من امس مكملتها لكن النت زفت ويقهر سامحني ,,
رواية #مناجي_والنصيب
الحلقه / 6
وصلنا لعند مناجي تكردمت علي وجها وخشت للمطبخ تزحف اتقول عنز وشفاشيفها طراطيش وبعد جت بتصبي تنخبط في رخامة الحوض جت مقمعزة من جديد وتتألم وخش عليها قيس القيها ماسكه راسها وتتوجع سئلها وهي تنفجع وتوقف استعداد وتنطحه في حنكه براسها هو توجع وهي عاودت طاحت ,, اتقول اللي داعي عليها متوضي 😁 المهم قيس شغلاته ,
قيس : مناجي شن صارلك انتي كويسه ?
وتخش عليهم فرات وشافت مناجي مقمعزة عالوطا ومنزلة رلسها وتتالم وقيس بارك قريب منها وقالت : كنكم شن في? 😒
قيس وهو يمسح في حنكه بيده : انخبطنا في بعضنا هي حست راسها ونا..
فرات : وانت شنو ?
قيس لمناجي: مناجي تسمعي فيا ?
رفعت مناجي راسها وهي تفتح في عيونها بشويه وهزت راسها بأها وحاولت توقف وساعدها قيس وهو واضح عليه انه منشغل عليها وفرات لاحظت الشي هضا الا مناجي ,,
وقف قيس وجاب كبايه مية ومدها لمناجي اللي خذتها شربت منها وصحصحت وصبت وقالت : نا كويسه مافيش داعي تنشغل ,😒
قيس : باهي انتي كويسه بس نا قبل طار حنكي من الخبطه 😁
مناجي : والله ماقالك حد تخش عليا علي غفلة وتفجعني 😒
قيس : مش قصدي نفجعك بس قبل نبي اندير قهوة ليا ولباتي ,
وتباعدت منه ومشت للدولاب طلعت قهوة والبكرج وبدت اتطيب في قهوة وقيس يشوفلها باعجاب ولاحظت نظراته اخته فرات 👀 وقالت : باهي اطلع اقعد مع باتي عليش مصبي في المطبخ ? 😒
قيس توتر وقال : لاا مغير نفكر شن نبي اخرا ,,ااه عطيني كاس مية باتي طلبه مني 😅
وعطاته مناجي كاس فيه مية وطلع وهي طيبت القهوة وحطت معاها نوع حلو ,, وشالتها لهم طبعا ملتمين جنب العزوز وعطتهم,, وقيس اعيونه عليها بس هي مش فاطنة وفرات اتخزر في مناجي وفي خوها ,, وطلعت مناجي وسمعت فونها ايرن طبعا نسيت انقوللكن ,,بعد كلمتها رحاب وقالتلها بترن عليك امي وفعلا رنت عليها عمتها وسئلتها واتفقت معاها بعد يومين هكي تحكيلها شن اتفقو ,وطبعا مناجي خشت لدارها وسكرت الباب وفتحت الفون ,
مناجي : ايوا امي !
رحمة : اهلين حبيبتي شخبارك ?
مناجي : الحمدالله ,, اهو قاعده اندق 😒
رحمة : المهم ,, حكيت مع عمتك عازة وحكيتلها وقالت يديرو مقابلة شرعيه قبل وكان صار قبول يجو رجالة ينهو الموضوع طول شن رايك ?
مناجي بتوتر : مش عارفه الحق انتي ادرا وديري اللي يريحك ,
رحمة : خلاص معناها حنحكي مع باتك وانشالله خير ,
مناجي : انشالله يمي ,, بس نا خايفة اتصير قصة هكي ولا حاجة ?!
رحمة : لا ماتخافيش انشالله خير ,, شخبار عيت الصديق مازالو قاعدين ?
مناجي : قاااعدين مع ان عمي الصديق عسل ربي يحفظه بس باقي عيلته دمهم ثقققيييييل زي امهم 😒
رحمة بضحك : ههههه عاطك الخير ,, خلاص بكرة بعد الغدا حنجيكم نا والبنات باهي ?
مناجي بفرحة : نرجاكم 😍
وسكرت منها وهي فرحانة وخايفه ومتوترة ,,
ومر الوقت عادي مافيش احداث وفي العشا طيبت مناجي طاجين بطاطا باللحم البقري في الكوشه وطيبت معاه رز ابيض ودارت سلطة ودارت عجة في الكوشه ,, طبعا قيس في العشيه جاب خضرة كامله ولحم ومشروب وفواكه وحلويات وخبر واجد الحق ومناجي هي اللي ردعت الخضرة ولان بنات عمها دايرات جو ان نحن ضيوف قررت مناجي تطمر الحلويات😁 اللي جابهن قيس واطلع هي مع قهوة العشيه او تحلايه بعد الغدا او العشا وفعلا خشن ايشمشمن كم مرة ايدورن وفرات اسالت عليهن ردت عليها مناجي انها دستهن واتحط مع القهوة او بعد الوجبه واطلعت فرات وهي بتموت من مناجي ,
وحطتلهم العشا وجت قمعزت مع الصبايا ,
حنها : كنه عشاك خفيف 😒
مناجي : اي خفيف حرام عليك سلامت انظرك طاجين باللحم ورز وعجة وسلاطه ومشاريب هض كله وخفيف 😮
حنها : قصدي كنك مادرتي حاجة ثقيلة لعيت عمك ?
