رواية #مناجي_والنصيب
الحلقه / 5
للكاابه Gazala Bobacer. هميلو ,,
وصلنا لعند مناجي روحت مع حنها وعيت عمها وخشت طول غيرت دبشها وبدت اتضم في الحوش وهي اتحوس وتبخر جتها فداء وهي منحرجة من مناجي وقالت : معليش ,, مناجي 😟
مناجي التفتت عليها وقالت : ايوااا ,, تبي حاجه ?
فداء : حني قالتلك ديري الغداء امبوخ ومحشي 😟
مناجي بغل بس وارت شعورها : اها باه ساهل انشالله انلحق ,, اصلا مافيش فلفل محشي ,😒
ومشت فداء عاودت للدار ومناجي همست لروحها : بدينا في الاوامر ديري وديري وهن اتقول عرايس مايساعدن حتى بغسلت ماعين خزززي 💦
وفعلا بعد كملت خشت عالمطبخ فكرت اتطيب رز مبوخ بعدها غيرت رايها وقبل بطيب مكرونة 😅 وبعدها قالت لالا مايصيرش ,,في الاخير قررت اطيب رز محبب وقلت معاه بطاطا وسلاطه وحمرت اللحم وطبعا مافيش وحدة خشت معاها عاونتها لا مرت عمها ولا بنات عمها ماهو حوش حنهن حتي هن 😒 بغدد وخلاص ,
المهم حطت صفرة للرجالة وصفرة للصبايا وحطت الشاهي عالنار وجهزت صفرة المشروب للرجاله والصبايا وتجري وواصله حدها خشت عليها حنها ,
الجدة : وينك ياحنه كنك طولتي بالغدا 😬
مناجي شالت صفرة الرجالة وطلعت من جنبها ولا عبرتها وهي غاااامة عندها. وحنها تهزب فيهر وطبعا مناجي تسمع فيها تعارك وفاتت ,, وقربت من باب المربوعه وخبطت عليه وطلع معاويه القيها تنفخ وقريب تنفجر مسك ضحكته عليها وخذا الصفرة وخش عالمربوعه وبعدها عطاته صفرة المشروب وشالت صفرة الصبايا وطبعا قمعزن دارن حولاقه وبدن فيها وحنها بعد قمعزت ماعجبهاش الغدا وشافت بغل لمناجي وقالت : كنك درتي رز ? مش دزيتلك مع فديوة وطلبت منك حاجة مبوخه ومحشي ? 😒
مناجي وهي تاكل وتفقش في البصل الحويل وقالت : الله غالب مالحقتش وبعدين مافيش فلفل محشي ولا كوسه وكثر خيري اللي لحقت طيبت ونا من جيتي ونا نلهد اتقول بنقلا ,,😒
عايشه تاكل براس الكاشيك ومنقهرة ماحتى تبي الغدا رز تمناته بالخلطه وعصابين ولا كسكسو باللحم الوطني لكن عاااد خابن اظنونها 😅
المهم قالت عايشه : لا عاادي ياعمتي كثر خيرها مناجي ,, مغير الصديق ماياكلش فيه الرز فاكيد حيقعد بلا غدا 😒
مناجي لمرت عمها : وليش ياعمتي ماخشيتي للمطبخ وطيبتي اللي ياكل فيها عمي انتي مش برانيه وهضا حوشكم زي ماحوشنا ,, والا شنو قولك ياحني ? 😏
الجدة : كلامك مزبوط هضا حوشهم لكن عيب اتخش عمتك عايشه اتطيب وانتي قاعده 😒
مناجي بنظرة ناريه لحنها : والله صااااح ? وعليييش ? وبعدين انا بنادمة ونتعب المفروض فداء وفرات خشن ساعدني عالاقل وحدة قرضت السلاطه 😒
فرات : علي اساس دايرة محاشي وعصابين ,, هه شن اللي تعبتي فيه ? رز يابس وبطاطا مقليه رااامضه 😏
مناجي شافتلها وقالت : اها صحيح بدليل مكانك ممسوح وخشيتي علي نص الربيعه وتبسي البطاطا اللي قصفتيه بروحك 😏
وصبت مناجي بعد شربت مشروبها وقالت : خلاص العشا عليك فروووتا ونذوقو تطييبك 😏
فرات : 😨
وطلعت وخلتهن بيولعن من الغيظ وخشت للمطبخ وقمعزت عالكرسي متاع الطاوله في المطبخ وتنهدت بتعب وقهر وقالت في سرها : لازم يفهمو اني مش خدامة عندهم ,,مش كان امي سيبتني بيستغلو وحدتي ويتأمرو عليا ,,صبركم عليا ياعيت عويشه حنلعبكن عالشناكل 😏
حي عليهن 😁,,
وصبت بدت اتضم في المطبخ علي خشت فداء جايبه صفرة الغدا ووراها فرات بصفرة المشروب حطنهن وطلعن وطبعا فرات بنظرات استكراد ومناجي بتزقب عليها اتريشها مغير استغفرت ربها وقعدت حايسه وتضم وبعدها لقت الشاهي الخضرا طايبه طفت عليها وحطتها في صفرة حلوة ومعاها طواسي الشاهي وحطت معاه المكسرات وهي تمشي للمربوعه خبطت عالباب وقعدت ترجا في معاويه وهي تخرط وتهزب وتسب وسمعت حد قاللها : نعم شن تبي ?
