قراءة ممتعه ,,❤❤
رواية #مناجي_والنصيب
الحلقه /12
وصلنا ياحناتي لعند مناجي اطيب في الشاهي للعيلة الملتمة من عمامها وباتها ورت فونها شافته لقاته رقم غريب فاتت مابتش اترد لكن الرقم سكن ,, وبعدها جتها رساله (وسام معاك ياخوافه )
ومناجي من الصدمة يبستها ,, وفتحت في اخر لحظه بعد رن عليها ,
مناجي : ايوا ,
وسام. : واخيرا يا مجنونة فتحتي ,
مناجي : 😶
وسام : وين رحتي? انتي يابنت !!
مناجي : ايوا معاك ,بس اللي مستغربه فيه كيف جبت رقمي ?
وسام : نا مانوحلش ,,
مناجي : شكلك مش ساهل ,,
وسام : زيك انتي ,
مناجي : انا شنو ?
وسام : لبوة ,😍
مناجي ضحكت بعفويه وعمكن وسام ذاب مع صوت ضحكتها ,,
وسام : نوجا ,,هضا رقمي احفظيه عندك ,, وبعدين حنكلمك اذا ماعندكش مانع ,😊
مناجي بفرحه : اوكي حنحفظه ,, وننتظر اتصالك ,😍
وسكرت منه وهي الفرحه مش سايعتها ,, وبعدها قالت لروحها ( حي عليا انشالله غير مااستعجلت بموافقتي عالمكالمة !? زعما ?? ينعلي عااادي عاطي فيا كليمة انعني مانفقده 😍)
وخذت الصفرة اللي وتتها وخشت علي عمامها وحنها وباتها وقعدت اتمد في الشاهي ولاخظت وجه باتها متغير وقارن حواجبه ومبسوطه وجهها اسود وتشوف لمناجي بغل ,, وقيس ايشوف لمناجي بغضب وعمتكن مناجي الدم نشف منها وبلعت ريقها وقيس مابش ياخذ شاهي ,, وحطت الصفرة عالطاوله اللي في نص الدار وقمعزت عالسرير يالا حنها وعمها عثمان قال : اهي البنت واسئلوها وهي اللي تختار ,
خليل : مش توا ياعثمان ,, مش وقته الكلام هضا ,
عثمان : وليش لا البنت بنتنا ومن عيلتنا وخير البر عاجله علي قول العرب ,, 😐
الصديق لعثمان : خلاص ياعثمان ساع يتشدها باتها واللي توافق عليه مانزعلوش منه سوا اختارت ولدي والا ولدك 😒
رواية مناجي واانصيب لهميلو ,, Hamelo ,,
كيف حالكن اليوم مليشيا ? ,😁 👋
مناجي قعدت استقبل في الصدمات وبان عليها الموضوع وحست بقلبها بيوقف وشافت لحنها والجده دارت روحها اتسبح ومناجي وقفت وطلعت لدارها وخشت وهي خلااص بتعيط ,, علي خشت رحمة جايبها معاويه وخشت عالدار لقت الجمعه عاد وسلمت وقمعزت جنب امها ونشدتهم حكولها ان عيت خوها الصديق خطبو مناجي لقيس واينط عثمان ايقول البنت تبيها لولدي فهد وصار نقاش وقبل تعاركو نين هداهم خليل اللي وجعاته بنته وقاللهم ماحد له حق الموافقه الا صاحبت الشأن اللي هي مناجي ,, ومبسوطه انجمطت قبل مسكها العصب السابع 💦😒 ولوالها وجهها وريم زادت سكرت راسها انها تبي مناجي لولدها ولما سالو العزوز ,
الجده : الحق مناجي تربايتي ومانودلها احسن من اعيال عمها ,, لكن الحق مش عارفه من اللي يكون صاحب النصيب ,, وهم الاثنين اعويلتنا ,
وبعد حكو اللي صار لرحمة قالت بهدؤ: بس مناجي امس جن صبايا يخطبن فيها والبنت موافقه عليهم ,
الثعلب ,,قصدي مبسوطه قبل ولعت 🔥 وهي مقمعزه وماشر منها الا ريم اللي عيونها قبل بلطن ,, وخليل شاف لرحمة باستغراب وقلل : من يارحمة ?
