اسفة عالتأخير بس كنت بدون نت ,, هضا وين الشبكة صحلها تشتغل ,😒
المهم قراءة ممتعه حبيباتي ,,
رواية #مناجي_والنصيب
الحلقه /10
وصلنا لعند مناجي ناضت دارت حملة عالحوش من تسييق ونكت وضم وتلميع وخشت بتختار شن تلبس في العشيه ,, وتسمع عيت عمتها خشو طبعا معاويه معاه نسخه من مفتاح حوش جده ومناجي فرحت بعد سمعت صوت البنات وطلعت سلمت عليهن ورحمة خششت الحفظات الحلو والموالح للمطبخ ومعاويه خش بعدها سلم وعطاهن شكاير وصاته عليهن امه عصير وحلوة وشوملاطه ومايغباكن ,,😊
الحده : خير انشالله جايين عالصبح ,, في شي ?
رحمة : في كل خير انشالله ,, امبارح كلمتني غزلان جارتك ,
الجدة : غزلان مرت حيات نجم الدين ?
رحمة : اها ,, وتبي اتجينا بعدين في العشيه ,
الجدة : خير انشالله كنها ?
رحمة شافت لمناجي وغمزت وقالت : مش متأكدة لكن الموضوع ايخص مناجي ,
الحدة فتصت وقالت : كيييف ? وشن دخل مناجي في النص ?
رحمة : ي يمي غزلان جاية بتخطب مناجي لولدها الكبير وبيجن معاها صبايا بعدين ,
الجده قرنت حوتجبها وشافت لمناجي لقتها اخدودها حمر والفرحه باينة في عيونها وقالت : ومن امتا هالخبر ساير ?
مناجي تغيرن ملامح وجهها وشافت لرحمة ورخاب وهديل وقالت رحمة : كيف يمي ? شن قصدك ?
الجده : يعني غزلان ايش خطرها عليها تبي تخطب مناجي ? والا في شي صاير من وراي ?
وشافت لمناحي بتظرة شك ,, وفهمتها مناجي وعصبت ووقفت بعصبيه وقالت : فهمت عليك ,, قصدك اني دايره وجيج مع ولدها ولا ? انا مش متاعت لا وحيج ولا سريبات وانتي ادرى بيا ,, وبعدين الوحدة كان جو عرب خطبوها معناها دايرو شي ? معناها انتي كيف اجوزتي جدي ?😏
رحمة شافت لمناحي وقالت : جيجي عيب خلاص ,, 😐
وشافت لامها وقالت : يمي غزلان شافت جيجي في حفلة رحاب وعجبتها وكلمتني عليها ولاني عارفه اخلاق بنتي كويس قلتلها اتفضل واهو جينا عشان نساعدوها ونستقبلو معاها الصبايا ,
الجدة : بس مناجي مازالت صغيرة 😒
مناجي خلاااص قريب ترتكب جناية في حنها وقالت : ياحني حرام عليك بلاش لط ,, بلاش قهر كنك معاي ? وبعدين في عهدهم ايجوزو فيكن عال14 جت عليا نا ? ريتي خلي هالنهار يمشي علي خير راني بننفجر 😡
وطلعت ولحقنها خواتها وقعدت رحمة اتحايل علي امها عشان ماتخربش علي مناجي ,,
وعند مناجي خشت لدارها والدموع في عيونها وقمعزت بقوة علي فراشها ,
رحاب : وسعي بالك ياخيه وماتنكديش علي روحك ,😟
مناجي : حنك هذي لازم تنكد عليا ,, كان مانكدتش عليا ماتريحش ,😒
هديل بغل : حني هذي حاجة غريبه مش عارفه ليش اسلوبها هكي , غاووويه نكد 😒
وخشت رحمة عليهن : كنكن حبيباتي زعلانات ?
هديل : امك هذي خايفه منها ادير طروح اتخرب علينا فرحتتا ,
رحمة : هديييل عيب هذي حنك ,, وبعدين امي حكيت معاها وهضا طبعها الله غالب ,, المهم توا شن اخترتي لبسة ياجيجي ,?