لفت عمتكن مناجي وتلقا الشبوب مصبي انصدمت 😳 وعاودت تجري لباب الصاله وقالت بصوت عالي : انت شن ايطلع فيك عليا وين معاويه ? 😳
الشاب : معاويه روح بعد تغدا طول ,, انتي من ?
مناجي : نعنجد نا من ? انت اللي من ? ووين عمي الصديق كيف ايخليك تطلع عليا هكي 😬
الشاب : هااا كيف نا من ? نا من اصحاب الحوش وبعدين سقديني مش فاضي لقطاف عيت حنة شن تبي ?
مناجي مدت ايديها بصفرة الشاهي وقالت : هاااك ,, جايبة الشاهي 😬
قرب خذاه منها وخش للمربوعه ومناجي مشت للمطبخ وهي تعارك وتهزب البنت هذي عدتها حنها شكلها ديما اتعارك 😁
المهم مر الوقت ومناجي خشت لدارها بترقد واتريح وطبعا مرت عمها ازرطت مع عمتها العزوز المنجوهه تستاهلها 😂 والبنات خذن دار جنب دار حنهن فاضيه وزي المعيشه حطن فيها دبشهن وفرشن فيها ورقدن ,, وبعد وقت اذن العصر ومناجي بطلاااانه مازالت راقده من التعب والزر ,, خشت عليها حنها: انتي يابنت ,,مناجي هووو يادعوة نوضي المغرب اذن 😠
مناجي ناضت وشافت لحنها : خييير شن تبي ?
الجدة : فزي خفي روحك ديري قهوة العصريه وحطي صفرة انعصرو جواعه بعد الغدا ماضقنا حاجة ,
مناجي : والله صاح ياام زكي بتكسرن الصفرة علي راسي ? 😏 وليش ماتطلبي من بنات ولدك الثانيات ? مش حنهن انتي ? وبعدين نا بطلانه وشكلي بنمرض وراسي مصدع قولي لفرات ولا فدوى مش برانيات ,😒
وجت بتحكي العزوز وتقاطعها مناجي بتفنيصه : ريييتي راك اتقوليلي ضيوف وبغدد راااني وااصله حدي زي مانا بنت ولدك هاضوووم عيت ولدك ومافيييش حد براااني ايواااه اطلعي وخليني ننخمد انشالله نرقد وماعاااد انوض 😡
وحنها لوت وجها وجت تطلع وقالت : انشالله 😒
المهم في هذكي العشيه لا طلعت ولا عبرتهم ودارت روحها مريضه وطلعت فونها لقاته ايرن ,
مناجي : ايوا رحاب ,
رحاب : خيرات ياسمحه شخبارك ? 😊
مناجي بقهر : انعنهن ماهن اخبارك ,, بغدد 😡
رحاب : كنك ياخيه شن دارو فيك 😳
مناجي تنهدت وقالت : فوووتي ياخيه ,,, احكيلي كنك رنيتي ?
رحاب : ياحنة عندي لكي خبر بمليون جنيه 😊
مناجي : قولي بلاش براده 😮
رحاب : عمتي ام رافع اتصلت بامي مبدري في العشيه ,
مناجي :وكنها ?
