امس مانزلتش لان التغطيه قهرتني وحاولت انزلها ماصارش حتي القروب مابا ينفتحلي ,, وكتبتلكن تعليق علي الحلقه اللي قبل امس المهم هذي حلقه وانشالله تعجبكن ,😍
للكاتبه Gazala Bobacer Hamelo ,,
رواية #مناجي_والنصيب
الحلقه /19
وصلنا امبارح لعند مناجي تغزل بيها وسام ومشا بيها للسرير و تهنت مناجي يا حناتي 😁 الحمدالله زغرتن عاد ,, المهم ليلتهم كانت حلوة ورمانسيه ,, ونخلوهم عاد هاضوم وانطبو عند العزوز حن مناجي شايلة الصوت من جد جدها ورحمة اتهدي فيها وهي شي ناصبة نوعها اتقول خبروها علي شايبها اليوم هض ,,😒 وبسمة غامتلها وطايرلتها من الناس كلهم واتخزر في اللي ماشي واللي جاي بالذات في رحمة وبناتها ,, وعايشة مرت الصديق امقمعزة ترجا في راجلها والا ولدها ايروح بيها هي وبناتها ,, الا ريم طارت من الصالة لحوشها طول ,
رحمة لامها : يايمي مغير وسعي بالك عليش بس تبكي ,?
الجدة تمسح في دموعها بمنديلها وقالت : خطيني مش شورك نبكي والا ننفلق ,, ويش مالك انتي ?
هديل جايبه مية لحنها : هاكي يا حني واستهدي بالله ,,راهو الضغط يرقا عليك,
وخذت الجده كباية الميه وشربتها ومدتها لهديل وقعدت تبكي عالساكت ورحاب تبكي حتي هي لانها حست بحنها تبكي عشان مناجي ,,
عايشة : لا اله الا الله عليش بس هالمناحة ياعمتي ? اسمعتي خبارة والا خطرو عليك المراحيم 😒
الجدة : ونتي شن دخلك ? انشالله نسمع خبارتك انتي 😒
فرات : بعيد السو علي ماما انشالله في اللي يكرهها 😒
هديل : وسعي بالك ياحنه وهذي حنك يعني ام باتك مايصحش اتردي عليها ,😒
فرات :ونا ماقلت شي لكن الا امي عاااد ,
رحمة : خلاص اسكتن انتي وياها بلاش مناقرة ,, وانتي يمي فهميني عليش تبكي ?
الجده بعبرة قالت : لا مغير اول مرة نبات الليلة بدون مناجي ,, الحوش شين بلاها ,😢
هديل بضحكة : ايوا قولي من الأول ياتيته من توا رايفتي علي نوجا 😂
بسمة بغل : مافتكيتي الا منها ام لسان طويل ومليانه عيوب علي شنو بترايفي بس 😒
رحمة : عيب يابسمة مناجي مافيها اعيوب مغير تسلم بنتي متربيه احسن تربيه ايسد حنيتها في حنها وخدمتها الها ,, 😒
رحاب : ينعلي نوجا هذي مافيش زيها بكككل اصلا, ربي يسعدها وانشوف ذريتها يارب ,,😍
اوبااا واضغطت عالوتر الحساس لعمتكن بسمة 😁
بسمة اعيونها قبل ازرقن وقالت : عليك اللي انتن لا حشم ولا جعرة اي ذريه وهي اليوم الها اول يوم 😒
هديل ورحاب اسكتن لكن عاد اعويشه مازالت مش فاهمة بالحيل علي بسمة ماهو كانت بعيد عليهم ,
عايشه : لا عادي ياحنة في اللي اتشيل من اول يوم والا من اول اسبوع ,😐
بسمة وقفت وفعدت اترن علي رتجلها اللي طول عليها وقالت بعصبية : نعرفها قلت ادب وقلت ربايه جيل معش ايتحشم ,
وقعدت اترن رد عليها راجلها ,
