اتحركنا من صالحة بعد صلاة الجمعة انا وعمار راكبين عربيتي . لابسين جلاليب الصلاة ..وطواقي وبنتونس.. ماشين الكلاكلة..انا طلعت كوبري الفتيحاب شايف بالمراية في تلاتة مواتر ماشين وراي . بعاين بالمراية اليمين واحد وبالمراية الشمال واحد وبالخلفية واحد.. حسيت انهم متابعني ..
قمت هدنت العربية هدنو معاي .. شديت العربية شدو وراي .. لمن قطعت الكوبري.. قربو علي شديد.. وظهر بوكسي قبينة واحدة ..راكبين فيهو زي تلاتة انفار ورا ..
شكلهم الناس ديل كلهم مع بعض يتشابهو .. المهم قربو علي شديد البشمالي ده اشر لي قالي اقيف .. وقفت ..مع نزلة الكوبري في حتة فيها شجر كدا علي يميني وقفت فيها ..
والموترين الاتنين وقفو .. والراكبين فيهن نزلو ..والبوكسي وقف..
نزل من البوكسي واحد صاري وشو وعينيهو ديل كلهن شر.. شكلو رئيس الشلة دي .. وانا نزلت وعمار نزل ..
الزول ده قال لينا ارفعو ايديكم فوق .. وجو ماشين علينا كلهم .. الزول القدامهم ده قال لينا معاكم النقيب شريف .. مكافحة المخدرات ..
لمن قال كدا.. انا اضني صننننن .. وقلبي ده وقف عديل والله اول مرة اخاف كدا ..
قلت ليهو مرحب سعادتك لكن في شنو؟
نحن ماعندنا علاقة بالمخدرات .. قال يازول اسكت ساي ..
قال لي واحد منهم .. فتش الناس ديل .. داك جا بدا بي انا .. قعد يهبش في اكتافي وجيوبي وجمباي بي جاي وبيجاي ..
ومشى علي عمار.. اول ماهبشو من جنباتو كدا .. قال ليهو ارفع الجلابيه دي
عمار رفع الجلابية.. والفنيلة .
انا اعاين اشوف ليك عمار لابس ليهو حاجة كدا زي الحزام البلبسوهو الحجاج في الحرم.. ابيض كدا لكن كبير شوية .. قريب للحزام البلسوهو ناس التخسيس ..
بدون ما اححس قلت ليهو ده شنو ياعمار؟
قال ليهو اسكت ساي دي قسمة بس .. بتاع الامن فك الحزام من عمار وطلعو برة.. وحتاهو في كبوت العربية وبقى يفتش زيادة .. لكن مالقى حاجة غير ده ..
فتحوا لقى فيهو بنقو .. تلاتة راس بنقو كباااااار .. الزول ممكن يشرب فيهم شهر مايخلصهم ..
حاجات ملقدفة كدا خضراء ويابسه اول مرة اشوف الحاجة دي ..
الضابط قال لينا اركبو الاتنين في البوكسي ده ..وقال لي انت يازول ادي الزول ده مفتاح عربيتك دي .. ويلا اتحرك ..
سلمت واحد منهم مفتاح عربيتي .. وقلعو مننا تلفوناتنا .. وركبونا انا وعمار لاوين يدينا لورا .. وبلزلزه كدا بطريقة مهينة.. لزونا لز البقر الدايرين يدخلوهن البنطون .. وبالدفير طلعونا فوق البوكسي بورا ..والله انا اتمنيت الواطة دي تنشق وتبلعني ..
لمن ركبنا بقيت مدنقر لي تحت..
وعمار مدنقر ماقادر يرفع راسه يعاين لي في عيوني والعساكر زي اربعة كدا راكبين معانا ورا ..والضابط ومعاهو اتنين راكبين قدام وبتونسو وبضحكو وبعاينو بالمرايات ..
وصلنا حتة كدا المهم مكاتب ومباني مبنى داخل مبنى ودخلونا بالعربية جوة
انا قلت الناس ديل جابونا هنا ليه موش المفروض يودونا قسم الشرطة .؟
المهم نزلونا..
اناقعدوني في حتة كدا في كنبة ..
ومعاي اتنين واحد كدا شكله زول مولانا ..علامة الصلاة والدقينة والتاني اسمر غليد وخاتي سفة يتف دي ويخت دي ..مسكو ليك عمار ودخلو بيهو جوة ..