مناجي : حنديروووو راك قطعتيني بكرة هض غداكم ثقيييل باذن الله وعيت عمي مش برانيه ياحني واللي خاطره في حاجة ايشمر علي ذرعانه وايطيب 😏
عايشه : انطيبو يايام مش واحلين لكن نا انحس في ظهري والتصباي معش نقدره واجد 😒
مناجي : اووو ردي بالك ياعمتي اتقوليها قدام عمي الصديق حي عليك بعدها ايقول عليك عزوز وكبرتي ويقعدن اعيونه يزغين برا 😁
عايشه. يكلا كبرت وعزوز ! نا مازلت صغيرة انداداتي ماساع اجوزن 😒
مناجي : لا وين امداداتك هذين فاتهن القطار خلاص ,, وبعدين عمي الصديق بهيبته وشخصيه ومازال بشعره ماشالله والشيب رصاصي حليا دايرله جو 😍
عايشه انقهرت وقالت : اسكتي خلااص راه يسمعك يصدق روحه 😒
مناجي ماسكه ضحكتها وقعدت تاكل وفرات اتشوفلها بغل ,, الا فداء تضحك علي كلام مناجي وماناقشتش ولا بشي ,
المهم كملو العشا وغسلت مناجي الماعين وهالمرة ساعدتها فداء اللي انسجمت مع مناجي وحطن حلو وفواكه والشاهي الخضرا وشالنها للدار وطبعا مناجي وشاحها علي راسها لان قيس قاعد في الدار,,
رواية مناجي والنصيب لهميلو ,, هلا والله اي والله 😘 النمس زرق مش نا 😁,,
وعدا باقي الوقت كويس مفيت عايشه غيرت لبستها بقفطان مخصر شكله كلام مناجي اثر فيها 😁 ومشطت شعرها ورفعاته فوق وكحلت وحطت روج هادي وتعطرت وطبعا مناجي لاحظتها وضحكت علي الجو اللي دارته عايشه ,
وكملو سهرتهم ومناجي خشت لدارها رقدت وقيس اعيونها معاها 👀 بعد طلعت ,
وفرات وفداء خشن لدارهن ,, عند البنات. ,
فرات : قولي ياحنة شكلك انسجمتي مع البيئه هذي 😬
فداء بعد غيرت بتوته : عاادي شكلها طيبه وماعندهاش نية ,, وبعدين نحن زودناها راه ,, البنت تقطعت وهي تجري بروحها ضم ولم وتطييب وغسل حرام والله ,
فرات : حرمت عليك عيشتك انتي وياها ,, فكينا منها الحاله هذي ماتشوفيش فيها ترقد بروحها ?
فداء : لانها حست ان نحن درنا منها موقف وعاملنها بقسوة ,,
فرات : اسكتي خلاص صدعتيني ,, بالنسبة اللي اسمها مناجي هذي خليها شوري نا ,, نعرف كيف نوقفها عند حدها 😏
ورقدن عاطهن مرقد ,, لفرات بس 😁
********************************
المهم جا ثاني يوم وروتين معتاد لمناجي تعجن لخبزة حنها وحطت الدحي عالنار وطيبت القهوة وحطت الحليب والشاهي وزيت الزيتون لحنها عاد اتغمس فيه ماريتنها شي صااحه 😁 ماعلينا وحطت الجبنة والخبزة الكوشه وطبعا فداء معاها وشالن الفطور للدار والصديق منعجب بمناجي كيف تخدم ومتحملة مسؤوليه حنها ,
وفطرو الا قيس طلع بدري ماكنش قاعد ,, وطول خشت مناجي علي جو الغدا برمت الكسكسو ونصباته عالنار وقشرت الخضرة وقرضتها وجهزت البطاطا للمبطن وقرضت هي وفداء خضرة المحشي ودارن المصير وعمتكن مناجي رابطه المحرمة ورا راسها ولابسه توتا طويله وكمها للمرفق وتبي تنتقم من حاجة اسمها غداء وهن حايسات وبنت الغدا فايح وطبعا كان يوم جمعة وعمتكن مناجي تفتلك وتحبرك في السلطات بابا غنوج وسلاطه عاديه وسلطة الجزر والبازيليا وماسكه المايونيز واتحط منه عالسلطات خشت عايشه بعد خلاص كل حاجة عالنار ,
عايشه وهي منصدمة من فلاحة مناجي: خيرات يابنات ,
فداء : اهلا ماما ,
عايشه : جيت قلت بالكي انساعدكن في حاجه ,
مناجي بغل : كثر خيرك بعد كل شي قعد عالنار كنتي استعجلتي اشويه 😒