رحاب : وسالت امي عليكي ,😀
مناجي باستغراب : كيف ? وعليش ? 😕
رحاب : هههههه ياغبو سالت اذا مخطوبه او في حد مكلم عليكي افهميها 😁
مناحي : باااااهيييي 😍
رحاب : وامي قالتلها لا مافيش فقالت في عندها خوها اخر واحد في خوتها يدوروله في بنت حلال وبعد شافاتك قالت عجبتني وحكتله عليك وقال شوفيها ليا وهي تبي اتجي وتخطب وراهو بحوشه وسيارته 😍
مناجي : 😍
رحاب : بابنت وين رحتي ? 😅
مناجي بفرحة ومش مصدقه : ينعلي تحكي جديات يارحااب 😍
رحاب : والله كيف مانحكيلك 😃 هاه شن قولك ?
مناحي بلعت ريقها وقلبتها عالسريع في راسها وقالت : ريتي يارحوبا انتي عارفه وضعي وحالي اسألي رافع عليه مش يقعد خاله ? اكيد حيحكيلك عليه اهم شي يكون راجل يخاف ربي فيا 😔
رحاب : حاضر من عيوني وانتي صلي استخارة وبكرة امي بتتصل بيك عشان جيت العرب 😊
مناجي : انشالله خير ,
وودعن بعضهن وسكرت من بنت عمتها وهي فرخانه وتدعي ربي يسهل موضوعها , وبعدها اذن المغرب توضت وصلت وطلعت تشوف في الاجواء لقت حنها ومرت عمها في المربوعه حسهن ايهدرزن مع عمها الصديق وبنات عمها في الدار متاعهن وخشت للمطبخ بدير نص لانها جاعت وتنصدم بالشاب في المطبخ ,
مناجي : بسم الله انت من ياراجل ? 😳
الشاب وقف وعرف انها هذي مناجي بنت عمه اللي حكاله عليها باته وقال : انا قيس ,,قيس ولد الصديق عمك 😐
مناجي لاحظت شخصيته بس ماعدلتش وقالت : اااه قلتلي هضا هو انت ? تشرفنا ونا انقول زارقلي في كل مكان 😒
وخشت فتحت الثلاجة وطلعت جبنة وهريسه وخذت كسرة خبزة ودارت نص وصبت عصير وهو طبعا كان يشرب في قهوة ويشوفلها من تحت لتحت ,, وجت بتطلع فقال قيس : مش مفروض اتعرفيني علي روحك.?
مناجي شافتلا برفعت حاجب وقالت : علي اساس ماحد حكالك عليا ? وياسيدي مش مشكله انا بنت عمك خليل ,, واسمي مناجي ,😒
قيس ابتسم لان كان بيشوف اذا تقول اسمها او لا وقال : عاشت الاسامي يامناجي ,,☺
مناجي شافتلا بنظرة غل وقالت : عاش راسك ,,
وطلعت وهو ايشوفلها وضحك علي حركاتها ومناجي خشت لدارها وقمعزت وقعدت تاكل واذكرت كلامها مع قيس وابتسمت بعدها قالت : اخخخ بس حظي الزفت فروخ العيلة هذي كلهم اسامي راقيه فرات فداء قيس رحاااب حتي اصغر عمة ليا اسمها بسمة وناااا منااااجي ,,اخخخ الله لا اتسامحك ياحني ,, ولا يسامح امي اللي نسيتني 😔
وقعدت تاكل بالغصة والعبرة والدموع يطيحن من عيونها بدون صوت ,, شعور وااعر الحق ,, انك تشعر بالخذلان من اقرب الناس لكي 💔
رواية مناجي والنصيب لهميلو ,,ايواااه لمن لهميلو اللي هي من غزااالو 😂 حليا منكن وخلاص 😘 فوتن نعموشاتي خلاص ,,
المهم جا وقت العشا وعايشه اظطرت اتخش اطيب والصديق هو اللي طلب منها مقطع جاري وهي ماحتي تبي اتطيب والعزوز الحرفه معاها في المطبخ ,
وعند الرجاله الصديق لولده : شن صار ياولدي حصلته الراجل والا مازال ?