مناجي : مش عارفه شنو نلبس ,, مرات نلبس توتا وخلاص 😒
رحاب : وك عليا شنو توتا ?! صبي صبي ,, خشي خوذي دوش صحصحي هكي واللبسة شورنا اصلا جيناك بالدعم 😁
مناجي ضحكت : عارفات الحال ياحنه نجكن ليا ,, اصلا لولاكن مانعرف شن اتدير ,😂
وخذت متشفها وخشت للتواليت دوشت وطلعت لابسة روب بناتي نص كم وللركبه ابيض مورد بالاحمر والوردي وخشت للدار ولقت البنات قالبات الدار كم لبسة والسشوار والمايكب والعطور ,
مناجي : ينعليا نا نتعب من الشقاشق هذين ماعنديش معاهن روح 😍
رحاب : ههههه نفس الجو ادماااان 😁
هديل كانت في المطبخ خشت عليهن في يدها تبسي فيه خليط ماسك ,,
هديل : هيا ياجيجي اتكي خليني انحطلك القناع هضا ,
مناجي : قناع شنو ?😕
هديل : نشا وحليب وبشرة ليم ونقطتين ليم خميرة خبزة , جربته يومته خيااااال ,😍
واتكت مناجي وهديل اتحطلها في الماسك ومت خظهن لاعبات فتلة يوم بيان رحاب يعني الامور متستفه 😉
وحطت هديل الا رحاب طلعت تبرم علي حنهن ماتبيهاش اتنكد علي مناجي ,
ومر الوقت عادي غسلن البنات وجوهن ورحمة جهزت الضيافه والجو كله وولعت البخارة وطلعت اتبخر وهشت عالبنات لقت مناجي اتجرب في لبسة سروال جينز ابيض وبلوزه ليموني ,,
متاجي وهي اتشوف لروحها في المرايا : حسيتها ظابطه يابنات ,
هديل : بالعكس اتهبلي بيها وشعرك ارفعيه نظام كعكه فوق ونزلي خصلات بسيطه ,😁
رحمة : ماشالله اتهبل عليك اللبسه ,, بس جربي القونة والبدي اللي اخترتهن نا ,😉
وجربتهن مناجي وكانت قونة بيج للركبه ملمومه وبدي احمر فيه زكرشه بيج ,, طلعت تخبببل ,
وبعدها جربت فستان ناعم اسود وفيه نمش ابيض وكان نص كم ومخصر وللركبه وحركته خفيفه وحلوة ,
مناجي : عجبني هضا وحسيت روحي خفيفه وحلوة بيه ,😍
وخشت رحمة اللي طبعا كانت تبرم وتبخر في الحوش ,,
رحمة: ماشالله اتهبلي ي عمري ,, الفستان واخذ منك قطعه 😍
مناجي : تحكي جديات ? يعني نلبس الفستان ?
هديل : اكيد ,, وهيا عشان انجففلك شعرك عالسريع ,,
وبدت فيها هديل ورحاب كانت اتطيب في نعناع لحنها اللي توكبت فيها 😁 وخشت رحمة ,
رحمة : عليش اتطيبي في نعناع ?
رحاب : لحني ,, بالكي اعصابها يهدن وتريحنا علي جيت الصبايا , ياناري علي جيجي اللي عايشه معاها ,, فعلا ينقنها واااعره ,
رحمة فنصت فيها : رحاااب ,
رحاب : اسفه يمي ماتزعليش مني ,, بس بصراحة اتزود فيها بكل نا مغير ضيفه اليوم ورقتلي الضغط يابال جيجي اللي معاها 24 ساعه , تعرفي انحس في حني مش طاربه علي خطبة جيجي ,😟
رحمة : ربي يهديها ,,حتي نا حاسه بيها هكي,, لكن حنسايروها نين تنقرا فاتحه جيجي,, سبحان الله طبعها وطبع بسمة واحد ,,واعرات ,😓
رحاب بهمس لروحها : قولي نكديات , الله المستعان ,
رحمة : هيا بسرعه شيليلها الطاسه وشوفي خواتك ,
المهم مر الوقت واذن العصر وصلو البنات فرضهن ومناجي دارت لنسات بسيطه طلعت اتجنن والفستان خايل فيها ,, ورن الجرس وطلعت هديل تفتح لقتها عمتكن غزلان ومعاها وليتين جايبات معاهن طبق حلو وشةكلاته ,, ورحبت بيهن وفضلتهن وهشن لدار الضيافه والعزوز ورحمة مااهن وخشت هديل تزر لدار مناجي ,,
هديل : الصبايا جن راه ,
متاجي : ينعلي حسني خااايفه ,
رحاب : اقري المعوذات وهدي روحك ,,
عند الصبايا 👇
رحمة : مرحبتين بيكن ,, نورتونا ,
غزلان : تسلمي ياخيتي ,, بنورك ,
الجدة ساكته وتخزر وخلاص ,
غزلان : كيف حالك ياعمتي مناجي ?
