طبعا صفاء لمن سمعت الكلام ده اظلمت الدنيا قدامها .. وحست انها عايزة تعرف اكتر عن الموضوع ده قامت سألتها قالت ليها ..
وشنو يانسرين حكاية الكارثة العملوها وتليب البيوت القلتيها دي؟ ..
قالت ليها انتي بتعرفي عابد بتاع عفراء ده؟ ..
صفاء قالت ليها ايوة بعرفوا .. شفتو مع محمد اها مالو؟ .. قالت ليها .. عابد ده قبل ايام كدا قبضوه في بيت من بيوت الحلة ؟..مامعروف جاء يسوي شنو؟ لكن شكلو عايز يسرق .. لانو المراة ست البيت دي عندها دهب وكدا .. وفي اتفاق بينو وبين محمد شكلهم كانوا عايزين يسرقوهو..
لانو لمن الناس صحو بيهو سكوهو جرى دخل بيت ناس محمد.. ومحمد دساهو جوة البيت .. والناس لمن جو سألو محمد منه نكر .. اول ما الناس فاتو.. هو قايلهم مشو .. وكانو مشركين ليهم .. طوالي محمد طللع عابد وقفل الباب .. بس ناس الحلة مسكو ليك عابد ..دقوهو دق شديد .. وكانو عايزين يدقو محمد ..بس محمد لبد جوة وابا يفتح ليهم الباب ..
قالت ليها والله مابصدق محمد يعمل كدا ..
قالت ليها يابت الخبر ده منتشر في الحلة.. وفي ناس حاضرين بس انتي تعالي لي يوم في صالحة .. وأنا بخلي اخوي يحكي ليك الحصل بالضبط ..لانو اخوي كان مع الناس الدقو عابد.. وكانو عايزين يدقو محمد لكن لبد مع امه وابا يفتح ليهم الباب الجبان..
ههههه شفتو ياجماعة؟ ده منو؟ اللهو انا .. سبحان الله ..
المهم ياجماعة صفاء بقت بعيدة مني.. كل البعد.. وانا اصلا ماعارف السبب .. وماكنت متوقع ..انو ممكن يكون وصلها كلام بالطريقة دي ..
لكن نحن الحمد لله .. عايشين في مجتمع بتاع وحل ..
والله انا اتعذبت عذاب شديد في الايام دي .. من انو صفاء بتتصرف معاي بالطريقة .. وماعارف الحاصل بالضبط شنو؟ ..قريب بالاسبوع انا لاقادر اكل زي الناس ولا اشرب زي الناس ..
دي البت الوحيدة الانا فكرت يكون عندي معاها علاقة .. تعمل فيني كدا .. وطبعا جاتني وساسوس كتيرة ..
قلت يمكن ابوها غصبها على زياد .. وقلت يمكن لقت ليها انسان احسن مني .. وقارنت وانا فشلت في المقارنة ..
المهم طبعا الزول لمن تقطع منه كدا ..بدون توريهو الاسباب الانت فارقته من اجلها ..بكون عنده نوافذ للخيالات والوسوسة ..والتوقعات التخمينية ..
بس انا كنت مصر اعرف ليه صفاء مابترد على .. ولابترجع لي ..ولا رسالة ماردتها .. اظن رسلت ليها مية رسالة ولا واحدة ..
ياخي السلام عليكم مابتردها ..
يوم فاض بي الوضع ..وقمت اتصلت على ابوها ..
وسلمت عليهو وسألته .. قلت ليهو كيف انت ..وكيف صفاء والله حاولت اتواصل معاها .. لكن كم يوم مالامي فيها ..ان شاء الله ماعندها عوجة ..
قال لي والله كويسة الحمد لله .. انا لمن اصل البيت بخليها تكلمك ان شاء الله ..
برضو ده باب امل اتفتح .. نشوف البحصل شنو؟
وانتظرت للمساء ..ماجاني منها تلفون .. وبكرة وبعدو مافي اي خبر من صفاء ..وانا خلاص ابتديت افقد الامل..