بسمة : تي وينك انت الثاني ? شنو ? وامتا سافرت ? ليش ماقتلي ?,,, شنو اللي صارلك فجاءة انت وين قاعد ومن اللي يالاك ? صلاح انت ةين قاعد ? 😬
وقعدت تسمع نصيب وشكله سكر عليها انقهرت والغل لان عليها وطلعت من يالا الصبايا ومشت للمربوعه واقعدت اترن واترن واترن وعمكن صلاح فايتها بالطويل والعريض ,, شن قصتهم ساع تعرفن ,,
رةاية مناجي والنصيب لهميلو ,, كيف حالكن مليشيا ,, ياك متريحات 😁نرجعو للروايه 👇
المهم هديل تهمس لاختها : تي كلا خالتك بسمة حاله ياناري عليها ,😒
رحاب تخزرطت وخافت تسمعهن شي وحده وقالت : اسسس عيب تسمعك راه 😳
هديل طرمت شواربها وقالت : زي بعضه تسمع ولا لا ,, اساسا مانحصلو منها الا الهرجة والنكد 😒
وخشت بسمة لدار امها وهي تحرق واشويه واتجيها رسالة من صلاح راجلها كاتبلها ( انا مشغول الليلة في شغل ضروري ومسافر وحنجيك بعد يومين ,, خليك عند امك.بالمرة وحنكمل وانجيك )
وعمتكن بسمة اتقول انضربت برصاصه قعدت تحرق وترن تلقا فيه مقفل وقعدت اتعرام ورحمة خاولت اتهديها لكة بسمة بلسانها المر هزبت اختها وبناتها وهزبت حتى بنات الصديق ,,وخشت لدار المقعد وقعدت اترن وتلقا في راجلها مقفل قعدت تبكي 😭 وحالتها حاله , خلنها عنكن هذي وعدت الليلة حلوة عالبعض ونكد عالبعض الثاني وعايشه روحت هي وبناتها بعد جاهن قيس ورحمة باتت مع امها هي وهديل ورحاب روحت عشان باتها وخوتها عاد الا بسمة ماعليها اعبا بالحيل ,💦
المهم في صبح ثاني يوم عمتكن هديل راقدة وامها جتها ,
رحمة : هديل ,, هدوله ,, نوضي يمي هيا ,,
هديل بنعاس : خليني اشويه بس ,😴
رحمة : لا حول الله امتا بس اتنوضي في يوم ابروحك ,, خميرة نوم 😒
وطلعت وسيبتها وهديل كنلت نومها ولا دورتها طبعا رقدت في دار مناجي ,, ورحمة طبعا فطحت خبزة لامها وطيبتلها الفطور وجاباته لها ,
رحمة : صباح الخير يمي ,😊
الجدة : صباح الخيرات ,
رحمة : تفضلي هي افطري وحنجيبلك الدوا ,
الجدة وهي اتمقل في الصفرة : وين زيت الزيتون ?😕
رحمة : تفطري عليه ?😕
الجده : نفطر عليه مالا شنو 😒
رحمة حطتلها باكو الدوا عالصفرة وقالت : حاضر هي ,, نمشي انجيبه تو ,
ومشت رحمة جابتلها الزيت وفطرو مع بعضهن ,, وناضت بسمة لاويه وجهها والكحل سايح مو عيونها مخليها اتقول تقرب للجوكر وانفجعت العزوز منها ,
ااجدة : بسم الله الرحمن الرحيم 😨
بسمة بغل : كنك يمي شفتي غوله 😒
رحمة : مغير صبحي قبل ,
بسمة : غااامة ماعنديش جو انصبح علي حد نا حرة ,
ومشت للتواليت ورحمة اتهز في راسها بقهر من اسلوب اختها والجدة قالت : اختك هذي مش بلاش باقيه عصبية واجد ,
رحمة وهي تغمس في الجبنة : ربي يهديها ,,