الجده : الحمدالله ,,
غزلان : يستاهل الحمد ,, الحقيقه خلني انخش في الموضوع دغري ورحمة انتي عندك علم باللي نبي نقوله ,ونحن اليوم جايات نطلبو بنتكم مناجي لولدي وسام علي سنة الله ورسوله ,, ونحن جيران وكل حد عارف الثاني,
رحمة : وعز من نعرفو ,, جيران وحبايب وعشرة عمر ,, ووسام ولدنا ماهو براني ادب واخلاق ويشرف كل عيلة ,
غزلان : تسلمي يارحمة ,, ربي يجبر بخاطرك ,, حتي انتم اتشرفو ,,
وطبعا غزلان جايبه معاها حماتها عمة وسيم واختها خالة وسام ,,
العمة : طبعا ولدنا ماشااالله عليه ماناقصه شي كامل مكمل والكمال لله ,, بشقته وواتيه وعنله وربي فاتح عليه ناقصته بنت الحلال ,, وغزلان بعد حكتلنا علي بنيتكم ,, فرحنا ونتمنو تجون هي صاحبة النصيب ,😊
الجده لوت شوربها وقالت : كل شي عالنصيب ,, انشالله خير ,, 😒
المهم رحمة اتغطي علي اسلوب امها ونشدن الصبايا علي مناجي وخشت سلمت عليهن وهي منحرجة والوجه الوان ,,هضا مغير صباياه يايام 😁 مالا كان العريس بروحه مالا كيف 😂
رواية مناجي والنصيب لهميلو ,, Haaameloo,,
تحسابني انسيت نزرقلكن 😁 ياك دافيات ,,
نرجعو 👇
المهم غزلان عاجبتها مناجي والصبايا ايتمقلن فيها اتقول بيشرن سيارة ,, وقمعزت مناجي شويه وبعدها استأذنت وطلعت الحق هي خافت حنها تحرجها بشي فالطه ,, ففضلت تطلع وتشقا بالضيافه وفعلا اقعدت اتضيف فيهن ورحمة فرحانه لمناجي لانها تبي اتهنى عليها تعتبر قزونه ,, هابا مامن قزون وهله عايشين 💔 وهذي الكاينه ✋ المهم غزلان لاحظت ان الجده ماتناقشش معاهن وساكته وعرفت انها مش موافقه ودعت ربي يسهل موضوعهم ,,
وتم موضوع الهطبة من الصبايا عادي ومناجي فرحانه وروحن طبعا عالكرعين الحيشان بيناتهن حوشين هضا حد البعد 😅
لهم خشت غزلان لحوشها مالقتش وسام وطبعا حماتها واختها معاها ,
عمة وسام : ماشالله عليها البنيه الحق ,,بس تهايالي حنها لاوية وجهها علينا من اول مارتنا ,😐
غزلان : لا هضا طبعها عمتي مناجي تحسنها ولية واعرة ومش كل شي يعجبها ,😊
الخالة لوت شواربها وقالت : تبن الحق ? وسام يستاهل احلى منها وعيلة افضل 😒
غزلان : وكنها مناجي ماشالله عليها اتسد معاناتها لحنها اللي شفتيها ,, وشايلة حوش العيلة علي راسها ,, والحق وسام اختارها ونا مانقولش لولدي لا علي اي بنت يبيها المهم راحته عندي ,
العمة : هضا الكلام المزبوط مادام ولدنا يبيها ربي يجعلها من نصيبه ,, ماصدقنا طرب عالزيزه 😒
انفهمكن عليش متناقضات 😁✋