وانا قاعد منتظر قريب الساعة ونص الواطة بقت عصر .. بعد المدة دي كلها قالو لي قوم .. قوم على حيلك يازول ..
قمت بنفس الطريقة المهينة .. والدفير من ضهري .. بلزو فيني كدا والله لمن قلبي سخن .. غايتو الحمد لله ..
خشيت جوة .. وانا داخل على مكتب.. لاقوني اتنين .. سايقين عمار .. وشو مورم وخشمو نازف دم .. وعينو واحدة جمرا ..
شكلو الزول ده طقطقوهو طقطقة بلارحمة . وانا الراجيني يعلم بيهو الله .. ومن دون ذنب غايتو الحمد لله النشوف ..
وبقيت بصبر في نفسي .. واقول يامحمد اثبت .. وخليك جبل..
اوعه تتجرس لو ضربوك طلقة.. الجاية من السما تتحملها الواطه.. والصقر ان وقع كتر البتابت عيب ..
المهم دخلت المكتب بتاع الضابط..
لقيت اتنين ضباط قاعدين في كراسي.. وفي واحد واقف علي حيلو .. شكلو فرد امن ماضابط .. لكن ده اظنو ياهو الزول البلطشك كان نكرت ..
المهم ختو لي كرسي وقال لي اقعد .. لو اتكلمت الحقيقة مابحصل ليك اي شي ولو لفثيت ودورت بنفسحك فسحة ماسمعت بيها في حياتك ..
قلت ليهو جدا سعادتك انا مابكذب والله ..
قال لي قول اسماء الناس البتتعاملو معاهم .. نفر نفر نسجلهم ..
البتشترو منهم والبتبيعو ليهم ..
قلت ليهو والله ياسعادتك.. انا ماعارف حاجة الا الشي الشفتو هسي ده لمن وقفتوني .. وماعارف الزول ده بشتري من وين وببيع وين..
الضابط قال لي ياود انت بتستعبط ولا بتتزاكى ..
انا طبعا ضهري بقى تخين.. واضني دي زي الفيهن بنج.. حسيت الزول الوراي خلاص ح يخبطني بيدو الماكنة دي في راسي ؟؟
قلت ليهو والله ياسعادتك .انا الزول ده اتصل علي الصباح كتير.. وانا كنت نايم والوالدة صحتني ..وقالت لي كيت كيت ورجعت ليهو ..وقال لي كيت كيت ..
لمن لقيتكم انتو وراي.. وماكنت فاهم حاجة ..لكن هو شكله كان عارف
والله انا لمن وقفتوني .مافاهم انتو منو. وعايزين شنو ..
وكنت مفتكر انكم غلطانين ..لمن عمار رفع جلابيتو وشفت الحاجة دي.. اتأكد انو انا في ورطة حقيقية..
قال لي بتعرف عمار ده من زمان ولا معرفة سطحية .. قلت ليهو لالا ده ودحلتي وصاحبي من زمان ..اسرارنا مع بعض وفي الحارة والباردة مع بعض ..
وانا عارفو مرات بلفها وبشرب البنقو .. لكن ماطوالي .. بس والله ماكنت مفتكر انو ممكن يكون مروج او موزع ..
قال لي طيب هو صاحبك يعني انت مابتسطل؟
قلت ليهو ابدا والله ..ولا سجارة حمراء .. ولابسف ولابعرف اشرب الشيشة ..
قال لي غريبة .. كيف يكون ده صاحبك وصديقك المقرب .. انت بالمناسبة المفروض تنجلد.. وتتخبط لمن راسك يسخن.. موش عشان انت متهم في القضية دي .. لا .. بس لانك بتصاحب زول وسخ زي ده ..
قلت ليهو والله ياسعادتك كلامك صاح .. بس والله كلامي القلتو ليك لازدتو ولانقصتو.. وماكذبت في كلمة ..
قال لي فعلا الزول ده قال نفس كلامك ده .. قال انك ماعارف البضاعة دي.. وانكم ماشين لزول.. اخوهو جا من السفر وقال انك مابتسف ولابتسجر ..
نحن مابنقدر نخلي سبيلك .لاانو المفروض تتحاكم لان البضاعة كانت في عربيتك .. والمفروض العربية تتصادر ..
