الزول جا كابس الباب .. اعاين القاهو ليك ده عابد ..
بسم الله الرحمن الرحيم .. ده مالو؟ اعوذ بالله منك ياخي .. والله خلعني خلعة .. لمن حيلي برد .. قلت ليهو يازول مالك ؟ قال لي دسني دسني يامحمد ح يقتلوني ..
قلت ليهو هم منو ؟ قال لي بس انت دسني سريع .. ح يجو وراي هسي ..
قلت ليهو كويس .. خش تحت سريري ده ..
وقاعد يناهد شديد .. ماقادر يتكلم .. وانا الحقيقة شلت هم ياربي المطاردو منو .. شياطين ولا بشر ولاشنو؟
اصلا ماكنت متخيل الحاصل .. بتكلم معاهو هو تحت سريري مباشرة .. قلت ليهو اهدا ووريني براحة .. الحاصل شنو؟ قال ليهو اسكت اسكت .. هسي بجو ..
اصلا ابا يقول لي الحاصل شنو؟ بعد شوية تقريبا دقيقتين بس ..
اسمع ليك باب الحوش كوكوكو ..كوكوكو..
قال لي اها ياهوديل جو .. عليك الله يا محمد ماتوريهم اني هنا.. انا وثقت فيك .. قلت ليهو ماتشيل هم ..والله مافي زول يصلك الا على جثتي ..
الكلام ده ..
ما تم ليهو اسبوعين او تلاتة اسابيع من حادثة صفاء ..
قمت مشيت الباب وابيت افتح الباب .. قلت منو الفي الباب ؟
قال لي افتح يامحمد .. انا لؤي؟
قلت لي لؤي منو؟ وعايز شنو؟ قال لي بتفتح الباب ده .. ولا انا بنط فيهو جوز اكسرو .. افتح الزفت ده يامحمد .. عايزين نتفاهم معاك ..
انا طبعا قدر ما حاولت اتذكرت لؤي ده ياتوغلبني ..
في الاخير عرفت ده عم مودة .. مودة دي جكسوية عابد .. بس خلاص خمنت الحاصل .. هم جيرانا في الشارع الرابع .. فتحت ليهو الباب .. لقيت معاهو كمية من الناس .. امكن قريب العشرة انفار من جيرانا ..
والشايل ليهو عصاية والشايل ليهو سيخة والشايل ليهو طوبة وحجر .. قلت ليهم خير ياجماعة .. في شنو ان شاء الله خير .. قالو لي لاخير ولا حاجة ..في زول قصير دخل في بيت ناس عز الدين .. عز الدين ده ابو مودة .. لمن ناس البيت حسو بيهو .. وصرخوا قام جاري .. ونحن طلعنا وشفناهو جاري بالشارع .. وقصينا اترو لحدي هنا ..
جاء تلب في بيتكم ده .. تابعنا اترو لغاية ماتلب بالحيطة دي .. اصلك ماحسيت بيهو؟ ..
واحد فيهم قال ليهم .. انا قلت ليكم ده عابد صاحبو ..والله انا بعرفو من جريتو .. وده دربو ..
انا قلت ليهم تعالو وروني الاتر .. وجريت الباب وراي..
في اتنين مشو معاي على الحيطة كدا .. غرب الباب .. نحن بابنا فاتح شمال ..في شارع ماشي شرق غرب..
زي ماقلت ليكم في اتنين مشو معاي عشان يوروني الاتر .. وباقي النااس كلهم كبسو البيت جوة ..
انا جيتم جاري .. قلت ليهم ياجماعة ماتدخلو .. ناس البيت نايمين ..
قال لي بيتكم كمان فيهو بنات ؟ ما انت واخوك وامك وابوك .. قلت ليهم امي دي موش حرمة؟ ماتدخلوا ..
ادوني فرصة اخش افتش براي ..بس لانهم كتار بقو يدافرو فيني .. داخلين لي جوة ..
الصادق اخوي كان راقد في غرفتو .. عندو غرفة حقتو براهو .. في ركن البيت الغربي الشمالي ..