عايشه : معليش حبيبتي عارفتني كنت نهدرز مع عمتي وبعدين عمك الصديق لازم انجهزله الحمام ودبش الجمعه متعود اصلا انا انديرلا في كل شي 😌
مناجي التفتت لطاجين البطاطا عالنار واتقلب فيها وفداء تغسل في ماعين الحوسه ,
والبنات فاتنها وطلعت اتكر في رميمتها زي ماجت هالجاموسه هذي ,,
رواية لهميلو ايواااه ,,زرقاتي وهكي ,,
المهم جا وقت الظهر الا والغدا ماشالله واتي ومناجي قالت : فداء حطي كبابي المشروب في الصفرة ,
وحطتهن فداء وسمعن صوت الاذان ,,والرجالة طبعا في الجامع والعزوز اتسبح بسبحتها وعايشه متكيه عالفراش في دار العزوز اتفرج عالتي في ,, وطلعن البنات من المطبخ وهن يطااابخن من الحمو وفرات منخمدة عار البنات وخشت فداء اطلع في دبش بتاخذ دوش ومناجي نفس الشي وطلعن في نفس اللحظه ,
مناجي: بتخشي ادوشي ?
فداء : اها ,, عشان نصلي ,,لكن عادي خشي انتي قبل ,
مناجي : لالا عادي خشي حبيبتي نا ساع انخش لحمام الرجاله ونطلع بسرعه قبل مايروحو ,
وفعلا كل وحدة خشت لواحد ومر ربع ساعه حاجة 15 او 20 دقيقه ومناجي لافة شعرها بمنشفها وبتطلع تسمع صوت رجاله بيخشو المربوعه وطبعا التواليت بابه مقابل ساس المربوعه مش الباب ,, وحاولت اتزرق راسها ماصار شي لقتهم مقابلين الباب قيس ومعاه شابين وخشت تجري للتواليت وقعدت متخزرطه كيف تخش للحوش وخطرت عليها انها تاخذ منشفها وتفتحه بحكم كبير واتغطي نظام ستارة بينها وبين باب الرجاله نين اتخش طبعا هي دارتها وعمكن قيس بيطلع من المربوعة وشاف المنشف بودري مغطي خيالها وراسها لكن صوابع ايديها باينات وعرفها مناجي وهي زرقت وهو يشدها من ذراعها بيد وسكر فمها بيد وزرها عالساس ,,
قيس بغضب مكتوم : فيش اديري برا الحوش وين كنتي ? وعليش تمشي قدام باب المربوعه ? احكي عليش ساكته ? 😬
وهضا كله ويده علي فمها وواعيونها بيبطلن من القهر ,
وحولت يده وهمستله : حول يدك هذي بيش نقدر انجاوبك وانت تبعبط في الدوة ,, انا كنت ندوش في حمام الرجاله لان فداء خشت للجواني ونبي نلحق انصلي قبل وقت الغدا ويروحو الصلايا من الجامع ومالقيتش الا اني نغطي روحي بالمنشف ببني وبينكم وبعدين من قالك تعزم معاك رجاله ونا مش عابيه بيهم عالغداء ? 😬
قيس لاحظ انها مصبيه قدامه بشعرها المبلول وناسيه روحها ,,وابتسم وقاللها : نا حر نعزم اللي نعزمه وبعدين لازم تاخذي عالجو هكي لاني نحب العزايم واااجد 😉
مناجي : ايوواااه شكلكم مرمضين معانا علي قولت صالح الابيض ,, حول خليني نمشي وهي بتخش وقيس قاللها : اكيد الايام الجايه انتي بالذات حترمضي معايا وتسوي غدايا وعشايا وغصبن عنك 😌
مناجي التفتت بتعارك وهي تمشي بسرعه طااااف في حاشية الباب براسها ,
مناجي : ااااه ياراسي اللي تكردم ينعليااا 😵
قيس بضحكة : بحتي قدامك وانتي تمشي 😏
عطاته عمتكن مناجي نظرة وخشت وهي تبرطم وتعارك وخشت لدارها لبست ملاية الصلاة وبدت تصلي وعايشه خشت اتنوض في فرات اللي خامرة وطبعا مانجتش فرات من هزايب الجدة مناجي , 😁 علي قولت نوضي يالخامرة القايلة قيلت نوضي يوم جمعه ماعمر والي رقد للظهر وياعار البنات صيور اللي واخذك عازقك علي هلك وخوذي يافرات اشويه من جرعات حنك اللي تعطي فيهن لمناجي 😂
