقالا : المهم امك حملت علي طول يافرحة مابعدها فرحة افرحها باتك بيها وقعد امدللها غير ويش تبي وهي كانت مريحته لا تزن علي راسه كيف لخرا ولا تهارج فيه حتي بعد ايجي معصب ماتبا تحكي معاه وهضا الشي زاد محبة باتك لها ,, ونار الغيرة زادت عند مرت بوك ,, والحق امك ماعندها كثرت طلبات لكن مرة توحمت علي اسنفنز ونا المطبخ سيبته من يوم كبرت ضناي وباتك بعد علمها طلب مني وقتله ناسيته لي زمان عليه ومشا طلب من مبسوطه في الاول رفضت لكن بعدها في العشية خشت علينا بيه صونية معبية وامك فرحت بيها وشكرتها وطيبت شاهي وجابته لنا وكلينا في هذكي العشية وخليل كان في عرس رفيق له وجا في الليل القي امك تبكي وعلمها ضايق وتعاركت معاه وهذي اول مرة اتصير بيناتهم ,
مناجي : عليش كانت تبكي ?
الجده : علمي علمك اللي عرفته انها تبي تطلق وخلاص وخليل قعد ايساير فيها قال مرات من الوحم والحمل وامك زادت في العناد وقعدت مشاكل مع باتك ورنت علي خوها الكبير وقالتله ايجي ايروح بيها وهو رفض وقاللها ماعندنا بنات يطلقن وتسكت وتريح روحها ,, ونا بعد عملها مع ولدي زدت كرهتها ونزلت عليها بالكيد تخدم واطيب واتضم وحتي بعد اتجي عايشة وريم مانبيهن يساعدنها ومبسوطه قعدت تكسب في خليل واتنفذ في طلباته وامريحته ,, وياما جرت عالضنو عند طبيبات العرب مغير ماحصلت وبعد عاينت عند دكتورة طلع عندها الغدة اللي تمنع الحمل وياما صار فيها لا علاج انفع معاها ولاشي 😐
مناجي باستغراب : ونا نقول اعيونها بالطات اتقول فنارات قلع دايرة حادث ويديها ايتراعشن ديما 😕
الجدة : وامك قعدت فترة حملها مشاكل واعياطات وخلاص نين جا وقت ولادتها وباتك شالها للسبيتار وجاباتك وفرح بيك باتك ماتقول عنده بنات قبلك ومازلتي ماسبعتي طاحت امك ومرضت وشالوها للدكتور قال عندها فقر دم ومسكوها في السبيتار ونا في الوقت هضكي كنت مع بنتي رحمة كانت دوبها والده معاويه وقاعدة في حوشها واول فرحة لبنت ليا ومشيت قعدت معاها وباتك مشا جاب عمتك بسمة عشان تقعد مع امك ,
مناجي : كيف امي ماعندهاش خوات ولا هل والا شنو ?
الجدة تنهدت وشافت لمناجي وقالت : اللي علمته ان امك قزونة بوها وامها متوفيين وكانت عايشة مع خوها الكبير وحنه ام امه ولا عندها اخت ولا حد ,وقالي خليل ان حن خوها ربتها وحنت فيها كيف ولد بنتها لكن خو امك كان واعر وبالذات بعد اجوز مراته ماريحتها وبعد جاه باتك وشافها طلبها منه وهو ماصدق عطاها بمهر ربع جنيه وجابت شنطت دبشها وجت ,
مناجي : معقوله في خو ايدير في اخته هكي ويعزقها لاول واحد وبربع جنيه ? لهدرجة كان حظها عطيب في هلها وفي هل راجلها ولا اخرا جت علي ضرة ومش اي ضرة مبسوطة الثعلب 😢
الجدة : الله غالب هضا نصيبها لكن اللي انتي مش عارفته انها بعد طلعت من السبيتار وجت قعدت هنا بسمة تعبتها اتعارك فيها واتهزب وباتك تغير عليها ماتقول الراجل اللي كان يحلف براسها ونا كنت انشوف في المعامله وساكته لا دافعت عليها ولا عاونتها وكانت ماتعرفش اتعارك و الوحيدة الاي كانت حنونه فيها هي عمتك رحمة ادافع عليها واتود فيها حتي بعد جابت جت عمتك وقعدت عندي عشان امك وعربها ماشالله عمتها الله يرحمها وخوات مفتاح قعدن ايجن بالضيفات اشكال والوان وطبعا عرفن امك والده وقعدن يحسبن فيها في كل شي ,وبعد ثلاث شهور امك خلاص تعبت من باتك ومعاملته وقعد يبات عند مبسوطه وسيبها وامك قبل سماتك اسم ونا مارضيتش بيه ,
مناجي : شن سمتني?