يعني في نهايو جدار باب الحوش .. من الناحيه الغربية ؟؟ الصادق لمن حس بي حركة الناس والجوطة .. صحى وقام جا طالع .. لابس فنيلة بحمالات وبجامة .. وطبعا الصادق مفتل .. ومجنون الاتنين عليهو .
قال لي يامحمد؟ قلت ليهو ايوة .. قال لي ديل منو ؟وفي شنو؟
قلت ليهو ديل الجيران .. ناس الحلة .. بفتشو لحرامي قالو نط في بيتنا .. ودايرين يدخلوا يفتشو في البيت وانا منعتهم ..
قال لي حرامي شنو؟ يعني حرامي نحن حنكون داسنو في بيتنا؟
ودخل جوة في غرفته .؟جاب ليهو قناية وجا .. عصاية غليدة دايما بختها تحت سريرو وينوم ..
وجاء ماشي عليهم .. وقال لي خليهم لي .. خش انت جوة .. فتش شوف في زول؟؟
شيل ليك معاك حاجة .. لو لقيت حرامي لابد ماترحمه ..
وجاء وقف ليهم .. قال ليهم البيوت عندها حرمة .. بعدين انتو بصفتكم شنو؟ تخشو تفتشو في بيتنا .. البوليس مابقدر يفتش في بيوت الناس .. لو ماعندو مذكرة تفتيش .. المهم ناقشوه وكوركو فيهو ..
والمشكلة كبرت .؟
في شاب كدا ببقى لي مودة .. رفع صوتو علي الصادق .. والصادق هجم عليهو بالعصاية .. والله لو مامسكوهو كان سفرو ..
المهم انا مشيت احوم جوة .. ..
طبعا لانو حوشنا مبلط الاتر مابظهر فيهو ... بس الحاجة الكويسة .. امي ابوي جوة في بطن البيت معاهم اخوي الصغير .. ماصحو بالجوطة دي ...
المهم طبعا الصادق هرشهم تب .. ومافي راجل منهم دخل لاجوة .. لانو لو دخلو ولقو السجم الاسمو عابد ده .. كانو قتلوهو .. بس انا تقريبا عرفت الحصل ..
انا لمن دخلت جوه بيتنا .. عشان افتش زي ماقال لي الصادق .. اخدت لي حومة كدا بتاعة سبعة دقايق.. وجيت لقيت ليك الصادق شايل عصايتو وحارسهم زي راعي الغنم وهم واقفين ..
جيت قلت ليهم مافي اي حاجة جوة.. مافي زول خش البيت ده الزول احتمال طلع بالجيهة التنية .. وهرب وناس البيت نايمين ونومهم خفيف ..ياجماعة .. و انا اساسا صاحي ..لو دخل زول هنا.. كنت حسيت بيهو ..
المهم لمن قنعوا مننا وفاتو .. واناقفلت الباب من جوة بالترباس .. ومشيت على الصالون .. والصادق اخوي مشى على غرفته ..
انا دخلت جوة .. وقلت لي عابد .. خليك لابد في محلك ده ماتتحرك .. لو الصادق ده حسه بيك بقتلك ..
بعد ربع ساعة كدا .. قلت ليهو اطلع تطلع روحك ياخ ..
ياخ مالك انت كل مرة جايب لي مشكلة؟ ..
ياخي انت مالك زول عارض كدا ؟.. انت مالقيت ليك حتة تمشي تتدسه فيها غير بيتنا؟؟ الله ينتقم منك ياخ ..
قال لي انا عندي منو غيرك؟ .. انا بثق في منو غيرك .. هسي لو ما انت الناس ديل كانو اكلوني اكل .. قلت ليهو ياكلك التمساح ياخ .. احكي الحاصل شنو؟ عملت شنو تاني يا الفقر ..
قال لي انا موش قلت ليك اليومين ديل بربط مع مودة؟؟ ..
قلت ليهو اي اها ..
قال لي قدر ما فكرنا لينا في حتة نمشي عليها .. مالقينا طريقة ..
حتى اتصلنا على مهند في المغتربين بحري .. برضو مالقينا عنده طريقة .. طبعا بحكي كدا ..
وكانه الحاجة دي عاااادي ..
قال لي في النهاية اتفقنا على اني اجيها بالليل في بيتهم ..