العمة اتحب اعيال خوها نجم الدين وغزلان تعتبر صديقتها واختها اكثر من كونها مرت اخ وعندها بنات وعيال ومجوزتهم كلهم ماشالله ,, والخالة اللي تناقز في الدوة ,, هذي اخت غزلان وعندها بنات في الحوش وتمنت وسام ياخذ وحدة من بناتها ,, عالمهم غزلان خشت للنطبخ بتنصب عشاها عاد ماسكتهن للعشا 😏
انجو لحوش عثمان وفهد اتزن عليه امه ريم ,
ريم : باليد الله يربحك مغير خليني نخطبوها لكي واحكي معاها وبعدها كان مازلت عند رايك سيبها ودير اللي يريحك ,
فهد : ياعليك زنييين يا يمي مانبيش مانبيش مش بالغصب الزف 😬
بعد وحلت فيه ريم وحست ولدها معند قالت : خلاااص معناها دور بنت ناس ودلني عليهم ونمشي نخطبها لك ,, لكن تقعد هكي من دون خوتك هذي لااا 😒
وطلعت وسيباته يحرق من امه وقال : نعجند نا نجوز وحدة اسمها مناجي هه 😏
انطبو عند قيس عااد جا مسقط عالعشا عند عيت جده او حنه وطبعا بيشوف مناجي ,,
والقي عمته رحمة سلم عليها وقعد يهدرز مع حنه وعمته الا مناحي والبنات في الدار ويهدرزن ,,
هديل : شكله قيس متعود عالجي هنا ولا كيف ?
مناجي : بكككل من حيتهم من منطقتهم وهو شبه يوميا عندنا ,, نا مصدقت خشو حوشهم الحق عمي الصديق عسل هدراز وبشوش لكن مراته وبناته اععع عاهات ,,
رحاب : وقيس ?
مناجي : عادي ,, صاح هو بارد ودمه ثقيل بس الحق كويس ,
وخشت عليهن رحمة : هيا يابنات تعالن ساعدني شيلن الصفر ,
مناجي : قيس قاعد ولا روح ?
رحمة : قاعد حيتعشا معانا ,وانتن حطيتلكن برواحكن ,
وطلعن البنات ومناجي اتلم في شعرها والبست وشاحها وطلعت للصالة لقت قيس طالع وباين عليه معصب ,واول ماشاف مناجي قرب منها لدرجة مناجي تخزرطت وقعدت اتوخر وهو ايقرب نين الصقت في الساس ,
مناجي : كنك ? لاباس ? شن في ? 😨
قيس معصب وهمسلها : تعرفي نسمعك وافقتي عالنم اللي جو اليوم نقتلك فاااهمة ? 😡
وطلع وهو العقارب متقارنات عنده ومناجي قارنة حواجبها بصدمة وقالت لروحها : هضا كنه بسم الله ,, عيلة مطرشقه ايخلصتي الله منها في جده قريبه ,
وخشت للمطبخ وماحكتش احد باللي قاله لها قيس , والبنات خشن دارهن ورحمة اول ماخشت لامها قالت : وين قيس ?
الجده : روح ,
رحمة : علييش ? مش علي اساس ايتعشا معانا ?
الجده : ماني عارفه شنو دعوته ,, هدرز معايا وحكيتله علي خطبة مناجي وهو طااار وعصب وطلع ,
رحمة بشك : وشن حكيتيله ?
الجده : سالني امتا جيتي انتي والبنات قتله جن من الصبح عشان ايساعدن مناجي عالضيافه تشدني ضيافة لمن قتله صبايا جايات يخطبن فيها ,وهو عصب وطلع بدون مايحكي ,😒
رحمة لروحها : يستر الله كان اللي نفكر فيه مزبوط ,, هابا علي حظك يابنتي ,
وطلعت خشت عالبنات وحكت لمناجي وهي جت مصبية استعداد واذكرت كلامه وقالته لرحمة ,
رحمة : شكله قيس حاطك في راسه ,
مناجي : كيف حاطني في راسه ?