رحمة : ولد جارنا نجم الدين الله يرحمه ,,وسام ,
الكل منصدمين وقيس وقف معصب وقال : انا ولد عمها واولالها من الغريب ,, نستخيل يزفها غيري ,😡
وطلع وعثمان قال : وكيف هي موافقة ?? نش المفروض ايجو رجاله لبوها والا كلام الصبايا هو بيمشي 😏
رحمة : لا ياخوي اكيد بيجو الرجاله ,, هن الصبايا امس جن وتكلمن عليها ,,
مبسوطه بفتنه : مادام امس بس جن وحكن فيها امتا وافقت ? مش المفروض تاخذ وقت واتفكر وبعدها اترد عليهم ? والا ااموضوع متفالك مو قبل ?
رحمة بعصبيه بس بصوت واطي : مبسوووطه ,, ياريت تلتزمي حدودك في الكلام علي مناجي لانها متربيه كويس ومش هي اللي اتخون ثقتنا فيها وحتي لو مش عايشه مع باتها ,, وبعدين من قالك مافكرت اصلا هي صلت استخارة في الليل وفي الصبح شاورتني وقالت موافقة ,, لانها تريحت للموضوع ,
مبسوطه : 😒
رحمة لعثمان : وبعدين انتم المفروض كلمتو خليل قبل ونشدتو ,,
ريم ادخلت وقالت : ريتي يا رحمة نا يوم بيان بنتك كلمتك عليها اول وحده وفهد اولدي مايعيبها شي ,,
رحمة : صاح كلمتيني عليها ياريم ,, بس غزلان كلمتني قبلك ونا ماقلتش شي ,, والبنت حرة تختار اللي تريحله ,
عثمان وقف وقال بعصبية :الكلام هضا مايصيرش منه البنت بنتنا نحنا ولازم تختار واحد من ضنا عمامها ياقيس يافهد ,, الا ولد نجم الدين هضا ردو عليه بلا ,
رحمة : ياعثمان مايصيرش هكي ,, البنت من حقها تختار اللي تبيه يكون شريك حياتها ,, ووقت توا معش حد يجبر في بناته علي حد ,
الصديق ساكت وقارن حواجبه وصبا وقال : خلو البنت تختار علي راحتها كل شي بالغصب الا حبني يابنادم ,,وقوليلها. يارحمة تختار علي مهلها ومهما تختار نا مستحيل نزعل منها ,,هذي حياتها وهي بس من حقها تختار حتي لو اختارت ولد خيات نجم الدين ,
وطلق عليهم السلام وطلع الا عثمان معصب وريم شافت لخالتها وقالت : وانتي ياخالتي شن رايك ?
الجدة :ماعتدي شي راي ,, البنت حال الغايه لولد عمها ,, لكن تو اللي كلمو فيها ضنا عمها الاثنين واللي ممتوبلها ساع ياخذها ,
ريم ناعحبهلش كلام. خالتها توقعت اتجي معاها ,, لكن ااجده جت بين نارين قيس وفهد وهي الحق غالي عليها قيس اكثر وتمنت مناجي ياخذها قيس ميف عرب واجده تقرا توا 😁
المهم خليل صبا ومشا لدار مناجي ودق الباب وخش بعد سمحتله مناجي كانت مقمعزه عالفراش وتبكي ,, لكن بعد لقت ان باتها جاها صبت وقعدت تمسح في دموعها ,
خليل : قمعزي يابنتي ,, نبي نحكي معاك ,
قمعزت مناجي بدون ماتحكي وخليل قمعز جنبها و قال : ريتي يابنتي نبيك تعرفي شن انقولك والكلام افهميه كويس ,, نا عارف روحي مقصر معاك واجد ,, وماعمريش وقفت معاك في شي ,, لا في قرايتك ولا في طفولتك نا ماعنديش عذر بس كنت متهني عليك مع رحمة عمتك مع ان هضا واجبي نا مش عمتك ,,
مناجي : 😔
خليل تنهد وشافلها وقال : عارف انك انظلمتي واجد وانحرمتي من امك وانتي لحمة حمره وفي عز حاجتك لها بس نبيك تفهمي اني كنت زي المنعمي عليك زي اللي ناسيك او مش متذكر اني عندي بنت ,, عارف انك مش حتصدقيني بس هضا اللي صار وفي شي صار معاي حنحكيه لكي مع الايام ,,بس تبيك تعرفي اني باتك ومانودلك سو ,
مناجي : تعرف اجثر شي كنت محتاجته في خياتي اني اناديك باتي ونعتند عليك ونفتخر بيك انك سندي قدام العيلة والجيران والناس كلها ,, 😢
خليل : عارف ,, وسامحيني لاني قصرت معاك ,😔
ومسك يد بنته وقال : ونا ايهمني رايك انتي علي من موافقه من العرسان اللي خطبوك ?