مع اننا مقتنعين ماعندك علاقة بالموضوع.. لكن المحكمة هي البتحدد الموضوع ده .. شيل شيلتك ..غلطك انك بتصاحب ناس مابستحقو تسلم عليهم في الشارع .. وعشان تتعلم تاني تختار الاصحاب. لازم تتعذب عذاب الله اكبر ..
قلت ليهو طيب .. ممكن اتصل على ناس البيت.. واوريهم الحاصل لانو والله الوالدة عندها سكري وضغط ..
قال لي لو ريتها انو قابضنك في قضية مخدرات ..يادوب البتجيها جلطة .. مافي اي تلفونات .. يلا قوم اطلع برة..
نحن بعد نسلمكم وكيل النيابة وهو البقدر يتصرف..
طلعوني من المكتب ودوني علي غرفة كدا وفتحوا الباب وقالو لي يلا اترمي جوة معاهو ..
قعدنا انا وعمار في غرفة كدا مافيها سراير ..ولافي اي حاجة.. لامعروفة غرفة ولامعروفة حراسة .. وقفلوها علينا وبعد شوية جابو لينا موية شراب في جك بتاع المونيوم ..
في الوقت ده انا قاعد مع عمار.. واصلا ابيت اتكلم معاهو بس ساكت ومدنقر في الواطة .. عمار قعد يتكلم معاي ..
محمد ؟ يامحمد انا بتكلم معاك .. ابيت ارد عليه نهائي ..
قعد يبكي زي الشافع .. قال لي والله انا اسف ياخوي .. والله انت زي اخوي وانا ماقايل الحاجة دي بتحصل بالطريقة دي ..
علي الله تسامحني .. انا لو اعدموني ما هامي ..لكن المأثرني اني رميتك في مشكلة ..ماعندك بيها علاقة.. لكن والله اموت فداك ..وما تحصل لي حاجة ..
ما تشيل هم ..انا المتهم انك ماعندك علاقة بالموضوع .. قلت ليهو ما مشكلة ياعمار زي ماقلت دي قسمتي.. وانا الحمد لله راضي بامر الله ..
قعد يحكي لي في القصة بتاعة الجريمة قال لي .. انا طبعا والله يامحمد لاقاعد ابيع ولاقاعد اشتري .. بس صاحبي محمد نجم الدين الماشين ليهو ده قال لي تمش السوق الشعبي.. في زول بسلمك لي امانة.. عبارة عن تلاتة قنقرات
لو جبتهم لي بديك منهم قنقرة ..
وانا اصلا ماعارف اشتراهم ولا رسلوهم ليهو هدية .. بس همي في الراس البديني ليهو ده ..
قلت ليهو خلاص ياعمار ..الموضوع ده اقفل عليهو لو سمحت.. الحصل حصل
ونحن ورطنا وموضوعنا باظ .. وسمعتنا بقت في الواطة ..
المهم ياجماعة.. انا بطني طمت من عمار.. ومن الدنيا كلها.. وبقى يتكلم وانا ماسامع هو بقول في شنو.. من شدة الهم والغم ..
اها في تلاتة من افراد المكافحة .. جو
فتحو الباب وقالو لينا يلاقومو وركبونا ودونا قسم الشرطة ..
وهناك دخلونا حراسة عديلة.. وطبعا فتحو لينا بلاغ في قسم المكافحة .. وقعدنا 34 ساعة في الحراسة .. انا حاسبهن بالدقايق والحاصل في الحراسة احسن ما اقولو ليكم..
المهم .. صباح الاحد شالو البلاغ ودوه النيابة.. ووكيل النيابة صدق على البلاغ ..
وجو سلمونا تلفوناتنا ..وقالو كلمو اهاليكم .. ورجعو التلفونات.. انا اتصلت على ناس البيت ..واتكلمتا مع الصادق اخوي قلت ليهو كلم امي براحة كدا وقول ليها محمد سافر لعزاء في مدني وبجي يوم الاتنين او التلاتا وتلفونو ضايع ..
ونحن منتظرين يودونا وكيل النيابة.. وانا سارح في الح يحصل بعدو والمحكمة ..وجرجرة الجلسات ومصادرة العربية.. وعمر اخوي يقول شنو؟ والسجن سنوات والحمد لله غايتو ربنا يجيب العواقب سليمة ..
الى اللقاء