الجدة : سماتك أمل ,, ونا قلت لا وعاركت كيف مايسمو عليا وهي سكتت لكن في ليلة تعاركت مع مبسوطه وكانت اول مرة تنفصل امك عليها ,
مناجي : مش منها هي مرارة وحدة وانفجرت ,😒
الجدة : وخش باتك وشاف مبسوطه اتبكا واللي تقهر كانت قبلها ادف في امك وتبي تضربها لكن علي خشت باتك قلبت العلل وقعدت تبكي وتحلف وقالتله انشد امك اللي هي نا ونا سكتت وخلاص ,
مناجي بصدمة : يعني شفتي امي مظلومة ومادافعتيش عليها ?
ااحدة : زمان ماكنش ايهمني لا امك ولا مرت بوك وقلت فخار ايكسر بعضه ,وامك تحلف واتقوله والله ماصار وباتك من زنين مبسوطه وقالبتله راسه ضرب امك وكانت اول مرة,, ضربها نين داخت وروح مع مبسوطه لحوشهم وانتي قعدتي تبكي في سريرك ونا خشيت داري وسيبتها دايخه قدام دارها ولا عبرتها ,
وكانت الجدة تحكي والندم باين في كلامها لكن مناجي كانت ناااقمة عليها وعلي كل اعتراف اتقوله اتزيد تكرهها ,
مناجي : وااااك انتم من بشر مستحيييل اتكونو بشر كيف طاوعك قلبك بس اتخشي لدارك واتسيبها طايحة لاعارفتها حية ولا ميتة 😢 حسبي الله ونعم الوكيل فيك وفي باتي ومراته وجه الصل 😭
الجدة بعبرة : والله يابنتي نادمة ومانحساب ايصير هكي ثاني يوم امك رنت علي خوها وجاها وبعد شاف وجهها والضرب تعارك مع باتك وباتك من الغل رما الطلاق علي امك قدام خوها وكانت تبي تاخذك لكن خوها منعها وباتك قال بنتي تقعد معاي وامك ياما صار فيها قعدت تبكي وتجدا في خوها وباتك عشان ايخلوها تاخذك بس كل واحد كان يبي يقهر الثاني ومايحسابو قهرو مينتك في كبدها وهي خذاها خوها ركبها في سيارته والصديق حاول يصلح بيناتهم لكن شي تعاندو ومفتاح راجل عمتك كان حاضر وحتي هو ياما دار عشان مايصير فراق لكن الله غالب ,, وقعدتي اتعيطي وعمتك رحمة خذاتك ودارتلك رضاعه لكن انتي كنتي متعوده ترضعي من امك وقلتلها نا رضعيها مع ولدك وفعلا رضعاتك بعد شاورت راجلها ووافق ,
لكن نا اللي قاهرني ومامخليني نرقد الليل نظرة امك ليا وهي تبكي واتقولي كبدي ياعمتي كبدي ,
مناجي صبت وقالت وهي الدموع معبيات وجهه : وامي وين مشت ووين قاعده ?