مناجي باحراج : الحق ياباتي من ضنا عمي بسلامتهم مانبيش حد منهم ,, لاني لاني
خليل : لانك شنو يابنتي ?.احكي ,,
مناجي خافت اتقول موافقة علي وسام باتها يفكر انها دايرة معاه علاقه ويفهمها غلط فقالت : لاتذ حاسبتهم زي خوتي بحكم عشت مع حني وايجو هنا ديما مش مقتنعه نتجوز حد منهم ,
خليل ابتسم وقال : معناها موافقة علي ولد جيرانا ولد نجم الدين ولا ?
مناجي سكتت وخليل قال : السكوت علامة الرضا يابنتي ,, وعلي بركه الله ,,
مناجي : بس عمامي ااا....
خليل : خليهم شوري ,, نا باتك ومازلت حي لا عمامك ولا حد يقدر يفرض عليك شي ,
متاجي فرحتها بكلام باتها ماتتوصف لانها حست بالقوة وان لها سند بجد يحميها ويخاف عليها ,
وحضنت مناجي باتها وكانت اول مرة تحضنه وهو تأثر ,, وطلع خليل من دار بنته بعد طمنها ومناجي الدموع في وجهها وخشت رحمة وحكتلها مناجي باللي قاله باتها وحضنتها رحمة ومناجي تبكي ,,
رحمة : طيب فيك يابنتي اللي حن باتك عليك ,
مناجي : مش مصدقه يايمي ,, فرحانه بجد ,,
رحمة : اااه الحمدالله ,,المهم توا انتي موافقة علي ولد غزلان ولا ?
مناجي رقصت حواجبها وقالت : اهاا اهاا ,😍
رحمة : هههههه علي قولت هديل غابو غابو وجوك جية وحدة 😂
مناجي : نين رقدو كرعيا من الصدمات ,, وهابا مان شفتي وجه الثعلب وهي اتخزر فيا كان في يدها موت راهي طلقتها عليا 😁
رحمة : انشالله في عدوك ,, خلاص نا نبي انروح وحنرد علي غزلان بالكي اتعجل ولدها ويقرو فاتحتك بسرعه ,
مناجي :: 😍
المهم روحت رحمة وعثمان عارك وهزب لكن في الاخير روح وخذا ريم اللي بتموت لو مناجي تجوزت قيس ولا وسام ,,
المهم فهد ماحضرش الاجتماع ,, وعند قيس مان يسوق ومعصب ومشا للبحر قعد مدرس. عالقطران ويدخن وهو غامتله ورن فونه القيها امه ,
قيس : ايوا امي ,, لا ماعنديش نية ,, قاعد مع اصحابي ,, اوكي ,
وسكر وهو راقيله عالاخر ,
انجو لفهد اللي يكلم في البنت اللي تعباته 😁
فهد : مغير اسمعيني بس نا والله مانبيها اصلا العزوز هي اللي ساكنتلي بيه الموضوع هضا ,
البنت : اوكي وشنو النطلوب مني توا ?
فهد : كيف شنو المطلوب ? حني عليا وخليني انشوفك بس ,,
البنت : مرات مانعجبكش بعد اتشوفني
فهد : متاكد حتعجبيني 😍
البنت : اوكي نفكر ,
وسكرت منه وهو هااايم وحالته حالة ,, انشالله اتأدبك هذي 😒
المهم غزلان اتصلت بيها رحمة وخبرتها برد مناجي وغزلان خبرت وسام وفعلا اتفق مع عمامه الاثنين وخاله انهم يمشو يخطبوها له ,, والمدة كانت بداية شهر 9 يعني علي خشت القرايا ,,
انطبو لمناجي اللي تدهن في كرعين حنها واتدلك فيها ,,😁
الجده : يابنت بشواش كسرتي كرعيا 😬
مناجي : اندلك بشواش ياحني مغير انتي اللي ماتتحملي ,
الجده : باهي خلااص سادك ,, عدي اشقي بحالك 😒
مناجي : حايره الحق شن انطيبلك عشا ,
الجده : لا ماتعبيش روحك جيبيلي تمر وحليب وخبزه بس ,
مناجي ببصاره :انديرلك مثروده وخلاص 😁
الجده : امشي بلا براده ,😒
وجابتلها مناجي العشا وهي دارت نص دحي وهريسه وخذت عصير ,, وتاكل قدام التي في, اتبع في مسلسل ليبي ,
الجده : قولي !! شن رايك توافقي علي قيس ?