وناضت هديل لقت خالتها في الصالة ماسكة الفون وتعارك كانها الفون يسمع فيها وضحكت عالخفيف وخشت للتواليت توضت وطلعت صلت فرضها وخشت علي حنها لقتها مقمعزه اتسبح باامسبحه ويارحه صبحت عليها وطلعت للنطلخ لقت امها ناصبة الغدا وعابيو علي جيش بيجيهم وفهمت هديل ان عيت خوالها بيجو اكيد سخنت فطورها وفطرت ورن فونها لقاته عمكن فهد طارت لدار مناجي تحكي معاه , انخلوهم ونجو للعرسان وكيف ناضو ,, طبعا وسام راقد الا متاجي ترباية عزوز الله غالب عليها ناضت من ال 8 غسلت وتوضت وصلت وين عندها تاخرت وقايلة. 😁
المهم لبست بجاما بيج بالوردي نص كم اتهبل ودارت مايكب خفيف وتعطرت وشافت لوسام لقاته مازال راقد وقربت منه واتكت عالمخدة متاعها وهي سارحة في ملامح وسام وقعدت باصبعها تلمس في خدوده وهشمه ةاعيونه واول مالمست شفايفه يفجعها وسام ويقبض علي اصبعها بسنونه. وعمتكن مناجي اتعيط: عااا 😨
وسام : هههه صباحو حبيبتي 😍
متاجي وهي ااشوف لصبعها : صباح العض ياعضاض 😒
وسان نسك يدها وباس اصبعها بطريقه ذوبتها العطيبه وقاللها : تي باهي اللي ماكليتك 😍
مناجي الخدود ريييد رسمي وقالت بحشم : نوض هيا اغسل عشان نفطرو مع بعضنا جيعانه راه ,😶
وسام : من عيوني 😉
وشدها لحضنه وباسها وهي في عالم ثاني ومافكت منه الا بعد ستين واسطه وهربت للمطبخ ,, وخش وسام للتواليت وهو يضحك عليها ومناجي خاطة يدها علي قلبها : ينعلي ايهبل ولد اللذين 😍
وضحكت عالخفيف وبدت اتجهز في الفطور وخطرت عليها حنها اللي تفطر علي خبزة فطاطيح واباسمت بحزن وقالت : زعما دارالها امي خبزة ?
وهزت راسها وبدت اطيب في القهوة وابشاهي وطلعت الزيتون والجبنه عااد فطورنا ومايغباكن فيه ,وطلع وسان مدوش ولابس سروال توتا اسود وتيشرت اسود وصلى فرضه وخش القيها ادندن واتصب في القهوة في الفناجين ,
وسام : تسلم دياتك ,,اهم شي القهوة عندي ,
مناجي بابتسامة دوباته : صحتين ,, نفس الشي ضروري نبدا بيها يومي ,😊
وفطرو وضمت مناجي حوسة الفطور وولعت البخارة حطت شوية بخور. وفاسوخ وبخرت الشقه ووسام فتح التي في ويتفرج نين جا وقت الغدا دزت عليهم غزلان وطبعا عندها خواتها وبناتهن وحماواتها وكناينهن وبناتهن ,, وعمتكن مناجي لبست بدلة اتهبل نظام قونة للركبه ومعاها بلوزة اكمامها شافون ومن الرسغ ظابطه واستشورت شعرها ورفعاته بطريحة حلوه ونزلت خصلات من شعرها ودارت مايكب خفيف وتعطرت ولبست كندرتها وابتسمت لروحها في المرايا وخش عليها انبهر بحلاوتها واناقتها وبساطة مايكبها ,
وسام : واتية حبي ?😍
متاجي : اكيده 😊
ومسم في يدها وقاللها : هيا ننزلو ,
مناجي : استني بس نلبس عبايتي ,
وفعلا لبست عبايتها ووشاحها وطلعو من شقتهم وهن نازلين تنصدم ببنت خالت وسام لابسة فستان احمر قصير نظام بدي والشعر فل. ونطلوق والوجه اتقول باكو الوان والعطر اللي اتقول بنج ,,💦
وعنتكن مناجي ولع فتيل الغيرة جواها ,
بنت خالته : هلا بالعرسان قبل جاية بناديكم الغدا واتي ,
وسام برسميه : مافيش داعي اتعبي روحك,, اصلا امي رنت عليا ,