ولي اكتر اسبوع مالاقيت عابد .. ولاعارف الحاصل عليهو شنو؟ .. يوم لاقاني ياسين صاحبنا التالت متذكرنه؟؟
قال لي والله يامحمد طلعت زول جبان لدرجة .. اصلا ماكنا متخيلها فيك .. قلت ليهو ليه؟ .. قال لي ياخي تسمع في الناس يضربو عابد في الشارع ماتطلع تقيف معاهو ..
نحن يا محمد من شفع الشكلة البتحصل بنقيف فيها الاربعة ..مافي زول بتخاذل الحصل ليك شنو؟ خلاك كدا بالطريقة دي ..
قلت ليهو كدي انت سمعت من منو؟ .. قال لي حكا لي عابد ذاته..
قال لي انا كنت في بيت ناس محمد ..لمن طلعت ناس الحلة قايلني حرامي ضربوني ..
ومحمد يسمع في الضرب جمب الباب مافتح الباب جا حجزني .. انا قلت ليهو يا يايسين .. كان تسأل عابد الناس ديل ضربوه في شنو؟
قال لي الناس كذبو فيهو واتهموه .. انو مشى تلب في بيت ناس عزالدين ..
وهو حلف قال ماتلبت ..
قلت ليهو اليصبر الكلب الكذاب .. تلب والله .. وسكوه من البيت لغاية هنا ..
وهو حكى لي القصة براهو ياياسين .. وقال قال..
وانا والله فعلا زعلت من حركته .. والدقة الدقوها ليهو يستاهلا .. انا مابقيف معاهو في الغلط .. انا اصلا غلطان في اني .. اتسترت عليهو في بيتنا .. وهسي ماقادر اقابل الناس .. والله ناس الشارع البغادي ديل قاعد ازوغ منهم .. بس انت ياخوي ليك ولي زمانك .. ماتسمع كلام طرف واحد وتحكم .. لاقيني بي عابد .. ونتكلم رجال التلاتة ..وشوف الصادق من الكذاب ..
قال لي عابد اصلا كذاب انا عارفه ..
وانا والله اليومين ديل مشغوول وماعندي طريقة اسك لي كلام انت موش قلت كدا انا صدقتك انت ..
يعني معقول الناس يكونوا كذابين..
وانت كذاب وهو الصادق المصدوق ..
انسى ياخ انت خبرك شنو؟ قلت ليهو الحمد لله انا كويس ..
قال لي ياخي ولايوم مامشيت تزور صاحبك في السجن؟؟ والله انا كل ما امشي ليهو بسأل منك .. وبتكلم عن بكل خير..
قلت ليهو معليش يا يس انا الملف ده قفلته.. وهسي داير لي طريقة اقفل بيها ملف عابد ..
لكن الحقيقة ياجماعة انا عايز عابد .. محتاجلو جدا .. عايزو يتواصل مع عفراء باي طريقة .. او يديني تلفونها .. انا لازم اتكلم معاها ..عشان توصلني لصفاء والله انا اعصابي تلفت من الحاصل ده ياخ.
اها يوم انا طلعت من المنطقة .. مشيت سوق امدرمان .. من بعيد اشوف ليك عابد .. كوركت ليهو ياعاااابد .. وقف عاين لي زعلان في وشو ظاهر ..مشيت .. قلت سلامات ياخينا ..
رد لي رد مسيخ قال لي مرحب .. وانا حاولت الطف الجو .. قلت ليهو ماشي وين يازول ؟
قال لي عندي مواعيد مع زول في كافتيريا .. قلت ليهو الزول منو العندك معاهو مواعيد؟
قال وانت مالك ياخوي بتحقق معاي؟
انت الفيك اتعرفت .. وانا هسي ماعندي ليك وكت عشان اسلخك .
لكن بلاقيك.. والله طلعت جبان .. كمان جاي تسالني عايز اقابل منو؟
مابكلمك ياخوي داير تسوي شنو؟
بعدين بخشمك قلت لي تاني ماعايز معاك علاقة ولاخوة .. هسي موقفني لشنو؟
قلت ليهو بي ياعابد ياخ اعتبرني غلطان وجاي اعتذر بس هسي انا محتاج ليك وعايزك في خدمة .