المهم روح الصديق وطلعت مناجي وفدا حطن الغدا وتغدو وهاااضا وين انبطت دمالة عزوز البغدد 😂 وشافت لعرم المحاشي وقالت : عليش حاشية الخضرة كلها يابنت ? حتي الطماطم حاشيته 😒
مناجي برفعت حاجب : مش تعيطي علي المحشي اهو حشيتلك الفلفل والكوسة والبطاطا والطماطم تاكلو اليوم نين تعرفوه محشي ايوااااه ,, وماعين الغدا علي فرات راه انا وفدا بطلانات ونبو انتريحو ,😌
فرات : 😨
الجدة : لا تريحي ياحنة هضا من صباح ربي وانتي تجري والماعين علي الخامرة هذي خليها اتحرك روحها اشوي 😒
فرات : ياسلاااام حوسة غدا الجمعه ديما واااااجد وتبوني نغسل الماعين بروحي ?😬
فداء لاختها : مافيش حوسه الطناجر ماطلعنا نين غسلناهن ومسحنا الغاز هالصفرتين بس صفرة غدانا وصفرة غدا الرجاله 😐
فرات : حتي ولو,, واجد هكي ,, كل صفرة فيها عشر تباسي 😒
مناجي بصوت حاسم : والله ياحلوة هضا حوش الجد والكل بيساعد مادام موجودين انا سويت وساعدتني اختك وانتي حتغسلي الماعين احمدي ربي اللي غسلتلك طاجين القلي وطاجين العجة ومسحنالك الغاز واحلة في طشة تباسي وبعدين مش تبو غدا ثقيييل الثقيل ماعينه اثقال يانوغه 😏
عايشه : خلاص يامناجي الماعين حتغسلهن فرات انتهينا ,
مناجي : وتسييق المطبخ ايواااااه 😒
فرات :😡
المهم العيلة تغدت وشالو البنات الصفر ومناجي جابت براد الشاهي الخضرا بالنعناع وحطاته قدام عايشه نظام صبي يايام الشاهي للرجاله ولك وللعزوز ,😁 وحاجة نص ساعة وجت رحمة وبناتها جايبهن معاويه ومعاه مؤيد بيهدرزو مع قيس وفعلا اجواء حلوة والعيلة ملتمة وتسليمات وترحيبات واشويه واتخش بسمة بنت العزوز الاخيرة اللي متجوزة وماعندهاش ذريه ,, وخشت تنطنقش بالعبايه والخمار والمكاج الخليجي اتقول ماشيه عرس ,, المهم مناجي فرحانة باللمة والونس وخااااصه ان عمتها رحمة والبنات جايات وجو لا قوة الا بالله ,,
رواية مناجي والنصيب لهميلو ,,, حليا منكن انتن وخلاص ,,😘 فوتني عندي فصلات 😁
المهم رحمة خذت مناجي وخشت بيها الدار بروحها وبناتها برا يلهن في الشلة عاد متفقات ,😁
رحمة بصوت واطي : اسمعي ياجيجي امس كلمت باتك علي موضوع المقابلة الشرعيه ,
مناجي : وباهي ,!!
رحمة : وقال لا ,, قال ايجن صبايا وهكي لا نظرة شرعيه ولا شي ,😟
مناجي بزعل : عاد كيف يسير يايمي نظام قطوس في شكارة ولا شنو القصه ? 😧
رحمة : لالا ,, بس نا فكرت فيها وحكيت مع عمتك عازة وقالت عادي يشوفو بعضهم في مكان بعيد عن انظار العيله ,
مناحي : كيف يعني ?
رحمة : بعد العصر تلبسي ونطلع نا وياك للسوق وفي محل ماسكته بنت نخشو فيه وهو ايجينا غادي ايشوفك واتشوفيه ,
مناجي نفخت بغل وقالت : يايمي مش زابطه راه ,,😤 بنحكي معاه المفروض نعرف شروطه ويعرف شروطي ونتفقو مش فن طب ,, 😒
رحمة : باهي شن رايك نمشو للحديقه ?
مناجي بقهر : ايواااا واشهد يلي ماتعرف. وكان شافني حد نعرفه ? لالالا مش زابطه ,😔
رحمة فكرت وبعدها قالتلها : القيتها ,
مناجي : شنو ?
رحمة : نمشو ............
وين بتشيلها عمتها عشان النظرة الشرعيه ازعما ومناجي توافق عالعريس ولا لا وقيس شن قصته مع مناجي زعما اعجاب والا شي ثااااني ?
راياتكن مليشيا ,, شكشكن عااد 😁 يهمني رايكن وتوقعاتكن ,,
#Hamelo ✒