بنت خالته : تعبك رااااحة وسووومي انت عارف معزتك عندي 😍
متاجي هنا بتنفصل مغير مسكت روحها وقالت : اكيده حبيبتي حتي هو ايعزك زي اخته اللي مارزقه بيها ربي ,😒
وسام ماسك روحه خايف يضحك لان عرف مناجي غايره عليه ,,
بنت خالته غمتلها من مناجي وقالت: معزتنا لبعضنا مايدري بيها حد الا ربي ,, عموما الناس ترجا هيا ,😒
ووقفت عالباب ترجا في مناجي اتخش معاها لكن وسام مسك ايدين مناجي وهمسلها : حبيبي كبري عقلك وماتعدليش علي كلام حد جوا وتأكدي انك زوجتي وحبيبتي ومافي خد في قلبي الا انتي وبس 😘
مناجي فرحت بكلامه ولاحظت تصبايت بنت خالته عند الباب فتعمدت اتقرب من وسام بطريقة اغراء وسبلت اعويناتها وقالت : من عيوني حبيبي عارفة ومتاكدة من حبك ليا ,,وعشان خاطرك انتحمل اي كلام ثقيل لان المقهور بس اللي يحكي ,😘
وعمكن وسام قبل باسها نين رمشتله ناحية الباب وانحرج وطلع وهو يضحك وجت بتخش لقت بنت خالته قريب اتعيط واعيونها دمعن بغل ,
مناجي : كنك واقفه هنا ليش ماخشيتي ?😕
بنت خالته : نرجا فيك اتخشي ,واناي طولتي ,😒
مناجي : حبيبتي مش غفير عشان ترجيني انخش وبعدين مالمش داخل نتاخر ولا لا لاني مصبية مع زوجي وحبيبي هه حاله وخلاص ,😏
وخشت تطنقش وبنت خالت وسام ولعت فيها نار الحقد والغيرة ,, المهم خشت مناجي اتسلم عالصبايا والبنات وسلحت عبايتها وسقمت شعرها وقمعزت والصبايا ايشوفلها وبعد خشت بنت خالت وسام انقهرت بعد شافتها لابسه لبسة قصيرة كركوازيه بلمعه اتهبل والحنة صابغة وعمتكن غزلان فرحانه بمناجي وبدن الصبايا ايحطن في الغدا وخالت رسام اتخزر في مناجي هي وبناتها تي ناقصة ثعالب ياهمي 😤 ماعلينا وبعد الغدا رنت مناجي علي وسام اينزللها الهدايا اللي جايبتهن معاها من الشقة وطبعا اموتيتهن في الصالة ورقا جابهن ومدهن لعمته وبنت عمته الكبيرة متجوزه وخشن حطنهن جنب مناجي وبدت مناجي اتوزع في هداياها جايبة لعمتها بدلة كبيرة اتهبببل بسلة بخور وعطور وخاتم ذهب وعماته بدالي حلوات ومعاهن سلة صغيرة بخور وعطور وخالته نفس الشي ولسلفها جايبتله ساعة ماركه وقلم حبر ماركه وعمتها غزلان فرحانه بكنتها وطبعا دايرين عشا وبيجو هل مناجي ,, وركبت لشقتها ولقت وسام يرجا فيها ,, وقعدو ايهدرزو وايتغزل بيها ومالحظتنش انها معش طاحت عمتكن مناجي ولا 😅 المهم في العشية جتها رحمة في شقتها وهديل اللي لبسنها العربي ومكجتها هديل واطمنن عليها وركب وسام بعد روحن رحمة وهديل عشان ايجهزن ارواحهن وعمكن وسام القي مناجي مجهزتلا اللبسة العربيه وسرح في زولها وجمالها طالعة تخبل بالعربي وتغزل بيها وهي الوجه متورد كل مرة بلون ,, المخم لبس عمكن وسام وخي عليك طرف طلع ياخياتي هبلها وخذا ذنبها وهي ذايبة رسمي معاه 😁 المهم قريب من نزلتهم للحوش والناس بدت اتجي وجو هل