رحاب : يعني يبيك ياجيجي
مناجي بصدمة والفم مفتوح اتقول مغاره ,, 😳
رواية مناجي والنصيب لهميلو ايواااه ,, هذي تزريقه 😁Hamelo
المهم مناجي اقعدت متنكده واطير وتنزل وهي تدعي ان كلام رحمة يطلع غلط ومايكوتش قيس يفكر فيها
هديل تضحك ورحاب نتت فيها ,
هديل : اسفه بس مش ملاحظات اللي يبو متاجي كلهم طروف ,, هضا خال رافع في الاول قيسه جرته خضرا العطيب 😁 وفي جرته وسام واهو عمكن قيس ,, هههههههه
مناجي بضحكة غل : ولا اللي تبغدد اسميهم اسماح كلهم هضا فيصل 😒 ووسام 😍 وقيس 😱 ونا هه مناااااجييي 😬 تي الدنيا مايلة عليا حتى في الاسم ,
وبعد وقت روحت رحمة وبناتها مع معاويه اللي كان يهدرز مع وسام قدام حوشه ,, ومناجي قعدت علي اعصابها ومرت الليلة عليها توتر وخوف وجا ثاني يوم ناضت عال8 طيبت الفطور وهي نعسانه لانها سهرت وهي تخمم ,, ودق باب الحوش عاطت حنها الفطور اللي تعارك فيها قايله وطولتي بالفطور ونا ولية مريضه ناخذ في دوا وخوذن من الاسطوانه ,, عاطها غيبوبه عزوز النكد ,,😒
المهم مشت فتحت الباب وخش قيس ومناجي خشت طووول وهو لحقها ,
قيس : مناجي استني نبيك في موضوع
مناجي : مافيش بيناتنا مواضيع ,
وجت بتخش شدها من يدها بقوة التوت جت طايحه ,
مناجي : ااااااه 😳
قيس : بسم الله انتي شن قصتك ديما ياطايحة يامنخبطه ?
مناجي شدت يدها منه بقوة وصبت وقالت : ريت ياقيس انت ولد عمي عالعين والراس لكن تقعد مرة اتزر فيا عالساس ومرة تمسك يدي هذي نا مانقبلهاش منك وياريت اتخلي بيناتنا حدود ,
قيس قرب منها وقال : وكان قتلك مانبيش بيناتنا حدود ,?
مناجي : لااا في ,, لاني مانحبش حد يتجاوز حدوده نعايا ,
قيس : واذا تجاوزتهن ?
مناجي بقوة : اتحمل مايجيك لاني نش من بنات الهاي والباي والواي ,, انا مناجي ,
وخشت لدارها وقيس طلع وركب سيارته ومشا للحوش خش القي باته حكاله انه يبي يخطب مناجي ولازم يحكي مع عمه خليل ,,
خطرها خليل ,انجو لخليل و هابا علي مطراه 😒
مبسوطه مقمعزة عالتي في ومعاه بنتها وخش خليل ,,
مبسوطه : صح النوم ,, نوضي يابنت جيبي فطور باتك ,
وصبت بنتها خشت للمطبخ ,
خليل : بنمشي لحوش امي اليوم ,
مبسوطه بغل : وعليييش ? امك معاها مناجي ومهنيه منها عليش اتعب في روحك ,
خليل : رايفت علي امي لي زمان عليها ,, كان بتمشي وتي روحك ,
مبسوطه : اكيد بنمشي معاك ,
خليل في سره ( ااااه مش عارف ليش قلبي واجعني هاليومين ونبي انشوف مناجي ,, حاسس انها متضايقه ) ,,
الوالدين مايقطعش في جنينه لكن حسبي الله في قسايات القلوب ,,💔
المهم مناجي جت لحنها بتاخذ منها فلوس ,
مناجي : حني نبي فلوس ,😐
حنها : وعليش ?
مناجي : نبي نمشي للدكان انجيب حاجة ناقصتتي ,
الجده طلعت دنزانها : وكم تريدي ?
مناجي : نبي 20 ,
وعطتها حنها ولبست عبايتها ووشاحها وطلعت وهي تشوف ........
شكرا يابنات عالتهاني بعيد ميلادي اللي وصلني سوا عالصفحة او الانيل او الخاص ,,😍 بجديات محظوظه بصداقتكن وربي يسعدكن ويحفظكن ,,
ويجبر بخاطركن ,, تاريتني محظوظه نعليا نا منكن نعموشه نعموشه ,😘
#Hamelo