مناجي شافتلها وقالت : لا اسفة قيس زي خويا ,
الجده : انتي ماعندك شي خوت ,, خوك معاويه بس. وبالرضاعه اخرا 😒
مناجي: حني الله يربحك ويسعدك في باقي ايامك انا واحد يقربلي مانبيييش نااخذه ,,ياريت وصلت 😒
الجده : يعني ولد غزلان خير من ولد عمك ?
مناجي بعصبيه : قاعده محمضه في العيلة الزايطه هذي كم سنة و بعد يجيني نصيب في غيلة اكويسه زي عيلت عمتي غزلان اتنطو فيها واتلطو عليا ,, هن كلمتين قيس ,,لاااا ايواااه ,😒
الجده : باهي ياستي ,,قيس لا ,, وفهد ? هضا عاد غزال مصور ماعندك فيه ماتقولي ,
مناجي : فكيني منه المغرور هضا,, لا فهد ولا نمر ريحيني يرحم والديك واجدودك 😤
الجده : فزي ,,فزي ارقدي عاطك مرقد وانتي جالط والسانك متبري منك , ساع يعزقك علينا ولد غزلان بعد يشوف جلاطتك , صيورك مروحه 😠
مناجي صبت وقالت : فال الله ولا فالك ,, نا مغير نطلع كان شفتو وجي بعدها دقيها ليا خضرة هن ,
وشيرت علي حنكها 😁😂
رواية مناجي والنصيب لهميلو ,, Hamelo ,,
وخشت مناجي لدارها بعد شالت كبايتها وغسلتها مع صفرو حنها وفرست اسنونها ودهنت بمريمة النيفيا ديها وكرعيها وحتي وجهها 😂 ماحتى لقت من يعطيها اشري كريمات هي كريمة.وحده وبعد كم شهر تحصلها ,😅
المهم وطبعا رن عليها وسام وهدرزت هي وياه ,,وحكالها انهم بكره بيمشو لباتها ومناجي اتفقت معاه يجو الرجاله لمربوعه حوش جدها احسن وباتها يلقوه هنا بحكم اترن مناجي علي باتها مرة مرات ,, كان حصل فرصة من المسمومه اللي عنده ,, المهم وسام وافق خير مايقعدو ايدورو في حوش خليل ,,
وسكرت منه بعد نص ساعه بس لانها معودته ماطولش معاه في الهدرزة ,
وفي صبح ثاني يوم ,, ناضت مناجي علي صوت حنها كالعاده السيمفونيه هذي كل صبح تصبح عليها 😂 الله غالب وناضت بدوت ماتجادل معاها وجهزت الفطور ورن ااحرس فتحت لقتها رحمة والبنات حايبهن مفتاح سلمت عليهن ومفتاح سلم ومشا لعمله ,,
ورحمة والبنات بعد سلمن علي حنهن خشت رحمة مع امها والبنات فط للدار يقصقصن علي اخبار مناجي ,, وحكتلهن مناجي وهديل قالت : باهي ,, ف فهد شن قال يوم اللي جو ,?
متاجي : ماتكلمش حسيته مش مدور الموضةع بس عمي عثمان وعمتي ريم هم اللي معندين وعاركو ,
هديل ابتسمت بعدها ورات بسمتها وهلت روحها عاديه ورحاب قالت : ينعلي ياجيجي امس قعدت علي اعصابي ونا نحدا في العيال ايجيبوني لكي اكن خزوو فاتوني ,😒
متاجي : عادي ياخيه المهم اهو جيتن توا ,
وطلعن يحكن مع رحمة في النطبخ ورنت رحمة علي خليل وبعد سألاته امتا إيجي قال .........
شن قال وشن بيصير عذي يوم السبت نعموشاتي تعرفنها 😘
Hamelo ✒