الجدة : عاشت مع خوها لان حنه توفت وبعدها باع حوشه وسافر للجنوب لان مراته من الجنوب وسكنو غادي ,لكن بعد سنتين كنتي مازلتي عايشه مع عمتك رحمة,, جتني امك ومعاها راجل شكله راجل طيب اسمر هكي وقالتلي نبي بنتي ,وجاية بناخذها ,ونا قلتلها : بنتك ماتت وهي صغيرة ,في الاول ماصدقتش ودقت علي باب حوش باتك وبعد شافها انصدم وبالذات بعد عرفها تجوزت واحد من الجنوب وقالت : نبي بنتي ياخليل ,
خليل : ماعندكش عندي بنت ,
سارة : حرام عليكم نبي بنتي نبيها نبي انربيها واتعيش معايا ,
خليل من الغل والغيرة قاللها : بنتك ماتت ,
وهي تنهار وتقعد تبكي واتعيط وراجلها قعد ايهدي فيها وشالها للسيارة ونا نشوف فيها كيف تبكي واتحسب علينا ,
مناجي : ماااتتت ?? قلتولها بنتك ماااتت? ليييش ?ليييش بس ? حرام عليكم قهرتوها وقهرتوني , حرمتوها مني وحرمتوني منها ,, هذي امي عارفة شن معناها امي ? انتم حرمتوني حنانها وحضنها الدافي ,, وباتي هضا شنو ? انتي شنو ? الا مبسوطه هذي اكيده بتغار منها لانها ضرتها ,, حسبي الله ونعم الوكيل فيكم 😢
الجدة خنقتها العبرة وقالت : ساد يابنتي تحسيب والله من يوم جبتك وعشتي معايا ونامانقدر انعيش بلاك ,, انتي اغلا حفيدة عندي راك ,,حتي لو مابينتلك ,, انتي مسمية عليا ,, ونا مانقدر انعيش بلا حفيد ليا بعيد بالذات لما خالك جوزها لواحد من الجنوب يعني بتاخذك معاها بعيد عليا ,, 😓
مناجي صبت وقعدت تبرم في الدار وتحاول ماتبكي بس الله غالب الدموع غلبنها ونزلن وقعدت تمسك في راسها وقالت : وباتي كنه تغير عليها مش علي اساس يبيها وفرحان بيها ? وعليش معش عبرني ولا اهتم بيا الا بعد كبرت وجاني وهو متندم ويتعذر عليش بس احكيلي ?
الجدة : والله ماني عارفه ,, اللي نعرفه قلته لكي ونا نتمنا انشوفها امك بيش نعتذر منها وانشالله تسامحني ,, لانم توا خلاص بتتجوزي وتسيبيني ,😢
مناجي طلعت من دار حنها وهي خلاص مش متحملة اتشوف وجهها ,وفي الليل جا خليل ولقا امه اتعشا بروحها مناجي طيبتلها شربة ورز ابيض وخبزة وخشت لدارها والجدة حكت لخليل باللي قالاته وحكاته لمناجي ,, واتجه لدار مناجي خبط عليها ومناجي كانت تحكي مع وسام ,,وقفلت من الغلا عاد وقالت : من ?
خليل : هضا نا باتك ,
وقفت مناجي وفتحت الباب وخش خليل ومناجي باين عليها انها باكيه ونازحة دموع من عيونها اللي متنفخات وحمر ,,
خليل : ممكن نحكي معاك ?
مناجي : تفضل ياباتي ,
وقمعزو عالفراش ,
خليل : حنك حكتلي باللي قالاته لكي ,
مناجي : وباهي ,, ?