مناجي ونزلها وسام وغزلان تبخر في الفاسوخ والملح الحصو خايفة علي ولدها وكنتها ووسام وصل مناجي لكرسيها وطلع وسط اعجاب عيت حنة بالذات بنت خالته اللي مغيرة لبستها ولابسة فستان سهرة اسود. اتقول حازنة العطيبه 😒 وكان بدون اسيور ومن قدام نظام قصير ومن خلف طويل وايكر ورافعه شعرها اللي صابغته وحارقته بالميش والمايكب اللي معبي وجهها والعزايز مايحسابنها الا براجلها خبر يحبط وقت توا معش تعرف الانسة من المدام 😒 ماعلينا ,, وبدو هل العريس ايحطن في العشا وطبعا دايرين عشا رجاله ومناجي متحنطرة باللبسة العربيه والعقد والشناقيل والخلال اللي تعبها 😁 وبدن ايتعشن الصبايا ومتاجي بدت تجوع خبر ايجوع الحق ورحمة جايبة ازحلو والمشروب اللي بيوزعنه في الاسبوع وبدت هديل وفداء ورحاب ايوزعن عالصبايا بعد العشا وصفيق ولعب وجو علي كيف كيفكن ,, ورقصن العروس وهي فرحانه ,,وحنها ااشوفلها وفرحانه بيها وباين عليها التعب ,, وفي اللحظه هذي رن فون رحمة ولقاته مفتاح ردت عليه ,
رحمة : ايوا فتوحه ,, وينك لك يومين مش باين ? ,, كيف ? كنت مسافر ? وين ? ..باهي باه من اللي معاك ? ضيوف مهمين ? من معاك.? باهي ياراجل مغير شغلتني ,, وباهي ,, هيا طالعه ,,
وطلعت رحمة بتشوف مفتاح وبدو الضيوف ايروحو وماقعد الا الجدة وبنات رحمة وصبايا عمام مناجي وخالات وسام وعمته ,, وجت رحمة تجري لمناجي وهي منصدمة واعيونها مرقرقات وطبست عليها وهمستلها : نويجا صبي نبيك ضروري ,
مناجي : انشالله خير شن في يمي ?
رحمة : تو تعرفي بروحك هيا سقدي روحك خلينا نركبو لشقتك ,
وصبو مناجي وهي مش عارفه شي واتوتر باين علي امها رحمة ,,
رحمة جت لامها : امي تعالي حتي انتي مفتاح يبيك فوق في شقة مناجي ,
والحدة جت مصبيه بخفه وكأنها كانت ترجا فيها تقوللها وقعدت رحاب اتساعد فيها وغزلان لاهيه ماحتي ركزت ,,
وعند فهد فاتح فونه ويكلم في هدوله وهي تستكرد فيههابا تبيه يدير خطوة عاد مش ديما اللكلك ولا 😁 رواية مناجي والنصيب لهميلو وهابا عليا حتى نا مغير نزرق 😂Hamelo ,,
المهم هديل بالفون : اسمع يافهد نا كثرت دوة معش عندي ومن الاول اتفقنا نتعرفو ونتفاهمو اكثر من هكي لا ,, وبعدين انظني انت واتي مافيش شي يمنعك الا اذا امك مش موافقه ? 😒
فهد : ياحبي والله شاريك لكن نرجا في الفرصة بس. وبالنسبة لامي مش شورك حتوافق أكيد ,,😊
هديل : خلاص من هنا لعند اتفكر ادير خطوة ولا لا معش تتصل بيا لاني مايهونش عليا تدير شي من ورا هلي ,, باي 😒
وسكرت عليه وفهد انصدم وغمتله ورن علي امه عشان ايروح بيها وهي قالتله بتروح مع عيت ولدها الثاني ,,
وعند مناجي اللي اول ماوصلت للشقو لقت وسام ومفتاح في الصالة والتفتت اتشوف ........
بكرة الاخيرة عاد توقعاتكن ,,😍
سامحتي عالتأخير غصبن عني والله ,,😊
#Hamelo ✒