قيس: كلمته انبدري واتفقت معاه ننشيله بعد الغشا خلاص باذن الله الموضوع منتهي ,
الصديق : انشالله يارب ,, والله يربحك ياولدي ,,باهي اللي حصلنا الحوش بسرعه بيش نستقرو ونتريحو ,
قيس : لا ماتخممش واحسن شي انه قريب من حوش حتي يعني عالكرعين توصل ,
الصديق : وهضا اللي نبيه ,, الصراحة حنك ماعاد كيف قبل كبرت وتعبت ولولا بنت خليل اللي معاها واتعاني فيها راهي سايبه ,,شكلها بنيه طيبه وكويسه وشكلها حرة ريت هالغدا السمح اللي داراته في وقت قصير وبعدها الشاهي الخضرا , 😊
قيس في سره : هه وشكلها حصله اخرا 😏
المهم طاب العشا وتعشو الا مناجي ماجتهش نيه وبعد كنلو غسلت ماغين العشا وسيقت المطبخ وخشت لدارها رقدت ماتبيش تحتك لا بحنها ولا مرت عمها ولا بنات عمها وصلت العشا ورقدت وقيس والصديق خشو لدار العزوز وقعدو ايهدرزو معاها وطبعا التلفزيون في دارها والبنات معاهم وصوت هدريزهم واصل لمناجي اللي تدعي ربي يفرجها عليها في كل وقت وحين وغفت ,,
وفي صبح ثاني يوم ناضت مناحي جهزت الفطور وكانت واخذة دوش والمتشف مكعبرته فوق راسها وتغني واتحط في الكبابي ومافطنتش للي يشوفلها باعجاب طبعا قيس ,, ومشت للثلاجة اطلع في الزيتون وقيس قرب منها وقال : صباح الخير ,😊
وهي تصكها عيطة نين قريب طاح فازو الزيتون وشافتلا : الله يفجعك , رقدت اعظامي 😨
قيس ايشوف لصفرة الفطور : مم اسف مش قصدي بس نضت جيعان الخق وشنيت بنت قهوة معش تحملت ,
مناحي سقمت المنشف بحيث غطا شعرها وقعدت اتحط في الزيتون وقيس مستغرب سكوتها وقال : انتي كنك ديما متعقدة وراقيلك ?
مناجي رفعت حاجبها وقالت : انا حرة وبعدين انت شن دخلك مش تبي تفطر امشي للنربوعه وحيجيك فطورك انت وعمي ,
قيس : باتي مازال راقد ,
مناجي : خلاااص حنحطلك مع حني لانها واعيه تم ?
قيس : وانتي ?
مناجي : بنفطر بروحي ,
وشالت الصفرة وطلعت لدار حنها وقيس قرن حواجبه ولحقها وهو خش صبح علي حنه ومناجي طلعت ,, طبعا عايشه هربت ورقدت مع بناتها ,,😁
المهم قيس قهراته حنه بالنشدة وهو يجاوب باختصار ,, ومناجي كرست في دارها تفطر,
المهم نرن يومين مناحي معاملتها رسنية مع حنها وعايشه وبناتها وقيس الا عمها الحق حنون فيها وطيب ومناجي تريحتله ومن قبل غالي عليها ,,
المهم مناجي طلعت بتخش المطبخ ونست العتبه وهي اتلفت علي قيس اللي خش هو وباته لدار حنها وتلتقط وشلبااخ 😁 علي وجهها ومن خوفها ايشوفها حد قعدت تزحف عالاربعه نين خشت المطبخ وبعد خشت جت بتصبي وطاااف انخبطت في الرخامه علي رلسها قمعزت وقعدت ماسكه راسها وتقول : اااه اخ يارسي ينعلي ياخشمي وااااك عاليوم الاسود 😖
وتسمع قيس ايقول : لاباس كنك ?
وعيطت كالعاده كل ماتنفجع 😁 وجت بتصبي وتخبط في حكنه وهو عيط بكتمة وهي ردت عالوطا تهايالي داخت او فقدت الذاكرة وقيس خاف عليها وقعد ينادي فيها ,علي خشت ...............
توقعاتكن ياحناتي ,, وادعن معايا ربي يقوي الشبكه عندي لاني نقهرت وتبغددت 😬
@#Hamelo ✒