خليل : اكيد انتي زعلانة مني وكارهتني بس اللي نبيك تعرفيه اتي ماكنتش بوعيي امك كنت مانحمل فيها حاجة ,
هابا😁 متحشم ايقول كنت انحبها الله الله ابهات الزمن الجميل 😌 مش ابهات توا ايقول لضناه هذي الكبيده والغلا ياخرا😒
رواية مناجي والنصيب لهميلو ايوا حناتي قبل انسيت نزرقلكن 😁 ابعييييي. 👀 ههههه انكملو ,,👇
المهم حكا نفس امه مغير زاد كلام قاله اللي هو :
خليل : قعدت انبات عند مبسوطه وكانت امك ترجا في اليوم اللي انبات فيه عندها لعند حملت بيك,, تغيرت عليا اللي كانت هاديه وطبعها خجول قعدت اتعارك علي ابسط شي وكرهتني وبين لحظة ولحظة طلبت الطلاق ونا تحملت واجد لعند قربت ولادتها كانت مبسوطه مهتمة بيا واجد وتغير طبعها للاحسن ولقيت راحتي عندها عكس امك اللي خذت طبع مبسوطه القديم ,, وصار اللي صار ,😔
مناجي : طلقتها وجاها خالي خذاها وحرمتوها مني ونا في عز حاجتي لها 😢
خليل : غصبن عني والله 😔
مناجي : مافيش سبب ايخليك تحرم ام من جنينها ,, مافيش عذر ايخليك تضرب ولية قزونة مالهاش حد الا خو واحد من باتها وماصدق عطاها ولا نشد عليها ولا دورها ,, امي ظلمتوها ومستحيل نا انسامحكم لا انت ولا نتي ولا حتي مراتك السوسه 😒
تحشمت اتقول ثعلب ولا ضبع ,😂 ماعلينا ,
المهم خليل حاول ايرطب قلب مناجي لكن شي حست بغل مش عادي ناحية باتها وحنها ومرت باتها ,, وطلع وهو زعلان ومشا لحوشه خش القي مبسوطه اتفرج عالتي في وغمتله بعد قالتله : وين كنت ? ماتقولش عند بنتك الجالط ?! ماتقول انخطبت ولا تبي تجوز مفيت هي 😒
وايصبي خليل قدامها وايقول : مبسوطه الا بنتي مناجي فاااهمة ?
نبسوطه : وشن قلنا نحن ? ماحد جا شورها بنت سارة ,😒
وطلع خليل وهو خلاص يذكر في سارة ومعاملته لها وكيف فرط فيها بدون مايحس والندم ياكل فيه ,
المهم عند قيس كان متصل بيه واحد كان جار هل سارة ام مناجي وعطاه عنوان خوها في الجنوب بس قيس طلب رقم فون خوها او راجلها وفعلا بعد جهد جهيد حصله واتصل وكان رقم زوج سارة ,وحكا معاه حاجة نص ساعه وسكر منه وهو متأمل خير ,,
المهم مرن الايام وجا فرح مناجي وعليك أجواء وحركات داروهن لها معاويه ومؤيد ومعاهم فهد عاد بيناسبهم العطيب 😁 ورحمة مصبية لمناجي هي وبناتها في كل شي ومناجي حكت باللي قالاته حنها لها لعمتها وصبرتها وقالتلها بعد تتجوزي حننشدو علي عنوانها وتمشي اتزوريها غصبن عن اللي يحب واللي يكره هذي امك ومن حقك وحقها اتشوفن بعضكن ,, ومناجي قعد عندها أمل اتشوفها وتشبع منها حتى ولو كبيرة وبعيالها المهم اتشوف امها وتدعي اتكون امها حية ,,
وطبعا صبايا عمامها حاضرات وفداء وفرات جايات فداء فرحانه عاد دارت كبيدة مع معاويه ويكلمو في بعضهم ويرجو في الفرصة المناسبه بيش معاويه ايدير خطوة ,, وطبعا مناجي حنت حنة عربية طلعت اتهبببل وكان بتعرفو من من خذتها عجنتها لها عمتها راه 😁 احجزن عند رحمة باهي ? وجا يوم الزفة وكانت مناجي في المزينة ومعاها رحاب و.........
بكرة نكملو بإذن الله ,, ومرات تكون الاخيرة راه 😊 انحبكن في الله نعموشاتي ,😘
#Hamelo ✒