قال لي خدمة شنو ؟؟ مع انك مابتستاهل؟؟ لكن انا ماجبان زيك..
قلت ليهو ياخي صفاء دي انا مالامي فيها..ومافي زول ممكن يلمني فيها غير عفراء.. عايزك تتواصل مع عفراء .. باي طريقة وتخليها تلاقيني بصفاء .. عليك الله ياعابد عشان خاطري..
قال لي والله ياخوي نفس الحاصل علي انا عفراء مالامي فيها من يوم الساحة وتلفونها مقفول وماعارف اصل ليها كيف ..
قلت ليهو ياخي اتصرف انا مابعرف ...
قال لي يازول انا بوعدك.. اخدمك في الموضوع ده.. واجمعك بصفاء بس عاهدني.. مهما حصل مافي حاجه تفرقنا ..ياخي نحن عُشْرة عمر .. صاحنا مع بعض وغلطنا مع بعض. وتاني عليك الله لو احتجت ليك ماتخذلني .. وانا يامحمد ماحصل خذلتك والله افديك بدمي
قلت ليهو جدا ياعابد . بعاهدك بس انت لمني في صفاء..
قال لي جدا والله لو بقت في باطن الارض.. ابحتها اجيبها ليك انا كمان في بت بتغلبني اصل ليها اصبر بس ..
قلت ليهو طيب عليك الله انت ماشي مواعد منو الليلة ..
قال لي مودة ههه
اعوذ بالله منك ياخ.. انت شنو يازول مابتوب ولابتتعلم؟ .. قال لي ده الاصرار الانت مابتقدر عليهو .. ماسك لي صفاء صفاء .. ياخي الجلاك جليهو والبنات راقدات ..
قلت ليهو ياخ انا بحب بقلبي يا حمار .. انا ما زيك انت تفكيرك كلو حيواني..
بس عليك الله ماتنسى كلامك ..انت وعدتني انا عايز الاقي صفاء او اتصل اتكلم معاها ,,
المهم الزول المسلط ده.. والله التقول شيطان بس .. يومين بس .. وجاني في البيت بالمساء بعد المغرب ..
قال لي اسمع انا الليلة لميت في صفاء .. ولاقيتها وجها لوجه .. ووعدتني انها ح تتصل عليك الليلة بالليل ..
قلت ليهو اصصصلو مابصدق .. ومسكتو حضنتو بدون ما اشعر .. قلت ليهو والله كلامك ده يطلع صاح.. انت تكون ماقصرت معاي ابدا .. ودي حاجة ما انساها ليك عمري ...
قال لي لكن يا محمد والله في خبر ماحلو .. الزولة دي قالت لي انا محمد ماعندي معاهو علاقة .. وما ناوية ابني معاهو مستقبلي ..
انا قلت ليها انتي ياصفاء بس اتصلي عليهو .. وقولي ليهو الكلام .. لانو هو راجي منك بس مكالمة ..
في الاول رفضت قالت لي ولاعايزة اتكلم معاهو موش انا حرة ؟
لكن انا لمن ضغطتها وافقت .. وقالت بتتصل .. انت غايتو انتظرها ..
وشزف حنكك معاها .. لكن الزولة دي ماااااعارف غايتو .. لكن شكلو حبكم ده من طرف واحد ..
والله ياجماعة بعد مافرحت.. عابد بكلامه الاخير ده ..عمل لي احباط .. لكن انا لو صفاء اتصلت بي.. وفهمت منها ..برتاح شوية.. لكن تمشي كدا بلاخبر الحكاية دي ماكلة معاي جنبة شديد ..
المهم عابد خلاني لاحي لاميت.. وبقيت منتظر تلفون صفاء ياربي ح تتصل .. ولا حيكون زي يوم كلمت ابوها .. لمن قال لي بتتصل عليك وابت تتصل .. اها ياربي الليلة ح اسمع صوتها ولا ح اساهر راجيها للصباح ..
صليت العشاء وقعدت ماسك تلفوني مشحون وراجي اتصال من صفاء ..
والله خايف ومتوتر وحالتي حالة ..
الى اللقاء