قالت لي بخلي ليك باب الحوش متاكا .. ومابقفلو من جوة ..
وباب اوضتي بخليهو متاكا ..
اول ما ناس بيتنا ينومو .. انا بضرب ليك تجيني .. بس انت تعال براحة ..
انا يامحمد والله وثقت في كلامها .. وقلت لو هي مامتأكدة .. مابتقول لي كدا .. وتدخل نفسها في مشكلة قدر دي ..
اها بقيت منتظرها تتصل علي .. زي الساعة اطناشر الا عشرة بالضبط ضربت لي .. وقالت لي ابوي قفل باب الحوش .. مافي طريقة الا تجي مطفر بالحيطة .القصاد اوضتي .. وانا بخلي ليك الشباك الفاتح في الزقاق بخليهو ليك فااااتح .. تدخل بيهو ..
اها طوالي انا مشيت علي بيتهم .. وطفرت بالحيطة بتاعة زقاقهم المن الجهة الجنوبية شايفها؟ .. طبعا بالجيهة ديك في قطعة فاضية ..
اها جيت بالقطعة الفاضية دي .. وبراحة نطيت في الحيطة زي الكديس .. ولمن داير اتلب جوة البيت .. في طوبة من الحيطة وقعت ..
بس بتكون دي الخلت عمها لؤي يصحى .. يلا اول مافتحت لي الشباك طلعت راسها .. عاينت في الزقاق .. اشوف ليك عمها جاء جاري .. شايل ليهو مصيبة في يدو ,,
بس هي اتصرفت لمن شافتو .. صرخت بطول حسها ..
وانا جيت ناطي في الحيطة زي بتاع الجمباز .. سمعتها قالت لي عمها ياعمي الحرامي داير يخش لي بالشباك ..
قال ليها اقفلي الشباك .. اقفليهو من جوة وقعد يكورك الحرااااامي الحرااااامي ..
والناس طلعو من بيوتهم .. وانا جاري .. وقعت مرتين .. كل ما الف بشارع اشوفهم هناك في اخر الشارع جارين وراي ..
جيت بس بشارعكم ده .. والله ماجيت قاصد اخش هنا .. الا لمن جيت بشارعكم .. بس لقيت الحيطة دي ساهله .. وساعدني كوم التراب البره طلعت فوقو ونطيت ..
قلت ليهو اعوذ بالله منك ياعابد ياخ .. عليك الله انت واعي ؟
في زول بمشي ليهو لي بت في بيتها .. واهلها موجودين .. انت حتى الجرايم مابتعرف تنفذها بي فهم ..
ياخي مالك داير تجيب لي مشكلة؟ .. ياخي الله يلعن ابو الاصحاب لو بقو زيك ياخ ..
انا ماعايز معاك علاقة تاني .. عليك الله يا عابد اختاني .. عليك الله حل عن افكاري ياخ ..
قال لي يازول والله تاني مابدخلك في مشكلة .. انا اساسا تاني توبة من حاجة اسمها بنات .. والله الليلة خوفت خوفة .. ياخي قبل كم يوم ماخد دقة .. واسي كنت ح اضيع فيها .. ياخي انعل ابوكدا زاتو ..
المهم حسيت انو الزول ده .. الليلة بكون جاهو اسهال ده لو مابال في هدومو .. الكلب خاف خوف شديد .. وتاني من الليلة شكله ح يتعدل ..
اها يازول بعد ماخلص حكايتو دي .. وانا حسيت انو الصادق اخوي بكون نام .. قلت ليهو النفتح لي الباب اتخارج براحة ..
الصادق مايحس بيك .. وامشي البيت بي شارع ناس يوسف ..
عشان ممكن جيران ناس عز الدين يكونو صاحين لسع ..
قال لي كويس تعال افتح لي الباب ..
مشيت براااحة فتحت ليهو الباب واتخارج ..
وانا قفلت الباب وراي وجاي انوم
فجأة كدا اسمع ليك الضرب في الشارع .. والكواريك والجوطة ..
شكلهم كانو لابدين ليهو بره ..ولمو فيهو والله دقوهو دق العيش واسمع ليك اللب اللب ..
الى اللقاء ..
